1-2. Eky’erileberyako kya Paulo kyangawatikya kiti abasyakulu b’endeko ba munabwire?

 OMUKWENDA Paulo abya n’olwanzo oko baghala babo. Abya akakola omubírí n’omuhwa busana n’eribalandako. (Emib. 20:31) Busana n’ekyo, abaghala n’abali babo babya bamwanzire kutsibu. Kiro kighuma, omughulu abasyakulu b’endeko ye Efeso bowa ngoko sibendisyaswamulolako “abosi mobalira n’omulenge.” (Emib. 20:37) Kutya, abasyakulu betu b’endeko abakayiherera banzire abaghala n’abali babo bo kutsibu kandi bakakola ekyosi ekyo bangatoka busana n’eribawatikya. (Flp. 2:16, 17) Aliwe, oko sindi ndambi hakanabya emyatsi eyo abasyakulu b’endeko batetoka erikola bweghu-bweghu. Ekyangabawatikya niki?

² Abasyakulu betu abakakola omubírí n’omuhwa banganalengekania oko eky’erileberyako kya Paulo. (1 Kor. 11:1) Syabya n’obutoki obuli ng’obw’abamalaika. Paulo abya mundu oyutahika-hikene naye oko sindi ndambi ikikanamukalako erikola ebyuwene. (Rom. 7:18-20) Kandi anabya n’ebikalire bingyi ebyabya akalwa nabyo. Aliwe Paulo mwataleka erikolera abaghala n’abali babo n’omuhwa kutse mwataherya obutseme bwiwe. Abasyakulu b’endeko bamabikwama eky’erileberyako kya Paulo, ibanganalola embere erikolera Yehova isibataherya obutseme nomo bangabya omo maligho. Muleke tulebaye nga bangakola batya bati.

3. Omo mwatsi ono tukendikania okuki, tukendigha n’ekindi kyahi?

³ Omo mwatsi ono, tukendikania oko myatsi ini eyikabya nga yikakala oko basyakulu b’endeko: (1) eribya n’endambi eyitosire busana n’omubírí w’eritulira n’eyindi myatsi eyo litolere ibakola, (2) eribana endambi y’erisikya emitima y’abaghala n’abali betu, (3) erilwa n’obulema bwabo, na (4) erikola haghuma n’abandi bandu abatahika-hikene. Tukendilangira ekyawatikaya Paulo y’omo maligho wiwe kandi n’abasyakulu b’endeko nga bangakwama eky’erileberyako kiwe kyo bati.

4. Busanaki esindi ndambi eribya b’erimbere omo mubírí w’eritulira lyanganakala oko basyakulu?

⁴ Busanaki si mwatsi olobire. Abasyakulu bawite emibírí mingyi y’erikola kandi litolere ibabya b’erimbere omo mubírí w’eritulira. Eky’erileberyako, kangyi-kangyi abangyi bak’imanira emihindano y’omo kati-kati k’eyenga n’erisondola Erigha ly’eBiblia ry’endeko. Kandi banganasyabya n’eyindi mikania y’erilabya. Bakayikasa erisisangira okw’ibegherya abaghombe bawatikya kandi banzire erisikya mutima abaghala n’abali betu. (1 Pet. 5:2) Abandi basyakulu bakakola oko mubírí w’obuhimbe n’owerisugha eBisenge by’oBwami n’eyindi myanya ey’eriramirya mo Yehova. Ng’abandi batuliri bosi b’omo ndeko, Omubírí w’omughaso munene owo abasyakulu bakakola ly’eritula engulu mbuya.​—Mat. 28:19, 20.

5. Paulo abya mutuliri oyuli eky’erileberyako ati?

⁵ Ekyo bang’igha omo eky’erileberyako kya Paulo. Omo risako ly’ Abanya Filipi 1:10, Paulo akatubwira ekyamuwatikaya atoke eribya akabana ebighuma by’omo mubírí w’eritulira, akabugha ati: ‘Imwatoka [eriminya ebiri n’omughaso munene kulenga].’ Paulo iyuwene-wene mwakwama erihano liwe. Mwahabwa omubírí w’eritulira, n’omo myaka mingyi omubírí w’eritulira oyo mwabya w’omughaso munene omo buyingo bwiwe. Iniakatulira “embere sy’abandu kandi omo yindi nyumba n’omo yindi nyumba.” (Emib. 20:20) Mwatatwirirya omubírí wiwe w’eritulira w’oko ndambi nyilebe y’omo musibo kutse oko kiro kilebe ky’eyenga. Abya iniakasondekanaya ehyanya hy’eritulira ahosi-hosi ahangatoka n’oko ndambi yosi-yosi! Eky’erilebeyako, omughulu abya akalindirira abalikyabo be Atene, mwatulira ekikuto ky’abandu b’obusike, nibya n’abandi ba kubo mobaligha ekwenene. (Emib. 17:16, 17, 34) Nibya n’omughulu abya “omo muliki,” Paulo mwabya akatulira abamutimbireko.​—Flp. 1:13, 14; Emib. 28:16-24.

6. Paulo mwakangirirya abandi b’erikolaki?

⁶ Paulo mwakolesya endambi yiwe yo ndeke. Abya iniabeghere erikokya abandi eritulira haghuma naye. Eky’erileberyako, oko lughendo lwiwe lw’erimbere lw’obumisionere, mwaghenda haghuma na Yoane Mariko, n’oko lughendo lw’akabiri, mwaghenda na Timoteo. (Emib. 12:25; 16:1-4) Ahate eritika-tika Paulo mwakola ekyosi ekyo angatoka erikangirirya abalume abo eriteghekania endeko, ngoko bangakola omubírí w’erilisya esyombuli sy’oMungu sy’omo ndeko, kandi ngoko bangabya bakangirirya abatolere.​—1 Kor. 4:17.

7. Abasyakulu bangakwama bati ebyo Paulo abugha omo Abanya Efeso 6:14, 15?

⁷ Esomo. Abasyakulu banganakwama emibere ya Paulo omw’itulira lukyo kwa lukyo, aliwe n’omw’ibya ibanayiteghekire eritulira ehosi-hosi n’oko katambi kosi-kosi ngoko bangatoka. (Soma Abanya Efeso 6:14, 15.) Eky’erileberyako, banganatulira omughulu bakaghula ebindu, kutse  oko mubírí wabo. Kutse omughulu bakakola oko mubírí w’erihinba amanyumba w’ekiteokrasi, banganatulira ababatimbireko n’abakabaghulaya ebindu. Ngoko Paulo abya akakola, abasyakulu banganakolesya endambi eyo bakalabaya omw’itulira ibanemubegherya abandi batuliri, n’abaghombe bawatikya.

8. Oko sindi ndambi, lyanganatolera abasyakulu ibakolaki?

⁸ Siritolere n’ahake oko basyakulu erilabya endambi nyingyi kutsibu y’omw’ikola emibírí y’endeko kutse ey’omutimbo erihika oko kika ky’eribula endambi y’erilabya omo mubírí w’eritulira. Eritoka erisunga endambi y’erikola emyatsi yosi eyo basabirwe erikola, lyanganatolera oko sindi ndambi ibaghana eriligha eyindi mibírí eyo bakabatomekera. Enyuma sy’erilengekania n’erisaba busana n’omwatsi oyo, banganahika okw’ilangira ngoko bamabiligha omubírí oyo, isibenditoka erikola eyindi myatsi y’omughaso munene. Emyatsi eyo yanganabya ng’erisondola eriramya ly’eka obuli yenga, eribya n’omuhwa omo mubírí w’eritulira, kutse eribegherya abana babo eritulira. Abandi bakalangira erighana eritomekerwa eyindi mibírí nga rikalire, aliwe banganikirirya ngoko Yehova anasi ko banzire erikola emibírí mbiriri-mbiriri eyo basabirwe yo ndeke.

9. Ni mwatsi wahi owangakala oko basyakulu kundi bawite emyatsi mingyi y’erikola?

⁹ Busanaki anganabya mwatsi akalire. Abandu ba Yehova bawite maligho mangyi. Omo biro by’enduli bino, itwe bosi tulaghire okw’isikibwa mutima, oko buwatikya, n’okw’ikiranibwa. Kandi n’oko sindi ndambi hane abandi abalaghire oko buwatikya batoke eriyihighula oko mighendere mibi. (1 Tes. 5:14) Okw’ibugha ekwenene, abasyakulu sibangatoka eribughaho amaligho wosi awakahikira abandu ba Yehova. Nomo bine bitya, Yehova anzire ati ngambe abasyakulu ibabya bakakola ekyosi ekyo bangatoka erisikya abandu ba Yehova b’omutima n’eribateya. Abasyakulu abawite ebingyi by’erikola bakabana bati endambi y’eriha abaghala n’abali betu b’obuwatikya obo balaghireko?

10. Erikwamana ne 1 Abanya Tesalonike 2:7, Paulo mwakolaki erikangania ngoko anzire abandu ba Yehova?

¹⁰ Eky’erileberyako kya Paulo. Paulo iniakasondekanaya ehyanya hy’erisima n’erisikya abaghala n’abali babo b’omutima. Ni mwatsi mubuya oko basyakulu erikwama eky’erileberyako kiwe omw’ibya n’olwanzo n’obwenge oko baghala n’abali betu. (Soma 1 Abanya Tesalonike 2:7.) Paulo iniakabwira abaghala n’abali babo ngoko abanzire kandi ngoko Yehova naye abanzire. (2 Kor. 2:4; Efe. 2:4, 5) Paulo iniakakolera ab’omo ndeko ng’abira biwe, iniakalabaya endambi haghuma nabo. Mwakangania ngoko ayiketere ibo omw’ibabwira ekwenene oko bikamuhanga-hangaya n’obutahika-hikene bwiwe. (2 Kor. 7:5; 1 Tim. 1:15) Aliwe, Paulo, mwatahira obulengekania bwiwe bosi b’oko maligho wiwe. Omo mwanya w’erikola atya, iniakanza eriwatikya abaghala babo.

11. Ekyaleka Paulo iniahana abaghala n’abali babo niki?

¹¹ Oko sindi ngendo, Paulo abya atolere iniahana abaghala n’abali babo. Aliwe mwatakola atya  n’ahake busana abahiteneko. Mwabahana kundi abya anzirebo kandi asonda eribateya oko bwiko mbiriri-mbiriri. Mwayikasa erileta erihano eryowikire bweghu-bweghu, kandi abya anzire ibaligharyo. Eky’erileberyako, omo baruha nguma oko Abanya Korinto, Paulo mwahabo amahano awakalire. Enyuma sy’erihandika ebaruha eyo, mwabatumira Tito. Paulo mwahangya-hangya eriminya nga bakendiyiwata bati busana n’ebaruha yiwe. Mwatsema kutsibu eryowa ngoko mobaligha amahano wiwe n’erikolesyagho!​—2 Kor. 7:6, 7.

12. Abasyakulu bangahira bati omo Bakriso balikyabo mw’akaghala?

¹² Esomo. Abasyakulu banganakwama eky’erileberyako kya Paulo omw’ilabya endambi haghuma n’aBakristo balikyabo. Enzira nguma y’erikola batya ly’erihika oko mihindano y’endeko kw’embere batoke erisubya abandi b’omutima bakakania nabo. Erisubibwa mutima eryo mughala kutse mwali wetu alaghireko kangyi-kangyi likasaba esyodakika nge. (Rom. 1:12; Efe. 5:16) Omusyakulu oyukakwama eky’erileberyako kya Paulo akakolesaya n’eBiblia eriwatya obwikirirya bw’abaghala n’abali babo n’eribibukya kwenene ngoko oMungu anzirebo. N’ekindi, akasonda ati baminye ngoko abanzire. Abeghere eribya akakania nabo kandi akasondekanaya ehyanya hy’eribasima. Omughulu omusyakulu atolere erihana omundu, akaleta amahano awahulikirirene n’eKinywa ky’oMungu. Akabugha oko mwatsi mulebe butsira eriyitimbya-timbya, aliwe akakola atya n’olwanzo kundi anzire mughala kutse mwali wetu iniakolesya erihano liwe.​—Gal. 6:1.

13. Eritendihikahikana ly’omusyakulu lyanganaleka iniayowa ati?

¹³ Busanaki lyanganakala. Abasyakulu sibahika-hikene. Nabo bakakola amakosa ng’abandi bandu. (Rom. 3:23) Kyanganabakalako eribya n’amalengekania awuwe okw’itendihika-hikana lyabo ibibene-bene. Abaghuma banganahangya-hangya kutsibu busana n’eritendihika-hikana lyabo neryo ibabunika mutima. Abandi banganayihambulya busana n’obulema bwabo ibabugha bati si mwatsi mulito na kandi sibangakola mabindule wosi-wosi.

14. Erikwamana n’erisako ly’ Abanya Filipi 4:13, eriyikehya molyawatikya liti ye Paulo eribya n’amalengekania awatolere busana n’eritendihika-hikana liwe?

¹⁴ Eky’erileberyako kya Paulo. Kusangwa Paulo abya akayikehya mwabya inianasi ngoko syangatokire erilwa n’obulema bwiwe omo kaghala kiwe iyuwene-wene. Abya alaghire oko kaghala ak’oMungu angaha omundu. Embere, Paulo abya mutsibu, abya n’omuhwa w’eryendererya aBakristo. Aliwe enyuma syaho, mwaminya ngoko ebyo abya akakola abya makosa kandi abya ayiteghekire eribindula amalengekania n’emibere yiwe. (1 Tim. 1:12-16) Busana n’obuwatikya bwa Yehova, Paulo mwabya mulisya w’olwanzo, oyukakwira abandi b’obulighe, n’oyukayikehaya. Mwayibandya b’omo busana n’eritendihikahikana liwe; aliwe  mwatikalira eribya akalengekania kubo ko kutsibu. Omo mwanya w’ekyo, mwayiketera ngoko Yehova angamughanyire. (Rom. 7:21-25) Mwatayilindirira kw’eribya oyuhika-hikene. Omo mwanya w’ekyo, mwayikasa eryuwania emibere yiwe y’eKikrito kandi kusangwa abya mundu oyukayikehaya mwayiketera obuwawitikya bwa Yehova eriberererya omubírí wiwe.​—1 Kor. 9:27; soma Abanya Filipi 4:13.

15. Omusyakulu w’endeko angatoka ati eribya n’amalengekania awuwene okw’itendihika-hikana liwe?

¹⁵ Esomo. Abasyakulu sibalisombolawa kundi bahika-hikene. Nomo byangabya bitya, Yehova anzire ibaligha amakosa wabo n’eriyikasa eryuwania emibere yabo y’eKikristo. (Efe. 4:23, 24) Litolere omusyakulu iniakolesya eriyighisya eBiblia riwe eriminya aho atolere eryuwania. Neryo Yehova iniakendimuwatikya eribya n’obutseme n’eribya musyakulu mubuya.​—Yak. 1:25.

16. Ekyangabya niki omusyakulu amabihira obulengekania bwiwe b’okw’itendihika-hikana ly’abandi ko kutsibu?

¹⁶ Busanaki lyanganakala. Omughulu abasyakulu bakalabaya endambi nene yo haghuma n’abaghala n’abali betu omo ndeko, banganalangira sesene eritendihika-hikana ly’abandi. Neryo batetayiteya ndeke, ibanganabahitanako, ibanganabula obwenge, kutse ibanganabya bakabatswera. Paulo mwabwira aBakristo ati Sitani anganzire ibakola batya.​—2 Kor. 2:10, 11.

17. Paulo abya n’amalengekania awali ati oko baghala n’abali babo?

¹⁷ Eky’erileberyako kya Paulo. Iniabeghere eribya n’amalengekania awatolere oko baghala n’abali babo. Abya inianasi ndeke ngoko mobakola amakosa, n’oko mughulu mulebe ebyo bakola mobyamwaghalya. Aliwe, Paulo abya inyanasi ngoko omundu erikola ekosa sibughambu ni mundu mubi. Abya anzire abaghala babo neryo abya iniakahira obulengekania bwiwe b’oko mibere yabo mibuya. Abaghala n’abali babo bamabya ibabya bakalangira erikola ekibuya nga likalire, mwasombola erilengekania ati babya ibananzire erikola ebyuwene n’ebitunganene n’akandi ngoko babya batolere eriwatikibwa.

18. Wamighaki wabilangira ngoko Paulo asoha omwatsi wa Eodia na Sintike? (Abanya Filipi 4:1-3)

¹⁸ Terilengekania oko ky’erileberyako kya Paulo, ngoko awatikaya abali betu babiri b’omo ndeko ye Filipi. (Soma Abanya Filipi 4:1-3.) Alinga Eodia na Sintike babya n’eritendihulikirirana, kandi alinga obwira bwabo mobwaholoka. Paulo mwatabya kubo ko mukali kutse eribatswera muhanda; omo mwanya w’erikola atya mwahira obulengekania bwiwe b’oko mibere yabo mibuya. Abali betu bataleghula abo babya ibabirikolera Yehova y’omo myaka mingyi. Paulo abya inianasi ngoko Yehova abanzire. Kundi Paulo mwabya n’amalengekania awuwene oko bali betu abo, mwabahana ati bahireho obuholo omo kati-kati kabo. Kusangwa Paulo mwabya akahira obulengekania buwe b’oko mibere mibuya y’abandi, mokyaleka iniatoka eribya iniane n’obutseme kandi mwatsunga obwira obuwatire n’ab’omo ndeko eyo.

19. (a) Abasyakulu bangatoka bati eribya ibane n’amalengekania awuwene oko Bakristo balikyabo? (b) Epitsa y’omusyakulu oyukabiraya eKisenge ky’oBwami ikakwighisayaki?

 ¹⁹ Esomo. Inywe basyakulu, mubye mukasondekania emibere eyuwene eyo abaghala n’abali benyu bali nayo. Obuli mundu syahikahikene; aliwe, obuli mundu anawite emibere eyo twanganatsemera. (Flp. 2:3) Kwenene, esindi ndambi abasyakulu banganaha mughala wetu kutse mwali wetu y’erihano. Aliwe ngoko Paulo abya, litolere abasyakulu ibayikasa kutsibu eritendihira obulengekania bwabo b’oko binywa kutse oko mategheko w’omundu awakahitanaya. Omo mwanya w’erikola batya, litolere ibahira obulengekania b’okw’ilangira ngoko omundu oyo ali n’olwanzo oko Yehova, eriyiyinia liwe omo mubírí wa Yehova, n’oko butoki bwiwe bw’erikola ekibuya. Abasyakulu abakahira obulengekania bwabo b’oko mibere mibuya y’abandi bakawatikaya abaghala n’abali betu eriyowa ngoko banzirwe n’abosi b’omo ndeko.

20. Ekyangawatikya abasyakulu erilola embere eribana endundi y’omo eky’erileberyako kya Paulo niki?

²⁰ Inywe basyakulu mukendilangira ngoko eriyitsinga erigha eky’erileberyako kya Paulo likendibawatikya. Eky’erileberyako, omo kitabu Fahirisi, wanganalebya ahali omutwe mukulu “Paulo” nikwa oko katswe “mfano kwa wazee Wakristo.” Omughulu ukendibya ukasoma emyatsi eyitondekene aho, uyibulaye, ‘Eky’erileberyako kya Paulo kyanganyiwatikya kiti eritendiherya obutseme omughulu ngakola omubírí waghe w’omusyakulu w’endeko?’

21. Abasyakulu banganikirirya mwatsi wahi?

²¹ Abasyakulu, mwibuke ngoko Yehova syalibasaba eribya bandu abahika-hikene; akabasaba eribya bataleghula. (1 Kor. 4:2) Yehova mwatsemera omubírí w’omuhwa wa Paulo n’obutaleghula bwiwe. Wanganikirirya ngoko Yehova akatsemera omubírí owo ukamukolera. Yehova sy’endisyibirirwa n’ahake “omubírí wenyu, n’olwanzo olo mwakangaya busana naye imwabirikolera kandi mukinakolera abandu b’oMungu.”​—Ebr. 6:10.