1-2. Baka ni teladan rasul Paul ulih nulung bala tuai gempuru kemayaharitu?

 RASUL Paul rinduka bala menyadi Kristian sereta bebendar nyaga sida. (SKR. 20:31) Ketegal nya, bala menyadi Kristian amat rinduka Paul. Bisi sekali, ‘semua sida nyabak magang’ laban bala tuai gempuru ari Epesus nemu sida enda ulih agi betemu enggau Paul. (SKR. 20:37) Bala tuai gempuru mega rinduka menyadi Kristian. Sida bebendar ngereja utai ke ulih sida ngambika ulih nulung menyadi Kristian. (Plp. 2:16, 17) Tang kekadang, bala tuai gempuru mega napi penanggul. Nya alai, baka ni sida ulih mutarka penanggul tu?

² Bala tuai gempuru ulih beratika teladan Paul. (1 Kor. 11:1) Paul enda sempurna lalu bisi maya iya tusah deka ngereja utai ti badas. (Rom. 7:18-20) Paul mega napi mayuh penanggul. Tang iya enda asa ati tauka lenyau pengaga ati. Lebuh bala tuai gempuru neladan Paul, sida ulih terus gawa ke Jehovah enggau gaga ati taja pan napi penanggul. Diatu, kitai deka berandauka baka ni tuai gempuru ulih ngereja nya.

3. Nama deka dikerandauka kitai ba artikel tu, lalu nama utai bukai ke deka dipelajarka kitai?

³ Ba artikel tu, kitai deka meresa empat iti penanggul ke suah ditapi bala tuai gempuru. Sida patut: (1) magi awak ke pengawa nginjil sereta tanggungjawap ke bukai, (2) ngiga awak meransang bala menyadi Kristian, (3) napi pengelemi diri, lalu (4) bekerejasama enggau bala menyadi ke bisi pengelemi. Kitai mega deka berandauka chara Paul mutarka tiap iti penanggul nya sereta chara bala tuai gempuru ulih neladan iya.

4. Nama kebuah kekadang tusah bala tuai gempuru deka ngiring ba pengawa nginjil?

⁴ Kebuah tu ulih nyadi penanggul. Kelimpah ari ngiring pengawa nginjil, bala tuai gempuru mega bisi pengawa ke bukai. Ambika chunto, sida patut ngiring gempuru tengan minggu sereta Gempuru Belajarka Bup Kudus. Sida mega bisi mayuh pengawa meri cheramah. Tuai gempuru mega patut ngelatih penulung gempuru sereta meransang bala menyadi Kristian. (1 Pet. 5:2) Sekeda tuai gempuru nulung ba pengawa nirika sereta nyeruri Palan Gempuru enggau bengunan teokratik ke bukai. Tang, baka bala penginjil ba eklisia, pengawa ti pemadu penting ba tuai gempuru nya nginjil pasal Berita Manah.—Mat. 28:19, 20.

5. Nama teladan ke ditetapka Paul bekaul enggau nyadi penginjil?

⁵ Teladan Paul. Paul ulih mujur ba pengawa nginjil laban iya nitihka jaku lalau ke ditulis iya empu. Ba Pilipi 1:10, Paul nulis: “Nemu milih utai ti pemadu badas.” Paul nginjil pengelama betaun-taun. Iya ngumbai pengawa nginjil nya pengawa ti pemadu beguna ba pengidup iya. Iya nginjil “di mua orang mayuh ari rumah sebuah ngagai rumah sebuah.” (SKR. 20:20) Paul enda milih maya tauka hari iya patut nginjil. Iya ngiga peluang ngambika ulih nginjil ba sebarang maya enggau ba sebarang endur! Bisi sekali, lebuh Paul benung nganti Silas seduai Timoti ba Atens, iya nginjil ngagai seraban orang ba balai gempuru dia. Asil iya, sida tu deka ningaka iya. (SKR. 17:16, 17, 34) Indah lebuh iya kena tan “dalam rumah jil,” Paul terus nginjil ngagai orang ba dia.—Plp. 1:13, 14; SKR. 28:16-24.

6. Nama latih ke diberi Paul ngagai orang bukai?

⁶ Paul ngena awak iya enggau manah. Iya suah mai orang bukai sama nginjil enggau iya. Ambika chunto, lebuh keterubah kali iya ngereja pengawa pengerintis seberai tasik, iya mai Mark enggau iya. Lalu lebuh kedua kali Paul ngereja pengawa nya, iya mai Timoti. (SKR. 12:25; 16:1-4) Paul bebendar ngajar Mark enggau Timoti chara nyaga eklisia, meransang bala menyadi Kristian sereta chara ulih nyadi pengajar ti landik.—1 Kor. 4:17.

7. Baka ni bala tuai gempuru ulih nitihka jaku lalau Paul ba Epesus 6:14, 15?

⁷ Utai ke dipelajar. Bala tuai gempuru ulih neladan Paul ukai semina maya sida ngereja pengawa nginjil ari rumah ke rumah. Tang sida mega seruran sedia deka nginjil ba sebarang maya. (Bacha Epesus 6:14, 15.) Ambika chunto, sida ulih nginjil lebuh bebelika barang tauka ba endur gawa. Tauka lebuh sida nulung ba projek nirika bengunan teokratik, sida ulih nginjil ngagai orang ke diau semak  dia tauka ngagai pekereja luar ti nyediaka servis ngagai sida. Baka Paul, bala tuai gempuru ulih ngena awak ba pengawa nginjil kena ngelatih orang bukai, nyengkaum penulung gempuru.

8. Kekadang, nama utai ke patut digaga tuai gempuru?

⁸ Bala tuai gempuru enda patut kelalu kisuk ngereja pengawa sida nyentukka sida nadai awak ke pengawa nginjil. Kekadang, sida engka patut nulak sekeda pengawa ngambika enda ngelengkaka pengawa ke penting agi. Pengawa ke bukai nya nyengkaum ngiring ba pengawa Belajarka Bup Kudus enggau Diri Sebilik ninting minggu, ransing agi ba pengawa nginjil tauka ngelatih bala anak ba pengawa nginjil. Pengudah sida besampi sereta berundingka situasi diri empu, sida engka sedar manah agi nulak sekeda pengawa. Taja pia, sekeda engka tusah deka nulak pengawa ke diberi. Tang sida ulih andal Jehovah tentu meretika sida ke deka nyadi seimbang ba semua pekara.

9. Ketegal bala tuai gempuru amat kisuk, nama penanggul bukai ke ditapi sida?

⁹ Kebuah tu ulih nyadi penanggul. Nembiak Jehovah napi mayuh penanggul. Ba hari ti penudi tu, semua kitai begunaka jaku peransang, sukung sereta pengelantang ba ati. Lalu kekadang, sekeda begunaka tulung kena nyeliahka ulah ti salah. (1 Tes. 5:14) Bala tuai gempuru enda ulih mutarka semua penanggul ke ditapi bala menyadi. Tang Jehovah deka tuai gempuru meransang sereta nyaga nembiak Iya. Nya alai, taja pan bala tuai gempuru amat kisuk, tang baka ni sida ulih ngiga awak kena nulung bala menyadi Kristian?

10. Nitihka 1 Tesalonika 2:7, nama utai ke digaga Paul kena nyaga nembiak Jehovah?

¹⁰ Teladan Paul. Paul seruran ngiga peluang muji sereta meransang bala menyadi Kristian. Bala tuai gempuru ulih neladan Paul lebuh sida ngintu nembiak Jehovah enggau pengerindu. (Bacha 1 Tesalonika 2:7.) Paul ngasuh bala menyadi andal, pasal pengerindu iya sereta pengerindu Jehovah ngagai sida. (2 Kor. 2:4; Eps. 2:4, 5) Paul ngumbai bala menyadi ba eklisia nya pangan iya lalu iya seruran meri awak begulai enggau sida. Paul nunjukka diri pechayaka bala menyadi lebuh iya madah ngagai sida pasal pengirau iya sereta pengelemi diri. (2 Kor. 7:5; 1 Tim. 1:15) Taja pia, Paul ngereja nya ukai ketegal iya berundingka penanggul diri empu. Tang iya deka nulung menyadi Kristian.

11. Nama kebuah Paul meri jaku lalau ngagai bala menyadi Kristian?

¹¹ Kekadang, Paul patut meri jaku lalau ngagai bala menyadi Kristian. Tang iya enda ngereja nya ketegal ringat ngagai sida. Paul meri jaku lalau laban iya ibuhka sida lalu deka nyaga sida ari utai ti ulih ngachau pengarap sida.  Iya meri jaku lalau ti mudah dimereti sereta nyamai diterima. Bisi sekali, Paul meri jaku lalau ngagai orang Kristian di Korint nengah surat. Pengudah Paul nembuka surat nya, iya minta Titus nganjung surat nya ngagai sida. Paul irau pasal reaksi sida lebuh ninga jaku lalau nya. Tang lebuh Paul nemu sida nerima jaku lalau iya, iya berasai gaga ati!—2 Kor. 7:6, 7.

12. Baka ni bala tuai gempuru ulih ngeringka menyadi Kristian?

¹² Utai ke dipelajar. Bala tuai gempuru ulih neladan Paul enggau meri awak begulai enggau bala menyadi Kristian. Sida ulih ngereja tu enggau datai tumu ngagai gempuru Kristian ngambika ulih berandau enggau bala menyadi. Kebendar iya, semina beberapa minit aja pan udah chukup kena meransang bala menyadi. (Rom. 1:12; Eps. 5:16) Tuai gempuru ke neladan Paul mega deka ngeringka bala menyadi Kristian ngena Bup Kudus. Tu ulih negapka pengarap bala menyadi lalu nulung sida andalka pengerindu Petara. Pia mega, tuai gempuru deka bala menyadi nemu pasal pengerindu sida. Tuai gempuru mega deka suah nanya rita bala menyadi lalu ngiga peluang muji sida. Lebuh tuai gempuru patut meri jaku lalau, iya nentuka jaku lalau nya bepelasarka Bup Kudus. Taja pan tuai gempuru patut madah enggau terus terang pasal utai ke enda tau enda dikemansangka menyadi nya, tang tuai gempuru ngereja nya enggau siru laban iya deka bala menyadi nerima jaku lalau nya.—Gal. 6:1.

13. Ketegal enda sempurna, nama kesan iya ngagai tuai gempuru?

¹³ Kebuah tu ulih nyadi penanggul. Bala tuai gempuru enda sempurna. Lalu kekadang sida ngereja penyalah. (Rom. 3:23) Kekadang, sida tusah deka bisi runding ti betul pasal pengelemi diri. Sekeda menyadi engka beratika pengelemi tuai gempuru nyentukka tuai gempuru berasai asa ati. Pia mega, sekeda menyadi engka senang deka nerima pengelemi ba tuai gempuru, lalu tu engka ngasuh tuai gempuru nya ngasaika diri enda ibuh ngaga ubah ke patut.

14. Nitihka Pilipi 4:13, baka ni pemaruh ati nulung Paul napi pengelemi ba diri empu?

¹⁴ Teladan Paul. Paul enggau baruh ati ngaku iya enda ulih mutarka pengelemi diri enggau chara diri empu. Iya begunaka pengering ari Petara. Paul kala nyadi orang ke amat kieh sereta balat merinsaka orang Kristian. Tang udah nya, iya ngaku penyalah diri lalu sanggup ngaga ubah ba runding sereta ulah. (1 Tim. 1:12-16) Enggau tulung ari Jehovah, Paul ulih nyadi orang ke bisi pengerindu, siru sereta seiku tuai gempuru ti baruh ati.  Iya nemu diri bisi mayuh pengurang, tang iya enda terus berundingka semua nya. Paul pechaya Jehovah tentu deka ngampunka iya. (Rom. 7:21-25) Pia mega, iya enda ngarapka diri ulih ngereja semua utai enggau sempurna. Tang Paul bebendar deka ngemansangka sifat Kristian sereta baruh ati bepanggai ba Jehovah ngambika ulih nembuka pengawa iya.—1 Kor. 9:27; bacha Pilipi 4:13.

15. Baka ni tuai gempuru ulih ngembuan runding ti betul bekaul enggau pengelemi diri?

¹⁵ Utai ke dipelajar. Bala tuai gempuru dipilih ukai ketegal sida sempurna. Tang enti sida bisi ngereja penyalah, Jehovah deka sida ngaku penyalah diri, lalu terus ngemansangka sifat Kristian. (Eps. 4:23, 24) Tuai gempuru patut meresa diri ngena Bup Kudus ngambika ulih nemu chara ngaga ubah ke patut. Lalu Jehovah tentu deka nulung iya gaga ati sereta nyadi seiku tuai gempuru ti manah.—Jas. 1:25.

16. Nama ulih nyadi enti tuai gempuru kelalu beratika pengelemi menyadi Kristian?

¹⁶ Kebuah tu ulih nyadi penanggul. Bala tuai gempuru engka ngena mayuh awak ngereja pengawa eklisia enggau bala menyadi. Nya alai, sida senang agi deka meda pengelemi bala menyadi. Enti tuai gempuru enda bejimat, sida jampat nyadi ringat, enda siru tauka ngakim bala menyadi. Paul kala nangkan orang Kristian pasal pelan Sitan ke sigi deka sida ngereja nya.—2 Kor. 2:10, 11.

17. Nama runding Paul pasal bala menyadi Kristian?

¹⁷ Teladan Paul. Paul bisi runding ti manah pasal bala menyadi Kristian. Paul tentu nemu pengelemi sida laban kekadang sida ngereja utai ti ngemediska ati iya. Tang Paul nemu enti bala menyadi ngereja penyalah, nya ukai reti menyadi nya orang ke jai. Iya sayauka bala menyadi lalu beratika pemanah sida. Kekadang bala menyadi berasai tusah deka ngereja utai ti betul. Tang Paul nemu sida bisi tuju ati ti manah. Lalu ba Paul, sida semina begunaka tulung kena ngemansangka pemanah diri.

18. Nama ulih dipelajarka nuan ari chara Paul nulung Eudia enggau Sintike lebuh seduai iya bisi penanggul enggau pangan diri? (Pilipi 4:1-3)

¹⁸ Peratika baka ni Paul nulung dua iku menyadi indu ba eklisia di Pilipi. (Bacha Pilipi 4:1-3.) Eudia enggau Sintike engka beserekang penemu enggau pangan diri lalu seduai iya enggai begulai manah enggau pangan diri. Taja pia, Paul enda kasar tauka ngakim seduai iya. Tang Paul beratika pemanah ba seduai iya. Bala menyadi indu tu udah lama nyembah Jehovah lalu Paul nemu Jehovah amat sayauka seduai iya. Paul bisi runding ti manah pasal dua iku menyadi indu tu. Nya alai, iya meransang seduai iya bebaik enggau pangan diri. Ketegal Paul suah beratika pemanah ba orang bukai, iya ulih mengkang gaga ati sereta ngetanka kaul ti manah enggau bala menyadi ba eklisia nya.

19. (a) Baka ni bala tuai gempuru ulih terus bisi runding ti manah pasal bala menyadi Kristian? (b) Nama ulih dipelajarka nuan ari gambar pasal seiku tuai gempuru ke meresi Palan Gempuru?

 ¹⁹ Utai ke dipelajar. Tuai gempuru, uji meh beratika pemanah ba bala menyadi Kristian nuan. Tiap iku sida enda sempurna, tang sida mega tentu bisi pemanah ti dikerinduka kitai. (Plp. 2:3) Endang amat, kekadang bala tuai gempuru engka patut meri jaku lalau ngagai menyadi Kristian. Tang baka Paul, tuai gempuru enda patut kelalu beratika pengelemi ba bala menyadi. Tang tuai gempuru deka beratika pengerindu bala menyadi ngagai Jehovah, baka ni sida ngayanka tan ati lebuh nyembah Petara, sereta peluang seseiku menyadi ulih ngereja utai enggau manah agi ba jemah ila. Tuai gempuru ke bisi runding ti manah pasal bala menyadi ulih nulung semua ba eklisia ngasaika pengerindu.

20. Baka ni bala tuai gempuru ulih terus belajar ari teladan Paul?

²⁰ Tuai gempuru, nuan ulih terus bulih penguntung ari belajarka teladan Paul. Ambika chunto, ba bup Indeks dalam jaku Indonesia, nuan ulih ngiga “Paulus” lalu giga tajuk “teladan bagi penatua.” Lebuh nuan macha sekeda artikel ke bisi disedia ba dia, tanya meh diri empu, ‘Baka ni teladan Paul ulih nulung aku mengkang gaga ati ba pengawa aku ke nyadi tuai gempuru?’

21. Nama ulih diandalka bala tuai gempuru?

²¹ Bala tuai gempuru, ingat meh, Jehovah enda minta nuan nyadi sempurna, tang Iya deka nuan tetap ati. (1 Kor. 4:2) Jehovah lantang ati enggau penetap ati Paul sereta iya ti bebendar gawa. Nuan mega ulih andal Jehovah tentu lantang ati enggau pengawa nuan ke Iya. Jehovah “deka mengkang ingatka pengawa ti udah dikereja kita, enggau pengerindu ti dipandangka kita lebuh kita bekereja nulung nembiak Tuhan.”—Heb. 6:10.