1-2. Ԝе чьма баш бә кӧ рʹуспи чʹәʹв бьдьнә Паԝлосе шанди?

 ПАԜЛОСЕ шанди хушк-бьра гәләк һʹьз дькьр. Әԝи бона һʹалхԝәшийа ԝан гәләк шьхӧл дькьр у бона ԝан хәм дькьр (Кʹаред Шандийа 20:31). Ԝана жи Паԝлос гәләк һʹьз дькьр. Щарәке, гава рʹуспийед жь Әфәсе пеһʹәсийан кӧ әԝана ԝе Паԝлосе шанди ида нәвиньн, «һʹәму жи гәләки дьгьрийан» (Кʹаред Шандийа 20:37). Иро жи, рʹуспийед хирәт хушк-бьра гәләк һʹьз дькьн у бь дьл у щан бона ԝан шьхӧл дькьн у али ԝан дькьн (Филипи 2:16, 17). Ле рʹуспи жи щарна рʹасти чәтьнайа тен. Гәло чь дькарә али ԝан бькә кӧ сәри жь ван чәтьнайа дәрхьн?

² Ԝе баш бә кӧ рʹуспи дина хԝә бьдьнә мәсәла Паԝлосе шанди (1 Корьнтʹи 11:1). Паԝлосе шанди мәрьвәки мина мә бу, у щарна ԝирʹа жи зор бу тьштед рʹаст бькә (Рʹомайи 7:18-20). Ле нава чәтьнайада Паԝлос мерхаси у шабуна хԝә ӧнда нәдькьр. Иро жи рʹуспи рʹасти чәтьнайа тен. Сәва кӧ әԝана бькарьбьн ван чәтьнайа сафи кьн у шабуна хԝә ӧнда нәкьн, ԝе баш бә кӧ әԝана чʹәʹв бьдьнә Паԝлосе шанди. Гәло чаԝа? Ԝәрә әм пебьһʹәсьн.

3. Ве готареда, әме дина хԝә бьдьнә чь?

³ Щарна рʹуспийарʹа чәтьн ә: (1) һьм шьхӧле бәлакьрьна мьзгине һьм жи щабдарийед хԝәйә дьн биньн сери, (2) бона аликʹарийа хушк-бьра ԝәʹдә вәԛәтиньн, (3) һьмбәри кемасийед хԝә шәрʹ бькьн (4) у кемасийед кәсед дьн сәбьр кьн. Ве готареда, әме дина хԝә бьдьне кӧ Паԝлосе шанди чаԝа сәри бь ван чәтьнайарʹа дәрдьхьст у рʹуспи чаԝа дькарьн чʹәʹв бьдьнә ԝи.

4. Һьнә рʹуспийарʹа чьрʹа чәтьн ә рʹебәрийа шьхӧле бәлакьрьна мьзгине бькьн?

⁴ Щарна чьрʹа дькарә чәтьн бә? Щабдарийед рʹуспийа гәләк ьн. Мәсәлә, хенщи ве йәке кӧ әԝана щабдар ьн бона шьхӧле бәлакьрьна мьзгине, гәләк жь ԝана щьвина «Мина Иса Бьжин у Хьзмәт кьн» дәрбаз дькьн у пе готара дәрдькʹәвьн. Әԝана бәрдәстийед щьвате һин дькьн, у бәрдәԝам дькьн хушк-бьра һелан кьн у бьшьдиньн (1 Пәтрус 5:2). Хенщи ве йәке, һьнә рʹуспи сәр шьхӧле авакьрьн у хԝәйкьрьна Одед Щьвата у сәр авайед тʹәшкиләте дьхәбьтьн. Диса жи, мина һʹәму хушк-бьред дьн, щабдарийа ԝанә һәри фәрз әв ә, ԝәки мьзгине бәла кьн (Мәтта 28:19, 20).

5. Жь алийе бәлакьрьна мьзгинева, Паԝлос мәсәләкә чаԝа һишт?

⁵ Мәсәла Паԝлосе шанди. Гәло Паԝлос чьрʹа пешдачуйи бу? Филипи 1:10-да, әԝи гот: «Кʹижан һәрә ԛәнщ ә, һун ԝе бьбьжерьн». Паԝлос хԝәха жи ль гора ве ширәте дьжит. Ԝирʹа щабдарик һатьбу дайине, у әԝи әв щабдари ча тьштәки һәри фәрз һʹәсаб дькьр. Әԝи мьзгин һьм ль щийед кӧ гәләк мәрьв һәбун бәла дькьр, һьм жи «мал бь мал» (Кʹаред Шандийа 20:20). Әԝи нә тʹәне һьнә рʹожа йан һьнә сьһʹәта хьзмәт дькьр, ле әԝ һәртʹьм һазьр бу кӧ мьзгине бәла кә. Мәсәлә, гава әԝ бажаре Атʹинайеда һивийа һәвалед хԝә бу, әԝи һьнә кәсед нав-дәнгрʹа дәрһәԛа мьзгине гьли кьр, у һьнә жь ԝан бунә шагьртед Иса Мәсиһ (Кʹаред Шандийа 17:16, 17, 34). Гава Паԝлос гьрти бу жи, әԝи кәсед дәр-дора хԝәрʹа мьзгин бәла дькьр (Филипи 1:13, 14; Кʹаред Шандийа 28:16-24).

6. Паԝлос бьред дьн чь һин дькьр?

⁶ Паԝлос ԝәхта хԝә бь щурʹәки баш дьда хәбате. Әԝи гәләк щар гази кәсед дьн дькьр кӧ әԝана тʹәви ԝи хьзмәт бькьн. Мәсәлә, әԝи щарәке Йуһʹәнна, кӧ жерʹа Марԛос дьготьн, у щарәкә дьн жи Тимотʹейо хԝәрʹа бьрә хьзмәтийе (Кʹаред Шандийа 12:25; 16:1-4). Бешьк Паԝлосе шанди нишани ԝан дькьр, кӧ гәрәке әԝ щьвате чаԝа организә бькьн, чаԝа шьвантийе бькьн у чаԝа бьбьн дәрсдаред баш (1 Корьнтʹи 4:17).

7. Рʹуспи чаԝа дькарьн тʹәмийа кӧ Паԝлос Әфәси 6:14, 15-да дабу, бьԛәдиньн?

⁷ Дәрс. Мина Паԝлосе шанди, ԝе баш бә кӧ рʹуспи нә тʹәне мал бь мал хьзмәт бькьн, ле һазьр бьн кӧ щурʹә-щурʹә дәрәщада мәрьварʹа бәʹса мьзгине бькьн (Әфәси 6:14, 15 бьхунә). Мәсәлә, әԝана дькарьн дькʹанада йан щийе хәбата хԝә мәрьварʹа шәʹдәтийе бьдьн. Йан  жи, гава әԝана сәр проектед авакьрьне дьхәбьтьн, әԝ дькарьн щинар у базьрганарʹа шәʹдәтийе бьдьн. Гава рʹуспи хьзмәтеда ньн, ԝе баш бә кӧ әԝ мина Паԝлос хирәт бькьн, ԝәки бәрдәстийед щьвате у кәсед дьн һин кьн.

8. Дьбәкә щарна лазьм бә кӧ рʹуспи чь бькьн?

⁸ Щабдарийед рʹуспийа, щьватеда йан жи мьһаледа чьԛас зәʹф бьн жи, гәрәке әԝана бь ван щабдарийа һаԛас мьжул нәбьн, кӧ бона шьхӧле бәлакьрьна мьзгине ԝәхт нәминә. Бона ве йәке, дьбәкә щарна лазьм бә кӧ әԝ һьнә щабдарийед дьн ԛәбул нәкьн. Пешийа кӧ щабдарике ԛәбул кьн, ԝе баш бә кӧ әԝана дӧа бькьн у рʹьнд бьфькьрьн. Дьбәкә әԝана фәʹм бькьн кӧ һәгәр әԝана ве щабдарийе ԛәбул кьн, ԝәхта ԝан ԝе тʹера ԝан нәкә кӧ ԛӧльхкьрьна тʹәви малбәте дәрбаз кьн, мьзгине бь хирәт бәла кьн йан жи зарʹед хԝә һин кьн ча хьзмәт кьн. Дьԛәԝьмә ԝанрʹа чәтьн ә кӧ һьнә щабдарийа ԛәбул нәкьн, ле әԝана дькарьн баԝәр бьн кӧ Йаһоԝа фәʹм дькә, ԝәки әԝана дьхԝазьн һәр тьштида ортʹа зерʹин бьвиньн.

9. Рʹуспи щарна рʹасти чь чәтьнайе тен?

⁹ Щарна чьрʹа дькарә чәтьн бә? Хьзмәткʹаред Йаһоԝа рʹасти гәләк тәнгасийа тен. Ван рʹожед ахьрийе, әм гьшк һʹәԝще һелане, аликʹарийе у бәрдьлийе нә. Щарна жи мәрʹа аликʹари лазьм ә кӧ әм нәкʹәвьнә рʹекә шаш (1 Тʹесалоники 5:14). Рʹуспи һәмьки нькарьн һʹәму чәтьнайед хушк-бьра сафи кьн. Диса жи, Йаһоԝа дьхԝазә кӧ рʹуспи чь жь дәсте ԝан те бькьн, ԝәки хьзмәткʹаред ԝи ԛәԝи кьн у бьпарезьн. Һәгәр шьхӧлед рʹуспийа гәләк ьн, әԝана ча дькарьн аликʹарийе бьдьнә хушк-бьра у дьлбинийе бьдьнә ԝан?

10. Ль гора 1 Тʹесалоники 2:7, Паԝлос һьндава хушк-бьрада чаԝа бу?

¹⁰ Мәсәла Паԝлосе шанди. Паԝлос мәщал дьгәрʹийа кӧ пʹайе хушк-бьра бьдә у ԝана бьшьдинә. Ԝе баш бә кӧ рʹуспи чʹәʹв бьдьнә ԝи у бь дьловани али хушк-бьра бькьн (1 Тʹесалоники 2:7 бьхунә). Паԝлос ԝанрʹа дьгот ԝәки әԝ ԝана һʹьз дькә у Йаһоԝа жи ԝана һʹьз дькә (2 Корьнтʹи 2:4; Әфәси 2:4, 5). Паԝлос хушк-бьра ча достед хԝә һʹәсаб дькьр у тʹәви ԝана ԝәʹдә дәрбаз дькьр. Әв йәк кӧ әԝи ԝанрʹа аза дәрһәԛа тьрс у кемасийед хԝә гьли дькьр, нишан дькә ԝәки әԝи итʹбарийа хԝә ԝана дьани (2 Корьнтʹи 7:5; 1 Тимотʹейо 1:15). Ле Паԝлосе шанди һәри зедә дина хԝә нәдьда дәрдед хԝә, ле әԝи дина хԝә дьда сәр ве йәке кӧ ча али хушк-бьра бькә.

11. Паԝлос чьма ширәт дьда хушк-бьра?

¹¹ Щарна лазьм бу кӧ Паԝлосе шанди ширәте бьдә хушк-бьра. Ле әԝи тʹӧ щар  жь һерсе ширәт нәдьда ԝан, әԝи ԝана һʹьз дькьр у дьхԝәст ԝана бьпараста. Әԝи дьхԝәст кӧ ширәтед ԝи фәʹмдари бьн у бьгьһижьн дьле ԝан. Мәсәлә, Паԝлос нәʹма хԝәйә Корьнтʹийарʹа ширәтед рʹастә-рʹаст ньвиси. Паши кӧ әԝи әв нәʹмә ԝанрʹа ньвиси, әԝи дьхԝәст бьзаньбуйа һәла ԝана әԝ ширәт данә хәбате йан на, ләма әԝи Тито шандә бал ԝан. Гава әԝи бьһист кӧ ԝана ширәтед ԝи ԛәбул кьрьн у пек анин, әԝ гәләк ша бу (2 Корьнтʹи 7:6, 7).

12. Рʹуспи чаԝа дькарьн хушк-бьра ԛәԝи кьн?

¹² Дәрс. Мина Паԝлосе шанди, ԝе баш бә кӧ рʹуспи тʹәви хушк-бьра ԝәʹдә дәрбаз кьн. Мәсәлә, ԝе баш бә кӧ әԝана һьнәки зу һәрʹьн Ода Щьвате, ԝәки бькарьбьн пешийа щьвина тʹәви хушк-бьра хәбәр дьн у ԝан һелан кьн. Щарна, бона һеландайине бәс ә ԝәки рʹуспи тʹәви кәсәки чәнд дәԛа хәбәр дьн (Рʹомайи 1:12; Әфәси 5:16). Мина Паԝлосе шанди, ԝе баш бә кӧ рʹуспи бь сайа Хәбәра Хԝәде хушк-бьра ԛәԝи кьн у ԝана бьдьн баԝәркьрьне кӧ Хԝәде ԝана һʹьз дькә. Ӧса жи, гәрәке хушк-бьра тʹәхмин кьн, кӧ рʹуспи ԝана һʹьз дькьн. Ләма жи гәрәке рʹуспи һәр гав тʹәви ԝан хәбәр дьн у мәщала бьгәрʹьн кӧ пʹайе ԝан бьдьн. Һәгәр лазьм бә кӧ рʹуспи ширәте бьдьн кәсәки, гәрәке әԝана ве йәке сәр һʹиме Хәбәра Хԝәде бькьн. Сәва кӧ ширәтәк бьгьһижә дьле хушк-бьра, лазьм ә кӧ әв ширәт бь зәлали у бь дьловани бе дайине (Галати 6:1).

13. Кемасийед шәхси чаԝа дькарьн сәр рʹуспийа һʹӧкӧм кьн?

¹³ Щарна чьрʹа дькарә чәтьн бә? Рʹуспи беԛьсур ниньн. Мина һәр кәси, әԝана жи шашийа дькьн (Рʹомайи 3:23). Щарна ԝана зор те кӧ сәр кемасийед хԝә рʹаст бьньһерʹьн. Һьнәк сәва кемасийед хԝә бь зедәйи дьлтәнг дьбьн. Һьнәк жи сәр кемасийед хԝә сәрʹа-бәрʹа дьньһерʹьн у сәр хԝә нахәбьтьн ԝәки гӧһастьна бькьн.

14. Ль гора Филипи 4:13, мьлукти чаԝа али Паԝлос дькьр ԝәки һьмбәри кемасийед хԝә шәрʹ бькә?

¹⁴ Мәсәла Паԝлосе шанди. Паԝлос бь мьлукти ԛәбул дькьр кӧ әԝ тʹәне нькарә һьмбәри кемасийед хԝә шәрʹ бькә. Әԝи заньбу ԝәки әԝ һʹәԝще аликʹарийа Хԝәде йә. Пешийа кӧ Паԝлос бу шагьрте Иса Мәсиһ, әԝ йәки сәрт у сәрһʹьшк бу, у әԝи Мәсиһи дьзерандьн. Ле паше, әԝи шашийед хԝә ани рʹуйе хԝә, у һазьр бу кӧ ньһерʹандьн у хәйсәт-һʹӧнӧред хԝә бьгӧһезә (1 Тимотʹейо 1:12-16). Бь сайа  аликʹарийа Йаһоԝа, Паԝлос бу шьванәки дьлован, дьлрʹәʹм у мьлук. Рʹаст ә әԝ сәва кемасийед хԝә әʹщьз дьбу, ле әԝ тʹьме дәрһәԛа ве йәке нәдьфькьри, у баԝәрийа хԝә рʹәʹма Йаһоԝа дьани (Рʹомайи 7:21-25). Әԝи заньбу кӧ әԝ беԛьсур нинә, ле әԝи хирәт дькьр кӧ хәйсәте хԝә ль гора хԝәстьна Хԝәде бьгӧһезә, у әԝи хԝә бь мьлукти дьспарт аликʹарийа Хԝәде, ԝәки шьхӧле хԝә бинә сери (1 Корьнтʹи 9:27; Филипи 4:13 бьхунә).

15. Гәрәке рʹуспи сәр кемасийед хԝә чаԝа бьньһерʹьн?

¹⁵ Дәрс. Гава кәсәк ча рʹуспи те кʹьфшкьрьне, әв найе һʹәсабе ԝәки әԝ беԛьсур ә. Диса жи, Йаһоԝа дьхԝазә кӧ әԝана кемасийед хԝә ԛәбул кьн у «мәрьве ну» ль хԝә кьн (Әфәси 4:23, 24). Һәгәр рʹуспи ль гора Хәбәра Хԝәде дьле хԝә бьщерʹьбиньн у хирәт бькьн кӧ хԝә рʹаст бькьн, Йаһоԝа ԝе али ԝан бькә, кӧ әԝ бәхтәԝар у пешдачуйи бьн (Аԛуб 1:25).

16. Һәгәр рʹуспи дина хԝә бьдьн кемасийед хушк-бьра, чь проблем дькарә пешда бе?

¹⁶ Щарна чьрʹа дькарә чәтьн бә? Гава рʹуспи тʹәви хушк-бьра гәләк ԝәхт дәрбаз дькьн, дьбәкә һьнә кемасийед ԝан дьһа бькʹәвьнә чʹәʹва. Ләма жи, гәрәке рʹуспи һаш жь хԝә һәбьн кӧ һьмбәри хушк-бьра сәрт нәбьн у ԝана сущдар нәкьн, ԝәки дьле Мире-щьна ша нәкьн (2 Корьнтʹи 2:10, 11).

17. Паԝлосе шанди сәр хушк-бьра ча дьньһерʹи?

¹⁷ Мәсәла Паԝлосе шанди. Паԝлос һәртʹьм сәр хушк-бьра позитив дьньһерʹи. Әԝи һәмьки шашийед ԝан заньбу, чьмки кьред ԝан щарна сәр ԝи жи һʹӧкӧм дькьрьн. Ле әԝи ӧса жи фәʹм дькьр, кӧ гава кәсәк шаши дькә, әв йәк найе һʹәсабе кӧ әԝ мәрьвәки хьраб ә. Әԝи хушк-бьра һʹьз дькьр у дина хԝә дьда хәйсәтед ԝанә баш. Гава хушк-бьрарʹа чәтьн бу кӧ тьштед рʹаст бькьн, Паԝлос диса жи нәдьфькьри кӧ нета ԝан хьраб ә, ле фәʹм дькьр кӧ әԝана һʹәԝще аликʹарийе нә.

18. Гава нав дӧ хушкада проблем пешда һат, Паԝлос чь кьр? (Филипи 4:1-3)

¹⁸ Мәсәлә, бинә бира хԝә кӧ гава нав дӧ хушкед щьвата Филипйайеда проблем пешда һат, Паԝлос чь кьр (Филипи 4:1-3 бьхунә). Паԝлос әв дӧ хушк, Әйодийа у Сьнтиха, рʹьнд нас дькьрьн. Әԝи заньбу кӧ ԝана гәләк сала бь мьлукти хьзмәт кьрьбун, у әԝ баԝәр бу кӧ Йаһоԝа ԝана һʹьз дькә. Ләма жи Паԝлос әԝ сәрт сущдар нәкьрьн, ле әԝи дина хԝә да хәйсәтед ԝанә баш, у дьхԝәст али ԝан бькә ԝәки әԝана ль һәв бен. Бь сайа ньһерʹандьна позитив, әԝи шабуна хԝә ӧнда нәдькьр, у достийа ԝи тʹәви хушк-бьра хьраб нәдьбу.

19. (а) Рʹуспи чаԝа дькарьн ньһерʹандьна рʹаст сәр хушк-бьра хԝәй кьн? (б) Тӧ жь ви шькле кӧ рʹуспи Ода Щьвате тʹәмьз дькә, чь һин дьби?

 ¹⁹ Дәрс. Рʹуспино, дина хԝә бьдьнә хәйсәтед баш йед хушк-бьра! Рʹаст ә һәр кәс гӧнәкʹар ә, ле хәйсәт-һʹӧнӧред баш бал һәр кәси һәйә (Филипи 2:3). Дьбәкә щарна лазьм бә кӧ рʹуспи фькьр у ньһерʹандьнед хушк-бьра рʹаст кьн. Диса жи, мина Паԝлос, ԝе баш бә кӧ һерса ԝан сәва готьн у кьред хушк-бьра рʹанәбә, ле дина хԝә бьдьн ве йәке кӧ хушк-бьра Йаһоԝа чьԛас һʹьз дькьн, чаԝа бь сәбьр Хԝәдерʹа хьзмәт дькьн у дькарьн ԛәнщийе бькьн. Рʹуспи бь ньһерʹандьна хԝәйә позитив, щьват дькьнә мина һелунәкә хԝәш у гәрм.

20. Рʹуспи чаԝа дькарьн жь мәсәла Паԝлосе шанди кʹаре бьстиньн?

²⁰ Рʹуспино, бәрдәԝам кьн мәсәла Паԝлосе шанди леколин бькьн. Мәсәлә, «Индекса Әʹдәбийәта Бьрща Ԛәрәԝьлийеда», бьньһерʹьн бьнсәри «Паԝлос», у «мәсәла бона рʹуспийа». Чахе һун ван готара бьхуньн, жь хԝә бьпьрсьн: «Гәло мәсәла Паԝлос чаԝа дькарә али мьн бькә, кӧ әз щабдарийед хԝә бь шабуне биньм сери?»

21. Рʹуспи дькарьн чьда баԝәр бьн?

²¹ Рʹуспино, бир нәкьн кӧ Йаһоԝа жь ԝә һивийа беԛьсуртийе нинә, әԝ һивийа амьнийе йә (1 Корьнтʹи 4:2). Йаһоԝа хирәт у амьнийа Паԝлосе шанди ԛимәт дькьр, у һун дькарьн баԝәр бьн, ԝәки Әԝ хьзмәта ԝә жи ԛимәте дькә. Йаһоԝа ԝе тʹӧ щар бир нәкә «кьред ԝә у әԝ һʹьзкьрьна кӧ ԝә бона наве ԝи да кʹьфше . . . , йа кӧ ԝә щьмәʹта Хԝәдерʹа хьзмәткʹари кьр у дькьн жи»! (Ибрани 6:10).