1-2. Engtin nge tirhkoh Paula entawn tûr siamin tûn laia kohhran upate a ṭanpui theih?

 TIRHKOH Paula chuan a unaute chu a hmangaih a. Anmahni ngaihsakna kawngah a thawkrim hle a ni. (Tirh. 20:31) Chumi avâng chuan, a unaute pawhin Paula chu an hmangaih tak zet a. Ṭum khat chu, Ephesi khuaa kohhran upate’n ani chu an hmu leh tawh dâwn lo tih an hriat chuan “an ṭap zawih zawih a.” (Tirh. 20:37) Tûn laia kohhran upa inpe takte chuan an unaute chu an hmangaih tak zetin, ṭanpui tûrin an tihtheih apiang an ti a. (Phil. 2:14-17) Mahse, harsatnate hmachhawn châng pawh an nei a ni. Chûng harsatnate hneh tûrin engin nge ṭanpui thei?

² Kohhran upa thawkrim takte chuan Paula entawn tûr siam chu an ngaihtuah thei a. (1 Kor. 11:1) Paula chu mi bîk a ni hran lo. Ṭha famkim lo ve tho a ni a, thil dik tih harsa tih chângte pawh a nei a ni. (Rom 7:18-20) Chu bâkah, harsatna chi hrang hrang a hmachhawn a ngai bawk. Mahse, ani chuan beidawn mai chu a duh lo va, a hlimna hloh pawh a duh hek lo. Paula entawnin kohhran upate chuan an hmachhawn harsatnate an hneh theih bâkah, Jehova rawng an bâwl laiin hlimna an nei reng thei a ni. Chutianga an tih theih dân chu i lo en ang u.

3. He thuziakah hian eng nge kan sawiho vang a, eng thil dangte nge kan hriat ang?

³ He thuziakah hian kohhran upate hmachhawn harsatna pali kan sawiho vang: (1) an thu hrilh rawngbâwlna leh mawhphurhna dangte inbûk tâwk taka thawhna, (2) ngaihsakna nei tak berâm vêngtute nihna, (3) mi mal chak lohnate hmachhawnna,  leh (4) mi dangte ṭhat famkim lohna hmachhawnnate chu. Paula’n chûng harsatnate a hneh dân leh kohhran upate’n a entawn tûr siam an zui theih dânte chu kan sawiho bawk ang.

4. Engvângin nge kohhran upate tân thu hrilh rawngbâwlnaa entawn tûr ṭha siam chu a harsat mai theih?

⁴ A harsat theih chhan. Kohhran upate chuan thu hrilh rawngbâwlnaa hma an hruai mai bâkah, mawhphurhna tam tak pawh an nei a. Entîr nân, chawlhkâr chhûng inkhâwmte leh Kohhrana Bible Zirnate an kaihruai a. Thusawi chanvo dangte pawh an nei bawk. Kohhranho rawngbâwltute chu ṭhahnemngai taka an zirtîr bâkah, unaute chu an fuih reng bawk a ni. (1 Pet. 5:2) Kohhran upa ṭhenkhat chu Kingdom Hall sakna te, vawn ṭhatna te, leh biakna atâna hman in dang saknaahte an tel a. Chuti chung pawhin, kohhrana unau dangte ang bawkin, rawngbâwlna azawnga pawimawh ber chanchin ṭha hrilhnaah an tel ziah a ni.—Mt. 28:19, 20.

5. Thu hriltu a nih angin, Paula’n entawn tûr eng nge a siam?

⁵ Paula entawn tûr siam. Paula hlawhtlinna bul ber chu Philippi 1:10-naah kan hmu a; chutah chuan: “Thil pawimawh zâwkte chu fiah rawh u,” tiin min fuih a ni. (NWT) Paula ngei pawhin a fuihna pêk chu a zâwm a. Ani chuan kum sâwmbi tel aṭang tawhin rawngbâwlna chanvo hlu a hnêna pêk chu thil pawimawh zâwkte zînga pakhat angin a thlîr a ni. “Vântlâng zîngah te, in tinah te” thu a hril ṭhîn a. (Tirh. 20:20) A thu hrilh rawngbâwlna chu ni khata dârkâr eng emaw chhûng chauh, a nih loh leh chawlhkâr khatah ni khat chauh a thawk lo. Chu aiin, hun remchâng a neih apiangin a hril zâwk a ni. Entîr nân, Atheni khuaa a ṭhiante a nghah laiin, mi challangte hnênah chanchin ṭha a hmêlhriattîr a, an zînga ṭhenkhatin ṭha takin a chhâng lêt a ni. (Tirh. 17:16, 17, 34) ‘Kawlbuna’ a awm chung pawhin, Paula chuan a bul hnaia awmte chu thu a hrilh a ni.—Phil. 1:13, 14; Tirh. 28:16-24.   

6. Paula’n mi dangte chu eng zirtîrna nge a pêk?

⁶ Paula chuan a ṭha thei ang berin a hun a hmang a. Mi dangte chu rawngbâwlnaa a ruala tel tûrin a sâwm ṭhîn a ni. Entîr nân, missionary nia khual a zin hmasak ber ṭum khân, Johana, Marka an tiha chu a hruai a; a ṭum hnihnaah chuan Timothea a hruai leh a. (Tirh. 12:25; 16:1-4) Paula chuan anni chu kohhran inrêlbâwl dân te, berâm tlawhna neih dân te, leh zirtîrtu thiam tak nih dânte zirtîrin theih tâwp a chhuah tih a chiang hle.—1 Kor. 4:17.   

7. Engtin nge kohhran upate chuan Ephesi 6:14, 15-naa chhinchhiah Paula fuihna chu an zui theih?

 ⁷ Zir tûr. Kohhran upate chuan in tin kala rawngbâwlnaah mai ni lovin, a remchân hun apianga inhuam taka thu hril tûra inpeih rengin Paula chu an entawn thei a. (Ephesi 6:14, 15 chhiar rawh.) Entîr nân, dâwra an kal hunah emaw, an hnathawhna hmunah emaw thu an hril thei a ni. A nih loh leh, biakna atâna in saknaa an tel hunah an chhehvêla mite leh bungrua an va leina hmuna mite hnênahte chuan thu an hril thei a. Paula angin, kohhran upate chuan rawngbâwlnaa an hun hmante chu kohhranho rawngbâwltute pawh tiamin, mi dangte zirtîr nân an hmang thei bawk a ni.

8. A châng chuan, kohhran upain eng nge a tih a ngaih mai theih?

⁸ Kohhran upate chu thu hrilh rawngbâwlnaa tel hman lo khawpin kohhran leh bial chhûnga an chanvo neihahte an buai lutuk tûr a ni lo. Inbûk tâwk taka awm tûr chuan, chanvo ṭhenkhat chu an pawm theih loh thu an sawi a ngaih chângte pawh a awm thei a. Ngun taka an ṭawngṭai hnu chuan, thil pawimawh zâwkte ngahthah chuang si lova chûng chanvote hlen chu thil theih a ni lo tih an hria pawh a ni thei. Chûng thil pawimawh zâwkahte chuan chhûngkuaa Pathian biakna te, thu hrilh rawngbâwlnaa a kima tel te, leh chûng biakna pêngtea fate zirtîrnate a tel a ni. Unau ṭhenkhat chuan chanvo hlu eng emaw hnâwl chu harsa an ti mai thei; mahse, kawng engkima inbûk tâwk taka thiltih an duhna chu Jehova’n a hriatthiampui tih an ring tlat thei a ni.

9. Kohhran upa buai takte chuan eng harsatnate nge an hmachhawn?

⁹ A harsat theih chhan. Jehova mite kan nih angin fiahna tam tak kan hmachhawn a. He hun hnuhnûngahte hian kan zain fuihna te, ṭanpuina te, leh thlamuannate kan mamawh ṭheuh a ni. A châng chuan, unau ṭhenkhat chuan nungchang ṭha lo pumpelh tûrin ṭanpuina an mamawh a. (1 Thes. 5:14) Ni e, kohhran upate chuan Jehova mite hmachhawn fiahnate chu an chinfelsak vek thei lo ngei mai. Mahse, Jehova chuan anni chu a berâmte fuih tûr leh vênghim tûra an tihtheihte ti tûrin a duh a ni. Engtin nge kohhran upa buai takte chuan chutiang ṭanpuina pe tûra hun an neih theih ang?

10. Thessalonika thawn khat 2:7-na nêna inmilin, engtin nge Paula’n a unaute chu a ngaihsak?

¹⁰ Paula entawn tûr siam. Paula chuan a unaute fakna tûr leh tihchak theih dân tûr kawngte a zawng a. Kohhran upate chuan an unaute chu hmangaihna nei taka cheibâwlin Paula entawn tûr siam ṭha tak chu an zui thei a ni. (1 Thessalonika 2:7 chhiar rawh.) Paula chuan a Kristian unaute chu a hmangaihin, Jehova pawhin a hmangaih tih a hriatnawntîr a. (2 Kor. 2:4; Eph. 2:4, 5) Kohhrana  unaute chu hun hmanpuiin ṭhiante angin a cheibâwl a ni. A thil hlauhthâwnte leh chak lohnate chu tlang taka hrilhin anmahni a rinzia a lantîr a. (2 Kor. 7:5; 1 Tim. 1:15) Mahse, ama harsatnate chauh a ngaihven lo. Chu aiin, a unaute chu ṭanpui a duh a ni.

11. Engvângin nge Paula’n a unaute chu thurâwn a pêk?

¹¹ A châng chuan, Paula’n a unaute chu thurâwn a pêk a ngai a. Mahse, chu chu a lungnih loh vânga ti a ni ngai lo. Anmahni a ngaihsak avâng leh hlauhawm chi hrang hrang laka vênhim a duh avânga ti a ni zâwk. A thurâwn pêk chu hriatthiam awlsam tak leh pawm awlsam tak nihtîr a tum a. Entîr nân, Korinth khuaa Kristiante hnêna a lehkhathawnah chuan zilhna khauh tak a pe a. Chu lehkha a ziah hnu chuan, an hnênah Tita a tîr a. A lehkhathawn an chhân lêt dân chu hriat a châk hle a ni. A thurâwn ṭha takin an dawngsawng tih a hriat huna a hlim dân tûrzia mai chu!—2 Kor. 7:6, 7.

12. Engtin nge kohhran upate chuan an Kristian unaute chu an tihchak theih?

¹² Zir tûr. Kohhran upate chuan an Kristian unaute nêna hun hmanghovin Paula entawn tûr siam chu an zui thei a. Chutianga tih theih dân kawng khat chu kohhran inkhâwma hma taka thlen a, unaute nêna awmze nei taka inbiak pawhna neih hi a ni. Unau tu emaw hnêna a mamawh fuihna duhawm tak pe tûrin minute tam a ngai lo. (Rom 1:12; Eph. 5:16) Paula entawn tûr siam zuitu kohhran upa chuan a unaute chu Bible hmanga tichakin, Pathianin a hmangaih tih a hriatnawntîr ṭhîn ang. Amah ngei pawhin chûng unaute chu a hmangaihzia a hrilh ṭhîn bawk. Anmahni nêna inbiak pawhna nei rengin, fak theihna hun remchângte a zawng reng a. Thurâwnte a pêk hunah, Bible a ṭanchhan a ni. Unaute chu a thurâwn pêk zâwm tûra a duh avângin hmangaihna nei takin a pe a ni.—Gal. 6:1.

13. Mi mal chak lohnate chuan kohhran upa chungah eng nghawng nge a neih theih?

¹³ A harsat theih chhan. Kohhran upate chu ṭha famkim an ni lo. Mi dangte ang bawkin, thil an tisual thei a. (Rom 3:23) An chak lohnate chu inbûk tâwk taka thlîr harsa tih chângte an nei a ni. Ṭhenkhat phei chuan chûngte chu an ngaihven lutuk avângin an lunghnual phah hial a. Ṭhenkhat dang lehte chuan an chak lohnate chu an ngaihthah avângin a ṭûl anga insiamrem tumna an nei lo.

14. Philippi 4:13-naa sawi angin, engtin nge inngaihtlâwmnain Paula chu a chak lohnate hneh tûra a ṭanpui?

¹⁴ Paula entawn tûr siam. Paula chuan a chak lohnate chu mahni mai chuan a hneh thei lo tih inngaitlâwm takin a pawm a, Pathian pêk chakna a mamawh a ni. A tîr chuan, mi luhlul tak leh Kristiante nasa taka tihduhdah ṭhîntu  a ni a. Mahse, a hnuah a tlin lohnate chu pawmin, a rilru put hmang leh mizia chu inhuam takin a thlâk danglam a ni. (1 Tim. 1:12-16) Jehova ṭanpuinain, Paula chu hmangaihna, khawngaihna, leh inngaihtlâwmna nei tak berâm vêngtu a rawn ni ta a. A ṭhat famkim lohnate chu a hre reng a; mahse, chumi ngaihtuah reng ai chuan, Jehova ngaihdam theihna chu a ring tlat zâwk a ni. (Rom 7:21-25) Ṭha famkim anga lan a tum lo. Chu aiin, a Kristian miziate tihhmasâwn tumin theih tâwp a chhuah a, a rawngbâwlna hlen thei tûrin Jehova ṭanpuina pawh inngaitlâwm takin a rinchhan bawk.—1 Kor. 9:27; Philippi 4:13 chhiar rawh.

15. Kohhran upate chuan an chak lohna chungchângah eng thlîr dân inbûk tâwk tak nge an neih ang?

¹⁵ Zir tûr. Kohhran upate chu an ṭhat famkim avânga ruat an ni lo. Chu aiin, Jehova chuan an thil tihsualte chu pawm a, Kristian miziate nei chho zêl tûrin a beisei zâwk a ni. (Eph. 4:23, 24) Kohhran upa chu Bible hmanga mahni inendikin, a ṭûl angin a insiamrem tûr a ni. Chutianga a tih chuan, Jehova’n hlimna nei tûr leh hlawhtling tûrin a ṭanpui ang.—Jak. 1:25.

16. Kohhran upain mi dangte ṭhat famkim lohnate a ngaihven tlat chuan eng thil nge thleng thei?

¹⁶ A harsat theih chhan. Kohhran upate chuan kohhrana unaute nêna hun tam tak an hman ṭhin avângin an ṭhat famkim lohnate chu an hre mai thei a. Chuvângin, an fîmkhur loh chuan lungnih lohna neiin an unaute sawisêl duhna an nei thei a ni. Paula chuan Kristiante chu Setana’n chutianga thil ti tûrin a duh tih a vaukhân a ni.—2 Kor. 2:10, 11.

17. Engtin nge Paula’n a unaute chu a thlîr?

¹⁷ Paula entawn tûr siam. Ani chuan a unaute chu a êng zâwngin a thlîr tlat a. A rilru tihnat chângte an neih avângin an thil tihsualte chu a hre chiang hle. Mahse, Paula chuan thil sual tih leh mi sual nih a inang lo tih a hria a ni. A unaute a hmangaih avângin an mize ṭhate chu a ngaihven tlat a. A unaute’n thil dik tih an tum ṭâng ṭâng a nih chuan, anni chuan rilru put hmang ṭha an neiin, ṭanpuina an mamawh mai niin a ngai a ni.

18. Paula’n Euodii leh Suntuki te a cheibâwl dân aṭangin eng nge kan zir? (Philippi 4:1-3)

¹⁸ Entîr nân, Paula’n Philippi khuaa unaunu pahnih a cheibâwl dân hi han ngaihtuah teh. (Philippi 4:1-3 chhiar rawh.) Euodii leh Suntuki chu mi mal inkâra inrem lohna an neih avângin ṭhian an ni tawh lo niin a lang. Paula chuan chutianga an awm avângin a sawisêl mai lo va; chu aiin, an mize ṭhate chu a ngaihven tlat zâwk a ni. Anni chuan hun rei tak chhûng Jehova rawng an bâwl tawh a. Paula chuan anni chu Jehova’n a hmangaih tih pawh a hria a. Chûng unaunute chunga a êng zâwnga thlîrna a neihna chuan, an pahnih inkâra inrem lohnate chingfel tûra fuih tûrin  a chêttîr a ni. Unaute mize ṭhatna lai a thlîr tlat avângin a hlim reng theiin, chu kohhrana unaute nên inṭhianna nghet tak a nei thei a ni.

19. (a) Engtin nge kohhran upate’n an Kristian unaute chu a êng zâwnga an thlîr tlat theih? (b) Kingdom Hall tifaitu kohhran upa thlalâk aṭangin eng nge i zir theih?

¹⁹ Zir tûr. Kohhran upate u, in unaute mize ṭhatna laite chu ngaihven tlat rawh u. Ṭha famkim lo vek ni mah ila, mi tin hian mize duhawm takte kan nei ṭheuh a ni. (Phil. 2:3) Ni e, kohhran upate tân an unaute rilru put hmang siamremsak a ngaih chângte chu a awm thei ngei mai. Mahse, Paula angin, anni chuan lungnih lohna nei unaute thusawi leh thiltihte chu theihnghilh an tum tûr a ni a. Chu aiin, Jehova an hmangaih dân te, chhel taka Pathian rawng an bâwl dân te, leh hma an sâwn chhoh dânte chu an ngaihven tlat zâwk a ni. A êng zâwnga thlîrna nei kohhran upate chuan kohhranah boruak nuam leh zângkhai tak an siam a ni.

20. Engtin nge kohhran upate chuan Puala entawn tûr siam chu an hlâwkpui zawm zêl theih?

²⁰ Kohhran upate u, Paula entawn tûr siam zir belh zêl chu manhla tak a ni tih in hria ang. Entîr nân, Watch Tower Publications Index-ah “Paula” tih thupui hnuaiah lûtin, “kohhran upate tâna entawn tûr,” tih thupui tê chu in en thei a. Chuta târ lan thuziak ṭhenkhat in chhiar hunah heti hian inzâwt ang che u, ‘Engtin nge Paula entawn tûr siamin kohhran upa nia ka chanvote ka thawh mêk lai hian hlimna nei reng tûra min ṭanpui theih?’ tiin.

21. Kohhran upate chuan eng nge an chian theih?

²¹ Kohhran upate u, Jehova’n ṭha famkim tûr ni lovin, rinawm tlat tûrin a beisei che u tih hre reng ang che u. (1 Kor. 4:2) Ani chuan Paula thawhrimna leh rinawmna chu a ngaihlu hle a. A rawngbâwlna kawnga i thiltihte pawh a ngaihlu ang tih i chiang thei a ni. Jehova chuan ‘in hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu a theihnghilh’ ngai lo vang.—Heb. 6:10.