1-2. Edena dala ai aposetolo Paulo ena haheitalai ese elda taudia ia durua diba?

 APOSETOLO PAULO ese ena tadikaka ia lalokau henia. Bona ia gaukara goada idia ia naria totona. (Kara 20:31) Unai dainai tadikaka bona taihu ese ia idia lalokau henia bada. Nega ta, Efeso kongrigeisen ena elda taudia idia kamonai Paulo do idia itaia lou lasi neganai, “idia ibounai idia taitai bada.” (Kara 20:37) Paulo hegeregerena, iseda elda taudia ese edia tadikaka taihu idia lalokau henia bada bona dala idauidau ai idia durua. (Fili. 2:16, 17) To, nega haida elda taudia dekenai ia auka gau haida idia karaia totona. Dahaka ese idia ia durua diba?

² Elda taudia ese Paulo ena haheitalai idia laloa diba. (1 Kor. 11:1) Paulo ena goada be aneru edia goada hegeregerena lasi. Ia be goevadae lasi tauna dainai, nega haida ia hekwarahi kara maorona ia karaia totona. (Roma 7:18-20) Bona ia be hekwakwanai haida ia davaria danu. To ena tadikaka taihu durua totona ia gaukara goada bona ia moale noho. Ena be elda taudia ese hekwakwanai idauidau idia davaria, to Paulo idia tohotohoa neganai, mai moale ida Iehova do idia hesiai henia noho. Edena dala ai unai idia karaia diba?

3. Inai atikol ai dahaka do ita herevalaia, bona dahaka do ita dibaia?

³ Elda taudia dekenai ia auka gau haida idia karaia totona. Inai atikol ai unai gaudia 4 do ita herevalaia: (1) Haroro bona hesiai gaukara ma haida dekenai lalohadai maorona idia abia totona, (2) mamoe naria taudia namodia ai idia lao totona, (3) edia manoka gaudia idia hanamoa totona, bona (4) ma haida edia kerere idia haheaukalaia totona. Paulo ese unai hekwakwanai ia hanaia dalana bona elda taudia ese iena haheitalai idia tohotohoa dalana do ita herevalaia.

4. Dahaka dainai nega haida ia auka elda taudia ese haroro gaukara idia hakaua totona?

⁴ Dahaka dainai ia auka? Elda taudia ese haroro gaukara idia hakaua, to idia be mai edia gaukara momo danu. Hegeregere, idia momo be wiki ena hebou idia hakaua eiava Kongrigeisen Baibel Stadi idia naria. Reana tok ma haida idia henia danu. Idia ese hesiai taudia idia treinia bona mai ura ida tadikaka taihu idia hagoadaia. (1 Pet. 5:2) Elda taudia haida be Iehova tomadiho henia rumadia idia haginia bona hanamoa. To, pablisa ibounai bamona, elda taudia ese sivarai namona idia harorolaia be mai anina bada.​—Mat. 28:19, 20.

5. Edena dala ai, haroro gaukara dekenai Paulo be haheitalai namona ia hahedinaraia?

⁵ Paulo ena haheitalai. Paulo ese haroro gaukara ia karaia namonamo ena badina be Filipi 1:10 ai ia herevalaia, ia gwau: “Mai anina bada gaudia do umui diba.” Paulo be unai sisiba ia badinaia. Iena mauri lalonai haroro gaukara be mai anina bada, bona lagani momo lalonai unai gaukara ia karaia. Ia be “taunimanima vairanai bona ruma ta ruma ta ai” haroro gaukara ia karaia. (Kara 20:20) Ia be dina ta ta ai haroro gaukara ia karaia, bona gabu bona nega idauidau ai ia haroro! Hegeregere, Atena ai ena turadia ia naria noho lalonai, ia be dagi bada taudia dekenai ia haroro, bona haida be abidadama taudia ai idia lao. (Kara 17:16, 17, 34) Ena be Paulo be “dibura ruma” ai ia noho, to ia dekenai idia lao taudia ia haroro henia.​—Fili. 1:13, 14; Kara 28:16-24.

6. Paulo be ma haida dekenai dahaka treinini ia henia?

⁶ Paulo be ena nega ia gaukaralaia namonamo. Nega momo ma haida ia boiria ia ida idia haroro totona. Hegeregere, ena misinari laolao ginigunana ai Ioane Mareko ese ia bamoa, bona nega iharuana ai Timoteo ese ia bamoa. (Kara 12:25; 16:1-4) Paulo ia gaukara goada unai tatau dekenai kongrigeisen hakaua dalana, mamoe vadivadi karaia dalana, bona hadibaia taudia namodia ai idia lao dalana dekenai treinini ia henia.​—1 Kor. 4:17.

7. Edena dala ai elda taudia ese Paulo ena hadibaia hereva Efeso 6:14, 15 ai idia badinaia?

⁷ Dahaka ita dibaia? Elda taudia be Paulo idia tohotohoa totona, ruma-ta-ruma-ta ai idia haroro bona idia noho hegaegae nega bona gabu idauidau ai idia haroro danu. (Efeso 6:14, 15 duahia.) Hegeregere, sitoa dekenai idia lao eiava edia gaukara gabuna ai idia haroro diba. Eiava Kingdom Hall haginia gaukarana idia durua neganai, edia dekena taudia bona hoihoi taudia dekenai idia haroro diba. Paulo bamona, elda taudia be haroro gaukara lalonai edia nega idia gaukaralaia pablisa ma haida bona hesiai taudia idia treinia totona.

8. Nega haida, elda taudia be dahaka idia karaia be namo?

 ⁸ Namo lasi elda taudia be edia kongrigeisen gaukaradia eiava sekit gaukara dekenai idia bisi bada dainai, nega be lasi idia haroro totona. Bona edia hesiai gaukara ibounai idia karaia namonamo totona, nega haida hesiai gaukara ma haida idia abia dae lasi be namo. Unai idia lalohadailaia bona gurigurilaia murinai, do idia laloparara bema gaukara ma ta idia abia dae, idia be nega lasi mai anina bada gaudia idia karaia totona. Unai gaudia haida be, wiki ta ta ena ruma bese tomadiho idia hakaua, haroro gaukara idia durua, eiava edia natudia idia treinia idia haroro totona. Elda taudia haida dekenai hesiai gaukara ma ta idia dadaraia be ia auka, badina idia ura gaukara ibounai idia karaia, to namona be idia diba Iehova ese edia ura ia lalopararalaia.

9. Elda taudia be dahaka hekwakwanai idia davaria?

⁹ Dahaka dainai ia auka? Iehova ena taunimanima be hekwakwanai idauidau idia davaria. Inai nega dokona ai, ita ura ma haida ese ita idia hagoadaia bona durua. Bona haida be kara dika idia dadaraia totona heduru idia abia be namo. (1 Tes. 5:14) Oibe, elda taudia ese Iehova ena taunimanima edia hekwakwanai ibounai idia kokia diba lasi. To, Iehova ia ura edia goada hegeregerena iena taunimanima do idia hagoadaia bona gimaia. Ena be elda taudia idia bisi, to edena dala ai nega idia atoa edia tadikaka taihu idia durua totona?

10. Tesalonika Ginigunana 2:7 hegeregerena, edena dala ai Paulo ese Iehova ena taunimanima ia naria?

¹⁰ Paulo ena haheitalai. Paulo ese dala idauidau ia tahua ena tadikaka taihu dekenai hanamoa herevadia ia gwauraia bona idia ia hagoadaia. Elda taudia ese iena haheitalai idia tohotohoa bona edia tadikaka taihu dekenai lalokau bona kara namo idia hahedinaraia. (1 Tesalonika 2:7 duahia.) Paulo ese ena tadikaka taihu ia hamaoroa idia ia lalokau henia bona Iehova ese ia lalokau henidia danu. (2 Kor. 2:4; Efe. 2:4, 5) Paulo ese kongrigeisen taudia be ena turana bamona ia kara henia, bona nega ia atoa idia ia bamoa totona. Ena lalohekwarahi bona manoka gaudia be idia dekenai ia herevalaia, unai amo ia hahedinaraia idia ia abidadama henia. (2 Kor. 7:5; 1 Tim. 1:15) Paulo ese sibona ena hekwakwanai ia herevalaia momo lasi. To, ia ura ena tadikaka taihu ia durua.

11. Dahaka dainai Paulo ese ena tadikaka bona taihu ia sisiba henia?

¹¹ Nega haida, Paulo be ena tadikaka bona taihu ia sisiba henia, to mai badu ida sisiba ia henia lasi. Ia be sisiba ia henia badina idia ia laloa bada bona ia ura dika idauidau amo idia ia gimaia. Ia ura ena sisiba idia lalopararalaia, bona do idia abia dae dalanai ia henia. Hegeregere, Paulo ese Korinto taudia dekenai  ia torea revareva ai, sisiba aukana ia henia. Unai revareva ia torea murinai, idia dekenai Tito ia siaia lao. Paulo ia ura diba ena revareva idia abia dae eiava lasi. Bona ia kamonai ena sisiba herevadia idia abia dae bona badinaia neganai, ia moale bada!​—2 Kor. 7:6, 7.

12. Edena dala ai elda taudia ese edia tadikaka taihu idia hagoadaia diba?

¹² Dahaka ita dibaia? Paulo ena haheitalai hegeregerena, elda taudia ese nega idia atoa edia tadikaka taihu idia bamoa totona. Dala ta be, hebou dekenai idia ginidae haraga, unai amo ma haida ida idia hagoadaia heheni diba. Nega momo elda taudia be miniti haida idia gaukaralaia diba tadikaka eiava taihu ta idia hagoadaia totona. (Roma 1:12; Efe. 5:16) Elda tauna be Baibel ia gaukaralaia ena tadikaka taihu edia abidadama ia hagoadaia bona ia hamaorodia Dirava be idia ia lalokau henia, unai amo Paulo ena haheitalai ia tohotohoa. Danu, elda tauna ese ia hahedinaraia ena tadikaka taihu ia lalokau henia be namo. Nega momo idia ida ia herevahereva bona dala ia tahua idia dekenai hanamoa herevadia ia gwauraia totona. Elda tauna be sisiba ia henia neganai, Baibel ia gaukaralaia. Ia ese ena tadikaka o taihu ena hekwakwanai hegeregerena sisiba ia henia, to manau dalanai unai ia karaia badina ia ura unai sisiba idia badinaia.​—Gal. 6:1.

13. Elda haida edia manoka gaudia be edena bamona idia laloa?

¹³ Dahaka dainai ia auka? Elda taudia be goevadae lasi dainai, nega haida idia kerere danu. (Roma 3:23) Reana nega haida ia auka edia manoka gaudia dekenai lalohadai maorona idia abia totona. Elda haida be edia manoka gaudia idia laloa momo dainai idia lalomanoka. Elda taudia haida be edia manoka gaudia idia laloa bada lasi dainai idia laloa unai gaudia idia hanamoa be anina lasi.

14. Filipi 4:13 hegeregerena, edena dala ai manau karana ese Paulo ia durua ena manoka gaudia ia hanamoa totona?

¹⁴ Paulo ena haheitalai. Paulo be manau tauna, unai dainai ia laloparara ia sibona ese ena manoka gaudia ia hanamoa diba lasi. Ia diba Dirava ena heduru ia abia be namo. Matamanai, Paulo be mai ura ida Keristani taudia ia dagedage henia. To gabeai, ia laloparara ia karaia karana be kerere bona mai ura ida ena kara ia haidaua. (1 Tim. 1:12-16) Iehova ena heduru dainai, Paulo be mamoe naria tauna namona ai ia lao. Ia diba ena manoka gaudia be momo, to unai gaudia ia laloa momo lasi. Bona ia abia dae Iehova ese ena kara dika do ia gwauatao. (Roma 7:21-25) Ia diba nega ibounai kara maorona do ia karaia lasi. To, ia gaukara goada ena Keristani  karadia ia hanamoa bona mai manau ida Iehova ena heduru dekenai ia tabekau ena gaukara ia hagugurua totona.​—1 Kor. 9:27; Filipi 4:13 duahia.

15. Edena dala ai elda tauna be ena manoka gaudia ia hanamoa diba?

¹⁵ Dahaka ita dibaia? Namo lasi ita laloa elda ta be ia goevadae dainai unai maduna ia abia. To, Iehova ia ura ena kerere ia gwauraia hedinarai bona ena Keristani karadia ia hanamoa noho. (Efe. 4:23, 24) Namona be elda tauna ese Dirava ena Hereva ia stadilaia namonamo, unai ese ia do ia durua ena manoka gaudia ia hanamoa totona. Bena Iehova ese do ia durua elda tauna namona ai ia lao bona ia moale totona.​—Iam. 1:25.

16. Bema elda ese ma haida edia manoka gaudia ia laloa momo, dahaka do ia vara?

¹⁶ Dahaka dainai ia auka? Kongrigeisen ai elda taudia be nega momo tadikaka taihu ida idia gaukara hebou neganai, edia manoka gaudia idia itaia diba. To, bema elda taudia idia naria namonamo lasi, edia tadikaka taihu dekenai do idia badu, kara auka eiava idia hahemaoro henia. Paulo ese Keristani taudia ia hadibaia Satani ia ura idia be unai bamona do idia karaia.​—2 Kor. 2:10, 11.

17. Paulo ese ena tadikaka bona taihu be edena bamona ia laloa?

¹⁷ Paulo ena haheitalai. Ia ese ena tadikaka taihu dekenai lalohadai maorona ia abia. Ia diba idia be kerere idia karaia danu, badina nega haida edia kara ese ia idia hahisia. To Paulo ia diba, ta be kerere ia karaia dainai, unai ese ia hahedinaraia lasi ia be taunimanima dikana. Ia be ena tadikaka taihu ia lalokau henia bona edia kara namodia sibona ia laloa. Bema ia itaia ena tadikaka bona taihu be idia hekwarahi noho kara maorona idia karaia totona, ia diba unai be badina maorona bona heduru idia abia namo.

18. Paulo ese Euodia bona Sunutuke ia durua dalana amo dahaka oi dibaia? (Filipi 4:1-3)

¹⁸ Paulo ese Filipi kongrigeisen ai taihu rua ia durua dalana mani ita laloa. (Filipi 4:1-3 duahia.) Euodia bona Sunutuke be reana gau ta dainai idia lalotamona lasi bona edia hetura karana ia dika. Paulo ese idia ia hereva auka henia lasi bona hahemaoro henia lasi to edia kara namodia sibona ia laloa. Idia be nega daudau mai abidadama ida Iehova idia hesiai henia. Paulo ia diba Iehova ese idia ia lalokau henia. Ia ese edia kara namodia ia laloa dainai, idia ia hagoadaia maino idia karaia totona. Oibe, Paulo be ma haida edia kara namodia sibona ia laloa dainai ia moale noho bona kongrigeisen taudia ia tura henia namonamo.

19. (a) Edena dala ai elda taudia ese edia tadikaka taihu edia kara namodia sibona idia laloa? (b) Laulau ai, elda ta ese Kingdom Hall hagoevaia gaukarana ia durua, unai amo dahaka oi dibaia?

¹⁹ Dahaka ita dibaia? Elda taudia e, emui tadikaka bona taihu edia kara namodia sibona  umui laloa. Idia ta ta be goevadae lasi, to edia kara namodia dainai idia umui hanamoa. (Fili. 2:3) Momokani, nega ta ta ai elda taudia ese tadikaka eiava taihu ta ena laloa dalana idia hamaoromaoroa be namo. Paulo hegeregerena, elda taudia ese ta ena hereva eiava kara kererena idia laloa momo lasi. To, unai tauna ena kara namodia sibona idia laloa bada hegeregere, Iehova ia lalokau henia, Dirava hesiai henia totona ia haheauka, bona ia gaukara goada kara namodia ia karaia totona. Elda taudia be edia tadikaka taihu edia kara namodia sibona idia laloa dainai, tadikaka taihu idia mamia kongrigeisen lalonai lalokau ia noho.

20. Edena dala ai Paulo ena haheitalai ese hanaihanai elda taudia ia durua diba?

²⁰ Bema hanaihanai elda taudia ese Paulo ena haheitalai idia stadilaia, unai ese idia do ia durua. Hegeregere, Watchtower Publications Index lalonai inai sinado, “Paul” ena henunai hereva kwarana “example for elders” umui itaia. Bona unuseniai idia noho pablikeisen umui duahia neganai, sibona umui nanadaia, ‘Edena dala ai, Paulo ena haheitalai ese lau ia durua elda gaukara lau karaia namonamo bona lau moale noho totona?’

21. Elda taudia be dahaka idia diba be namo?

²¹ Elda taudia e, namona be umui laloatao, Iehova ese umui ia noia lasi umui goevadae totona, to umui ia noia abidadama taudia ai umui lao totona. (1 Kor. 4:2) Iehova ese Paulo ena gaukara goada bona abidadama karana ia moalelaia. Namona be umui diba Dirava totona umui karaia gaukarana ia laloa bada. Iehova ese “emui gaukara bona iena ladana totona umui hahedinaraia lalokauna do ia laloaboio lasi. Inai lalokau dainai umui ese helaga taudia umui hesiai henia, bona unai bamona do umui hesiai henia noho.”​—Heb. 6:10.