1-2. Oshiholelwa shomuyapostoli Paulus otashi vulu ngiini okukwathela aakuluntugongalo kunena?

 OMUYAPOSTOLI Paulus okwa li e hole aamwahe, nokwa li ha longo nuudhiginini e ya kwathele. (Iil. 20:31) Shoka osha ningitha wo nayo ya kale ye mu hole noonkondo. Pompito yimwe, aakuluntugongalo yokuEfeso oya li ya “lili” sho ya uvu kutya Paulus itaye ke mu mona we. (Iil. 20:37) Aakuluntugongalo kunena nayo oye hole aamwatate naamwameme noonkondo nohaya ningi ngaashi taya vulu ye ya kwathele. (Fil. 2:16, 17) Ihe omathimbo gamwe ohaye shi mono oshidhigu okuninga kehe shimwe shoka ye na okuninga. Oshike tashi vulu oku ya kwathela ya ninge iinima mbyoka?

² Aakuluntugongalo otaya vulu okutala koshiholelwa shaPaulus. (1 Kor. 11:1) Paulus ka li a fa omuyengeli. Naye oka li a gwanenena, nomathimbo gamwe okwa li he shi mono oshidhigu okuninga shoka shi li mondjila. (Rom. 7:18-20) Okwa li wo e na omaupyakadhi gi ili nogi ili. Ihe ina sa uunye nenge a kanithe enyanyu lye. Ngele aakuluntugongalo oya kala haya holele Paulus, otaya ka vula okuninga iinima mbyoka haya mono oshidhigu okuninga notaya ka tsikila okukala ya nyanyukwa sho taya longele Jehova. Natu ka taleni kutya oye na oku shi enda ngiini.

3. Oshike tatu ka kundathana moshitopolwa shika, notashi ke tu kwathela tu ninge shike?

³ Moshitopolwa shika, otatu ka konakona iinima ine mbyono aakuluntugongalo haya mono unene oshidhigu okuninga: (1) okukala ye na ethimbo lya gwana lyokuuvitha nolyokulonga iilonga yilwe, (2) okumona ethimbo lyokutsa aamwatate naamwameme omukumo, (3) okuungaunga nokwaagwanenena kwawo, nosho wo (4) okuungaunga nokwaagwanenena kwayalwe. Otatu ka tala shono sha kwathele omuyapostoli Paulus a ninge iinima mbyoka, nankene aakuluntugongalo taya vulu oku mu holela.

4. Omolwashike aakuluntugongalo tashi vulika ye shi mone oshidhigu okukwatela komeho miilonga yokuuvitha?

⁴ Omolwashike hashi vulu okukala oshidhigu? Kakele kokukwatela komeho iilonga yokuuvitha, aakuluntugongalo oye na iinakugwanithwa oyindji. Pashiholelwa, oyendji ohaya ningi omalufo gokukwatela komeho okugongalo kwomokati koshiwike nokuninga Ekonakonombiimbeli lyEgongalo. Ohaya gandja wo iipopiwa yomontaneho. Shimwe ishewe, ohaya dheula aayakuligongalo nohaya tsu omukumo aamwatate naamwameme. (1 Pet. 5:2) Aakuluntugongalo yamwe ohaya longo miilonga yokutunga noyokukaleka Iinyanga yUukwaniilwa nomatungo galwe gehangano monkalo ombwanawa. Ihe ngaashi owala ayehe megongalo, iilonga mbyoka ya simanenena komukuluntugongalo kehe, okuuvitha onkundana ombwanawa. — Mat. 28:19, 20.

5. Paulus okwe tu tulila po oshiholelwa shini kombinga yokuuvitha?

⁵ Oshiholelwa shaPaulus. Oshinima shono sha li sha kwathele Paulus a pondole oshi li mAafilippi 1:10, moka e tu ladhipike a ti: ‘Yoololeni iinima mbyoka yi na oshilonga unene.’ Paulus okwa li a tula miilonga omayele ngoka. Okwa li a pewa oshinakugwanithwa shokuuvitha, nuule womimvo odhindji okwa li a tala ko oshinakugwanithwa shoka kutya osha simana unene. Okwa li ha uvitha ‘momagumbo.’ (Iil. 20:20) Kali owala ha uvitha pethimbo limwe nenge esiku owala limwe moshiwike, ihe okwa li ha uvithile aantu kehe pamwe nopompito kehe! Pashiholelwa, sho a li a tegelela aamwahe muAtena, okwa li a uvithile aantu yamwe ya simana onkundana ombwanawa, nayamwe yomuyo oya li ya pulakene ketumwalaka lye. (Iil. 17:16, 17, 34) Shimwe ishewe, sho a li “mondholongo,” Paulus okwa li a uvithile aantu mboka ya li puye. — Fil. 1:13, 14; Iil. 28:16-24.

6. Paulus okwa li a gandja edheulo lini kuyalwe?

⁶ Paulus okwa li ha longitha ethimbo lye nawa. Olundji okwa li ha pula yalwe ya ye naye miilonga yokuuvitha. Pashiholelwa, miilonga ye yotango yuuyendi okwa li a kutha Johannes ngoka hi ithanwa wo Markus, nomolweendo lwe olutiyali, okwa kutha Timoteus. (Iil. 12:25; 16:1-4) Kapu na omalimbililo kutya Paulus okwa li a ningi ngaashi ta vulu a longe aalumentu mboka ya kale ye shi okuunganeka egongalo, okuninga omatalelopo guusita, nokulonga nawa yalwe onkundana ombwanawa. — 1 Kor. 4:17.

7. Ongiini aakuluntugongalo taya vulu okuninga shoka sha popiwa kuPaulus mAaefeso 6:14, 15?

⁷ Oshiilongomwa. Aakuluntugongalo otaya vulu okuholela Paulus mokuuvitha egumbo negumbo, ihe nokuuvithila wo aantu kehe pamwe nopethimbo kehe ngele otashi wapa. (Lesha Aaefeso 6:14, 15.) Pashiholelwa, otaya vulu okugandja uunzapo uuna taya landa iinima nenge ngele ye li kiilonga. Uuna taya kutha ombinga miilonga yokutunga omatungo gehangano, otaya vulu wo  okuuvithila aantu yopopepi naamboka haye ya landitha iinima. Ngaashi Paulus, aakuluntugongalo otaya vulu okulongitha ethimbo lyawo miilonga yokuuvitha ya dheule yalwe, mwa kwatelwa aayakuligongalo.

8. Omathimbo gamwe aakuluntugongalo oya pumbwa okuninga shike?

⁸ Aakuluntugongalo kaye na okukala unene yi ipyakidhila niinakugwanithwa yawo yomegongalo nenge yomoshikandjo shawo e taya kala kaaye na ethimbo lyokuuvitha. Opo ya kale ye na ondjele, poompito dhimwe oya pumbwa okutinda iinakugwanithwa yimwe. Ngele oya dhiladhila nokugalikana kombinga yasho, otaya ka mona kutya ngele iinakugwanithwa mbyoka oye yi taambele ko andola inaya vula okuninga iinima yilwe ya simana unene. Iinima mbyoka ongaashi, okuninga elongelokalunga lyuukwanegumbo oshiwike kehe, okukutha ombinga miilonga yokuuvitha nenge okudheula oyana miilonga mbyoka. Yamwe ohaye shi mono oshidhigu okutinda iinakugwanithwa mbyoka taya pewa, ihe naya kale ye na uushili kutya Jehova oku shi nkene ye uvite sho ya hala okukala ye na ondjele mokukutha wo ombinga miinima yilwe.

9. Molwaashoka aakuluntugongalo ohaya kala yi ipyakidhila noonkondo, otashi vulika ya mone oshidhigu okuninga shike?

⁹ Omolwashike hashi vulu okukala oshidhigu? Oshigwana shaJehova ohashi adhika komaupyakadhi ogendji. Momasiku ngaka ga hugunina, atuheni otwa pumbwa okutsuwa omukumo, okuyambidhidhwa nokuhekelekwa. Omathimbo gamwe, yamwe ohaya kala ya pumbwa okukwathelwa ya yande eihumbato ewinayi. (1 Tes. 5:14) Odhoshili kutya aakuluntugongalo itaya vulu okukutha po omaupyakadhi agehe goshigwana shaJehova. Ihe nonando ongawo, Jehova okwa hala ya ninge ngaashi taya vulu ya tse omukumo nokukwathela oonzi dhe. Nonando ohaya kala yi ipyakidhila, ongiini taya vulu okukonga ethimbo ye dhi kwathele?

10. Metsokumwe nAatessalonika yotango 2:7, Paulus okwa li ha sile oshimpwiyu oshigwana shaJehova ngiini?

¹⁰ Oshiholelwa shaPaulus. Paulus okwa li aluhe ha kala a hala okupandula aamwahe noku ya tsa omukumo. Aakuluntugongalo nayo oshi li nawa ya landule oshiholelwa she, mokuungaunga noshigwana shaJehova pahole nonolukeno. (Lesha 1 Aatessalonika 2:7.) Paulus okwa li ha shilipaleke ooitaali ooyakwawo kutya oku ya hole nosho wo kutya Jehova naye oku ya hole. (2 Kor. 2:4; Ef. 2:4, 5) Okwa li a ungaunga naamboka yomegongalo ongookuume ke, mokukala nayo. Okwa ulike wo kutya okwe yi inekela sho e ya lombwele oshili kombinga yaashoka a li ti ipula nasho nosho wo yokwaagwanenena kwe. (2 Kor. 7:5; 1 Tim. 1:15) Ihe nonando ongawo, Paulus ka li ha kala ta gandja eitulomo komaupyakadhi ge. Pehala lyaashono, okwa li ha kala a hala okukwathela aamwahe.

11. Omolwashike Paulus a li a pe aamwatate naamwameme omayele?

¹¹ Omathimbo gamwe, Paulus okwa li a pumbwa okupa aamwatate naamwameme omayele. Ihe ka li e shi ningi molwaashoka e uvite ta ningilwa nayi. Pehala lyaashono, okwe ya pe omayele molwaashoka  oku na ko nasha nayo nokwa li a hala e ya gamene kiiponga yi ili noyi ili. Okwa kambadhala oku ya pa omayele omapu okuuva ko, nokwa li a hala ye ga taambe ko. Pashiholelwa, montumwafo ndjoka a nyolele Aakorinto, Paulus okwa li e ya pe omayele ga kwata miiti. Konima sho a nyola ontumwafo ndjoka, okwa tumu Titus kuyo, oshoka okwa li a hala okuuva kutya oya ningi po shike sho ye yi lesha. Paulus ka li tuu a nyanyukwa sho a uvu kutya aamwatate yomuKorinto omayele ge oye ga taamba ko noye ga tula miilonga! — 2 Kor. 7:6, 7.

12. Ongiini aakuluntugongalo taya vulu okunkondopaleka aamwatate naamwameme?

¹² Oshiilongomwa. Aakuluntugongalo otaya vulu okulandula oshiholelwa shaPaulus mokukala haya kala naamwatate naamwameme. Omukalo gumwe taya vulu oku shi ninga omokuthika kuyele pokugongala, opo ya popye nayo iinima tayi tungu. Olundji ohashi kutha owala ominute omishona okutsa omukumo omumwatate nenge omumwameme ngoka a pumbwa okutsuwa omukumo. (Rom. 1:12; Ef. 5:16) Omukuluntugongalo ngoka ha landula oshiholelwa shaPaulus, oha nkondopaleke wo ooitaali ooyakwawo ta longitha Oohapu dhaKalunga e ya tunge noku ya shilipaleke kutya Kalunga oku ya hole. Shimwe ishewe, oha ningi iinima mbyoka tayi ulike kutya oku ya hole. Pashiholelwa, oha popi nayo pandjigilile nohe ya pandula. Ngele omukuluntugongalo okwa pumbwa okugandja omayele gontumba, oha gandja ngoka ga kankamena kOohapu dhaKalunga. Oha gandja omayele ngoka ga pumbiwa kondandalunde, ihe ohe shi ningi nonge, molwaashono okwa hala shoka ta popi omumwatate nenge omumwameme e shi taambe ko. — Gal. 6:1.

13. Okwaagwanenena ohaku vulu ngiini okuguma omukuluntugongalo?

¹³ Omolwashike hashi vulu okukala oshidhigu? Aakuluntugongalo inaya gwanenena. Nayo ohaya ningi owala omapuko, ngaashi aantu ayehe. (Rom. 3:23) Onkee omathimbo gamwe otashi vulika ya kale ye wete oshidhigu okukala ye na etaloko lyu uka kombinga yokwaagwanenena kwawo. Yamwe otashi vulika ya gandje unene eitulomo kokwaagwanenena hoka, sigo ya teka omukumo. Yalwe otashi vulika ya kale ye uvite kutya okwaagwanenena kwawo kaku na shoka taku ti, noinaya pumbwa okuninga omalunduluko.

14. Shi ikolelela kAafilippi 4:13, eifupipiko olya kwathele ngiini Paulus a ungaunge nokwaagwanenena kwe?

¹⁴ Oshiholelwa shaPaulus. Paulus okwa li omwiifupipiki nokwa li e shi kutya ita vulu okuungaunga nokwaagwanenena kwe kuye mwene. Okwa li a pumbwa oonkondo ndhoka Jehova ha gandja. Manga Paulus inaa ninga Omukriste, okwa li ha hepeke noonkondo Aakriste. Ihe konima okwe ke shi zimina kutya shoka a li ha ningi osha puka nokwa li a hala okulundulula eihumbato nuukwatya we. (1 Tim. 1:12-16) Kekwatho lyaJehova, Paulus okwa ningi omukuluntugongalo omunahole, omunalukeno nomwiifupipiki. Okwa li lela e shi kutya ina gwanenena, ihe nonando ongawo, okwa  tokola okukala e na einekelo kutya Jehova okwe mu dhimina po, pehala lyokukala ta gandja eitulomo komapuko ge. (Rom. 7:21-25) Ka li a tegelela okukala a gwanenena. Pehala lyaashono, okwa longo nuudhiginini a hwepopaleke uukwatya we wopaKriste nokwa li i ikolelela muJehova neifupipiko e mu kwathele a gwanithe po oshilonga she. — 1 Kor. 9:27; lesha Aafilippi 4:13, yelekanitha NW.

15. Aakuluntugongalo oye na okukala ye na etaloko lini li li pandjele kombinga yokwaagwanenena kwawo?

¹⁵ Oshiilongomwa. Aakuluntugongalo inaya langekwa po shaashi ya gwanenena. Ihe, Jehova okwa tegelela ya kale haya zimine omapuko gawo nokuhwepopaleka uukwatya wawo wopaKriste. (Ef. 4:23, 24) Omukuluntugongalo oku na okwiikonakona ye mwene ta longitha Oohapu dhaKalunga, e ta ningi omalunduluko ngoka ga pumbiwa. Kungawo, Jehova ote ke mu kwathela a kale a nyanyukwa noku kale omukuluntugongalo e li nawa. — Jak. 1:25.

16. Oshike tashi ka ningwa po ngele omukuluntugongalo okwa kala ta gandja eitulomo kokwaagwanenena kwayalwe?

¹⁶ Omolwashike hashi vulu okukala oshidhigu? Aakuluntugongalo otashi vulika ya mone okwaagwanenena kwaamwatate naamwameme, molwaashoka ohaya kala aluhe nayo. Ngele inaya kotoka, shoka otashi vulika shi ningithe aakuluntugongalo ya kale ye uvite taya ningilwa nayi, kaaye na we ombili nenge ya tameke okukala haye ya shokonona. Paulus okwa londodha Aakriste kutya shoka osho nduno Satana ta ka kala a hala ya ninge. — 2 Kor. 2:10, 11.

17. Paulus okwa li a tala ko ngiini aamwatate naamwameme?

¹⁷ Oshiholelwa shaPaulus. Paulus okwa li ha dhiladhilile aamwatate naamwameme muuwanawa. Okwa li e shi omapuko gawo, oshoka omathimbo gamwe oya li ya ningi iinima mbyoka ye mu uvitha nayi. Ihe nonando ongawo, Paulus okwa li e shi kutya omuntu ngele okwa ninga sha sha puka, itashi ti kutya ye omuntu omwiinayi. Onkee okwa li e hole aamwatate naamwameme nokwa li ha gandja eitulomo komaukwatya gawo omawanawa. Uuna ya li ye wete oshidhigu okuninga shoka shi li mondjila, Paulus okwa li ha kala e wete kutya oya hala oku shi ninga netompelo ewanawa noya pumbwa ekwatho.

18. Oshike tatu ilongo kunkene Paulus a li a ungaunga nonkalo yaEuodia naSintike? (Aafilippi 4:1-3)

¹⁸ Pashiholelwa, tala nkene omuyapostoli Paulus a li a ungaunga naamwameme yamwe yaali yomegongalo lyomuFilippi. (Lesha Aafilippi 4:1-3.) Aamwameme mboka oEuodia naSintike, notashi vulika ya li ihaaya tsu ya thithe, shoka sha li sha teya po uukuume wawo. Ihe Paulus ka li a ungaunga nayo nayi nenge e ya shokonone. Pehala lyaashono, okwa gandja eitulomo komaukwatya gawo omawanawa. Aamwameme mboka oya li aadhiginini noya li ya longele Jehova ethimbo ele. Paulus okwa li e shi kutya Jehova oku ya hole. Onkee, molwaashono Paulus okwa li e na etaloko ewanawa shi na ko nasha nayo, okwe ya ladhipike ya kandule po uupyakadhi mboka wa li wu li pokati kawo. Etaloko lye ndyono olye mu ningitha a  kale a nyanyukwa nokukale e na uukuume wopothingo naamwatate naamwameme yomegongalo lyomuFilippi.

19. (a) Aakuluntugongalo otaya vulu ngiini okukala ye na etaloko ewanawa li na ko nasha naamwatate naamwameme? (b) Oshike tatu ilongo kethano lyomukuluntugongalo ta opaleke mOshinyanga shUukwaniilwa?

¹⁹ Oshiilongomwa. Aakuluntugongalo, kaleni hamu tala komaukwatya omawanawa gaamwatate naamwameme. Inaya gwanenena, ihe kehe gumwe oku na uukwatya mboka tatu vulu okukala tu hole. (Fil. 2:3) Odhoshili kutya omathimbo gamwe aakuluntugongalo otashi vulika ya kale ya pumbwa okupukulula omumwatate nenge omumwameme. Ihe ngaashi Paulus, oye na okukambadhala kaaya kale owala haya tala kwaashoka omuntu ha popi nenge ha ningi, hashi ningile aantu nayi. Ihe, oshi li nawa ya kale haya gandja eitulomo kohole ye yokuhola Jehova, keidhidhimiko lye moku mu longela nokokuvula kwe okuninga shoka oshiwanawa. Aakuluntugongalo mboka haya gandja eitulomo komaukwatya omawanawa gayalwe, ohaye ya ningitha ya kale yu uvite ye holike kwaayehe megongalo.

20. Ongiini aakuluntugongalo taya vulu okutsikila okumona mo uuwanawa moshiholelwa shaPaulus?

²⁰ Aakuluntugongalo otamu ka mona mo uuwanawa moshiholelwa shaPaulus, ngele omwa tsikile oku shi konakona. Pashiholelwa, tala moWatch Tower Publications Index, e to yi poshipalanyolo “Paul,” opo nduno e to yi pokapalanyolo “example for elders.” Sho to lesha uuyelele wumwe wu li kohi yokapalanyolo hono, ipula ngeyi, ‘Oshiholelwa shaPaulus otashi vulu okukwathela ndje ngiini ndi kale nda nyanyukwa, sho tandi gwanitha po oshilonga shandje ndi li omukuluntugongalo?’

21. Aakuluntugongalo otaya vulu okukala ye na uushili wuni?

²¹ Aakuluntugongalo, dhimbulukweni kutya Jehova ina tegelela mu kale mwa gwanenena, ihe okwa hala mu kale aadhiginini kuye. (1 Kor. 4:2) Jehova okwa li a pandula noonkondo Paulus omolwiilonga ye nuudhiginini we. Nane kaleni mu na uushili kutya Jehova oha kala a nyanyukilwa iilonga yeni mbyoka hamu mu longele. “Ita dhimbwa iilonga nohole yeni mokusimanekitha edhina lye, sho hamu yakula Aakriste ooyakweni.” — Heb. 6:10.