1-2. Apostl Pauluchea udharonnantlean vhoddilank koxi modot mellonk xokta?

 APOSTL Paulu aplea bhav-bhoinnancho khub mog kortalo dekhun tanchi kallji gheunk to khub vavurlo. (Itihas 20:31) Ani hea pasot bhav-bhoinnam pasun tacho khub mog kortalim. Eka vellar Efezantlea vhoddilank te Pauluk porot pollounk xokchenant mhunn kollʼllem tednam “te soglle dukhamnim roddunk lagle.” (Itihas 20:37) Paulu bhaxen aiz pasun vhoddil bhav-bhoinnancho khub mog kortat ani tankam modot korunk apnnachean zata tem soglem kortat. (Filp. 2:16, 17) Punn thodde pavtti vhoddilank oddchonneancho fuddo korcho poddtta. Tor hea oddchonneancho fuddo korunk tankam koxi modot zatoli?

² Vhoddilamnim Pauluchi dekh gheunk zata. (1 Kor. 11:1) Pauluk ainzam bhaxen tank nasli. To opurnn aslo ani sarkem tem korunk taka khub vavr korcho poddttalo. (Rom. 7:18-20) Toxench, taka herui trasancho fuddo korcho poddlo. Tori astana, tannem aplea bhav-bhoinnanchi seva korop bond korunk na, nhoi mhunn apli khuxalkai hogddaunk na. Tor oddchonneo ietat tednam tancho fuddo korunk ani khuxalkaien Jehovachi seva korit ravonk vhoddilamnim Pauluchi dekh koxi gheunk zata tem ami polloum-ia.

3. Hea lekhant ami khoinchea char oddchonneam vixim polloitolim, ani ami anik kitem zannam zatolim?

³ Hea lekhant vhoddilamnim tankam aslolea char oddchonneancho koso fuddo korunk zata tem ami polloitolim. (1) Sobhecheo zobabdareo samballttana tannim porgottnnechem kam koxem korit ravonk zata? (2) Soglea bhav-bhoinnank urba diunk tannim vell koso kaddunk zata? (3) Aplea svotachea unneponnank lagon tannim niraxi zainastana koxem ravonk zata? (4) Ani bhav-bhoinnam opurnn aslear pasun tannim tanchea sangata bore toren koxem vagonk  zata? Tor Paulun hea dor eke oddchonnecho koso fuddo kelo, ani vhoddilamnim tachi dekh koxi gheunk zata tem ami fuddem zannam zaum-ia.

4. Porgottnnechea kamant fuddakar gheunk vhoddilank kiteak kotthin zaunk xokta?

⁴ Hi ek oddchonn kiteak zaunk xokta? Porgottnnechea kamant fuddakar gheunchea sangata vhoddilank anikui zobabdareo astat. Zoxem, choddxea vhoddilank sumanache modle mittingek chairman-acho bhag korcho asta ani Sobhecho Bible Obheas gheuncho asta. Toxench, tankam anikui bhaxonnam diunchim astat. Ani vhoddilank sobhechea sevokank proxikxonn diunchi pasun zobabdari asta. Toxench, tannim sobhentlea bhav-bhoinnank urba diunk zai. (1 Ped. 5:2) Tea bhair, thoddea vhoddilank, Raj-ghoram ani songottnnechim her bandkamam korpachim ani tim samballpachi zobabdari asta. Punn sobhentlea soglea porgottnnaram bhaxen porgottnnechem kam eka vhoddilak ekdom mhotvachem zaun asa.—Mt. 28:19, 20.

5. Paulu porgottnnechem kam kiteak korit ravonk pavlo?

⁵ Paulun kitem kelem? Filipkarank 1:10-nt, Paulun to porgottnni kiteak korit ravonk pavlo tem sanglem. Tannem mhunnttlem: “Kitem odik borem tem tumi sodanch vinchun kaddunk pavum.” Paulun svota ho solʼlo apnnailo. Taka porgottnni korchi zobabdari asli ani tannem khub vorsam porian hea kamak sogleam-von chodd mhotv dilem. To ‘sobhe mazar ani ghor-ghoramnim’ vochon porgott kortalo. (Itihas 20:20) Hem porgottnnechem kam to sumanachea ekuch disak vo disachea umkeach vellar korinaslo, punn apleak melltta ti dor ek sondhi to uzar kortalo. Udharonnak, to Aten xarant aplea ixttanchi vatt polloitalo tednam thoinchea thoddea famad lokank tannem porgott kelem. Ani tantuntlea thoddea zannamnim tachem borem korun aikolem. (Itihas 17:16, 17, 34) Toxench, to “bondkhonnint” aslo tednam taka mellonk ietale tankam tannem porgott kelem.—Filp. 1:13, 14; Itihas 28:16-24.

6. Paulun dusreank koslem proxikxonn dilem?

⁶ Paulun dusreank proxikxonn diunk aplea vellacho ekdom boro upeog kelo. Porgottnnent voitana tannem dusreank aplea sangata apoile. Udharonnak, aple poile mixinori bhonvddent tannem Juanv Markuk apoilo. Ani tache dusre mixinori bhonvddent tannem Timotak aplea sangata vhelo. (Itihas 12:25; 16:1-4) Toxench, sobhentlim veg-vegllim kamam koxim samballchim, gonvlli bhett koxeo korcheo ani bore xikoupi koxe zaunche, tea vixim tankam xikounk tannem apleachean zata tem soglem kelem.—1 Kor. 4:17.

7. Efezkarank 6:14, 15-nt sanglolim Pauluchim utram vhoddilamnim koxim pallunk zatat?

⁷ Vhoddilamnim Paulu thaun kitem xikonk zata? Vhoddilamnim ghor-ghoramnim porgottnni korchea sangata, Paulu bhaxen porgott korunk apleak melltta ti dor ek sondhi uzar  korunk toiar asonk zai. (Efezkarank 6:14, 15 vachat.) Udharonnak, te bazarant voitat tednam vo te kam kortat tea zagear tannim dusream lagim ulounk zata. Toxench, te Raj-ghorachea bandkamant modot kortat tednam thoim sorvbhonvtim ravtolea lokam lagim tannim ulounk zata, vo te bandkamachem koslem-i saman viktem gheunk voitat tednam tannim tea munxam lagim ulounk zata. Tea bhair, vhoddilamnim porgottnnent vell sartana, Paulu bhaxen dusreank, toxench sobhechea sevokank pasun proxikxonn diunk zata.

8. Thodde pavtti vhoddilank kitem korunk poddot?

⁸ Vhoddilamnim sorkitt vo sobhechea kamamnim itle bizi zaunk zaina ki uprant porgottnnechem kam korunk tankam velluch mellona. Oxem zaina zaunk, thodde pavtti eka vhoddilak anik zobabdareo mellttat tednam na mhunnonk poddot. Tor kosli-i zobabadari gheunche poilim vhoddilamnim magnnem korun, apleak dor sumanak kuttumbik bhokti korunk, urben porgottnni korunk ani porgottnni koxem korchem tea vixim aplea bhurgeank xikounk vell astolo kai na tem chintunk zata. Punn thoddea vhoddilank, na mhunnonk ghoddie kotthin zata astolem. Tea vellar, apleak asloleo sogleo zobabdareo bore bhaxen samballunk vhoddil apleachean zata tem soglem kortat, hem Jehova somzota mhunn tannim khatri dovrunk zata.

9. Khubxeo zobabdari samballpi vhoddilank kitem korunk kotthin zaunk xokta?

⁹ Hi ek oddchonn kiteak zaunk xokta? Hea nimannea disamnim amkam sogleank zaitea trasancho fuddo korunk poddtta. Ani amchea modlea dor ekleak, urba, bhuzvonn ani modotichi goroz asa. Toxench, thodde pavtti, thoddea bhav-bhoinnank chukiche vatten vochona zaunk modot zai poddtta. (1 Tes. 5:14) Tor bhav-bhoinnank fuddo korunk poddttat te sogle tras vhoddil kaddun uddounk xokonant tem khorem. Tori astana aplea xelliank urba diunk ani tanchi rakhonn korunk vhoddilamnim tanchean zata tem soglem kelolem Jehovak zai. Tor khubxeo zobabdari samballpi vhoddilamnim bhav-bhoinnank goroz ti modot diunk vell koso kaddunk zata?

10. 1 Tesalonikekarank 2:7-a pormonnem, Paulun Jehovachea lokanchi kallji koxi ghetli?

¹⁰ Paulun kitem kelem? Aplea bhav-bhoinnank xabaski ani urba diunk Paulu sodanch toiar aslo. Paulun bhav-bhoinnank apunn toxench Jehova tancho mog korta mhunn tankam khatri dili. (2 Kor. 2:4; Ef. 2:4, 5) Ani tanchea sangata vell sarun tannem tankam aple ixtt koxe lekhle. Apleo oskotai-o ani uskeam vixim ukteponnim tanchea sangata uloun taka tancher visvas aslo mhunn tannem dakhoilem. (2 Kor. 7:5; 1 Tim. 1:15) Paulun apleachech oddchonneancher chodd dhean diunk na. Punn to tachea bhav-bhoinnank modot korunk sodhtalo. Tor aiz vhoddilamnim pasun Pauluchi dekh gheun aplea bhav-bhoinnam sangata doiall ani mogall toren vagonk zai.—1 Tesalonikekarank 2:7 vachat.

11. Paulun bhav-bhoinnank kiteak solʼlo dilo?

¹¹ Thodde pavtti, Pauluk aplea bhav-bhoinnank solʼlo diuncho poddlo. Punn to solʼlo tannem bejar zaun vo ragan diunk na. Tachea  bodlek to aplea bhav-bhoinnancho mog kortalo ani tim trasant poddlolim taka naka aslim dekhun tannem tankam solʼlo dilo. Toxench, tankam somzonk ani manun gheunk sompem zata tea ritin tannem tankam solʼlo dilo. Udharonnak, Korintkarank boroilʼle chittint Paulun tankam khor solʼlo dilo. Punn uprant tannem Titak tea sobhent dhaddlo. Karonn bhav-bhoinnamnim to solʼlo koso ghetlo tem to zannam zaunk sodhtalo. Ani tannim tacho solʼlo manun ghetlo ani to apnnailo hem zannam zaun to ekdom khuxal zalo.—2 Kor. 7:6, 7.

12. Bhav-bhoinnancho bhavarth ghott korunk vhoddilamnim kitem korunk zata?

¹² Vhoddilamnim Paulu thaun kitem xikonk zata? Vhoddilamnim Pauluchi dekh gheun bhav-bhoinnam sangata vell sarunk zata. Hem korunk ek vatt mhunnttlear tannim mittingek begin ieun bhav-bhoinnank urba melltta tea toren tanche lagim ulounk zata. Hem korunk ghoddie chodd vell lagona. Toxench, vhoddilamnim anik ek toren Pauluchi dekh gheunk zata. Tem mhunnttlear, tannim Devachem Utor uzar korun bhav-bhoinnacho bhavarth ghott korunk zata. (Rom. 1:12; Ef. 5: 16) Ani toxench apunn ani Jehova pasun tancho mog korta mhunn tankam khatri diunk zata. Vhoddilamnim bhav-bhoinnam sangata ulounk sodanch vell kaddunk zata ani tankam xabaski diunk sondhi sodhunk zatat. Tea bhair, vhoddilank solʼlo diunk poddtta tednam tannim to Devachea Utracher adarit spoxtt ritin diunk zai. Punn tea bhavan vo bhoinnin to solʼlo apnnailʼlo tankam zai dekhun te to solʼlo doiall toren ditat.—Gal. 6:1.

13. Svotachea unneponnam vixim eka vhoddilak koxem disonk puro?

¹³ Hi ek oddchonn kiteak zaunk xokta? Vhoddil opurnn aslolean te-ui chuki kortat. (Rom. 3:23) Thodde pavtti aplea unneponnam vixim sarkem chintop dovrunk vhoddilank ghoddie kotthin zaunk xokta. Thodde vhoddil aplea unneponnam vixim itlem chintʼtat ki te niraxi zaunk xoktat. Punn thodde vhoddil apleo chuki vo unneponnam manun ghenant, ani tannim koslich sudharnni korchi goroz na oxem tankam dista.

14. 2 Korintkarank 4:7-a pormonnem, Paulu khalto aslolean kitem korunk pavlo?

¹⁴ Paulun kitem kelem? Paulu khalto aslo. Hea pasot aplea oskotai-encher zoit vhoronk to svotacher patieunche bodlek, Jehovacher patieun ravlo. Kristanv zaunchea poilim, Paulu Jezuchea xisank dhumallo ditalo. Punn uprant apnnem kelʼlem tem chukichem aslem mhunn taka kollon ailem. Ani tannem aplea sobhavant bodol kelo. (1 Tim. 1:12-16) Jehovache modotin to ek doiall, mogall ani khalto vhoddil zaunk pavlo. Apleak zaitim unneponnam asat mhunn to zannam aslo. (Rom. 7:21-25) Punn to teach vixim chintit ravonk na. Jehova apleak bhogxitolo mhunn to  zannam aslo. Toxench, apunn kednanch chuki korchona oxem tannem chintunk na. Punn aplea sobhavant bodol korunk to proitn korit ravlo. Ani apnnak dilolem kam korunk to khaltikaien Jehovacher patieun ravlo.—1 Kor. 9:27; 2 Korintkarank 4:7 vachat.

15. Vhoddilamnim kitem ugddas dovrunk zai?

¹⁵ Vhoddilamnim Paulu thaun kitem xikonk zata? Vhoddil poripurnn asonk zai mhunn Jehova opekxa korina. Punn tannim apleo chuki manun gheun sudharnni keloli Jehovak zai. (Ef. 4:23, 24) Tor tannim khoim sudharnni korunk zai tea vixim zannam zaunk Devachea Utracher obheas korunk zai ani goroz te bodlav korunk zai. Tannim oxem kelem zalear Jehova tankam khuxal ravonk ani ek boro vhoddil zaunk modot kortolo.—Jak. 1:25.

16. Vhoddilamnim bhav-bhoinnanchea oskotai-encher vo chukincher dhean dilem zalear kitem zaunk xokta?

¹⁶ Hi ek oddchonn kiteak zaunk xokta? Vhoddil sobhechea bhav-bhoinnam sangata khub vell sartat vo tanchea sangata kam kortat tednam bhav-bhoinnancheo oskotai-o vo chuki tankam anik bariksannen dixtti poddonk xoktat. Tor ek vhoddil chotur na zalear to hea karonnak lagon bhav-bhoinnancher bejar zaunk xokta, tankam vaitt dista tea toren tanchea sangata vagonk xokta, vo tanche vixim tachea monant chukichem chintop asonk xokta. Ani vhoddilamnim oxench kelʼlem Soitanak zai. Paulun pasun heach vixim xittkavnni dilʼli.—2 Kor. 2:10, 11.

17. Aplea bhav-bhoinnam vixim Paulun kitem monant dovorlem?

¹⁷ Paulun kitem kelem? Paulu aplea bhava-bhoinnam vixim sodanch borem chintʼtalo. Tim chuki kortat mhunn to zannam aslo. Karonn thodde pavtti tannim taka pasun dukhoilo. Punn eka munxan chuk keli dekhun to vaitt munis nhoi mhunn Paulu zannam aslo. To aplea bhav-bhoinnancho khub mog kortalo. Ani hea pasot tanchea borea gunnancher tannem dhean dilem. Tor eka bhavak vo bhoinnik sarkem tem korunk kotthin zata zalear, tim borem tem korunk proitn kortat ani tankam fokot modotichi goroz asa mhunn Paulun somzon ghetlem.

18. Paulu, Euodie ani Sintike sangata koso vaglo tachea thaun tumi kitem xiklim? (Filipkarank 4:1-3)

¹⁸ Filipintlea sobhentlea don bhoinnam sangata Paulu koso vaglo tachem udharonn polloum-ia. (Filipkarank 4:1-3 vachat.) Tea sobhentlim, Euodie and Sintike modem vad-vivad zalo, ani hea pasot tim eka-meka sangata uloinaslim. Punn tea vellar, Paulu tancher ragar zaunk na, nhoi mhunn tanchi nit korunk na. Punn tanchea borea gunnancher tannem dhean dilem. Tim zaitim vorsam Jehovachi seva kortalim ani Jehova pasun tancho khub mog kortalo mhunn Paulu zannam aslo. Hea soglea karonnank lagon tanche modem xanti korunk Paulun tankam urba dili. Ani hea toren, Paulu dusreanchea borea gunnancher dhean ditalo dekhun to tea sobhentlea bhav-bhoinnam sangata bori ixttagot samballunk pavlo ani khuxal ravonk pavlo.

19. (a) Vhoddilamnim bhav-bhoinnanchea borea gunnancher dhean diunk kitem korunk zai? (b) Raj-ghor nitoll korpi vhoddil aslolea tea chitrantlean tumi kitem xikonk zata?

 ¹⁹ Vhoddilamnim Paulu thaun kitem xikonk zata? Paulu bhaxen vhoddilamnim bhav-bhoinnanchea borea gunnancher dhean diunk zai. Ami soglim opurnn asat tem khorem. Punn amchea modlea dor-ekleak bore gunn pasun asat. (Filp. 2:3) Toxench vhoddilank vella-vellar bhav-bhoinnank solʼlo diunk poddot. Punn tannim bhav-bhoinnanchea chukincher dhean diunchea bodlek, Paulu bhaxen, tim Jehovacho kitlo mog kortat, tachi seva korunk kitlo vavr kortat, ani tim borem korunk xoktat hacher dhean diunk zai. Tor vhoddil bhav-bhoinnanchea borea gunnancher dhean ditat tednam te sobhent xanti ani ekvott samballunk pavtole.

20. Paulu vixim xikot ravonk vhoddilamnim kitem korunk zata?

²⁰ Apostl Paulu vixim xiklolean vhoddilank modot zaunk xokta. Oxem korunk vhoddilamnim Watch Tower Publications Index-ant, “Paul” hea vixoi-a khala, “example for elders” hantunt dilʼle lekh pollounk zatat. He lekh vachtat tednam vhoddilamnim apleakuch ho prosn vicharunk zata: ‘Vhoddil mhunn seva kortana, ti khuxalkaien korunk Pauluchea udharonnantlean mhaka koxi modot mellonk xokta?’

21. Vhoddilamnim kosli khatri dovrunk zata?

²¹ Vhoddilamno ugddas dovrat, tumi poripurnn asonk zai mhunn Jehova sangona. Punn tumi visvaxi aslole Jehovak zai. (1 Kor. 4:2) Paulun khub vavr kelo ani to visvaxi aslo. Ani hea pasot Jehova khub khuxal aslo. Tor tumi pasun kortat to vavr polloun Jehova khub khuxal asa mhunn khatri dovrat. “Tachea Nanvacho man rakhun tumi mog dakhoila to, bhoktank tumi adar dila ani ozun tumi adar diit asa to, hem sogllem tumi kelam tem” Jehova kednanch visorchona.—Heb. 6:10.