1-2. ¿Imaraykun apóstol Pabloq ejemplon umalliqkunata yanapanman?

 APÓSTOL Pabloqa anchatan iñiqmasinkunata munakuran, mana samaspataqmi llank’aran paykunata yanapananpaq (Hech. 20:31). Chaymi iñiqmasikunapas Pablota anchata munakuranku. Juj kutinmi Éfeso llaqtamanta umalliqkuna uyariranku apóstol Pablowan manaña jayk’aqpas tupanankuta, jinan “llapanku khuyayta waqaykuranku” (Hech. 20:37). Kunanpas umalliqninchiskunaqa Pablo jinan llapa hermanokunata munakunku, tukuy atisqankutataqmi ruwanku yanapanankupaq (Filip. 2:16, 17). Mayninpin ichaqa paykunapaq sasa kanman wakin ruwayninkuwan junt’ay. Chhaynaqa, ¿iman paykunata yanapanman?

² Umalliqninchiskunaqa apóstol Pabloq ejemplontan qatikunanku (1 Cor. 11:1). Payqa noqanchis jina juchayoq runa kasqanraykun kallpachakuran allin kaqta ruwananpaq (Rom. 7:18-20). Chaymantapas payqa imaymana sasachakuykunapin tarikuran, ichaqa manan pisiparanchu. Sichus umalliqkuna Pabloq ejemplonta qatikunqaku chayqa ima sasachakuykunapiña tarikuspapas kusisqan Jehová Diosta servinqaku.

3. ¿Imamantan kaypi yachasun?

³ ¿Ima ruwaykunan umalliqkunapaq sasa kanman? Tawamanta yachasun: Juj) Tiempotan orqonanku Diosmanta willanankupaq juj ruwayninkutapas junt’anankupaq. Iskay) Munakuywanmi iñiqmasikunata kallpachananku. Kinsa) Imapipas pantaruspaqa manan pisipanankuchu. Tawa) Sumaqllatan iñiqmasikunata yanapananku. Apóstol Pabloqa allintan chaykunata ruwaran, chaymi umalliqkunapas paypa ejemplonta qatikunanku. Chaykunamantan kaypi yachasun.

4. ¿Imanaqtinmi wakin umalliqkunapaq sasa kanman Diosmanta willayta ñaupaqman churay?

⁴ ¿Imanaqtinmi sasa kanman? Umalliqkunaqa Diosmanta willaytan ñaupaqman churanku. Chaymantapas kuska semana juñunakuypin yachachinku, Bibliata estudianapaq juñunakuyta aparinku, juj iñiq t’aqakunapipas yachachinku. Chaymantapas yanapakuq kamachikunatan yanapanku umalliq kanankupaq, iñiqmasikunatapas sumaqtan kallpachanku (1 Ped. 5:2). Chaymantapas wakin umalliqkunaqa juñunakuna wasikunata jatarichiypi, allichaypi, juj ruwaykunapi iman yanapakunku. Chaykunataña ruwanku chaypas umalliqkunaqa juj iñiqmasikuna jinan Diosmanta willayta ñaupaqman churananku (Mat. 28:19, 20).

5. ¿Imaynatan apóstol Pablo jina Diosmanta willasunman?

⁵ ¿Imatan apóstol Pablo ruwaran? Filipenses 1:10 textopin apóstol Pablo niran: “Aswan allin kaqkunatan allinta reparanaykichis”, nispa. Chayta ruwasqanmi paytapas yanaparan Diosmanta willayta ñaupaqman churananpaq. Payqa Diosmanta willananpaqmi kamachisqa karan, chay llank’aymi paypaqqa aswan importante karan. Chaymi kallpachakuran runaq qayllanpipas wasin-wasintapas Diosmanta willananpaq (Hech. 20:20). Payqa manan semanapi juj p’unchayllachu Diosmantaqa willaran. Aswanmi maypiña kaspapas Diosmanta willashallaq. Chaymi Atenas llaqtapi Silasta Timoteotawan suyashaspapas waj llaqtayoq runakunaman Diosmanta willaran, jinan wakinqa iñipuranku (Hech. 17:16, 17, 34). Carcelpi kashaspapas visitaqnin runakunamanmi Diosmanta willaq (Hech. 28:16-24; Filip. 1:13, 14).

6. ¿Imatan Pablo ruwaran jujkunata yanapananpaq?

⁶ Apóstol Pabloqa manan tiemponta usuchiranchu. Chaymantapas sapa kutillanmi jujkunata invitaq paywan kuska Diosmanta willanankupaq. Chaymi ñaupaq kaq kutipi viajashaspa Marcosta aparikuran, iskay kaq viajenpitaq Timoteotañataq aparan (Hech. 12:25; 16:1-4). Chaymantapas Pabloqa yanapaqnin iñiqmasikunatan yachachiran iñiq t’aqata umallinankupaq, iñiqmasikunata sumaqta yanapanankupaq, allin yachachiq kanankupaqpas (1 Cor. 4:17).

7. ¿Imaynatan umalliqkuna Efesios 6:14, 15 textopi Pabloq nisqanta kasukunkuman?

⁷ ¿Imatan umalliqkuna yachankuman? Umalliqkunaqa apóstol Pablo jinan listo kashananku maypipas Diosmanta willanankupaq, manataqmi wasin-wasinllatachu Diosmantaqa willananku (leey Efesios 6:14, 15). Yaqapaschá Diosmanta willankuman rantikuq rishaspa, llank’anankupipas kashaspa. Juñunakuna wasi ruwaypi yanapakushaspapas chay  llaqtapi tiyaq runakunaman vendeqkunaman iman Diosmanta willankuman. Chaymantapas Pablo jinan umalliqkunaqa Diosmanta willashaspa yanapakuq kamachikunatapas juj iñiqmasikunatapas yanapananku iñiyninkupi ñauparinankupaq.

8. ¿Imatan mayninpi umalliqkuna ninanku?

⁸ Umalliqkunaqa manan Diosmanta willaytaqa saqenankuchu iñiq t’aqapi imaymana ruwanayoq kasqankuraykuqa. Mayninpiqa “manan atirusaqchu” ninkumanmi juj ruwaypi yanapakunankupaq niqtinku. Diosmanta mañakuspan allinta qhawarinanku importante ruwayninkunawan junt’anqakuchus manachus chayta, mana junt’ayta atispaqa manan juj ruwaykunapiqa yanapakunankuchu. Umalliqkunaqa sapa semananmi familiankuwan Diosta adorananku, tukuy sonqowanmi Diosmanta willaypi yanapakunanku, wawankunatapas yachachinankun Diosmanta willanankupaq. Wakin umalliqkunaqa manapaschá munankuchu juj ruwaykunapi yanapakunankupaq niqtinku “manan atirusaqchu” niyta, Jehová Diosmi ichaqa munan llapa ruwayninkuwan allinta junt’anankuta.

9. ¿Ima sasachakuykunapin umalliqkuna tarikunku?

⁹ ¿Imanaqtinmi sasa kanman? Iñiqmasinchiskunaqa imaymana sasachakuykunapin tarikushanku. Chaymi kay tukukuy p’unchaykunapi llapallanchis necesitanchis kallpachasqa kayta. Wakinqa mana allin ruwaykunata saqepunankupaqmi yanapanata necesitanku (1 Tes. 5:14). Umalliqkunaqa manapaschá llapa hermanokunaq sasachakuyninkunatachu allichanqaku. Chaywanpas tukuy atisqankutan ruwananku iñiqmasikunata cuidanankupaq kallpachanankupaqpas. ¿Imaynatan umalliqkuna tiempota t’aqankuman iñiqmasikunata yanapanankupaq?

10. 1 Tesalonicenses 2:7 textopi nisqanman jina, ¿imaynatan apóstol Pablo iñiqmasikunata qhawariq?

¹⁰ ¿Imatan apóstol Pablo ruwaran? Apóstol Pabloqa imaymanatan ruwaran iñiqmasikunata kallpachananpaq. Umalliqkunapas apóstol Pablo jinan iñiqmasikunata sumaqta kallpachananku (leey 1 Tesalonicenses 2:7). Pabloqa mana manchakuspan iñiqmasikunata niran munakusqanta, Jehová Diospas paykunata munakusqanta (2 Cor. 2:4; Efes. 2:4, 5). Chaymantapas payqa amigonkunata jinan iñiqmasikunata qhawariq, chaymi tiempota t’aqaran paykunawan kananpaq. Chaymantapas apóstol Pabloqa iñiqmasikunapi confiasqantan rikuchiran, mana manchakuspataqmi willaran imachus llakichisqanta, imapichus pisipasqantapas (2 Cor. 7:5; 1 Tim. 1:15). Apóstol Pabloqa manan sasachakuyninkunata allichaypichu mastaqa piensaran, aswanpas iñiqmasikunata yanapananpaqmi kallpachakuran.

11. ¿Imanaqtinmi apóstol Pablo iñiqmasikunata yuyaycharan?

¹¹ Mayninpin apóstol Pabloqa iñiqmasikunata yuyaychanan karan. Ichaqa manan phiñakuyninta  paykunapi thasnunanpaqchu chaytaqa ruwaran, aswanpas paykunata munakuspan sumaqllata rimapayaran. Chaymantapas entiendenankupaq jinallan yuyaycharan, munarantaqmi yuyaychasqanman jina imatapas ruwanankuta. Juj kutinmi Corinto llaqtapi iñiqmasikunaman carta qelqasqanpi paykunata allinta yuyaycharan. Chay qhepamantaq Titota paykunaman kacharan cartapi yuyaychasqanta kasukusharankuchus icha manachus chayta yachananpaq. Jinan Pabloqa anchata kusikuran yuyaychasqanman jina iñiqmasikunaq ruwasqankuta yachaspa (2 Cor. 7:6, 7).

12. ¿Imatan umalliqkuna ruwananku iñiqmasikunata kallpachanankupaq?

¹² ¿Imatan umalliqkuna yachankuman? Umalliqkunaqa apóstol Pablo jinan hermanokunata yanapananku. Chaypaqmi ichaqa juñunakuykunaman tempranota rinanku, chhaynapi hermanokunata kallpachanankupaq. Pisillata rimapayasqankupas iñiqmasikunataqa kallpachanmanmi (Rom. 1:12; Efes. 5:16). Chaymantapas umalliqkunaqa Bibliawanmi hermanokunata kallpachananku, sut’itataqmi reparachinanku Jehová Dios paykunata munakusqanta. Chaymantapas umalliqkunaqa sapa kutillanmi iñiqmasikunata wajashananku, jinaspa allinta ruwasqankumanta felicitananku. Sichus juj umalliq reparanman mayqen iñiqmasipas mana allinta ruwashasqanta chayqa Bibliaq nisqanman jinan yuyaychanan. Jinaspapas sumaqllata rimapayaspan sut’ita reparachinan imatachus mana allinta ruwashasqanta (Gál. 6:1).

13. ¿Imaynatan umalliqkuna imapipas pantasqankuta qhawarinkuman?

¹³ ¿Imanaqtinmi sasa kanman? Umalliqkunapas noqanchis jina juchayoqmi kanku, chaymi mayninpiqa imallapipas pantanqakupuni (Rom. 3:23). Ichaqa manan nishutachu juchachakunanku imatapas mana allinta ruwasqankumantaqa. Wakinqa mana allin ruwasqankupi nishuta piensaspan pisikallpayankuman. Wakinqa yaqapaschá imapipas pantasqankuta mana reparaqman tukuspa ninkuman: “Noqaqa allintan imatapas ruwashani, manan cambianaychu” nispa.

14. Filipenses 4:13 textopi nisqan jina, ¿imatan Pablo ruwaran k’umuykukuq kasqanrayku?

¹⁴ ¿Imatan apóstol Pablo ruwaran? Apóstol Pabloqa yacharanmi Jehová Diospa yanapaynillanwan ima sasachakuyninkunatapas atipananta, chaymi Diospa yanapayninta mañakuran. Payqa manaraq cristiano kashaspan iñiqmasikunata qatikacharan. Qhepamanmi ichaqa mana allin ruwasqanta reqsikuspa cambiapuran, jinaspa Dios sonqo runa kapuran (1 Tim. 1:12-16). Jehová Diospa yanapayninwanmi payqa allin umalliq, sumaq sonqo,  k’umuykukuq kapuran. Payqa llakikunmanmi karan mana allin ruwasqankunata yuyarispa, ichaqa manan iskayaranchu Jehová Dios perdonananpi (Rom. 7:21-25). Payqa yacharanmi mayninpi imallapipas pantananta, chaymi kallpachakuran Dios sonqo runa kananpaq. Chaymantapas k’umuykukuspan Jehová Diospa yanapayninta mañakuran Diosmanta runakunaman yachachinanpaq (1 Cor. 9:27; leey Filipenses 4:13).

15. ¿Imatan umalliqkuna ruwananku imallapipas pantasqankuta reparakuspa?

¹⁵ ¿Imatan umalliqkuna yachankuman? Umalliqkunaqa wakin iñiqmasikuna jinan mayninpiqa imallapipas pantanqaku, Jehová Diosmi ichaqa munan mana allin ruwasqankuta reqsikuspa Dios sonqo kanankupaq kallpachakunankuta (Efes. 4:23, 24). Umalliqkunaqa Bibliaq yanapayninwanmi allinta qhawarikunanku, jinaspa imapipas cambiananku kaqtinqa cambiananku. Jinan Jehová Diosqa yanapanqa kusisqa payta servinankupaq, imachus ruwanankutapas allinta junt’anankupaq (Sant. 1:25).

16. ¿Iman pasanman iñiqmasikunaq mana allin ruwasqallankuta umalliqkuna qhawaqtinku?

¹⁶ ¿Imanaqtinmi sasa kanman? Umalliqkunaqa iñiqmasikunawan kuska Diosta servisqankuraykun reparanqaku hermanokuna imallapipas pantasqankuta. Sichus umalliqkuna iñiqmasikunaq imapipas pantasqallankuta qhawankuman chayqa phiñakuspan paykunamanta mana allinta rimayta qallarinkuman. Chayta ruwaspaqa Satanastan kusichishankuman. Chayraykun apóstol Pablopas niran chaykunamanta cuidakunankupaq (2 Cor. 2:10, 11).

17. ¿Imaynatan apóstol Pablo iñiqmasikunata qhawariran?

¹⁷ ¿Imatan apóstol Pablo ruwaran? Payqa sumaqllatan iñiqmasikunata yanaparan. Rikuranña iñiqmasikunaq imallapipas pantasqankuta chaypas manan phiñakuranchu. Apóstol Pabloqa anchatan hermanokunata munakuran, chaymi allin ruwasqankuta astawanqa qhawariran. Chaymantapas allin kaqta ruwanankupaq kallpachakusqankuta rikuspan paykunata yanaparan, manataqmi paykunamantaqa mana allintaqa piensaranchu.

18. ¿Imatan yachasunman imaynatachus apóstol Pablo Evodiatawan Sintiquetawan yanapasqanmanta? (Filipenses 4:1-3).

¹⁸ Yachasun imaynatas apóstol Pablo Filipos llaqtapi tiyaq iskay hermanakunata yuyaycharan chayta (leey Filipenses 4:1-3). Evodiawan Sintiquewanqa manan allintachu apanakuranku. Apóstol Pabloqa manan paykunataqa k’amiranchu nitaqmi phiñasqachu kasharan. Aswanpas sumaqllatan rimapayaran allinkuna ruwasqankumanta, sasachakuykunapiña tarikuspapas Jehová Diosta servisqankumanta. Pabloqa yacharanmi Jehová Dios chay hermanakunata munakusqanta. Chayraykun paykunata kallpacharan phiñachinakusqankuta  sumaqllata allichanankupaq. Chhaynata iñiqmasikunata yanapasqanraykun iñiq t’aqapi hermanokunaqa kusisqalla Jehová Diosta serviranku.

19. a) ¿Imatan umalliqkuna ruwananku iñiqmasikunata sumaqta qhawarinankupaq? b) ¿Imatan umalliqkuna yachankuman fotopi limpiaq umalliqmanta?

¹⁹ ¿Imatan umalliqkuna yachankuman? Umalliqkunaqa apóstol Pablo jinan hermanokunaq allin ruwasqankuta astawan qhawananku. Iñiqmasikunaqa mayninpin imallapipas pantanqakupuni, ichaqa kallpachakunkun munakuq, khuyapayakuq, Dios sonqo runakuna kanankupaq (Filip. 2:3). Umalliqkunaqa yaqapaschá mayninpiqa wakin hermanokunata correginanku kanqa. Ichaqa manan imapipas pantasqallankutachu qhawananku. Aswanpas reparanankun Jehová Diosta munakusqankuta, sasachakuykunata aguantasqankuta, cambianankupaq kallpachakusqankutapas. Chaykunata ruwanqaku chayqa sumaq thaj kausaymi iñiq t’aqapi kanqa.

20. ¿Imatan umalliqkuna ruwankuman Pabloq ejemplonmanta astawan yachanankupaq?

²⁰ Umalliqkunaqa apóstol Pablomantan allinta yachananku, chhaynapi pay jina allin umalliq kanankupaq. Chaypaqqa Índice de las publicaciones Watch Tower nisqamanmi jaykunkuman, “Pablo” nisqa sutiman, chaymantataq “ejemplo para los ancianos” nisqaman. Chaypin Pabloq ejemplonmanta estudiashaspa tapukunanku: “¿Imaynatan Pabloq ejemplon yanapawanman allin umalliq kanaypaq?”, nispa.

21. ¿Imamantan umalliqkuna mana iskayanankuchu?

²¹ Umalliqkuna, Jehová Diosqa manan mana pantaspa imatapas ruwanaykichistachu munan, aswanpas junt’aq sonqo kanaykichistan munan (1 Cor. 4:2). Jehová Diosqa allinpaqmi qhawariran Pabloq ruwasqanta junt’aq sonqo kasqantapas. Sichus qankunapas kallpachakunkichis pay jina kanaykichispaq chayqa Jehová Diosqa “manapunin qonqanqachu imachus ruwasqaykichista sutinta munakusqaykichistapas” (Hebreo 6:10).