1, 2. ¿Kenon uelis kinpaleuis tlayekankej tla kichiuaj ijkon ken Pablo?

 MIYEKEJ tokniuan melak kitlasojtlayaj apóstol Pablo pampa yejua melak kinpaleuiaya niman kintlasojtlaya (Hech. 20:31). Biblia kijtoua ika ijkuak tlayekankej akin nemiyaj Éfeso okimatkej ika xok kitaskiaj Pablo, “nochimej ochokakej” (Hech. 20:37). Aman, tlayekankej noijki melak kintlasojtlaj tokniuan niman melak kinpaleuiyaj (Filip. 2:16, 17). San ika ¿tlenon uelis kinpaleuis ijkuak konixnamikiskej tlen ouijtika?

² Tlayekankej kipiyaj miyek tekitl, ika yejon, melak noneki makichiuakan ken Pablo (1 Cor. 11:1). Yejua noijki tlajtlakole katka, hasta okijto: “Nikmati ika ipan notlalnakayo xitlaj onkaj tlen kuajli, pampa maski nikneki nikchiuas on tlen kuajli, xueli nikchiua” (Rom. 7:18-20). Maski yejua okixnamik miyek tlen ouijtika, xonosiaujkauj niman nochipa oyolpak. Tla tlayekankej kitekichiuiliaj Jehová ijkon ken apóstol Pablo, noijki uelis nochipa yolpakiskej  maski kixnamikiskej tlen ouijtika. Matikitakan kenon uelis kichiuaskej.

3. ¿Tlenon tikitaskej ipan yejuin tlamachtijli?

³ Ipan yejuin tlamachtijli tikitaskej naui tlemach tlen tlayekankej kixnamikij: 1) noneki kixeloskej tiempo para tenojnotsaskej, 2) noneki kuajli kintlajpiyaskej tokniuan, 3) noneki nopatlatiaskej niman 4) noneki kinxikojtiaskej tokniuan. Matikitakan kenon apóstol Pablo okixnamik yejuin niman kenon tlayekankej uelis kichiuaskej ijkon ken yejua.

4. ¿Tleka kemantika tlayekankej ouijtika kitaj tenojnotsaskej?

⁴ Yejuin ouijtika. ¿Tleka ijkon tikijtouaj? Pampa tlayekankej kipiyaj miyek tekitl. Yejuamej kinyekanaj tlanechikoltin tlen tikinpiyaj niman kinyektlaliaj tlamachtiltin tlen kinpanoltiaj. Noijki kinmachtiaj tlapaleuijkej niman kinyolchikauaj tokniuan (1 Ped. 5:2). Sekimej tlayekankej tlapaleuiyaj kampa kinyektlaliaj niman kinchijchiuaj Kaltin kampa tikueyichiuaj Jehová. San ika, yejuamej noijki kuajli kimatstokej ika melak noneki tenojnotsaskej (Mat. 28:19, 20, TNM).

5. ¿Tlenon okichiuj Pablo?

⁵ Tlen okichiuj Pablo. ¿Tleka apóstol Pablo nochipa otenojnots? Pampa yejua nochipa okichiuj tlen okijto ipan Filipenses 1:10, kampa okijto: “Nochipa nenkimatiskej kenijki nenkitlapejpeniskej on tlen más kuajli”. Apóstol Pablo kimatstoya ika nonekiya nochipa tenojnotsas. Ika yejon, otenojnots “kampa tojlan niman ipan techajchan” (Hech. 20:20). Pablo xotenojnots san se hora noso san se tonajli ipan se semana, ka, yejua nochipa otenojnots. Sejpatipan ijkuak techatoya Atenas, okinnojnots akin ompa nemiyaj niman melak kuajli okikakkej (Hech. 17:16, 17, 34). Noijki, ijkuak tsauktoya kinnojnotsaya akin konitayaj (Hech. 28:16-24; Filip. 1:13, 14).

6. ¿Kenon Pablo okinpaleui Juan Marcos niman Timoteo?

⁶ Pablo nochipa kinyolchikauaya oksekimej para imiuan matenojnotsatij. Ijkuak yejua opeuj kintlajpaloua tlanechikoltin, okijli Juan Marcos iuan mauiya. Niman ijkuak ika okpa oyaj, aman okuikak Timoteo (Hech. 12:25; 16:1-4). Ijkuak kinuikatinemiya okinmachti kenon kinyekanaskej tlanechikoltin, kenon kintlajpiyaskej tokniuan niman kenon kuajli temachtiskej (1 Cor. 4:17).

7. ¿Kenon tlayekankej uelis kichiuaskej tlen okijto Pablo ipan Efesios 6:14, 15?

 ⁷ Tlen kinmachtia tlayekankej. Yejuamej noijki uelis tenojnotsaskej maski san kanon, ijkon ken okichiuj Pablo (xpoua Efesios 6:14, 15). Uelis tenojnotsaskej kampa ontlakouaj noso kampa tekitij. Noso tla tlapaleuiyaj kampa kichijchiuaj se Kajli kampa tikueyichiuaj Jehová, uelis kinnojnotsaskej akin ompa nisiuj chantij noso akin konkauaj material. Niman ijkuak tenojnotsaskej imiuan tokniuan noso tlapaleuijkej, uelis kinmachtiskej ijkon ken okichiuj Pablo.

8. ¿Kemantika tlenon noneki kichiuas se tlayekanketl?

⁸ Tlayekankej xnoneki kinemiliskej ika xtlaj tlenon tla xok más tenojnotsaj san pampa kichiuaj okseki tekitl ipan tlanechikojli noso ipan circuito. Ika yejon, tla kinekij más tenojnotsaskej, kemantika kanaj nonekis kiteijliskej ika xuelis kichiuaskej se tekitl. Tlayekankej, xchiuakan teoyotl niman xkitakan tla más noneki nemomachtiskej imiuan nemochanejkauan, nentenojnotsaskej noso nenkinmachtiskej nemokoneuan kenon tenojnotsaskej. Kanaj kemantika nenpinauiskej nenkiteijliskej ika xuelis nenkiseliskej se tekitl, san ika, xkilnamikikan ika Jehová mechasikamati.

9. ¿Tlenon kixnamikij tlayekankej?

⁹ Yejuin ouijtika. ¿Tleka ijkon tikijtouaj? Pampa tinochimej akin tiktekichiuiliaj Jehová tikixnamikij miyek tlen ouijtika ipan yejuin itlamiyan tonaltin. Ika yejon, tinochimej tiknekij matechyolchikauakan, matechpaleuikan niman matechyolseuikan. Niman sekimej noneki makinmelajkatlalikan (1 Tes. 5:14). Tlayekankej xuelis kipopoloskej nochi tlen tikixnamiktokej. San ika, Jehová kineki ika yejuamej matechyolchikauakan niman matechtlajpiyakan. Kuakon, ¿kenon uelis techpaleuiskej tla yejuamej kipiyaj miyek tekitl?

10. Ken kijtoua 1 Tesalonicenses 2:7, ¿kenon Pablo okinpaleui tokniuan?

¹⁰ Tlen okichiuj Pablo. Yejua nochipa kinyolchikauaya tokniuan niman kimijliaya ijkuak itlaj kuajli kichiuayaj. Tlayekankej noijki noneki kintlasojtlaskej tokniuan, ijkon ken okichiuj Pablo (xpoua 1 Tesalonicenses 2:7). Pablo okimijli tokniuan ika yejua niman Jehová melak kintlasojtlayaj (2 Cor. 2:4; Efes. 2:4, 5). Yejua nosentlaliaya imiuan tokniuan niman kimitaya ken iamigos. Okimititi ika intech tlaneltokaya pampa kimijliaya tlenon kimojtiaya niman kenon nomachiliaya (2 Cor. 7:5; 1 Tim. 1: 15). Maski Pablo kixnamiktoya miyek tlen ouijtika, nochipa okinpaleui tokniuan.

11. ¿Tleka Pablo kinmelajkatlaliaya tokniuan?

¹¹ Kemantika, Pablo noijki okinmelajkatlali tokniuan pampa yemelak kinekiya kinpaleuis niman pampa xkinekiya makixnamikikan tlen ouijtika. Yejua temelajkatlaliaya ika tlasojtlalistli niman nochipa kinekiya kimatis tlenon kijtouayaj tokniuan. Biblia kijtoua ika ijkuak okintlajkuilouili tokniuan akin chantiyaj Corinto, okinmelajkaijli tlen xkuajli kichiujtoyaj. Sakin okititlan Tito pampa kinekiya kimatis tla onopatlakej tokniuan. ¡Niman melak oyolpak ijkuak okimat ika okichiujkej tlen okimijli! (2 Cor. 7:6, 7).

12. ¿Kenon tlayekankej uelis kinyolchikauaskej tokniuan?

¹² Tlen kinmachtia tlayekankej. Yejuamej noijki uelis kinpaleuiskej tokniuan, ijkon ken Pablo okichiuj. Uelis ijkon kichiuaskej tla saniman ajsi ipan tlanechikoltin niman imiuan tlajtlajtouaj. Kemantika nion xnoneki miyek tiempo para tikyolchikauas niman tikititis se tokniuj ika tiktlasojtla (Rom. 1:12; Efes. 5:16). Tlayekankej akin kichiuaj ken Pablo, kitekitiltiaj Biblia para kinyolchikauaskej imikniuan niman para kimititiskej ika Jehová kintlasojtla. Noijki kimititiaj ika kintlasojtlaj ijkuak kominnotsaj niman ijkuak kimijliaj tlen kuajli kichiuaj. Tla se tlayekanketl kineki temelajkatlalis, noneki kitekitiltis Biblia. Tla ijkon kichiua, akin kimelajkatlalis más totoka kinekis kichiuas tlen kijlis (Gál. 6:1).

13. ¿Tlenon kinemiliaj sekimej tlayekankej ijkuak nopopolouaj?

¹³ Yejuin ouijtika. ¿Tleka ijkon tikijtouaj? Pampa tlayekankej noijki tlajtlakolejkej niman nopopolouaj (Rom. 3:23). Kemantika ijkuak nopopolouaj noneki nokojtiliskej para xsan itech yejon tlanemilijtoskej. Sekimej kanaj najmanaj pampa san kinemilijtokej tlen xueli kichiuaj. Noso sekimej xkinmajmana ijkuak nopopolouaj niman kinemiliaj ika xnoneki nopatlaskej.

14. Ken kijtoua Filipenses 4:13, ¿kenon okiteititi Pablo ika yolyemanki katka?

¹⁴ Tlen okichiuj Pablo. Yejua okijto ika nonekiya makipaleui toTajtsin para nopatlas niman kilkauas nochi tlen xkuajli okichiujka. Ijkuak xikixmatiya Jehová okintlaueltokak tokniuan, san ika, sakin onopatlak (1 Tim. 1:12-16). Pampa Jehová okipaleui, Pablo kuajli okinyekan tokniuan, okimititi  ika kintlasojtla, okimikneli niman onoyolyemanili. Maski kajmanaya tlen xkuajli okichiujka, onokojtili xok san yejon kinemilijtos pampa kimatstoya ika Jehová yokitlapopoluijka (Rom. 7:21-25). Kimatstoya ika tlajtlakole katka, san ika, onokojtili kichiuas tlen kuajli niman nochipa nopaleuiaya itech Jehová ijkuak tenojnotsaya (1 Cor. 9:27; xpoua Filipenses 4:13, TNM ). *

15. ¿Tlenon noneki kichiuaskej tlayekankej?

¹⁵ Tlen kinmachtia tlayekankej. Maski yejuamej tlajtlakolejkej, Jehová yokinmakak se kualtsin tekitl. Yejua kineki manopatlatiakan niman makichiuakan tlen kuelita (Efes. 4:23, 24). Tlayekankej noneki nomachtiskej Biblia niman ijkon kitaskej tla itlaj noneki kipatlaskej. Tla ijkon kichiuaj, Jehová kinpaleuis nochipa mayolpakikan niman kuajli makichiuakan intekiyo (Sant. 1:25).

16. ¿Tlenon uelis panos tla tlayekankej san kitaj kenon nopopolouaj tokniuan?

¹⁶ Yejuin ouijtika. ¿Tleka ijkon tikijtouaj? Pampa ijkuak tlayekankej uejkauij tekitij imiuan tokniuan, más kitaj kenon nopopolouaj. Tla xnotlajpiyaj, uelis ajmankamikiskej niman tetlauelnotsaskej noso tetejteneuaskej. Niman Pablo okijto ika yejon tlen kineki Satanás (2 Cor. 2:10, 11).

17. ¿Kenon Pablo kimitaya tokniuan?

¹⁷ Tlen okichiuj Pablo. Yejua nochipa kitaya tlen kuajli kichiuayaj tokniuan. Maski kemantika kiyolkokouayaj, xsan kitaya tlen xkuajli kichiuayaj. Pablo kintlasojtlaya tokniuan niman kimatstoya ika tla yakaj kichiuaya tlen xkuajli, xkijtosnekiya tla xkuajli iyojlo kipiaya. Niman yejua nochipa kipaleuiaya akin kitaya ika nokojtiliaya kichiuas tlen kuajli.

18. ¿Tlenon techmachtia ken Pablo okinpaleui Evodia niman Síntique? (Filipenses 4:1-3).

¹⁸ (Xpoua Filipenses 4:1-3). Matikitakan kenon Pablo okipaleui Evodia niman Síntique, akin nemiyaj ipan tlanechikojli de Filipos. Nesi ika yejuin omemej siuamej notlauelitayaj, san ika, Pablo xokintlauelnots nion xokintejteneuj. Yejua okitak tlen kuajli kichiuayaj, kenon yomelajkanenkaj niman kenon kintlasojtlaya Jehová. Ika yejon, okimijli manoyolseuikan. Pampa Pablo ijkon okichiuj, nochipa oyolpak niman kuajli onouikak imiuan tokniuan de Filipos.

19. a) ¿Tlenon noneki kichiuaskej tlayekankej? b) ¿Tlenon mitsmachtia tlayekanketl akin tlachipaujtika ipan Kajli kampa tosentlaliaj? (Xkita tlaixkopinajli).

¹⁹ Tlen kinmachtia tlayekankej. Tokniuan noijki tlajtlakolejkej, san ika, noijki kichiuaj tlen kuajli. Ika yejon, tlayekankej, nochipa xkitakan tlen kuajli kichiuaj tokniuan  (Filip. 2:3). Ijkon ken Pablo, ijkuak yakaj nenkimelajkatlaliskej, maka san xkitakan tlen xkuajli okijto noso tlen xkuajli okichiuj, yej xkitakan ika kitlasojtla Jehová, ika chikauak tlaxikojtika niman ika uelis nopatlas. Ijkuak tlayekankej ijkon kichiuaj, más notlasojtlaj tokniuan akin nemij ipan intlanechikol.

20. ¿Tlenon uelis kinpaleuis tlayekankej para kuajli makichiuakan intekiyo?

²⁰ Tlayekankej melak kinpaleuis tla nochipa nomachtiaj itech Pablo. Uelis nomachtiskej ipan Índice de las publicaciones Watch Tower kampa kijtoua “Pablo” niman sakin kampa kijtoua “ejemplo para los ancianos”. Ijkuak nomachtiskej uelis notlajtoltiskej: “¿Kenon uelis nikchiuas notekiyo ika nochi noyojlo ijkon ken Pablo okichiuj?”.

21. ¿Tlenon uelis kuajli kimatstoskej tlayekankej?

²¹ Tlayekankej, xkilnamikikan ika Jehová kimatstok ika nentlajtlakolejkej. Maski ijkon, yejua kineki itech xmelajkanemikan (1 Cor. 4:2). Jehová okitlasojkamat nochi tlen Pablo okichiuj niman kenon omelajkanen. Kuakon, kuajli xmatstokan ika Jehová noijki kitlasojkamati nochi tlen nenkichiuaj, pampa ipan Hebreos 6:10 kijtoua: “Dios yolmelajki. Yejua xkelkauas nemotekiu nion on tetlajsojtlalistli yejuan onenkititijkej ijkuak onenkimpaleuijkej on tlaneltokakej, niman hasta aman nenkimpaleuiyaj”.