1-2. Hewisa wa tola möi fanolo ndra satua sokubaloi duma-duma Waulo?

 IʼOMASIʼÖ sibai ndra talifusönia sinenge sotöi Faulo. Lö tebulö iforege ba wanolo yaʼira. (Hal. 20:31) Börö daʼö, laʼomasiʼö sibai Waulo ira talifusönia si sara lala wamati. Samuza inötö, me larongo ira satua sokubaloi ba Efeso wa tebai saʼae falukha ira khö Waulo, ”adöʼu-döʼu ira wege-ege”. (Hal. 20:37) Simanö göi, laʼomasiʼö sibai ndra talifusöra ira satua sokubaloi ba lafalua wondrege zi sökhi ba wanolo yaʼira. (Fil. 2:16, 17) Hizaʼi itaria, abua khö ndra satua sokubaloi wamalua noro dödö nibeʼe khöra. Hadia zi tola manolo yaʼira?

² Ira satua sokubaloi samorege fohalöwö, tola lafahaʼö ira moroi ba duma-duma Waulo. (1 Ko. 11:1) Yaʼia andrö tenga niha sangokhögö faʼabölö sahöli-höli dödö simane ira malaʼika. Niha si lö moʼahonoa Waulo, ba itaria abua khönia wamalua satulö. (Rom. 7:18-20) Oya göi gabula dödö nitaögönia. Hewaʼae simanö, lö awuwu Waulo mazui taya waʼomuso dödönia. Na laʼoʼö duma-duma Waulo ira satua sokubaloi, tola lafosumange Yehowa si fao faʼomuso dödö hewaʼae na so daha-taha nitaögöra. Datatutunö hewisa lalara ba wamalua daʼö.

3. Hadia nitutunöda ba artikel daʼa?

³ Ba artikel daʼa, tatutunö öfa noro dödö sabua sinangea lafalua ira satua sokubaloi: (1) lafalua halöwö fanuriaigö hewaʼae na oya noro dödöra tanö böʼö, (2) labeʼe ginötöra ba wamarou tödö ndra talifusöra, (3) lalawa walömoʼahonoara samösa, ba (4) falulu fohalöwö ira khö ndra talifusöra si lö moʼahonoa. Tatutunö göi hewisa wamalua Waulo noro dödö sabua andrö, ba hewisa lala ndra satua sokubaloi ba woloʼö duma-duma nibeʼenia.

4. Hana wa itaria abua khö ndra satua sokubaloi wameʼe duma-duma si sökhi ba wanuriaigö?

⁴ Hana wa tola manö abua wamalua daʼö? Baero wondröniaʼö halöwö fanuriaigö ba mbanua niha Keriso, oya göi noro dödö tanö böʼö niʼokhögö ndra satua sokubaloi. Duma-dumania, ladöniaʼö gangowuloa barö migu hegöi Famahaʼö Zura Niʼamoniʼö ba Gangowuloa. Lafaʼema göi huhuo sebua hegöi faosatö tanö böʼö ba gangowuloa. Lö tebulö lafomaha ndra enoni ba lafarou dödö ndra talifusöra. (1 Fe. 5:2) So ösa ndra satua sokubaloi sohalöwö ba wangotomosi hegöi ba wondrorogö Nahia Gangowuloa mazui tomosa tanö böʼö niʼokhögö organisasi. Hizaʼi, simane ira talifusöda tanö böʼö ba mbanua niha Keriso, noro dödö fondrege zebua niʼokhögö ndra satua sokubaloi yaʼia daʼö ba wanuriaigö turia somuso dödö.—Mat. 28:19, 20.

5. Hewisa wameʼe Waulo duma-duma ba wamalua halöwö fanuriaigö?

⁵ Duma-duma nibeʼe Waulo. Ba Wilifi 1:10, ifatunö khöda Faulo hadia mbörö wa tola mofozu ia ba wamalua halöwö fanuriaigö. Imane, ”Mitatugöi hadia zabölö moguna.” No ifalua samösa Faulo mene-mene nibeʼenia andrö. Ba wamaiginia, halöwö fanuriaigö andrö no sabölö moguna, ba iʼofönaiʼö daʼö ba waʼaurinia sagötö zi hauga wulu fakhe. Manuriaigö ia ”föna niha sato hegöi ba nomo-omo misa”. (Hal. 20:20) Ifalua halöwö fanuriaigö tenga ha ba ngaluo mazui ba ginötö si no itatugöi. Manuriaigö ia gofu hawaʼara manö so ginötö ba wamalua daʼö! Duma-dumania, me ibaloi ndra awö-awönia ba Atena, ituriaigö duria somuso dödö ba niha sagalawa faka si so ba daʼö, ba so ösa ba gotaluara zanemaʼö turia nifaʼemania. (Hal. 17:16, 17, 34) Hewaʼae ’no labeʼe ia ba gurunga’, lö tebulö manuriaigö Waulo ba niha si so ba daʼö.—Fil. 1:13, 14; Hal. 28:16-24.

6. Hadia wamomaha nibeʼe Waulo ba niha böʼö?

⁶ Ihaogö wangogunaʼö inötönia Faulo. Asese iʼandrö ba niha böʼö wefao khönia ba wanuriaigö. Duma-dumania, ba wofanönia si oföna tobali utusan injil, iʼohe awönia Yohane Mareko, ba me ifalua daʼö ba zi mendrua kali, iʼohe awönia Dimoteo. (Hal. 12:25; 16:1-4) Tatu no ifalua wondrege zi sökhi Faulo ba wamomaha yaʼira enaʼö tola ladöniaʼö mbanua niha Keriso, lakubaloi ndra talifusöra, ba tobali ira samahaʼö sonekhe.—1 Ko. 4:17.

7. Hewisa lala ndra satua sokubaloi ba wamalua niwaʼö Waulo ba Efeso 6:14, 15?

⁷ Famahaʼönia. Tola laʼoʼö duma-duma Waulo ira satua sokubaloi na manuriaigö ira tenga ha ba nomo-omo misa, hizaʼi lafaʼanö göi ira wanuriaigö gofu hezoso so ira ba gofu hawaʼara so ginötö. (Baso Efeso 6:14, 15.) Duma-dumania, tola lafalua wanuriaigö ba nahiara  wohalöwö mazui na möi ira mowöli soguna khöra. Mazui, na fao ira ba wamasindro Nahia Gangowuloa, tola manuriaigö ira ba niha si toröi ahatö ba daʼö mazui ba niha sogale gama-gama ba wamazökhi tomosa. Simane Faulo, tola göi laʼogunaʼö ginötöra ba wamomaha niha böʼö ba wanuriaigö, tefarahu ba daʼö ndra enoni.

8. Itaria, hadia zinangea lafalua ira satua sokubaloi?

⁸ Hewaʼae na oya sibai halöwö ndra satua sokubaloi ba mbanua niha Keriso hegöi ba wilayah si so yaʼira, moguna labeʼe ginötöra wamalua fanuriaigö. Enaʼö tola lafalua daʼö, itaria so halöwö sinangea latimbagö. Na no lahaogö laʼangeragö ba mangandrö ira, tola manö aboto ba dödöra wa tebai lafalua noro dödöra sabölö moguna na latema halöwö daʼö. Duma-dumania, te tola möi fanaisira halöwö daʼö ba wondröniaʼö famahaʼö zi sambua omo ero migu, ba wamalua halöwö fanuriaigö, hegöi ba wamahaʼö iraonora ba wamalua halöwö daʼö. So ösa zorasoi wa abua khöra wanimbagö halöwö nibeʼe khöra. Hewaʼae simanö, tola faduhu dödöra wa iʼila Yehowa hadia gohitö dödöra, yaʼia daʼö ba wamalua fefu halöwöra ba lala si tefaudu.

9. Börö me oya halöwö ndra satua sokubaloi, hadia zabua khöra famalua?

⁹ Hana wa tola manö abua wamalua daʼö? Oya gabula dödö nitaögö nono mbanua Yehowa. Sagötö ngaluo safuria andre, moguna khöda wamarou dödö, fanolo, hegöi fondrara dödö. Itaria göi moguna khöda wanolo ba wanimbagö amuata si lö sökhi. (1 Te. 5:14) Tatu manö, lö faʼabölö khö ndra satua sokubaloi ba wangeheta abula dödö nitaögö nono mbanua Yehowa. Hewaʼae simanö, omasi Yehowa na laforege ira satua sokubaloi ba wamarou tödö hegöi ba wolumöʼö biri-birinia. Hewaʼae na oya halöwö ndra satua sokubaloi, hewisa lala enaʼö tola labeʼe ginötöra ba wamalua daʼö?

10. Moloʼö 1 Tesalonika 2:7, hadia nifalua Waulo khö ndra talifusönia si sara lala wamati?

¹⁰ Duma-duma nibeʼe Waulo. Lö tebulö iʼalui lala Faulo ba wanuno hegöi ba wamarou tödö niha böʼö. Moguna göi laʼoʼö duma-dumania andrö ira satua sokubaloi, ba laforomaʼö waʼomasi hegöi faʼasökhi dödö ba nono mbanua Yehowa. (Baso 1 Tesalonika 2:7.) Iforomaʼö Faulo wa iʼomasiʼö ndra talifusönia ba ifaduhuʼö göi ba dödöra wa iʼomasiʼö ira Yehowa. (2 Ko. 2:4; Ef. 2:4, 5) Fahuwu Waulo khö ndra talifusönia ba mbanua niha Keriso ba ibeʼe ginötönia fariawö khöra. Börö me ifaduhusi tödö ira, lö ibini-biniʼö khöra wanutunö falömoʼahonoania hegöi faʼaombö dödö nirasoinia. (2 Ko. 7:5; 1 Ti. 1:15) Hewaʼae simanö, lö iʼosambuaʼö dödönia Faulo ba gabula dödö salua khönia. Hizaʼi, omasi ia ba wanolo ira talifusönia.

11. Hana wa iʼamenesi ndra talifusönia Faulo?

¹¹ Itaria, iʼamenesi ndra talifusönia Faulo. Hizaʼi, ifalua daʼö tenga börö me mofönu ia khöra.  Ibeʼe khöra mene-mene börö me iʼameʼegö tödö ira ba omasi ia wolumöʼö yaʼira moroi ba deʼala ba wamati. Iforege enaʼö alio aboto ba dödö niha mene-mene nibeʼenia, ba omasi ia na latemaʼö mene-menenia andrö. Duma-dumania, ba zura nifaʼoheʼönia ba niha Gorindro, ibeʼe khöra mene-mene sabeʼe. Me no aefa ifaʼoheʼö zurania andrö, ifatenge Dito ba wangondrasi yaʼira. Ifalua daʼö börö me omasi ia iʼila hewisa wanemaʼöra sura nifaʼoheʼönia andrö. Tatu omuso sibai dödönia me irongo wa latemaʼö ba lafalua mene-mene nibeʼenia!—2 Ko. 7:6, 7.

12. Hewisa lala ndra satua sokubaloi ba wamarou tödö ndra talifusöra?

¹² Famahaʼönia. Tola laʼoʼö duma-duma Waulo ira satua sokubaloi na labeʼe ginötöra fariawö khö ndra talifusöra si sara lala wamati. Sambua lala si tola lafalua yaʼia daʼö na ahulö tohare ira ba gangowuloa enaʼö so ginötöra fahuhuo khö ndra talifusöra. Sasesenia, hewaʼae ha mato hauga menit fahuhuo ira, tola labeʼe wamarou dödö khö ndra talifusöra si fao faʼomasi. (Rom. 1:12; Ef. 5:16) Na omasi zi samösa satua sokubaloi ba woloʼö duma-duma nibeʼe Waulo, lö tola löʼö iʼogunaʼö Daromali Lowalangi ba wangaʼaroʼö famati ndra talifusöda hegöi ba wamaduhuʼö ba dödöra wa iʼomasiʼö ira Lowalangi. Baero daʼö, moguna göi iforomaʼö waʼomasi khö ndra talifusönia andrö. Lö tebulö fariawö ia khöra ba iʼalui lala ba wanuno yaʼira. Na so mene-mene nifaʼemania, moguna ifaudugö daʼö ba Daromali Lowalangi. Ba ginötö izara-zara wanutunö hadia manö zinangea mufalua, moguna ifaʼema daʼö si fao faʼasökhi dödö börö me omasi ia na fatema ba dödö ndra talifusöda mene-mene nibeʼenia.—Gal. 6:1.

13. Hadia nirasoi ndra satua sokubaloi börö walömoʼahonoara samösa?

¹³ Hana wa tola manö abua wamalua daʼö? Lö moʼahonoa ndra satua sokubaloi. Simane niha böʼö, itaria göi lafalua zala. (Rom. 3:23) Tola manö abua khöra wangokhögö lala wangera-ngera si tefaudu sanandrösa ba daʼö. So ösa zangosambuaʼö tödöra ba walömoʼahonoara samösa irege ide-ide dödöra. Hizaʼi, so göi zalio mangosilöʼögö daʼö irege lawaʼö tödöra wa lö hadöi sinangea labulöʼö.

14. Moloʼö Filifi 4:13, hadia zanolo Faulo ba wolawa falömoʼahonoania samösa?

¹⁴ Duma-duma nibeʼe Waulo. Börö me so wangide-ngideʼö khö Waulo, aboto ba dödönia wa tebai ilawa walömoʼahonoania na iʼodaligö waʼabölönia samösa. Moguna khönia waʼabölö moroi khö Lowalangi. Ba wamobörö, Faulo andrö niha sabeʼe högö ba safaito, samaka-makao niha Keriso. Hizaʼi ba gafuriata, aboto ba dödönia wa fasala nifaluania andrö ba omasi ia ibulöʼö lala wangera-ngera hegöi amuatania. (1 Ti. 1:12-16) Börö wanolo moroi khö Yehowa,  tola tobali ia kubalo sebua faʼomasi, sahakhö tödö, ba sangide-ngideʼö. Aboto ba dödönia wa oya zoʼamböta ia, hizaʼi tenga ha daʼö manö niʼera-erania. Faduhu dödönia wa hasambalö iʼefaʼö zalania Yehowa. (Rom. 7:21-25) Lö itötöna Faulo enaʼö moʼahonoa ia. Hizaʼi, iforege wondrouʼö bua-bua niha Keriso ba iʼodaligö Yehowa si fao fangide-ngideʼö enaʼö tola ifalua halöwö nibeʼe khönia.—1 Ko. 9:27; baso Wilifi 4:13.

15. Hadia lala wangera-ngera si tefaudu sinangea laʼokhögö ira satua sokubaloi sanandrösa ba walömoʼahonoara samösa?

¹⁵ Famahaʼönia. Sindruhu sa, mufataro ndra satua sokubaloi tenga börö me moʼahonoa ira. Hewaʼae simanö, itötöna Yehowa enaʼö lafaduhuʼö wa oya göi zoʼamböta ira, ba laforege wondrouʼö bua-bua niha Keriso. (Ef. 4:23, 24) Lö tola löʼö laʼogunaʼö Daromali Lowalangi ba wamareso faʼaurira ba lafaudugö gamuatara. Aefa daʼö, hasambalö itolo ira Yehowa enaʼö tobali ira kubalo somuso tödö ba mofozu ira wamalua halöwöra.—Yak. 1:25.

16. Hadia zalua na laʼosambuaʼö dödöra ira satua sokubaloi ba walömoʼahonoa niha böʼö?

¹⁶ Hana wa tola manö abua wamalua daʼö? Börö me asese falulu fohalöwö ndra satua sokubaloi khö ndra talifusöra ba mbanua niha Keriso, tola manö itugu oya laʼila walömoʼahonoara. Na lö mangelama ndra satua sokubaloi, tola manö alangu dödöra, mofönu-fönu ira, mazui laʼalu-alui zala ndra talifusöra. Ifangelama ndra niha Keriso Faulo wa omasi Zatana na lafalua daʼö.—2 Ko. 2:10, 11.

17. Hewisa wamaigi Waulo ira talifusönia?

¹⁷ Duma-duma nibeʼe Waulo. Lö tebulö iʼokhögö lala wangera-ngera si tefaudu Faulo sanandrösa khö ndra talifusönia. Sindruhunia, iʼila wa asese fasala ira, ba no göi irai laʼafökhöiʼö dödönia. Hizaʼi, hewaʼae na itaria lafalua zala, aboto ba dödö Waulo wa tenga daʼö zangoromaʼö wa niha si lö sökhi ira. Iʼomasiʼö sibai ndra talifusönia Faulo ba iʼosambuaʼö dödönia ba gamuatara si sökhi. Hewaʼae abua khö ndra talifusönia wamalua satulö, aboto ba dödönia wa sökhi gohitö dödöra ba moguna khöra wanolo.

18. Hadia wamahaʼö si tola öhalö moroi ba nifalua Waulo khö Gewodia hegöi Sitikhe? (Filifi 4:1-3)

¹⁸ Nehegö atö hadia nifalua Waulo ba wanolo talifusönia ira alawe si darua ba mbanua niha Keriso si so ba Wilifi. (Baso Wilifi 4:1-3.) Börö me so waʼafaböʼö mbua gera-era ba gotalua Gewodia hegöi Sitikhe, lö hadöi saʼae khöra fahasara dödö. Hewaʼae simanö, lö mofönu khöra Waulo mazui ihuku ira. Iʼosambuaʼö dödönia ba mbua-buara si sökhi. Iʼila wa no ara lafosumange Yehowa si fao faʼalöfaröi ba iʼomasiʼö göi ira Yehowa. Börö me iʼokhögö lala wangera-ngera si tefaudu sanandrösa khö ndra talifusönia andrö, ihalö gangetula ba wamarou yaʼira enaʼö ifuli atulö ira. Baero daʼö, börö me  iʼosambuaʼö dödönia Faulo ba mbua-bua si sökhi niʼokhögö niha böʼö, lö tebulö irasoi waʼomuso dödö ba aro wahuwusania khö ndra talifusönia ba mbanua niha Keriso andrö.

19. (a) Hewisa enaʼö lö tebulö laʼokhögö lala wangera-ngera si tefaudu ira satua sokubaloi sanandrösa khö ndra talifusöra? (b) Hadia wamahaʼö si tola öhalö moroi ba gambara zatua sokubaloi si fao ba wangehao Nahia Gangowuloa?

¹⁹ Famahaʼönia. Yaʼami ira satua sokubaloi, miʼosambuaʼö dödömi ba mbua-bua si sökhi niʼokhögö ndra talifusöda. Niha si lö moʼahonoa fefu ndra talifusöda. Hewaʼae simanö, fefu ira oi laʼokhögö mbua-bua si sökhi. (Fil. 2:3) Sindruhu sa, itaria moguna laʼamenesi ndra talifusöra ira satua sokubaloi. Hizaʼi simane Faulo, tebai laʼosambuaʼö dödöra ba wehede hegöi amuata si fasala nifalua zi samösa talifusöda. Moguna laʼosambuaʼö dödöra ba waʼomasinia khö Yehowa, faʼanau gölönia, hegöi ba ngawalö zi sökhi si tola ifalua. Na laʼokhögö lala wangera-ngera si tefaudu ira satua sokubaloi, tola laʼasogö waʼomasi ba mbanua niha Keriso.

20. Hewisa lala ndra satua sokubaloi enaʼö lö tebulö latema mbua moroi ba duma-duma Waulo?

²⁰ Yaʼami ira satua sokubaloi, tola mitema mbua na lö tebulö mifahaʼö ami sanandrösa khö Waulo. Duma-dumania, ba Indeks Publikasi Menara Pengawal, tola mifaigi duho ”Paulus”, aefa daʼö tuho side-ide ”teladan bagi penatua”. Ba ginötö mibaso artikel si no mufaʼanö ba daʼö, misofu khömi samösa, ’Hewisa woloʼögu duma-duma Waulo andre enaʼö lö tebulö urasoi waʼomuso dödö ba wamalua halöwögu?’

21. Hadia zi tola lafaduhusi tödö ira satua sokubaloi?

²¹ Böi olifu ami wa lö niʼandrö Yehowa enaʼö moʼahonoa ami. Niʼandrönia yaʼia daʼö enaʼö lö faröi ami khönia. (1 Ko. 4:2) Iʼameʼegö tödö Yehowa waʼerege dödö Waulo hegöi faʼalöfaröinia. Tola göi faduhu dödömi wa iʼameʼegö tödö fefu halöwö si no mifalua ba wamosumange yaʼia. Lö irai ”olifu ia halöwömi hegöi faʼomasimi börö döinia, me no mangai halöwö ami ba niha niʼamoniʼö ba lö miböhöli wamalua yaʼia”.—Heb. 6:10.