14-زەرتتەۋ ماقالاسى
اقساقالدار، پاۋىلدىڭ ۇلگىسىنە ەلىكتەي بەرىڭىزدەر
«سەندەر دە ماعان ەلىكتەڭدەر» (قور. 1-ح. 11:1).
99-ٵن سانسىز كوپ باۋىرلاستار
اڭداتپا *
1، 2. ەلشى پاۋىل اقساقالدارعا نەسىمەن ۇلگى بولا الادى؟
ەلشى پاۋىل باۋىرلاستارىن قاتتى جاقسى كورگەن. ولاردىڭ قامى ٷشىن ايانباي تەر توككەن (ەل. ٸس. 20:31). سول ٷشىن دە باۋىرلاستاردىڭ پاۋىل دەسە ٸشى-باۋىرى ەلجىرەپ تۇرعان. مىسالى، ەفەستەگى اقساقالدار ەندى ونى قايتىپ كورمەيتىندەرىن تۇسىنگەندە، «ٴبارى قاتتى جىلاعان» (ەل. ٸس. 20:37). پاۋىل سياقتى، ٴبىزدىڭ ەڭبەكقور اقساقالدارىمىز دا باۋىرلاستارىن قاتتى جاقسى كورەدى جانە ولاردان ەشبىر كومەگىن ايامايدى (ٴفىلىپ. 2:16، 17). ٴبىراق ولار كەزىگەتىن كەيبىر قيىنشىلىقتار بار. سوندايدا ولارعا نە كومەك بولادى؟
2 اقساقالدار پاۋىلدىڭ ۇلگىسىن قاراستىرسا بولادى (قور. 1-ح. 11:1). پاۋىل پەرىشتە ەمەس، كەمەلسىز پەندە بولعان. دۇرىس ارەكەت ەتۋ وعان دا قيىنعا سوققان (ريم. 7:18—20). ونىڭ ۇستىنە، ونىڭ ٶز باسىندا دا ٴبىراز پروبلەمالارى بولعان. ٴبىراق سوعان قاراماستان، ول باۋىرلاستارىنا قىزمەت ەتۋدى دوعارماعان جانە قۋانىشىن دا ساقتاي بىلگەن. اقساقالدار دا پاۋىلعا ەلىكتەپ، قيىندىقتارىنا قاراماستان، قىزمەتتەرىن قۋانىشپەن جالعاستىرا الادى. ٴقازىر سونىڭ جولدارىن بىلەيىك.
3. بۇل ماقالادان نە بىلەمىز؟
3 وسى ماقالادا اقساقالدارعا ٴجيى قيىنعا سوعاتىن ٴتورت جايتتى قاراستىرامىز. ولار: 1) باسقا جاۋاپكەرشىلىكتەرمەن بىرگە ۋاعىز ٸسىن دە قاتار الىپ ٴجۇرۋ؛ 2) قامقور باعۋشى بولۋ؛ 3) وزدەرىنىڭ كەمشىلىكتەرىمەن كۇرەسۋ جانە 4) كەمەلسىز ادامدارمەن قىزمەتتەسۋ. وسى ٵربىر جاعدايدا پاۋىلعا نە كومەكتەسكەنىن، ال اقساقالدار وعان قالاي ەلىكتەي الاتىنىن بىلەيىك.
ۋاعىز ٸسىن باسقا جاۋاپكەرشىلىكتەرمەن قاتار الىپ ٴجۇرۋ
4. نەلىكتەن اقساقالدارعا ۋاعىز ىسىندە جاقسى ۇلگى كورسەتۋ قيىن بولۋى مۇمكىن؟
4 نەگە بۇل قيىنعا سوعادى؟ ۋاعىزداۋ ىسىندە جەتەكشىلىك ەتۋمەن قاتار، اقساقالداردىڭ موينىندا باسقا دا كوپ جاۋاپكەرشىلىكتەر بار. مىسالى، ولار كەزەكتەسىپ اپتا ىشىندەگى كەزدەسۋدى جانە قاۋىمدا كيەلى كىتاپتى زەرتتەۋ بولىگىن جۇرگىزىپ تۇرادى. باسقا دا باياندامالارمەن شىعادى. ولار قىزمەت كومەكشىلەرىن كوپ نارسەگە ۇيرەتەدى ٵرى قاۋىمداعى باۋىرلاستاردى دا ۇنەمى نىعايتىپ، جىگەرلەندىرىپ وتىرادى (پەت. 1-ح. 5:2). سونداي-اق كەيبىرى پاتشالىق سارايلارى مەن باسقا تەوكراتيالىق عيماراتتاردى سوعۋ مەن جوندەۋ جۇمىستارىنا اتسالىسادى. دەگەنمەن قاۋىمداعى بارلىق باۋىرلاستار سياقتى، ولار ٷشىن دە ەڭ باستى ٸس — ىزگى حاباردى ۋاعىزداۋ (مات. 28:19، 20).
5. پاۋىل ىزگى حاباردى ۋاعىزداۋ جاعىنان قانداي ۇلگى قالدىردى؟
5 پاۋىلدىڭ ۇلگىسى. پاۋىلدىڭ ۋاعىز ىسىندە كوپ جەتىستىككە جەتكەنىنىڭ سىرى ٶزىنىڭ فىلىپىلىكتەرگە 1:10 داعى كەڭەسىنە ساي ارەكەت ەتكەنىندە بولعان. ول تارماقتا پاۋىل: «نەنىڭ ماڭىزدىراق ەكەنىنە كوز جەتكىزىڭدەر»،— دەگەن. ول وزىنە تاپسىرىلعان قىزمەتكە ادال بولىپ، ونداعان جىل بويى ۋاعىزداۋ ٸسىن باستى ورىنعا قويعان. «ەل الدىندا جانە ۇيدەن ۇيگە ٴجۇرىپ» ىزگى حاباردى جاريالاعان (ەل. ٸس. 20:20). ول كۇننىڭ ٴبىر مەزگىلىندە عانا نەمەسە اپتانىڭ ٴبىر كۇنىندە عانا ۋاعىزدايمىن دەمەگەن، ٵربىر مۇمكىندىكتى پايدالانعان. بىردە ول افينا قالاسىندا سەرىكتەرىن كۇتىپ وتىرعاندا، ٴبىر توپ بەدەلدى كىسىگە ۋاعىزدايدى، ناتيجەسىندە ولاردىڭ كەيبىرى ىزگى حابارعا قۇلاق اسىپ، جاقسى قابىلدايدى (ەل. ٸس. 17:16، 17، 34). ول ٴتىپتى «بۇعاۋدا وتىرعاندا» دا، اينالاسىنداعى ادامدارعا ىزگى حاباردى ايتىپ وتىرعان (ٴفىلىپ. 1:13، 14؛ ەل. ٸس. 28:16—24).
6. پاۋىل وزگەلەرگە نەنى ۇيرەتكەن؟
6 پاۋىل ٴجيى وزگەلەردى وزىمەن بىرگە ۋاعىزداۋعا شاقىرىپ تۇرعان. مىسالى، ٴبىرىنشى ميسسيونەرلىك ساپارىندا ول مارقانى، ال ەكىنشىسىندە تىموتەنى ەرتىپ جۇرگەن (ەل. ٸس. 12:25؛ 16:1—4). سول كەزدە دە پاۋىل ۋاقىتىن ٴتيىمدى پايدالانىپ، ولارعا قاۋىمدى ۇيىمداستىرۋدى، باقتاشىلىق ٸستى اتقارۋدى، جاقسى تالىمگەر بولۋدى ۇيرەتكەنى ٴسوزسىز (قور. 1-ح. 4:17).
پاۋىلعا ەلىكتەپ، كۋالىك بەرۋگە دايىن بولىڭىز (7-ابزاستى قاراڭىز) *
7. اقساقالدار پاۋىلدىڭ ەفەستىكتەرگە 6:14، 15 تەگى سوزدەرىن قالاي ٸس جۇزىندە ورىنداي الادى؟
7 الار ساباق. اقساقالدار پاۋىلدان ۇيدەن ۇيگە ۋاعىزداۋدى عانا ەمەس، ٵربىر مۇمكىندىكتى پايدالانىپ، كۋالىك بەرۋگە دايىن بولۋدى دا ۇيرەنەدى (ەفەستىكتەرگە 6:14، 15 وقىڭىز). مىسالى، ولار بازار يا دۇكەن ارالاعاندا نە وزدەرىنىڭ جۇمىس ورنىندا ۋاعىزداسا بولادى. ال ەگەر تەوكراتيالىق قۇرىلىس جوباسىنا قاتىسىپ جۇرسە، كورشىلەرگە يا قۇرىلىس زاتتارىن ساتۋشىلارعا كۋالىك بەرە الادى. پاۋىل سياقتى، ولار دا ۋاعىز قىزمەتىندە ٴجۇرىپ باسقالاردى، مىسالى قىزمەت كومەكشىلەرىن، كوپ نارسەگە ۇيرەتە الادى.
8. اقساقالدارعا كەيدە نە ىستەۋ قاجەت بولادى؟
8 اقساقالدار ەشقاشان دا قاۋىمنىڭ نە اۋداننىڭ ىستەرىنە بار ۋاقىتىن جۇمساپ، ۋاعىز ٸسىن شەت قالدىرىپ قويماۋ كەرەك. وسى رەتتە بالانس ساقتاۋ ٷشىن، كەيدە ولارعا كەيبىر تاپسىرمالاردان باس تارتۋ كەرەك بولاتىن شىعار. ولار دۇعا ەتە وتىرىپ ويلانعاننان كەيىن، بۇل تاپسىرمانى موينىنا السا، ودان دا ماڭىزدىراق ىستەر اقساپ قالاتىنىن ٴتۇسىنۋى مۇمكىن. مۇنداي ماڭىزدى ىستەرگە وتباسىلىق عيباداتتى اپتا سايىن وتكىزۋ، ۋاعىز ىسىندە قۇلشىنىستى بولۋ جانە بالالارىن دا وسى ىسكە باۋلۋ جاتادى. ەگەر سىزگە قوسىمشا جاۋاپكەرشىلىكتەردەن باس تارتۋ قيىن بولسا، ەحوبا ٴسىزدى جاقسى تۇسىنەتىنىن ۇمىتپاڭىز. ول ٴسىزدىڭ ٶز جاۋاپكەرشىلىكتەرىڭىزدى بارىنشا جاقسى اتقارعىڭىز كەلەتىنىن كورىپ تۇر.
قامقور باعۋشى بولۋ
9. جاۋاپكەرشىلىكتەرى كوپ بولعاندىقتان، اقساقالدارعا نە نارسە قيىنعا سوعۋى مۇمكىن؟
9 نەگە بۇل قيىنعا سوعادى؟ ەحوبانىڭ حالقى كوپتەگەن قيىندىقتارمەن كۇرەسىپ ٴجۇر. اسىرەسە وسى سوڭعى كۇندەرى جىگەر، جۇبانىش پەن دەمەۋگە ٵرقايسىسىمىز مۇقتاجبىز. ال كەيبىرەۋلەرىمىزگە بۇرىس ىستەردەن اۋلاق ٴجۇرۋ ٷشىن كومەك كەرەك بولىپ جاتادى (سال. 1-ح. 5:14). ارينە، قاۋىمداعى بارلىق باۋىرلاستاردىڭ قيىندىعىن شەشىپ، جوق قىلىپ تاستاۋ اقساقالداردىڭ قولىنان كەلمەيدى. دەسە دە ەحوبا ولاردىڭ قولدارىنان كەلگەنشە حالقىنىڭ جىگەرىن قايراپ، ولارعا قورعانىش بولعانىن قالايدى. سوندا ونسىز دا كوپ جاۋاپكەرشىلىگى بار اقساقالدار قاۋىمداعى باۋىرلاستارعا قاجەتتى كومەك كورسەتۋ ٷشىن ۋاقىتتى قايدان تابا الادى؟
ٶزگەلەردى ماقتاپ، جىگەرلەندىرىڭىز (10، 12-ابزاستاردى قاراڭىز) *
10. سالونيكالىقتارعا 1-حات 2:7 گە ساي، پاۋىل باۋىرلاستارىنا قالاي قامقور بولعان؟
10 پاۋىلدىڭ ۇلگىسى. اقساقالدار پاۋىلعا ەلىكتەپ، باۋىرلاستارىن ايالاپ، جاقسى كورگەندەرى (سالونيكالىقتارعا 1-حات 2:7 وقىڭىز). پاۋىل باۋىرلاستاردىڭ رۋحىن كوتەرىپ، ولاردى ماقتاۋدىڭ ورايىن ىزدەپ وتىرعان. ولاردى ٶزى دە جاقسى كورەتىنىن، ەحوبانىڭ دا جاقسى كورەتىنىن ايتىپ وتىرعان (قور. 2-ح. 2:4؛ ەفەس. 2:4، 5). باۋىرلاستارىنا دوس رەتىندە قاراپ، ولارمەن ارالاسىپ، ۋاقىت وتكىزگەن. ٴتىپتى ولارعا قورقىنىشى مەن السىزدىكتەرىن دە جاسىرماي ايتىپ، سەنىم ارتاتىنىن كورسەتكەن (قور. 2-ح. 7:5؛ ٴتىم. 1-ح. 1:15). ٴبىراق بۇلاردى وزىنە نازار اۋدارتۋ ٷشىن ەمەس، باۋىرلاستارعا كومەكتەسۋ ماقساتىمەن ايتقان.
11. پاۋىل باۋىرلاستارعا نە سەبەپتى كەڭەس بەرگەن؟
11 پاۋىل قاجەت كەزدە قاۋىمداعىلارعا كەڭەس تە بەرگەن. ٴبىراق ول ەشقاشان دا كەڭەسىن باۋىرلاسقا اشۋلانعاندىقتان ەمەس، ونىڭ يگىلىگىن ويلاعاندىقتان، جاماندىقتان ساقتاندىرعىسى كەلگەندىكتەن بەرگەن. ول كەڭەستى تۇسىنىكتى بولاتىنداي جەتكىزگەن ٵرى ادامنىڭ ونى قابىلداپ، قۇلاق اسقانىن قالاعان. مىسالى، بىردە ول قورىنتتىقتاردى قاتاڭ تۇزەتىپ حات جازدى. ٴسۇيتىپ، ولاردىڭ بۇل تۇزەتۋدى قالاي قابىلداعانىن ويلاپ ۋايىمداعاندىقتان، حاتتىڭ سوڭىنان ولارعا ٴتيتتى جىبەردى. باۋىرلاستار ونىڭ كەڭەسىن جاقسى قابىلداپ، قۇلاق اسقانىن بىلگەندە، پاۋىلدىڭ قۋانىشىندا شەك بولمادى! (قور. 2-ح. 7:6، 7).
12. اقساقالدار باۋىرلاستارىن قالاي نىعايتىپ، جىگەرلەندىرە الادى؟
12 الار ساباق. اقساقالدار پاۋىلدى ۇلگى ەتىپ، باۋىرلاستارمەن ارالاسۋ ٷشىن ۋاقىت بولەدى. باۋىرلاستارمەن اڭگىمەلەسىپ، جىگەرلەندىرۋ ٷشىن، مىسالى، ولار قاۋىمعا ەرتەرەك كەلسە بولادى. باۋىرلاسقا كەرەكتى، جىگەرلى دە جىلى سوزدەر ايتۋعا ٴجيى بىرنەشە مينۋتتىڭ ٶزى جەتكىلىكتى بولىپ جاتادى (ريم. 1:12؛ ەفەس. 5:16). سونداي-اق اقساقالدار پاۋىلعا ەلىكتەپ، باۋىرلاستاردىڭ سەنىمىن نىعايتۋ ٷشىن جانە ەحوبانىڭ ولاردى سۇيەتىنىنە كوزدەرىن جەتكىزۋ ٷشىن قۇداي سوزىنە جۇگىنەدى. ٶزىنىڭ دە ولاردى قاتتى جاقسى كورەتىنىن ٴبىلدىرىپ وتىرادى. ولارمەن بايلانىستى جوعالتپايدى ٵرى ماقتاۋدىڭ مۇمكىندىگىن ىزدەيدى. ال ەگەر باۋىرلاسقا كەڭەس بەرۋ قاجەت بولسا، ونى كيەلى كىتاپقا نەگىزدەيدى. ول مەيىرىممەن، ٴبىراق ناقتى كەڭەس بەرەدى. ويتكەنى باۋىرلاستىڭ سول كەڭەستى قابىلداپ، قۇلاق اسقانىن قالايدى (عال. 6:1).
ٶز كەمشىلىكتەرىمەن كۇرەسۋ
13. اقساقالدار وزدەرىنىڭ كەمشىلىكتەرىنە قالاي قاراۋى مۇمكىن؟
13 نەگە بۇل قيىنعا سوعادى؟ اقساقالدار كەمەلدى ەمەس، بارلىعىمىز سياقتى ولار دا قاتەلەسەدى (ريم. 3:23). ٴبىراق ٶز كەمشىلىكتەرىنە دۇرىس قاراۋ اقساقالدارعا كەيدە قيىن بولۋى مۇمكىن. مىسالى، بىرەۋلەرى قاتەلىكتەرىن ويلاي بەرگەننەن سالى سۋعا كەتىپ، ٴتۇڭىلىپ كەتسە، باسقالارى وزدەرىن بىردەن اقتاپ، قاتەلىكتەرىنە ٴمان بەرمەي، تۇزەلمەي جۇرە بەرۋى مۇمكىن.
14. فىلىپىلىكتەرگە 4:13 كە ساي، پاۋىل قالاي كىشىپەيىلدىلىكتىڭ ارقاسىندا ٶز كەمشىلىكتەرىنە دۇرىس قاراي ٴبىلدى؟
14 پاۋىلدىڭ ۇلگىسى. پاۋىل كىشىپەيىل بولعان، سوندىقتان ٶزىنىڭ كەمشىلىكتەرىن ٶزى جەڭە المايتىنىن، قۇدايدىڭ كومەگىنە مۇقتاج ەكەنىن تۇسىنگەن. ەسىمىزدە بولسا پاۋىل بۇرىندا ماسىحشىلەردى اياۋسىز قۋدالاعان ادام بولعان. ٴبىراق كەيىننەن ٶزىنىڭ اعاتتىعىن مويىنداپ، كوزقاراسى مەن بولمىسىن دا وزگەرتۋگە دايىن بولدى (ٴتىم. 1-ح. 1:12—16). ٴسۇيتىپ، ەحوبانىڭ ارقاسىندا مەيىرىمدى، جاناشىر دا كىشىپەيىل باعۋشىعا اينالدى. ارينە، ول كەمشىلىكتەرى بار ەكەنىن مويىنداعان، ٴبىراق سولارعا قادالىپ قالىپ، ويلاي بەرمەگەن. قايتا، ەحوبانىڭ ونى كەشىرەتىنىنە سەنگەن (ريم. 7:21—25). ول وزىنەن مىنسىزدىكتى دە تالاپ ەتپەگەن. قايتا، ٴماسىحشى رەتىندە بارىنشا جاقسارا بەرۋگە كۇش سالعان جانە ەحوبانىڭ كومەگىنە كىشىپەيىلدىلىكپەن ارقا سۇيەگەن (قور. 1-ح. 9:27؛ فىلىپىلىكتەرگە 4:13 وقىڭىز).
ٶز كەمشىلىكتەرىڭىزدى جەڭۋگە كۇش سالىڭىز (14، 15-ابزاستاردى قاراڭىز) *
15. اقساقالدار قالاي ٶز كەمشىلىكتەرىنە دۇرىس قاراي الادى؟
15 الار ساباق. ەر باۋىرلاستار كەمەلدى دە ٴمىنسىز بولعاندىقتان اقساقال بولىپ تاعايىندالمايدى، ارينە. ٴبىراق سوندا دا ەحوبا ولاردان قاتەلىكتەرىن مويىنداپ، جاقسارا بەرەدى دەپ كۇتەدى (ەفەس. 4:23، 24). بۇل ٷشىن ولار قۇداي ٴسوزىن زەرتتەۋ ارقىلى جوندەيتىن جاقتارىن بايقاپ، تۇزەلۋلەرى قاجەت. سول كەزدە ەحوبا ولارعا باقىتتى بولۋعا ٵرى جاقسى اقساقال بولۋعا كومەكتەسەدى (جاق. 1:25).
كەمەلسىز ادامدارمەن قىزمەتتەسۋ
16. اقساقالدىڭ بار نازارى وزگەلەردىڭ كەمشىلىگىنە اۋىپ كەتسە، بۇل نەگە اكەپ سوعۋى مۇمكىن؟
16 نەگە بۇل قيىنعا سوعادى؟ اقساقال قاۋىمداعى باۋىرلاستارمەن تىعىز قىزمەتتەسەتىندىكتەن، ولاردىڭ كەم-كەتىگىن جاقسى بىلەتىن شىعار. ٴبىراق، اباي بولماسا، سونىڭ سالدارىنان ول اشۋشاڭ، قاتال، ٴمىن تاققىش بولىپ كەتۋى مۇمكىن. ٴبىراق پاۋىل ٴبىزدىڭ وسىنداي بولعانىمىزدى شايتان قالايتىنىن ەسكەرتىپ كەتكەن (قور. 2-ح. 2:10، 11).
17. پاۋىل باۋىرلاستارعا قالاي قاراعان؟
17 پاۋىلدىڭ ۇلگىسى. پاۋىل ٵردايىم باۋىرلاستار تۋرالى جاقسى ويدا بولعان. ول باۋىرلاستارىنىڭ كەمشىلىكتەرىن دە جاقسى بىلگەن، ويتكەنى ولاردىڭ ارەكەتى وزىنە دە اۋىر تيگەن كەزدەر بولعان. ٴبىراق پاۋىل ادامنىڭ قاتەلىك جاساعانى ونىڭ جامان ادام ەكەنىن بىلدىرمەيتىنىن تۇسىنگەن. ول باۋىرلاستارىن جاقسى كورگەندىكتەن، جاقسى قاسيەتتەرىن كورە بىلگەن. ەگەر كەيبىر باۋىرلاستارعا دۇرىس ارەكەت ەتۋ قيىن بولىپ جاتسا، پاۋىل «ولار دا جاقسىلىققا ۇمتىلىپ ٴجۇر عوي، ولارعا جاي كومەك كەرەك» دەپ ويلاعان.
18. ەۋوديا مەن سينتيحەنىڭ جاعدايىندا پاۋىلدىڭ قالاي ارەكەت ەتكەنىنەن نە ۇيرەنەمىز؟ (فىلىپىلىكتەرگە 4:1—3)
18 مىسالى، فىلىپىدەگى قاۋىمدا بولعان جاعدايدا پاۋىل قالاي ارەكەت ەتكەنىن الايىقشى (فىلىپىلىكتەرگە 4:1—3 وقىڭىز). ەۋوديا مەن سينتيحە ەسىمدى ايەل باۋىرلاستاردىڭ اراسىندا تۇسىنىسپەۋشىلىك بولىپ، ەكەۋى ارالاسپاي كەتكەن كورىنەدى. سول كەزدە پاۋىل ولارعا ۇرسىپ، سوگىپ تاستاعان جوق. قايتا، ولاردىڭ بويلارىنداعى جاقسى قاسيەتتەرگە نازار اۋداردى. پاۋىل ولاردىڭ جىلدار بويى ادال قىزمەت ەتىپ كەلە جاتقانىن ٵرى ەحوبانىڭ ولاردى جاقسى كورەتىنىن ٴبىلدى. ولار جايلى جاقسى ويدا بولعاندىقتان، پاۋىل ەكەۋىن ىمىراعا كەلىپ، تاتۋلاسۋعا شاقىردى. پاۋىل وزگەلەردىڭ جاقسى جاقتارىن بايقاي بىلگەندىكتەن، ٶزىنىڭ دە قۋانىشىن ساقتاعان ٵرى سول قاۋىمداعى باۋىرلاستارمەن دوس بولىپ قالعان.
ٶزگەلەردى بىردەن كىنالاپ، سوكپەۋگە تىرىسىڭىز (19-ابزاستى قاراڭىز) *
19. ا) اقساقالدارعا وزگەلەرگە وڭ كوزبەن قاراۋعا نە كومەكتەسەدى؟ ٵ) سۋرەتتەگى پاتشالىق سارايىن جيناستىرىپ جۇرگەن اقساقالدان نە ۇيرەنەمىز؟
19 الار ساباق. اقساقالدار، باۋىرلاستاردىڭ بويىنان جاقسى قاسيەتتەردى كورە بىلىڭىزدەر. ولاردىڭ ٴبارى كەمەلسىز بولسا دا، ٵرقايسىسىندا وزىنشە ٴبىر كەرەمەت قاسيەتتەر بار (ٴفىلىپ. 2:3). راس، اراگىدىك باۋىرلاستاردىڭ كوزقاراسىن تۇزەتىپ وتىرۋ كەرەك بولىپ جاتادى. ٴبىراق وندايدا اقساقالدار پاۋىلعا ەلىكتەپ، ادامنىڭ جاعىمسىز ٴسوزى مەن ارەكەتىنە قادالىپ قالماي، كەڭىرەك قاراۋعا تىرىسۋى كەرەك. دەمەك، ولار باۋىرلاستىڭ ەحوبانى قانشالىقتى جاقسى كورەتىنىن، وعان تاباندىلىقپەن قىزمەت ەتىپ جۇرگەنىن، قانداي جاقسى ىستەر اتقارا الاتىنىن ويلاعاندارى ٴجون. اقساقالدار وزگەلەردىڭ جاقسى جاعىن كورە بىلسە، بۇكىل قاۋىمنان سۇيىسپەنشىلىك لەبى ەسىپ تۇراتىن بولادى.
پاۋىلعا ەلىكتەي بەرىڭىزدەر
20. اقساقالدار ٵرى قاراي دا پاۋىلدان قالاي ۇيرەنە بەرسە بولادى؟
20 اقساقالدار، پاۋىلدىڭ ۇلگىسى جايلى ٵرى قاراي دا زەرتتەسەڭىزدەر، مۇنىڭ كوپ پايداسىن كورەسىزدەر. مىسالى، بۇل ٷشىن ورىس تىلىندەگى «كۇزەت مۇناراسى باسىلىمدارىنىڭ كورسەتكىشىندەگى» «پاۋىل» دەگەن نەگىزگى تاقىرىپتىڭ استىنان «اقساقالدارعا ۇلگى» دەگەن تاقىرىپشانى قاراساڭىزدار بولادى. سول جەردەگى مالىمەتتەردى وقىعاندا، بىلاي دەپ ويلانىپ كورىڭىزدەر: «پاۋىلدىڭ ۇلگىسى اقساقالدىق قىزمەتىمدى قۋانىشپەن اتقارا بەرۋگە قالاي كومەكتەسەدى؟»
21. اقساقالدار نە نارسەگە سەنىمدى بولۋلارى كەرەك؟
21 اقساقالدار، ۇمىتپاڭىزدار، ەحوبا سىزدەردەن كەمەلدى بولۋدى ەمەس، ادال بولۋدى تالاپ ەتەدى (قور. 1-ح. 4:2). ەحوبا پاۋىلدىڭ اۋىر ەڭبەگى مەن ادالدىعىنا ريزا بولعانىنداي، سىزدەردىڭ دە اتقارىپ جاتقان ەڭبەكتەرىڭىزگە ريزا ەكەنىنە سەنىمدى بولىڭىزدار. ول ەشقاشان دا «قاسيەتتىلەر ٷشىن اتقارعان، ٵلى دە اتقارىپ جاتقان قىزمەتتەرىڭىز ارقىلى ٶزىنىڭ ەسىمىنە دەگەن سۇيىسپەنشىلىكتەرىڭىز بەن ەڭبەكتەرىڭىزدى ۇمىتپايدى» (ەۆر. 6:10).
87-ٵن كەلىپ، سەرگىپ قالىڭدار!
^ قاۋىمىمىزداعى اقساقالداردىڭ اۋىر ەڭبەكتەرىنە ٴبىز وتە ريزامىز! ٴبىز بۇل ماقالادا ولار ٴجيى كەزىگەتىن ٴتورت قيىندىققا نازار اۋدارامىز. سونداي-اق ەلشى پاۋىلعا ەلىكتەي وتىرىپ، ولار قالاي بۇل قيىندىقتارمەن كۇرەسە الاتىنىن بىلەمىز. ال بارشامىزدى بولسا بۇل ماقالا اقساقالدارعا تۇسىنىكپەن قاراپ، ٶز تاراپىمىزدان سۇيىسپەنشىلىك پەن قولداۋ كورسەتۋگە تالپىندىرادى.
^ سۋرەت سيپاتتاماسى: ەر باۋىرلاس جۇمىستان شىعىپ بارا جاتىپ ارىپتەسىنە كۋالىك بەرىپ جاتىر.
^ سۋرەت سيپاتتاماسى: اقساقال وزگەلەردەن وقشاۋلانىپ جۇرەتىن باۋىرلاستى جىلى سوزدەرىمەن جىگەرلەندىرىپ جاتىر.
^ سۋرەت سيپاتتاماسى: ٴبىر نارسەگە رەنجىپ قالعان باۋىرلاسقا ەر باۋىرلاس پايدالى كەڭەس بەرىپ جاتىر.
^ سۋرەت سيپاتتاماسى: پاتشالىق سارايىن جيناۋ تاپسىرماسىنا اتسالىسامىن دەپ، باسقا نارسەگە الاڭداپ كەتكەن ەر باۋىرلاستى اقساقال سىناپ-مىنەپ جاتقان جوق.
