1-2. Baana-bahulu kacenu bakona kutusiwa cwañi ki mutala wa muapositola Paulusi?

 MUAPOSITOLA PAULUSI naalata mizwale bahae. Naasebelize ka taata kuli abatuse. (Lik. 20:31) Ki lona libaka mizwale ni likaizeli bahae hane bamulata hahulu. Nako yeñwi, baana-bahulu ba kwa Efese “balila maswe” habautwa kuli nebasike babonana ni yena hape. (Lik. 20:37) Ni kacenu, baana-bahulu babasebeza ka taata balata hahulu mizwale ni likaizeli babona mi baeza mobakonela kaufela kuli babatuse. (Mafil. 2:16, 17) Kono fokuñwi, baana-bahulu bakopananga ni miinelo yetaata. Ki lika mañi zekona kubatusa?

² Baana-bahulu babasebeza ka taata bakatusiwa haiba banyakisisa mutala wa Paulusi. (1 Makor. 11:1) Paulusi naasi mutu yaipitezi. Naasika petahala mi fokuñwi neku mubelanga taata kueza zelukile. (Maro. 7:18-20) Mi naakopani ni miinelo yetaata yemiñata. Kono Paulusi naasika zwafa kamba kufelelwa ki tabo. Haiba baana-bahulu balikanyisa mutala wa Paulusi, bakakona kutiyela miinelo yetaata yebakopana ni yona ni kuzwelapili kuba ni tabo habanze basebeleza Jehova. Halunyakisiseñi mobakona kuezeza cwalo.

3. Lukanyakisisañi mwa taba ye, mi ki lika mañi zeñwi zeluka ituta?

³ Mwa taba ye, lukanyakisisa miinelo yetaata yemine yebakopana ni yona baana-bahulu babañata: (1) kuba ni nako yeñata ya kukutaza kono hape inze bapeta buikalabelo bwabona bobuñwi, (2) kuba balisana babalilato, (3) kutula mifokolo yabona, ni (4) kusebelisana ni mizwale ni likaizeli babasika petahala. Lukanyakisisa mo Paulusi naakonezi kutiyela miinelo yeo kaufela ni mo baana-bahulu bakona kumulikanyiseza.

4. Ki kabakalañi baana-bahulu hakukona kubabela taata kuetelela mwa musebezi wa kukutaza?

⁴ Libaka hakukona kuba taata kueza cwalo. Kwandaa kuetelela mwa musebezi wa kukutaza, baana-bahulu banani buikalabelo bobuñwi bobuñata. Ka mutala, buñata bwabona bayapananga kuba muina-situlo wa mukopano wa mwahalaa sunda ni kuzamaisa Tuto ya Bibele ya Puteho. Hape bafanga lingambolo zeñwi. Kuzwa fo, baezanga mobakonela kaufela kuluta likombwa za puteho musebezi mi bazwelapili kususueza mizwale ni likaizeli babona. (1 Pit. 5:2) Baana-bahulu babañwi baeza musebezi wa kuyaha ni kubabalela Mandu A Mubuso ni miyaho yemiñwi ya kopano. Kono sina bahasanyi kaufela mwa puteho, musebezi wa butokwa hahulu waswanela kueza muuna-muhulu ki kukutaza taba yende.—Mat. 28:19, 20.

5. Ki mutala mañi walutomezi Paulusi ka kuba mukutazi?

⁵ Mutala wa Paulusi. Bibele kwa Mafilipi 1:10 ilutusa kuziba zenetusize Paulusi kukondisa, haili: ‘Mulemuhe lika za butokwa hahulu nikufita.’ Paulusi naasebelisize kelezo yahae yeo. Naafilwe bukombwa, mi ka lilimo zeñata, naangile musebezi wa kukutaza kuba omuñwi wa lika za butokwa hahulu nikufita. Naakutazanga “fapilaa nyangela ni fa ndu ni ndu.” (Lik. 20:20) Naasakutazangi feela ka nako yeñwi kamba lizazi lililiñwi feela mwa sunda. Naakutazanga fanaabela ni kolo kaufela. Ka mutala, hanaanzaa libelela balikani bahae mwa Atene, naakutalize taba yende kwa batu babañwi babatumile, mi babañwi ku bona nebabile balumeli. (Lik. 17:16, 17, 34) Paulusi mane niha naali mwa “mawenge,” naakutalize kwa batu banaali ni bona.—Mafil. 1:13, 14; Lik. 28:16-24.

6. Paulusi naalutile babañwi kuezañi?

⁶ Paulusi naaitusisize hande nako yahae. Hañata, naamemanga batu babañwi kuli basebeze ni yena mwa bukombwa. Ka mutala, fa musipili wahae wa bulumiwa wapili, naamemile Joani Mareka kuli asebeze ni yena, mi fa musipili wahae wabubeli, naamemile Timotea. (Lik. 12:25; 16:1-4) Kusina kukakanya, Paulusi naalutile baana bao mwakuonga-ongela puteho, mwakuezeza musebezi wa bulisana, ni mwakubela baluti babande.—1 Makor. 4:17.

7. Baana-bahulu bakona kusebelisa cwañi kelezo yanaafile Paulusi kwa Maefese 6:14, 15?

⁷ Zeluituta. Baana-bahulu bakona kulikanyisa Paulusi ka kuitukiseza kukutaza fobabela ni kolo kaufela isiñi feela kukutaza fa ndu ni ndu. (Mubale Maefese 6:14, 15.) Ka mutala, bakona kukutaza habayo leka lika zeñwi kamba habali kwa mubeleko. Kamba habanze batusa mwa musebezi wa kuyaha miyaho ya kopano, bakona kukutaza taba yende kwa batu babali mabapa ni bona kamba batu baba balekisa lika.  Sina Paulusi, baana-bahulu bakona kuitusisa nako yebali mwa bukombwa kuluta babañwi musebezi, hamohocwalo ni likombwa za puteho.

8. Ki nto mañi yatokwa kueza muuna-muhulu fokuñwi?

⁸ Baana-bahulu habaswaneli kupateha hahulu kueza misebezi ya puteho kamba ya mwa mupotoloho wabona kuli mane bapalelwa kuba ni nako ya kukutaza. Kuli babe ni nako ya kueza misebezi yeo kaufela, fokuñwi bakatokwa kuhana kueza misebezi yemiñwi. Hase banyakisisize taba yeo ni kulapela ka za teñi, mwendi bakona kulemuha kuli haiba baamuhela musebezi omuñwi, habana kukona kueza misebezi yemiñwi ya butokwa nikufita. Misebezi yeo ikopanyeleza kuba ni nako ya kulapela sina lubasi sunda ni sunda, kukutaza ka tukufalelo, ni kuluta bana babona kueza musebezi wa kukutaza. Baana-bahulu babañwi kubabelanga taata kuhana habafiwa misebezi yemiñwi mwa puteho, kono baswanela kukolwa kuli Jehova wautwisisa kuli batabela kueza misebezi yemiñata.

9. Ki butata mañi bobakopana ni bona baana-bahulu babapatehile?

⁹ Libaka hakukona kuba taata kueza cwalo. Batanga ba Jehova bakopananga ni miinelo yetaata yemiñata. Mwa mazazi a mafelelezo a, kaufelaa luna lutokwa kususuezwa, kutusiwa, ni kuomba-ombiwa. Mi fokuñwi, babañwi batokwa kutusiwa kuli batuhele muzamao omaswe. (1 Mates. 5:14) Kono niti ki kuli baana-bahulu habakoni kufelisa miinelo yetaata kaufela yebakopana ni yona batanga ba Jehova. Nihakulicwalo, Jehova ubata kuli baana-bahulu baeze mobakonela kaufela kususueza ni kusileleza lingu zahae. Ki lika mañi zekona kutusa baana-bahulu kuba ni nako ya kutusa mizwale ni likaizeli babona niha bapatehile?

10. Sina mokuboniselizwe kwa 1 Matesalonika 2:7, Paulusi naabonisize cwañi kuli naaisa pilu batanga ba Jehova?

¹⁰ Mutala wa Paulusi. Paulusi naababazanga ni kususueza mizwale ni likaizeli bahae. Baana-bahulu baswanela kulikanyisa mutala wahae omunde ka kubonisa lilato batanga ba Jehova. (Mubale 1 Matesalonika 2:7.) Paulusi naataluselize mizwale ni likaizeli bahae kuli naabalata mi Jehova naabalata. (2 Makor. 2:4; Maef. 2:4, 5) Naabaanga sina balikani bahae mi naatandanga nako ni bona. Naabonisize kuli naabasepile ka kulukuluha kubataluseza lika zenee mubilaeza ni mifokolo yahae. (2 Makor. 7:5; 1 Tim. 1:15) Niteñi, Paulusi naasika isa pilu kwa butata bwanaakopana ni bona. Kono naabata kutusa mizwale ni likaizeli bahae.

11. Ki kabakalañi Paulusi hanaaelelize mizwale ni likaizeli bahae?

¹¹ Fokuñwi, Paulusi naatokwa kueleza mizwale ni likaizeli bahae. Kono naasaezangi cwalo kabakala kuli neba muhalifisize. Naabafanga kelezo kabakala kuli naabalata mi naabata kubasileleza kwa likozi zeñata  zeneka batahela. Naabatusize kulemuha libaka hana bafa kelezo, mi naabata kuli baiamuhele hande. Ka mutala, mwa liñolo lanaañolezi puteho ya Korinte, Paulusi naafile mizwale ni likaizeli ba mwa puteho yeo kalimelo yetiile. Hamulaho wa kuñola liñolo leo, aluma Tite kwateñi. Paulusi naabata kuziba mone baamuhelezi liñolo leo. Kanti luli, naatabile hahulu hanaautwile kuli nebasebelisize kalimelo yanaa bafile!—2 Makor. 7:6, 7.

12. Baana-bahulu bakona kutiisa cwañi mizwale ni likaizeli babona?

¹² Zeluituta. Baana-bahulu bakona kulikanyisa Paulusi ka kutandanga nako ni mizwale ni likaizeli babona. Nzila yeñwi yebakona kueza cwalo ka yona ki kuitahanela kwa mikopano ilikuli bakone kuambola ni mizwale ni likaizeli babona. Bakona kususueza hahulu mizwale ni likaizeli babona nihaiba mwa mizuzu isikai feela. (Maro. 1:12; Maef. 5:16) Muuna-muhulu yalikanyisa mutala wa Paulusi hape ukona kutiisa mizwale ni likaizeli bahae ka kuitusisa Linzwi la Mulimu ni kubakolwisa kuli Mulimu wabalata. Hape ubatalusezanga kuli wabalata. Kamita ubatanga kuziba mobazuhela, mi wabababazanga. Muuna-muhulu hatokwa kufa kelezo, uezanga cwalo ka kuitusisa Linzwi la Mulimu. Ufanga kelezo yenongile kono hape uezanga cwalo ka sishemo kuli abatuse kuamuhela hande kelezo yeo.—Magal. 6:1.

13. Muuna-muhulu ukona kuikutwa cwañi ka za mifokolo yahae?

¹³ Libaka hakukona kuba taata kueza cwalo. Baana-bahulu habasika petahala. Ni bona baezanga mafosisa sina batu kaufela. (Maro. 3:23) Fokuñwi, kukona kubabela taata kuba ni mubonelo oswanela ka za mifokolo yabona. Babañwi bakona kuisa hahulu pilu kwa mifokolo yabona, ili nto yekona kutahisa kuli bazwafe. Babañwi bona bakona kuikutwa kuli mifokolo yabona haki yemituna hahulu mi habatokwi kueza licinceho.

14. Sina mokuboniselizwe kwa Mafilipi 4:13, kuba ni buikokobezo nekutusize cwañi Paulusi kutula mifokolo yahae?

¹⁴ Mutala wa Paulusi. Paulusi naaikokobeza mi naaziba kuli naasike akona kutula mifokolo yahae ka ili yena. Naatokwa kutusiwa ki Mulimu. Pili asikaba kale Mukreste, Paulusi naanyandisize hahulu Bakreste. Kono hasamulaho, naaitumelezi mafosisa ahae mi naaikatulezi kucinca mubonelo ni butu bwahae. (1 Tim. 1:12-16) Ka tuso ya Jehova, Paulusi naabile mulisana yalilato, yanani mukekecima, ni yaikokobeza. Naaziba hande kuli naali mutu yasika petahala kono naasepile kuli Jehova naaka muswalela mi naasike alandalala fa bufosi bwahae. (Maro. 7:21-25) Naaziba kuli naasakoni kueza lika zelukile ka nako kaufela. Kono naaezize mwanaakonela kaufela kuba ni  tulemeno twa Sikreste mi naabonisize buikokobezo ka kuitinga ku Jehova kuli amutuse kueza musebezi wanaafilwe.—1 Makor. 9:27; mubale Mafilipi 4:13.

15. Baana-bahulu baswanela kuunga cwañi mifokolo yabona?

¹⁵ Zeluituta. Baana-bahulu habaketiwangi kabakala kuli bapetahalile. Niteñi, Jehova ubata kuli baitumelelange mafosisa abona ni kuapala butu bwa Sikreste. (Maef. 4:23, 24) Muuna-muhulu utokwa kuitatuba ka kuitusisa Linzwi la Mulimu ni kueza licinceho zetokwahala. Mi Jehova uka mutusa kuba ni tabo ni kuba muuna-muhulu yomunde.—Jak. 1:25.

16. Ki nto mañi yekona kuezahala haiba muuna-muhulu aisa hahulu pilu kwa mifokolo ya babañwi?

¹⁶ Libaka hakukona kuba taata kueza cwalo. Baana-bahulu bakona kulemuha mifokolo ya mizwale ni likaizeli babona mwa puteho bakeñisa kusebelisana hahulu ni bona. Kono haiba basatokomeli, bakona kunyemiswa ki mizwale ni likaizeli babona, kubaeza ka buhali, ni kubaatula. Paulusi naalemusize Bakreste kuli Satani naabata kuli baeze cwalo.—2 Makor. 2:10, 11.

17. Paulusi naanga cwañi mizwale ni likaizeli bahae?

¹⁷ Mutala wa Paulusi. Naanani mubonelo oswanela ka za mizwale ni likaizeli bahae. Naaziba hande mifokolo yabona mi fokuñwi naaikutwanga bumaswe kabakala likezo zabona. Nihakulicwalo, Paulusi naaziba kuli mizwale ni likaizeli bahae niha nebakona kueza mafosisa, nesi batu babamaswe. Naabalata mi naaisanga pilu kwa tulemeno totunde tone banani tona. Hane kubabelanga taata kueza zelukile, naasanahanangi kuli nebasina milelo yeminde kono naaziba kuli nebatokwa feela kutusiwa kueza zelukile.

18. Muitutañi ku Paulusi ka za mwanaatatululezi butata bone buliteñi mwahalaa Euodia ni Sintike? (Mafilipi 4:1-3)

¹⁸ Ka mutala, halunyakisiseñi mo Paulusi naatuselize likaizeli bababeli mwa puteho ya Filipi. (Mubale Mafilipi 4:1-3.) Kubonahala kuli Euodia ni Sintike nebafapahani, mi batuhela kuba balikani. Paulusi naasika bahalifela kamba kubaatula kono naaisize pilu kwa tulemeno twabona totunde. Likaizeli bao nebasebelelize Jehova ka busepahali ka nako yetelele. Paulusi naaziba kuli Jehova naabalata. Bakeñisa kuli Paulusi naanani mubonelo omunde ka za likaizeli bao, abasusueza kutatulula butata bone banani bona mwahalaa bona. Kuba ni mubonelo omunde ka za mizwale ni likaizeli bahae hape neku mutusize kuzwelapili kuba ni tabo ni kuba ni balikani babande mwa puteho.

19. (a) Ki nto mañi yekona kutusa baana-bahulu kuba ni mubonelo omunde ka za mizwale ni likaizeli babona? (b) Muitutañi kwa siswaniso sesibonisa muuna-muhulu yakenisa Ndu ya Mubuso?

¹⁹ Zeluituta. Baana-bahulu, muise pilu kwa tulemeno totunde tobanani tona mizwale ni likaizeli bamina. Ki niti kuli kaufelaa luna halusika petahala, kono mañi ni mañi waluna unani  tulemeno totunde. (Mafil. 2:3) Fokuñwi, baana-bahulu batokwanga kukalimela mizwale ni likaizeli babona. Niteñi, sina Paulusi, baswanela kueza mobakonela kaufela kusaisa pilu kwa manzwi kamba likezo za mizwale ni likaizeli bao zekona kubafilikanya. Kono baswanela kuisa pilu kwa lika zende zebaeza zebonisa kuli balata Jehova, buitiiso bobabonisa mwa sebelezo yabona ku Mulimu, ni kuutwisisa kuli bakona kueza lika zende. Baana-bahulu babaisa pilu kwa tulemeno totunde tobanani tona babañwi batusa kuli mizwale ni likaizeli mwa puteho baikutwe kulatiwa.

20. Baana-bahulu bakona kutusiwa cwañi ki mutala wa Paulusi?

²⁰ Baana-bahulu, mukatusiwa hahulu haiba muzwelapili kuituta kwa mutala wa Paulusi. Ka mutala, mubone buka ya “Ku fa Bupaki bo bu Tezi ka za Mubuso wa Mulimu” kauha. 12 mapara. 18-19; kauha. 21 mapara. 6-7 ni buka ya “Liñolo Kamukana Li Tahile ka Moya wa Mulimu, mi Li Na ni Tuso” like. 217 para. 19; make. 242-243 mapara. 8-9. Hamunze mubala litaba zeo, muipuze kuli: ‘Mutala wa Paulusi unitusa cwañi kuzwelapili kuba ni tabo haninze nipeta buikalabelo bwaka bwa kuba muuna-muhulu?’

21. Ki buikolwiso mañi bobakona kuba ni bona baana-bahulu?

²¹ Baana-bahulu, muhupule kuli Jehova waziba kuli hamusika petahala kono ubata kuli musepahale ku yena. (1 Makor. 4:2) Jehova naatabisizwe ki Paulusi kabakala kuli naasebeza ka taata mi naasepahala ku yena. Ni mina mwakona kuba ni buikolwiso bwa kuli Mulimu waitebuha sebelezo yamina ku yena. Jehova haana ‘kulibala musebezi wamina ni lilato lemubonisize kwa libizo lahae, ka kusebeleza babakenile ni kuzwelapili kubasebeleza.’—Maheb. 6:10.