1, 2. ¿Jameerü nakuwaʼipa na laülaashiikana nashatüle nukuwaʼipa Pablo?

 CHI ALUWATAAUSHIKAI Pablo aishii nüpüla na anoujashiikana, müshijeseʼe niʼyataain maʼin napüleerua (Aluw. 20:31). Aishijeseʼe nia napüla. Soʼu wanee kaʼi, natüjaapa saaʼu na laülaashii chajanakana Éfeso müichiain nnojolin neʼrüin nüchikuaʼa Pablo, aʼyalajüshii naya (Aluw. 20:37). Maaʼulu yaa, na laülaashiikana aishii napüla na wawalayuukana jee nakaalinjain naya maʼaka naaʼinrüin shia Pablo (Filip. 2:16, 17). Eepejeʼe waneirua kasa kapüleʼewaika aaʼujee tü naʼyataainkat. ¿Kasa eeka süpüla naaʼinrüin?

² Wainma maʼin naʼyataain na laülaashiikana, müsüjeseʼe anain maʼin nashatüle nukuwaʼipa Pablo (1 Cor. 11:1). Nnojoishi wayuuin pülashin Pablo. Süka nnojoluin lotuin maʼin nukuwaʼipa eesia tü nüchecherüinjatkalü oulia naaʼin (Roma 7:17-20). Mayaainjeʼe wainmain tü kasa alatakat nümüin nnojotsü amalajaain naaʼin, ayatüshia aʼyataain nia sümaa talatüin naaʼin. Müleka nashatüle na laülaashiikana tü nukuwaʼipakat, eeshii süpüla ayatüin naʼyataain nümüin Jehová sümaa talatüin naaʼin. Wekirajaa sünain tü naaʼinrajatkat.

3. (1) ¿Kasa wekirajaainjatka anain sünain ekirajaayakat tüü? (2) ¿Kasa wayaawateetka aaʼu sünainjee tia?

³ Sünain ekirajaayakat tüü, wekirajaajeerü anain pienchisü kasa kapüleeka aaʼujee namüin na laülaashiikana naʼyataain sümaa talatüin naaʼin: (1) masetaainre kaʼi napüla süpüla naküjain pütchi saaʼujee waneirua kasa naaʼinrajatka, (2) choʼujaale nakatalüinjanain kaʼi süpüla natütüleʼerüin waaʼin, (3) mojule naaʼin sutuma tü kasa mojukat natuma otta (4) nnojorüle nachecherüin naaʼin suulia tü mojukat natuma na waneinnua. Wekirajaajeerü anain tü naaʼinrakat Pablo süpüla nülatüin süchikumüin  tia otta tü naaʼinrajatkat na laülaashiikana süpüla nashatüin nukuwaʼipa.

4. ¿Kasa kapüleeka aaʼujee namüin na laülaashiikana anain nakuwaʼipa napüleerua na wawalayuukana sünain aküjaa pütchi?

⁴ Tü kapüleekalü aaʼujee. Anainjatü maʼin nakuwaʼipa na laülaashiikana napüleerua na wawalayuukana süpüla naküjain pütchi, eepejeʼe waneirua kasa naaʼinrajatka. Eeshii shikiipüʼüwaire naya tü outkajawaakat Wakuwaʼipa otta Waʼyataain nümüin Maleiwa jee shiale noʼunirüin sukuwaʼipa tü Ekirajawaakat sünain tü Bibliakat namaa na wawalayuukana. Eesü saapünüle namüin wanee pütchi süpüla nekirajüinjatüin sünain tü outkajawaakat. Eeshii nekirajüinjanale na aʼyataakana neʼipajee otta natütüleʼerüinjatüle naaʼin na wawalayuukana (1 Ped. 5:2). Eeshii na akaalinjakana sünain akumajaa Piichi Outkajaalee jee waneirua piichi eere nuʼwaajünüin Jehová sümaa naaʼinmajüin shia. Shiapejeʼe naaʼinmaainjatüin tü aküjaakat pütchi maʼaka naaʼinrüin shia na wane wawalayuukana (Mat. 28:19, 20).

5. ¿Jamüsü anaka nukuwaʼipa Pablo sünain aküjaa pütchi napüleerua na anoujashiikana?

⁵ Tü naaʼinrakat Pablo. Anasü maʼin nukuwaʼipa Pablo sünain aküjaa pütchi sünainjee naaʼinrüin tü sümakat Filipos 1:10 (TNM), müsü yala: «Süpüla jaaʼinmaainjatüin maʼin tü kasa alanaʼaleekat suluʼu anain». Aapünüsü nümüin tü aʼyatawaakat sünain aküjaa pütchi otta kojutusü nümüin waneepia tia aʼyatawaakat, aküjashi pütchi eepünaale nia jee sainküin miichi (Aluw. 20:20). Nnojoishi neʼe aküjain pütchi soʼu tü kaʼi nüneekakat süpüla tia, aküjashia pütchi eepünaale nia. Soʼu wanee kaʼi, sümaʼinruʼu chajachin naʼatapajüin na naʼaleewainyuukana chaa Atenas, aküjashi pütchi Pablo namüin waneinnua wayuu eʼnnaajünakana maʼin. Eeshii noʼutku naya wayuukana aapajakana tia pütchikat (Aluw. 17:16, 17, 34). Akaʼaya soʼu püreesain nia suluʼu wanee piichi, aküjashi pütchi namüin na wayuu antakana nünainmüin jee na yalajakana nümaa (Aluw. 28:16-24; Filip. 1:13, 14).

6. ¿Kasa naaʼinrapuʼuka Pablo süpüla nekirajüin waneinnua anoujashii?

⁶ Najayatapuʼuin Pablo tü kaʼikat. Nuunejaapuʼuin waneinnua anoujashii nümaa süpüla naküjain pütchi. Soʼu tü palajatkat nukua sünain aküjaa pütchi wattapünaa, nuunejaain Juan Marcos otta soʼu tü piantuakat nukua nümaashi Timoteo (Aluw. 12:25; 16:1-4). Nikirajüin maʼin naya Pablo süpüla natüjainjatüin süpüleerua sukuwaʼipa tü aainjünüinjatkat suluʼu tü outkajaaleekat, süpüla naaʼinmajüinjanain na anoujashiikana otta süpüla natüjainjanain ekirajaa (1 Cor. 4:17).

7. ¿Jamüsü süpüla naaʼinrüin na laülaashiikana tü nümakat Pablo suluʼu Éfeso 6:14, 15?

 ⁷ Watüjaka. Na laülaashiikana eesü süpüla nashatüin nukuwaʼipa Pablo naküjale pütchi eepünaale naya (paashajeʼera Éfeso 6:14, 15). Eesü süpüla naaʼinrüin tia noʼunapa sünain ayaʼlajaa jee aʼyatawaa. Otta müsia jiʼyataale sünain akumajaa wanee piichi aʼwaajülee Maleiwa, eeshii süpüla jüküjain pütchi namüin na kepiakana süʼütpünaa otta müsia namüin na eʼikajaakana wanee kasa sünain tia aʼyatawaakat. Maʼaka naaʼinrüin shia Pablo, eeshii süpüla nekirajüin na waneinnua naküjapa pütchi namaa maʼaka naaʼin na aʼyataakana neʼipajee na laülaashiikana.

8. ¿Kasa eeka süpüla naaʼinrüin wanee laülaashi süpüla anain sukuwaʼipa tü niʼyataainkat?

⁸ Nnojotsü anain nnojorüle naaʼinmaain maʼin aküjaa pütchi na laülaashiikana sutuma wainmain maʼin naʼyataain. Süpüla anainjatüin maʼin sukuwaʼipa naʼyataain eesü kaʼi «nnojo», nameetka oʼu suchuntunule namüin naaʼinrüinjatüin wanee kasa. Sülatüle tia nümüin wanee laülaashi eeshi süpüla naashajaain nümaa Jehová süchiki tia. Eesüjaʼa niyaawatüle saaʼu nnojoleerüin naaʼinmaain waneirua kasa anaka saapünüle nümüin sooʼomüin aʼyatawaa, maʼaka saaʼin nuʼwaajüin Maleiwa sümaa nüpüshi semaanawai, nujuʼituin sünain aküjaa pütchi otta nikirajüin nüchonnii sünain aküjaa pütchi. Eeshii noʼutku laülaashii kapüleekana amüin «nnojo» sümüin wanee aʼyatawaa aapünaka namüin. Nütüjaapejeʼe saaʼu Jehová aneein natuma sukuwaʼipa süpüshuaʼa tü naʼyataainkat.

9. Süka wainmain maʼin tü kasa naaʼinrakat na laülaashiikana, ¿kasa kapüleeka namüin?

⁹ Tü kapüleekalü aaʼujee. Süka kepiain waya sükalioʼu sajaʼttajatüin kasakat süpüshuaʼa, wainma kasa alataka wamüin wayakana aʼyataakana nümüin Jehová. Müsüjeseʼe choʼujaain wamüin sütütüleʼennüin waaʼin otta sümüliannüin waaʼin. Eeshii na choʼujaakana amüin naashajaanüin amaa suulia sumojujaain nakuwaʼipa (1 Tes. 5:14). Nnojotsü süpüla nasünneʼerüin süpüshuaʼa tü kasa mojusü alatakat wamüin na laülaashiikana, keeʼireepejeʼe naaʼin Jehová natütüleʼerüin waaʼin jee naaʼinmajüin waya. Süka wainmain maʼin tü kasa naaʼinrajatkat, ¿kasache naaʼinrajatka süpüla nakaalinjain na wawalayuukana?

10. Sünainjee tü sümakat 1 Tesalónica 2:7, ¿jamapuʼusü nukuwaʼipa Pablo namüin na nuwalayuukana?

¹⁰ Tü naaʼinrakat Pablo. Nüchajaapuʼuin sukuwaʼipa süpüla nüküjain pütchi analuʼut namüin na nuwalayuukana jee nütütüleʼerüin naaʼin. Anasü nashatüle nukuwaʼipa Pablo na laülaashiikana wanaa sümaa naküjain pütchi analuʼut namüin na wawalayuukana (paashajeʼera 1 Tesalónica 2:7). Nüküjain Pablo namüin na nuwalayuukana alin naya nüpüla Jehová otta alin naya nüpüla (2 Cor. 2:4; Éf. 2:4, 5). Naʼaleewainyuu naya Pablo jee nümaashii naya, nüküjain namüin tü mmotkalü eema nia otta tü kasa mojukat nutuma (2 Cor. 7:5; 1 Tim. 1:15). Nnojotsü shiain naaʼinmaain tü alatakat nümüin, shia naaʼinmaaka nükaalinjain na nuwalayuukana.

11. ¿Jamüshi nüchiaapuʼuka Pablo na nuwalayuukana?

 ¹¹ Eeshii nüchiaʼawaire Pablo na nuwalayuukana. Nnojotsü naaʼinrüin tia süka jashichin nia namüin, naaʼinrüin tia süka alin naya nüpüla otta nükaalinjeein naya suulia mojuin nakuwaʼipa. Nüchajaain sukuwaʼipa Pablo süpüla nayaawatüin saaʼu na nuwalayuukana jamüin nüchiaaka naya otta nütüjawee aaʼu jamapuʼuin naaʼin süka nüchiaain naya. Jamüsüjaʼa wanaa sümaa nüshajüin wanee karaloʼuta namüin na corintojeʼewaliikana, nüchiaain naya. Shiasaʼa mapa, nüjütüin Tito namaʼanamüin süpüla nütüjaain saaʼu müleka naapaale sümaa tü nüchiaakalü oulia naya. Talatakajasaʼa naaʼin Pablo nütüjaapa saaʼu naapaain sümaa tia (2 Cor. 7:6, 7).

12. ¿Kasa naaʼinrajatka na laülaashiikana süpüla natütüleʼerüin naaʼin na wawalayuukana?

¹² Watüjaka. Eesü süpüla nashatüin nukuwaʼipa Pablo na laülaashiikana namaale naya na wawalayuukana. Wanee sukuwaʼipa süpüla naaʼinrüin tia shia nantüle maalü sünain tü outkajawaakat süpüla natütüleʼerüin naaʼin na wawalayuukana. Jaʼitashii yootule motsomüin nümaa wanee wawala, eeshii süpüla natütüleʼerüin naaʼin (Roma 1:12; Éf. 5:16, TNM). Na laülaashii ashatakana nukuwaʼipa Pablo, natütüleʼerüin naaʼin na wawalayuukana otta naküjain alin naya nüpüla Jehová sükajee tü sümakat tü Bibliakat. Yootowaire na laülaashiikana namaa na wawalayuukana, natüjaweerü aaʼu alin naya napüla. Anasü jülüjale naaʼin tü kasa anasü naaʼinrakat na wawalayuukana süpüla naküjain shia namüin. Müleka nüchiaainjachire wanee laülaashi wanee wawala, naaʼinrüinjatü tia wanaapünaa sümaa tü sümakat tü Bibliakat. Süka keeʼireein naaʼin naapaainjatüin chi wawalakai sümaa tü nachiaakalü oulia nia, lotuinjatü nanüiki otta nnojoluinjatü airuʼuluin nanüiki nümüin (Gal. 6:1).

13. ¿Kasa eeka süpüla jülüjain naaʼin wanee laülaashi süchiki tü kasa mojukat nutuma?

¹³ Tü kapüleekalü aaʼujee. Süka nnojoluin lotuin maʼin nakuwaʼipa na laülaashiikana, eesia tü mojukat natuma (Roma 3:23). Eeshii waneinnua laülaashii mojushaatakana aaʼin sutuma jülüjain naaʼin tia. Eetaashii na nnojoliikana jülüjain naaʼin tü mojukat natuma, jülüjasü naaʼin nnojoluin choʼujaain nanouteʼerüin tü naaʼinrakat.

14. Saashin Filipos 4:13, ¿kasa niyaawataka aaʼu Pablo süka nnojoluin yaletüin naaʼin?

¹⁴ Tü naaʼinrakat Pablo. Nütüjaa aaʼu Pablo choʼujaain nükaalinjünüin süpüla nunouteʼerüin tü nukuwaʼipakat, nütüjaa aaʼu choʼujaain nükaalinjainjachin nia Maleiwa. Nnojoluiwaʼaya nunoujain Pablo, müliapuʼushii nutuma na anoujashiikana. Shiasaʼa mapa, niyaawajaaka suulia tü naainjalakat, nunouteʼerüin tü jülüjakat naaʼin otta tü nukuwaʼipakat (1 Tim. 1:12-16). Süka nükaalinjain nia Jehová aipüraishi  nia wayuu, amüliajüishi otta nnojotsü pülayaain naaʼin. Aisü nümüin tü kasa mojusü naaʼinrapuʼukat paala, niʼitaapejeʼe naaʼin nünain Jehová sünain motuin naaʼin tü naainjalakat jee nnojotsü jülüjakuʼu müin naaʼin tü kasa mojusü naaʼinrapuʼukat (Roma 7:21-25). Süka nnojoluin yaletüin naaʼin nütüjaa aaʼu nnojoluin lotuin maʼin nukuwaʼipa, aʼyataashi maʼin nia süchiirua süpüla nunouteʼerüin nukuwaʼipa otta nuuʼulaain nükaalinjain nia Jehová süpüla nikeraajüin tü aküjaakat pütchi (1 Cor. 9:27; paashajeʼera Filipos 4:13, TNM).

15. ¿Kasa naaʼinrajatka na laülaashiikana süpüla pansaain tü jülüjakat naaʼin süchiki tü mojukat natuma?

¹⁵ Watüjaka. Nnojoishii aneekünüin na wawalayuukana süpüla laülaashin naya saaʼujee lotuin maʼin nakuwaʼipa. Keeʼireepejeʼe naaʼin Jehová nayaawatüinjatüin saaʼu tü mojukat natuma otta neeʼiratüinjatüin nakuwaʼipa (Éf. 4:22-24). Anasü nasakireʼerüle naaʼin sünain tü nanouteʼerüinjatkat sünain nakuwaʼipa sükajee tü sümakat tü Bibliakat jee neeʼiratüinjatü shia. Müshiijeseʼe nükaalinjain naya Jehová süpüla talatüin naaʼin otta anain maʼin tü naʼyataainkat (Sant. 1: 25).

16. ¿Kasa alateetka jülüjale neʼe naaʼin na laülaashiikana tü kasa mojukat natuma na wawalayuukana?

¹⁶ Tü kapüleekalü aaʼujee. Eesü süpüla neʼrüin na laülaashiikana tü mojukat natuma na wawalayuukana naʼyataajiraapa namaa. Jülüjale maʼin naaʼin tia, shapaajeerü maʼin naaʼin otta nayoujeena naya. Nüküjain Pablo shiain keeʼireein naaʼin tia Satanaa (2 Cor. 2:10, 11).

17. ¿Kasa jülüjapuʼuka naaʼin Pablo nachiki na nuwalayuukana?

¹⁷ Tü naaʼinrakat Pablo. Jülüjapuʼusü naaʼin Pablo tü kasa anasü naaʼinrakat na nuwalayuukana. Naaʼinrüin tia mayaainjeʼe aiwalin nümüin tü naainjakat. Nütüjaapejeʼe saaʼu Pablo naaʼinrüle wanee anoujashi wanee kasa mojusü, nnojotsü shiain saaʼujee mojulaain nia. Aishii nüpüla na nuwalayuukana otta jülüjasü naaʼin tü anakat sünain nakuwaʼipa. Niʼrapa tü naaʼinrakat maʼin wanee anoujashi süpüla nunouteʼerüin nukuwaʼipa, jülüjasü naaʼin nnojoluin naainjeein tü kasa mojusü naainjakat otta choʼujaain nükaalinjünüin.

18. ¿Kasa watüjaka sünainjee tü naaʼinrakat Pablo süpüla nükaalinjain Evodia sümaa Síntique? (Filipos 4:1-3).

¹⁸ Wekirajaa süchiki tü naaʼinrakat Pablo süpüla nükaalinjain piamasü anoujasü chajanakana Filipos (paashajeʼera Filipos 4:1-3). Mojujiraasü Evodia sümaa Síntique saaʼujee wanee kasa alataka namüin, nnojoishi jashichin Pablo namüin otta nnojoishii niyoujüin naya. Shia jülüjaka naaʼin tü anakat sünain nakuwaʼipa otta tü naaʼinrakat süpüla waneepiain naya nümaa Maleiwa. Nütüjaa aaʼu alin naya nüpüla Jehová. Süka jülüjain naaʼin tia, nütütüleʼerüin naaʼin süpüla anajiraainjanain nachikuaʼa. Süka naaʼinrüin tia Pablo, aʼyataashi nia nümüin Maleiwa sümaa talatüin naaʼin otta ayatüshi nia aleewain namaa na anoujashii chajanakana Filipos.

19. (1) ¿Kasa naaʼinrajatka na laülaashiikana süpüla anain tü jülüjakat naaʼin nachiki na wawalayuukana? (2) ¿Kasa pütüjaka nünainjee chi laülaashi epitajakai Piichi Outkajaalee suluʼuka tü ayaakuaakat?

 ¹⁹ Watüjaka. Jia laülaashiikana, jülüja jaaʼin tü kasa anasü eekat sünain nakuwaʼipa na wawalayuukana. Mayaainjeʼe nnojoluin lotuin maʼin nakuwaʼipa, wainma tü kasa anasü naaʼinrakat (Filip. 2:3). Eejeetpejeʼe wanee kaʼi jüchiaainjachika oʼu wanee wawala. Jaaʼinrüinjatüle tia jülüjainjatü maʼin jaaʼin tü kasa anasü naaʼinrakat na wawalayuukana suulia tü mojukat natuma, maʼaka saaʼin alin Jehová napüla, ayatüin naʼyataain nümüin Maleiwa soʼunnaa tü alatakat namüin otta eein süpüla nanouteʼerüin nakuwaʼipa. Na laülaashii aaʼinrakana tia, anasü nakuwaʼipa na wawalayuukana natuma, jama aijiraain naya.

20. ¿Kasa naaʼinrajatka na laülaashiikana süpüla nekirajaain sooʼomüin süchiki tü naaʼinrakat Pablo?

²⁰ Anasü maʼin nekirajaale sooʼomüin na laülaashiikana süchiki nukuwaʼipa Pablo. Eesü süpüla jüchajaain süchiki suluʼu Índice de las publicaciones Watch Tower eere sümüin «Pablo» otta süchikijee «ejemplo para los ancianos». Sümaʼinruʼu jikirajaain sünain tia pütchikalüirua, jüsakireʼera jaaʼin sünain tüü: «¿Jamüsü talateetka taaʼin sünain laülaashin taya tashatüle nukuwaʼipa Pablo?».

21. ¿Kasa nnojoluinjatka motuin naaʼin na laülaashiikana?

²¹ Jia laülaashiikana, soto jaaʼin nütüjaain saaʼu Jehová nnojoluin lotuin maʼin jukuwaʼipa, keeʼireepejeʼe maʼin naaʼin waneepiain jia nümaa (1 Cor. 4:2). Kojutusü nümüin Jehová süpüshuaʼa tü naaʼinrakat Pablo süpüla waneepiainjachin nia nümaa. Anasü jütüjaale saaʼu kojutuin nümüin tü jaaʼinrakat, süküjain Hebreokana 6:10 «nnojoleerüin motüin naaʼin tü kasa anasü jaaʼinrakat jiiʼiyatakat aka nümüin tü naaliikat jüpüla. Sotüshii jia naaʼin sünain jiʼyataain paala je sünain ayatüin jia aʼyataain sünain akaalinjaa tü nüchooinkalüirua».