ATUAQQISSAAGASSAQ 14
Utoqqaanertaasusi, apustili Paulusi ilaartuarsiuk
“Uannik ilaarsisunngoritsi.” – KOR 1. 11:1.
ERINARSUUT 103 Paarsisut ilagiinnut tunissutaapput
QILANAARTUUT *
1-2. Utoqqaanertat Paulusip maligassiaa qanoq iluaqutigisinnaavaat?
APUSTILIP Paulusip uppeqatini asavai. Isumassorumallugit suleruloortarpoq. (ApS 20:31) Taamaattumik uppeqataasa asangaarpaat. Ilaanni utoqqaanertat Efesossimiittut Paulusi takoqqissanagu paasigamikku “tamarmik qiangaalerput”. (ApS 20:37) Paulusi ilaarlugu ilagiinni utoqqaanertat suleruloortut uppeqatitik asangaarpaat sapinngisaminnillu ikiortarlugit. (Flp 2:16, 17) Ilaannikkulli utoqqaanertat ajornakusoortitaqartarput. Taamaattoqartillugu suna iluaqutigisinnaavaat?
2 Utoqqaanertat Paulusip maligassiaa iluaqutigisinnaavaat. (Kor 1. 11:1) Paulusi inuinnaagami naammalluinnanngitsuuvoq ilaannikkullu eqqortumik iliornissani sapernartittarlugu. (Rom 7:18-20) Assigiinngitsunillu ajornartorsiuteqartaraluarluni nikallorluni uniinnanngilaq. Utoqqaanertat Paulusi ilaarunikku ajornartorsiutitik aaqqissinnaallugillu Jehovamut kiffartornermi nuannaartuarsinnaapput. Qanoq taamaaliorsinnaasut sammeriartigu.
3. Allaaserisami matumani suut sammissavagut?
3 Allaaserisami matumani utoqqaanertat ajornakusoortittagaat uku sisamat sammissavagut: (1) Akisussaaffeqangaaraluarluni oqaluussinermut piffissaqarnissaq, (2) paarsisuulluartuunissaq, (3) naammalluinnanngitsuugaluarluni nikallunnginnissaq aamma (4) uppeqatit naammalluinnanngitsuugaluartut isumalluarfiginissaat. Paulusip ajornakusoornarsinnaasut taakku qanoq iliuuseqarfigigai aamma utoqqaanertat Paulusi qanoq ilaarsinnaagaat sammissavagut.
AKISUSSAAFFEQANGAARALUARLUNI OQALUUSSINERMUT PIFFISSAQARNISSAQ
4. Sooq utoqqaanertat oqaluussinermi siuttuunissartik sapernartissinnaavaat?
4 Sooq sapernarsinnaasoq. Utoqqaanertat oqaluussinermi siuttuunermik saniatigut aamma allarpassuarnik akisussaaffeqarput. Assersuutigalugu ilaat ulluinnarni ataatsimiinnerni aamma ilagiit Biibilimik atuaqqissaaqatigiinneranni aqutsisuusarput. Aamma oqalugiaateqartarput. Ilagiinni kiffartortut ilinniartittarlugillu ilagiinniittut tamaasa qiimmassartuartarpaat. (Pet 1. 5:2) Utoqqaanertat ilaat naalagaaffilersaarfinnik illunillu guutisiornitsinnut tunngasunik allanik sanaartoqataasarlutillu aserfallatsaaliuinermi peqataasarput. Kisianni ilagiinniittutut allatulli utoqqaanertat iliuuserisinnaasaat pingaarnerpaaq tassaavoq nutaarsiassanik nuannersunik oqaluussineq. – Mat 28:19, 20.
5. Paulusi oqaluussisartutut qanoq maligassiuiva?
5 Paulusip maligassiaa. Paulusi kiffartornermini sooq iluatsilluartartoq Filippimiut 1:10-mi atuarsinnaavarput, ima allassimavoq: ‘Suut pingaarnerpaanersut qulakkeerniarsiuk.’ Paulusip siunnersuutini nammineq maleruartarpaa. Oqaluussinermi suliassinneqarpoq, oqaluussininilu ukiorpassuarni pingaarnerpaatittuarpaa. “Kikkut tamaasa tusaatillugit aamma illumiit illumut” oqaluussisarpoq. (ApS 20:20) Piffissani assigiinngitsuni aamma sapaatip-akunnerani ulluni arlalinni oqaluussisarpoq. Oqaluussinissaminut periarfissani tamaasa atortarpai! Assersuutigalugu Athenimi angalaqatini utaqqitillugit inuit nuimasut kinguneqarluartumik oqaluussiffigai. (ApS 17:16, 17, 34) Allaat ‘parnaarussaaqqatilluni’ eqqaminiittut oqaluussiffigisarpai. – Flp 1:13, 14; ApS 28:16-24.
6. Paulusip suut ilinniartitsissutigisarpai?
6 Paulusip piffissani atorluartarpaa. Allat oqaluusseqatigisarpai. Assersuutigalugu oqaluussiartorluni angalanermini siullermi Johannesi Makkorsi ilaatippaa angalanermilu aappaani Timuutiusi ilaatillugu. (ApS 12:25; 16:1-4) Paulusip angutit taakku ilagiinnik qanoq aaqqissuussisinnaanerannik, qanoq paarsisuulluarsinnaanerannik qanorlu ilinniartitsilluarsinnaanerannik ilinniartittarsimassavai. – Kor 1. 4:17.
Paulusi ilaarlugu oqaluussinissannut piareersimajuarit (Immikkoortoq 7 takuuk) *
7. Paulusip siunnersuutaa Efesossimiut 6:14, 15-imilu allassimasoq utoqqaanertat qanoq maleruarsinnaavaat?
7 Ilinniutissartaa. Utoqqaanertat illumiit illumut oqaluussisarnermikkut oqaluussinissaminnullu periarfissaminnik tamanik atuisarnermikkut Paulusi ilaarsinnaavaat. (Efesossimiut 6:14, 15 atuakkit). Assersuutigalugu pisiniarfileritillutik suliffimminniluunniit oqaluussisinnaapput. Aamma sanaartornermi peqataagaangamik sanaartorfiup eqqaani najugallit niueqatilluunniit oqaluussiffigisarsinnaavaat. Utoqqaanertat oqaluussitillutik Paulusi ilaarlugu allat, soorlu ilagiinni kiffartortut, ilinniartittarsinnaavaat.
8. Utoqqaanertat ilaannikkut susariaqartarpat?
8 Utoqqaanertat ilagiinni ilageeqatigiinnilu suliassiissutigineqartunik ulapputeqaraluarlutik oqaluussineq piffissaqarfigiuartariaqarpaat. Akisussaaffigisatik tamaasa piffissaqarfigissagunikkit immaqa suliassiissutigineqartut ilaannut naameertariaqarput. Qinoreerlutik eqqarsaatiginnereerlutillu immaqa paasissavaat suliassiissutigineqartoq akuerigunikku pingaarnerusut piffissaqarfigisinnaanaviarnagit. Pingaarnerusut ilaatigut tassaapput ilaqutariittut atuaqqissaarneq, oqaluussinermi peqataasarneq qitornanillu oqaluussinermi ilinniartitsineq. Ilaasa suliassinneqaraangamik naameernissartik sapernartissinnaavaat. Naameertariaqaraangamilli upperilluinnarsinnaavaat akisussaaffimminnik isumaginnilluarusunnertik Jehovap paasilluaraa.
PAARSISUULLUARTUUNISSAQ
9. Utoqqaanertat ulapittut sunissartik sapernartissinnaavaat?
9 Sooq sapernarsinnaasoq. Jehovap innuttai annikilliuuterpassuaqartarput. Ulluni kingullerni inuugatta tamatta qiimmassarneqarnissamik, ikiorneqarnissamik tuppallersarneqarnissamillu pisariaqartitsivugut. Ilaallu eqqunngitsumik iliornaveersaarnissaminnut ikiorneqartariaqarput. (Tes 1. 5:14) Utoqqaanertat soorunami Jehovap innuttaasa annikilliuutaat tamarluinnaasa aaqqissinnaanngilaat. Jehovalli innuttani qiimmassarniarlugit isumassorniarlugillu utoqqaanertat sapinngisaminnik iliuuseqarnissaat kissaatigaa. Utoqqaanertat ulapittut taamaaliornissaminnut qanoq piffissaqarsinnaappat?
Inuit allat nersualaartarlugillu qiimmassartakkit (Immikkoortut 10 aamma 12 takukkit) *
10. Tessaluunikamiunut allakkat siulliit 2:7-imi allassimasoq malillugu Jehovap innuttai Paulusip qanoq pisarpai?
10 Paulusip maligassiaa. Paulusi uppeqatiminik qiimmassaanissaminut nersualaarinissaminullu piareersimajuaannarpoq. Utoqqaanertat Jehovap innuttaasa asannittumik inussiarnersumillu pisarnerisigut Paulusi ilaarsinnaavaat. (Tessaluunikamiunut 1. 2:7 atuaruk). Paulusip uppeqatini asanerartarpai oqarfigisarlugillu Jehovamit asaneqartut. (Kor 2. 2:4; Ef 2:4, 5) Ilagiinniittut ikinngutigai peqatigisarlugillu. Isumakuluutini naammalluinnanngitsuuninilu pillugit oqaluttuartarnikkut uppeqatini tatigalugit ersersittarpaa. (Kor 2. 7:5; Tim 1. 1:15) Paulusilli nammineq ajornartorsiutini pivallaarnagit qatanngutini ikiorusuttarpai.
11. Suna kajumississutigalugu Paulusip uppeqatini siunnersortarpai?
11 Paulusip ilaannikkut uppeqatini siunnersortariaqartarsimavai. Uumisunnerli pissutigalugu taamaaliunngisaannarpoq. Asanninnini kajumississutigalugu illersorusukkamigillu siunnersortarpai. Paasiuminartumik siunnersuisarpoq neriulluni siunnersuut maleruarneqassasoq. Assersuutigalugu Korintimiunut allakkamini Paulusi sakkortuumik oqaaqqissaarivoq. Allaffigereerlugit Tittusi taakkununnga aallartippaa. Allakkaminut qanoq qisuariarsimanerat Paulusip paaserusungaarpaa. Paasigamiullu siunnersuutini maleruarsimagaat nuannaangaarpoq. – Kor 2. 7:6, 7.
12. Utoqqaanertat uppeqatitik qanoq qiimmassarsinnaavaat?
12 Ilinniutissartaa. Utoqqaanertat uppeqatimik peqatigisarnerisigut Paulusi ilaarsinnaavaat. Ilaatigut taamaaliorsinnaapput uppeqatitik qiimmaallannartumik oqaloqatigiumallugit ataatsimiinnermut aggiaarnikkut. Amerlanertigut minutsialuit atorlugit qatanngutit pisariaqartitsisut qiimmassarneqarsinnaasarput. (Rom 1:12; Ef 5:16) Aamma utoqqaanertap uppeqatini qiimmassarniarlugit Guutip oqaasianik atuisarnermigut Guutimillu asaneqarnerannik eqqaasittarnerisigut Paulusi ilaarsinnaavaa. Tamatumalu saniatigut nammineq asanerartarpai, oqaloqatigikulasarpai nersualaarnissaannillu periarfissarsiortarluni. Utoqqaanertaq siunnersuisariaqaraangami Guutip oqaasianut naapertuuttumik taamaaliortarpoq. Siunnersukkami siunnersuutini maleruassagaa kissaatigigamiuk toqqaannartumik inussiarnersumilli siunnersuisarpoq. – Gal 6:1.
NAAMMALLUINNANNGITSUUGALUARLUNI NIKALLUNNGINNISSAQ
13. Utoqqaanertaq kukkusarnini pillugu qanoq misigisinnaava?
13 Sooq sapernarsinnaasoq. Utoqqaanertat naammalluinnanngitsuugamik inuttulli allatut kukkusarput. (Rom 3:23) Naammalluinnanngitsuunerminnut eqqortumik isiginnittaaseqarnissartik ilaannikkut sapernartissinnaasarpaat. Ilaat immaqa kukkusarnertik eqqarsaatigivallaartaramikku nikallungasarput. Allallu allannguisariaqarsorinnginnamik kukkugaangamik utoqqatsissutissarsiupallattarput.
14. Filippimiut 4:13 naapertorlugu Paulusip naammalluinnanngitsuunini qanoq isiginnittaaseqarfigaa?
14 Paulusip maligassiaa. Paulusip maniguulluni paasivaa naammalluinnanngitsuunini eqqortumik isiginnittaaseqarfigissaguniuk Guutimit ikiorneqartariaqarluni. Siornatigut kristumiunik sakkortuumik malersuisuusimavoq. Eqqunngitsuliorsimaninili paasigamiuk isiginnittaatsiminik inuttullu pissusiminik allannguerusussuseqarpoq. (Tim 1. 1:12-16) Jehovamit ikiorneqarami tassaalerpoq utoqqaanertaq asannittoq, misiginneqataasoq maniguuttorlu. Kukkusarnini nalunngilluinnarpaa, tamannali eqqarsaatigivallaarnagu Jehovap isumakkeerfiginnittarnera upperaa. (Rom 7:21-25) Naammalluinnanngitsuunini eqqumaffigigamiuk Jehovap nuannarisaanik pissuseqarniartarpoq, kiffartorninilu naammassiumallugu maniguulluni Jehovamit ikiorneqarnissani upperaa. – Kor 1. 9:27; Filippimiut 4:13 atuaruk.
Sanngiissutitit tamaviaarlutit qaangerniartakkit (Immikkoortut 14-15 takukkit) *
15. Utoqqaanertap naammalluinnanngitsuunini qanoq isiginnittaaseqarfigissavaa?
15 Ilinniutissartaa. Utoqqaanertat naammalluinnartuunngillat. Jehovap piumasaraa utoqqaanertat kukkusarnitik nassuerutigalugit Jiisusitut pissuseqarnissartik sulissutigissagaat. (Ef 4:23, 24) Utoqqaanertap Biibilimik atuaqqissaartarnikkut sutigut allannguisariaqarnerluni mississortariaqarpaa pisariaqartunillu allannguilluni. Taava pilluarnissaminut utoqqaanertaalluarnissaminullu Jehovamit ikiorneqassaaq. – Jaak 1:25.
UPPEQATIT NAAMMALLUINNANNGITSUUGALUARTUT ISUMALLUARFIGINISSAAT
16. Utoqqaanertaq allat naammalluinnanngitsuunerannik eqqarsaatiginnippallaaruni susinnaava?
16 Sooq sapernarsinnaasoq. Utoqqaanertat ilagiinniittut suleqatigisaramikkit naammalluinnanngitsuunerat malugisinnaasarpaat. Eqqarsaatigivallaarunikkuli uumisulersinnaapput, peqqarniillisinnaapput isornartorsiuilersinnaallutilluunniit. Saatanip kristumiut taamaattuunissaat anguniarsarimmagu Paulusi mianersoqqusivoq. – Kor 2. 2:10, 11.
17. Paulusip uppeqatini qanoq isiginnittaaseqarfigisarpai?
17 Paulusip maligassiaa. Paulusip uppeqatini aliasuutigisaminik ilaannikkut iliuuseqartarmata kukkusarnerat nalunngilluinnarpaa. Isumalluarfigaali. Aamma nalunngilaa inuk kukkusaraluarluni inuttut ajortuusariaqanngitsoq. Uppeqatini asavai pissusiilu nuannersut pingaartittarlugit. Taakkua eqqortuliornissartik sapernartikkaangassuk eqqarsaannartarpoq ajunngitsumik pissutiginiagaqarlutillu ikiorneqarnissaminnik pisariaqartitsisut.
18. Paulusip Euudiamik Syntykimillu ikiuinera qanoq ilinniarfigaajuk? (Filippimiut 4:1-3)
18 Paulusip qatanngutit arnat marluk ilagiinni Filippimiittut qanoq ikiorai assersuutitut sammisinnaavarput. (Filippimiut 4:1-3 atuakkit). Euudia aamma Syntyki isumaqatigiinngissuteqaramik ikinngutigiikkunnaarunarput. Paulusip peqqarniiffiginagillu isornartorsiunngilai, pissusiili nuannersut pingaartippai. Jehovamut kiffartornerminni ukiorpassuarni aalajaatsuusimapput. Paulusillu nalunngilaa Jehovamit asaneqartut. Taamatut ajunngitsumik isiginnittaaseqarfigigamigit eqqisseqatigeeqqullugit kajumissaarpai. Allat pissusii nuannersut pingaartittaramigit nuannaartuarlunilu ilagiinniittut ikinngutigilluarpai.
Inuit allat isumalluarfigisakkit (Immikkoortoq 19 takuuk) *
19. (a) Utoqqaanertat uppeqatitik qanoq isumalluarfigisinnaavaat? (b) Utoqqaanertamik naalagaaffilersaarfimmi asaasumik asseq qanoq ilinniarfigaajuk?
19 Ilinniutissartaa. Utoqqaanertaasusi, uppeqatissi pissusii nuannersut pingaartissigit. Tamarmik naammalluinnanngitsuupput, taamaakkaluartorli nuannaarutigisinnaasatsinnik pissuseqarput. (Flp 2:3) Utoqqaanertat ilaannikkut qatanngutit oqaaqqissaartariaqartarpaat. Utoqqaanertalli Paulusitut inuup oqaasii iliuusiilu uuminartut sapinngisaminnik eqqarsaatigivallaarnaveersaassavaat. Inuulli taassuma Jehovamik asanninnera, Guutimut kiffartornermi pinertusaarnera ajunngitsuliorsinnaaneralu utoqqaanertat eqqarsaatiginerussavaat. Utoqqaanertat uppeqatiminnik isumalluarfiginnittuusut ilagiinniittut tamaasa asaneqartutut misigitittarpaat.
PAULUSI ILAARTUARSIUK
20. Utoqqaanertat Paulusi qanoq ilinniarfigiuarsinnaavaat?
20 Utoqqaanertat Paulusip maligassiaanik misissueqqissaartarnertik iluaqutigissavaat. Ilaatigut Jehovap Nalunaajaasuisa ujarliutaat-ni sammisami “Biibili”-mi qulequtaaqqap “Inuit Biibilimi eqqaaneqartut” ataani “Paulusi (Saulusi Tarsusimioq)” toqqarlugu misissugassarsiorsinnaavutit. Allaaserisat tassani innersuussutigineqartut atuarneranni apeqqut una eqqarsaatigiuk: ‘Paulusip maligassiaa iluaqutigalugu utoqqaanertatut sulininni qanoq nuannaartuarsinnaavunga?’
21. Utoqqaanertat suna qularinngissinnaavaat?
21 Utoqqaanertaasusi, eqqaamasiuk Jehovap naammalluinnartuunissarsi piumasarinagu aalajaatsuunissarsi kissaatigigaa. (Kor 1. 4:2) Paulusip sulilluarnera aalajaatsuuneralu Jehovap iluarai. Qularissanngilat kiffartornermi iliuuserisatit Jehovap aamma iluarigai. Jehovap “puiornavianngilai illernartunik kiffartuussinissigut kiffartuussiuarnissigullu iliuutsisi aterminullu asannittuliornersi.” – Hebr 6:10.
ERINARSUUT 90 Qiimmassaqatigiitta
^ par. 5 Utoqqaanertat asannittut sulilluarmata qujamasuffigingaarpagut! Allaaserisami matumani utoqqaanertat ajornakusoortissinnaasaat sisamat sammissavagut. Aamma apustili Paulusi ilaarlugu ajornakusoornartut taakku qanoq iliuuseqarfigisinnaagaat sammissavarput. Tamatta allaaserisaq manna iluaqutigalugu utoqqaanertat paasinerusinnaavagut, asanninnermik ersersitsivigisinnaavagut tapersersorlugillu.
^ par. 61 ASSIMI MALUGISASSAT: Qatanngutip angutip suliffimminit soraarami suleqatini oqaluussiffigigaa.
^ par. 63 ASSIMI MALUGISASSAT: Utoqqaanertap qatanngut angut kisimiikkusunnerusartoq inussiarnerluni ikioraa.
^ par. 65 ASSIMI MALUGISASSAT: Angutip qatanngunni ajuallassimasoq siunnersoraa.
^ par. 67 ASSIMI MALUGISASSAT: Utoqqaanertap qatanngut angut nammineq kajumissutsiminik suleqataasoq suliaminit allamut saasartittoq isornartorsiunngikkaa.