1-2. Ia duwen mehn kahlemeng en wahnpoaron Pohl eh kak sewese elder kan rahnwet?

 WAHNPOARON Pohl kin poakohng rie Kristian kan. E kin doadoahk laud pwehn apwalih irail. (Wiewia 20:31) Ihme kahrehda ienge tohnkaudok kan kin uhdahn poakohng ih. Ehu pako, ni elder kan nan Episos ar esehda me re sohla pahn pwurehng kilang Pohl, “irail koaros ahpw sengiseng laud.” (Wiewia 20:37) Riatail elder kan me kin doadoahk laud pil kin uhdahn poakohng riarail Kristian kan oh kin wia uwen arail kak pwehn sewese irail. (Pil. 2:16, 17) Ahpw ekei pak, e kin apwal ong elder kan en wia soahng koaros me re anahne wia. Dahme kak sewese irail?

² Elder kan me kin doadoahk laud kak medewe duwen mehn kahlemeng en Pohl. (1 Kor. 11:1) E sohte ahneki koahiek kan me tohnleng kan ahneki. E pil sohte unsek, oh mie ahnsou me e anahne nanti laud pwehn wia dahme pwung. (Rom 7:18-20) Oh e pil ahneki soangsoangen kahpwal tohto. Ahpw Pohl sohte uhdihsang eh doadoahk laud ong rie Kristian kan, de pil nsensuwedkihla eh doadoahko. Ni elder kan ar idawehn ahn Pohl mehn kahlemeng, irail kak pousehlahte papah Siohwa ni peren mehnda ma re kin ahneki kahpwal. Kitail pahn kilang ia duwen arail kak wia met.

3. Dahme kitail pahn koasoiapene nan iren onop wet, oh dahme kitail pil pahn sukuhlki?

³ Nan iren onop wet, kitail pahn koasoiapene soangen kahpwal pahieu me elder kan kin lelohng: (1) en toupahrek ong doadoahk en kalohk oh pwukoa teikan, (2) en wia silepen sihpw nsenoh men, (3) en dadaurete pahn ar soh unsek kan, oh (4) en iang meteikan me pil sohte unsek doadoahk. Kitail  pahn koasoiapene dahme sewese Pohl oh ia duwen elder kan ar kak kahlemengih ih.

4. Dahme kahrehda ekei pak e kin apwal ong elder kan en tiengla mwowe nan doadoahk en kalohk?

⁴ Dahme kahrehda e kakete apwal. Elder kan ahneki pwukoa tohto me iangahki en tiengla mwowe nan doadoahk en kalohk. Tohto irail kin wia chairman nan atail mihting en nan wihk oh pil wia Onop en Paipel en Mwomwohdiso. Irail pil kin wia padahk teikan. Irail pil kin wia soahng tohto pwehn kaiahne sounsawas kan oh pil perenki kangoange riarail Kristian kan. (1 Pit. 5:2) Ekei elder kan kin iang kauwada oh apwalih Wasahn Kaudok kan oh pil ihmw kan me kitail kin doadoahngki pwehn kaudokiong Siohwa. Ahpw duwehte koaros nan mwomwohdiso, elder kan kin keieu kesempwalki doadoahk en kalohki rongamwahwo.​—Mad. 28:19, 20.

5. Mehn kahlemeng dah me Pohl wiahda nin duwen sounkalohk men?

⁵ Ahn Pohl mehn kahlemeng. Nan Pilipai 1:10, Pohl padahkihong kitail dahme kahrehda e kin pweida nan kalohk. E koasoia: “Kumwail en pilada dahme keieu kesempwal.” Pein Pohl idawehn eh kaweido. E alehdi pwukoahn kalohk, oh erein sounpar tohto e kin wiahki doadoahk en kalohk me keieu kesempwal nan eh mour. E kin kalohk “nan wehipokon oh sang ihmw lel ihmw.” (Wiewia 20:20) E sohte kin kalohkte erein ahnsou ehu nan rahn ehu, de rahn ehute nan wihk ehu. E kin kalohk wasa sohte lipilipil oh pil ahnsou sohte lipilipil. Karasepe, nin doken eh awiawih ienge ko nan Adens, e kalohk ong pwihnen aramas lapalap ehu, oh ekei irail mwekidkihda met. (Wiewia 17:16, 17, 34) Pil erein eh “wie sensel,” Pohl kalohk ong irail kan me kousoan karanih ih.​—Pil. 1:13, 14; Wiewia 28:16-24.

6. Dahme Pohl kaiahne meteikan en wia?

⁶ Pohl kin doadoahngki mwahu eh ahnsou. E kin kalapw luke meteikan en iangih kalohk. Karasepe, ni keieun eh seiloak en misineri, e kahre Sohn Mark, oh ni keriauo, e kahre Timoty. (Wiewia 12:25; 16:1-4) Pohl wia uwen eh kak en kaiahne ohl riemeno ong ia duwen ara pahn koasoanehdi ehu mwomwohdiso, kangoange Kristian kan, oh ia duwen ara kak wiahla sounpadahk koahiek kei.​—1 Kor. 4:17.

7. Ia duwen elder kan ar kak idawehn ahn Pohl kaweido me kileldi nan Episos 6:14, 15?

⁷ Mehn kasukuhl. Elder kan kak alasang Pohl kaidehn sang ni arail kin kalohkte ihmw lel ihmw, ahpw sang ni arail kin onopadahng kalohk wasa oh ahnsou sohte lipilipil me re kak. (Wadek Episos 6:14, 15.) Karasepe, irail kak kalohk ni arail kin kohla netinet, de ni  arail wasahn doadoahk. De pil ni arail kin sewese kauwada Wasahn Kaudok kan, irail kak kalohk ong aramas akan me mi karanih wasao de ong aramas akan me kohla pwehn netiki arail kepwe kan. Duwehte Pohl, elder kan kak doadoahngki ahnsoun kalohk pwehn kaiahne meteikan, iangahki sounsawas kan.

8. Dahme elder kan ele anahne wia ekei pak?

⁸ Elder kan en dehr kin nohn kedirepwkihla pwukoahn nan mwomwohdiso kan eri sohla ahneki ahnsoun kalohk. Pwehn kolokolete arail toupahrek, ele ekei ahnsou irail anahne nda soh ong ekei pwukoa. Mwurin arail medemedewe oh kapakapki duwen met, ele irail pahn esehda me ma irail pil alehda ehu pwukoa, irail pahn kakete sohla kak apwalih soahng kan me keieu kesempwal. Soahng kesempwal pwukat iei me iangahki wia kaudok en peneinei ehuehu wihk, iang doadoahk en kalohk, de kaiahne neirail seri kan ong kalohk. Ekei kin apwalki en nda soh ong pwukoa teikan, ahpw irail kak kamehlele me Siohwa ketin mwahngih arail ineng en apwalih mwahu soahng koaros.

9. Dahme elder kan me kin wiewia soahng tohto kakete apwalki wia?

⁹ Dahme kahrehda e kakete apwal. Sapwellimen Siohwa aramas akan ahneki kahpwal tohto. Ni imwin rahn pwukat, kitail koaros anahne emen en kin kangoange, sewese, oh kansenamwahwih kitail. Oh ekei pak, ekei kin anahne sawas pwehn soikala tiahk sapwung kan. (1 Des. 5:14) Mehlel, elder kan sohte kak kihsang kahpwal koaros me sapwellimen Siohwa aramas akan kin ahneki. Ahpw Siohwa ketin kupwurki elder kan en wia uwen arail kak en kangoange oh pere sapwellime sihpw kan. Ia duwen elder kan me kin wiewia soahng tohto ar kak wiahda ahnsou pwehn sewese riarail Kristian kan me anahne sawas?

10. Nin duwen me 1 Deselonika 2:7 mahsanih, ia duwen Pohl eh kin nsenohki sapwellimen Siohwa aramas akan?

¹⁰ Ahn Pohl mehn kahlemeng. Pohl kin ahnsou koaros perenki kapinga rie Kristian kan oh kangoange irail. E pahn mwahu ong elder kan en idawehn eh mehn kahlemeng ni arail kin kasalehda limpoak oh kadek ong sapwellimen Siohwa aramas akan. (Wadek 1 Deselonika 2:7.) Pohl padahkihong rie Kristian kan me e poakohng irail oh me Siohwa ketin poakohng irail. (2 Kor. 2:4; Ep. 2:4, 5) Pohl kin wiahki irail kan nan mwomwohdiso kompoakepah kei, oh kin wiahda ahnsou ong irail. E kasalehda me e kin likih irail sang ni eh padahkihong irail dahme kin kapwunode ih oh duwen eh luwet akan. (2 Kor. 7:5; 1 Tim. 1:15) Pohl sohte kin medemedewehte pein eh kahpwal. Ahpw e kin men sewese rie Kristian kan.

11. Dahme kahrehda Pohl kihda kaweid ong rie Kristian kan?

¹¹ Ekei pak, Pohl anahne kaweidih rie Kristian kan. Ahpw e sohte kin wia met pwehki e lingeringer. E kin kihda kaweid pwehki e nsenohkin irail oh men pere irail sang soangsoangen  keper kan. E kin song en kihda kaweid me pahn mengei ong irail en wehwehki, oh e kin men irail en kapwaiada. Karasepe, nan ehu kisinlikou ko ong mehn Korint ko, Pohl kihda kaweid kehlail. Mwurin eh ntingihada kisinlikowo, e kadarala Taitus rehrail. Pohl uhdahn men ese ia duwen arail mwekidki nah kisinlikowo. Ia uwen eh peren ni eh esehda me irail ale kaweido oh kapwaiada!​—2 Kor. 7:6, 7.

12. Ia duwen elder kan ar kak kakehlakahda iengarail tohnkaudok kan?

¹² Mehn kasukuhl. Elder kan kak idawehn ahn Pohl mehn kahlemeng sang ni arail kin wiahda ahnsou ong iengarail tohnkaudok kan. Ehu ahl en wia met iei sang ni arail kin mwadangala ni mihting en mwomwohdiso kan pwehn kangoange meteikan. Pali laud en ahnsou, minit keite me re kin kangoange emen brother de sister. (Rom 1:12; Ep. 5:16) Elder men me kin idawehn ahn Pohl mehn kahlemeng pil kin doadoahngki Paipel pwehn kakehlakahda en rie Kristian kan pwoson oh kamehlelehiong irail me Koht ketin poakohng irail. Patehng met, e kin kasalehda me e poakohng irail. E kin kalapw koasoiong irail oh isaneki ahnsou mwahu kan en kapinga irail. Ni elder men eh pahn kihda kaweid, e anahne tehk mwahu me kaweido kin poahsoankihda Mahsen en Koht. E kin inen, ahpw e pil kadek pwehki e men rie Kristian ko en doadoahngki eh kaweido.​—Kal. 6:1.

13. Ia ahn elder kan pepehm duwen arail luwet kan?

¹³ Dahme kahrehda e kakete apwal. Elder kan sohte unsek. Duwehte meteikan koaros, irail kin wiahda sapwung. (Rom 3:23) Ekei pak, e kin apwal ong irail en ahneki madamadau pwung duwen arail luwet kan. Ekei mwein kin uhdahn pwunodki met me kahrehda re kin mworusala. Ekei irail kakete medewe me arail luwet kan sohte uhdahn kesempwal oh re sohte anahne wiahda wekidekla kan.

14. Nin duwen me Pilipai 4:13 mahsanih, ia duwen aktikitik eh sewese Pohl en ahneki madamadau pwung duwen eh luwet kan?

¹⁴ Ahn Pohl mehn kahlemeng. Pwehki Pohl aktikitik, e wehwehki me e sohte kak pein powehdi eh luwet kan. E anahne kehl me Koht kak ketikihda. Mwoweo, Pohl kin ngoangki kaloke Kristian kan. Ahpw mwuhr, e wehwehkihla me dahme e wiao sapwung, oh men wekidala eh madamadau oh tiahk. (1 Tim. 1:12-16) Pwehki sapwellimen Siohwa sawas, Pohl wiahla elder aktikitik oh limpoak men. E ese me e ahneki luwet tohto, ahpw e sohte kin medemedewehte soangen luwet pwukat. E kamehlele me Siohwa pahn ketin mahkohng. (Rom 7:21-25) E sohte kasik en unsek. E kin doadoahk laud pwehn kamwahwihala  eh irair en Kristian oh ni aktikitik likih me Siohwa pahn ketin sewese ih en kapwaiada eh doadoahko.​—1 Kor. 9:27; wadek Pilipai 4:13.

15. Ia duwen elder kan ar kak ahneki madamadau pwung duwen arail luwet kan?

¹⁵ Mehn kasukuhl. Elder kan sohte kin idihdida pwehki irail unsek. Siohwa ketin kasik me irail en pohnese arail sapwung kan oh kakairada irair en Kristian. (Ep. 4:23, 24) Elder men anahne doadoahngki dahme e sukuhlkihsang nan Paipel pwehn sewese ih diarada wasa kan me e anahne kamwahwihala reh. Eri Siohwa pahn ketin sewese ih en kin peren oh pil wia elder mwahu men!​—Seims 1:25.

16. Dahme kakete wiawi ma elder kan kin kilikilangete soh unsek en meteikan?

¹⁶ Dahme kahrehda e kakete apwal. Ni elder kan ar kin kalapw iang riarail kan nan mwomwohdiso, e kak mengei ong irail en esehda soh unsek en riarail kan. Ma elder kan sohte kanahieng, irail kakete lingeringerda pahrail, lemei ong irail, de kauwe. Pohl katamankihong Kristian kan me Sehdan pahn men irail en kin wia met.​—2 Kor. 2:10, 11.

17. Ia duwen Pohl eh kin kilangwohng rie Kristian kan?

¹⁷ Ahn Pohl mehn kahlemeng. Pohl kin ahnsou koaros medemedewehte soahng mwahu kan en rie Kristian kan. E ese me irail kin wiahda sapwung pwehki ekei pak arail wiewia kan kin kamedekihala ih. Ahpw Pohl ese me ni aramas emen eh kin wiahda sapwung, met sohte wehwehki me aramaso suwed. Pohl kin poakohng rie Kristian kan oh kin medemedewehte arail irair mwahu kan. Ma rie kan kin apwalki wia dahme pwung, Pohl kin pilada en medewe me irail uhdahn men wia dahme pwung ahpw ihte re anahne sawas.

18. Dahme ke sukuhlkihsang en Pohl eh sewese Iuodia oh Sindiki? (Pilipai 4:1-3)

¹⁸ Karasepe, medewehla ia duwen Pohl eh sewese sister riemen nan mwomwohdiso en Pilipai. (Wadek Pilipai 4:1-3.) Mwomwen me Iuodia oh Sindiki sohte pwungkipene ire ieu kahrehda ira sohla kompoakepahnki emenemen. Pohl sohte lemeiong de kauwe ira, ahpw e medemedewehte ara irair mwahu kan. Ira lih Kristian lelepek kei me papahkier Siohwa erein sounpar tohto. Eri Pohl ese me Siohwa ketin poakohng ira. Pwehki Pohl kin medemedewehte ara irair mwahu kan, e kangoange ira en wiahda popohl nanpwungara. Pohl kak ahnekihte peren oh kolokolete eh nanpwungmwahu rehn irail kan nan mwomwohdiso pwehki e kin kilikilangete arail irair mwahu kan.

19. (a) Ia duwen elder kan ar kak ahnekihte madamadau pwung duwen iengarail tohnkaudok kan? (b) Dahme ke kak sukuhlkihsang kilel en eldero me kamwakamwakele Wasahn Kaudok?

¹⁹ Mehn kasukuhl. Elder kan, kumwail rapahki irair mwahu en riamwail Kristian kan. Emenemen irail sohte unsek, ahpw emenemen  irail ahneki irair kaselel kan me kitail kak wauneki. (Pil. 2:3) Mehlel, ekei pak elder kan anahne kapwungala madamadau en riarail Kristian men. Ahpw duwehte Pohl, elder kan anahne nantihong en dehr kin medemedewehte ahn emen eh lokaia oh wiewia kalingeringer kan. Ahpw e mwahu irail en kin medemedewehte en aramaso eh poakohng Siohwa, eh kin dadaurete ni eh papah Koht, oh pil soahng mwahu kan me e kak wia. Elder kan me kin medemedewehte irair mwahu en meteikan kin sewese riarail Kristian kan en pehm me koaros nan mwomwohdiso kin poakohng irail.

20. Ia duwen elder kan ar kak pousehlahte paiekihda ahn Pohl mehn kahlemeng?

²⁰ Kumwail elder kan, amwail pousehlahte onopki ahn Pohl mehn kahlemeng pahn sewese kumwail. Karasepe, nan Watch Tower Publications Index, kumwail kak kilang oaralapo “Pohl” (Paul) oh pahnangin mwo, sawasepen oaralapo “mehn kahlemeng en elder kan” (example of elders). Ni amwail wadek ekei artikel kan wasao, pein idek rehmwail, ‘Ia duwen ahn Pohl mehn kahlemeng eh kak sewese ie en ahnekihte peren nin doken ei wiewia ei pwukoahn elder?’

21. Dahme elder kan kak kamehlele?

²¹ Elder kan, kumwail en tamataman me Siohwa sohte ketin kasik kumwail en unsek; e ketin kupwurki kumwail en kin lelepek. (1 Kor. 4:2) Siohwa ketin kupwurperenki ahn Pohl doadoahk laud oh eh lelepek. Kumwail kak kamehlele me Koht pil kin ketin kupwurperenki amwail kin doadoahk laud ong ih. Siohwa sohte pahn ketin “meliehla amwail doadoahk oh duwen amwail kin poakohng mware sang ni amwail kin papah aramas sarawi kan.”​—Ipru 6:10.