1-2. Kunnasi nga makoffun ta elder ira i ehemplo ni apostol Pablo?

 INIDDU ni apostol Pablo i wawwaragi na. Malappo yayya ta panangngal nira. (King. 20:31) Megafu tatun, kuruga iddeddu yayya na wawwaragi. Mittan, “nattatangi” i elder ira ta Efeso turi ta nammuadda nga ariadda ngana vuluvuga masingan uli si Pablo. (King. 20:37) Kuruga iddeddukan gapa na malappo ira nga elder tam i wawwaragi anna kuadda i ngamin nga mawayya da tapenu uffunan ira. (Fil. 2:16, 17) Ngem nu karuan, marigatan gapa i elder ira nga kuan i ngamin nga mawag nga kuadda. Anni i makoffun nira?

² Makagigiammu i malappo ira nga elder ta ehemplo ni Pablo. (1 Cor. 11:1) Awan tu abilidad ni Pablo nga kagitta na anghel ira. Imperfekto yayya anna nu karuan, marigatan gapa yayya nga kuan i fustu. (Roma 7:18-20) Aru gapa i inarubang na nga problema. Ngem magayayya lagapa yayya anna ari nagimmang ta panguffun ta wawwaragi. Nu parigan na elder ira si Pablo, magayayya lagapa ira nga makapasserbi kani Jehova maski nu egga ira problema da. Gigiammuattam nu kunnasi da nga makua yatun.

3. Anni i ikonsidera tam taw nga artikulo, anna anni paga i magigiammu tam?

³ Ikonsidera tam taw nga artikulo i appa nga gannug nga posible nga marigatan i elder ira nga kuan: (1) pangibalanse ta pallayyagayya anna tanakuan paga nga responsibilidad, (2) pamagaram ta wawwaragi, (3) pangarubang ta sarili nga pakkafian, anna (4) pangarubang ta pakkafian na tanakuan. Gigiammuattam nu kunnasi nga inarubang ni Pablo i kada tadday tatun anna nu kunnasi nga maparigan na elder ira i ehemplo na.

4. Ngatta posible nga marigatan i elder ira nga mabbalin tu makasta nga ehemplo ta pallayyagayya?

⁴ Nu ngatta mariga. Aru i responsibilidad na elder ira fuera paga ta pabbalin tu makasta nga ehemplo ta pallayyagayya. Angngarigan na, aru nira i maruddu nga mat-tserman nu study ta midweek anna mangikondukta ta Paggigiammu na Kongregasion tu Biblia. Tapus mappalappa paga ira. Aktibo ira nga massanay ta ministerial ira anna okupadu ira ta pamagaram ta wawwaragi. (1 Ped. 5:2) Mabboluntariu gapa i karuan nga elder ta pappataddag anna pammentena tu Kingdom Hall anna tanakuan paga nga teokratiko nga fasilidad. Ngem kagitta na ngamin nga wawwaragi ta kongregasion, i pallayyagayya i pinaka-importante nga trabahu na elder ira.​—Mat. 28:19, 20.

5. Anni i ehemplo ni Pablo ta pallayyagayya?

⁵ I ehemplo ni Pablo. Mabibbig ta Filipos 1:10 i nakoffun kani Pablo. Nitabarang na: “Pilian i kapianan ta ngamin.” Sinuttul na mismu yatun nga tabaranna. Ta aru nga dekada, minammatan na i ministerio na nga netalo ta nisa bilang tadday ta kapianan ta ngamin onu mas importante nga gannug. Nallayyagayya yayya ta “pagara-arubangan na totolay anna gibbalayan.” (King. 20:20) Ari laman yayya nga nallayyagayya ta partikular nga oras onu aggaw. Inapprobetcha na i kada oportunidad nga mallayyagayya! Angngarigan na, ta paginnag na ta kakavulu na ta Atenas, nilayyagayyan na i grupo na prominente nga totolay anna nangurug i karuan nira. (King. 17:16, 17, 34) Maski turi ta ‘nefuku’ si Pablo, nilayyagayyan na lagapa danuri mabbisita anna makavulu na.​—Fil. 1:13, 14; King. 28:16-24.

6. Kunnasi nga sinanay ni Pablo i tanakuan?

⁶ Inusa tu mapia ni Pablo i tiempo na. Kanayun yayya nga nangivulu tu tanakuan ta pallayyagayya na. Angngarigan na, ta ollu nga pabbiahe na bilang misionero, nivulu na si Juan Marcos anna ta mekadua, si Timoteo gapa i nivulu na. (King. 12:25; 16:1-4) Talaga kingngua ni Pablo i ngamin nga mawayya na tapenu tudduan ira nga mangorganisa ta kongregasion, mangipastor, anna mabbalin tu efektibo ta panuddu.​—1 Cor. 4:17.

7. Kunnasi nga matuttul na elder ira i tabarang ni Pablo ta Efeso 6:14, 15?

⁷ I magigiammu na elder ira. Maparigan na elder ira si Pablo nu ariadda laman nga mallayyagayya ta babalay. Sigga-paran nakuan gapa ira nga mallayyagayya kada egga i chansa. (Bibbigan i Efeso 6:14, 15.) Angngarigan na, awayya da mallayyagayya nu umay ira maggatang onu nu egga ira ta pattrabahuadda. Nu mabboluntariu gapa ira ta  pappataddag tu Kingdom Hall, awayya da layyagayyan i totolay ta pallevu onu i mallaku ira. Kagitta ni Pablo, awayya usan na elder ira i tiempo da ta ministerio ta passanay ta tanakuan, nelagum ngana i ministerial ira nga aripan.

8. Anni i mawag nga kuan na tadday nga elder nu karuan?

⁸ Siguraduan nakuan na elder ira nga egga tiempo da ta pallayyagayya maski nu okupadu ira ta annungadda ta kongregasion onu ta sirkito. Tapenu mattalupaddian ira nga balanse, baka mawag tu ariadda nga alawatan i tadday nga annungan nu karuan. Kabalidda nga nikonsidera anna nipakimallo yatun, awayya na nga manono da nga nu alawatadda yatun, ariadda ngana saw makua i mas importante ira nga gannug. Kasali tatun i pangikondukta ta family worship ta kada ligguan, matalikarag nga pallayyagayya, onu passanay ta ána da nga mallayyagayya. Marigatan i karuan nga pammanakitan i tadday nga annungan. Ngem makasiguradu ira nga mantindian ni Jehova i pakkaraga da nga mabbalin tu balanse ta ngamin nga gannug.

9. Megafu ta aru i trabahu na elder ira, marigatan ira nga kuan i anni?

⁹ Nu ngatta mariga. Aru nga kapurueba i meparubang ta totolay ni Jehova. Taw ta pangurianan nga aggaggaw, kawagattam ngamin i pamagaram, uffun, anna banna-bannay. Egga gapa tiempo nga mawag na karuan i uffun tapenu malillitan i marake nga kondukta. (1 Tes. 5:14) Siempre, ari nga mari na elder ira i ngamin nga kapurueba nga meparubang ta totolay ni Jehova. Ngem kayà ni Jehova nga kuan na elder ira i mawayya da tapenu mapagaram anna maprotektan i totolena. Maski gafu aru i trabahu na elder ira, kunnasi da lagapa nga moffunan i wawwaragi?

10. Segun ta 1 Tesalonica 2:7, kunnasi nga sinangngallan ni Pablo i totolay ni Jehova?

¹⁰ I ehemplo ni Pablo. Kanayun nga nagaleg si Pablo tu chansa tapenu komendan anna pagaramman i kapangngurug na ira. Makasta nu parigan na elder ira i ehemplo ni Pablo. Masippo nakuan ira ta totolay ni Jehova anna iddukadda ira. (Bibbigan i 1 Tesalonica 2:7.) Nipasiguradu ni Pablo ta kapangngurug na nga iddeddukan na ira anna iddeddukan gapa ira ni Jehova. (2 Cor. 2:4; Efe. 2:4, 5) Trinatu ni Pablo i wawwaragi ta kongregasion bilang kokkofun anna egga tiempo na ta nira. Ipasingan na nga mattalo yayya nira megafu ta kinagi na nira i pakavurungan na anna i pakkafian na ira. (2 Cor. 7:5; 1 Tim. 1:15) Kinagi na danatun tapenu uffunan i wawwaragi na, ari nga tapenu maffokus ira ta problema anna pakkafian na ira.

11. Ngatta sinabarangngan ni Pablo i kapangngurug na ira?

¹¹ Sinabarangngan gapa ni Pablo i kapangngurug  na ira ngem ari yayya nanabarang megafu ta lussaw na. Kingngua na yatun megafu ta iddukan na ira anna kayà na ira nga protektan ta peligro. Siniguradu na nga mabi malippawa i tabarang na anna kayà na nga alawatadda yatun. Angngarigan na, ta tura na ta taga-Corinto, sinabarangngan ni Pablo i wawwaragi. Tapus zinog na nira si Tito. Kakayà ni Pablo nga mammuan i reaksion na wawwaragi ta tura na. Kuruga magayayya yayya turi ta nammuan na nga inalawa anna niyaplika da i tabarang na!—2 Cor. 7:6, 7.

12. Kunnasi nga mapagaram na elder ira i kapangngurug da?

¹² I magigiammu na elder ira. Maparigan na elder ira si Pablo nu egga i tiempo da ta kapangngurug da. Tadday ta makua da tapenu metuppal yatun ay paggammia onu paggangay ta study nige paga nga mamegafu yatun tapenu makistoria anna mapagaram i tanakuan. Maruddu nga mapagaram i wawwaragi maski ta piga minuto laman nga pakibbida ta nira. (Roma 1:12; Efe. 5:16) Maparigan gapa na elder i ehemplo ni Pablo nu usan na i Uvovug na Dios ta pamagaram ta kapangngurug na ira anna ipasiguradu na ta nira nga iddeddukan ira na Dios. Ipatageno na gapa i aya na nira. Kanayun yayya nga makibbida ta nira anna magaleg tu chansa tapenu komendan ira. Nu manabarang gapa i elder, ibase na yatun ta Uvovug na Dios. Espesipiko anna masippo i panabarang na megafu ta kayà na nga alawatadda i tabarang na.​—Gal. 6:1.

13. Anni i posible nga matageno na elder megafu ta pakkafian na ira?

¹³ Nu ngatta mariga. Imperfekto i elder ira. Makaliwa gapa ira kagitta tam. (Roma 3:23) Marigatan gapa ira nu karuan nga mapeggan tu balanse nga pagimamma ta pakkafiadda ira. Awayya na nga agga-nono na karuan nira i pakkafiadda yatutta makkafi i nono da. Baka manono gapa na karuan nga baddi laman nga gannug i nakkamaliadda yari tu kampante ira anna nonopadda nga awan tu mawag nga uliadda.

14. Segun ta 2 Corinto 4:7, kunnasi nga nakoffun kani Pablo i kinapakalinno tapenu marubang i pakkafian na ira?

¹⁴ I ehemplo ni Pablo. Mapakalinno si Pablo yatutta ammu na nga arian na malabanan i pakkafian na ira nga yayya laman. Kawagan na i uffun na Dios. Dati nga awan tu allo ni Pablo nga nameppersigi ta Cristiano ira. Ngem narekunnisi na nga marake i kingngua na anna sigga-paran yayya nga ulian i appana-panono anna personalidad na. (1 Tim. 1:12-16) Ta uffun ni Jehova, nabbalin yayya tu minaggiddu, minangngikallo, anna mapakalinno nga elder. Maraddam yayya megafu ta  pakkafian na ira ngem ari yayya nga naffokus tatun. Nattalo yayya nga mapakoma yayya ni Jehova. (Roma 7:21-25) Ari na inekspekta nga ari yayya vuluvuga makaliwa. Kingngua na lallagu i ngamin nga mawayya na tapenu mapakasta i personalidad na bilang Cristiano anna mapakalinno nga nattalo ta uffun ni Jehova tapenu metuppal i trabahu na.​—1 Cor. 9:27; bibbigan i 2 Corinto 4:7.

15. Kunnasi nga mapeggan tu balanse nga pagimamma i elder ira ta sarili da nga pakkafian?

¹⁵ I magigiammu na elder ira. Natunno i elder ira ari nga megafu ta perfekto ira. Ngem ekspektan ni Jehova nga aminadda i nakkamaliadda anna pakastadda i personalidad da bilang Cristiano. (Efe. 4:23, 24) Usan nakuan na tadday nga elder i nagigiammu na ta Biblia tapenu masingan nu anni paga i mawag nga pakastan na. Nu kunnatun, uffunan yayya ni Jehova nga mabbalin tu magayayya anna mapia nga elder.​—Sant. 1:25.

16. Anni i posible nga mesimmu nu maffokus i tadday nga elder ta pakkafian na tanakuan?

¹⁶ Nu ngatta mariga. Ta pakikavulu na elder ira ta kongregasion, mabi laman nga masingadda i pakkafian na kapangngurug da. Ngem magimmugug nakuan ira tapenu ariadda makaporay, mabbalin tu istrikto, onu mina-husga. Niperaddam ni Pablo nga yatun i kayà ni Satanas nga pabbalinan na Cristiano ira.​—2 Cor. 2:10, 11.

17. Kunnasi nga minammatan ni Pablo i wawwaragi?

¹⁷ I ehemplo ni Pablo. Kanayun nga positibo i pagimamma na ta wawwaragi. Ammu na i liwa da ira megafu ta natakitan gapa yayya nu karuan ta kingngua da. Ngem ammu ni Pablo nga nu marake i nakua na tadday, arian na kayà kagian nga marake ngana yayya nga tolay. Iddeddukan na i wawwaragi anna naffokus yayya ta makasta ira nga kualidad da. Nu marigatan ira nga kuan i fustu, mas ninono na nga makasta i motibo da anna mawag da laman i uffun.

18. Anni i magigiammum ta pinanguffun ni Pablo kani Euodia anna Sintike? (Filipos 4:1-3)

¹⁸ Ikonsidera nu kunnasi inuffunan ni Pablo i dua nga sister ta kongregasion na Filipos. (Bibbigan i Filipos 4:1-3.) Posible nga egga i ari nga nakka-intindian ni Euodia anna Sintike yatutta ari ngana makasta i avvulu da. Ngem ari ira nga krinitika ni Pablo, ni tu napporay ta nira. Naffokus yayya ta mapia nga kualidad da. Matalo ira nga wagi nga nabayag ngana nga massesserbi kani Jehova. Ammu ni Pablo nga iddeddukan ira ni Jehova. Megafu tatun nga makasta nga pagimamma ni Pablo ta dua nga wagi, pinagaram na ira nga makkapakoma. Yatun nga positibo nga pagimamma na i namattalupaddian ta pagayayya na anna ta madukko nga pakikkofun na ta wawwaragi ta kongregasion.

19. (a) Kunnasi nga mapattalupaddian na elder ira i positibo nga pagimamma ta kapangngurug da? (b) Anni i magigiammum ta letratu na elder nga mappakarenu ta Kingdom Hall?

 ¹⁹ I magigiammu na elder ira. Maffokus nakuan i elder ira ta makasta ira nga kualidad na wawwaragi. Imperfekto i ngamin ngem siguradu nga egga lagapa i maappresia tam nga kualidad na kada wagi. (Fil. 2:3) Kurug nga nu karuan, mawag tu tabarangngan na elder ira i tadday nga wagi. Ngem kagitta ni Pablo, mappursigi nakuan i elder ira nga ari maffokus ta maka-irita nga kakkagian onu kukukuan na tanakuan. Maffokus lallagu ira ta aya na tadday kani Jehova, ta pagattattam na ta passerbi, anna ta potensial na nga kuan i mapia. Nu positibo i pagimamma na elder ira ta wawwaragi, matageno na wawwaragi nga iddeddukan ira na kongregasion.

20. Kunnasi paga nga mabenefisiowan i elder ira ta ehemplo ni Pablo?

²⁰ Makoffun nikamu nga elder nu gigiammuan nu paga i ehemplo ni Pablo. Angngarigan na, awayyam magaleg ta Watch Tower Publications Index ta main heading nga “Paul” tapus ta subheading nga “example for elders.” Ta pabbibbig mu ta referensia ira, iyavu mu ta baggim, ‘Kunnasi nga makoffun niakan i ehemplo ni Pablo tapenu mattalupaddian ngà nga magayayya ta pangituppal ku ta annungakku bilang elder?’

21. Anni i masiguradu na elder ira?

²¹ Elder ira, daddamman nu nga ari nga ikikkiddaw ni Jehova nga mabbalikkamu tu perfekto. Kayà na laman nga mabbalikkamu tu matalo. (1 Cor. 4:2) Inappresia ni Jehova i lallappo anna kinamatalo ni Pablo. Tagibaloran gapa na Dios i passerbim nisa. Makasiguradu ka tatun, ta si Jehova, “arian na nga kattaman i kingngua nu, onu i pangaya nu sa, nga nipasingan nu ta panguffun nu ta kakavvulu nu ta angngurug anna paddaggunan nu nga ipasingan adde sangoye.”​—Heb. 6:10.