1-2. Ino cakubonenaako cakwe Paulo inga cabacafwa buyani bamanene?

 MUTUMWI Paulo wakalinga kubasuni bashominyina alimwi wakasebensa cankusu kubacafwa. (Milimo 20:31) Aboobo abalo bakalinga kumusuni abuumbi. Paciindi cimwi, bamanene baku Efeso ndyebakashiba kwaamba ayi teshi bakamuboneewo alimwi, ‘bakalila.’ (Milimo 20:37) Abalo bamanene mulibungano balibasuni abuumbi bamakwesu abenankashi. Alimwi balasebensa cankusu kwaamba ayi babacaafwe. (Filip. 2:16, 17) Nacibi boobo, cimwi ciindi bamanene baleenda mumapensho. Ino nciinshi ceenga cabacafwa kukoma mapensho?

² Kwiiya cakubonenaako cakwe Paulo inga kwabacafwa bamanene. (1 Koli. 11:1) Taakalinga kucite nkusu mbuli sha baanjelo. Paulo wakalinga muntu utamaninite, aboobo cimwi ciindi tacakalinga kumubeta cuubu kucita shiluleme. (Loma. 7:18-20) Alimwi wakalinga kwiinda mumapensho apusenepusene. Nacibi boobo, Paulo taakwe kuboolela mwisule nabi kucileka kusebensa calusangalalo. Kwiinda mukukonkela cakubonenaako cakwe Paulo, bamanene inga bacikonsha kukoma mapensho ngobeendaamo akutolelela kusebensela Yehova calusangalalo. Amuleke tubandike mbweenga bacita boobo.

3. Ino nshiinshi nsheshi twiiye mumutwi uyu?

³ Mumutwi uyu tutoobandika mapensho ali 4 bamanene baanji ngobeendaamo: (1) kucana ciindi cakwaabanamo lubasu muncito yakushimikila akukumanisha mikuli imwi njobacite, (2) kucana ciindi cakuyuminisha bamakwesu abenankashi, (3) lipenshi lyakuliyumya ceebo ca shintu shimwi nshebataciti kabotu, alimwi (4) kusebensela pomwi abamwi batamaninite. Tutobandika Paulo mbwakacikonsha kukoma mapensho aya ambweenga bamanene bakonkela cakubonenaako cakwe.

4. Ino nceebonshi cimwi ciindi nciyumu bamanene kuba panembo muncito yakushimikila?

⁴ Nceenga cabeta ciyumu. Kwilika pa mukuli wakuba panembo muncito yakushimikila, bamanene balicite mikuli iinji. Kucakubonenaako, buunji bwambabo mbobatanjilila kubungana kwamukati kansondo a Ciiyo ca Baibo Calibungano. Alimwi inga baba ambasu shimwi shakwaamba makani. Balacita shiinji kwaamba ayi baiishe basebenshi bacafwilisha alimwi balikondetwe kutolelela kuyuminisha bamakwesu abenankashi. (1 Pit. 5:2) Bamanene bamwi balacafwilisha muncito yakubamba Maanda aBwaami amisena imwi njetusebensesha muncito yakwe Lesa. Nacibi boobo, bweenka mbuli shikushimikila uli woonse mulibungano, incito iyandika abuumbi bamanene njobasebensa nkushimikila makani abotu.—Mate. 28:19, 20.

5. Ino Paulo wakatondesha cakubonenaako ca buyani mbuli shikushimikila?

⁵ Nsheenga bamanene beeya kucakubonenaako cakwe Paulo. Palilembo lya Bene Filipi 1:10, Paulo wakaamba cakamucafwa kuswitilila mbuli shikushimikila. Wakaamba ayi: ‘Amushinishe shintu shiyandika abuumbi.’ Paulo wakacita kweelana ambwakayuminisha bamwi. Wakapekwa ncito yakushimikila, aboobo kwamyaaka iinji, iyi njoyakalinga ncito iyandika abuumbi mubuumi bwakwe. Wakalinga kushimikila ‘mumisena mucanika bantu baanji akuŋanda aŋanda.’ (Milimo 20:20) Taakalinga kushimikilabo paciindi comwi mubushiku na bushiku bomwibo munsondo. Wakalinga kushimikila ciindi cili coonse alimwi akumusena kuli koonse. Kucakubonenaako, ndyaakalinga kulindila bamwi mbwaakalingaabo ku Atenisi, wakashimikila makani abotu kulikoto lya bantu bamwi bapukite abo bakasumina kwiiya. (Milimo 17:16, 17, 34) Nabi ndyebakamwaanga muŋanda yakwe, wakatolelela kushimikila baabo bakalinga pafwiifwi.—Filip. 1:13, 14; Milimo 28:16-24.

6. Ino Paulo wakaiisha bamwi bwakucita nshi?

⁶ Paulo wakacisebensesha kabotu abuumbi ciindi ncaakalinga kucite. Liinji wakalinga kwiitako bamwi kusebensaakwe muncito yakushimikila. Kucakubonenaako, palweendo lwakutaanguna muncito yabumishonali, wakaya a Joni Maako, lyalo palweendo lwabili wakaya a Timoti. (Milimo 12:25; 16:1-4) Ncakutatoonsha kwaamba ayi Paulo wakacita nshaakalinga kucikonsha kwaamba ayi aiishe basankwa aba bwakutalika libungano, bwakuyuminisha bashominyinaabo alimwi abwakwiisha kabotu.—1 Koli. 4:17

7. Ino bamanene inga baakonkela buyani maswi Paulo ngakaamba pa Bene Efeso 6:14, 15?

⁷ Ciiyo. Bamanene inga bakonkela cakubonenaako cakwe Paulo kuteshibo kwiinda mukushimikila kuŋanda aŋanda, sombi akuba balibambite kushimikila kuli koonse nkweenga baba alimwi paciindi cili coonse nceenga bacikonsha. (Amubelenge Bene Efeso 6:14, 15.) Kucakubonenaako, inga bashimikila ciindi ndyebatookuula  shintu na ndyebali kuncito. Na paciindi ndyebatoocafwilisha muncito yakuyaka Maanda aBwaami, inga bashimikila kubantu bali pafwiifwi na abo batokuulisha shintu. Bweenka mbuli Paulo, bamanene inga basebensesha ciindi ndyebali muncito yakushimikila kucafwa bamwi, kwiilikaawo abasebenshi bacafwilisha.

8. Ino nciinshi cimwi ciindi munene nceenga wayandika kucita?

⁸ Bamanene tabeelete kutaatilwa abuumbi amikuli imwi ya mulibungano na muncito sha mulibunga cakwaamba ayi kabaalilwa akwaabanamo lubasu muncito yakushimikila. Kwaamba ayi bacikoonshe kuba aciindi cakukumanisha mikuli yoonse njobacite, cimwi ciindi balyeelete kukaka kutambula ncito shimwi. Pesule lya kuyeeyawo akupaililaawo inga bacana kwaamba ayi kusumina ncito shimwi shiinji inga kwabapa kwaalilwa kucita shintu shiyandika abuumbi. Shintu ishi inga sheelikaawo kutanjilila kulambila kwamukwashi nsondo ansondo, kwaabanamo lubasu muncito yakushimikila, na kwiisha bana babo bwakushimikila. Bamwi balaalilwa kukaka kutambula mikuli iinji, nacibi boobo, inga bashoma kwaamba ayi Yehova alanyumfwisha kwaamba ayi balisuni kulama kabotu mikuli ipusenepusene.

9. Ino ndipenshi nshi bamanene bacite shakucita shiinji ndyobacana?

⁹ Nceenga cabeta ciyumu. Bantu bakwe Yehova baleenda mumapensho aanji. Munshiku shino shakweelaako, soonse tulayandika kuyuminishikwa, kucafwikwa alimwi akuumbulushikwa. Alimwi cimwi ciindi bamwi balayandika lucafwo kwaamba ayi baleye mibo itabete kabotu. (1 Tesa. 5:14) Ncakwiila kwaamba ayi bamanene inga tabamani mapensho oonse bantu bakwe Yehova ngobeendaamo. Nacibi boobo, Yehova alisuni ayi banoocita nsheenga bacikonsha kwaamba ayi bayuminishe akushitilisha mbelele shakwe. Ino bamanene bacite shakucita shiinji inga bacita buyani kwaamba ayi bacane ciindi cakupa lucafwo luyandika?

10. Kweelana a 1 Bene Tesalonika 2:7, ino Paulo wakatondesha buyani ayi wakalinga kubabikilaako maano bantu bakwe Yehova?

¹⁰ Cakubonenaako cakwe Paulo. Paulo lyoonse wakalinga ulibambite kulumba bamwi akubayuminisha. Inga cabota bamanene kukonkela cakubonenaako cakwe kwiinda mukutondesha lusuno ankuumbu kubashominyinaabo. (Amubelenge 1 Bene Tesalonika 2:7.) Paulo wakacafwa bashominyina kushoma kwaamba ayi Yehova alibasuni alimwi alakwe wakalinga kubasuni. (2 Koli. 2:4; Efe. 2:4, 5) Paulo wakalinga kucana ciindi cakuba pomwi abashominyina mukwiinga wakalinga kubabona ayi mbeshicibusa bakwe. Wakatondesha kwaamba ayi wakalinga kubashoma kwiinda mukubalwiitako shakalinga kumusukamika anshaakalinga kwaalilwa kucita kabotu. (2 Koli. 7:5; 1 Timo. 1:15) Nacibi boobo, Paulo taakwe kubikila maano kumapensho akwe. Sombi wakalinga kusuni kucafwa bashominyina.

11. Ino nceebonshi Paulo wakalulika bashominyina?

¹¹ Cimwi ciindi, Paulo wakalinga kuyandika kululika bashominyina. Nacibi boobo, taakwe kucita  boobo ceebo cakwaamba ayi wakalinga kukalalite. Wakabalulika ceebo cakwaamba ayi wakalinga kubabikila maano alimwi wakalinga kusuni kubashitilisha kumapensho apusenepusene. Wakeelesha kubalulika munshila yuubu kunyumfwisha alimwi wakalinga kusuni ayi basumine kululikwa. Kucakubonenaako, munkalata njaakalembela bene Kolinto, Paulo wakabalulika cankusu. Pesule lyakubalembela nkalata, wakatumako Taitasi. Paulo wakalinga kusuni kushiba nshobakacita pesule lyakutambula nkalata njaakabatumina. Wakakondwa abuumbi ndyaakanyumfwa ayi bakakonkela kululika kwakwe!—2 Koli. 7:6, 7.

12. Ino bamanene inga bacita buyani kwaamba ayi bayuminishe bashominyinaabo?

¹² Ciiyo. Bamanene inga bakonkela cakubonenaako cakwe Paulo kwiinda mukucana ciindi cakuba pomwi abashominyinaabo. Nshila yomwi mbweenga bacita boobo nkwiinda mukushika bwangu kumabungano kwaamba ayi babe aciindi cakuba amibandi iyuminisha bamwi. Liinji tacitoliiwo aciindi cilaamfu kwaamba maswi ayuminisha ngeenga mukwesu na nankashi wayandika. (Loma. 1:12; Efe. 5:16) Munene ukonkela cakubonenaako cakwe Paulo alayuminisha bashominyina kwiinda mukusebensesha Maswi akwe Lesa. Alimwi alabacafwa kushoma kwaamba ayi Yehova alibasuni. Kwiilikaawo, alacita nsheenga wacikonsha kwaamba ayi atondeshe ayi alibasuni abo mbwaatanjilila. Alabandikaabo lyoonse akucana ciindi ca kubalumba. Na munene wabona ayi kuli batoyandika kululikwa, alabalulika kusebensesha Maswi akwe Lesa. Teendi mweela alimwi alatondesha nkumbu mukwiinga alisuni kwaamba ayi mukwesu nabi nankashi asumine kululikwa.—Gala. 6:1.

13. Ino kwaalilwa kucita kabotu mushintu shimwi inga kwapa munene kulinyumfwa buyani?

¹³ Nceenga cabeta ciyumu. Bamanene tabamaninite. Bweenka mbuli muntu uli woonse, abalo balacita shilubo. (Loma. 3:23) Cimwi ciindi inga baalilwa kubona nshebataciti kabotu munshila yeelete. Bamwi inga kababikila maano abuumbi kusheesho nshebataciti kabotu cakwaamba ayi balinyumfwa akulefuka. Bamwi inga kabayeeya ayi cilibo kabotu nabi kwaamba ayi kuli nshebataciti kabotu, aboobo taakuwo ncobeelete kucitaawo.

14. Kweelana a Bene Filipi 4:13, ino kuliceesha kwakamucafwa buyani Paulo kubona shilubo shakwe munshila yeelete?

¹⁴ Cakubonenaako cakwe Paulo. Paulo mukuliceesha wakalinga kucishi kwaamba ayi inga taacikoonshi kwaalula nshaakalinga kwaalilwa kucita kabotu palwaakwe mwiine. Wakalinga kuyandika lucafwo lwakwe Yehova. Kaatana kuba Mwineklistu, Paulo wakasebensa cankusu kupensha Beneklistu. Ano mukuya kwaciindi, wakesa mukushiba kwaamba ayi nshaakalinga kucita tashakalinga kabotu aboobo wakalinga kulibambite kwaaluka. (1 Timo. 1:12-16) Kwiinda mulucafwo lwakwe Yehova, Paulo wakaba mweembeshi shilusuno, ucite  nkumbu alimwi uliceesha. Wakalinga kucishi kwaamba ayi kuli shiinji nshaakalinga kwaalilwa kucita kabotu; sombi taakwe kutolelela kuyeeya pasheesho. Muciindi cakucita boobo, wakashoma kwaamba ayi Yehova inga wamulekelela. (Loma. 7:21-25) Taakalinga kulilangila kucita shintu anga ngumuntu umaninite. Muciindi cakucita boobo, wakasebensa cankusu kwaamba ayi abe amibo ya Bwineklistu akucinka manungo muli Yehova kwaamba ayi amucaafwe kukumanisha ncito yakwe.—1 Koli. 9:27; amubelenge Bene Filipi 4:13.

15. Ino munene inga wacita buyani kwaamba ayi anoobona shilubo shakwe munshila yeelete?

¹⁵ Ciiyo. Bamanene tabasaalwi ceebo cakwaamba ayi balimaninite. Nacibi boobo, Yehova alabalangila kusumina shilubo shabo akusebensa cankusu kwaamba ayi babe amibo ya Bwineklistu. (Efe. 4:23, 24) Munene alyeelete kulicencenta kwiinda mukusebensesha Maswi akwe Lesa kwaamba ayi abone mbasu nshaataciti kabotu nsheenga wayandika kusebenselawo. Lyalo Yehova inga wamucafwa kuba munene usangalete alimwi uli kabotu.—Jemu. 1:25.

16. Ino nciinshi ceenga cacitika na munene kaabikila bunene maano pashintu bamwi nshebataciti kabotu?

¹⁶ Nceenga cabeta ciyumu. Ceebo cakusebensela pomwi abamwi mulibungano, cilaba cuubu bamanene kubona bamwi nshebataciti kabotu. Na tabana kucenjela bamanene inga bakalala, kutalika kwaamba shibiibi pabamwi na kwaalilwa kutondesha nkumbu. Paulo wakacenjesha Beneklistu ayi ishi nsheenga Satana wasuna ayi banoocita.—2 Koli. 2:10, 11.

17. Ino Paulo wakalinga kubabona buyani bashominyina?

¹⁷ Cakubonenaako cakwe Paulo. Lyoonse wakalinga kubikila bunene maano kusheesho bashominyina nshobakalinga kucita kabotu. Wakalinga kucishi ayi balacita shilubo, mukwiinga cimwi ciindi nshobakalinga kucita shakalinga kumucisa kumoyo. Nacibi boobo, Paulo wakalinga kucishi kwaamba ayi na muntu wacita cilubo teshi kwaamba ayi muntu uyo ngumubiibi. Wakalinga kubasuni bashominyina aboobo wakalinga kubikila maano kumibo yabo ibotu. Na wabona ayi batokwaalilwa kucita kabotu, wakalinga kusalawo kuyeeya ayi balisuni kucita shibotu aboobo batoyandikabo lucafwo.

18. Ino mweeya nshi kucakubonenaako cakwe Paulo mbwaakacafwa Yuwodia a Sintiki? (Bene Filipi 4:1-3)

¹⁸ Kucakubonenaako, amuyeeye Paulo mbwaakacafwa benankashi bobilo bakalinga mulibungano lyaku Filipi. (Amubelenge Bene Filipi 4:1-3.) Mpashi Yuwodia a Sintiki bakapusana aboobo bakalinga bacileka kunyumfwana. Muciindi cakubakalalila na kwaamba shibiibi pali mbabo, Paulo wakabikila maano kumibo yabo ibotu. Benankashi bashomeka aba bakasebensela Yehova kwamyaaka iinji. Paulo wakalinga kucishi ayi Yehova alibasuni. Mukwiinga Paulo wakabikila maano kumibo yabo ibotu, wakabayuminisha ayi batalike kunyumfwana. Kucita boobo kwakamucafwa kutolelela kuba usangalete akuba abushicibusa buyumu abaabo bakalinga mulibungano ili.

19. (a) Ino bamanene inga bacita buyani kwaamba ayi banoobikila maano kumibo ibotu ya bashominyinaabo? (b) Ino nciinshi nceenga mweeya ku cikope citotondesha munene utoobotesha mu Ŋanda ya Bwaami?

 ¹⁹ Ciiyo. Nobamanene, amubikile maano kumibo ibotu icite bashominyinaanu. Nabi kwaamba ayi uli woonse taamaninite, womwi awomwi alicite mibo ibotu. (Filip. 2:3) Ncakwiila ciindi aciindi bamanene inga bayandika kululika mukwesu na nankashi. Nacibi boobo, bweenka mbuli Paulo, bamanene balyeelete kusebensa cankusu kuleya kubikila maano kushintu muntu nshaataciti kabotu. Inga cabota na kababikila maano kumuntu uyo mbwaasuni Yehova, mbwaatooliyumya muncito yakwe Lesa alimwi ambweenga wacita kabotu kunembo. Bamanene babikila maano kumibo ibotu ya bamwi balacafwa bashominyinaabo kulinyumfwa ayi boonse balibasuni mulibungano.

20. Ino bamanene inga bacita buyani kwaamba ayi batolelele kukonkela cakubonenaako cakwe Paulo?

²⁰ Nobamanene, kutolelela kwiiya pacakubonenaako cakwe Paulo kulaakumucafwa. Kucakubonenaako, inga mwabona mulibuku lya Watch Tower Publications Index, lyalo akubona palembetwe ayi “Paul” akulanga pakamutwi katokwaamba ayi “example for elders.” Ndyemutobelenga makani atoocanika palubasu ulu amuliipushe ayi, ‘Ino kukonkela cakubonenaako cakwe Paulo inga kwancafwa buyani kutolelela kuba alusangalalo ndyentookumanisha ncito yangu mbuli munene?’

21. Ino nciinshi nceenga bamanene bashoma?

²¹ Nobamanene, mutaluubi kwaamba ayi Yehova tatoomulangila kucita shintu anga mbantu bamaninite; cinene ncaasuni kuli ndimwe nkushomeka. (1 Koli. 4:2) Yehova wakakondwa ceebo cakushomeka akusebensa cankusu kwakwe Paulo. Inga mwashoma kwaamba ayi Yehova alikondetwe pancito njomumusebensela. Aboobo “teshi akalube ncito njemwakacita, alimwi alusuno ndomwakamubonesha kwiinda mulucafwo ndomwakacita aloolo ndomucicita kubashominyinaanu.”—Ebu. 6:10.