1-2. Wii khan Phaul sayn payxpiil ti elteste hayt helfe?

 TE APHOSTEL Phaul hot sayn priiter keliipt un hot xtram kexaft fer tëne uf phase. (Aph. 20:31) Tes weeche, hon tëm sayn priiter un xwestere tëm aach keliipt. Wii ti elteste fon Ëfeso tsum wise kriit hon tas se teete tëm net mee siin, hon al “aan kefang fiil se prile”. (Aph. 20:37) Kraat soo, unser liipliche elteste liipe sayn priiter un xwestere aarich fiil un mache sayn pestes fer tëne helfe. (Fili. 2:16, 17) Awer als mool, khan es xweyer fer ti elteste sin se mache ales was se mache mise. Was khan tëne helfe?

² Unser flaysiche elteste khene fiil mit Phaul sayn payxpiil lërne. (1 Kor. 11:1) Phaul hat net ti apiliteete fon een engel. Tee waar een imperfekte mënx un als mool must eyer sich aan xtrenge fer se mache was richtich is. (Rom. 7:18-20) Tee hot fiile propleeme mit kemacht, awer tee hot net uf kep orer sayn frooheet ferloer. Wën ti elteste Phaul sayn payxpiil noo mache, khene se wayter Yeehoowa mit frooheet tiine, opwool se propleeme mit mache. Wole mer siin wii se tas mache khene.

3. Was tuun mer in tiise artikel lërne?

³ In tiise artikel, tuun mer xpreche iwer 4 tinge woo khene xweyer sin fer ti elteste mache: (1) kenuuch tsayt fer ti preetich aarwayt un ti anere flichte hon, (2) tsayt fine fer ti priiter un xwestere uf muute, (3) mit sayn aychne xwacheete um keen, un (4) mit te xwacheete fon te anere um keen. Meyer tuun aach lërne was te aphostel Phaul keholef hot un wii ti elteste tëm sayn payxpiil noo mache khene.

4. Warom is es als mool xweyer fer ti elteste ti preetich aarwayt fiire?

⁴ Warom khan tas xweyer sin? Ti elteste fiire ti preetich aarwayt, awer tii hon aach anere flichte. Tsum payxpiil: fiile sin ofts te presitent fon te mitewoch fersamlung orer tuun tas Kemaynt Piipel Xtuutyum fiire. Fiilaycht, mache se aach anere reete. Tii tuun ti ministeryaale tiiner iipe un ti priiter un xwestere mit frooheet uf muute. (1 Phe. 5:2) Etliche elteste xafe aach fer ti Raych Saale un anere kepaye fon te Orkanisatsyoon paue un uf phase. Noch soo — soo wii al ti anere priiter in te kemaynt —, ti wichtichste aarwayt woo ti elteste mache, is ti kuute notisye preetiche. (Mat. 28:19, 20)

5. Was fer payxpiil hot Phaul kelos wii eyer kepreeticht hot?

⁵ Was fer payxpiil hot Phaul kelos? In Filiper 1:10, saat uns Phaul warom eyer een kuute preeticher waar: “Sayt [aych sicher] iwer was fer tinge wichticher sin.” Phaul hot kraat tas kemacht. Tee hot een insetsung kriit: ti preetich aarwayt. Un torich fiile yoore, hot eyer tas wii tas wichtichste tings in sayn leepe kesiin. Tee hot “foer ale layt un haus tsu haus” kepreeticht. (Aph. 20:20) Tee hot yeete keleechenheet penutst fer se preetiche! — net ploos in spetsiifixe xtune fom taach orer in een taach fon te woch. Tsum payxpiil: wii eyer, in Atenas, sayn froynte am waarte waar, hot eyer fer een krup fon importante layt kepreeticht. Un tee hot kuute resultaate kehat! (Aph. 17:16, 17, 34) Soo kaar wii Phaul inkexpërt waar, hot eyer kepreeticht. (Fili. 1:13, 14; Aph. 28:16-24)

6. Was fer iipung hot Phaul kep?

⁶ Phaul hot sayn tsayt kuut penutst. Tee hot ofts anere in kelaat fer mit tëm preetiche keen. Tsum payxpiil: in sayn eyerste misyoneer rees, hot eyer Yoohan Markus mit kenom; un in sayn tsweet, Timoteus. (Aph. 12:25; 16:1-4) Sicher, hot Phaul sich fiil aan kextrengt fer tiise mëner iipe. Tee hot tëne in kelërnt wii een kemaynt orkanisiire, wii ti priiter un xwestere uf phase, un wii kuute leerer sin. (1 Kor. 4:17)

7. Wii khene ti elteste mache was Phaul kesaat hot in Ëfeser 6:14, 15?

⁷ Was is ti lisyoon? Ti elteste khene Phaul sayn payxpiil noo mache net ploos wën se haus tsu haus preetiche, awer wën se fërtich sin fer in yeete keleechenheet preetiche. (Lees Ëfeser 6:14, 15.) * Tsum payxpiil: tii khene tsaye kepe wën se etwas khaafe tuun orer wën  se am xafe sin. Un wën se in te paueray fon een Raych Saal xafe, khene se tsaye kepe fer ti nochpere un fer tii woo tëne tinge ferkhaafe. Un soo wii Phaul, wën se in te preetich aarwayt sin, khene ti elteste ti tsayt penutse fer ti anere iipe, too tepay ti ministeryaale tiiner.

8. Was mus een elteste als mool mache?

⁸ Ti elteste sole nii soo fiil xafe fer sayn flichte in te kemaynt orer in te sirkuyt uf phase, tas se khee mee tsayt fer ti preetich aarwayt hon. Fer kenuuch tsayt hon fer ales mache was eyer mache mus, mus een elteste als mool “nee” fer etliche insetsunge saan. Manich mool, noo een elteste peete un triwer noo tenke, tuut eyer mërke tas eyer khan net een flicht uf phase oone ti wichtichste tinge uf sayt lose; too tepay is ti familye aanpeetung yeete woch fiire, flaysich in te preetich aarwayt sin un sayn khiner iipe fer se preetiche. Etliche elteste fine es xweyer “nee” fer een flicht saan, awer tii khene sich sicher sin tas Yeehoowa ferxteet tas se wole al sayn flichte kuut uf phase.

9. Wayl ti elteste xon fiil se tuun hon, was khan xweyer sin fer tëne mache?

⁹ Warom khan tas xweyer sin? Yeehoowa sayn folek macht fiile propleeme mit. Torich tiise letste taache, meyer al mise uf kemuut, ketreest un keholef sin. Un als mool, etliche prayche hilef fer net was ferkheertes mache. (1 The. 5:14) Kewis, ti elteste khene net al ti propleeme fon te priiter wech hoole. Noch soo, wil Yeehoowa hon tas ti elteste mache ales was se khene fer ti priiter helfe un xitse. Wii khene ti elteste — woo xon fiil se tuun hon — tsayt fine fer ti priiter helfe?

10. Tëm noo 1^te Thesalooniker 2:7, wii hot Phaul ti priiter uf kephast?

¹⁰ Was fer payxpiil hot Phaul kelos? Phaul waar imer fërtich fer ti priiter loope un uf muute. Ti elteste sole tëm sayn payxpiil noo mache un liiplich un froyntlich mit te priiter un xwestere sin. (Lees 1^te Thesalooniker 2:7.) * Phaul hot ti priiter un xwestere sicher kelos tas eyer un Yeehoowa tëne keliipt hon. (2 Kor. 2:4; Ëfe. 2:4, 5) Fer Phaul, waare ti priiter in te kemaynt sayn froynte un tee hot tsayt mit tëne aus kep. Tee hot ketsaycht tas eyer uf tëne ketraut hot wii eyer iwer sayn soriche un xwacheete kexproch hot. (2 Kor. 7:5; 1 Tim. 1:15) Awer Phaul wolt net acht fer sayn propleeme pringe. Xtats tas, wolt eyer sayn priiter helfe.

11. Warom hot Phaul aanreete fer sayn priiter un xwestere kep?

¹¹ Phaul must als mool aanreete fer sayn priiter un xwestere kepe. Awer tee hot tas nii kemacht wayl eyer pees mit tëne waar. Tee hot  se aan kereet wayl eyer se keliipt hot un tee wolt se fon te kefoore xitse. Phaul hot sich aan kextrengt tas sayn aanreete laycht tsum ferxteen weyere. Un tee wolt hon tas ti priiter tas aan nëme teete. Tsum payxpiil: in sayn priif fer ti korinter, hot Phaul xtarke aanreete kep. Awer nochter, hot eyer Titus tsu Korinto kexikt fer se siin wii se sich aan kextelt hon noo tëm priif kriin. Phaul is mechtich froo kep wii eyer tsum wise kriit hot tas sayn priiter hon ti aanreete aan kenom un aan kewënt. (2 Kor. 7:6, 7)

12. Wii khene ti elteste ti priiter un xwestere ferxtërke?

¹² Was is ti lisyoon? Ti elteste khene Phaul sayn payxpiil noo mache wën se tsayt mit sayn priiter fertraype. Tii khene, tsum payxpiil, friier tsu te fersamlung khome un ufmuutiche kexpreche mit te anere hon. Een elteste praycht net een lang kexpreche mit een pruuter hon fer tëm uf muute — ploos phaar minute sin xon kenuuch. (Rom. 1:12; Ëfe. 5:16) Een elteste woo Phaul sayn payxpiil noo macht, tuut aach ti Piipel penutse fer te klaape fon sayn priiter ferxtërke un fer tëne sicher lose fon Yeehoowa sayn liip. Te elteste lost ti priiter aach sicher tas eyer tëne liipt. Tee tuut ofts mit tëne xpreche un suucht keleechenheete fer tëne loope. Wën een elteste een aanreet kepe mus, tuut eyer sayn aanreet in Kot sayn Wort xtaype. Tee is spetsiifix, awer froyntlich, wayl tee wil hon tas sayn pruuter te aanreet aan nëmt. (Kal. 6:1)

13. Wii khan een elteste petrof kepe fon sayn xwacheete?

¹³ Warom khan tas xweyer sin? Ti elteste sin net perfekt. Soo wii meyer al, mache se feeler. (Rom. 3:23) Es khan als mool xweyer fer tëne sin sayn xwacheete in te richtich aat siin. Im xtant, mache etliche sich soo fiil ketanke mit sayn xwacheete, tas se oone muut plaype. Awer khan sin tas anere, im keeche teel, tenke tas sayn xwacheete net soo wichtich sin un tas se mise khee ënerunge mache.

14. Tëm noo Filiper 4:13, wii hot ti teemuut Phaul keholef mit sayn xwacheete um keen?

¹⁴ Was fer payxpiil hot Phaul kelos? Phaul waar teemuutich kewees. Tes weeche, hot eyer ferxtan tas eyer khont net mit sayn xwacheete aleen um keen: tee must kraft fon Kot kriin. Friier, hat Phaul ti kriste keyacht un tëne krop pehantelt. Awer xpeeter, hot eyer ferxtan tas was eyer kemacht hat, ferkheert waar un tee wolt sayn aanxtelung un personaliteet ënere. (1 Tim. 1:12-16) Mit Yeehoowa sayn hilef, is Phaul een teemuutich, liiplich un mitlaytiche elteste kep. Tee wust tas eyer fiil xwacheete hat, awer tee hot sich net too traan kehal. Xtats tas, hot eyer keklaapt tas Yeehoowa tëm fertsaye teet. (Rom. 7:21-25) Phaul wust tas  eyer teet net perfekt sin. Soo wii soo, hot eyer sich fiil aan kextrengt fer sayn kristliche kwaliteete ferpesere. Un mit teemuut, hot eyer uf Yeehoowa sayn hilef ketraut fer sayn preetich kuut mache. (1 Kor. 9:27; lees Filiper 4:13. *)

15. Wii sole ti elteste sayn xwacheete siin?

¹⁵ Was is ti lisyoon? Ti elteste sin net in kextelt kep wayl se perfekt sin. Awer Yeehoowa wil hon tas ti elteste sayn feeler erkhëne un tas se sayn kristliche kwaliteete ferpesere. (Ëfe. 4:23, 24) Een elteste mus ti Piipel xtutiire fer se wise woo eyer sich ferpesere mus un tan ti neetiche ënerunge mache. Soo, tuut Yeehoowa tëm helfe een froo un kuut elteste sin. (Tya. 1:25)

16. Was khan pasiire wën ti elteste sich traan hale aan te xwacheete fon te anere?

¹⁶ Warom khan tas xweyer sin? Wën ti elteste fiil tsayt mit te priiter un xwestere fertraype, is es laycht tëne sayn xwacheete mërke. Un, wën se net uf phase, khene ti elteste pees wëre, ti priiter kritikiire un tëne xlecht pehantele. Phaul hot fer ti kriste kesaat tas Satanaas sich fraye teet, wën tas pasiire teet. (2 Kor. 2:10, 11)

17. Wii hot Phaul sayn priiter un xwestere kesiin?

¹⁷ Was fer payxpiil hot Phaul kelos? Phaul hot imer tas pestes in sayn priiter un xwestere kesiin. Tee wust tas se feeler kemacht hon, wayl als mool, tëne sayn feeler hon tëm petrof. Awer Phaul hot ferxtan tas, ploos wayl yemant een feele kemacht hot, tas wolt net saan tas eyer een xlecht persoon waar. Phaul hot sayn priiter keliipt un tee hot sich aan tëne sayn kuute kwaliteete traan kehal. Wën es xweyer fer sayn priiter un xwestere waar tas richtiches mache, hot Phaul tëne net kericht; tee hot net ketenkt: ‘Tii mache tas wayl se xlechte layt sin.’ Tee hot raus kesuucht se tenke tas se wolte tas richtiches mache, awer tii miste hilef kriin.

18. Was host tuu kelërnt fon te aat wii Phaul mit Ewootya un Sintik um kang is? (Filiper 4:1-3)

¹⁸ Kuk mool, tsum payxpiil, wii Phaul tswaay xwestere in te kemaynt fon Filipos keholef hot. (Lees Filiper 4:1-3.) * Es siit aus tas Ewootya un Sintik sich net mee ferxtan hon un tas se sayn froyntxaft fersaut hon. Phaul waar net krop mit tëne un hot se net kritikiirt. Xtats tas, hot eyer sich traan kehal aan tëne sayn kwaliteete. Tiise troye xwestere hon Yeehoowa xon een lang tsayt ketiint. Phaul wust tas Yeehoowa se keliipt hot. Weeche sayn kuut mënung iwer ti tswaay xwestere,  hot Phaul se uf kemuut te friit mache. Wayl Phaul sich konsentriirt hot aan te anere sayn kuute kwaliteete, khont eyer sayn frooheet un aach een xtark froyntxaft mit te priiter hale.

19. (a) Wii khene ti elteste een positiiw mënung iwer sayn priiter hale? (b) Was host tuu kelërnt mim pilt fon een elteste woo te Raych Saal sauwer macht?

¹⁹ Was is ti lisyoon? Elteste, halt aych traan aan te kuute kwaliteete fon ayre priiter un xwestere. Tii sin al imperfekt, awer yeete eene fon tëne hot kwaliteete woo mer kërn hëte. (Fili. 2:3) Es is woer tas, als mool, mise ti elteste aanreete kepe fer een pruuter orer een xwester. Awer, soo wii Phaul, ti elteste sole sayn pestes mache fer sich net konsentriire aan te priiter sayn xwacheete. Xtats tas, sole se sich traan hale aan te persoon sayn liip tsu Yeehoowa, sayn persewerans, un tas kuutes woo se mache khan. Ti elteste woo sich konsentriire aan te kuute kwaliteete fon te anere, helfe sayn priiter un xwestere xpiire tas se keliipt sin.

20. Wii khene ti elteste wayter nutse fon Phaul sayn payxpiil kriin?

²⁰ Elteste, es wërt kuut fer tich sin wayter Phaul sayn payxpiil xtutiire. Tsum payxpiil: im Índice de Publicações da Torre de Vigia, tuust tuu phaar informatsyoone iwer tëm fine. Suuch tas theema “Paulo” un tan “exemplo para os anciãos”. Wëns tuu etliche artikele woo tat xteen xtutiirst, froo tich: ‘Wii khan Phaul sayn payxpiil mich helfe ti frooheet hale in mayn insetsung wii elteste?’

21. Fon was khene ti elteste sich sicher sin?

²¹ Elteste, erinert aych tas Yeehoowa wil net hon tas teyer perfekt sayt; tee wil hon tas teyer troy sayt. (1 Kor. 4:2) Phaul hot xtram kexaft un waar troy kewees un Yeehoowa hot fiil weyert fer tas kep. Teyer khent aych aach sicher sin tas Yeehoowa weyert kept fer ales was teyer macht. Yeehoowa tuut sich nii ferkese “fon te aarwayt un ti liip woo teyer tsu sayn naame ketsaycht hot, wii teyer ti hayliche ketiint hot un tii wayter tiine tuut”. (Hep. 6:10)