1-2. Yotajhiha ya murumiwi Pawulo enaakavihere addi anamaholela mulogo a peeno?

 MURUMIWI Pawulo owadhivela vanlubale addibile. Oliye oolaba vanlubale wihina aasamalele. (At. 20:31) Bumwahaya addibila a mulogo dhimodha, yomudhivela vanlubale Pawulo. Nlabo nimodha, addibila a mulogo wo Efezu ‘wambela wunla vanlubale’ nunona wihina kiyahogolowele omoona Pawulo. (At. 20:37) Addibilihu oofuneya eri anamaholela mulogo, eri ninga murumiwi Pawulo, aliwa enowadhivela addibiliwa ammulogoni ni enolaba nuviheya wihina yaakavihere. (Fil. 2:16, 17) Mbwenye malabo mamodha, anamaholela mulogo enofwanyiwa makathamiho. Ki enaakavihera ddi?

² Ethu enaakavihere fumutajhiha Pawulo. (1 Cor. 11:1) Pawulo aari muthu oohilogomana ninga iyo. Malabo mamodha werana ethu yapama kayakweya. (Rom. 7:18-20) Ohiya eyo, oliye oowanana makathamiho manlubale mwigumini mwaaye. Naarive dhigari ndo, oliye kaayelele ohagalala. Anamaholela mulogo yamutajhihaga murumiwi Pawulo, enere wanda wawanana makathamiho enniwana, ni ohagalalagave emulabelaga Yehova. Kabeni noone ethu enaakavihere.

3. Musolo ola, nnahudhere ddi?

³ Musolo ola, nnere wawoona makathamiho mannayi enaafwanya anamaholela mulogo: (1) wapara mabasa oolaleya naarive eganna mutholo dhowinjhiva, (2) okala namakukula oodhivela, (3) owanana ni ohulogomana wewa, ni (4) ovilelana ni ohulogomana waathu amodha. Ohiya eyo, nnere woona, makalelo Pawulo aagonjhihiliye kadda makathamiho ni makalelo anamaholela mulogo enafuniwa omutajhiha.

4. Mwahaya bwaddi malabo mamodha anamaholela mulogo egarusiwa waapara mabasa oolaleya?

⁴ Mwahaya bwaddi malabo mamodha eyo egakala ethu yorusa? Anamaholela mulogo enowaholela mabasa oolaleya, ohiya eyo, ehikanna mutholo dhimodha mmulogoni. Motajhiha, owinjhiva enoholela mutugumano dha vaari vasumana ni enoweddiha ohudhera wa Bibliya wa mulogo. Teto aliwa enowooga mwaha dhavathaddo ni dhipaddi dhimodha. Aliwa enowaxagiha adhaari ookavihera ni enodhiveliwa wawaredhela addibila ni arogola ammulogoni. (1 Ped. 5:2) Teto vadhuluva, amodhaya enowapara mabasa oomaga nyumba dhomwene ni perediyu dhimodha dha nikuru nehu. Naarive dhigari ndo, anamaholela mulogo boobajha okala anamalaleya a muthenga dhapama dhomwene ninga enerana addibila amodha ammulogoni.—Mat. 28:19, 20.

5. Pawulo andile addi okala yotajhiha yapama wodhela mabasa oolaleya?

⁵ Yotajhiha ya murumiwi Pawulo enanihudhiha ddi? Va Filipenses 1:10, Pawulo anonaddela ethu baani yamukavihera okala namalaleya apama a muthenga womwene, oliye anihina: ‘Musogolihege dhithu dhiri dhathima.’ Siyela yamukavihera Pawulo. Oliye ahakela mutholo wowalaleya athu a malogo, muwari mwa yaka dhowinjhivadhene, ela yaari ethu yathima mwigumini mwaaye. Oliye oolaleya ‘vamentoni vaathu aatene ni nyumba ni nyumba.’ (At. 20:20) Yamuhagalasa Pawulo kuwari olaleyave mudhidhi wokweya baahi, obe kadda sumana dila modha, oliye oopatha kadda mudhidhi akanniyena wihina alaleye! Motajhiha, agaari wAtenas aajhehaga akwaye a mulenddoni, oliye ahalaleya athu athima ni dhahimweddela pama. (At. 17:16, 17, 34) Pawulo owalaleya athu naarive agaari ‘mukambura’ oomagiwene.—Fil. 1:13, 14; At. 28:16-24.

6. Pawulo axagihile muselu baani?

⁶ Pawulo oolabihera pama mudhidhaye. Oliye owaloba athu amodha wihina yalaleye vamodha. Motajhiha, olenddo woobajha ninga misiyonariyu, oliye omuthukula Juwawu ni Marku, olenddo wanabili omuthukula Timotiyu. (At. 12:25; 16:1-4) Mwebaribarene Pawulo owilibihera wihina aaxagihe alobwana ala, oliye wahudhiha makalelo owegeredha mulogo, makalelo owaredhela addibila ni okala anamahudhiha apama a madhu a Mulugu.—1 Cor. 4:17.

7. Anamaholela mulogo enande addi wavirihamo madhu aasorihe murumiwi Pawulo va Efésios 6:14, 15?

⁷ Nnahudheravo ddi? Anamaholela mulogo enohowela omutajhiha Pawulo, ohiya olaleyave baahi nyumba ni nyumba, mbwenye opatha mudhidhi yakanna ofuru wolaleya. (Omwileri Efésios 6:14, 15.) Motajhiha, aliwa podi ovaha onamoona yadhowaga ogula dhithu dhewa obe yaparaga mabasiwa. Teto ale enaapara  mabasa oomaga nyumba dhomwene, podi opatha mudhidhi yole wihina yaalaleye ale yaddamele mburo vinamagiiwa obe athu yaale enaadhana matiriyaleya. Mowindala ninga Pawulo, anamaholela mulogo podi opatha mudhidhi mmalaleyelo wihina yaxagihe athu amodha, ni adhaariya ookavihera.

8. Malabo mamodha anamaholela mulogo enohowela wera ddi?

⁸ Namaholela mulogo kahiyo othabwa opinyaminyeya ni mutholo dha mmulogoni obe naari dha murudda onalaleyiwa ofiyera wasukuma mabasa oolaleya. Wihina erena dhatedhene anandiye, namaholela mulogo onofwanelela okoodda mutholo dhimodha. Namaholela mulogo ubuwela ni alobela podi woonelamo wihina mutholo ola, kaginaakwanihe. Erana ndo anofwanelela wubuwela mutholo dhimodha dhiri dhathima ninga ohudhera weemudhi onereya sumana dhatedhene, wapara mabasa oolaleya, ni waxagiha anaaye wapara mabasa oolaleya. Anamaholela amodha, enowarusa owoga wi kaginaakwanihe mutholo ola, mbwenye eyo Yehova anowonelamo wihina efunelo yewa fuwoona dhewa dhaweddelega pama.

9. Makathamiho baani enaafwanya namaholela mulogo owinjhiva?

⁹ Mwahaya bwaddi malabo mamodha eyo egakala ethu yorusa? Adhaari a Yehova enofwanyiwa makathamiho owinjhiva. Thabwa-thabwa malabo yala ookuthula, iyo aatene nnohowela olibihiwa, okaviheriwa ni otodoliwa. Malabo mamodha nnohowela nikavihero, wihina niherena ethu yabure. (1 Tes. 5:14) Nihinona wi anamaholela mulogo kinande wamariha makathamiho amatene enafwanya addibila. Naarive dhigari ndo, Yehova anafuna wi ebarelege nikuru naaye ni elibihege naarive anamaholela mulogo eganna dhithu dhowinjhiva dhopara. Enande addi oopatha mudhidhi wihina yaakavihere addibila?

10. Mowiwanana ni 1 Tessalonicenses 2:7, Pawulo aweddiha ni makalelo baani addibila?

¹⁰ Yotajhiha ya murumiwi Pawulo enanihudhiha ddi? Pawulo ahikanna elamalelo yowatamalela addibila ni oopatha kadda mudhidhi wihina aalibihe. Anamaholela mulogo enotajhiha ekalelo ela yowadhivela addibila, ni waweddiha pama nuudhivela. (Omwileri 1 Tessalonicenses 2:7.) Pawulo kaakuwa addibile wihina owadhivela vanlubale, teto Yehova oomudhivela kadda muthu. (2 Cor. 2:4; Efé. 2:4, 5) Vamentoni va Pawulo addibila ammulogoni yaari akwaye, ni oojha mudhidhi naaliwa. Oliye owaroromela addibila ni kaakuwa wodhela makathamiho aye ni dhithu dhamurusa. (2 Cor. 7:5; 1 Tim. 1:15) Mbwenye Pawulo kaalibana wawogave baahi makathamiho aye. Oliye afuna aakavihere addibila.

11. Mwahaya bwaddi Pawulo adhe aalagege addibile?

¹¹ Malabo mamodha Pawulo owafwanya addibila yahowela olagiwa. Mbwenye oliye keerana ndo mwaha wa ethu emutakalele yeriliwana. Mwebaribarene, oliye owalaga mwaha owathuwathuwela addibila ni afuna aabarele.  Oliye owerana dhatedhene wihina dholaga dhaye dhikale dhokweya wonelamo ni othuwathuwela onona akala addibila ehonelamo pama ethu afuniye owoga. Motajhiha, Pawulo ahalaga akudda korintiyu mwamakalelo oohiyedhedha. Mbwenye vasogolova, oliye omuruma Titu okorintiyu. Mwaha afuna anone makalelo addibila yaariiwa nuwakela karta naaye. Mwebaribarene oliye ahihagalala nuwiwa wihina addibila yahirumedha yolaga yaye!—2 Cor. 7:6, 7.

12. Anamaholela mulogo enande addi walibiha addibila ammulogoni?

¹² Nnahudheravo ddi? Anamaholela mulogo podi omutajhiha Pawulo wodhela ojha mudhidhi vamodha ni addibila ammulogoni. Makalelo owerana ndo, fufiya mutaneene omutugumanoni, mowindala aliwa enere okanna mudhidhi wothapanya naaddibila. Wihina yaalibihe addibila kinahoweleya ovira mudhidhi wowinjhivene ethapanyaga, mutala vang’ono podi walibiha. (Rom. 1:12; Efé. 5:16) Anamaholela mulogo podi omutajhiha Pawulo, wodhela omulabihera Bibliya wihina elibihe nroromelo naaddibila ammulogoni, ni wooniha wihina kadda ddibila ammulogoni Yehova anomudhivela vanlubale. Anamaholela mulogo, enothapanya mudhidhi wowinjhivene naaddibila, ni enoopatha kadda mudhidhi wihina yaatamalele. Yahoweleyaga walaga, namaholela mulogo anovaha yolaga yaye akumihaga mBibliyani. Aliwa kinaakuwa yafuna wavaha yolaga, mudhidhi mmodhave enowerana ni makalelo apama, mwaha enowathuwathuwela addibila makalelo enafuniwa wonelamo yolaga yewa.—Gál. 6:1.

13. Makalelo baani abure yamuthukulele namaholela mulogo ohukanna monelo wapama mwaha ohulogomana waye?

¹³ Mwahaya bwaddi malabo mamodha eyo egakala ethu yorusa. Anamaholela mulogo kahiyo athu oologomana. Aliwa enoviriganiha ninga athu aatene enaviriganihiwa. (Rom. 3:23) Wodhela muselu yola, podi wera amodhaya enowarusa wanona manddile ewa. Motajhiha, amodhaya enothabwa othuwa-thuwa mwaha wa dhithu enaviriganihiwa ofiyera okwerebeya. Mbwenye amodhaya enoona wihina ohulogomana wewa kuthambwe teto newene kinahoweleya osaddula ethu.

14. Mowiwanana ni Filipenses 4:13, wiyeviha omukavihere addi murumiwi Pawulo owanana ohulogomana waye?

¹⁴ Yotajhiha ya murumiwi Pawulo enanihudhiha ddi? Pawulo aari muthu owiyeviha ni ahinona wi kaande owanana ohulogomana waye yekaye. Oliye ahinona wihina ohowela nikavihero na Mulugu. Omambelelowene, Pawulo owaharahara ni owawoniha goyi enlubale makiristawu. Mbwenye, oliye woonelamo wihina ndhe eeriyena kahiyo dhithu dhapama, vano osaddula emuthu yaye. (1 Tim. 1:12-16) Nnikavihero na  Yehova, Pawulo okala namakukula owiyeviha, oodhivela ni oojhedhiha. Oliye ahinona wihina gihikanna dhithu dhowinjhiva ginaviriganihimi, mbwenye oliye kaajha mudhidhaye ubuwelaga dhendho, ohiya eyo, oliye oomuroromela Yehova wihina anere omukurumuwela. (Rom. 7:21-25) Oliye ahinona wi kaande okala mudhaari a Yehova oologomana. Naarive dhigari ndo, oliye owilibihera vanlubale wihina awomihedhe dhikalelo dhaye dheekiristawu. Malabo amatene owerana mwamakalelo owiyeviha, amuroromelaga Yehova wihiha eere wanda wapara mabasa oolaleya.—1 Cor. 9:27; omwileri Filipenses 4:13.

15. Anamaholela mulogo yonege avi ohulogomana wewa?

¹⁵ Nnahudheravo ddi? Kaawo namaholela mulogo anathomiwa mwaha wi doologomana. Mbwenye Yehova anajhehera wihina anamaholela mulogo enonege wihina enoviriganiha ni yilibiherege owomihedha ekalelo yewa yekiristawu. (Efé. 4:23, 24) Namaholela mulogo akanne elamalelo yomuhudhera Bibliya wihina oone dhipaddi baani mwigumini mwaaye anahoweliye owomihedha. Erana ndo anere ohagalala, teto Yehova anere omukavihera okala namaholela mulogo apama.—Tia. 1:25.

16. Enaapadduwele ddi anamaholela mulogo yathabwaga osugwa ohulogomana waaddibila?

¹⁶ Mwahaya bwaddi ela podi okala ethu yorusa? Anamaholela mulogo yajhaga mudhidhi wowinjhivene ni addibila ammulogoni, enokweya woona ohulogomana wewa. Yahikala pasope, eyo podi wathukulela anamaholela mulogo wanyanyuwela addibila, wawoga obure, ni waweddiha mwamakalelo abure. Ninga awogile murumiwi Pawulo, siyeyo Saddana anaganiye wihina yeregena.—2 Cor. 2:10, 11.

17. Pawulo awoona aavi addibila ni arogola?

¹⁷ Yotajhiha yamurumiwi Pawulo enanihudhiha ddi? Oliye athabwa osugwa dhikalelo dhapama dha addibila. Pawulo owoona dhooviriganiha dha addibila, teto nuliyeya ooviriganiha. Naarive dhigari ndo, Pawulo ahinona wi kahiyo mwaha woviriganiha winamuthukulela muthu okala abure. Oliye owadhivela addibila ni owoona dhikalelo dhapama dhanniwana. Akala ddibila oorusiwa werana dhithu dhapama, oliye kaamutoriha ubuwelaga wihina anerana mwaha obure waye, oliye ahinona wihina addibila enna wilibihera wihina yerena dhithu dhapama, mbwenye enahoweleya fuwakavihera.

18. Wodhela makalelo murumiwi Pawulo amweddihiye murogola Evodiya ni Sintiki enuhudhiha ddi? (Filipenses 4:1-3)

¹⁸ Kasugwa makalelo murumiwi Pawulo aweddihiye arogola a mulogo wa ooFilipo. (Omwileri Filipenses 4:1-3.) Podi wera Evodiya ni Sintiki kayiwanana pama ni yahifiyedha widdana. Pawulo kaweddihe nimakalelo abure newene kaatorihe arogola ale, mbwenye oliye asugwa dhikalelo dhapama yanniwana. Arogola ale yanna omulabela Yehova yaka dhowinjhivadhene, teto Pawulo ahinona wihina Yehova owadhivela vanlubale. Moonelo yola wapama anniyena wodhela  arogola yaale, wahimuthukulela Pawulo wakongomedha aabilene otxokotxela muladdu yanniwana wihina yandane dila biili. Osugwa ekalelo yapama yaathu amodha wahimukavihera Pawulo odhowagave ahagalalaga ni okanna wandana wapama naaddibila ammulogoni.

19. a) Anamaholela mulogo enamutajhihe addi Pawulo? b) Ohudhere ddi ni fotu ela enamoniha namaholela mulogo anafufutha nyumba ya Omwene?

¹⁹ Nnahudheravo ddi. Anamaholela mulogo, musugwege dhikalelo dhapama dhaaddibila ni dhaarogola. Iyo aatene kanilogomane, naarive dhigari ndo kadda ddibila ohukanna dhikalelo iyo nnunlelihu wihina nikanne. (Fil. 2:3) Nihinona wi malabo mamodha, anamaholela mulogo enohowela walaga addibila amodha ammulogoni, mbwenye mowindala ninga Pawulo anamaholela mulogo enohowela wilibihera wihina ehithabwege osugwa dhooviriganiha dhaaddibila. Ohiya eyo, musugwege odhivela enna addibila ni Yehova, ninga odhivela wewa ni dhithu enandiwa werana. Anamaholela mulogo yakanna moonelo wapama, mulogo watene onakala wowiwanana mwaha aatene enofwanyamo odhivela.

20. Odidela ohudhera yotajhiha ya murumiwi Pawulo, enakavihere addi anamaholela mulogo?

²⁰ Anamaholela mulogo mudidele omutajhiha murumiwi Pawulo. Muwari mwa indisi, onere ofwanyamo muselu dhohiyana-iyana, dhinukavihere omutajhiha murumiwi Pawulo. Olebevo Pawulo, windo osayele makalelo anamaholela mulogo enahoweliwa omutajhiha murumiwi Pawulo. Wasayelaga muselu ndha, we podi orajhiha werana nikoho nna, ‘yotajhiha ya Murumiwi Pawulo enaagikavihere addi wakwaniha mutholo ola wokala namaholela mulogo?’

21. Ethu baani Yehova anaalobiye anamaholela mulogo?

²¹ Anamaholela mulogo, kamubuwele wi Yehova anulobani wi mukale athu oologomana, mbwenye anafuna wihina mukale oororomeleya. (1 Cor. 4:2) Pawulo ohuloba vanlubale ni aali ororomeleya, siyeyo yamuthukulele Yehova omoona ninga muthu athima. We podi okanna ebaribari wihina Yehova onowawona mabasa matene onampareliwe, teto ‘Yehova kadha aaddiwala mabasa enyu ni odhivela mutonyihedhinyu ndina naaye, mwaha walabela ni ohihiya walabela oweela.’—Heb. 6:10.