1, 2. ¿Ken kinpaleuia tlayekankej tlen okichi apóstol Pablo?

 APÓSTOL Pablo sapanoua okintlasojtlaya tokniuan tlen okichiuayaj ken Cristo (Hech. 20:31). Ik non, nochipa okinpaleuiaya uan tokniuan okitlasojtlayaj. Se tonal tokniuan tlayekankej tlen ochantiayaj Éfeso okimatkej ayakmo keman kitaskiaj Pablo, ik non, opejkej chokaj (Hech. 20:37). Axkan tokniuan tlayekankej kintlasojtlaj tokniuan uan noijki kinpaleuiaj (Filip. 2:16, 17). Pero ualeua kitaj oui seki tlamantli. ¿Tlen uelis kinpaleuis?

² Tlayekankej tlen sapanoua kitekichiuiliaj Jehová, moneki kichiuaskej ken apóstol Pablo (1 Cor. 11:1). Ye noijki okatka tlajtlakole, ik non, omonekiaya mochijchikauas kichiuas tlen kuali (Rom. 7:18-20). Maski otlajyoui nochipa oyolpakiaya. Tla tlayekankej kichiuaj ken Pablo, yolpakiskej kitekichiuiliskej Jehová maski tlajyouiskej. Ma tikitakan ken uelis ijkon kichiuaskej.

3. ¿Tlen timomachtiskej?

³ Axkan timomachtiskej naui tlamantli tlen ualeua kitaj oui tlayekankej. Moneki majxiliskej para tetlapouiskej, moneki majxiliskej para kinyolchikauaskej tokniuan, moneki mochijchikauaskej porque motlapololtiaj uan maski oksekimej motlapololtiaj moneki mochijchikauaskej kitekichiuiliskej Jehová. Timomachtiskej tlen okichi Pablo ijkuak ijkon okipanok uan ken uelis kinpaleuis tlayekankej.

4. ¿Tleka ualeua tlayekankej kitaj oui tetlapouiskej?

⁴ ¿Tleka ualeua oui? Tlayekankej nochipa tetlapouiaj  pero noijki kichiuaj okseki tlamantli. Ualeua tlayekanaj noso tlamachtiaj ijkuak timonechikouaj tlajko semana. Noijki tlamachtiaj itlamian semana, mochijchikauaj kinmachtiaj siervos ministeriales uan kinyolchikauaj tokniuan (1 Ped. 5:2). Sekimej tlayekankej tlapaleuiaj kanin kinchijchiuaj uan kinyektlaliaj kalmej kanin timonechikouaj para tikueyichiuaskej Jehová. Maski ijkon kichiuaj mochijchikauaj tetlapouiaj iuan tokniuan (Mat. 28:19, 20).

5. ¿Ken uelis titetlapouiskej ijkon ken apóstol Pablo?

⁵ ¿Tlen okichi apóstol Pablo? Filipenses 1:10 kiteititia tleka Pablo kuali otetlapoui, ompa kijtoua moneki tikpejpenaskej tlen okachi kuali. Ye okichi tlen okijto, okiluijkej ma tetlapoui iuan ijkon okichi miak xiuitl, ik non, otetlapoui itech ojtli uan tekalijtik (Hech. 20:20). Amo san seki horas otetlapouiaya noso san se tonal itech semana. Se tonal ijkuak okinchixtoka iyolikniuan ompa Atenas, otetlapoui uan sekimej tlen oueyititokaj otlaneltokakej (Hech. 17:16, 17, 34). Noijki otetlapouiaya ijkuak otsaktoka (Filip. 1:13, 14; Hech. 28:16-24).

6. ¿Ken okinpaleui apóstol Pablo oksekimej tokniuan?

⁶ Pablo amo omotonalpolouaya, nochipa okinyoleuaya oksekimej iuan ma tetlapouitij. Ijkuak achto otetlapouito itech seki altepemej okiuikak Juan Marcos uan satepan ijkuak otetlapouito itech okseki altepemej, okiuikak Timoteo (Hech. 12:25; 16:1-4). Okinmachti kuali ma tlayekanakan, ma kinmaluikan tokniuan uan kuali ma tlamachtikan (1 Cor. 4:17).

7. ¿Ken uelis kichiuaskej tlayekankej tlen kijtoua Efesios 6:14, 15?

⁷ ¿Tlen techmachtia? Tlayekankej uelis kichiuaskej ijkon ken apóstol Pablo uan uelis san kanin tetlapouiskej (xiktlajtolti Efesios 6:14, 15). Uelis ijkon kichiuaskej ijkuak motlakouitiuij noso kanin tekipanouaj. Tla tlapaleuijtokej itech se kali kanin timonechikouaj, uelis kintlapouiskej akinmej ik ompa chantij uan akinmej tlanemakaj. Ijkon ken okichi apóstol Pablo, ijkuak tetlapouiaj uelis kinmachtiskej siervos ministeriales.

8. ¿Ualeua tlen moneki kichiuaskej tlayekankej?

⁸ Maski tlayekankej tlapaleuiaj kanin monechikouaj uan itech circuito,  moneki majxiliskej tetlapouiskej. Achto monekis motlatlaujtiskej para ijkon kitaskej kox uelis kichiuaskej seki tekitl. Ijkon uelis momachtiskej iuan infamilia nochi semanas uan uelis tetlapouiskej uan kinmachtiskej inkoneuan ken tetlapouiskej. Sekimej kitaskej oui amo kiseliskej seki tekitl pero moneki kilnamikiskej tlen Jehová okachi kipatioita.

9. ¿Tlen moneki kichiuaskej tlayekankej maski kipiaj miak tekitl?

⁹ ¿Tleka oui? Tikatej itlamian tonalmej, ik non, tiitekipanojkauan Jehová titlajyouiaj uan tiknekij ma techyolchikauakan uan ma techyolseuikan. Sekimej moneki kinpaleuiskej para amo tlajtlakolchiuaskej (1 Tes. 5:14). Tlayekankej amo uelis kichiuaskej ayakmo ma tlajyouikan tokniuan pero Jehová kineki ma mochijchikauakan ma kinyolchikauakan uan ma kinmaluikan. Maski kipiaj miak tekitl, ¿tlen kinpaleuis ma majxilikan para kinpaleuiskej tokniuan?

10. Ijkon ken kijtoua 1 Tesalonicenses 2:7, ¿ken apóstol Pablo okinpaleui tokniuan?

¹⁰ ¿Tlen okichi apóstol Pablo? Ye nochipa okinyolchika uan okinpaleui tokniuan. Tlayekankej moneki ijkon kichiuaskej uan moneki kintlasojtlaskej tokniuan (xiktlajtolti 1 Tesalonicenses 2:7). Pablo okinmilui tokniuan okintlasojtlaya uan noijki Jehová okintlasojtlaya (2 Cor. 2:4; Efes. 2:4, 5). Ye inmiuan okatka uan kuali inmiuan omouikaya, okinneltokiliaya, ik non, okintlapouiaya ken okatka uan ken omomachiliaya (2 Cor. 7:5; 1 Tim. 1:15). Maski Pablo otlajyouiaya okinpaleuiaya tokniuan.

11. ¿Tleka apóstol Pablo okinyektlali tokniuan?

¹¹ Ualeua apóstol Pablo okinyektlaliaya tokniuan ijkuak itlaj amo kuali okichijtokaj pero amo okinmajuaya, ye melauak okinekiaya kinpaleuis para amo ma tlajyouikan. Okintlapoui amo oui para ma kajsikamatikan uan okinekiaya ma kiselikan tlen okintlapouiaya. Ma tikitakan ken okichi. Ijkuak okintlajkuilili tokniuan tlen ochantiayaj Corinto, okinmilui tlen omonekiaya kichiuaskej. Satepan okititlanki Tito para kitaskia kox okiselijkej tlen okintlajkuilili. Sapanoua oyolpakik ijkuak okimatki kema ijkon okichijkej (2 Cor. 7:6, 7).

12. ¿Tlen uelis kichiuaskej tlayekankej para kinyolchikauaskej tokniuan?

¹² ¿Tlen techmachtia? Tlayekankej uelis  kichiuaskej ijkon ken apóstol Pablo para kinyolchikauaskej tokniuan. Uelis ijkon kichiuaskej tla ajsitiuij ok kualkan ijkuak monechikoskej, ijkon uelis inmiuan motlapouiskej uan kinyolchikauaskej. Maski amo uejkauaskej inmiuan motlapouiskej uelis kinyolchikauaskej uan kinmititiskej kintlasojtlaj (Rom. 1:12; Efes. 5:16). Tlayekankej kichiuaj ijkon ken Pablo, ijkuak kiyektlaliaj se tokni ijkon ken kijtoua Biblia. Noijki kititiaj kitlasojtlaj ijkuak iuan motlapouiaj uan kiluiaj tlen kuali kichiua. Tla se tlayekanki moneki kiyektlalis se tokni, moneki kititis tlen kijtoua Biblia. Maski kiluis tlen moneki kichiuas, moneki kitlakaitas, ijkon ye kinekis kichiuas tlen kiluis (Gál. 6:1).

13. ¿Ken momachiliaj tlayekankej porque noijki motlapololtiaj?

¹³ ¿Tleka oui? Tlayekankej noijki tlajtlakolejkej, ik non, motlapololtiaj (Rom. 3:23). Ualeua moneki mochijchikauaskej para mokuayejyekoskej ken moneki. Ualeua sekimej xamo amo kuali momachiliaj porque noijki motlapololtiaj pero oksekimej mokuayejyekouaj nochi kuali kichiuaj uan amo moneki itlaj kipatlaskej.

14. Ijkon ken kijtoua Filipenses 4:13, ¿tlen okipaleui apóstol Pablo ma yeto yolyamanki?

¹⁴ ¿Tlen okichi apóstol Pablo? Ye okimatiaya amo uelis iselti kiyektlaliskia tlen okichiuaya ijkuak omotlapololtiaya, okimatiaya san toTajtsin Dios uelis kipaleuiskia. Yiuejkika okintlajyouilti tokniuan pero satepan okitak amo kuali tlen okichiuaya uan ayakmo ijkon okichi (1 Tim. 1:12-16). Jehová okipaleui ma yeto yolyamanki, okinyolchika tokniuan uan oteiknomatki. Maski amo kuali omomachiliaya ijkuak omotlapololtiaya, okimatiaya Jehová kitlapojpoluiskia uan non okipaleui ayakmo ma mokuayejyekojto tlen amo kuali (Rom. 7:21-25). Maski okatka tlajtlakole, omochijchika nochipa kichiuas tlen kuali uan okikauili Jehová ma kipaleui para ma kitekichiuili (1 Cor. 9:27; xiktlajtolti Filipenses 4:13).

15. ¿Tlen kinpaleuis tlayekankej?

¹⁵ ¿Tlen techmachtia? Jehová kinkauilia tlayekankej ma tlapaleuikan kanin  monechikouaj. Maski tlajtlakolejkej ye kineki ma kajsikamatikan ijkuak motlapololtiaj uan ma kipiakan innemilis ken Jehová kineki (Efes. 4:23, 24). Moneki momachtiskej Biblia para kitaskej tlen moneki kipatlaskej itech innemilis. Ijkon Jehová kinpaleuis ma yolpakikan uan okachi kuali ma kitekichiuilikan (Sant. 1:25).

16. ¿Tlen uelis kinpanos tlayekankej tla san kitaj motlapololtiaj tokniuan?

¹⁶ ¿Tleka oui? Xamo tlayekankej ijkuak san sekan mopaleuiaj iuan tokniuan, kitaj motlapololtiaj. Tla amo momaluiaj, san niman mosotlauaskej, kualaniskej noso kinteneuaskej. Apóstol Pablo okinmilui tokniuan ijkon kineki Satanás ma kichiuakan (2 Cor. 2:10, 11).

17. ¿Ken okinmitaya apóstol Pablo tokniuan?

¹⁷ ¿Tlen okichi apóstol Pablo? Ye nochipa omokuayejyeko kuali tlen okichiuayaj tokniuan. Okimatiaya omotlapololtiayaj uan tlen okichiuayaj okiyolkokouaya pero okimatiaya akinmej omotlapololtiayaj uan akinmej san okinekiayaj kichiuaskej tlen amo kuali. Okintlasojtlaya tokniuan, ik non, okitaya tlen kuali okichiuayaj uan tla okitaya se tokni omochijchikauaya, apóstol Pablo omokuayejyekouaya non tokni okinekiaya kichiuas tlen kuali, ik non san omonekiaya ma kipaleuikan.

18. ¿Tlen techmachtia apóstol Pablo ijkuak okinpaleui Evodia uan Síntique? (Filipenses 4:1-3).

¹⁸ Ma tikitakan ken okinpaleui Pablo ome tokniuan tlen ochantiayaj ompa Filipos (xiktlajtolti Filipenses 4:1-3). Evodia uan Síntique amo kuali omouikayaj. Pero Pablo amo okinmajuak, okintlakaitak ijkuak okintlapoui uan okitak tlen kuali okichiuayaj. Noijki okimatiaya Jehová okintlasojtlaya, ik non, okinpaleui oksepa kuali ma mouikakan. Tlen okichi okipaleui nochipa ma yolpaki uan kuali ma mouika iuan tokniuan.

19. (1) ¿Tlen kinpaleuis tlayekankej ma kitakan tlen kuali kichiuaj tokniuan? (2) ¿Tlen mitsmachtia foto kanin mota se tokni tlachipaua ijkuak monechikoua?

¹⁹ ¿Tlen techmachtia? Tlayekankej ximochijchikauakan xikitakan tlen kuali kichiuaj tokniuan maski motlapololtiaj (Filip. 2:3). Tla monekis nankiyektlaliskej se tokni, xikchiuakan ken Pablo. Maski nankitaskej tlen amo kuali kichiua,  xikitakan ken kitlasojtla Jehová, kitekichiuilia maski kipanoua miak tlamantli uan ken uelis okachi kuali kitekichiuilis. Ijkuak tlayekankej kitaj tlen kuali kichiuaj tokniuan, kinpaleuiaj ma motlasojtlakan uan kuali ma mouikakan.

20. ¿Tlen kinpaleuis tlayekankej ma kichiuakan ken apóstol Pablo?

²⁰ Tlayekankej uelis kinpaleuis tla okachi momachtiaj tlen okichi apóstol Pablo. Uelis momachtiskej amatlajkuilol Índice de las publicaciones Watch Tower, kanin kijtoua “Pablo”, “ejemplo para los ancianos”. Ijkuak momachtiskej tlen ompa kijtoua uelis motlajtlaniskej: “¿Ken nechpaleuia tlen okichi apóstol Pablo ma niyolpaki nitlapaleuijtos ken tlayekanki?”.

21. ¿Tlen moneki kineltokaskej tlayekankej?

²¹ Tlayekankej xikilnamikikan Jehová kimati amo nochipa nankichiuaskej tlen moneki pero ye kineki nochipa xiktlakamatikan (1 Cor. 4:2). Ye okipatioitak nochi tlen okichi apóstol Pablo, ik non, xikneltokakan Jehová kipatioita tlen nankichiuaj. Hebreos 6:10 kijtoua: “ToTajtsin Dios yolmelauak, ik non, amo kilkauas tlen onankichijkej uan onankiteititijkej nankitlasojtlaj itoka porque onankinpaleuijkej uan nankinpaleuijtokej akinmej santos” (Heb. 6:10, TNM).