1-2. I mushing kaay udy cileejel cya mupostol Pool mwa kwambulwiish bakul leeloow?

 MUPOSTOL Pool waakady mukat baan baabw. Ukadil mudimw mukasakan bwa kwiibakashish mu diitabij. (Yil. 20:31) Ki bwabiny, baan baabw biin Krist baakady bamukat bikasakan. Musang mukwaabw, “boos baakady badil” haakady bakul ba mu Efez bamanyik neey: kaabakady mwa kumutaloh cikwaabw (Yil. 20:37) Cikwaabw, bakul biitut bakaakal mudimw bikasakan, i bakat bikasakan baan baabw ni baloolong mwaababw moos bwa kwiibambulwiish. (Fili. 2:16, 17) Ki misang yikwaabw, bakul badyaakal byaab bahet makab. I biny bidy mwa kwiibambulwiish bwa kwiimataatameen?

² Bakul bakaakal mudimw bikasakan bady mwa kukontonon cileejel cya Pool. (1 Kor. 11:1) Kaakadyobw bend ni bukash bu bwa banjel. Pool waakady muut ukiish muwaakan waakady ul misang yikwaabw diivit bwa kulong myand yilengel. (Rom 7:18-20) Ni uhetel makab ma mishind ni mishind. Ki Pool kalekeeloh bend bwa kukadil baan baabw mudimw bikasakan eecy kulong mudimw indiy ni kaakunying. Hady bakul biidikij cileejel cya Pool, bady mwa kutungunuk ni kukadil Yehow mudimw ni musangal ning bab batwiilangan ni makab. Tutalayaak kaabaak mudyobw mwa kulong naak.

3. I biny bitwiiyiiy kukontonon mu ciin bwaal eecy, ni i biny bitwiiyiiy kulong?

³ Mu ciin bwaal eecy, twiiyiiy kukontonon myand yinaay yidy bakul mwa kutaatameen: 1) kwiikal ni kacy-kacy mu mudimw a bukajaady ni mu midimw yikwaabw ya mu cisumbw, 2) kwiikal ni diib dya kukal mudimw a bulamy, 3) mudyobw mwa kutaatameen bibiih byaabab bu mudyobw baat bakiish bawaakan, ni 4) mudyobw mwa kutaatameen bibiih bya bakwaabw. Twiiyiiy kwiisambil ha mushind waakady Pool mutaatameen makab moos ni mudy bakul mwa kulond mu diikas dindiy.

4. Bwabiny bidy mwa kumweekok misang yikwaabw bikasakan bwa bakul kwiikalobw cileejel cilengel mu mudimw a bukajaady?

⁴ Cidy mwa kulong bwa bahetok lutat. Bakul bady ni myand yivul ya kulong mu cisumbw ni kulombol cikwaabw mudimw a bukajaady. Cileejel, bavul baloolombol cisangil cya mukacy mwa luming ni balombol dilong dya Bibl dya cisumbw. Cikwaabw bady mwa kulongolol misambw. Bakaakal cikwaabw mudimw muvul bwa kulongweesh bakwanjok ba mudimw ni biikal ni musangal a kukashish biin-kweet baan-balum ni baan-bakaj mu diitabij. (1 Py. 5:2) Bakul bakwaabw bakaakal midimw ya lwiibak ni ya kulam Nzubw ya Bukaleng ni midimw yikwaabw yidyok bwa kuhambidil naay Yehow. Cikwaabw, teng bu baat boos mu cisumbw, mukul i wa kuuhal bwa kwiikal cileejel mu mudimw a kudiil baat musah mulengel.​—Mat. 28:19, 20.

5. I cileejel kaay cidy Pool mushiy habitaatal mudimw a bukajaady?

⁵ Bakul bady mwa kwiidikij cileejel cya Pool. Mu Biin Filipw 1:10, Pool wiitwambambil mwaakadyey kajaady waakady ni musangal haleebeley neey: ‘manyikaay mwa kunoonoh myand yidy yilengel [yidy ni buseeb buvul].’ Pool ulondel mubel indiy oow. Ulongel mudimw indiy a bukajaady oow, ni mu mivw yivul yilongeley utadil neey: mudimw indiy a bukajaady oow waakady bwaal bwa buseeb buvul mu shikacil indiy. Waakady udiil baat musah a Mawej ‘mukacy mwa baat ni ku mazubw maabab.’ (Yil. 20:20) Kaakadyoh bend udiil baat musah teng ha diib kahand dya diifuk eecy diifuk dyumw ku luming. Waakady udiil baat musah cyaab cyoos ni diib dyoos dyaakadyey mukat! Cileejel: Hacyaakadyey mwiimanyin balund nend ku Ateen, utwaadijil kudiil baat ba mitah yishil-shilangan musah mulengel, ni uhetel bihet bilengel bwaal baat bakwaabw biitabil Mawej. (Yil. 17:16, 17, 34) Ning mwaakadyey mu “lukan,” Pool waakady teng udiil baat baakady habwiih nend musah.​—Fili. 1:13, 14; Yil. 28:16-24.

6. Pool ulongweeshel baat bakwaabw bwa kulongobw biny?

⁶ Pool ukadil mudimw bilengel ni diib dindiy. Waakady ubiikanok baat bakwaabw bwa kumutwaalobw mu mudimw a bukajaady. Cileejel, mu lwend lwindiy lwa kuuhal mu mudimw a bumisiioneer, uyiil ni Jah ubiibiikanobw ney Mark; ni uyiil mu lwend lwindiy lwiibiidy ni Timoteh. (Yil. 12:25; 16:1-4) Biin-biin, Pool ulongel mwindiy moos bwa kulongweesh baat aab mwa kulongolol myand mu cisumbw, mwa kukal bilengel mudimw a bulamy, ni mwa kwiikal balongweesh ba Diiy dya Mawej bashimat.​—1 Kor. 4:17.

7. I mushind kaay udy bakul mwa kulond mubel utwaadil Pool udy mu Biin Efez 6:14, 15?

⁷ Dilongweesh. Bakul bady mwa kwiidikij cileejel cya Pool kiin teng kudiil baat musah ku cibel ni ku cibel, ki cikwaabw hakwiikalobw  biihangadij bwa kudiil baat musah cyaab cyoos ni diib dyoos didyobw mwa kwiibasangan. (Bal Biin Efez 6:14, 15.) Cileejel, bady mwa kudiil baat musah ha byaab bidyobw basumbishil biit eecy ha cyaab cyaabab cya mudimw. Eecy hadyobw bambulwiish ku midimw ya lwiibak lwa Mazubw ma Bukaleng, bady mwa kudiil biin mutumb naabw eecy baat biiyiiy kuland biit kudyobw musah mulengel. Teng bu Pool, bakul bady mwa kukal mudimw ni diib dyaababw mu mudimw a bukajaady bwa kwambulwiish bakwaabw, ni bakwanjok ba mudimw.

8. I biny bidy mukul mwa kulongok mu biisang bikwaabw?

⁸ Kabiin bikaam bakul biikal ni myand yikahit-hit ya kulong mu cisumbw cyaabab eecy mu cijeng yidy mwa kulong bwa bakaakal diib dya kulong mudimw a bukajaady. Bwa kwiikalobw ni kacy-kacy, bikaam balekok midimw yikwaabw. Haanyim ha kulangil ni kwiisambil ha bwaal oobw, bady mwa kutal neey: bab biitab mudimw oow, kabakuhetoh bend mushind a kulong myand yidy ni buseeb buvul. Mu myand eey mudy: kulombol kuhambidil kwa mu cisak luming loos, kwiikal ni cisumy mu mudimw a kudiil baat musah, eecy kulongweesh baan baababw Diiy dya Mawej. Bakwaabw i batal biibakasakeen bwa kwangat majit makwaabw, Ki bikaam biikal bajaadik neey: Yehow umvumvw mudyobw biiyumvw hadyobw bakaam kwiikal ni kacy-kacy mu myand yoos.

9. I biny bidy mwa kukasakeen bakul hadyobw ni bivul bya kulong?

⁹ Cidy mwa kulong bwa bahetoh lutat. Baat ba Yehow baheehet makab mavul. Mu mafuk ma bulekel aam, tut boos tukaakaam bwa bitwambulwiish, ni biitukashish ku micim. Ni mu biisang bikwaabw, bakwaabw bakaakaam dyambulwiish bwa kulekobw ciikadil cibiih. (1 Tes. 5:14) I bwaal bwa biin-biin, bakul kabiin mwa kuman makab moos matwiitwiilangan naam baat ba Mawej. Ning biby biikal nook, Yehow i mukat bwa bakul balong cyoos cidyobw mwa kulong bwa kukashishobw mikook yindiy ku micim ni kwiiyilam. I mushind kaay udy bakul bady ni bivul bya kulong mwa kuhetobw diib dya kwambulwiish biin-kweet ni biit bidyobw naaby diikeng?

10. Bilondeshel 1 Biin Tesalonik 2:7, i mushind kaay waakady Pool wambulwiish baat ba Yehow?

¹⁰ Bakul bady mwa kwiidikij cileejel cya Pool. Pool waakady teng habwiih bwa kweel baan baabab kalumbady ni bwa kwiibakashish ku micim. Bakul baloolong bilengel hadyobw balond cileejel cindiy cya lukat ha kulongel baat ba Yehow myand ni lukat ni bulengel. (Bal 1 Biin Tesalonik 2:7.) Pool waakady mujaadikil biin Krist nend neey: i mwiibakat ni Yehow byend i mwiibakat. (2 Kor. 2:4; Ef. 2:4, 5) Pool waakady ulongel baan baabw ba mu cisumbw myand bu balund nend, ni waakady uhitij naabw diib haakaabumw. Wiibaleejel mwaakadyey mwiibateekel micim hakwiibambil ni bujaalal myand yaakady yimutond ni bilem byaakadyey naaby. (2 Kor. 7:5; 1 Tim. 1:15) Ki Pool kaakadyoh bend mutum meej teng ku myand yindiy. Hamut a kulongey nook, waakady mukat kwambulwiish baan baabw.

11. Bwabiny Pool waakady ubel baan baab?

¹¹ Mu biisang bikwaabw, byaakady bilomb Pool  bwa kubeley biin Krist nend. Ki kaakadyoh bend ulong nook bwaal baakady bamubungamij. Waakady mwiibakish mibel bwaal waakady mwiibakat ni mwiibalam bwa kaay bahet buuhund. Waakady mukat bwa baat bumvw mubel indiy bihehel ni bamwiitab. Cileejel, mu mukand ufundiley biin Krist ba mu Korent, Pool utwaadil mubel waakady ukashish micim bikasakan. Kuunyim kwa yiy muman kufund mukand oow, waakady mwiibatuminey ku dyambulwiish dya Tiit. Pool waakady utat ni micim bwa kumanyik cyaakadyobw mwa kulong hadyobw bahet mukand indiy oow. Waakady ni musangal muvul haakadyey mumvw neey: biitabiil mubel indiy ni bamukooyedyeel!​—2 Kor. 7:6, 7.

12. I mushind kaay udy bakul mwa kukashish biin Krist naabw ku micim?

¹² Dilongweesh. Bakul bady mwa kulond cileejel cya Pool hakwiikal ni ciibidil cya kuhitij diib haakaabumw ni biin Krist naabw. Mushind mulengel udyobw mwa kulong nook i kufik ha diib mu bisangil bya cisumbw ni kiihacil ka kwiisamb ni biin Krist naabw bwa kukashishanganobw. Bidyaakal byangat teng minit yikeeh bwa kukashish mwiin-kweet mwaan-mulum eecy mwaan-mukaj ni may ma lukat makaakaamey. (Rom 1:12; Ef. 5:16) Mukul uloolond mu diikas dya Pool wiiyiiy kukashish cikwaabw diitabij dya biin Krist nend ni Diiy dya Mawej ni bwa kwiibajaadikil neey: Mawej i mwiibakat. Wiibajaajaadikil cikwaabw bwa bamanyik neey: i mwiibakat. Wiisaasamb naabw ha ciibidil ni ukaakaam mishind yidyey mwa kwiibeel naay kalumbady. Hady mukul utwaal mubel, biikaam iikal mushimacil mu Diiy dya Mawej. Bwaal i mukat bwa mwiin-kweet woos hakooyel mibel eey.​—Kal. 6:1.

13. I mushind kaay udy mukul mwa kwiiyumvw bwa bibiih bindiy?

¹³ Cidy mwa kulong bwa bahetoh lutat. Bakul kabiishoh bend bawaakan. Teng bu baat boos, baloolong byaabw bibiih. (Rom 3:23) Bady mwa kul misang yikwaabw diivit bwa kwiikal ni kacy-kacy bwa mudyobw batal bibiih byaababw. Bakwaabw bady mwa kutat ni micim hakulangil bikasakan ha bibiih byaababw biloolong bwa bakooyel mu mabok. Bakwaabw bady mwa kulang neey: bibiih byaabab kabiin ni buseeb, ni kabiin bakat bwa kulongolol myand kahand.

14. Bilondeshel Biin Filipw 4:13, i mushind kaay waakady kwiihweekesh kwa Pool kumwambulwiish bwa kutaatameeney bibiih bindiy?

¹⁴ Bakul bady mwa kwiidikij cileejel cya Pool. Pool umanyikil ni kwiihweekesh neey: kaakadyoh bend mukumban bwa kutaatameen bibiih bindiy. Ukaamin bukash bwa Mawej. Kuuhal-a-hal, Pool waakady mwiin mut mukasakan, ni mukabish a biin Krist. Ki hahicil mafuk, wiiyiil kutal neey: myand yaakadyey ulong yaakady yibiih ni ukacil bwa kushiitulul meej mindiy ni buumuut bwindiy. (1 Tim. 1:12-16) Ku dyambulwiish dya Yehow, Pool ushaadil mukul udy ni lukat, udy ni micim yimwiit mund bwa bakwaabw, ni mwiin kwiihweekesh.  Waakady mumanyik neey: waakady mulong myand yibiih yivul; ki kaakadyoh bend mutungunuk ni kulangil ha myand yibiih yilongeley. Hamut a kulong nook, wiitabil neey: Yehow waakady mumufwiil lus. (Rom 7:21-25) Kakaaminoh bend bwa kwiikal muwaakan. Hamut a kulongey nook, waakady mwiikashishomw bwa kulengej biikadil bindiy bya bwiin Krist ni weeyelel Yehow ni kwiihweekesh hakumulomb dyambulwiish bwa kukumbajey mudimw indiy.​—1 Kor. 9:27; bal Biin Filipw 4:13.

15. I biny bidy bakul mwa kulong bwa kwiikal ni meej ma kacy-kacy ha bibiih byaabab?

¹⁵ Dilongweesh. Bakul kabiishoh bend bateek mu cisumbw bwaal i bawaakan. Nook, Yehow ukaakaam bwa bamanyik neey: baloolong bibiih, ni bwa balengej buumuut bwaababw bwa bwiin-Krist. (Ef. 4:23, 24) Bikaam mukul iikononon ku dyambulwiish dya Diiy dya Mawej bwa kutal myand yidyey mwa kulongolol. Nook, Yehow wiiyiiy kumwambulwiish bwa kwiikaley ni musangal ni kwiikal mukul mulengel.​—Jak 1:25.

16. I biny bidy mwa kufikil mukul hadyey uhit kutal myand yibiih yidy bakwaabw balong?

¹⁶ Cidy mwa kulong bwa bahetoh lutat. Hady bakul biikal ni ciibidil cya kuhitij diib haakaabumw ni biin mu cisumbw, bady mwa kumanyik biheehel myand yibiih yidyobw balong. Ki, bakul bab kabay badimuk, bady mwa kufulul mund, kuleeb myand kabay ni bulengel, eecy bady mwa kutwaadij kutobolol baat bakwaabw. Pool udyumwiijil biin Krist neey: Sataan i mukat bwa balong nook.​—2 Kor. 2:10, 11.

17. I meej kaay maakady naam Pool habitaatal baan baabw?

¹⁷ Bakul bady mwa kwiidikij cileejel cya Pool. Waakady teng ni meej malengel kudy baan baabw biin Krist. Waakady mumanyik myand yibiih yaakadyobw balong, ni hahicil mafuk, myand yilongelobw yimutengel bibiih ku micim. Ning naak, Pool waakady mumanyik kushilangan kudy hakacy ha bilong bibiih ni baat babiih. Waakady mukat baan baabw ni waakady uhit kutal biikadil byaababw bilengel. Bu mwaakady baan baabw bal diivit bwa kulong bwaal bulengel, utadil neey: baakady ni tubingil tulengel ni byaakady bikaam bituh kwiibambulwiish.

18. I biin biwudy mwa kulongel ku mushind waakady Pool mwambulwiish Evodih ni Sentish? (Biin Filipw 4:1-3)

¹⁸ Tukonononaay cileejel cya mwaakady Pool mwambulwiish baan beet babidy ba mu cisumbw cya mu Filipw. (Bal Biin Filipw 4:1-3.) Misang yikwaabw Evodih ni Sentish kabaakadyoh bend bumvwangan ni baakady bakabulukangan mu bulund bwaabab. Pool kaakadyoh bend mufulul mund eecy uleeb bibiih bwa baab; waakady mwiimanyin ha bikadil bilengel byaabab. Biin-kweet baan bakaj ba lulamat aab, baakady bakadil Yehow mudimw mukacy mwa mafuk mavul. Pool waakady mumanyik neey: Yehow waakady mwiibakat. Meej malengel maakady naam Pool bwa baan beet baan bakaj aab, maakady mamusak bwa kwiibakashishey ku micim bwa kukaamobw diitalal. Cikwaabw kutal kwindiy kwa myand kulengel kumwambulwiishil bwa kwiikaley ni musangal  ni bwa kulam bulund bwindiy ni baan baabw mu cisumbw.

19. a) I mushind kaay udy bakul mwa kwiikal ni meej malengel kudy biin Krist naabw? b) I biny bitudy mwa kulongel ku cifwaatul cya mukul uloolongolol ku Nzubw a Bukaleng?

¹⁹ Dilongweesh. Bakul, talaayok biikadil bilengel bidy naaby baan been baan-balum ni baan-bakaj. Tut boos katwiishoh bend bawaakan; cikwaabw, muut woos udy ni biikadil bitudy mwa kwanyish. (Fili. 2:3) Cya biin, bakul bady mwa kwiikal ni ciibidil cya kwambulwiish mwiin-kweet mwaan-mulum eecy mwaan-mukaj ni mibel. Teng bu Pool, bikaam bakul biikal bajingunun bikasakan cidy cisak muut bwa kulong myand kahand eecy bwa kuhatul may mabiih. Hamut a kulong nook, baloolong bilengel bwa kwiimanyin ha lukat ludy naal muut aaw bwa Yehow, mudyey utaatameen myand mu mudimw a Mawej, ni kwiikashomw kwindiy bwa kulong myand yilengel. Bakul banyaanyish biikadil bilengel bidy naaby bakwaabw, bambambulwiish baan-baabw bwa biiyumvw neey: i biibakat kudy baat boos mu cisumbw.

20. I mushind kaay udy bakul mwa kutungunuk ni kuhetel dyambulwiish ku cileejel cya Pool?

²⁰ Nun bakul, myand eey yiiyiiy kwiinwambulwiish, hanutuutungunuk ni kulongel ha cileejel cya Pool. Cileejel, mu Index des publications, udy mwa kutal muush mwa ciin bwaal citam cya neey: “Paul” ni cikwaabw mu kaciin bwaal ka neey: “Anciens.” Uw mubal myand yidyomw, iyihanguj neey: ‘I mushind kaay udy cileejel cya Pool mwa kuyambulwiish bwa kwiikal ni musangal hakukumbaj mudimw a mim wa bukul?’

21. I biny bidy bakul mwa kwiikal batwiishiibw?

²¹ Nun bakul, vulukaay neey: Yehow kiin wiinulomboh bend bwa nwiikal baat bawaakan; ki wiinuloolombw bwa nwiikal ni lulamat. (1 Kor. 4:2) Yehow waakady ni musangal bwa mudimw mukasakan wa lulamat waakady Pool mulong. Iikal mutwiishiibw cikwaabw neey: Mawej usaasangal bwa mudimw uwumukaakadil. Yehow “kiish uvulamin midimw yiinun. Kiish uvulamin ning lukat lwiinun lunwaakady bamuleej ku midimw yinukadil ni yinukaakadil biin Krist neen.”​—Ebr. 6:10.