1-2. Kouma lexanp lapot Pol kapav ed bann ansien azordi?

 LAPOT Pol ti bien kontan so bann frer ek ser. Li ti travay “lanwit-lizour” pou zot. (Zist. 20:31) Se pou sa rezon-la ki so bann frer ek ser ti bien kontan li. Par exanp, kan bann ansien Efez ti aprann ki zot pa ti pou trouv lapot Pol ankor, zot ti bien “plore.” (Zist. 20:37) Dan mem fason, bann ansien dan nou bann lasanble bien kontan zot bann frer ek ser, ek zot fer tou seki zot kapav pou ed lezot. (Fil. 2:16, 17) Me parfwa, bann ansien kapav gagn difikilte pou fer tou seki zot ena pou fer. Ki kitsoz kapav ed zot pou sirmont sa bann difikilte-la?

² Bann ansien kapav reflesi lor lexanp Pol. (1 Kor. 11:1) Pol pa ti enn superman. Li ti enn zom inparfe, ek parfwa li ti trouv sa difisil pou fer “seki bien”. (Rom. 7:18-20) Anplis, li ti bizin fer fas ar boukou difikilte. Selman, Pol pa ti bes lebra, ek li pa ti perdi so lazwa. Kan bann ansien swiv lexanp lapot Pol, zot pou kapav kontign servi Zeova avek lazwa, mem kan zot gagn bann difikilte. Anou gete kouma zot kapav fer sa.

3. Ki nou pou examine dan sa lartik-la?

³ Dan sa lartik-la, nou pou get kat difikilte ki bann ansien kapav gagne: (1) zot bizin trouv letan pou predikasion ek zot bann lezot responsabilite, (2) zot bizin trouv letan pou ankouraz zot bann frer ek ser, (3) zot bizin lit kont zot prop febles, ek (4) zot bizin fer fas ar bann defo ki lezot ena. Nou pou gete osi kouma lapot Pol ti sirmont sa bann difikilte-la, ek kouma bann ansien kapav swiv so lexanp.

4. Kifer parfwa bann ansien kapav gagn difikilte pou pran latet dan predikasion?

⁴ Kifer sa kapav difisil? Anplis ki zot bizin pran latet dan predikasion, bann ansien ena boukou lezot responsabilite ankor. Par exanp, boukou ansien fer prezidan pou renion lasemenn ek zot diriz Letid Biblik Lasanble. Zot ena osi bann diskour pou prepare. Zot bizin osi form bann asistan ministeryel, ek zot pas boukou letan pou ankouraz zot bann frer ek ser. (1 Pier 5:2) Sertin ansien fer konstriksion ouswa mintenans bann Lasal Renion ouswa bann lezot batiman ki lorganizasion ena. Me kanmem sa, parey kouma tou bann proklamater, travay pli inportan ki bann ansien bizin fer se pres bonn nouvel.​—Mat. 28:19, 20.

5. Ki nou kapav aprann ar lexanp lapot Pol konsernan predikasion?

⁵ Lexanp Pol. Pol ti enn proklamater ki ti bien efikas, ek dan Filipien 1:10, li ankouraz nou pou “verifie bien bann kitsoz ki pli inportan.” Pol ti swiv sa konsey-la. Li ti gagn enn mision pou akonpli, ek pandan plizir dizenn lane, predikasion ti kitsoz pli inportan dan so lavi. Li ti prese ‘anpiblik ek lakaz apre lakaz.’ (Zist. 20:20) Li pa ti pres zis enn sertenn ler, ouswa enn sertenn zour dan lasemenn. Li ti sezi tou lokazion ki li ti gagne pou prese! Par exanp, pandan ki li ti pe atann so bann kamarad dan Atenn, li ti pres avek bann dimounn inportan sa lavil-la, ek li ti gagn bann bon rezilta. (Zist. 17:16, 17, 34) Mem kan li ti dan “prizon,” Pol ti pres avek bann dimounn ki ti otour li.​—Fil. 1:13, 14; Zist. 28:16-24.

6. Ki formasion Pol ti donn lezot?

⁶ Pol ti servi bien so letan. Souvan, li ti invit lezot pou akonpagn li dan so minister. Par exanp, pou so premie vwayaz misioner, li ti amenn Zan Mark avek li. Ek pou so deziem vwayaz, li ti amenn Timote. (Zist. 12:25; 16:1-4) Nou kapav sir ki lapot Pol ti fer so maximum pou montre sa bann zom-la kouma pou organiz bann lasanble, kouma pou ankouraz bann frer ek ser, ek kouma pou vinn bann ansegnan ki efikas.​—1 Kor. 4:17.

7. Kouma bann ansien kapav swiv konsey ki lapot Pol inn done dan Efezien 6:14, 15?

⁷ Ki leson nou aprann? Bann ansien kapav swiv lexanp lapot Pol kan zot pa zis prese lakaz-lakaz, me kan zot sezi tou lokazion ki zot gagne pou prese. (Lir Efezien 6:14, 15.) Par exanp, zot kapav prese kan zot dan travay ouswa kan zot pe  fer shopping. Ouswa, si zot pe konstrir enn Lasal Renion, zot kapav pres avek bann vwazin ek bann dimounn avek ki zot aste bann materyo. Parey kouma Pol, kan zot dan predikasion, bann ansien kapav sezi sa lokazion-la pou form lezot, kouma par exanp, bann asistan ministeryel.

8. Parfwa, ki kitsoz enn ansien pou bizin fer?

⁸ Fode zame ki enn ansien telman okipe avek so bann responsabilite dan lasanble ouswa dan sirkonskripsion, ki li nepli ena letan pou prese. Pou ki li ena letan pou fer tou seki li bizin fer, kitfwa li pou bizin refiz sertin responsabilite. Apre ki li’nn priye ek bien reflesi lor la, kitfwa li pou konpran ki, si li aksepte sa responsabilite-la, li pou nepli ena letan pou bann kitsoz ki pli inportan, kouma par exanp, so ladorasion an fami sak semenn, partisip dan predikasion, ouswa form so bann zanfan pou predikasion. Sertin ansien kapav trouv sa difisil pou refiz enn responsabilite. Me zot kapav sir ki Zeova pou konpran ki zot pe fer sa, parski zot pa anvi negliz bann lezot responsabilite ki zot ena.

9. Ki difikilte bann ansien kapav gagne?

⁹ Kifer sa kapav difisil? Bann serviter Zeova bizin fer fas ar boukou difikilte. Nou pe viv dan bann dernie zour, ek nou tou nou bizin lankourazman, soutien, ek rekonfor. Ek parfwa, nou bizin led pou ki nou pa fer enn move kitsoz. (1 Tes. 5:14) Biensir, bann ansien pa kapav tir tou bann problem ki bann serviter Zeova gagne. Selman, Zeova anvi ki bann ansien fer zot maximum pou ankouraz ek protez so bann serviter. Mem si bann ansien ena boukou kitsoz pou zot fer, kouma zot kapav trouv letan pou ed zot bann frer ek ser?

10. Dapre 1 Tesalonisien 2:7, kouma Pol ti pran swin so bann frer ek ser?

¹⁰ Lexanp Pol. Pol ti touletan pre pou felisit lezot ek ankouraz zot. Bann ansien bizin swiv so lexanp kan zot montre lamour ek bonte anver zot bann frer ek ser. (Lir 1 Tesalonisien 2:7.) Pol ti dir so bann frer ek ser ki li kontan zot, ek ki Zeova osi kontan zot. (2 Kor. 2:4; Efe. 2:4, 5) Li ti pas letan avek zot, ek li ti konsider zot kouma so bann kamarad. Li pa ti ezite pou koz lor so bann defo avek zot ek lor seki ti pe trakas li. Sa montre ki li ti fer zot konfians. (2 Kor. 7:5; 1 Tim. 1:15) Selman, Pol pa ti res konsantre lor so bann problem. Okontrer, li ti anvi ed so bann frer ek ser.

11. Kifer Pol ti konsey so bann frer ek ser?

¹¹ Parfwa, Pol ti bizin konsey so bann frer ek ser. Me li pa ti fer sa parski li ti ankoler  avek zot. Li ti konsey zot parski li ti kontan zot, ek li ti anvi protez zot pou zot pa tom dan bann piez Satan. Li ti donn zot bann konsey ki fasil pou konpran, ek li ti anvi ki zot aksepte sa bann konsey-la. Par exanp, dan so let ki li ti ekrir bann Korintien, Pol ti donn bann konsey bien ferm. Me apre ki li ti avoy let-la, li ti fer Tit al Korint parski li ti anvi kone kouma bann-la ti reazir ar so let. Pol ti bien kontan kan li ti aprann ki bann-la ti aksepte konsey ki zot ti gagne ek ki zot ti met li an pratik.​—2 Kor. 7:6, 7.

12. Kouma bann ansien kapav ranforsi lafwa zot bann frer ek ser?

¹² Ki leson nou aprann? Bann ansien kapav swiv lexanp Pol kan zot pas letan ar zot bann frer ek ser. Enn fason ki zot kapav fer sa se kan zot ariv Lasal boner, avan ki renion koumanse, pou ki zot kapav gagn bann konversasion ki ankourazan ar lezot. Souvan, sa pran zis de-trwa minit pou ankouraz enn kikenn ki bizin led. (Rom. 1:12; Efe. 5:16) Enn ansien ki swiv lexanp Pol pou osi servi Labib pou ranforsi lafwa so bann frer ek ser, ek rasir zot ki Bondie kontan zot. Li pou osi montre zot ki li kontan zot. Li pou koz avek zot regilierman, ek li pou rod bann lokazion pou felisit zot. Kan enn ansien bizin konsey enn kikenn, li pou servi Labib pou donn sa konsey-la. Avek bonte, li pou donn bann konsey ki kler, parski li anvi ki sa dimounn-la aplik konsey ki li’nn gagne.​—Gal. 6:1.

13. Ki enn ansien kapav resanti akoz so prop febles?

¹³ Kifer sa kapav difisil? Bann ansien, zot pa parfe. Zot fer erer parey kouma tou dimounn. (Rom. 3:23) Parfwa, bann ansien kapav ena enn move lopinion lor zotmem akoz zot prop febles. Par exanp, sertin ansien telman konsantre lor zot bann febles, ki sa dekouraz zot. Ek ena lezot ki kitfwa ferm zot lizie lor zot bann febles ek zot panse ki zot pa bizin sanze.

14. Dapre Filipien 4:13, kouma limilite ti ed Pol pou sirmont so bann febles?

¹⁴ Lexanp Pol. Avek limilite, Pol ti rekonet ki li ti bizin led pou li sirmont so bann febles. Li ti bizin lafors ki zis Bondie tousel kapav done. Avan, Pol ti bien persekit bann Kretien. Me apre, li ti konpran ki seki li ti pe fer pa ti bon, ek li ti dispoze pou sanz so fason panse ek so personalite. (1 Tim. 1:12-16) Avek led Zeova, Pol ti vinn enn ansien ki ena lamour, konpasion, ek limilite. Li ti kone ki li ti ena boukou febles, me  li pa ti res konsantre lor la. Li ti kone ki Zeova ti pardonn li. (Rom. 7:21-25) Pol pa ti panse osi ki li ti parfe. Okontrer, li ti fer boukou zefor pou kontign sanz so personalite, ek avek limilite, li ti kont lor Zeova pou fer sa.​—1 Kor. 9:27; lir Filipien 4:13, NW. *

15. Kouma bann ansien bizin konsider zot bann febles?

¹⁵ Ki leson nou aprann? Bann ansien pa gagn responsabilite pou vinn ansien parski zot parfe. Selman, Zeova atann ki zot rekonet zot bann erer ek ki zot sanz zot personalite. (Efe. 4:23, 24) Enn ansien bizin etidie Labib pou li kone ki sanzman li bizin fer dan so personalite, ek li fer sa bann sanzman-la. Lerla, Zeova pou ed li pou ki li vinn enn bon ansien ek pou ki li ere.​—Zak 1:25.

16. Ki kapav arive si enn ansien res konsantre lor defo lezot?

¹⁶ Kifer sa kapav difisil? Kan bann ansien pas boukou letan ar bann frer ek ser dan lasanble, zot remark defo ki bann-la ena. Akoz sa, si zot pa fer atansion, zot kapav agase ar lezot ek kritik zot. Pol ti dir bann Kretien ki Satan ti pou bien kontan ki sa arive.​—2 Kor. 2:10, 11.

17. Ki lopinion lapot Pol ti ena lor so bann frer ek ser?

¹⁷ Lexanp Pol. Pol ti ena enn bon lopinion lor so bann frer ek ser. Li ti konn zot bann defo, ek parfwa, seki zot ti fer ti bien bles li. Me Pol ti kone osi ki, kan enn kikenn fer enn erer, sa pa vedir ki li enn move dimounn. Li ti kontan so bann frer ek ser, ek li ti res konsantre lor zot bann zoli kalite. Si zot ti pe gagn difikilte pou fer seki bien, Pol pa ti dout zot lintansion. Li ti kone ki zot ti anvi fer seki bien ek ki zot ti bizin led pou fer sa.

18. Ki nou kapav aprann ar fason ki Pol ti ed Evodi ek Sintish? (Filipien 4:1-3)

¹⁸ Anou gete kouma Pol ti ed de ser ki ti dan lasanble Filip. (Lir Filipien 4:1-3.) Evodi ek Sintish kitfwa ti gagn enn dezakor, ek akoz sa, zot ti nepli kamarad. Pol pa ti ni ziz zot, ni kritik zot. Okontrer, li ti res konsantre lor bann zoli kalite ki zot ena. Sa de ser-la ti fidel anver Zeova, ek zot ti pe servi Li depi plizir lane. Pol ti kone ki Zeova ti bien kontan zot. Pol ti ena enn bon lopinion lor sa de ser-la. Akoz sa, li ti ankouraz zot pou fer lape avek zot kamarad. Pol ti res konsantre lor bann kalite ki lezot ena. Sa ti permet li pou gard so lazwa ek pou ena enn bon lamitie avek zot tou dan lasanble.

19. (a) Kouma bann ansien kapav ena enn bon lopinion lor zot bann frer ek ser? (b) Ki to kapav aprann ar sa zimaz kot enn ansien pe netway Lasal la?

 ¹⁹ Ki leson nou aprann? Ansien, zot bizin rod bann zoli kalite ki zot bann frer ek ser ena. Li vre ki nou tou nou inparfe. Selman, nou tou nou ena bann kalite ki lezot kapav apresie. (Fil. 2:3) Detanzantan, kitfwa bann ansien pou bizin konsey enn kikenn. Me parey kouma Pol, zot bizin fer zefor pou pa konsantre zot lor bann parol negatif ouswa bann move aksion sa dimounn-la. Konsantre zot plito lor lamour ki sa dimounn-la ena pou Zeova, lor bann zefor ki li pe fer pou servi Zeova, ek lor dezir ki li ena pou fer seki bien. Bann ansien ki res konsantre lor bann kalite ki lezot ena, zot ede pou ki ena enn bon latmosfer dan lasanble.

20. Kouma bann ansien kapav kontign gagn bann bienfe ar lexanp Pol?

²⁰ Ansien, zot pou gagn bann bienfe si zot kontign etidie lexanp Pol. Par exanp, dan Index des publications des Témoins de Jéhovah, al dan soutit « Paul » ek rod « exemple pour les anciens ». Kan to pe lir sa bann lartik-la, demann tomem, ‘Kouma lexanp lapot Pol kapav ed mwa pou gard mo lazwa kan mo pe asim mo responsabilite ansien?’

21. Ki kitsoz bann ansien kapav sir?

²¹ Ansien, Zeova pa demann twa pou vinn parfe. Li demann twa pou res fidel anver Li. (1 Kor. 4:2) Zeova ti bien kontan travay ki lapot Pol ti fer, ek Li ti apresie so fidelite. To kapav sir ki Zeova bien apresie tou seki to fer pou Li. Zame Li pa ‘pou bliye seki to’nn fer ek lamour ki to finn montre pou so nom, kan to finn servi bann sin ek ki to pe kontign servi bann-la.’​—Ebre 6:10, NW.