1-2. Kasano a makatulong ti ulidan ni apostol Pablo kadagiti panglakayen ita?

 AY-AYATEN ni apostol Pablo dagiti kakabsatna. Kanayon a nagsakripisio para kadakuada. (Ara. 20:31) Gapu iti dayta, dinungdungngo met isuna dagiti kapammatianna. Iti maysa a gundaway, idi nadamag dagiti panglakayen manipud Efeso a saandan a makita manen ni Pablo, “nakaro ti panagsasangitda.” (Ara. 20:37) Dagiti nagagaget a panglakayentayo ay-ayatenda met unay dagiti kakabsatda. Ar-aramidenda met ti amin a kabaelanda a tumulong kadakuada. (Fil. 2:16, 17) Ngem no dadduma, adda dagiti pakarigatan a pakaipaspasanguan dagiti panglakayen. Ania ti makatulong tapno mapagballigianda dagita?

² Mabalin nga usigen dagiti nagagaget a panglakayen ti ulidan ni Pablo. (1 Cor. 11:1) Ni Pablo ket saan a superman. Imperpekto isuna, ken no dadduma, marigatan a mangaramid iti umiso. (Roma 7:18-20) Adda met ti nadumaduma a problemana. Ngem saan a simmuko ni Pablo wenno saanen a naragsak. No tuladen dagiti panglakayen ti ulidan ni Pablo, mapagballigianda dagiti pakarigatan ken agtultuloyda a naragsak nga agserserbi ken Jehova. Kitaentayo no kasano.

3. Ania ti pagsasaritaantayo iti daytoy nga artikulo, ken ania pay ti masursurotayo?

³ Iti daytoy nga artikulo, pagsasaritaantayo ti uppat a gagangay a pakarigatan a pakaipaspasanguan dagiti panglakayen: (1) panangbalanse iti tiempo para iti panangasaba ken iti dadduma pay a responsabilidad, (2) panagbalin a nadungngo a pastor, (3) pananglaban kadagiti personal a pagkapuyan, ken (4) pananganus kadagiti pagkapuyan ti sabsabali. Pagsasaritaantayo no kasano a napagballigian ni Pablo ti tunggal pakarigatan ken no kasano a matulad dagiti panglakayen ti ulidanna.

4. Apay a mabalin a marigatan dagiti panglakayen a mangidaulo iti panangasaba?

⁴ No apay a mabalin a narigat. Adu ti responsabilidad dagiti panglakayen malaksid iti panangidauloda iti panangasaba. Kas pagarigan, adu kadakuada ti agsisinnublat nga agtserman iti gimong iti tengnga ti lawas ken mangikondukta iti Panagadal ti Kongregasion iti Biblia. Mabalin nga agsaganada met iti dadduma pay a palawag. Sansanayenda dagiti ministerial nga adipen ken siraragsakda a mangparparegta iti kakabsat. (1 Ped. 5:2) Adda met dagiti panglakayen a tumultulong iti panagibangon ken panangmantener kadagiti Kingdom Hall ken dadduma pay a pasilidad ti organisasion. Ngem kas iti amin a kakabsat iti kongregasion, ti panangikasaba iti naimbag a damag ti kangrunaan a trabaho ti panglakayen.​—Mat. 28:19, 20.

5. Ania ti inyulidan ni Pablo kas manangaskasaba?

⁵ Ulidan ni Pablo. Ti tulbek ti panagballigi ni Pablo ket imbagana iti Filipos 1:10: ‘Siguraduenyo ti napatpateg a bambanag.’ Sinurot ni Pablo ti mismo nga imbagana. Adda naitalek kenkuana a maysa a ministerio, ket iti adu a dekada, imbilangna dayta a maysa kadagiti kapatgan iti biagna. Nangaskasaba iti “publiko ken iti binalaybalay.” (Ara. 20:20) Saan laeng a nangasaba iti maysa a partikular nga oras wenno aldaw iti makalawas. Ginundawayanna ti mangasaba iti tunggal oportunidad! Kas pagarigan, bayat nga ur-urayenna ti kakaduana idiay Atenas, impakaammona ti naimbag a damag iti maysa a grupo dagiti prominente a tattao, ket positibo ti resulta dayta. (Ara. 17:16, 17, 34) Uray idi ‘naibalud’ ni Pablo, kinasabaanna latta dagidiay adda iti aglawlawna.​—Fil. 1:13, 14; Ara. 28:16-24.

6. Kasano a sinanay ni Pablo ti sabsabali?

⁶ Inusar ni Pablo ti tiempona iti kasayaatan a pamay-an. Masansan idi nga awisenna ti dadduma a makikadua kenkuana iti ministerio. Kas pagarigan, iti umuna a panagmisionerona, inkaduana ni Juan Marcos, ken iti maikadua, ni Timoteo. (Ara. 12:25; 16:1-4) Sigurado nga inkagumaan ni Pablo nga isuro kadagitoy a lallaki no kasano ti mangorganisar iti kongregasion, mangipastor, ken agbalin nga epektibo a mannursuro.​—1 Cor. 4:17.

7. Kasano a masurot dagiti panglakayen ti imbaga ni Pablo iti Efeso 6:14, 15?

⁷ Leksion. Matulad dagiti panglakayen ti ulidan ni Pablo no saanda laeng a mangasaba iti binalaybalay no di ket sisasagana ken situtulokda pay a mangasaba iti tunggal gundaway. (Basaen ti Efeso 6:14, 15.) Kas pagarigan, mabalinda ti mangasaba no addada iti paglakuan wenno iti pagtrabahuanda. Wenno mabalinda  nga ipakaammo ti naimbag a damag kadagiti lumugar ken aglaklako bayat a tumultulongda iti panagibangon kadagiti pasilidad ti organisasion. Kas ken Pablo, mabalin nga usaren dagiti panglakayen ti tiempoda iti ministerio a mangsanay iti sabsabali, a pakairamanan dagiti ministerial nga adipen.

8. No dadduma, ania ti masapul nga aramiden ti maysa a panglakayen?

⁸ Uray kasano ti kina-busy dagiti panglakayen kadagiti responsabilidadda iti kongregasion wenno iti sirkito, masapul nga adda latta koma tiempoda a mangasaba. Tapno agtalinaedda a balanse, baka kasapulan a saanda nga awaten ti dadduma nga asaynment. Kalpasan nga inkararag ken pinanunotda dayta, mabalin a maamirisda a no awatenda ti maysa nga asaynment, baka mabaybay-anda dagiti napatpateg a bambanag. Karaman kadagita ti panangidaulo iti linawas a panagdaydayaw ti pamilia, sireregta a pannakiraman iti ministerio, wenno panangsanay kadagiti annak a mangasaba. Adda dagidiay marigatan nga agsaan iti maysa a pribilehio, ngem masiguradoda a maawatan ni Jehova ti tarigagayda nga agbalin a balanse iti amin a banag.

9. Ania a pakarigatan ti pakaipaspasanguan dagiti panglakayen nga adu ti as-asikasuenda?

⁹ No apay a mabalin a narigat. Adu ti pakasuotan dagiti adipen ni Jehova. Kadagitoy maudi nga al-aldaw, kasapulantayo amin ti pammaregta, suporta, ken liwliwa. Ken no dadduma, adda dagidiay agkasapulan iti tulong tapno saanda a makaaramid iti di umiso. (1 Tes. 5:14) Siempre, saan a maikkat dagiti panglakayen ti amin a pakasuotan dagiti adipen ni Jehova. Nupay kasta, kayat ni Jehova nga aramiden dagiti panglakayen ti amin a kabaelanda a mangparegta ken mangsalaknib kadagiti karnerona. Kasano a maiwayaan dagiti busy a panglakayen ti mangipaay iti kasapulan a tulong?

10. Maitunos iti 1 Tesalonica 2:7, kasano nga inaywanan ni Pablo dagiti adipen ni Jehova?

¹⁰ Ulidan ni Pablo. Nangbirok ni Pablo kadagiti pamay-an a mangkomendar ken mangpabileg kadagiti kakabsat. Nasayaat a tuladen dagiti panglakayen ti ulidanna babaen ti nadungngo a panangtratoda kadagiti adipen ni Jehova. (Basaen ti 1 Tesalonica 2:7.) Impasigurado ni Pablo kadagiti kapammatianna nga ay-ayatenna ida ken ay-ayaten ida ni Jehova. (2 Cor. 2:4; Efe. 2:4, 5) Trinato ni Pablo dagiti kakabsat iti kongregasion kas gagayyem, ken nangiwaya iti tiempo a makikadua kadakuada. Impakitana a pagtaltalkanna ida ta imbagana kadakuada dagiti pagdandanagan ken pagkapuyanna. (2 Cor. 7:5; 1 Tim. 1:15) Ngem saan a nagpokus ni Pablo kadagiti bukodna a problema. Imbes ketdi, kayatna a tulongan dagiti kakabsatna.

11. Apay a binalakadan ni Pablo dagiti kakabsat?

¹¹ No dadduma, kasapulan a balakadan ni Pablo dagiti kakabsat. Ngem dina pulos inaramid  dayta gapu iti suronna. Binalakadanna ida ta maseknan kadakuada ken kayatna a protektaran ida iti nadumaduma a peggad. Inkagumaanna ti mangbalakad iti pamay-an a nalaka a maawatan ken maakseptar. Kas pagarigan, nangted ni Pablo iti nadagsen a balakad iti suratna kadagiti taga-Corinto. Idi nalpasna dayta a surat, imbaonna ni Tito kadakuada. Kayat la unay a maammuan ni Pablo no ania ti reaksionda iti suratna. Sigurado a naragsakan idi naammuanna nga impangagda ti balakadna!​—2 Cor. 7:6, 7.

12. Kasano a mapabileg dagiti panglakayen dagiti kapammatianda?

¹² Leksion. Masurot dagiti panglakayen ti ulidan ni Pablo no mangiwayada iti tiempo a makikadua kadagiti kapammatianda. Ti maysa a pamay-an a maaramidda daytoy ket nasapada kadagiti gimong ti kongregasion tapno makipinnaregtada iti sabsabali. Masansan a sumagmamano laeng a minuto ti kasapulan tapno maipaay ti naayat a pammaregta a kasapulan ti maysa a kabsat. (Roma 1:12; Efe. 5:16) Ti panglakayen a mangsursurot iti ulidan ni Pablo paregtaenna met dagiti kapammatianna. Usarenna ti Biblia a mangpabileg kadakuada ken ipasiguradona nga ay-ayaten ida ti Dios. Kasta met, ipakpakitana ti ayatna kadagidiay adda iti aywanna. Kanayon a komustaenna ida ken bumirok kadagiti gundaway a mangkomendar kadakuada. No masapul a mangbalakad ti maysa a panglakayen, ibatayna dayta iti Sao ti Dios. Espesipiko ken nasingpet ti panangbalakadna ta kayatna a mayaplikar dayta.​—Gal. 6:1.

13. Ania ti mabalin nga epekto iti maysa a panglakayen dagiti personal a pagkapuyanna?

¹³ No apay a mabalin a narigat. Saan a perpekto dagiti panglakayen. Makaaramidda met kadagiti kamali kas kadatayo amin. (Roma 3:23) No dadduma, mabalin a saan a balanse ti panangmatmatda kadagiti pagkapuyanda. Baka sangkapanunot ti dadduma dagiti limitasionda isu a maupayda. Baka dagus a pagpambar ti dadduma dagiti pagkapuyanda, isu a kampanteda ken dida agporsegi nga agbalbaliw.

14. Sigun iti Filipos 4:13, kasano a nakatulong ken Pablo ti kinapakumbaba tapno mapagballigianna dagiti pagkapuyanna?

¹⁴ Ulidan ni Pablo. Sipapakumbaba a binigbig ni Pablo a saanna a mapagballigian dagiti pagkapuyanna nga is-isuna. Kasapulanna ti bileg nga ipapaay ti Dios. Ni Pablo ket dati a naranggas a manangidadanes kadagiti Kristiano. Ngem idi agangay, inaminna dagiti nagkamalianna ken situtulok a binalbaliwanna ti kababalin ken personalidadna. (1 Tim. 1:12-16) Iti  tulong ni Jehova, nagbalin ni Pablo a naayat, mannakipagrikna, ken napakumbaba a pastor. Ammona nga adu ti pagkapuyanna; ngem nagtalek a pinakawanen ni Jehova dagiti nagkamalianna imbes a sangkapanunotna dagita. (Roma 7:21-25) Ammona nga imperpekto latta isuna. Ngem inkagumaanna a pasayaaten ti Nakristianuan a personalidadna ken sipapakumbaba a nagtalek a tulongan ni Jehova a mangitungpal iti trabahona.​—1 Cor. 9:27; basaen ti Filipos 4:13.

15. Kasano nga agbalin a balanse ti panangmatmat dagiti panglakayen kadagiti pagkapuyanda?

¹⁵ Leksion. Dagiti panglakayen ket saan a naapointaran gapu ta perpektoda. Ngem ekspektaren ni Jehova nga aminenda dagiti kamalida ken kultibarenda ti Nakristianuan a personalidad. (Efe. 4:23, 24) Masapul nga usigen ti maysa a panglakayen ti bagina babaen ti Sao ti Dios ken aramidenna dagiti kasapulan a panagbalbaliw. Iti kasta, tulongan isuna ni Jehova nga agbalin a naragsak ken naballigi.​—Sant. 1:25.

16. Ania ti mabalin a mapasamak no agpokus ti panglakayen kadagiti pagkapuyan ti sabsabali?

¹⁶ No apay a mabalin a narigat. Mabalin a nalaka a makita dagiti panglakayen dagiti pagkapuyan dagiti kakabsat iti kongregasion gapu ta masansan a makaduada ida. Ngem no saan nga agannad dagiti panglakayen, mabalin a masuronda, agbalinda a nauyong, wenno mananghusgar. Pinakdaaran ni Pablo dagiti Kristiano a kasta ti kayat ni Satanas nga aramidenda.​—2 Cor. 2:10, 11.

17. Ania ti panangmatmat ni Pablo kadagiti kakabsat?

¹⁷ Ulidan ni Pablo. Kanayon a positibo ti panangmatmatna kadagiti kakabsat. Ammona dagiti kamalida, isu a no dadduma, masaktan ti riknana kadagiti inaramidda. Ngem ammo ni Pablo a saan a gapu ta nakaaramid iti dakes ti maysa a tao, isu ket dakesen. Ay-ayatenna dagiti kakabsat ken nagpokus kadagiti nasayaat a kualidadda. No marigatan idi dagiti kakabsat a mangaramid iti umiso, pinanunotna a nasayaat ti motiboda ken kasapulanda laeng ti tulong.

18. Ania ti masursurom iti panangtulong ni Pablo kada Euodia ken Sintique? (Filipos 4:1-3)

¹⁸ Kas pagarigan, usigentayo no kasano a tinulongan ni Pablo ti dua a kakabsat a babbai iti kongregasion ti Filipos. (Basaen ti Filipos 4:1-3.) Posible a binay-an da Euodia ken Sintique a madadael ti panaggayyemda gapu iti dida panagkinnaawatan. Saan a nauyong wenno mananghusgar ni Pablo; nagpokus ketdi kadagiti nasayaat a kualidadda. Matalekda a kakabsat ken nabayagen nga agserserbida ken Jehova. Ammo ni Pablo nga ay-ayaten ida ni Jehova. Gapu ta positibo ti panangmatmat kadakuada ni Pablo, pinaregtana ida a solbarenda ti dida panagkinnaawatan. Nakatulong met dayta ken Pablo tapno agtalinaed a naragsak ken nasinged ti pannakigayyemna kadagiti kakabsat iti dayta a kongregasion.

19. (a) Kasano a mapagtalinaed dagiti panglakayen ti positibo a panangmatmatda kadagiti kapammatianda? (b) Ania ti masursurom iti ladawan ti maysa a panglakayen nga agdaldalus iti Kingdom Hall?

 ¹⁹ Leksion. Papanglakayen, kitaenyo dagiti nasayaat a kualidad dagiti kakabsat. Imperpektoda amin; ngem adda apresiarentayo a kualidad ti tunggal maysa kadakuada. (Fil. 2:3) Pudno nga adda dagiti tiempo a masapul nga aturen dagiti panglakayen ti panagpampanunot ti maysa a kabsat. Ngem kas ken Pablo, saan nga agpokus dagiti panglakayen kadagiti makapasuron a sasao ken ar-aramid dayta a kabsat. Nasayaat nga agpokusda iti ayatna ken Jehova, iti panagibturna nga agserserbi iti Dios, ken iti panangikagumaanna nga agaramid iti naimbag. No kasta ti aramiden dagiti panglakayen, maipariknada kadagiti kakabsat nga ay-ayaten ida ti amin iti kongregasion.

20. Kasano nga agtultuloy a magunggonaan dagiti panglakayen iti ulidan ni Pablo?

²⁰ Makatulong kadakayo a panglakayen no itultuloyyo nga adalen ti ulidan ni Pablo. Kas pagarigan, iti Watch Tower Publications Index, kitaem ti main heading a “Paul” sa iti subheading nga “example for elders.” Bayat a basbasaem ti dadduma nga artikulo sadiay, isaludsodmo iti bagim, ‘Kasano a makatulong kaniak ti ulidan ni Pablo tapno agtalinaedak a naragsak bayat nga itungtungpalko ti trabahok kas panglakayen?’

21. Ania ti masigurado dagiti panglakayen?

²¹ Papanglakayen, laglagipenyo a saan a kidkiddawen ni Jehova nga agbalinkayo a perpekto; ti laeng kidkiddawenna ket agbalinkayo a matalek. (1 Cor. 4:2) Inapresiar ni Jehova ti kinagaget ken kinamatalek ni Pablo. Masiguradoyo met a napateg iti Dios ti panagserbiyo. Dinto pulos “lipaten [ni Jehova] ti aramidyo ken ti ayat nga impakitayo iti naganna, babaen ti panagserbiyo ken agtultuloy a panagserbiyo kadagiti nasantuan.”​—Heb. 6:10.