1-2. Muezaniso wo mupostori Pauro ungabeseresa kudini vakuru nyamasi uno?

 MUPOSTORI Pauro waida maningi hama jake. Iyena wakashanda ngo simba kuti avakorondhe. (Mabasa o Vapostori 20:31) Inga muviyo, hama jakakhombijavo kuti jaida maningi Pauro. Pa vhaza imweni, vakuru vo ku Efeso povakaziva kuti avacaizovonazve Pauro, ivona “vakacema maningi.” (Mabasa o Vapostori 20:37) Vakuru vanodavo maningi hama no hambzaji javo, zvovaita kuti vaite zvese zvavanokwanisa kuti vavabesere. (Vafiripi 2:16, 17) Asi nguva jimweni, vakuru vanosongana no zvineso. Ngozvapi zvavangaita kuti vanyise zvineso zvondhozvo?

² Vakuru vangabesereka maningi ngo kuvona muezaniso wa Pauro. (1 Vakorinte 11:1) Pauro aacaengepi mundhu waiezana no ngirozi. Iyena wainga mundhu acikazivi kukwana, nguva jimweni waitohwisana kuti aite zvakanaka. (Varoma 7:18-20) Iyena wainga no zvineso zvakawanda. Asi aazivi kuremba nee kuruza mudakaro wake. Ngo kutevejera muezaniso wo mupostori Pauro, vakuru vangakwanisa kunyisa zvineso zvavo no kwenderera mberi vano mudakaro pavanonga vecishandira Jehovha. Ngatende tivone kuti vangazviitisa kudini?

3. Ngozvapi zvatinozovona pa musoro uwu? Zvondhozvo zvinozotibesera kuti tiitenyi?

³ Pa musoro uwu tinozovona zvineso zvirongomuna zvinosongana no vakuru. (1) Kuwana nguva kuti vacumaere no kuita mabasa amweni ovakagajwa, (2) kuva muhavisi waushoni, (3) kuhwisana no zvineso zvo mundhu ega, no (4) kuhwisana no kutama kukwana ko vamweni. Tinozovona kuti mupostori Pauro wakahwisana kudini no cineso cimwe nga cimwe no kuvonazve kuti vakuru vangatevejeresa kudini muezaniso wake.

4. Ngenyi nguva jimweni zvinganesa maningi kuti vakuru vagaje muezaniso waushoni pa kucumaera?

⁴ Ngenyi ici cingava cineso? Vakuru vano mabasa akawanda maningi kusiyapo basi kutungamirira pa basa ro kucumaera. Inga muezaniso, vazinji vavo vanodikana kutungamirira musongano jinoitwa pakati po sumana no kuitisa Jijo yo Bhaibheri yo Ungano. Ivona vanodikanazve kunasirira hurukuru javanodikana kuita. Vanazve basa ro kuroveja vabeseri vo ungano. Basa rimwenizve rovanaro, ngo ro kuvangisa hama no hambzaji javo. (1 Pedhru 5:2) vakuru vamweni vanoshanda pa basa ro kuvaka no kunasirira-nasirira Nyumba jo kunamatira no nyumba jimweni jinoshandiswa ngo sangano ra Jehovha. Pikija zvakadaro, mukuezana no vese mu ungano, basa rinosisira maningi rinodikana kuitwa ngo vakuru ikucumaera masoko akanaka.—Mateu 28:19, 20.

5. Pauro wakagaja muezaniso wapi inga mucumaeri?

⁵ Muezaniso wa Pauro. Pana Vafiripi 1:10, Pauro anotivhunja ciro caimuita kuti abudirire inga mucumaeri, paakati: Zivanyi kuti “ngozvapi zvinosisira maningi.” Pauro wakanasa kutevera ngwajo iyi pacake. Iyena wainga akagajwa kuti ave mucumaeri. Ko makore akawanda, kucumaera masoko akanaka kwakava ciro cinosisira maningi mu upenyu hwake. Iyena wakacumaera ‘pambhene no nyumba ngo nyumba.’ (Mabasa o Vapostori 20:20) Iyena aacaigaja nguva pa njiku kuti acumaere kana kugaja njiku pa sumana kuti aite zvondhozvo. Waishandisa mukana wese waaiva nawo kuti acumaere. Inga muezaniso, paainga ecivetera vadoni vake mu Atena, wakatanga kucumaera masoko akanaka ku vagari vo mu nyikemo. Vamweni vavo vakatodakarira. (Mabasa o Vapostori 17:16, 17, 34) Pikija wainga ‘akasungwa’ iyena wakacumaera vandhu vainga mondhomo.—Vafiripi 1:13, 14; Mabasa o Vapostori 28:16-24.

6. Pauro wakajijisa vamweni kuti vaitenyi?

⁶ Pauro wainasa kushandisa ushoni nguva yake. Kazinji iyena waikoka vandhu vamweni kuti aende kocumaera navo. Inga muezaniso, pa hwendo hwake hwokutanga inga misiyonariyo, iyena wakaenda na Johani waidanijwa Marko. Pa hwendo hwake hwocipiri, wakaenda na Timoti. (Mabasa o Vapostori 12:25; 16:1-4) Pacina kukana-kana, Pauro wakajijisa vanarume ava marongehwe aiitwa ungano, manera avaidikana kuita basa ro kuhavisa no kuva vajijisi vaushoni.—1 Vakorinte 4:17.

7. Vakuru vangatevejeresa kudini zvakananga Pauro pana Vaefeso 6:14, 15?

⁷ Cijijo. Vakuru vangatevejera muezaniso wo mupostori Pauro kuciripi basi pavanonga vecicumaera nyumba ngo nyumba, asi  ngo kushandisa mukana wese wovanova nawo kuti vape ucapupu. (Verenganyi Vaefeso 6:14, 15.) Inga muezaniso, ivona vangakwanisa kucumaera pavanonga vari kubazari kana vacitoita mabasa avo. Cimwenizve, pavanonga vecivaka Nyumba jo Umambo, ivona vangacumaera kuno vandhu vanogara phedopo kana vandhu vanonga vecitengesa zviro. Inga ndi Pauro, vakuru vangashandisa nguva yavo pavanonga mu basa ro kucumaera kuti varoveje vamweni, kubatanijavo vabeseri vo ungano.

8. Ngozvapi zvingatodikana kuitwa ngo vakuru nguva jimweni?

⁸ Vakuru avadikani kubatikana maningi pa mabasa ovakagajwa mu ungano kana mu ndharaundha, zvoita kuti vatame kuwana nguva yo kucumaera. Kuti vakwanise kuwana nguva yo kuita mabasa amweni, ivona nguva jimweni vangatodikana kuramba mabasa amweni ovanogajwa. Pakupera kuita mukumbiro no kurangarijisisa ngo pamusoro pazvo, ivona vangazwisisa kuti kudari vakatendera basa rese rovanopuwa, avazokwanisi kuita zviro zvinosisira maningi, zvakadari inga kuitisa kunamata ko mbhuri, kupeja nguva yakawanda mu basa ro kucumaera no kujijisa vana vavo kuti vaite basa iri. Vamweni vanovona zvecinesa kuramba mabasa amweni ovanopuwa. Asi vangava no cokwadi co kuti Jehovha anozwisisa cido cavo co kuda kuva vandhu vakaezanana pa zviro zvese.

9. Ngocapi ciro cinonesa kuti vakuru vaite, zvecivoneka kuti ivona vakabatikana maningi?

⁹ Ngenyi ici cingava cineso? Vashandiri va Jehovha vari kusongana no zvineso zvakawanda. Mu njiku jino jo kupejisira, tese tinoda kuvangiswa, kubeswa no kuembezehwa. Nguva jimweni, vamweni vanoda kubesehwa kuti vatame kuita zvakashata. (1 Vatesaronika 5:14) Zvokadi kamare, vakuru avangakwanisi kupeja zvineso zvese zviri kusongana no vandhu va Jehovha nyamasi uno. Pikija zvakadaro, Jehovha anoda kuti ivona vaite zvese zvavanokwanisa kuti vavangise no kujivirira mavhuta ake. Waro, zvecivoneka kuti vakuru vakabatikana maningi, vangaiwanira kwapi nguva kuti vabesere hama no hambzaji?

10. Mukuzwirana no 1 Vatesaronika 2:7, Pauro waitajisa kudini vandhu va Jehovha?

¹⁰ Muezaniso wa Pauro. Pauro waipsaka njira jo kusimba hama jake no kujivangisa. Vakuru vanoitavo zvaushoni ngo kutevejera muezaniso wa Pauro ngo kutaja hama javo ngo njira yo rudo no kunaka mwoyo. (Verenganyi 1 Vatesaronika 2:7.) Pauro wakavhunja hama no hambzaji jake kuti iyena pamwepo na Jehovha anovada maningi. (2 Vakorinte 2:4; Vaefeso 2:4, 5) Iyena waitaja vese vainga mu ungano inga shamwari, ecipeja nguva na ivona. Wakavonesa kuti waivathemba ngo kuvavhunja zviro zvaimuita kuti athimwe-thimwe. (2 Vakorinte 7:5; 1 Timoti 1:15) Asi  Pauro aacaibatikana pa zvineso zvake. Iyena waida kubesera hama jake.

11. Ngenyi Pauro wakapangira hama no hambzaji jake?

¹¹ Nguva jimweni Pauro wakadikana kupangira hama no hambzaji jake. Asi iyena aazivi kuita zvondhozvo ngokuti wainga akanyangajwa. Wakavapangira ngokuti waida kuti ivona vagare ushoni no kuda kuvajivirira pa ngozi javaizosongana najo. Iyena waieja kuita kuti mbhangiro jake jireruke kuzwisisa no kujitendera ngo kukasika. Inga muezaniso, pa karata yaakatara ku Vakorinte, Pauro wakapa mbhangiro yakavanga maningi. Asi paakapera kutara karata iyi, iyena wakatumira Tito. Pauro waida kuziva kuti ivona vakaashirisa kudini karata iyi. Wakadakara maningi paakaziva kuti ivona vakashandisa mbhangiro yaakavapaya.—2 Vakorinte 7:6, 7.

12. Vakuru vangavangisa kudini hama no hambzaji javo?

¹² Cijijo. Vakuru vangatevejera muezaniso wa Pauro ngo kupeja nguva yakawanda no hama no hambzaji javo. Njira imwe yo kuita zvondhozvo, ngo yo kukasika kuguma pa musongano jo ungano kuti vakwanise kubhuya no vamweni. Kazinji zvinoda museswa munganani basi kuti tikwanise kuvangisa hama no hambzaji jedu. (Varoma 1:12; Vaefeso 5:16) Mukuru anotevera muezaniso wa Pauro anotevera hama no hambzaji jake ecishandisa Soko ra Mwari no kuvavangisa kuti Mwari anovada maningi. Cimwenizve, iyena anovonesa rudo hwake kwavari ngo kuvataja ushoni. Anobhuya navo mukuvo wese no kupsaka mukana wo kuvasimba. Mukuru paanoda kupa mbhangiro anodikana kushandisa Soko ra Mwari. Iyena anonasa kujekasa kamare zvaanongaro ecinanga ngokuti anoda kuti hama no hambzaji jake jishandise mbhangiro yake.—Vagaratiya 6:1.

13. Vakuru vangajizwa kudini ngo ndava yo kurembejeka kwavo?

¹³ Ngenyi ici cingava cineso? Vakuru avazivi kukwana. Kudari inga itusu tese, ivona vanoposavo. (Varoma 3:23) Nguva jimweni, vanonesehwa maningi kuti vave no mavonero akaezanana ngo pamusoro po kurembejeka kwavo. Vamweni vangabatikana maningi pa zviya zvavacikakwanisi kuita, zvoita kuti vagume pa kusuruvara. Vamweni vanorangarira kuti zvovanoposa azvisisiri maningi, zvoita kuti vatame kuita cinjo jinodikana.

14. Mukuzwirana no Vafiripi 4:13, kujidodokesa ka Pauro kwakamubeseresa kudini kuti anyise kurembejeka kwake?

¹⁴ Muezaniso wa Pauro. Zvecivoneka kuti Pauro wainga mundhu waijidodokesa, iyena wakazwisisa kuti aacaizokwanisa kuhwisana no kurembejeka kwake naari ega. Iyena waida simba raivha kuna Mwari. Pakutanga Pauro wainga mundhu waivangisira maningi pa kuteverera Makristu. Asi pakupejisira,  wakazwisisa kuti zvaaingaya eciita zvainga zvakashata, wova no cido cokucinja undhu hwake. (1 Timoti 1:12-16) Ngo besero ra Jehovha, Pauro wakaguma pa kuva muhavisi ano rudo, ano usizi no anojidodokesa. Iyena waisuruvara maningi ngo zvaaingaya akaita. Kusiyapo kubatikana pa zviro zvaaingaya akaita Pauro wakathemba kuti Jehovha wainga amuregerera. (Varoma 7:21-25) Iyena acaivetera kuti ave mundhu wakakwana. Kusiyapo zvondhozvo, wakashanda ngo simba kuti aitise nane undhu hwake hwo Cikristu no kujidodokesa kwese ecithemba kuti Jehovha waizomubesera kukwanirisa basa rake.—1 Vakorinte 9:27; verenganyi Vafiripi 4:13.

15. Mukuru angaitisa kudini kuti agume pa kujivona mu njira yakaezanana?

¹⁵ Cijijo. Vakuru avagajwi ngokuti ivona vakakwana. Jehovha anovetera kuti ivona vanange zvavanoposa no kuva no mugariro jo Cikristu. (Vaefeso 4:23, 24) Mukuru anodikana kushandisa Soko ra Mwari kuti akwanise kuvona paanodikana kuitisa nane no kuita cinjo jinodikana. Perapo Jehovha anozomubesera kuti ave no mudakaro no kukwanisa kubudirira.—Jakobo 1:25.

16. Ngozvapi zvaizoitika kudari vakuru vakabatikana maningi pa kutama kukwana ko vamweni?

¹⁶ Ngenyi ici cingava cineso? Vakuru pavanopeja nguva yakawanda no hama no hambzaji javo mu ungano, zvinoreruka maningi kuti vavone kutama kukwana ko vandhu ava. Asi kudari vakatama kungwarira vakuru vangakasika kunyangajwa, kuva no hasha no kuva vandhu vanotonga vamweni. Pauro wakangwaja Makristu kuti Sathana anoda kuti ivona vaite zvondhozvo.—2 Vakorinte 2:10, 11.

17. Pauro waivona kudini hama no hambzaji jake?

¹⁷ Muezaniso wa Pauro. Nguva jese Pauro wairangarira zviro zvaushoni ngo pamusoro po hama no hambzaji jake. Iyena waiziva kuti ivona vaiposa, ngokuti nguva jimweni zvavaiita zvaimupsasa kamare. Asi iyena waiziva kuti pikija ivona vaiposa, azvicaireva kuti vainga vandhu vakashata. Waida maningi hama no hambzaji jake no kubatikana pa mugariro javo jaushoni. Paaivona kuti ivona vainesehwa kuita zvaushoni, iyena wairangarira kuti vanoda kuzviita asi vanoda besero basi.

18. Ngozvapi zvamajija ngo manera Pauro wakataja Evhodhiya na Sintike pikija no zvineso zvavainga nazvo? (Vafiripi 4:1-3)

¹⁸ Inga muezaniso, vonanyi kuti Pauro wakatajisa kudini hambzaji mbiri jo ungano yo Firipo. (Verenganyi Vafiripi 4:1-3.) Zvinovoneka inga kuti Evhodhiya na Sintike vainga vacikazwani, zvoita kuti vatame kuva shamwari. Pauro aazivi kuvatonga asi wakabatikana pa mugariro javo jaushoni. Hambzaji iji jakagondeka jainga jecishandira Jehovha ko makore akawanda. Iyena waiziva kuti Jehovha waijida maningi. Pauro waijivona ngo njira yaushoni, wojivangisa kuti jibhuisane  no kupeja zvineso zvajo. Zvecivoneka kuti Pauro waibatikana ngo mugariro jaushoni jo vamweni, wakakwanisa kwenderera mberi ano mudakaro no kuramba ano ushamwari hwaushoni no vamweni mu ungano.

19. (a) Vakuru vangaitisa kudini kuti vavone zviro zvaushoni zvinoitwa ngo hama no hambzaji javo? (b) Ngozvapi zvamajija ngo foto inovonesa mukuru ari kucenesa Nyumba yo Umambo?

¹⁹ Cijijo. Vakuru vanobatikana maningi pa mugariro jaushoni jina hama no hambzaji. Tese atizivi kukwana, asi umwe nga umwe wedu ano mugariro jaushoni jatingavona. (Vafiripi 2:3) Zvokadi kamare, nguva jimweni vakuru vanodikana kupa mbhangiro hama no hambzaji javo. Inga ndi Pauro, vakuru vanodikana kuvangisira kuti vatame kusotesesa maningi zviro zvakashata zvinoitwa ngo vamweni. Kusiyapo zvondhozvo, vanodikana kubatikana maningi pa rudo una Jehovha, kucungirira kwavari kuita pa kumushandira no kukwanisa kwavo kuita zviro zvaushoni. Vakuru vanosotesesa mugariro jaushoni jino vamweni, vanobesera vese vari mu ungano kuti vajizwe kuti vanodiwa.

20. Vakuru vangabesereka kudini kudari vakaenderera mberi vecijija ngo muezaniso wa Pauro?

²⁰ Vakuru munozobesereka maningi ngo kwenderera mberi mecijija ngo muezaniso wa Pauro. Inga muezaniso, mu bhuku Índice das Publicações da Torre de Vigia, munowana cimusoro cinoti, “Pauro” moendazve pa cimusoro cimweni cinoti, “Muezaniso kuitira vakuru.” Pamunonga meciverenga masoko anowanika mondhomo, mungajivhunjisa kudari, ‘Muezaniso wa Pauro ungandibeseresa kudini kuti ndienderere mberi ndakadakara pandinonga ndeciita basa rangu inga mukuru?’

21. Vakuru vangava no cokwadi cenyi?

²¹ Vakuru ceukijanyi kuti Jehovha aaripi kumukumbira kuti muve makakwana, asi anoda kuti muenderere mberi makagondeka. (1 Vakorinte 4:2) Jehovha wakadakara maningi ngo basa rakaitwa ndi Pauro no kugondeka kwake. Mungavavo no cokwadi co kuti Mwari anoreremeja maningi basa ramuri kuita. Jehovha narini aazokanganwi “basa renyu no rudo hwamakakhombija ku zina rake, ngo kushandira vakasanwa no kuenderera mberi mecivashandira.”—Vahebheru 6:10.