1-2. Eky’okureeberaho ky’entumwa Paulo nikibaasa kuhwera kita abareeberezi obunaku obu?

 ENTUMWA Paulo akaba naakunda ab’eishe-emwe bagyenzi be. Akaba naayehenenga ahabwabo. (Byak. 20:31) Kandi nabo, bakaba nibamukunda munonga. Eizooba rimwe, abareeberezi ba Efeso ku baamanyire ngu tibarikwija kugaruka kureeba Paulo, ‘bakarira munonga.’ (Byak. 20:37) Abareeberezi baitu nabo nibakunda munonga ab’eishe-emwe na banyaanyabo, kandi nibeehayo n’agaabo goona kubahwera. (Fil. 2:16, 17) Kwonka obumwe, abareeberezi nibagumirwa. Niki ekirikubaasa kubahwera?

² Abareeberezi baitu abeeziriki nibabaasa kwegyera ahari Paulo. (1 Kor. 11:1) Akaba ataine maani nk’aga baamaraika. Paulo akaba ari omuntu otahikiriire obumwe owaabaire naagumirwa kukora ekihikire. (Rom. 7:18-20) Kandi akatunga emirabanamu mingi. Kwonka Paulo tarahanikire nari kubura kushemererwa. Abareeberezi baatooreza Paulo, nibabaasa kusingura embeera zigumire ezi barikurabamu, kandi bagume bashemereirwe barikuheereza Yehova. Ka tureebe oku barikubaasa kukikora.

3. Nituza kushwijuma ki omu kicweka eki, kandi nituza kuhwerwa kukora ki?

³ Omu kicweka eki, nituza kushwijuma ebintu bina ebirikukira kugumira abareeberezi: (1) okuringaaniza okubuurira n’obundi bujunaanizibwa, (2) okuba abariisa abarikufayo, (3) okwemera obweremwa bwabo, (4) n’okwemera obweremwa bw’abandi. Nituza kureeba oku Paulo yaasingwire buri mbeera egyo, n’oku abareeberezi barikubaasa kumutooreza.

4. Ahabw’enki kitarikworobera abareeberezi kwebembera omu murimo gw’okubuurira?

⁴ Ekirikubaasa kukireetera kuguma. Abareeberezi baine  obujunaanizibwa bwingi oyihireho okwebembera omu murimo gw’okubuurira. Nk’eky’okureeberaho, baingi nibaihaihana omu kuba baaceyamaani b’oruteerane rw’aha gati ya saabiiti n’okwebembera Okwega Baibuli okw’Ekibiina. Nibabaasa kuba baine n’obujunaanizibwa obundi obw’okuha embazo. Nibatendeka abaheereza, kandi nibejumbira kimwe omu kugumya ab’eishe-emwe na banyaanyabo. (1 Pet. 5:2) Abareeberezi abamwe nibaheereza omu kwombeka Ebyombeko by’Obukama n’okubihunduuza, n’aha byombeko by’ekibiina ebindi. Kandi kushushana n’abandi omu kibiina, omurimo mukuru ogu abareeberezi barikwebembeza n’okubuurira amakuru marungi.—Mat. 28:19, 20.

5. Paulo akataho ky’okureeberaho ki nk’omubuurizi?

⁵ Eky’okureeberaho kya Paulo. Omu Abafilipi 1:10, Paulo naatugambira ekyamuhweraire. N’okumanya “ebirikukira” obukuru. Paulo akakuratira obuhabuzi obu we wenyini yaahaire. Akaheebwa obuheereza, kandi kumara ebyasha, akaba naareeba obuheereza obwo nka kimwe aha bintu bikuru munonga. Akaba naabuurira omu rweteeraine, n’enju aha nju. (Byak. 20:20) Akaba atarikubuurira omu bwire bumwe omu izooba, nari eizooba rimwe omu saabiiti. Kureka akaba naakoresa buri mugisha gwona kubuurira! Nk’eky’okureeberaho, obu yaabaire ategyereize bagyenzi be omuri Aseene, akabuurira abantu b’ebitiinisa, kandi hakarugamu ebirungi. (Byak. 17:16, 17, 34) Nangwa n’obu Paulo yaabaire ari omu kihome, akabaasa kugumizamu naabuurira.—Fil. 1:13, 14; Byak. 28:16-24.

6. Paulo akatendeka abandi kukora ki?

⁶ Paulo akaba naakoresa gye obwire bwe. Akaba naakira kweta abandi kumwegaitaho omu buheereza bwe. Nk’eky’okureeberaho, omu rugyendo rwe rw’obumiisani, akagyenda na Yohaana Mako, kandi omu rugyendo orwa kabiri, akagyenda na Timoseo. (Byak. 12:25; 16:1-4) Buzima, Paulo akafayo kwegyesa abashaija aba oku baine kutebeekanisa ekibiina, oku baine kukora omurimo gw’okureeberera ab’eishe-emwe, n’okuba abeegyesa barungi.—1 Kor. 4:17.

7. Abareeberezi nibabaasa kugyendera bata aha kwehanangiriza kwa Paulo okuri omu Abaefeso 6:14, 15?

⁷ Eky’okwega. Abareeberezi nibabaasa kutooreza Paulo, ti mu kubuurira enju aha nju kyonka, beitu n’okuba beeteekateekire kubuurira buri kutunga omugisha. (Shoma Abaefeso 6:14, 15.) Nk’eky’okureeberaho, nibabaasa kubuurira baaba nibagura ebintu, nari baaba bari aha murimo. Nari baaba nibeejumba omu kwombeka ebyombeko by’ekibiina, nibabaasa kubuurira abataahi, n’abarikubaguza ebintu. Nk’entumwa Paulo, abareeberezi nibabaasa kukoresa obwire obu barikuba bari omu buheereza kutendeka abandi, otwariiremu abaheereza.

8. Obumwe, omureeberezi naaba aine kukora ki?

 ⁸ Abareeberezi tibashemereire kwehenenga omu mirimo y’ekibiina nari eya saketi bakaburwa obwire bw’okubuurira. Nibamanya obugarukiro bwabo, ekirikumanyisa ngu obumwe nibaba baine kwanga kwikiriza obujunaanizibwa obumwe. Bwanyima y’okuteekateeka n’okushaba, nibabaasa kwetegyereza ngu baikiriza obujunaanizibwa obwo, nibaija kwehuzya ebintu ebikuru. Ebikuru ebi nibitwariramu okwebembera okuramya kw’eka buri saabiiti, okwejumba omu kubuurira, nari okutendeka abaana baabo omu kubuurira. Abamwe nibabaasa kugumirwa kwanga obujunaanizibwa, kwonka nibabaasa kuhamya ngu Yehova naayenda ngu babe abaringaaniza omu bintu byona.

9. Abareeberezi abaine bingi by’okukora nibagumirwa kukora ki?

⁹ Ekirikubaasa kukireetera kuguma. Abaheereza ba Yehova nibahikwaho okugyezibwa kwingi. Omu biro ebi eby’emperu, twena nitwenda kugumibwa, kuhwerwa, n’okuhuumurizibwa. Obumwe, abantu abamwe nibaba baine kuhwerwa kwetantara emitwarize mibi. (1 Tes. 5:14) Amazima gari ngu, abareeberezi tibarikubaasa kwihaho okugyezibwa kwona okw’abaheereza ba Yehova. Kwonka, Yehova naayenda ngu bakore kyona ekirikubaasika kugumya entaama ze n’okuzirinda. Abareeberezi abaine bingi by’okukora nibabaasa kutunga bata obwire bw’okuhwera Abakristaayo bagyenzi baabo?

10. Kuhikaana na 1 Abatesalonika 2:7, Paulo akaba naareeberera ata abantu ba Yehova?

¹⁰ Eky’okureeberaho kya Paulo. Paulo akaba naasherura oburyo bw’okusiima ab’eishe-emwe n’okubombeka. Abareeberezi nibakora gye baamutooreza bakatwariza abantu ba Yehova omu muringo gw’embabazi. (Shoma 1 Abatesalonika 2:7.) Paulo akahamiza Abakristaayo bagyenzi be ngu naabakunda, kandi ngu na Yehova naabakunda. (2 Kor. 2:4; Efe. 2:4, 5) Paulo akaba naatwariza ab’omu kibiina nka banywani be, arikumara nabo obwire. Akooreka ngu naabeesiga arikubagambira atarikubashereka ebyabaire nibimwerarikiriza n’obweremwa bwe. (2 Kor. 7:5; 1 Tim. 1:15) Kwonka, Paulo akaba atarikuta omutima aha buremeezi bwe. Kureka, akaba naayenda kuhwera ab’eishe-emwe bagyenzi be.

11. Ahabw’enki Paulo yaahanire ab’eishe-emwe na banyaanya?

¹¹ Obumwe kikaba nikyetengyesa Paulo kuhana ab’eishe-emwe na banyaanya. Kwonka akaba atarikukikora ahabw’okwenda kwemaraho ekiniga. Kureka akaba naabahana ahabw’okugira ngu naabafaho, n’ahabw’okwenda kubarinda akabi k’emiringo mingi. Obuhabuzi bwe bukaba buba bworobi kwetegyereza, kandi akaba naafayo kumanya oku buraayaakiirwe. Nk’eky’okureeberaho, omu baruha ei Paulo yaahandiikiire  Abakorinso, akabaha obuhabuzi bw’amaani. Bwanyima y’okuhandiika ebaruha egyo, akooherezayo Tito. Paulo akaba aine ekihika ky’okumanya oku baatwarize bwanyima y’okutunga ebaruha egyo. Ka yaashemereirwe ku yaamanyire ngu bakaikiriza gye obuhabuzi bwe!—2 Kor. 7:6, 7.

12. Abareeberezi nibabaasa kugumya bata Abakristaayo bagyenzi baabo?

¹² Eky’okwega. Abareeberezi nibabaasa kutooreza Paulo barikugira obwire bw’okushashaanuka n’abaheereza ba Yehova bagyenzi baabo. Omuringo gumwe ogw’okukora eki n’okuhika kare omu nteerane z’ekibiina kubaasa kugaaniira nabo ebirikwombeka. Obwire obwingi nikitwara edakiika nkye kugumya ow’eishe-emwe nari munyaanyazi-itwe. (Rom. 1:12; Efe. 5:16) Omureeberezi orikutooreza Paulo, naagumya ab’eishe-emwe bagyenzi be arikukoresa Ekigambo kya Ruhanga kubombeka, kandi naabahamiza ngu Ruhanga naabakunda. Ekindi, naayoreka ngu naakunda abu arikureeberera. Naaguma naahurizana nabo, kandi naasherura oburyo bw’okubeebaza. Omureeberezi yaaba aine kuha obuhabuzi, naabwegamiza aha Kigambo kya Ruhanga. Naagamba enshonga yenyini, kwonka omu muringo gw’embabazi ahakuba naafayo oku baraatware obuhabuzi bwe.—Gal. 6:1.

13. Obweremwa bw’omureeberezi nibubaasa kumureetera kwehurira ata?

¹³ Ekirikubaasa kukireetera kuguma. Abareeberezi tibahikiriire. Nabo nibakora enshobe. (Rom. 3:23) Obumwe nibabaasa kugumirwa kugira emiteekateekyere eringaniire aha bweremwa bwabo. Abamwe nibabaasa kuta omutima munonga aha bweremwa bwabo, kibareetere kwehurira kubi. Abamwe nibabaasa kuguma nibeehorereza ahabw’enshobe zaabo, kibareetere kutakora empinduka ezirikwetengyesa.

14. Kurugiirira aha 2 Abakorinso 4:7, obucureezi bukahwera buta Paulo kwemera obweremwa?

¹⁴ Eky’okureeberaho kya Paulo. Paulo omu bucureezi akamanya ngu tarikubaasa kusingura obweremwa bwe ahabwe. Akaba naayenda amaani agu Ruhanga arikuha. Enyima, Paulo akaba naahiiganisa Abakristaayo omu muringo gw’obwinazi. Kwonka bwanyima, akeetegyereza obweremwa bwe, kandi akaba ayeteekateekire kuhindura emiteekateekyere ye n’emitwarize ye. (1 Tim. 1:12-16) Paulo akaba omuriisa oine rukundo, embabazi, kandi omucureezi, ahabw’obuhwezi bwa Yehova. Obweremwa bwe bukaba nibumureetera obusaasi, kwonka akacwamu kwesiga Yehova kumusaasira omu mwanya gw’okuta omutima aha bweremwa bwe. (Rom. 7:21-25)  Akaba atarikuteekateeka ngu ahikiriire. Kureka, akakora munonga kuboneza emitwarize ye y’Ekikristaayo, kandi omu bucureezi yaayesiga Yehova kumuhwera kuhikiiriza omurimo gwe.—1 Kor. 9:27; shoma 2 Abakorinso 4:7.

15. Abareeberezi baine kugira miteekateekyere ki aha bweremwa bwabo?

¹⁵ Eky’okwega. Abareeberezi tibarikutooranwa ahabw’okugira ngu bahikiriire. Kwonka Yehova naayenda ngu baikirize obweremwa bwabo, kandi bagire emitwarize mirungi y’Ekikristaayo. (Efe. 4:23, 24) Omureeberezi ashemereire kweshwijuma arikukoresa Ekigambo kya Ruhanga, kandi akakora empinduka. Reero obwo, Yehova naija kumuhwera kushemererwa n’okuba omusinguzi.—Yak. 1:25.

16. Niki ekirikubaasa kubaho omureeberezi yaata omutima aha butahikiirira bw’abandi?

¹⁶ Ekirikubaasa kukireetera kuguma. Abareeberezi nibabaasa kumanya obweremwa bw’abari omu kibiina ahabw’okugira ngu nibakira kuba bari nabo. Kwonka baaba bategyendesereize, nibabaasa kubagirira ekiniga, kubatwariza kubi, nari kubacwera orubanja. Paulo akarabura Abakristaayo ngu ekyo nikyo Sitaane arikwenda ngu bakore.—2 Kor. 2:10, 11.

17. Paulo akaba aine miteekateekyere ki aha Bakristaayo bangye be?

¹⁷ Eky’okureeberaho kya Paulo. Akaba aine emiteekateekyere mirungi aha b’eishe-emwe na banyaanya. Akaba naamanya obweremwa bwabo, nangwa n’obumwe ebikorwa byabo bikaba nibimukwataho nk’omuntu. Kwonka, Paulo akaba naamanya ngu okugira emitwarize mibi, tikyo kimwe n’okuba omuntu mubi. Akaba naakunda ab’eishe-emwe bagyenzi be, kandi akaba naata omutima aha mitwarize yaabo mirungi. Ab’eishe-emwe na banyaanya ku baabaire bagumirwa kukora ekihikire, akaba ateekateeka ngu baine ebigyendererwa birungi, beitu ngu nibenda obuhwezi kyonka.

18. Nooyega ki omu muringo ogu Paulo yaakwatsiremu embeera ya Eodia na Suntuke? (Abafilipi 4:1-3)

¹⁸ Nk’eky’okureeberaho, reeba oku Paulo yaakwatsiremu embeera ya banyaanya babiri omu kibiina kya Filipi. (Shoma Abafilipi 4:1-3.) Eodia na Suntuke bakagira obutaikirizana bwashiisha omukago gwabo. Paulo tarabagiriire ekiniga nari kubacwera orubanja. Kureka akata omutima aha mitwarize yaabo mirungi. Bakaba bari abeesigwa abaabaire baheereize Yehova kumara obwire buraingwa. Paulo akaba naamanya ngu Yehova naabakunda. Paulo okubagiraho emiteekateekyere mirungi, kikamureetera kubahiga kushoboorora obutaikirizana bwabo. Emiteekateekyere ye mirungi ekamuhwera kuguma ashemereirwe, n’okugira omukago murungi n’ab’eishe-emwe omu kibiina ekyo.

19. (a) Abareeberezi nibabaasa kugira bata emiteekateekyere mirungi aha b’eishe-emwe bagyenzi baabo? (b) Noobaasa kwegyera ki aha kishushani ky’omureeberezi oriyo naaboneza Ekyombeko ky’Obukama?

¹⁹ Eky’okwega. Abareeberezi, mureebe emitwarize  mirungi ei ab’eishe-emwe na banyaanyazi-itwe baine. Buri omwe aharibo tahikiriire, kwonka aine emitwarize ei turikumwegombaho. (Fil. 2:3) N’amazima, obumwe n’obumwe abareeberezi nikiija kubeetengyesa kuhabura ow’eishe-emwe nari munyaanyabo. Kwonka kushushana na Paulo, baine kureeba ekirikukira aha bigambo by’omuntu ebirikugwisa kubi, nari ebikorwa bye. Baine kuta omutima ahari rukundo ei omuntu ogwo ainiire Yehova, okugumisiriza kwe omu kuheereza Yehova, n’okubaasa kwe kw’okukora ekirungi. Abareeberezi abaine emiteekateekyere mirungi, nibareetaho embeera nungi y’okukundana omu kibiina.

20. Abareeberezi nibabaasa kugumizamu bata nibagasirwa omu ky’okureeberaho kya Paulo?

²⁰ Imwe abareeberezi, nimwija kushanga kirikuhwera kugumizamu nimwegyera ahari Paulo. Nk’eky’okureeberaho, omu Watch Tower Publications Index, noobaasa kuza ahansi y’omutwe “Paulo” reero oze ahansi y’omutwe omukye “okubeera abareeberezi eky’okureeberaho.” Waaba nooshoma bimwe ebiriho, yebuuze oti, ‘Obu ndi omureeberezi, eky’okureeberaho kya Paulo nikibaasa kumpwera kita kuguma nshemereirwe ndikuhikiiriza obujunaanizibwa bwangye?’

21. Abareeberezi nibabaasa kugira buhame ki?

²¹ Abareeberezi, mukimanye ngu Yehova tarikubashaba kuba abahikiriire hati, kureka naabashaba kuba abeesigwa. (1 Kor. 4:2) Obweziriki bwa Paulo n’obwesigwa bwe bikashemeza Yehova. Naiwe noobaasa kugira obuhame ngu Ruhanga naasiima ebi orikukora omu buheereza bwe. Yehova tarikubaasa “kwebwa emirimo yaanyu n’okukunda oku mwayorekire aha iziina rye, obu mwaheereza abarikwera, abu mukirikuheereza na hati.”—Heb. 6:10.