1-2. Luholo lutshi gifezegeselo gia mupostolo Phaula giajiya gukuatesa akulu mangino?

 MUPOSTOLO Phaula wakhalele muzumba aphangi’enji. Wakhalele mutshita mudimo wakola ha guakuatesa. (Makal. 20:31) Aphangi ene akhalele nji gumuzumba muavula. Lusugu lumoshi, tangua akulu a gu Efeso ajiyile egi mbaashigo gudimona luko n’enji, “mukut’awo agasue adidile mangololo”. (Makal. 20:37) Luholo lumoshi nji, akulu ana tshita mudimo wakola ha gukuatesa aphangi awo handaga ana guazumba muavula. (Fili. 2:16, 17) Uvi matangua ako akulu ana tagana nu malamba. Itshi yajiya guakuatesa ha guabinga?

² Akulu adi naye gulandula gifezegeselo gia Phaula. (1 Kol. 11:1) Phaula wakhalele muthu gifua athu agasue. Gakhalelego muthu watagana, wakhalele mutshita ngolo ha gukalagala ndaga jiabonga. (Roma 7:18-20) Wataganele nji nu malamba avula. Uvi galebelego muila nga gutotesa gusuanguluga guenji. Gula akulu alandula gifezegeselo gienji, ajiya gulandula gukalegela Yehowa mudimo nu gusuanguluga guagasue ngatshima adi mutagana nu malamba. Tuza mumona luholo akulu ajiya guyikalagala.

3. Itshi tuza muzuelela mu longo edi?

³ Mu longo edi tuza muzuelela ndaga nguana jiajiya gukhala lamba egi akulu atshite: (1) Gukhala nu tangua dia gukalagala mudimo wa gulongesa nu dia gutagenesa inemo iko, (2) guheta tangua dia gukolesa aphangi a mala nu a akhetu, (3) gulua nu gubola guawo hakhawo, nu (4) gutshita hamoshi nu athu ashigo atagana. Tuza mumona nji luholo Phaula wabingile malamba ene nu luholo akulu ajiya gulandula gifezegeselo gienji.

4. Matangua ako, yajiya gukhala lamba gudi akulu ha guhana gifezegeselo giabonga mu mudimo wa gulongesa. Mukunda natshi?

⁴ Mukunda natshi yajiya gukhala lamba. Akulu ana khala nu ginemo gia guhana gifezegeselo giabonga mu mudimo wa gulongesa, uvi ana khala nji nu inemo iko ya gutagenesa. Ha gufezegesa, akulu avula ana tuameza gudibungisa gua mukhatshi dia phoso, ana tuameza nji Gulonguga gua Biblia mu Hungu. Ana tshita nji ba diskur. Ana hana formasio gudi akuateshi a mudimo nu ana khala nu gusuanguluga ha gukolesa aphangi’awo a Aklisto. (1 Phet. 5:2) Akulu ako ana tshita mudimo wa gutunga nu gulondega Jinzo jia Ufumu nu jinzo jietu jiko. Uvi, gifua alongeshi agasue, mudimo wabalega ndando akulu adi naye gutshita udi gulongesa lukuma luabonga.—Mat. 28:19, 20.

5. Gifezegeselo gitshi Phaula wabembele mukunda nu mudimo wa gulongesa?

⁵ Ndaga jiakalegele Phaula. Ndaga yakuatesele Phaula ha gutshita muabonga mudimo wa gulongesa idi mu Filiphi 1:10, idi muzuela egi: “Mukambe gujiya ndaga jiabalega ndando.” Yene ndaga yatshitshile Phaula. Watombewe ha gukalagala mudimo wa gulongesa. Wawukalegele ivo yavula handaga gudi muene wakhalele nu ndando yavula. Wakhalele mulongesa “ha meso a athu agasue nu mu inzo nu inzo.” (Makal. 20:20) Phaula gakhalelego mulongesa phamba mu tangua dimoshi ngenyi mu lusugu nga lusugu lumoshi mu phoso, uvi wakhalele nji mulongesa mu ba okazio agasue. Ha gufezegesa, tangua diakhalele muene munengena Silase nu Timote gu Atene, wasendesele gulongesa hunji dimoshi dia athu lukuma luabonga, ako mukatshi diawo abuile alandudi a Yesu. (Makal. 17:16, 17, 34) Ikhale tangua diakhalele muene “mu bologo,” wakhalele mulongesa athu akhalele muza gumutala.—Fili. 1:13, 14; Makal. 28:16-24.

6. Formasio itshi Phaula wahanele athu ako?

⁶ Phaula wakhalele mukalegela tangua dienji muabonga. Wakhalele nji mutamega athu ako ha gutshita n’enji mudimo wa gulongesa. Ha gufezegesa, mu vuayaje ya thomo ya gimisionere, wayile nu Yone wakhalele mutamegewa nji egi Mako; uvi mu vuayaje ya mbadi, wayile nu Timote. (Makal. 12:25; 16:1-4) Idi yadiago egi Phaula wahanele Mako nu Timote formasio ha gujiya luholo lua gutuameza hungu, lua gubamba imeme nu lua gukhala alongeshi abonga.—1 Kol. 4:17.

7. Luholo lutshi akulu ajiya gukalegela longo didi mu Efeso 6:14, 15?

⁷ Longo akulu ajiya guzula. Akulu ajiya gulandula gifezegeselo gia Phaula gula adi mulongesa inzo nu inzo nu adi mukalegela ba okazio agasue ha gulongesa lukuma luabonga. (Tanga Efeso 6:14, 15.) Ha gufezegesa, ajiya  gulongesa tangua adi muya musumba ima nga tangua adi gu midimo yawo. Nga ndo, tangua adi mutunga Jinzo jia Ufumu, ajiya nji gulongesa lukuma luabonga gudi athu ana guadigila ima nga athu ana khala nawo hehi. Luholo lumoshi nu Phaula, akulu ajiya guhana formasio gudi akuateshi a mudimo nu aphangi ako a mu hungu tangua adi mu mudimo wa gulongesa.

8. Itshi akulu ajiya gutshita matangua ako?

⁸ Akulu ashigo naye phamba gudihana muavula ha gutagenesa inemo yawo ya mu hungu nga ya mu circonscription, uvi adi naye nji gukhala nu tangua dia gulongesa lukuma luabonga. Ha guyitshita, matangua ako ajiya gutuna inemo iko. Gungima dia gutangigiza nu dia gutshita gisambu, akulu ajiya gukotelesa egi gula atshigina inemo iko, yajiya gukhala lamba ha gutshita ndaga jiabalega ndando. Mukatshi dia ndaga jiene tuajiya gutanga: Gutuameza gukombelela gua mu fami, gulongesa muavula lukuma luabonga nga gukuatesa an’awo ha gulongesa. Yana khala lamba gudi akulu ako ha gutuna inemo iko. Uvi adi naye gujiya egi Yehowa wana jiya egi ana tshingina gutagenesa inemo yawo muabonga.

9. Ndaga itshi yajiya gukhala lamba ha gutshita gula akulu adi ndaga jiavula jia gukalagala?

⁹ Mukunda natshi yajiya gukhala lamba. Akombeledi a Yehowa ana tagana nu malamba avula. Mu masugu awa a gisugishilo, mukut’etu agasue tuana khala nu funu ya gikhesa nu ya ukuateshi. Matangua ako, aphangi ako ana khala nu funu ya ukuateshi hagula atshitshigo gubola. (1 Tes. 5:14) Tumujiya egi akulu ajiyilego gukatula malamba agasue tuana tagana nawo. Ikhale ngenyi, Yehowa wana tshigina egi akulu atshite yagasue ha gukolesa nu gubamba imeme yenji. Gula akulu adi nu ndaga jiavula jia gukalagala, yajiya gukhala lamba ha guheta tangua dia gukolesa aphangi’awo a Aklisto.

10. Ha gutadila 1 Tesalonike 2:7, itshi idi mumonesa egi Phaula wakhalele gudisagesa mukunda nu Aklisto ako?

¹⁰ Ndaga jiakalegele Phaula. Phaula wakhalele mushimana aphangi nu guahana gikhesa. Ha gulandula gifezegeselo gienji, akulu adi naye gukalegela aphangi awo Aklisto ndaga nu guzumba guagasue. (Tanga 1 Tesalonike 2:7.) Phaula wakhalele muwambela Aklisto ako egi wana guazumba, Yehowa nji wana guazumba. (2 Kol. 2:4; Ef. 2:4, 5) Wakhalele mubalegesa tangua hamoshi nu aphangi a mu hungu, akhalele diago mafuta enji. Ha gumonesa egi wakhalele guashila mutshima, Phaula wakhalele guawambela ndaga jiakhalele gumusagesa nu gubola guenji. (2 Kol. 7:5; 1 Tim. 1:15) Phaula gakhalelego musha matangi phamba mu malamba enji, uvi wakhalele nji mutshigina gukuatesa aphangi ako.

11. Mukunda natshi Phaula wahanele Aklisto ako malongo?

¹¹ Matangua ako, yakhalele mutoga egi Phaula ahane Aklisto ako malongo. Uvi gakhalelego guyitshita mu khabu. Wakhalele guyitshita handaga  wakhalele guazumba nu guabamba mu ingonza ya luholo nu luholo. Wakhalele mutshita yagasue hagula aphangi akotelese malongo enji nu a akalegele. Ha gufezegesa, hasonegele muene mukanda gudi Aklisto a gu Kolinto, waahanele malongo mu giamatshidia giagasue. Hamanesele muene gusonega mukanda wene, wawuhanele Tito ha guabatela nawo. Phaula wakhalele gudisagesa ha gujiya gula aphangi a gu Kolinto mbakalegela malongo ene. Uvi tangua diajiyile muene egi aphangi akalegele malongo ene, wasuangulugile muavula diago.—2 Kol. 7:6, 7.

12. Luholo lutshi akulu ajiya gukolesa Aklisto ako?

¹² Longo akulu ajiya guzula. Akulu ajiya gulandula gifezegeselo gia Phaula gula adi mubalegesa tangua hamoshi nu Aklisto ako. Ha guyitshita, ajiya guzula minuta yazonda gutuama egi gudibungisa gusendese ha guta maga adi muhana gikhesa nu aphangi ako. Matangua avula, yanago gutoga minuta yavula ha gukuatesa phangi udi nu funu ya gikhesa. (Roma 1:12; Ef. 5:16) Ha gulandula gifezegeselo gia Phaula, akulu adi naye nji gukalegela Biblia ha gukolesa gutshigina gua aphangi nu ha guamonesa egi Nzambi wana guazumba. Akulu adi naye nji guamonesa egi ana guazumba. Adi naye gukhala nu khadilo dia guta nawo maga nu guashimana mukunda nu ndaga ana kalagala. Akulu adi naye guhana malongo adi gudivua nu Mbimbi ya Nzambi. Tangua adi muhana malongo ene nu guzumba guagasue, adi naye guamonesa haphelo ndaga adi naye gukalagala.—Gal. 6:1.

13. Ndaga jitshi akulu ajiya gutangiza mukunda nu gubola guawo?

¹³ Mukunda natshi yajiya gukhala lamba. Akulu ashigo athu atagana. Ana kalagala nji gubola gifua athu agasue. (Roma 3:23) Matangua ako yajiya gukhala lamba gudi ene ha gutadila gubola guawo mu luholo luabonga. Ako ajiya guleba muila handaga adi gudisagesa muavula mukunda nu gubola guawo. Uvi ako ajiya gutangiza egi ndaga jiabola ana kalagala jishigo mulonga nu ashigo naye gusombegesa makalegelo awo.

14. Ha gutadila Filiphi 4:13, luholo lutshi khadilo dia gudibulumuisa diakuatesele Phaula ha gulua nu gubola guenji?

¹⁴ Ndaga jiakalegele Phaula. Khadilo dia gudibulumuisa diakuatesele Phaula ha gujiya egi gajiyilego gulua nu gubola guenji mu ngolo jienji hakhenji, uvi wakhalele nu funu ya ngolo jia Nzambi. Thomo Phaula wakhalele musagesa Aklisto muavula. Uvi gungima wakotelesele egi ndaga jiakhalele muene mutshita jiakhalele jiabola, hene watshitshile yagasue ha gusombegesa matangi nu umuthu wenji. (1 Tim. 1:12-16) Yehowa wamukuatesele ha gukhala mukulu udi  nu khadilo dia guzumba, dia gudisha ha fundo dia athu ako nu dia gudibulumuisa. Wakhalele mujiya egi watshitshile ndaga jiavula jiabola, uvi galanduilego gutangiza ndaga jiene. Washile mutshima egi Yehowa wamutotesele gubola guenji. (Roma 7:21-25) Gakhalelego gudifelela ha gutshita ndaga gifua muthu watagana. Uvi wakhalele mutshita ngolo ha gukudisa makalegelo a Uklisto nu wakhalele musha mutshima mu ukuateshi wa Yehowa ha gutagenesa ginemo gienji.—1 Kol. 9:27; tanga Filiphi 4:13.

15. Ndaga itshi akulu adi naye gujiya?

¹⁵ Longo akulu ajiya guzula. Akulu ashigo athu atagana. Uvi Yehowa wana tshigina egi akulu ajiye egi ana tshita nji ndaga jiabola nu adi naye gukudisa makalegelo a Uklisto. (Ef. 4:23, 24) Akulu adi naye gulonguga Mbimbi ya Nzambi ha gujiya ndaga adi naye gusombegesa mu monyo wawo. Ngenyi, Yehowa mbawakuatesa ha gukhala nu gusuanguluga nu ha gukhala akulu abonga.—Yak. 1:25.

16. Itshi yajiya gukalegewa gula akulu adi mutala phamba gubola gua aphangi?

¹⁶ Mukunda natshi yajiya gukhala lamba. Yajiya gukhala yaleba gudi akulu ha gumona gubola gua aphangi ako a mu hungu hana balegesa ene tangua hamoshi nawo. Gula akulu adi mutala phamba gubola gua aphangi, ajiya gusendesa guavila khabu, gutuna guakalegela ndaga nu gisemo nu guatangijila ndaga jiabola. Phaula watemesele Aklisto mu ndaga eyi hagula Satana gaabingigo.—2 Kol. 2:10, 11.

17. Luholo lutshi Phaula wakhalele mutadila aphangi’enji a Aklisto?

¹⁷ Ndaga jiakalegele Phaula. Phaula wakhalele mutadila aphangi’enji a Aklisto mu luholo luabonga. Uvi matangua ako, ndaga jiabola jiakhalele mukalagala ene jiakhalele gumusagesa. Ikhale ngenyi, Phaula wakhalele mujiya egi gula muthu watshita ndaga yabola, ishigo mukotelesa egi muthu muene udi muthu wabola. Wakhalele muzumba aphangi’enji nu wakhalele muhaga matangi enji muavula mu makalegelo awo abonga. Tangua aphangi akhalele mukalagala ngolo ha gutshita ndaga jiabonga, wakhalele mujiya egi adi nu matangi abonga nu adi phamba nu funu ya ukuateshi.

18. Longo ditshi wazula mu luholo Phaula wakuatesele Evodi nu Sentishe ha guvutula guhuima mukatshi diawo? (Filiphi 4:1-3)

¹⁸ Ha gufezegesa, tutadilenu luholo Phaula wakuatesele aphangi muyadi a akhetu a mu hungu dia gu Filiphi. (Tanga Filiphi 4:1-3.) Yajiya gukhala egi Evodi nu Sentishe akhalelego gudivua nu akhalelego luko mafuta. Phaula wakhalele mutala makalegelo awo abonga, ha fundo dia guavila khabu nga guatangijila ndaga jiabola. Aphangi ene akhalele mukombelela Yehowa nu gujinginyina guagasue sendese mualeha. Phaula wakhalele mujiya egi Yehowa wana guazumba. Luholo Phaula wakhalele mutadila aphangi ene mu luholo luabonga, waakuatesele ha guvutula guhuima mukatshi diawo. Phaula  wakhalele musha matangi enji mu makalegelo abonga a aphangi. Gutshita ngenyi guamukuatesele ha gubamba gusuanguluga nu ufuta wakola nu aphangi a mu hungu diene.

19. (a) Luholo lutshi akulu ajiya gulandula gutadila Aklisto ako mu luholo luabonga? (b) Longo ditshi wajiya guzula mu gifuanesa gidi mumonesa mukulu mumoshi udi muweva Inzo ya Ufumu?

¹⁹ Longo akulu ajiya guzula. Akulu adi naye gukamba gujiya makalegelo abonga a aphangi’awo a Aklisto. Muthu wagasue wana khala nu makalegelo abonga ngatshima tushigo athu atagana. (Fili. 2:3) Idi yadiago egi matangua ako, akulu ajiya guhana malongo gudi phangi mumoshi ha gulondega luholo luenji lua gutangiza. Uvi gifua Phaula, akulu ashigo naye gutala phamba gubola gua aphangi. Adi naye gujiya egi aphangi ana guzumba Yehowa, ana gukolesela ha gumukombelela nu ana tshita ngolo ha gukalagala ndaga jiabonga. Gula akulu adi mutala makalegelo abonga a aphangi, mbayikuatesa aphangi ha gudivua egi ana zumbiwa mukatshi dia hungu.

20. Luholo lutshi akulu ajiya gulandula guheta gubonga mu gifezegeselo gia Phaula?

²⁰ Gula akulu alandula gulonguga gifezegeselo gia Phaula, mbayakuatesa muavula. Ha gufezegesa, akulu ajiya guheta malongo avula mu Index des publications des Témoins de Jéhovah, ha muto wa lumene: “Paul” gungima aya ha gamuto ga lumene “exemple pour les anciens.” Tangua mukulu udi mutanga malongo ene, wajiya gudihula egi: ‘Luholo lutshi gifezegeselo gia Phaula giajiya gungukuatesa ha gubamba gusuanguluga guami tangua ngudi mutagenesa inemo yami?’

21. Ndaga itshi akulu ashigo naye gujimbila?

²¹ Akulu, jiyenu egi Yehowa ganago gumitoga ha gutshita ndaga gifua athu atagana, uvi wana tshigina egi mukhale ya gujinginyina gudi muene. (1 Kol. 4:2) Yehowa wasuangulugile muavula nu mudimo wakalegele Phaula nu gujinginyina guagasue. Enue nji mujimbilago egi Yehowa wana suanguluga muavula nu mudimo muana gumukalegela. Yehowa mbagajimbilago nga hazonda “mudimo muakalegele nu guzumba muamonesele mukunda nu jina dienji, luholo muakalegele athu a gijila mudimo nu mudi mulandula guakalegela.”—Heb. 6:10.