1-2. Gurhe olwiganyo lwa Paulo lwakarhabala abashamuka zene?

 ENTUMWA Paulo aliherhe obuzigire ku bene-babo. Aliri akola bwenene y’abarhabala. (Mdo. 20:31) Echola charhuma ababo bemezi nabo bamuzigira bwenene. Mango maguma, Abakristu be Efeso bayunvirhe oku barhakachibona ku Paulo, “boshi balaka bwenene”. (Mdo. 20:37) Abashamuka berhu b’obushiru nabo bajira obuzigire ku bene-babo na bali-babo, banajira n’okwabo koshi bagalire yibabarhabala. (Flp. 2:16, 17) Aliko mango maguma, abashamuka banahurana ebibazo. Bichi byakabarhabala kubihima?

² Abashamuka banakola bwenene bakalola olwiganyo lwa Paulo. (1 Kor. 11:1) Arhaliherhe obuhashe buchubukire obw’abantu. Paulo aliri muntu orhashinganene, hali n’amango byaliri byamuhema achihangane bwenene y’agala kujira ebinja. (Ro. 7:18-20) Analiri alwisa bibazo binene by’akalamo. Aliko Paulo arhahezaga obusime bwage. Omu kuyiganya Paulo, abashamuka bakahima ebibazo bali balwisa, n’okugenderera kugwarha obusime omu kasi ka Yehova. Leka rhulole nka gurhe.

3. Bichi rhwabona mu gunola mwazi, na bichi byarhurhabala kujira?

³ Mu gunola mwazi, rhwabona bibazo bine abashamuka bazigana kuhurana: 1) okugwarha akasanzi k’okuhubiri n’ak’okukola ezindi ngabane, 2) okubona ebisanzi by’okurhabala bene-bebo na bali-babo, 3) okulwisa obuzamba bwabo, n’echa 4) okugala kukola bwinja n’abandi nobo nabo barhashinganene. Rhwabona gurhe Paulo ahimaga buli chibazo, nagurhe abashamuka bakamuyiganya.

4. Bulagurhe byakakomerera abashamuka kuba lwiganyo lwinja omu mahubiri?

⁴ Bulagurhe chakaba chibazo. Abashamuka baherhe ngabane zinene olekere akasi k’okuhubiri. Omufano, banene banayimangira embuganano z’ahagarhi k’eboso, n’abandi banaongoza efunzo lye Biblia ly’echibaga. Bakaba eyi baherhe n’engabane z’okugeza ejambo (ehotuba). Kandi banaba eyi bali bakoomeza abagwasi b’akasi, eyi banaherhe obusime b’okuyinja bahira bene-berhu na bali-berhu omurhima. (1 Pe. 5:2) Hali abashamuka banakola omu kasi k’okuyumbaka n’okukwiziza Amachumbi m’Obwami, n’ezindi nju z’echiteokrasi. Aliko chiro akaba ntyo, kuguma n’abandi boshi bali omu chibaga, akasi k’oburhanzi omushamuka anakola kuli kuhubiri emyazi minja.​—Mt. 28:19, 20.

5. Lwiganyo luchi Paulo alilekere, yewe nka muhubiri?

⁵ Olwiganyo lwa Paulo. Omu Wafilipi 1:10, Paulo arhubwirire echamurhabalaga abe muhubiri mwinja. Arhuhanwire ntya: “Muchiseze oku bintu by’akamaro bwenene.” Paulo naye alikoleseze elila hano. Alihaabirwe engabane, amala amakumi m’emyaka ey’anabona eyo ngabane oku chili chiguma omu bintu by’akamaro bwenene. Aliri ahubiri “oku mugarogaro na nju oku nju.” (Mdo. 20:20) Arhalichihebeere esaa z’okuhubiri zen’ezo omu lusiku, changwa lusiku luguma lonyine omu boso. Sy’ahubwe, aliri ahubiri buli hoshi n’amango moshi akagala kujira ntyo! Omufano, amango aliri alindirira bera-bage omu Atene, ahubiri emyazi minja oku chigusho ch’abantu bamenyikene, na baguma mubo bamuyunviriza. (Mdo. 17:16, 17, 34) Chiro n’amango aliri omu pirizo, Paulo aliri ahubiri abali eburhambi bwage.​—Flp. 1:13, 14; Mdo. 28:16-24.

6. Bichi Paulo aliyigirize kujira?

⁶ Paulo alikoleseze ebisanzi bwinja. Aliri azigana kubwira n’abandi bagende naye omu mahubiri. Omufano, omu lugenzi lwage lurhanzi obumisiyonere, agenda na Yowane-Marko; omu lwa kabiri agenda na Timoteo. (Mdo. 12:25; 16:1-4) Nta ngangane, Paulo aliri achihangana kuyigiriza abola balume gurhe bakayerekeza n’okupanga ebintu bwinja omu chibaga, okuntu bakakola akasi k’obungeri, na gurhe bakaba balimu benja.​—1 Kor. 4:17.

7. Gurhe abashamuka bakakolesa ehano lya Paulo lili omu Waefeso 6:14, 15?

⁷ Bichi birhuyigirize. Abashamuka bakayiganya Paulo, arhali omu kuhubiri nju oku nju konyine, si n’omu kuba tayari kuhaana obuhamirizi oku nyorha amango moshi bapatire orozo l’okujira ntyo. (Osome  Waefeso 6:14, 15.) Omufano, bakahaana obuhamirizi amango bali bagula ebintu, changwa ahabanakolera. N’amango bali barhabala kuyumbaka enju ndebe y’echiteokrasi, bakahubiri abaturanyi b’ahabali bayumbaka, changwa abali baguza ebintu. Kuguma na Paulo, abashamuka banakolesa ebisanzi bali bageza omu mahubiri omu kukoomeza abandi, bahirirwe mu n’abagwazi b’akasi.

8. Mango maguma-maguma, bichi byakahema omushamuka ajirage?

⁸ Abashamuka barhakwanene kukola binene omu chibaga changwa omu muzunguluko kugera ahababulira ebisanzi by’okuhubiri. Yi bagenderera kugwarha olugero n’okubona ebisanzi by’okukola ku byoshi, hali amango bakalahira ngabane ziguma-ziguma. Enyuma y’okuwaza bwinja n’okusalira, hali oku bakabona, oku barhagala kukola bwinja ebintu by’akamaro bwenene nka bayemerere ezola ngabane. Ebyo bintu bihirire mw’okukola obuharamye b’omulala bwa buli boso, okukola oku kasi k’okuhubiri n’obushiru, changwa okukoomeza abana babo kuhubiri. Baguma banabona oku bikomere okulahira engabane ndebe, aliko bakachizera oku Yehova abwene enyorha yabo y’okulonza bagwarhe olugero mw’ebyola bintu.

9. Chibazo chihe abashamuka baherhe binene by’okukola banahurana?

⁹ Bulagurhe chakaba chibazo. Abantu ba Yehova yi bahurana ebibazo kamama. Mu zinola siku zizinda, rhweshi rhulagirire okuhirwa omurhima, okurhabalwa, n’okurhulirizwa. Hali n’amango baguma bakaba bakeneere okuntu bakala kuleka engeso mbi. (1 Tes. 5:14) Kweri, abashamuka barhakagala kumala ebila bibazo byoshi abantu ba Yehova bali bahurana. Aliko chiro akaba ntyo, Yehova alonzeze abashamuka bajire okwabo koshi bakagala omu kuhira omurhima n’okulanga entama zage. Gurhe abashamuka banabona ebisanzi by’okurhabala bene-babo na bali-babo n’obo nabo baherhe binene by’okukola?

10. Nk’oku olwandiko lwa 1 Watesalonike 2:7 luyerekene, gurhe Paulo aliri alwa oku bantu ba Yehova?

¹⁰ Olwiganyo lwa Paulo. Paulo aliri abwira bene-babo na bali-babo koko n’okubahira omurhima. Abashamuka banachihangana kukulikira olwiganyo lwage omu kugwarha obuzigire bw’akasisi ku bene-babo na bali babo. (Osome 1 Watesalonike 2:7.) Paulo aliri ayereka ababo bemezi oku abazigiire na Yehova abazigiire. (2 Kor. 2:4; Efe. 2:4, 5) Aliri akolera abandi omu chibaga nka bera-bage, omu kugeza ebisanzi haguma nabo. Ayerekana oku abanihiire omu kubabwira buzira kubabisha eby’ayubahire, n’obuzamba bwage. (2 Kor. 7:5; 1 Ti. 1:15) Aliko, Paulo arhasezaga obwenge oku bibazo byage. S’ahubwe alilonzeze gurhe akarhabala bene-babo.

11. Bichi byarhumaga Paulo ahanula bene-babo na bali-babo?

¹¹ Hali amango byaliri byahema Paulo ahanule bene-babo na bali-babo. Aliko nta mango  ajirire ntyo mpu bulala agayire. Aliri abahanula bulala abalagireko analilonzeze abalange oku buhanya bwakabapata. Aliri achihangana abahe empanulo ziyunvikene ey’analagirire gurhe baziyunva yi bazikolesa. Omufano, omu maruba ayandikiraga Abakorinto, Paulo alibahere ehano lirhali lya kufefereza. Amalire bayandikira, arhuma Tito emunda bali. Paulo alilagirire amenye gurhe bayunvirhe amaruba mage. Asima bwenene amango ayunva oku bayemerere empanulo ahagabo, banazikoleseze!​—2 Kor. 7:6, 7.

12. Gurhe abashamuka bakakomeza obwemere bw’ababo Bakristu?

¹² Bichi birhuyigirize. Abashamuka bakakulikira olwiganyo lwa Paulo omu kugeza ebisanzi haguma n’ababo Bakristu. Njira nguma bakajiramo ntyo kuli kuhika oku mbuganano embere w’echihe yi baganiira n’abandi enganiro ziherhe echi zimalire. Ahanene bene-berhu na bali berhu banahirwa omurhima n’okuhabwa echirhulirizo bakeneere, omu nganiiro ya miniti migeke yonyine. (Ro. 1:12; Efe. 5:16) Omushamuka oli wakulikira olwiganyo lwa Paulo, anakolesa Echinwa cha Mungu omu kukomeza obwemere bwa bene-babo na bali-babo, babone oku Mungu abazigiire. N’olekere n’echola, akwanene abayereke oku kweri naye abazigiire. Anabaderhesa oku kahunda n’okulonza empanvu z’okubabwira koko. Amango byamahema ok’omushamuka ahanule, akwanene kuchiseza oku Chinwa cha Mungu. Anaderha wazi echibazo, aliko omu bwinja bulala alagirire gurhe ehano lyage lyayunvikana.​—Gal. 6:1.

13. Gurhe okurhashinganana k’omushamuka kwakarhuma achiyunva?

¹³ Bulagurhe chakaba chibazo. Abashamuka barhashinganene. Kuguma na buli muntu, nabo banagoma. (Ro. 3:23) Hali amango bakaba bali balwisa yi bagwarha amawazo maherhe olugero oku bilolere obuzamba bwabo. Hali abakava bachiseza oku bufe bwabo kugera ahavunikira omurhima. N’abandi bakachirhebeka mpu amagosa mabo marhavire makomera, omu kuntu eyi barhabona oku bihemere bahindamuke.

14. Nk’oku Wafilipi 4:13 ederhere, nka gurhe obwirhohye bwalirhabere Paulo agale kulwisa obuzamba bwage?

¹⁴ Olwiganyo lwa Paulo. Bulala Paulo aliri mwirhohye, alimenye okw’arhakagala kulwisa obuzamba bwage oku buhashe bwage yenyine. Alikeneere emisi erhengere emwa Mungu. Burhanzi, Paulo arhaliri aharhulwa, aliri alibuza bwenene Abakristu. Aliko enyuma, arhegeera okw’eby’aliri ajira byaliri bibi n’oku akwanene ahindamule engeso n’oborhere bwage. (1 Ti. 1:12-16) Kugerera oburhabale bwa Yehova, Paulo aba mushamuka w’obuzigire, w’olukogo na mwirhohye. Okurhashinganana  kwage kwaliri kwamubabaza bwenene; aliko, arhali by’aliri aseza k’obwenge, sy’ahubwe alichizerere oku Yehova amubabalira. (Ro. 7:21-25) Arhaliwazize mpu aba mushinganyanya. Sy’aliri akola bwenene y’akomeza ehali yage y’ekiroho, analilangalire oku bwirhohye oku Yehova amurhabala amale akasi kage.​—1 Kor. 9:27; osome Wafilipi 4:13.

15. Nka gurhe omushamuka akagwarha amawazo makwanene oku bilolere okurha shinganana kwage?

¹⁵ Bichi birhuyigirize? Abashamuka barhashimikwa mpu bulala bali bashinganyanya. Si Yehova ahemerebo bayinje bayemera amagosa mabo n’okuchihangana bagendereze oborhere bwe Chikristu. (Efe. 4:23, 24) Omushamuka akwanene achigerereze kugerera efunzo lyage lye Biblia alole ngahe bimuhemere kuhindamula. Ahola, Yehova amurhabala agwarhe omwishingo, anabe mushamuka mwinja.​—Yak. 1:25.

16. Bichi byakarhengerera nk’omushamuka amaseza obwenge oku bijiro by’okurhashinganana kw’abandi?

¹⁶ Bulagurhe chakaba chibazo. Abashamuka bakaba juba-juba okubona obuzamba bw’abandi omu chibaga bulala banageza bisanzi binene haguma nabo. Aliko, nk’abashamuka barhakengukire, bahwanza yunva bagayire, banakaliha, n’okubona abandi kubi. Paulo aliyibwise Abakristu oku Shetani akasima ntyo ku babage.​—2 Kor. 2:10, 11.

17. Mawazo machi Paulo aligwerhe ku bene-babo na bali-bo?

¹⁷ Olwiganyo lwa Paulo. Aligenderere kugwarha amawazo makwanene ku bene-babo na bali-babo. Alimenyere oku banagoma, bulala mango maguma naye baliri bamugoseza. Chiro akaba ntyo, Paulo alimenyere oku arhali mpu bulala omuntu ajirire egosa ey’anavire aba muntu mubi. Alizigiire bene-babo, analiri achiseza oku ngeso zabo zinja. Eyi hakagerere amango bene-babo na bali-babo bagambwa kukola amenja, alimenyere oku balishunikirwe n’omuhigo gwinja, si bakeneere oburhabale.

18. Bichi wayigire kugerera okuntu Paulo arhabalaga Evodi na Sentishe? (Wafilipi 4:1-3)

¹⁸ Omufano, waza okuntu Paulo arhabalaga bali-berhu babiri b’omu chibaga che Filipi. (Osome Wafilipi 4:1-3.) Nkabaga haliri ebi Evodi na Sentishe barhaliyunvikenemo, n’echola charhuma barhachiba bera. Paulo arhabayunviraga ebisarani n’okubonabo kubi, sy’achiseza oku ngeso zabo zinja. Baliri bali-berhu b’obwemere, banabaga bakolere Yehova mu siku zinene. Paulo aliyinji ku Yehova azigiirebo. Amawazo makwanene alibagwerheko, mamushunika ahanulebo bayunvikane. Na bulala aliri achiseza oku ngeso zinja z’abandi, charhuma agwarha n’okugendereza obwira bukomeere haguma n’abandi omu chibaga.

19. a) Nka gurhe abashamuka bakagenderera ku gwarha amawazo makwanene oku babo bemezi? b) Bichi efoto y’omushamuka oli wakola obusafi oku Chumbi lyo Bwami ekuyigirize?

 ¹⁹ Bichi birhuyigirize? Bashamuka wee, mulole engeso zinja bene-berhu na bali-berhu bagwerhe. Ntaye chiro oli mushinganyanya; aliko, buli muguma agwerhe engeso zakarhusimisa. (Flp. 2:3) Kweri, mango oku mandi byakahema abashamuka bayinje bahanula mwene-werhu changwa mwali-werhu. Aliko kuguma na Paulo, bakwanene kuchihangana barhachisezaga oku binwa n’ebijiro bigayisize bali bayunva. Si kwakaba kwinja bachiseze oku buzigire oyola muntu agwerhe ku Yehova, eby’ali alembera y’akolera Mungu, n’okuntu ali achihangana kujira ebinja. Abashamuka banachiseza oku ngeso zinja z’abandi, banarhabala buli muntu achiyunve azigiirwe omu chibaga.

20. Gurhe omushamuka akagenderera kuyunguka n’omufano gwa Paulo?

²⁰ Mwewe bashamuka, mwabona oku kuli kwinja bwenene mugenderere kuyiganya Paulo. Omufano, omu Index des Publications, wakalola eshishi w’erhwe lidehere “Paul” naho wanaja omu “exemple pour les anciens.” Ok’oli wasoma oku myazi eli ahola, ochibaze: “Nka gurhe omufano gwa Paulo gwakantabala ngendereze omwishingo gwani eyinandi nakola akasi kani nka mushamuka?’

21. Bichi abashamuka bakachizera?

²¹ Bashamuka wee, muyibuke oku Yehova arhabahemere mpu mube bashinganyanya, sy’abahemere mube bimana. (1 Kor. 4:2) Yehova alisimisizwe n’akasi kakomeere Paulo aliri akola n’obwimana bwage. Muchizere oku nenyu ebi muli mwakola omu kasi ka Mungu, bimusimisize bwenene. Yehova ‘arhakayibagira chiro akasi n’obuzigire mwayerekene oku zino lyage omu kugenderera kukolera abachesibwa.’​—Ebr. 6:10.