អត្ថបទសិក្សា ១៤
អ្នកចាស់ទុំទាំងឡាយ ចូរបន្ដយកតម្រាប់សាវ័កប៉ូល
«ចូរយកតម្រាប់ខ្ញុំ»។—១កូ. ១១:១
ចម្រៀងលេខ៩៩ បងប្អូនដ៏ច្រើនអនេករបស់យើង
សេចក្ដីសង្ខេប *
១-២. តើគំរូរបស់សាវ័កប៉ូលអាចជួយពួកអ្នកចាស់ទុំនៅសព្វថ្ងៃនេះយ៉ាងដូចម្ដេច?
សាវ័កប៉ូលស្រឡាញ់បងប្អូនរបស់គាត់។ គាត់បានធ្វើការយ៉ាងនឿយហត់ដើម្បីជាប្រយោជន៍ដល់ពួកគេ។ (សកម្ម. ២០:៣១) ហេតុនេះ បងប្អូនរួមជំនឿស្រឡាញ់គាត់ខ្លាំងណាស់។ នៅពេលមួយ ពួកអ្នកចាស់ទុំពីក្រុងអេភេសូរបាន«ហូរទឹកភ្នែក» ពេលដែលឮថាពួកគេនឹងលែងជួបគាត់ទៀត។ (សកម្ម. ២០:៣៧) ពួកអ្នកចាស់ទុំដែលធ្វើការនឿយហត់ ក៏ស្រឡាញ់បងប្អូនរួមជំនឿខ្លាំងណាស់ ហើយខំអស់ពីសមត្ថភាពដើម្បីជួយពួកគេ។ (ភី. ២:១៦, ១៧) ប៉ុន្តែ ជួនកាលពួកអ្នកចាស់ទុំមានការពិបាកផ្សេងៗ។ តើអ្វីអាចជួយពួកគេឲ្យយកឈ្នះការពិបាកទាំងនោះ?
២ ពួកអ្នកចាស់ទុំដែលខំប្រឹងធ្វើការនឿយហត់អាចពិចារណាគំរូរបស់ប៉ូល។ (១កូ. ១១:១) ប៉ូលមិនមែនដូចទេវតាទេ តែគាត់ជាមនុស្សមិនល្អឥតខ្ចោះដូចមនុស្សទូទៅដែរ ហើយជួនកាលគាត់ពិបាកធ្វើអ្វីដែលត្រឹមត្រូវ។ (រ៉ូម ៧:១៨-២០) ម្យ៉ាងទៀត ប៉ូលត្រូវប្រឈមមុខនឹងការពិបាកមួយចំនួន។ ប៉ុន្តែ គាត់មិនបានឈប់ព្យាយាមឬបាត់បង់អំណរទេ។ ដោយយកតម្រាប់ប៉ូល ពួកអ្នកចាស់ទុំអាចយកឈ្នះការពិបាកផ្សេងៗដែលពួកគេជួបប្រទះ ហើយរក្សាអំណររបស់ពួកគេកាលដែលបម្រើព្រះយេហូវ៉ា។ សូមយើងពិចារណារបៀបដែលពួកគេអាចធ្វើដូច្នេះ។
៣. តើយើងនឹងពិចារណាអ្វីខ្លះក្នុងអត្ថបទនេះ ហើយតើយើងនឹងរៀនអ្វីទៀត?
៣ ក្នុងអត្ថបទនេះ យើងនឹងពិចារណាអំពីការពិបាកបួនដែលពួកអ្នកចាស់ទុំជួបប្រទះ គឺ៖ (១) ការលៃទុកពេលច្រើនគ្រប់គ្រាន់ដើម្បីផ្សព្វផ្សាយ និងធ្វើកិច្ចការឯទៀត (២) ការស្វែងរកពេលដើម្បីលើកទឹកចិត្តបងប្អូន (៣) ការយកឈ្នះភាពទន់ខ្សោយរបស់ខ្លួន និង(៤) ការធ្វើកិច្ចការជាមួយអ្នកឯទៀតដែលមានភាពមិនល្អឥតខ្ចោះ។ យើងនឹងរៀនអំពីអ្វីដែលបានជួយប៉ូលឲ្យយកឈ្នះការពិបាកនីមួយៗទាំងនោះ និងរបៀបដែលពួកអ្នកចាស់ទុំអាចធ្វើតាមគំរូរបស់គាត់។
ការធ្វើកិច្ចការផ្សព្វផ្សាយ ព្រមទាំងបំពេញភារកិច្ចឯទៀត
៤. ហេតុអ្វីពួកអ្នកចាស់ទុំប្រហែលជាពិបាកនាំមុខក្នុងកិច្ចបម្រើផ្សាយ?
៤ ហេតុអ្វីនេះប្រហែលជាពិបាក? ក្រៅពីនាំមុខក្នុងកិច្ចការផ្សព្វផ្សាយ ពួកអ្នកចាស់ទុំមានភារកិច្ចច្រើន។ ជាឧទាហរណ៍ ពួកគេជាច្រើននាក់ ច្រើនតែធ្វើអធិការីនៅកិច្ចប្រជុំសម្រាប់កិច្ចបម្រើនិងជីវិតជាគ្រិស្តសាសនិក ហើយដឹកនាំការសិក្សាគម្ពីរជាក្រុមជំនុំ។ ពួកគេក៏ប្រហែលជាថ្លែងសុន្ទរកថាជាច្រើនដែរ។ ពួកគេបង្ហាត់បង្រៀនជំនួយការខាងកិច្ចបម្រើ ព្រមទាំងជាប់រវល់ក្នុងការលើកទឹកចិត្តបងប្អូនរួមជំនឿ។ (១ពេ. ៥:២) អ្នកចាស់ទុំខ្លះធ្វើកិច្ចការសាងសង់ ហើយថែទាំសាលប្រជុំនិងអគារផ្សេងទៀតសម្រាប់គោរពប្រណិប័តន៍ព្រះ។ ប៉ុន្តែ ដូចបុគ្គលគ្រប់រូបនៅក្នុងក្រុមជំនុំ កិច្ចការសំខាន់បំផុតដែលពួកអ្នកចាស់ទុំធ្វើ គឺកិច្ចការផ្សព្វផ្សាយដំណឹងល្អ។—ម៉ាថ. ២៨:១៩, ២០
៥. តើប៉ូលបានទុកគំរូអ្វីក្នុងកិច្ចការផ្សព្វផ្សាយ?
៥ គំរូរបស់ប៉ូល។ នៅភីលីព ១:១០ ប៉ូលបានប្រាប់យើងអំពីមូលហេតុដែលគាត់ទទួលជោគជ័យក្នុងកិច្ចការផ្សព្វផ្សាយ។ នៅខនោះគាត់លើកទឹកចិត្តយើងថា៖ «[ចូរ]ពិចារណាឲ្យដឹងប្រាកដថាការអ្វីដែលសំខាន់ជាង»។ ប៉ូលផ្ទាល់បានធ្វើតាមយោបល់នេះ។ គាត់បានត្រូវចាត់តាំងឲ្យបំពេញកិច្ចបម្រើ ហើយអស់ជាច្រើនឆ្នាំ គាត់ចាត់ទុកកិច្ចបម្រើផ្សាយនោះជាកិច្ចការដ៏សំខាន់បំផុតមួយ។ គាត់បានផ្សព្វផ្សាយ«ជាសាធារណៈ និងពីផ្ទះមួយទៅផ្ទះមួយ»។ (សកម្ម. ២០:២០) ប៉ូលមិនដាក់កម្រិតទៅលើពេលវេលាណាមួយក្នុងមួយសប្តាហ៍ដើម្បីផ្សព្វផ្សាយនោះទេ។ គាត់បានឆ្លៀតគ្រប់ឱកាសដើម្បីផ្សព្វផ្សាយ! ជាឧទាហរណ៍ កាលដែលគាត់រង់ចាំពួកអ្នកដំណើរជាមួយគាត់នៅក្រុងអាថែន គាត់បានផ្សព្វផ្សាយដល់ពួកអ្នកធំ ហើយពួកគេខ្លះមានប្រតិកម្មល្អ។ (សកម្ម. ១៧:១៦, ១៧, ៣៤) សូម្បីតែពេលដែលប៉ូល«ជាប់ចំណង» ក៏គាត់បានផ្សព្វផ្សាយដល់ពួកអ្នកដែលគាត់ជួប។—ភី. ១:១៣, ១៤; សកម្ម. ២៨:១៦-២៤
៦. តើប៉ូលបានធ្វើអ្វីដើម្បីបង្ហាត់បង្រៀនអ្នកឯទៀត?
៦ ប៉ូលបានប្រើគ្រប់ឱកាសឲ្យកើតប្រយោជន៍ច្រើនបំផុត។ គាត់ច្រើនតែអញ្ជើញអ្នកឯទៀតឲ្យចូលរួមជាមួយគាត់ក្នុងកិច្ចបម្រើផ្សាយ។ ជាឧទាហរណ៍ ក្នុងអំឡុងដំណើរលើកទី១ជាសាសនទូត គាត់បានយកយ៉ូហាន ម៉ាកុសទៅជាមួយ ហើយជាលើកទី២គាត់បានយកធីម៉ូថេទៅជាមួយគាត់។ (សកម្ម. ១២:២៥; ១៦:១-៤) ប៉ូលច្បាស់ជាបានខំអស់ពីសមត្ថភាពដើម្បីបង្ហាត់បង្រៀនបុរសទាំងនេះអំពីរបៀបរៀបចំក្រុមជំនុំឲ្យមានរបៀបរៀបរយ របៀបបំពេញកិច្ចការជាគង្វាល និងរបៀបក្លាយទៅជាអ្នកបង្រៀនដែលមានប្រសិទ្ធភាព។—១កូ. ៤:១៧
ចូរយកតម្រាប់ប៉ូលដោយប្រុងប្រៀបផ្សព្វផ្សាយ (សូមមើលវគ្គ៧) *
៧. តើតាមរបៀបណាពួកអ្នកចាស់ទុំអាចធ្វើតាមពាក្យរបស់ប៉ូលដែលបានត្រូវកត់ទុកនៅអេភេសូរ ៦:១៤, ១៥?
៧ មេរៀន។ ពួកអ្នកចាស់ទុំអាចយកតម្រាប់ប៉ូល មិនគ្រាន់តែដោយផ្សព្វផ្សាយពីផ្ទះមួយទៅផ្ទះមួយប៉ុណ្ណោះទេ តែក៏ដោយប្រុងប្រៀបនិងសុខចិត្តផ្សព្វផ្សាយនៅគ្រប់ឱកាសដែរ។ (សូមអាន អេភេសូរ ៦:១៤, ១៥) ជាឧទាហរណ៍ ពួកគេអាចផ្សព្វផ្សាយពេលទៅផ្សារឬនៅកន្លែងធ្វើការ។ ពេលពួកគេបំពេញភារកិច្ចខាងកិច្ចការសាងសង់អគារគោរពប្រណិប័តន៍ ពួកគេក៏អាចផ្សព្វផ្សាយដំណឹងល្អដល់អ្នកជិតខាង និងអ្នកលក់។ ដូចប៉ូល ពួកអ្នកចាស់ទុំអាចប្រើពេលក្នុងកិច្ចបម្រើផ្សាយដើម្បីបង្ហាត់បង្រៀនបងប្អូនឯទៀត រួមទាំងជំនួយការខាងកិច្ចបម្រើផងដែរ។
៨. ជួនកាល តើពួកអ្នកចាស់ទុំប្រហែលជាត្រូវធ្វើអ្វី?
៨ ពួកអ្នកចាស់ទុំមិនគួរជាប់រវល់ខ្លាំងពេកនឹងការបំពេញភារកិច្ចក្នុងក្រុមជំនុំឬក្នុងមណ្ឌល រហូតដល់ពួកគេគ្មានពេលសម្រាប់ផ្សព្វផ្សាយឡើយ។ ដើម្បីរក្សាតុល្យភាព ជួនកាលពួកគេប្រហែលជាត្រូវសម្រេចចិត្តមិនទទួលយកភារកិច្ចខ្លះ។ ក្រោយពីគិតពិចារណានិងអធិដ្ឋាន ពួកគេប្រហែលជាទទួលស្គាល់ថា បើពួកគេព្រមទទួលយកភារកិច្ចណាមួយ ពួកគេនឹងមិនអាចមានពេលសម្រាប់ធ្វើអ្វីដែលសំខាន់ជាងដូចជា ដឹកនាំការគោរពប្រណិប័តន៍ជាក្រុមគ្រួសាររាល់សប្តាហ៍ ចូលរួមយ៉ាងពេញលេញក្នុងកិច្ចផ្សព្វផ្សាយ ឬបង្ហាត់បង្រៀនកូនឲ្យផ្សព្វផ្សាយជាដើម។ អ្នកចាស់ទុំខ្លះ ប្រហែលជាពិបាកប្រាប់ថាគាត់មិនអាចទទួលយកភារកិច្ចណាមួយ ប៉ុន្តែពួកគេអាចប្រាកដថាព្រះយេហូវ៉ាយល់ថាពួកគេចង់រក្សាតុល្យភាពក្នុងរឿងទាំងអស់។
ការធ្វើជាគង្វាលដែលយកចិត្តទុកដាក់ចំពោះបងប្អូន
៩. តើពួកអ្នកចាស់ទុំដែលជាប់រវល់មានការពិបាកអ្វី?
៩ ហេតុអ្វីនេះប្រហែលជាពិបាក? រាស្ត្ររបស់ព្រះយេហូវ៉ាមានទុក្ខលំបាកជាច្រើន។ ក្នុងអំឡុងគ្រាចុងក្រោយបង្អស់នេះ យើងទាំងអស់គ្នាត្រូវការការលើកទឹកចិត្ត ការគាំទ្រ និងការសម្រាលទុក្ខ។ ម្យ៉ាងទៀត ជួនកាលអ្នកខ្លះត្រូវការការដាស់តឿនដើម្បីជៀសវាងពីការប្រព្រឹត្តខុស។ (១ថែ. ៥:១៤) ពិតមែន ពួកអ្នកចាស់ទុំមិនអាចបំបាត់ចោលទុក្ខលំបាកទាំងអស់ដែលរាស្ត្ររបស់ព្រះយេហូវ៉ាមានឡើយ។ ទោះជាដូច្នេះក៏ដោយ ព្រះយេហូវ៉ាចង់ឲ្យពួកអ្នកចាស់ទុំធ្វើអ្វីដែលពួកគេអាចធ្វើបានដើម្បីលើកទឹកចិត្ត និងការពារចៀមរបស់លោក។ តើពួកអ្នកចាស់ទុំដែលជាប់រវល់អាចរកពេលដើម្បីផ្ដល់ជំនួយដល់បងប្អូនដែលត្រូវការយ៉ាងដូចម្ដេច?
ចូរសរសើរនិងលើកទឹកចិត្តអ្នកឯទៀត (សូមមើលវគ្គ១០, ១២) *
១០. តើថែស្សាឡូនិចទី១ ២:៧បង្ហាញយ៉ាងណាថាប៉ូលបានយកចិត្តទុកដាក់ចំពោះរាស្ត្ររបស់ព្រះយេហូវ៉ា?
១០ គំរូរបស់ប៉ូល។ ប៉ូលបានស្វែងរកវិធីផ្សេងៗដើម្បីសរសើរបងប្អូន និងពង្រឹងកម្លាំងចិត្តពួកគេ។ គឺជាការល្អដែលពួកអ្នកចាស់ទុំធ្វើតាមគំរូដែលប្រកបដោយសេចក្ដីស្រឡាញ់របស់គាត់ ដោយប្រព្រឹត្តទៅលើរាស្ត្ររបស់ព្រះយេហូវ៉ាយ៉ាងសប្បុរសនិងដោយសេចក្ដីស្រឡាញ់។ (សូមអាន ថែស្សាឡូនិចទី១ ២:៧) ប៉ូលបានពង្រឹងទំនុកចិត្តបងប្អូនរួមជំនឿថាគាត់ស្រឡាញ់ពួកគេ ហើយថាព្រះយេហូវ៉ាក៏ស្រឡាញ់ពួកគេដែរ។ (២កូ. ២:៤; អេភ. ២:៤, ៥) ប៉ូលបានប្រព្រឹត្តដូចជាមិត្តភក្ដិទៅលើពួកអ្នកដែលនៅក្នុងក្រុមជំនុំ ដោយចំណាយពេលជាមួយពួកគេ។ គាត់បានបង្ហាញថាគាត់ទុកចិត្តពួកគេ ដោយប្រាប់ពួកគេអំពីការភ័យខ្លាចនិងភាពទន់ខ្សោយរបស់គាត់។ (២កូ. ៧:៥; ១ធី. ១:១៥) ប៉ុន្តែ ប៉ូលមិនបានផ្ដោតអារម្មណ៍ទៅលើបញ្ហារបស់ខ្លួនទេ ផ្ទុយទៅវិញគាត់ចង់ជួយបងប្អូនរបស់គាត់។
១១. ហេតុអ្វីប៉ូលបានឲ្យយោបល់ដល់បងប្អូនរបស់គាត់?
១១ ជួនកាល ប៉ូលត្រូវឲ្យយោបល់ដល់បងប្អូន។ ប៉ុន្តែ គាត់មិនបានធ្វើដូច្នេះដោយសារគាត់ទើសចិត្តទេ។ គាត់បានឲ្យយោបល់ ដោយសារគាត់យកចិត្តទុកដាក់ចំពោះពួកគេ ហើយចង់ការពារពួកគេពីគ្រោះថ្នាក់ផ្សេងៗ។ គាត់បានព្យាយាមឲ្យយោបល់តាមរបៀបដែលស្រួលយល់ ហើយគាត់ចង់ឲ្យបងប្អូនព្រមទទួលយកយោបល់នោះ។ ជាឧទាហរណ៍ ក្នុងសំបុត្រមួយជូនចំពោះបងប្អូននៅក្រុងកូរិនថូស ប៉ូលបានឲ្យយោបល់យ៉ាងម៉ឺងម៉ាត់។ ក្រោយពីគាត់បានសរសេរសំបុត្រនោះ គាត់បានចាត់ទីតុសទៅឯពួកគេ។ ប៉ូលចង់ដឹងថាពួកគេមានប្រតិកម្មយ៉ាងណាចំពោះសំបុត្ររបស់គាត់។ ក្រោយមក គាត់សប្បាយចិត្តជាខ្លាំងពេលដែលឮថាពួកគេព្រមទទួលយកយោបល់របស់គាត់ ហើយធ្វើតាម។—២កូ. ៧:៦, ៧
១២. តើពួកអ្នកចាស់ទុំអាចពង្រឹងកម្លាំងចិត្តបងប្អូនរួមជំនឿយ៉ាងដូចម្ដេច?
១២ មេរៀន។ ពួកអ្នកចាស់ទុំអាចធ្វើតាមគំរូរបស់ប៉ូល ដោយចំណាយពេលជាមួយបងប្អូនរួមជំនឿ។ របៀបមួយដើម្បីធ្វើដូច្នេះគឺដោយទៅដល់កិច្ចប្រជុំមុនម៉ោងដើម្បីនិយាយលើកទឹកចិត្តអ្នកឯទៀត។ គឺច្រើនតែត្រូវការពេលតែប៉ុន្មាននាទីប៉ុណ្ណោះដើម្បីផ្ដល់ការលើកទឹកចិត្តដែលបងប្អូនត្រូវការ។ (រ៉ូម ១:១២; អេភ. ៥:១៦) អ្នកចាស់ទុំដែលធ្វើតាមគំរូរបស់ប៉ូល ក៏នឹងប្រើបណ្ដាំរបស់ព្រះដើម្បីពង្រឹងជំនឿបងប្អូន ហើយពង្រឹងទំនុកចិត្តពួកគេថា ព្រះស្រឡាញ់ពួកគេ។ បន្ថែមទៅទៀត គាត់បង្ហាញសេចក្ដីស្រឡាញ់របស់គាត់ចំពោះពួកអ្នកដែលនៅក្រោមការមើលថែរបស់គាត់។ គាត់និយាយជាមួយពួកគេជាទៀងទាត់ ហើយស្វែងរកឱកាសដើម្បីសរសើរពួកគេ។ ពេលអ្នកចាស់ទុំណាម្នាក់យល់ថា គាត់ត្រូវតែឲ្យយោបល់ គាត់ធ្វើឲ្យប្រាកដថាយោបល់នោះមានមូលដ្ឋានលើបណ្ដាំរបស់ព្រះ។ គាត់ឲ្យយោបល់ជាក់លាក់ តែនិយាយដោយសប្បុរស ដោយសារគាត់ចង់ឲ្យបងប្អូនធ្វើតាមយោបល់នោះ។—កាឡ. ៦:១
ការយកឈ្នះភាពទន់ខ្សោយរបស់ខ្លួន
១៣. តើភាពមិនល្អឥតខ្ចោះរបស់អ្នកចាស់ទុំណាម្នាក់អាចមានឥទ្ធិពលយ៉ាងណាមកលើគាត់?
១៣ ហេតុអ្វីនេះប្រហែលជាពិបាក? ពួកអ្នកចាស់ទុំមិនមែនជាមនុស្សល្អឥតខ្ចោះទេ។ ដូចអ្នកឯទៀតដែរ ពួកគេចេះធ្វើខុស។ (រ៉ូម ៣:២៣) ជួនកាល ពួកគេប្រហែលជាពិបាកមានទស្សនៈត្រឹមត្រូវចំពោះភាពទន់ខ្សោយរបស់ខ្លួន។ អ្នកចាស់ទុំខ្លះផ្ដោតអារម្មណ៍ខ្លាំងពេកទៅលើភាពមិនល្អឥតខ្ចោះរបស់ខ្លួន រហូតដល់ពួកគេធ្លាក់ទឹកចិត្ត។ រីឯអ្នកចាស់ទុំខ្លះទៀតប្រហែលជាគិតថា ចំណុចខ្សោយរបស់ពួកគេគឺមិនមែនជាអ្វីធំដុំ ហើយថាពួកគេមិនចាំបាច់ធ្វើការកែប្រែដែលសំខាន់ចាំបាច់ឡើយ។
១៤. យោងទៅតាមភីលីព ៤:១៣ តើចិត្តរាបទាបបានជួយប៉ូលយ៉ាងដូចម្ដេចឲ្យមានទស្សនៈត្រឹមត្រូវចំពោះភាពទន់ខ្សោយរបស់ខ្លួន?
១៤ គំរូរបស់ប៉ូល។ សាវ័កប៉ូលមានចិត្តរាបទាប ហើយដឹងថាគាត់មិនអាចយកឈ្នះភាពទន់ខ្សោយរបស់ខ្លួនដោយគ្មានជំនួយពីព្រះយេហូវ៉ាបានទេ។ គាត់ត្រូវការកម្លាំងដែលព្រះយេហូវ៉ាផ្ដល់ឲ្យ។ មុនគាត់ទៅជាអ្នកកាន់តាមគ្រិស្ត គាត់ធ្លាប់ជាមនុស្សក្បាលរឹង និងធ្លាប់ជាអ្នកប្រឆាំងគ្រិស្តសាសនិកយ៉ាងឃោរឃៅ។ ប៉ុន្តែក្រោយមក គាត់ទទួលស្គាល់ថាអ្វីដែលគាត់ធ្វើគឺខុស ហើយគាត់សុខចិត្តកែប្រែចិត្តគំនិតនិងបុគ្គលិកលក្ខណៈរបស់ខ្លួន។ (១ធី. ១:១២-១៦) ដោយមានជំនួយពីព្រះយេហូវ៉ា ប៉ូលបានទៅជាគង្វាលដែលប្រកបដោយសេចក្ដីស្រឡាញ់ មានចិត្តអាណិតមេត្តា និងមានចិត្តរាបទាប។ គាត់ទទួលស្គាល់ថា គាត់ធ្វើខុសច្រើនដង ប៉ុន្តែគាត់មិនចេះតែគិតអំពីរឿងនេះទេ។ ផ្ទុយទៅវិញ គាត់ជឿថាព្រះយេហូវ៉ាអភ័យទោសឲ្យគាត់។ (រ៉ូម ៧:២១-២៥) ប៉ូលមិនតម្រូវឲ្យខ្លួនធ្វើជាមនុស្សល្អឥតខ្ចោះទេ។ ប៉ុន្តែ គាត់ខំប្រឹងព្យាយាមអស់ពីសមត្ថភាពដើម្បីមានបុគ្គលិកលក្ខណៈជាគ្រិស្តសាសនិកឲ្យបានប្រសើរជាងមុន ហើយពឹងផ្អែកទៅលើជំនួយពីព្រះយេហូវ៉ាដើម្បីជួយគាត់ឲ្យសម្រេចកិច្ចការរបស់គាត់។—១កូ. ៩:២៧; សូមអាន ភីលីព ៤:១៣
ចូរខំព្យាយាមយកឈ្នះភាពទន់ខ្សោយរបស់ខ្លួន (សូមមើលវគ្គ១៤-១៥) *
១៥. តើអ្នកចាស់ទុំគួរមានទស្សនៈយ៉ាងណាចំពោះភាពទន់ខ្សោយរបស់ខ្លួន?
១៥ មេរៀន។ ពេលបងប្អូនបានត្រូវតែងតាំងជាអ្នកចាស់ទុំ នោះមិនមែនដោយសារពួកគេជាមនុស្សល្អឥតខ្ចោះទេ។ ទោះជាពួកគេចេះធ្វើខុសក្ដី ព្រះយេហូវ៉ាតម្រូវឲ្យពួកគេទទួលស្គាល់កំហុសរបស់ពួកគេ ហើយបណ្ដុះឲ្យមានបុគ្គលិកលក្ខណៈជាគ្រិស្តសាសនិកកាន់តែល្អប្រសើរឡើង។ (អេភ. ៤:២៣, ២៤) អ្នកចាស់ទុំគួរប្រើការសិក្សាគម្ពីរផ្ទាល់ខ្លួនដើម្បីជួយខ្លួនឲ្យពិចារណាថា គាត់ត្រូវរីកចម្រើនចំពោះអ្វីខ្លះ ហើយកែប្រែអ្វីខ្លះដែលសំខាន់ចាំបាច់។ យ៉ាងនេះ ព្រះយេហូវ៉ានឹងជួយគាត់ឲ្យទៅជាអ្នកចាស់ទុំល្អនិងមានអំណរ។—យ៉ា. ១:២៥
ការធ្វើកិច្ចការជាមួយ អ្នកឯទៀតដែលមានភាពមិនល្អឥតខ្ចោះ
១៦. តើអ្វីអាចកើតឡើងបើអ្នកចាស់ទុំផ្ដោតអារម្មណ៍ទៅលើគុណវិបត្តិរបស់អ្នកឯទៀត?
១៦ ហេតុអ្វីនេះប្រហែលជាពិបាក? ដោយសារអ្នកចាស់ទុំរួមការងារយ៉ាងជិតស្និទ្ធជាមួយបងប្អូនក្នុងក្រុមជំនុំ ពួកគេអាចងាយឃើញគុណវិបត្តិរបស់បងប្អូនទាំងនោះ។ បើមិនប្រុងប្រយ័ត្ន ពួកអ្នកចាស់ទុំអាចធុញទ្រាន់ ប្រព្រឹត្តមិនសប្បុរស ឬរិះគន់បងប្អូននោះ។ ប៉ូលបានព្រមានគ្រិស្តសាសនិកថា សាថានចង់ឲ្យពួកគេធ្វើដូច្នេះ។—២កូ. ២:១០, ១១
១៧. តើប៉ូលមានទស្សនៈយ៉ាងណាចំពោះបងប្អូន?
១៧ គំរូរបស់ប៉ូល។ គាត់រក្សាទស្សនៈត្រឹមត្រូវចំពោះបងប្អូនរបស់គាត់។ គាត់បានដឹងថាពួកគេចេះធ្វើខុស ដោយសារជួនកាលអ្វីដែលពួកគេបានធ្វើនាំឲ្យគាត់ឈឺចិត្ត។ ប៉ុន្តែប៉ូលបានដឹងថាពេលបុគ្គលណាម្នាក់ធ្វើខុស នេះមិនមានន័យថាគាត់ជាមនុស្សអាក្រក់នោះទេ។ ប៉ូលស្រឡាញ់បងប្អូនរបស់គាត់ ហើយបានផ្ដោតអារម្មណ៍ទៅលើគុណសម្បត្តិរបស់ពួកគេ។ បើបងប្អូនពិបាកធ្វើអ្វីដែលត្រឹមត្រូវ ប៉ូលមិនគិតពួកគេក្នុងផ្លូវអាក្រក់ទេ តែគាត់បានសន្និដ្ឋានថាពួកគេមានបំណងចិត្តល្អ ហើយថាពួកគេត្រូវការជំនួយ។
១៨. តើអ្នករៀនអ្វីពីរបៀបដែលប៉ូលប្រព្រឹត្តចំពោះបញ្ហារវាងអឺរ៉ូឌានិងស៊ីនទីច? (ភីលីព ៤:១-៣)
១៨ សូមគិតអំពីគំរូរបស់ប៉ូលស្ដីអំពីរបៀបដែលគាត់ប្រព្រឹត្តទៅលើបងស្រីពីរនាក់នៅក្រុមជំនុំនាក្រុងភីលីព។ (សូមអាន ភីលីព ៤:១-៣) បងស្រីទាំងពីរនាក់នោះគឺអឺរ៉ូឌានិងស៊ីនទីច។ ពួកគាត់មានជម្លោះជាមួយគ្នា និងមានចិត្តថ្នាំងថ្នាក់នឹងគ្នារហូតដល់លែងធ្វើជាមិត្តនឹងគ្នា។ ប៉ូលមិនមែនប្រព្រឹត្តដោយមិនសប្បុរស ឬរិះគន់ពួកគាត់ទេ។ ផ្ទុយទៅវិញ គាត់បានផ្ដោតអារម្មណ៍ទៅលើគុណសម្បត្តិរបស់ពួកគាត់។ ស្ត្រីគ្រិស្តសាសនិកទាំងពីរនាក់នេះបានបម្រើព្រះយេហូវ៉ាយ៉ាងស្មោះត្រង់អស់រយៈពេលជាយូរ។ ប៉ូលដឹងថាព្រះយេហូវ៉ាស្រឡាញ់ពួកគាត់។ ដោយសារប៉ូលមានទស្សនៈត្រឹមត្រូវចំពោះពួកគាត់ នេះជំរុញចិត្តគាត់ឲ្យលើកទឹកចិត្តពួកគាត់ឲ្យជានានឹងគ្នា។ ដោយសារប៉ូលផ្ដោតអារម្មណ៍ទៅលើគុណសម្បត្តិរបស់អ្នកឯទៀត គាត់អាចរក្សាអំណរនិងមិត្តភាពជិតស្និទ្ធជាមួយបងប្អូនក្នុងក្រុមជំនុំនោះដែរ។
សូមព្យាយាមមិនវិនិច្ឆ័យអ្នកឯទៀត (សូមមើលវគ្គ១៩) *
១៩. (ក) តើពួកអ្នកចាស់ទុំអាចរក្សាទស្សនៈត្រឹមត្រូវចំពោះបងប្អូនរួមជំនឿយ៉ាងដូចម្ដេច? (ខ) តើអ្នកអាចរៀនអ្វីពីរូបភាពអំពីអ្នកចាស់ទុំម្នាក់ដែលកំពុងសម្អាតសាលប្រជុំ?
១៩ មេរៀន។ ពួកអ្នកចាស់ទុំ សូមរកមើលគុណសម្បត្តិរបស់បងប្អូន។ ពួកគេម្នាក់ៗជាមនុស្សមិនល្អឥតខ្ចោះ តែមានគុណសម្បត្តិដែលគួរឲ្យកោតសរសើររៀងៗខ្លួន។ (ភី. ២:៣) ពិតមែន ម្ដងម្កាលពួកអ្នកចាស់ទុំប្រហែលជាត្រូវកែតម្រង់របៀបគិតគូររបស់បងប្អូនណាម្នាក់។ ប៉ុន្តែដូចប៉ូល ពួកអ្នកចាស់ទុំគួរព្យាយាមមិនផ្ដោតអារម្មណ៍ទៅលើពាក្យសម្ដីនិងការប្រព្រឹត្តរបស់បងប្អូនដែលគួរឲ្យទើសចិត្ត។ ផ្ទុយទៅវិញ ពួកគេគួរផ្ដោតអារម្មណ៍ទៅលើសេចក្ដីស្រឡាញ់ដែលបុគ្គលនោះមានចំពោះព្រះយេហូវ៉ា ការស៊ូទ្រាំរបស់គាត់ក្នុងកិច្ចបម្រើព្រះ និងអ្វីល្អដែលគាត់អាចធ្វើបាន។ ពួកអ្នកចាស់ទុំដែលផ្ដោតអារម្មណ៍ទៅលើគុណសម្បត្តិរបស់បងប្អូនឯទៀត ធ្វើឲ្យក្រុមជំនុំមានបរិយាកាសកក់ក្ដៅនិងមានសេចក្ដីស្រឡាញ់។
ចូរបន្តយកតម្រាប់ប៉ូល
២០. តើពួកអ្នកចាស់ទុំអាចបន្តរៀនពីគំរូរបស់ប៉ូលយ៉ាងដូចម្ដេច?
២០ បងប្អូនដែលជាអ្នកចាស់ទុំ អ្នកនឹងទទួលប្រយោជន៍ ដោយបន្តសិក្សាអំពីគំរូរបស់ប៉ូល។ ជាឧទាហរណ៍ អ្នកអាចមើលអត្ថបទដែលមានចំណងជើងថា«អ្នកចាស់ទុំ‹ជាអ្នករួមការងារដើម្បីឲ្យយើងរាល់គ្នាមានអំណរ›» ក្នុងទស្សនាវដ្ដីប៉មយាម ថ្ងៃទី១៥ ខែមករា ឆ្នាំ២០១៣។ កាលដែលអ្នកអានអត្ថបទនោះ អ្នកអាចសួរខ្លួនឯងថា ‹តើគំរូរបស់ប៉ូលអាចជួយខ្ញុំឲ្យរក្សាអំណរកាលដែលខ្ញុំបំពេញកិច្ចការជាអ្នកចាស់ទុំយ៉ាងដូចម្ដេច?›។
២១. តើពួកអ្នកចាស់ទុំអាចប្រាកដអំពីអ្វី?
២១ ពួកអ្នកចាស់ទុំ សូមចាំថាព្រះយេហូវ៉ាមិនសុំអ្នកឲ្យធ្វើជាមនុស្សល្អឥតខ្ចោះទេ។ តែលោកសុំអ្នកឲ្យធ្វើជាមនុស្សស្មោះត្រង់។ (១កូ. ៤:២) ព្រះយេហូវ៉ាពេញចិត្តចំពោះកិច្ចការនឿយហត់និងភាពស្មោះត្រង់របស់ប៉ូល។ អ្នកក៏អាចប្រាកដថាព្រះពេញចិត្តនឹងអ្វីដែលអ្នកធ្វើសម្រាប់លោកដែរ។ ព្រះយេហូវ៉ានឹងមិន‹បំភ្លេចការដែលអ្នកបានធ្វើ និងសេចក្ដីស្រឡាញ់ដែលអ្នកបានបង្ហាញចំពោះនាមរបស់លោកឡើយ គឺអ្នកបានបម្រើពួកអ្នកបរិសុទ្ធ ហើយនៅតែបម្រើពួកគាត់ជានិច្ច›។—ហេ. ៦:១០
ចម្រៀងលេខ៨៧ ចូរមកទទួលកម្លាំងចិត្តឡើងវិញ!
^ វគ្គ 5 យើងមានចិត្តកតញ្ញូជាខ្លាំងចំពោះកិច្ចការនឿយហត់ដែលពួកអ្នកចាស់ទុំធ្វើដើម្បីជួយយើង! ក្នុងអត្ថបទនេះ យើងនឹងពិចារណាអំពីការពិបាកបួនដែលពួកគេជួបប្រទះ និងរបៀបដែលគំរូរបស់សាវ័កប៉ូលអាចជួយពួកអ្នកចាស់ទុំនៅសព្វថ្ងៃនេះឲ្យយកឈ្នះការពិបាកទាំងនោះ។ អត្ថបទនេះនឹងជួយយើងទាំងអស់គ្នាឲ្យចេះយល់អារម្មណ៍ពួកអ្នកចាស់ទុំ និងជំរុញចិត្តយើងឲ្យគាំទ្រនិងបង្ហាញសេចក្ដីស្រឡាញ់ចំពោះពួកគេ។
^ វគ្គ 61 ការពណ៌នាអំពីរូបភាព: កាលដែលបងប្រុសម្នាក់ចាកចេញពីកន្លែងធ្វើការរបស់គាត់ គាត់ផ្សព្វផ្សាយដំណឹងល្អដល់អ្នករួមការងារម្នាក់។
^ វគ្គ 63 ការពណ៌នាអំពីរូបភាព: អ្នកចាស់ទុំសួរសុខទុក្ខយ៉ាងកក់ក្ដៅដល់បងប្រុសម្នាក់ដែលនៅតែឯង។
^ វគ្គ 65 ការពណ៌នាអំពីរូបភាព: បងប្រុសម្នាក់ឲ្យយោបល់ដល់បុគ្គលម្នាក់ដែលទើសចិត្តចំពោះរឿងមួយ។
^ វគ្គ 67 ការពណ៌នាអំពីរូបភាព: អ្នកចាស់ទុំមិនវិនិច្ឆ័យប្អូនប្រុសម្នាក់ដែលបានឲ្យអ្វីផ្សេងបង្វែរអារម្មណ៍គាត់ពីការបំពេញកិច្ចការដែលគាត់ស្ម័គ្រចិត្តធ្វើនោះទេ។
