1-2. Wãn to la tẽn-tʋmd a Poll mak-sõngã tõe n sõng kãsem-dãmbã rũndã-rũndã?

 TẼN-TƲMD a Poll ra nonga a tẽed-n-taasã. A ra tʋmda wʋsg sẽn na yɩl n ges b yelle. (Tʋʋ. 20:31) Woto kɩtame t’a tẽed-n-taasã me ra nong-a wʋsgo. Daar a ye, Efɛɛz tigingã kãsem-dãmb sẽn bãng tɩ b pa na n le yã a Pollã, “b fãa raaga nintãm wʋsgo.” (Tʋʋ. 20:37) Rũndã-rũndã, kãsem-dãmbã me nonga b tẽed-n-taasã hal wʋsgo, n maand b sẽn tõe fãa sẽn na yɩl n sõng-ba. (Fili. 2:16, 17) La bʋko, mi n pa nana ne-b ye. Bõe n tõe n sõng-ba?

² Kãsem-dãmbã sẽn tʋmd wʋsgã tõe n dɩka a Poll togs-n-taare. (1 Kor. 11:1) A Poll ra yaa ninsaal wa tõndo. A ra pa zems zãnga, tɩ wakat ninga yɩl n maan sẽn yaa tɩrgã ra yaa maoob ne-a. (Rom. 7:18-20) Sẽn paas me, a ra maooda ne zu-loees buud toor-toore. La a pa koms raood n base, bɩ n bas tɩ zu-loeesã kɩt t’a pa le tar sũ-noog ye. Kãsem-dãmbã sã n dɩkd a Poll togs-n-taare, b na n tõog n maoo ne zu-loees nins b sẽn segdã, la b ket n tũud a Zeova ne sũ-noogo. Bɩ d ges b sẽn tõe n maan rẽ to-to.

3. Bõe la d na n yã sõs-kãngã pʋgẽ, la bõe la rẽ na n sõng-d tɩ d tõog n maane?

³ Sõs-kãngã pʋgẽ, d na n yãa yɛl a naas sẽn mi n pa nana ne kãsem-dãmbã: 1) Yɩl n paam sẽk n moond koɛɛgã la b tʋmd b tʋʋm a taabã, 2) yɩl n paam sẽk n kengd b tẽed-n-taasã raoodo, 3) yɩl n tõog n mao ne b mensã pãn-komsem, 4) yɩl n da bas tɩ b taabã pãn-komsmã koms b raoodo. D na n yãa a Poll sẽn mao ne yel-kãensã fãa to-to, la kãsem-dãmbã sẽn tõe n dɩk a togs-n-taar to-to.

4. Bõe yĩng tɩ mi n yaa toog ne kãsem-dãmbã tɩ b tõog n lʋɩt taoor koɛɛgã mooneg pʋgẽ?

⁴ Bõe yĩng tɩ pa nana? Kãsem-dãmbã lʋɩta taoor koɛɛgã mooneg pʋgẽ. Rẽ sẽn yãk a toogo, b tara tʋʋm wʋsgo. Wala makre, b lʋɩta taoor Kiris-nebã vɩɩm la b tʋʋma tigissã sasa, la tigingã Biibl zãmsgã sasa. B leb n wɛgsda sõss zãma wã yĩnga. B modgdame me n sõngd kãsem-sõngdbã tɩ b paamd minim, la b kengd b tẽed-n-taasã raoodo. (1 Pɩy. 5:2) Kãsem-dãmb kẽer sõngd n metame la b manesd Rĩungã roto, la siglgã rot a taaba. La wa tigingã neba fãa, tʋʋmd ning sẽn tar yõod ne kãsem-dãmbã n yɩɩd yaa koe-noogã moonego.—Mat. 28:19, 20.

5. Koe-moonegã wɛɛngẽ, mak-sõng bʋg la a Poll kõ-yã?

⁵ A Poll mak-sõngã: Yaa a Poll sẽn yeel bũmb ning Filip rãmb 1:10 pʋgẽ wã n sõng-a n yɩɩda. A yeela beenẽ tɩ d bao n “bãng bũmb nins sẽn tar yõod n yɩɩdã n bake.” A Poll mengã tũu a sẽn yeel bũmb ningã. B ra kõ-a-la tʋʋmde, sẽn yaa koɛɛgã moonego. A tʋma tʋʋm-kãng n kaoose, n da get rẽ me wa bũmb sẽn tar yõod wʋsgo. A ra moonda zãma zĩisẽ, la “zak-zaka.” (Tʋʋ. 20:20) A ra pa yãk wakat kẽere, wall daar a ye bal semen fãa n moond koɛɛgã ye. A ra tũnugda ne segb buud fãa a sẽn paame, n taasd nebã koɛɛgã. Wala makre, a sẽn da wa n gũud a tẽed-n-taasã Atɛnnã, a taasa koe-noogã nin-kãsemse, hal tɩ wom biisi. (Tʋʋ. 17:16, 17, 34) Baa b sẽn wa n ‘balg-a bãensã,’ a moona neb nins sẽn da be beenẽ wã. —Fili. 1:13, 14; Tʋʋ. 28:16-24.

6. Bõe la a Poll maan n sõng neb a taabã, sẽn na yɩl tɩ b paam minim?

⁶ A Poll pa tol n sãam a sẽkã ye. A ra nong n boonda neb a taab tɩ b tũud-a n moond koɛɛgã. Wala makre, a sẽn wa n na n gilg pipi n moon koe-noogã, a kɩtame t’a Mark tũ-a. La a sẽn wa n na n gilg naoor a yiib-n-soabã, yɩɩ a Tɩmote n tũ-a. (Tʋʋ. 12:25; 16:1-4) Sãmbg kae t’a Poll modgame n sõng-b tɩ b bãng b sẽn tõe n lugl tiging to-to, b sẽn tõe n ges b tẽed-n-taasã yell to-to, la b sẽn tõe n paam minim to-to, nebã zãmsgã wɛɛngẽ.—1 Kor. 4:17.

7. Wa Efɛɛz rãmb 6:14, 15 sẽn yetã, wãn to la kãsem-dãmbã tõe n dɩk a Poll togs-n-taare?

⁷ Yam ning kãsem-dãmbã sẽn tõe n dɩke: Kãsem-dãmbã tõe n dɩka a Poll togs-n-taar n moond zak-zaka, la b modgd n tũnugd ne segb buud fãa b sẽn paame, n moond koe-noogã. (Karm-y Efɛɛz rãmb 6:14, 15.) Wala makre, b tõe n moonda koosem zĩisẽ, wall b tʋʋmã zĩigẽ. B sã n  wa sõngd n met siglgã roogo, b tõe n taasa yagsã la te-koaasdbã koɛɛgã. Wa a Polle, koɛɛgã mooneg sasa, kãsem-dãmbã tõe n sõnga neb a taabã tɩ b paam minim, wala makre kãsem-sõngdbã.

8. Wakat ninga, bõe la kãsem-soab segd n maane?

⁸ Kãsem-dãmbã pa segd n bas tɩ tʋʋm nins b sẽn tar tigingã pʋgẽ wã kɩt tɩ b pa le tar sẽk n moond koɛɛgã ye. Sẽn na yɩl n paam sẽk n tʋmd b tʋʋma fãa, wakat ninga b pa segd n sak tʋʋm a taab ye. Naoor wʋsgo, b sã n pʋʋs la b tags neere, b mikdame tɩ b sã n sak tʋʋm kẽere, b pa na n le paam sẽk n maand bũmb nins sẽn tar yõod n yɩɩdã ye. Wala makre, b pa na n tõog n maand b zak pʋgẽ Biibl zãmsgã semen fãa, n moond koɛɛgã wʋsgo, wall n zãmsd b kambã koɛɛgã mooneg ye. Sãnda getame tɩ yaa toog tɩ b zãgs siglgã tʋʋm a taab b sẽn kõ-ba. La b tõe n basa b yam, tɩ b sẽn dat n paam sẽk n maand bũmb nins sẽn tar yõod n yɩɩdã nooma a Zeova.

9. Kãsem-dãmbã tʋʋm sẽn yaa wʋsgã yĩnga, bõe maaneg n tõe n yɩ toog ne-ba?

⁹ Bõe yĩng tɩ pa nana? A Zeova nin-buiidã maooda ne zu-loees toor-toore. D sẽn be yaoolem wakatã, d fãa rata raood kengre, sõngre, la belsgo. Wakat ninga, yaa tɩlɛ tɩ b sõng nina t’a bas a minim-wẽnga. (1 Tes. 5:14) Yaa vẽeneg tɩ kãsem-dãmbã pa tõe tɩ zu-loees nins fãa a Zeova Kaset rãmbã sẽn maood ne wã sa ye. Ne rẽ fãa, a Zeova ratame tɩ kãsem-dãmbã maand b sẽn tõe fãa n kengd a nin-buiidã raoodo, la b kogend-ba. Baa ne kãsem-dãmbã tʋʋm sẽn yaa wʋsgã, bõe la b tõe n maan n paam sẽk n sõngd b tẽed-n-taasã?

10. Sẽn zems ne 1 Tesalonik rãmb 2:7 wã, wãn to la a Poll wilg t’a Zeova nin-buiidã yell pak-a lame?

¹⁰ A Poll mak-sõngã: A Poll ra nong n pẽgda a tẽed-n-taasã la a kengd b raoodo. Yɩta sõma tɩ kãsem-dãmbã rɩk a togs-n-taare, n nong b tẽed-n-taasã la b nand-ba. (Karm-y 1 Tesalonik rãmb 2:7.) A Poll sõnga a tẽed-n-taasã tɩ b bãng t’a nong-b lame, la t’a Zeova me nong-b lame. (2 Kor. 2:4; Efɛ. 2:4, 5) A ra geta tigingã neb wa a zo-rãmba, n da nong n be ne-ba. A ra pelgda a pʋg n togsd-b bũmb ning sẽn kẽesd-a rabeem, la a pãn-komsmã, tɩ wilgdẽ t’a ra kɩs-b-la sɩda. (2 Kor. 7:5; 1 Tɩm. 1:15) La pa a Poll mengã yɛlã n da pak-a n yɩɩd ye. A pʋd n da rata ne a sũur fãa n sõng a tẽed-n-taasã.

11. Bõe yĩng t’a Poll sagl a tẽed-n-taasã?

¹¹ Wakat kẽere, ra yaa tɩlɛ t’a Poll sagl a tẽed-n-taasã. La a zɩ n maan rẽ, a sũur sẽn yik ne-b yĩng ye. A ra sagend-b lame, b yell sẽn da pak-a wã yĩnga, la a sẽn da rat n kogl-bã me yĩnga. A ra modgdame  t’a saglsã võor wʋmb yaa nana, tɩ b tũub me pa toog ye. Wala makre, lɛtr ning a sẽn tool Korẽnt kiris-nebã pʋgẽ, a kõ-b-la sagls sẽn tar pãnga. A sẽn tool-b lɛtrã poore, a tʋma a Tɩt b nengẽ. A Poll ra rat n bãnga b manesem sẽn yɩ to-to ne lɛtrã. La a sũur yɩɩ noog wʋsgo, a sẽn wa n bãng tɩ b sak n tũu a saglsã.—2 Kor. 7:6, 7.

12. Wãn to la kãsem-dãmbã tõe n keng b tẽed-n-taasã tẽeb la b raoodo?

¹² Yam ning kãsem-dãmbã sẽn tõe n dɩke: Kãsem-dãmbã tõe n dɩka a Poll togs-n-taare, n mi n be ne b tẽed-n-taasã. Bũmb a ye sẽn tõe n sõng-b tɩ b maan rẽ yaa b sẽn na n wat tigissã pĩnda, n paamd n sõsd ne b tẽed-n-taasã sõma. Naoor wʋsgo, f tõe n sõsa ne f tẽed-n-taag minit a wãn pʋgẽ bal n keng a raoodo. (Rom. 1:12; Efɛ. 5:16) Kãsem-soab sẽn dɩkd a Poll togs-n-taar tũnugda ne Wẽnnaam Gomdã n kengd a tẽed-n-taasã tẽeb la b raoodo, la a sõngd-b tɩ b bãng tɩ Wẽnnaam nong-b lame. A sõngd-b lame me tɩ b bãng t’a nong-b lame. A nong n sõsda ne-ba, la a modgd n pẽgd-ba. Kãsem-soab sã n wa na n sagl neda, a saglgã segd n tika Wẽnnaam Gomdã zugu. A sẽn dat tɩ b sak n deeg a saglgã yĩnga, saglgã segd n yɩɩ takɩ, la ne bʋgsem.—Gal. 6:1.

13. Kãsem-soab manesem tõe n yɩɩ wãn ne a mengã pãn-komsem?

¹³ Bõe yĩng tɩ pa nana? Kãsem-dãmbã pa zems zãng ye. Wa ned buud fãa, bãmb me mi n kongdame. (Rom. 3:23) Wakat ninga, tõe n yɩɩ toog ne-b tɩ b tall tagsg sẽn zems b pãn-komsmã zugu. Kẽer tagsda b pãn-komsmã yell tɩ loog noore, hal tɩ komsd b raoodo. Sãnda pa get b pãn-komsmã wa yelle, tɩ rẽ kɩt tɩ b pa modgd n na n toeem ye.

14. Wa Filip rãmb 4:13 sẽn wilgdã, wãn to la sik-m-mengã sõng a Poll t’a tõog n mao ne a pãn-komsmã?

¹⁴ A Poll mak-sõngã: A sika a meng n sak n deeg t’a pa tõe n tõog a pãn-komsmã ne a meng pãng ye. Ra yaa tɩlɛ t’a paam tɩ Wẽnnaam sõng-a. Pĩndã, a Poll ra yaa ned sẽn pa wʋmd tʋbre, la sẽn da namsd kiris-nebã b tẽebã yĩnga. La a wa n bãngame t’a zʋgã la a yel-manesmã pa sõma, t’a yãk yam n na n toeeme. (1 Tɩm. 1:12-16) Ne a Zeova sõngre, a wa n lebga kãsem-soab sẽn nong neba, nimbãan-zoɛta, la sik-m-meng soaba. A ra mii a pãn-komsmã, hal tɩ ra namsd-a. La a ra pa tagsd rẽ yell wʋsg ye. Yaa a Zeova sẽn kõt sugrã yell la a ra tagsd n yɩɩda. (Rom. 7:21-25) A ra pa baood n yɩ ned sẽn zems zãng ye. A pʋd n  modgame n bɩɩs zʋg-sõma la a sik a meng n teeg a Zeova, sẽn na yɩl n tõog n tʋm a tʋʋmdã sõma.—1 Kor. 9:27; karm-y Filip rãmb 4:13.

15. Bõe n tõe n sõng kãsem-soab t’a tall tagsg sẽn zemse, a pãn-komsmã zugu?

¹⁵ Yam ning kãsem-dãmbã sẽn tõe n dɩke: B pa yãkd ned t’a lebg kãsem-soaba, a sẽn zems zãng yĩng ye. La a Zeova ratame tɩ kãsem-dãmbã sakd n deegd b kongre, la b modgd n bɩɩsd zʋg-sõma. (Efɛ. 4:23, 24) Kãsem-soab segd n talla Wẽnnaam Gomdã n fees a menga, n bãng zʋgd la yel-manesem nins a sẽn segd n toeemã. Woto, a Zeova na n sõng-a lame t’a paam sũ-noogo, la a tõog me n tʋm a tʋʋmdã sõma.—Zak 1:25.

16. Bõe yĩng tɩ kãsem-soab pa segd n get nebã pãn-komsem n tɩ yɩɩda?

¹⁶ Bõe yĩng tɩ pa nana? Kãsem-dãmbã sẽn nong n naagd b tẽed-n-taasã n maand bũmb kẽerã yĩnga, tõe n yɩɩ nana tɩ b yãt b pãn-komsmã. B sã n pa gũusi, b wat n lebga neb sũy sẽn yikd tao-tao, neb sẽn yaa dem-deme, la sẽn kaood b taabã bʋʋdo. La a Poll keooga kiris-nebã tɩ yaa woto la a Sʋɩtãan rat tɩ b maane.—2 Kor. 2:10, 11.

17. A Poll tagsg ra yaa wãn a tẽed-n-taasã zugu?

¹⁷ A Poll mak-sõngã: A Poll kell n talla yam-sõng a tẽed-n-taasã zugu. A ra miime tɩ b kongdame. Bala wakat ninga, b manesmã ra sãamda a sũur wʋsgo. La a ra miime tɩ ned sã n konge, pa rat n yeel t’a soabã yaa nin-wẽng ye. A ra nonga a tẽed-n-taasã, n da get b zʋg-sõma wã n yɩɩda. Sã n da wa yaa toog ne-b tɩ b maan sẽn yaa tɩrga, a pa ningd-b taal ye. A ra getame tɩ b tara yam-sõngo, la tɩ yaa sõngr bal la b rata.

18. A Poll manesem sẽn yɩ to-to ne a Evodi la a Sẽntiisã sõnga yãmb tɩ y bãng bõe? (Filip rãmbã 4:1-3)

¹⁸ D ges a Poll manesem sẽn yɩ to-to ne saam-bi-pogs a yiib sẽn da be Filip tigingã pʋgẽ. (Karm-y Filip rãmb 4:1-3) Yaa a Evodi ne a Sẽntiis. Wõnda b basame tɩ mo-yõs zĩnd b sʋka, tɩ kɩt tɩ b zoodã sãame. A Poll pa yɩ dem-dem ne-ba, bɩ n ning-b taal ye. A gesa b zʋg-sõma wã n tɩ yɩɩda. B ra yaa wẽn-sakdba, n da tũud a Zeova na maan yʋʋm wʋsgo. A Poll ra miime t’a Zeova nong-b lame. A sẽn da tar tagsg sẽn yaa sõma b zugã kɩtame t’a tõog n sõng-b tɩ b welg b mo-yõsã. A Poll sẽn da get nebã zʋg-sõma wã sõng-a lame t’a kell n tall a sũ-noogã, tɩ yẽ ne tigin-kãng nebã zood me ra ket n tar pãnga.

19. a) Wãn to la kãsem-dãmbã tõe n wilg tɩ b tara tagsg sẽn yaa sõma b tẽed-n-taasã zugu? b) Fotã sẽn bilgd kãsem-soab sẽn naag n na n yẽes Rĩungã roogã sõngda yãmb tɩ y bãng bõe?

¹⁹ Yãm ning kãsem-dãmbã sẽn tõe n dɩke: Kãsem-dãmba, get-y y tẽed-n-taasã  zʋg-sõma wã n tɩ yɩɩda. D fãa pa zems zãng ye. La d ned kam fãa tara zʋg-sõma sẽn sek pẽgre. (Fili. 2:3) Yaa sɩd tɩ wakat ninga kãsem-dãmbã segd n sõnga saam-biig bɩ saam-bi-poak t’a rems a tagsgo. La wa a Polle, kãsem-dãmbã segd n modgame n da get b tẽed-n-taag goam la a yel-manesem sẽn sãamd sũur ye. Yɩta sõma tɩ b ges a soabã sẽn nong a Zeova wã, a sẽn tõogd toog n ket n tũud Wẽnnaamã, la b sẽn tõe n sõng-a t’a maan bũmb ningã. Kãsem-dãmb nins sẽn get b taabã zʋg-sõma wã n yɩɩdã sõngda nin-kãensã tɩ b neẽ tɩ tigingã neb nong-b lame.

20. Bõe la kãsem-dãmbã tõe n maan n paam t’a Poll mak-sõngã ket n nafd-ba?

²⁰ Kãsem-dãmba, bãng-y tɩ y sã n ket n dɩkd a Poll togs-n-taare, na n naf-y-la wʋsgo. Rẽ wɛɛngẽ, y tõe n gesa Index des publications des Témoins de Jéhovah wã pʋgẽ, n gẽes b sẽn gʋlsẽ tɩ “Paul (Saul).” Rẽ poor bɩ y ges b sẽn gʋlsẽ tɩ “exemple pour les anciens” wã. Y sã n wa karemd sõss nins sẽn be be wã, bɩ y sok y meng yaa: ‘Wãn to la a Poll mak-sõngã tõe n sõng-m tɩ m kell n tall m sũ-noogã, la m kell n yɩ kãsem-soab sẽn tʋmd a tʋʋmd sõma?’

21. Kãsem-dãmbã tõe n basa b yam ne bõe?

²¹ Kãsem-dãmba, tẽeg-y t’a Zeova pa kot yãmb tɩ y yɩ neb sẽn zems zãng ye. A ratame tɩ y yɩ neb sẽn maand sɩd ne-a. (1 Kor. 4:2) A Zeova sũur da nooma ne a Poll sẽn da tʋmd wʋsg la a maand sɩd ne-a wã. Yãmb me tõe n basa y yam t’a Zeova sũur nooma ne tʋʋm nins y sẽn tʋmd a siglgã pʋgẽ wã. A pa na n tol n ‘yĩm yãmb tʋʋmdã ne y sẽn wilg tɩ y nonga a yʋʋrã, y sẽn sõng nin-sõamyã wã la y ket n sõngd-bã ye.’—Ebre. 6:10.