1-2. Ngapi omu sihonena somupositoli Paurusa nasi vatera vakuronambunga neina?

 MUPOSITOLI Paurusa kwa here vapuli vakwawo. Age nga rugana unene mokuvapakera mbili. (Yirug. 20:31) Ano morwa eyi, vapuli vakwawo kwa mu here unene. Sikando simwe, vapuli vakwawo “kwa lilire unene” apa vakuronambunga womoEfeso va zuvhire asi kapi ngava mona hena Paurusa. (Yirug. 20:37) Mokulifana, vakuronambunga vetu kwa hara vanavazinyetu unene ntani kurugana paapa va hulira yipo va va vatere. (Fil. 2:16, 17) Poyiruwo yimwe, vakuronambunga kuvakarera udigu kusikisa mo yirugana nayinye eyi va hepa kurugana. Yisinke nayi va vatera yipo va yi sikise mo?

² Vakuronambunga vetu kuvhura kulirongera ko kosihonena saPaurusa. (1 Kol. 11:1) Age kapi ga kere nevhuliko eli va kara nalyo vaengeli. Paurusa kwa kere muntu gokudira kusikilira mo ogu ngayi karere pamwe udigu kurugana yininke yoyiwa. (Rom. 7:18-20) Ntani age nga ligwanekere nomaudigu gamwe. Nye Paurusa kapi ga hagekere kuruganena unene vapuli vakwawo ndi a guve. Apa vakuronambunga ava honene Paurusa, awo kuvhura kutwikira kukarera Jehova noruhafo nampili ngomu vana kuligwanekera nomaudigu. Tuzeni tu ka tare omu nava vhura kuyirugana.

3. Yisinke natu ka zogera mosirongwa esi ntani yisinke hena natu ka lironga?

³ Mosirongwa esi, tatu ka zogera yininke yine eyi ayi karere vakuronambunga udigu kurugana poyiruwo yimwe: (1) kukara nosiruwo sokugwanena po sokuzuvhisa ntani sokurugana yirugana yapeke, (2) kugwana siruwo sokukorangeda vanavazinyetu, (3) kulididimikira maupirankondo gawo ntani (4) kulididimikira madiro kusikilira mo govapuli vakwawo. Tatu ka zogera eyi ya vaterere Paurusa yipo a lididimikire maudigu aga ntani nomu vakuronambunga nava mu honena.

4. Morwasinke pamwe ayi karere udigu kovakuronambunga va lihameke mo unene mosirugana sokuzuvhisa?

⁴ Eyi ayi karere udigu. Vakuronambunga kwa kara noyitumbukira yoyinzi kukwatera mo kupitisira mosirugana sokuzuvhisa. Pasihonena, sinzi sawo kukara munasipundi mepongo lyomokatji kosivike ntani kupitisira Elirongo lyoBibeli lyoMbunga. Awo kuvhura hena kugava yiuyungwa yapeke. Awo kudeura vakwafimbunga ntani kuyihafera mokukorangeda vanavazinyetu. (1 Pet. 5:2) Vakuronambunga vamwe kurugana komatungo, kupakera mbili Yinyanga yoUhompa ntani nomatungo gamwe goukareli wetu. Ngwendi vazuvhisi navenye womombungakriste, sirugana somulyo po unene esi ava rugana vakuronambunga kuna kara sokulihameka mokuzuvhisa.—Mat. 28:19, 20.

5. Sihonena musinke ga tura po Paurusa ngomuzuvhisi?

⁵ Sihonena saPaurusa. MoVafilipi 1:10, Paurusa kwa uyungire mo konda zeyi ya mu tompokerere mosirugana sokuzuvhisa. Age kwa tanta asi: ‘Diveni asi yipi yomulyo po unene.’ Paurusa nage kwa sikisire mo nonkango odo. Age kwa mu pere sirugana sokuzuvhisa, ano nomvhura dononzi age kwa tere sirugana oso asi sininke somulyo po unene meparu lyendi. Age nga zuvhisa “moyitarameho ntani tunda embo zende embo.” (Yirug. 20:20) Age kapi nga zuvhisa posiruwo songandi mezuva ndi ezuva limwe mosivike. Age nga ruganesa nkenye siruwo esi nga gwana yipo a zuvhise. Pasihonena, apa ga ndindilire vakwawo moAtena, age kwa zuvhisilire mbunga zovantu ava va divikwire, ano vamwe kwa purakenene kombudi zendi. (Yirug. 17:16, 17, 34) Nampili ngomu Paurusa ga kere “monomango,” age kwa zuvhisilire vantu ava ga kere nawo pepi.—Fil. 1:13, 14; Yirug. 28:16-24.

6. Edeuro musinke ga geve Paurusa kwava wopeke?

⁶ Paurusa kwa ruganesere nawa siruwo sendi. Rorunzi nga zigida ko vamwe yipo va ka zuvhise kumwe nage. Pasihonena, morugendo rwendi rokuhova routumwa, age kwa pitwire ko Johanesa ogu ngava tumbura hena asi Marukusa, ano morugendo rwendi rwauvali age kwa pitwire ko Timoteusa. (Yirug. 12:25; 16:1-4) Tuna si huguvara asi Paurusa kwa rugene paapa ga hulira yipo a ronge vagara owo omu nava pakere mbili mbungakriste, omu nava rugana sirugana sokudingura nokukorangeda vapuli vakwawo ntani nomu nava kara varongi wovawa.—1 Kol. 4:17.

7. Ngapi omu vakuronambunga nava kwama nonkango edi da kara moVaefeso 6:14, 15?

⁷ Eyi nava lirongera ko vakuronambunga. Vakuronambunga kuvhura va honene Paurusa, kapisi pokuzuvhisa tupu tunda embo zende embo, nye hena pokuzuvhisira nkenye oku vana kara nsene zina moneka mpito. (Resa Vaefeso 6:14, 15.) Pasihonena, awo kuvhura va zuvhisire moyitora apa ava zi va ka randange ndi koyirugana yawo. Ntani apa ava vatere kutunga Yinyanga yoUhompa, awo kuvhura va zuvhisire  vamusinda ndi vantu ava ava randesa yininke. Ngwendi moomu gayi rugene Paurusa, vakuronambunga kuvhura va ruganese siruwo esi ava kara mokuzuvhisa yipo va deure wopeke kukwatera mo vakwafimbunga.

8. Yisinke nampo na vhura kurugana mukuronambunga poyiruwo yimwe?

⁸ Vakuronambunga kapisi va pulisire yirugana yomombungakriste nayimwe, yi va ninkise va dire kukara nosiruwo sokulihameka mo moyirugana yokuzuvhisa. Mokuninka asi va gwane siruwo sokurugana yininke nayinye, poyiruwo yimwe kuvhura va nyoke kutambura yitumbukira yongandi. Konyima zokugazadara ko nokukanderera, awo kuvhura ngava ya dimburure asi nsene va tambura situmbukira songandi, ayo kapi ngayi va tompoka mokurugana yininke yomulyo po. Yininke oyo kwa kwatera mo kukara noUkareli wEpata nkenye sivike, kulitura mo unene mokuzuvhisa ndi kudeura vana vawo yipo nawo va lihameke mokuzuvhisa. Vamwe kuvadigopera kunyoka kutambura yitumbukira yoyinzi, nye va hepa kudiva asi Jehova kukwata egano kweyi va kara neharo lyokurugana yininke yoyinzi.

9. Udigu musinke ava ligwanekere nawo vakuronambunga ava va kara noyirugana yoyinzi?

⁹ Eyi ayi karere udigu. Vantu vaJehova kuligwanekera nomaudigu gomanzi. Pomazuva aga gopouhura, natuvenye tuna hepa ekorangedo nevatero ntani nehengagwido. Ntani poyiruwo yimwe, vanavazinyetu vamwe va hepa evatero yipo va nyokere po yirugana yoyidona. (1 Tes. 5:14) Yimo, vakuronambunga kapi tava vhuru kugusa po maudigu nagenye aga ava ligwanekere nago vakareli vaJehova. Nye nampili ngoso, Jehova ana hara vakuronambunga va rugane paapa va hulira mokukorangeda vantu vendi ntani nokuvapopera. Ngapi omu vakuronambunga ava va kara noyirugana yoyinzi nava gwana siruwo yipo va vatere vanavazinyetu ava vana hepa evatero?

10. Kuliza no-1 Vatesaronika 2:7, ngapi omu Paurusa ga pakerere mbili vantu vaKarunga?

¹⁰ Sihonena saPaurusa. Paurusa nga pandadeke vakwawo nkenye apa ntani nokuvakorangeda. Ayo ya kara nomulyo kovakuronambunga mokuhonena sihonena saPaurusa ntani pokukara neharo nonkenda kovanavazinyetu. (Resa 1 Vatesaronika 2:7.) Paurusa kwa tanterere vapuli vakwawo asi ga va hara ntani kwa va tanterere asi Jehova nage ga va here. (2 Kol. 2:4; Efe. 2:4, 5) Paurusa kwa tekwire womombungakriste ngovakaume vendi ntani nga kara kumwe nawo. Age kwa yi likidire asi ga va huguvara pokuvatantera kuvyukilira kuhamena yinka yendi ntani maupirankondo gendi. (2 Kol. 7:5; 1 Tim. 1:15) Nye nampili ngoso, Paurusa kapi ga demenenene komaudigu gendi, nye age kwa here kuvatera vapuli vakwawo.

11. Morwasinke Paurusa nga pukwilire vapuli vakwawo?

¹¹ Poyiruwo yimwe, Paurusa ga hepere kupukurura vapuli vakwawo. Nye age kapi ga yi rugene oyo nositambo sehandu. Age kwa va pukwilire morwa ga va here ntani kwa here kuvapopera  koyiponga yokulisiga-siga. Age nga hetekere ko kuvapukurura monkedi zoureru kukwata egano ntani kwa here va tambure mapukururo gendi. Pasihonena, mombilive ezi ga tjangerere koVakolinte, Paurusa kwa geve epukururo lyononkondo. Konyima zapa ga tjenge mbilive ozo, age kwa va tuminine Titusa. Paurusa kwa kere nosinka kuhamena omu mbilive zendi va zi tambwire. Age kwa hefe apa ga zuvhire asi awo vana tambura epukururo lyendi ntani nokulitura pasirugana.—2 Kol. 7:6, 7.

12. Ngapi omu vakuronambunga nava nkondopeka vapuli vakwawo?

¹² Eyi nava lirongera ko vakuronambunga. Vakuronambunga kuvhura kuhonena Paurusa pokulitulira po siruwo sokukara novapuli vakwawo. Nkedi zimwe omu nava yi rugana kuna kara pokulivinduka kusika kepongo yipo va likorangede nava wopeke. Rorunzi ayo kugusa tupu nominute dongandi mokugava ekorangedo eli ana hepa munazinyetu gongandi. (Rom. 1:12; Efe. 5:16) Mukuronambunga ogu a kwama sihonena saPaurusa kuruganesa Bibeli yipo a nkondopeke vapuli vakwawo nokuvatantera asi Karunga ga va hara. Ntani hena age kulikida eharo kovapuli vakwawo. Age kuzogera nawo nkenye apa ntani kupapara nompito omu na vhura kuvapandadeka. Apa mukuronambunga a gava epukururo, age kudivilisa asi epukururo olyo lina lizi noNonkango daKarunga. Age kugava epukururo lyokuvyukilira nonkenda morwa ana hara munazinyetu gongandi a li ture pasirugana.—Gar. 6:1.

13. Ngapi omu maupirankondo naga kundama mukuronambunga?

¹³ Eyi ayi karere udigu. Vakuronambunga kapi va sikilira mo. Nawo kutura mapuko ngwendi nkenye gumwe. (Rom. 3:23) Poyiruwo yimwe kuvhura kuvadigopera mokukara nomutaro gomuwa komaupirankondo gawo. Vamwe kudemenena unene komaupirankondo gawo, ano eyi kuvaninkisa va dompe mutjima. Ano vamwe kuvhura va gazare asi maupirankondo gawo kwato mulyo nokugazara asi kapisi hepero va ture po malitjindjo.

14. Kuliza noVafilipi 4:13, ngapi omu elinunupiko lya vaterere Paurusa a lididimikire maupirankondo gendi?

¹⁴ Sihonena saPaurusa. Paurusa gayi dimbwilire asi kapi ta vhuru kulididimikira maupirankondo gendi pwamwene. Age ga hepere nonkondo dokutunda kwaKarunga. Komeho Paurusa aya kare Mukriste, age nga hepeke Vakriste. Nye konyima, age ga ya dimbwilire asi eyi nga rugana kwa kere epuko ntani ga kere neharo lyokutjindja yirugana yendi ntani noyikara yendi. (1 Tim. 1:12-16) Nevatero lyaJehova, Paurusa kwa ya kere mukuronambunga gonkenda, gokulinunupika ntani geharo. Age gayi divire asi ga kere nomaupirankondo gomanzi, nye kapi ga twikilire mokugazara yininke oyo ntani gayi pulire asi Jehova namugusira po. (Rom. 7:21-25) Age kapi gayi ndindilire asi a kare muntu gokusikilira mo. Nye age kwa rugene unene  a wapukurure yikara yendi yoSikriste ntani ga huguvarere mevatero lyaJehova a sikise mo sirugana sendi.—1 Kol. 9:27; resa Vafilipi 4:13.

15. Ngapi omu mukuronambunga na kara nomutaro gomuwa kuhamena maupirankondo gendi?

¹⁵ Eyi nava lirongera ko vakuronambunga. Vakuronambunga kapi ava va horowora morwa asi va sikilira mo. Nye Jehova kundindira ko kwawo va tambure mapuko gawo ntani va tunge po yikara yoSikriste. (Efe. 4:23, 24) Mukuronambunga ga hepa kuruganesa Bibeli yipo a likonakone mwene ntani ga hepa kutura po malitjindjo aga gana kara hepero. Makura Jehova nga mu vatera a kare noruhafo ntani yipo a kare mukuronambunga gomuwa.—Jak. 1:25.

16. Yisinke nayi horoka nsene mukuronambunga a demenena komaupirankondo gava wopeke?

¹⁶ Morwasinke ayi karere udigu? Vakuronambunga kuvhura va dimburure maupirankondo govanavazinyetu womombungakriste morwa awo kuruganena kumwe nawo. Nye nsene kapi vana kutakamesa, vakuronambunga kuvhura va kare nonkareso zokuhanduka nezi zokudira kukara nonkenda ntani zokupangura wopeke. Paurusa kwa rondwere Vakriste asi Satana yiyo ga harera vantu va rugane oyo.—2 Kol. 2:10, 11.

17. Ngapi omu Paurusa ga tere vapuli vakwawo?

¹⁷ Sihonena saPaurusa. Age nkenye apa nga tara vapuli vakwawo monkedi zongwa. Age gayi divire asi awo kwa tulire mapuko morwa eyi ngava rugana poyiruwo yimwe ngayi mu handukisa. Nye Paurusa gayi divire asi muntu ogu a tura mapuko, kapi ayi tanta asi age ngoso muntu gomudona. Age kwa here vapuli vakwawo ntani nga demenene koyikara yawo yoyiwa. Apa vapuli vakwawo ngayi va digopere kurugana yoyiwa, age kwa gazarere asi awo va kere neharo lyokurugana yoyiwa, nye va hepere tupu evatero mokuyirugana ngoso.

18. Yisinke ono lirongere ko monkedi omu Paurusa ga vaterere Ewodiya naSintike? (Vafilipi 4:1-3)

¹⁸ Pasihonena, tu tareni omu Paurusa ga vaterere vanavazinyetu wovakadi vavali ava va kere mombungakriste zomoFilipi. (Resa Vafilipi 4:1-3.) Nampo Ewodiya naSintike kapi ngava lizuvhu kumwe ntani kapi va kere hena vakaume. Paurusa kapi ga kere nonkareso zokuhanduka ndi zokuvapangura, nye age kwa demenene koyikara yawo yoyiwa. Awo kwa kere vanavazinyetu wovakadi wovalimburukwi ava va karerere Jehova nomvhura dononzi. Paurusa ga yi divire asi Jehova ga va hara. Mokumona asi Paurusa ga kere nomutaro gomuwa kovanavazinyetu wovakadi ava vavali, age kwava korangedere va tulise po mbili. Ntani mokumona asi Paurusa kwa demenene koyikara yoyiwa yovakwawo, eyi kwa mu vaterere a twikire kukara noruhafo ntani nokukara nelikwatakano lyenene kumwe nava womombungakriste ozo.

19. (a) Ngapi omu vakuronambunga nava kara nomutaro gomuwa kovapuli vakwawo? (b) Yisinke ono kulirongera ko komukuronambunga ogu a kara pefano ana kuzeresa Sinyanga soUhompa?

¹⁹ Eyi nava lirongera ko vakuronambunga. Vakuronambunga, demeneneni koyikara yoyiwa  eyi va kara nayo vapuli vakweneni. Nkenye gumwe kapi ga sikilira mo, nye nampili ngoso, nkenye gumwe ga kara noyikara eyi natu vhura kuhafera. (Fil. 2:3) Yimo, poyiruwo yimwe, vakuronambunga va hepa kugava mapukururo komunazinyetu gongandi. Nye ngwendi Paurusa, vakuronambunga va hepa kuhetekera ko paapa va hulira yipo va dire kudemenena koyirugana yoyidona yomuntu ndi kononkango dendi donondona. Nye va hepa kudemenena koyininke yoyiwa eyi ga kara nayo ogo muntu, pasihonena omu ga hara Jehova, omu a lididimike yipo a karere Jehova ntani neharo eli ga kara nalyo mokurugana yoyiwa. Vakuronambunga ava ava demenene koyikara yoyiwa yovapuli vakwawo, kuvatera mbungakriste zi kare mouumwe.

20. Ngapi omu vakuronambunga nava twikira kugwanena mo uwa mosihonena saPaurusa?

²⁰ Vakuronambunga, one ngomu gwanena mo uwa pokutwikira kukwama sihonena saPaurusa. Pasihonena, moWatch Tower Publications Index, kuvhura mu tare siparatjangwa “Paurusa” ntani konhi zosiparatjangwagona “sihonena kovakuronambunga.” Ngomu ngomu resa yirongwa yimwe ya kara moruha oro, lipureni nyamweni asi ‘ngapi omu sihonena saPaurusa nasi vatera nge ni twikire kuhafa ngomu nina kusikisa mo sirugana sange ngomukuronambunga?’

21. Ehuguvaro musinke va hepa kukara nalyo vakuronambunga?

²¹ Vakuronambunga, diworokeni asi Jehova kapi ana kumupura mu sikilire mo, nye age kuna kumupura mu kare valimburukwi. (1 Kol. 4:2) Jehova ga haferere yirugana eyi nga rugana Paurusa ntani noulimburukwi wendi. Kuvhura mu kare nehuguvaro asi Jehova kuhafera yirugana eyi omu mu ruganene. Jehova “kapi nga divara yirugana yeni neharo eli mwa likida morwa edina lyendi, kweyi mwa kwefe vapongoki ntani kweyi muna kutwikira kuvakwafa.”—Heb. 6:10.