1-2. Edena dala ai Paulo ena haheitalai ese hari ina negai elda taudia bae durudia diba?

 APOSETOLO PAULO ese ena tadikaka bona taihu na e lalokau henidiava. Ia na e ḡaukara goadava idia baine durudia. (Apos. 20:31) Una dainai, unu tadikaka taihu ese Paulo na e lalokau henia badava. Nega ta, Efeso ai elda taudia na e diba Paulo na basie itaia loumu neganai, “iboudiai na e tai dikadika.” (Apos. 20:37) Elda taudia ese danu edia tadikaka taihu na e lalokau henidia badamu bona e ḡaukara goadamu dala idauidau ai idia bae durudia. (Fili. 2:16, 17) To, nega haida, elda taudia ediai na e aukamu edia maduna iboudiai ba kara. Dahaka ese idia bae durudia diba?

² Elda taudia ese Paulo ena haheitalai bae laloa diba. (1 Kor. 11:1) Ia na dia aneru heḡereḡeredia. Paulo na dia ḡoevadae tauna bona nega haida enai na e aukava dala maorona baine badinaia. (Roma 7:18-20) Bona hekwakwanai idauidau e davariva. To Paulo na se hesikuva ena tadikaka taihu baine durudia eiava unu ḡau daidiai ena moale baine haboioa. Elda taudia ese Paulo ena haheitalai be tohotohoamu neganai, mai moaledia ida Iehova be hesiai heniamu bona hekwakwanai be hanaidiamu. Unu bae kara toma daladia haida mani aita herevalai.

3. Ina atikol ai be dahaka baita herevalaimu, bona dahaka baita dibamu?

³ Ina atikol ai elda ediai e aukamu bae kara ḡaudia foa baita herevalaimu: (1) edia nega bae ḡaukaralai namonamo haroro ḡaukara bona maduna ma haida bae hua, (2) nega bae ato tadikaka bona taihu bae hagoadadia, (3) sibodia edia manoka ḡaudia bae haheaukalai, bona (4) ma haida edia manoka ḡaudia bae haheaukalai. Mani aita itaia dahaka ese Paulo e durua bona edena dala ai elda taudia ese iena haheitalai bae tohotohoa diba.

4. Dahaka dainai nega haida elda taudia ediai na e aukamu haroro ḡaukara ai haheitalai namona bae hahedinaraia?

⁴ Dahaka dainai ina na auka? Elda taudia na haroro ḡaukara bona maduna momo e huamu. Heḡereḡere, midwik heboudiai e seamanimu bona Kongrigeisin Baibul Stadi e hakaumu. Bona tok haida danu e henimu. Idia ese ministerial servant treinin e henidiamu bona mai moaledia ida tadikaka bona taihu e hagoadadiamu. (1 Pet. 5:2) Elda haida na heduru e henimu Kingdom Hall bona Iehova itomadiho henina gabudia ihaginidia bona ihanamodia ḡaukaradiai. To, kongrigeisin taudia heḡereḡeredia, elda taudia ese bae karaia mai anina bada ḡaukarana na haroro ḡaukara.​—Mat. 28:19, 20.

5. Dahaka dainai Paulo na haheitalai namona haroro ḡaukara ai?

⁵ Paulo ena haheitalai. Filipi 1:10 ese e hahedinaraia dahaka dainai Paulo na haheitalai namona haroro ḡaukara ai, ia na e gwa: “Mai anidia bada ḡaudia ba diba.” Paulo ese una sisiba na e badinaia. Haroro ḡaukara ena asainmen e abia neganai, ia enai una ḡaukara na mai anina bada ḡauna ai e halaoa laḡani momo lalodiai. Ia na pablik gabudiai bona ruma ta ruma ta ai sivarai namona e harorolaiava. (Apos. 20:20) Ia na dia dina ta lalonai, daba eiava adorahi ai mo e harorova eiava wiki ta ai dina tamona mo e harorova. Lasi, to nega bona gabu idauidau ai dala e hekehova neganai e harorova! Heḡereḡere, Paulo na bamona e naridiava lalonai, Atena ai lada bada taudia haida ediai sivarai namona e harorolaia, bona idia haida na hereva momokani e abia dae. (Apos. 17:16, 17, 34) Ena be ‘dibura ruma ai e nohova,’ to Paulo na ia dekenai e laova taudia iboudiai e haroro henidiava.​—Fili. 1:13, 14; Apos. 28:16-24.

6. Paulo ese ma haida be dahaka e hadibadia?

⁶ Paulo ese ena nega na e ḡaukaralaia namonamova. Nega momo ma haida e boiridiava ia bae bamoa haroro ḡaukara ai. Heḡereḡere, ena misinari laolao ginigunanai, Ioane Mareko ese e bamoa, a laolao iharuanai be Timoteo ese e bamoa. (Apos. 12:25; 16:1-4) Momokani Paulo ese ini tatau na e hadibadia edena dalai Kongrigeisin bae naria namonamo, mamoe vadivadi bae kara, bona hahediba taudia namodia ai baela.​—1 Kor. 4:17.

7. Edena dala ai elda taudia ese Paulo ena hereva Efeso 6:14, 15 bae badinaia?

⁷ Dahaka ta dibamu? Elda taudia ese Paulo ena haheitalai bae tohotohoa daladia na ini, idia na ruma ta ruma ta ai bae haroro bona bae heḡaeḡae nega bona gabu idauidau ai taunimanima bae haroro henidia. (Efeso 6:14, 15 ba duahi.) Heḡereḡere, stoa e laomu negadiai eiava edia ḡaukara gabudiai sivarai  namona bae harorolaia diba. Eiava Kingdom Hall ihaginina ḡaukaradia ai e hedurumu neganai, badiai e nohomu taudia bona hoihoi taudia ediai sivarai namona bae harorolaia diba. Paulo heḡereḡerena, elda taudia ese edia nega bae ḡaukaralaia namonamo haroro ḡaukara ai ma haida bae hadibadia ministerial servant danu.

8. Nega haida, elda tauna be dahaka baine kara?

⁸ Ena be elda taudia na e bisimu Kongrigeisin ḡaukaradiai bona sekit ḡaukaradiai, to namona na nega bae ato haroro ḡaukara bae karaia. Elda ta ese ena nega baine ḡaukaralaia namonamo totona, nega haida maduna ma haida e heniamu neganai reana baine gwa, lasi. Be lalohadailaiamu bona be ḡuriḡurilaiamu murinai, reana be lalopararamu bema una maduna be abia daemu reana mai anidia bada ḡaudia haida na basine karamu. Heḡereḡere wiki ta ta ai ruma bese tomadiho ikarana, haroro ḡaukara baine goadalaia, eiava natudia na haroro ḡaukara ikarana daladia baine hadibadia. Haida ediai na auka maduna ma haida bae dadarai, to bema be dadaraimu Iehova na be lalopararamu idia na e uramu e dogotaomu madunadia bae kara namonamomu.

9. Elda taudia edia ḡaukara na momo dainai, nega haida e aukamu dahaka bae kara?

⁹ Dahaka dainai ina na auka? Iehova ena taunimanima na hahetoho idauidau e davarimu. Dina gabediai ta nohomu dainai, ta uramu haida ese bae hagoadada, bae duruda, bona tauhalo bae henida. Bona nega haida, haida na heduru bae abi kara dikadia bae dadarai totona. (1 Tes. 5:14) Momokani, Iehova ena taunimanima ese e davarimu hahetoho iboudiai na elda taudia ese basie koki dibamu. To, Iehova na e uramu elda taudia ese ena mamoe na bae hagoadadia bona bae gimadia. Ena be elda taudia edia ḡaukara na momo, to edena dala ai nega bae ato tadikaka bona taihu bae durudia?

10. Tesalonika Ginigunana 2:7 ena hereva heḡereḡerena, edena dala ai Paulo ese Iehova ena taunimanima e durudia?

¹⁰ Paulo ena haheitalai. Paulo na hanaihanai ena tadikaka taihu e hanamodiava bona e hagoadadiava. Elda taudia ese iena haheitalai bae tohotohoa dalana namona na tadikaka taihu bae lalokau henidia bona bae kara namo henidia. (1 Tesalonika 2:7 ba duahia.) Paulo ese ena tadikaka taihu na e hamaorodiava ia bona Iehova ese idia na e lalokau henidiava. (2 Kor. 2:4; Efe. 2:4, 5) Paulo ese kongrigeisin taudia na turana heḡereḡerena e kara henidiava, bona nega e atova baine bamodia. Danu, idia na e trastidiava badina ia ese e lalohekwarahilaiva ḡaudia bona ena manoka ḡaudia na idia e hamaorolaidiava. (2 Kor. 7:5; 1 Tim. 1:15) Paulo ese sibona ena hekwakwanai na se lalo badava. To, e urava ena tadikaka taihu baine durudia.

11. Dahaka dainai Paulo ese ena tadikaka bona taihu e sisiba henidia?

 ¹¹ Nega haida, Paulo ese tadikaka bona taihu na e sisiba henidiava. To ia na dia badu bona lalohisihisi ai idia e sisiba henidiava. To unu e kara tomava badina e lalokau henidiava bona e urava dika ḡaudia amo baine gimadia. E hekwarahiva tadikaka taihu ese ena sisiba bae lalopararalaia bona bae abia dae. Heḡereḡere, Korinto taudia e tore henidia revarevanai, Paulo na sisiba aukana e henidia. Revareva e torea murinai, Tito e siaia idia dekediai ela. Paulo na e urava baine diba idia ese iena revareva be ede be laloa tomamu. Bena e kamonai idia ese iena sisiba e abia dae bona e badinaia neganai e moale dikadika!​—2 Kor. 7:6, 7.

12. Edena dala ai elda taudia ese tadikaka taihu bae hagoadadia diba?

¹² Dahaka ta dibamu? Elda taudia ese Paulo ena haheitalai bae tohotohoa dalana ta na nega bae ato tadikaka taihu bae bamodia. Heḡereḡere kongrigeisin heboudia ai bae kau haraḡa una amo ma haida ida bae herevahereva bona bae hahegoada heheni. Ena be miniti haida mo be herevaherevamu to una ese tadikaka ta o taihu ta be hagoadaia dibamu. (Roma 1:12; Efe. 5:16) Paulo ena haheitalai e tohotohoamu eldana ese Dirava ena Hereva amo tadikaka taihu e hagoadadiamu bona e hadibadiamu Iehova ese idia na e lalokau henidiamu. Danu, una elda tauna ese tadikaka taihu ediai na e hahedinaraiamu idia na e lalokau henidiamu. Ia ese hanaihanai e sekedia louloumu bona dala e tahumu hahenamo herevadia baine gwaurai. Elda ta na sisiba e henimu neganai, namona na hanaihanai Dirava ena Hereva baine ḡaukaralaia. Ia na mai manauna ida sisiba e henimu badina e uramu una tadikaka eiava taihu ese una sisiba baine badinaia.​—Gal. 6:1.

13. Elda ta na sibona ena manoka ḡaudia dainai dahaka baine vara diba?

¹³ Dahaka dainai ina na auka? Elda na dia ḡoevadae taudia. Bona nega haida e kereremu. (Roma 3:23) Nega haida edia manoka ḡaudia daidiai be aukamu lalohadai maorona bae abia. Haida be reana basie kara diba ḡaudia be laloa momomu dainai be lalomanokamu. Ma haida be reana be laloamu edia manoka ḡauna na dia ḡau badana dainai, basie uramu sensi haida bae kara.

14. Filipi 4:13 ena hereva heḡereḡerena, edena dala ai manau karana ese Paulo e durua ena manoka ḡaudia baine haheaukalai?

¹⁴ Paulo ena haheitalai. Paulo na mai manauna ida e abia daeva ia sibona ese ena manoka ḡaudia na basine haheaukalai diba. Namona na Dirava baine noia goada baine henia. Guna, Paulo na kwara auka ta, ia ese Kristen taudia e  daḡedaḡe henidiava. To gabeai, e laloparara ia e karaiava karana na kerere bona lalona e hadaia ena lalohadai bona kara baine haidau. (1 Tim. 1:12-16) Iehova ena heduru amo, Paulo na lalokau, hebogahisi, bona elda manauna ta ai ela. Ena be dibana ena manoka ḡaudia na momo; to, unu ḡau na se lalodia momova, ia na e abia dae Iehova ese ena dika na vada e gwautao. (Roma 7:21-25) Ia na dibana ḡau iboudiai na basine karadia ḡoevaḡoeva dibamu. To, e ḡaukara goadava Kristen kara namodia baine goadalai bona mai manauna ida Iehova ena heduru ai e tabekauva iena ḡaukara baine haḡuḡurua.​—1 Kor. 9:27; Filipi 4:13 ba duahia.

15. Edena dala ai elda tauna ta ese sibona ena manoka ḡaudiai lalohadai maorona baine abia?

¹⁵ Dahaka ta dibamu? Basitato ta na ḡoevadae dainai e abia hidi elda ai ela. To, Iehova na dounu e uramu idia ese edia kerere na bae lalopararalai bona Kristen kara namodia bae goadalai. (Efe. 4:23, 24) Elda ta na sibona Baibul istadilaina karana amo baine haeroa ededia kara be baine hanamo. Bena Iehova ese be duruamu elda namona ai be laomu.​—Iak. 1:25.

16. Dahaka be vara dibamu bema elda taudia na ma haida edia manoka ḡaudia mo be lalomu?

¹⁶ Dahaka dainai ina na auka? Elda taudia na kongrigeisin ai tadikaka taihu ida be ḡaukara momomu neganai edia manoka ḡaudia na be ita dibamu. To bema basie henari namonamomu, elda taudia ese be badu henidiamu, be kara auka henidiamu, eiava be hahemaoro henidiamu. Paulo ese Kristen taudia na e hamaorodia Satana na e uramu idia na unu bae kara toma.​—2 Kor. 2:10, 11.

17. Paulo ese ena tadikaka bona taihu be ede e lalodia tomava?

¹⁷ Paulo ena haheitalai. Ia ese ena tadikaka taihu edia kara namodia na e lalo badava. Ia na dibana idia na e kerereva, badina edia kara ese nega haida ia na e hahisiava. To, Paulo na mai dibana idia na dia taunimanima dikadia. Ia ese ena tadikaka na e lalokau henidiava bona edia kara namodia mo e lalo badava. Ia na dibana idia na e urava dala maorona bae badinaia, una dainai e itaiava ena tadikaka taihu ediai na e aukava kara maorona bae karaia neganai, ia ese durudiava.

18. Paulo ese Euodia bona Sunutuke e durudia dalana amo dahaka ta dibamu? (Filipi 4:1-3)

¹⁸ Heḡereḡere, Paulo ese Filipi kongrigeisin ai taihu rarua e durudia dalana mani a laloa. (Filipi 4:1-3 ba duahi.) Reana Euodia bona Sunutuke padadiai na hekwakwanai ta e vara dainai asie lalotamonava. Paulo ese unu taihu raruosi na se kara auka henidia eiava se hahemaoro henidia, to edia kara namodia hari e lalo bada. Unu taihu raruosi na laḡani momo lalodiai Iehova e hesiai henia. Paulo na dibana Iehova ese idia na e lalokau henidiava. Paulo na lalohadai maorona e abia dainai, unu taihu  raruosi e durudia bae herohemaino. Paulo na kongrigeisin ai ma haida edia kara namodia e lalo badava dainai, una ese e durua baine moale bona idia ida ena hetura karana e hagoadaia.

19. (a) Edena dalai elda taudia ese tadikaka taihu ediai lalohadai maorona bae abia? (b) Kingdom Hall e haḡoevaiamu eldana ta ena laulau amo dahaka ta dibamu?

¹⁹ Dahaka ta dibamu? Namona na elda taudia ese tadikaka bona taihu edia kara namodia bae lalo bada. Ena be idia na dia ḡoevadae taudia; to idia ta ta na mai edia kara namodia danu. (Fili. 2:3) Vaia, nega haida elda taudia ese reana tadikaka ta o taihu ta be sisiba heniamu. To Paulo heḡereḡerena, namona na elda taudia ese una tadikaka o taihu ena hereva o kara dainai basie badu haraḡa. Namona na idia ese una tadikaka o taihu ena lalokau Iehova enai, ena haheauka karana, bona ena kara namodia bae lalo bada. Bema elda taudia ese ma haida edia kara namodia be lalo badamu tadikaka taihu na be mamiamu Kongrigeisin taudia ese na e lalokau henidiamu.

20. Paulo ena haheitalai ese elda taudia be ede be durudia tomamu?

²⁰ Umui elda taumui na Paulo ena haheitalai bo stadilaiamu karana ese be durumuimu. Heḡereḡere, Watch Tower Publications Index ai, ina hereva kwarana “Paul” baola bena ina sinado maraḡina “example for elders” ba itaia. Unuseni o davarimu ḡaudia o duahimu neganai, sibomu ba henanadai, ‘Edena dalai Paulo ena haheitalai ese be durugumu mai moalegu ida egu elda ḡaukarana baina haḡuḡurua?’

21. Elda taudia ese dahaka bae abia dae be namo?

²¹ Elda taumui e, ba helalotao Iehova na se gwaumu ba ḡoevadae, to ia na e uramu Ia ba badinaia. (1 Kor. 4:2) Iehova ese Paulo ena ḡaukara goada bona ia e badinaiava karana na e laloa badava. Namona na bavabia dae Dirava ese ia dainai o karamu ḡaukaradia na e lalo badamu. Iehova ese “emui ḡaukara bona emui lalokau ia ladana dainai vada o hahedinarai, helaḡa taudia o durudiava bona o durudiamu, ia ese basine lalo boio.”​—Heb. 6:10.