1-2. Soske šaj e Pavleskoro primer te pomožinel e starešinenge?

 O APOSTOL Pavle mangela sine ple phralen hem but trudinela pe sine te grižinel pe lenge (Dela 20:31). Adaleske o phralja hem o phenja mangena le sine but. Ki jekh prilika o starešine taro Efes rungje keda šungje kaj nikogaš više nane te dikhen le (Dela 20:37). Amare vredna starešine isto agjaar but mangena pumare phralen hem phenjen, hem na štedinena pe keda valjani te pomožinen lenge (Fil. 2:16, 17). Ama ponekogaš e starešinen isi len nesave predizvikija. So šaj te pomožinel lenge te istrajnen ko adala predizvikija?

² Amare vredna starešine šaj te razmislinen bašo e Pavleskoro primer (1. Kor. 11:1). Le na sine le nesavi posebno sila ili mudrost. O Pavle da sine nesovršeno manuš kova so ponekogaš borinela pe sine te postapinel ispravno (Rim. 7:18-20). Hem sine le nekobor problemija kolencar so valjani sine te ikljovel ko krajo. Ama o Pavle na otkažingja pe, hem ponadari da sine bahtalo. Keda o starešine džana palo e Pavleskoro primer, ola ponadari da šaj te oven bahtale džikote služinena e Jehovaske iako isi len problemija. Te dikha sar.

3. So ka dikha ki akaja statija?

³ Ki akaja statija ka dikha štar predizvikija kola so isi e starešinen: 1) te odvojnen dovolno vreme bašo propovedibe hem bašo javera odgovornostija, 2) te odvojnen peske vreme te ohrabrinen e phralen hem e phenjen, 3) ma te obeshrabrinen pe bašo pumare lična slabostija hem 4) te nakhen preku e javerengere maane. Ka dikha so pomožingja e Pavleske hem sar šaj o starešine te džan palo leskoro primer.

4. Soske ponekogaš e starešinenge šaj te ovel pharo te predvodinen ko propovedibe?

⁴ Soske akava šaj te ovel pharo. Osven so valjani te propovedinen, e starešinen isi len but javera odgovornostija. Na primer, but džene lendar tane pretsedavačija ko sostanok Amaro životo hem služba hem vodinena o Proučibe i Biblija ki dvorana. Isto agjaar šaj valjani te ikeren javera govorija. Osven adava, nakhavena but vreme te šaj te obučinen e sluga-pomošnikon hem te ohrabrinen e phralen hem e phenjen (1. Pet. 5:2). Nesave starešine pomožinena te gradinen pe hem te održinen pe o dvorane hem javera teokratska objektija. Sepak, sar sa e objavitelenge, e starešinenge da i najvažno buti tani te vakeren o šukar haberi (Mat. 28:19, 20).

5. Savo primer dengja o Pavle sar propovedniko?

⁵ E Pavleskoro primer. Ko Filipjanite 1:10 o Pavle pottikningja amen te procenina soj tano naj važno. Ov postapingja sprema ple lafija hem adaleske uspejngja ki pli zadača te propovedinel. Leske i služba sine beršencar najvažno ko životo. Ov propovedingja „javno hem taro kher ko kher“ (Dela 20:20). Ov na propovedinela sine samo ko jekh odredeno vreme ili jekh dive ko kurko, nego koristinela sine sekoja prilika te šaj te propovedinel. Na primer, džikote adžikerela sine ple sorabotnikon ki Atina, ov propovedingja nesave poznata manušenge hem nesave lendar ule vernikija (Dela 17:16, 17, 34). Čak keda sine phanlo, o Pavle propovedingja okolenge so sine lea (Fil. 1:13, 14; Dela 28:16-24).

6. Sar o Pavle obučingja e javeren?

⁶ O Pavle koristingja plo vreme najšukar so šaj. Ov često lela sine pea javeren ki služba. Na primer, ko plo prvo misionersko patuvanje ov lelja e Marko, a ko dujto e Timotee (Dela 12:25; 16:1-4). O Pavle dengja plo naj šukar te sikavel len sar te vodinen jekh sobranie, sar te oven šukar pastirija hem šukar učitelija (1. Kor. 4:17).

7. Sar šaj o starešine te keren adava so vakergja o Pavle ko Efešanite 6:14, 15?

⁷ I pouka. O starešine džana palo e Pavleskoro primer na samo agjaar so džana ki služba taro kher ko kher, nego isto agjaar soj tane spremna te propovedinen ki sekoja prilika. (Čitin Efešanite 6:14, 15.) Isto agjaar, šaj te propovedinen keda džana te pazarinen ili ki pumari buti. Ili keda pomožinena te gradinel pe nesavo teokratsko objekti, ola šaj te propovedinen e komšienge ili okolenge kastar so kinena nešto baši dvorana. Sar o Pavle, o starešine šaj te koristinen o vreme keda tane ki služba  te šaj te obučinen e javeren hem e sluga-pomošnikon.

8. So valjani ponekogaš jekh starešina te kerel?

⁸ O starešine na valjani te oven doborom zafatime e zadačencar ko sobranie ili ki pokraina so nane te ovel len vreme baši služba. Te šaj te oven uramnotežena, o starešine ponekogaš ka valjani te odbinen nesave zadače. Otkeda ka razmislinen hem ka molinen pe bašo adava, ola šaj ka haljon kaj ako prifatinena poviše zadače šaj nane te ovel len vreme bašo považna bukja. Na primer, nane te ovel len vreme baši familijarno rat sekova kurko, revno te propovedinen ili te sikaven pumare čhaven te propovedinen. Nesavenge tano pharo te odbinen nesave zadače, ama šaj te oven sigurna kaj o Jehova haljola kaj mangena te oven uramnotežena ko sa o bukja.

9. So šaj te ovel predizvik e starešinenge te keren adaleske soj tane but zafatime?

⁹ Soske akava šaj te ovel pharo. E Jehovaskere narodo isi le but nevolje. Ko akala posledna dive, sarinenge valjani ohrabruvanje, poddrška hem uteha. Hem ponekogaš nekaske valjani pomoš te šaj te na grešinel (1. Sol. 5:14). Džangjola pe, o starešine našti te ciden sa o nevolje taro e Jehovaskoro narodo. Sepak o Jehova mangela o starešine te keren sa so šaj te šaj te ohrabrinen hem te zaštitinen leskere bakhren. Sar šaj o starešine soj tane but zafatime te odvojnen vreme te pomožinen e phralenge?

10. Sprema 1. Solunjanite 2:7, sar o Pavle grižinela pe sine e Jehovaskere narodoske ?

¹⁰ E Pavleskoro primer. O Pavle sine sekogaš spremno te pofalinel e phralen hem te ohrabrinel len. O starešine da valjani te džan palo leskoro primer hem te oven ljubezna e phralencar hem e phenjencar. (Čitin 1. Solunjanite 2:7.) O Pavle uveringja e phralen hem e phenjen kaj mangela len hem kaj o Jehova da mangela len (2. Kor. 2:4; Ef. 2:4, 5). O Pavle sine sar amal okolencar taro sobranie agjaar so nakhavela sine lencar vreme. Ov sikavgja kaj isi le doverba ki lende agjaar so sine lencar iskreno hem vakerela sine lenge ple sekiracie hem kola tane leskere slabostija (2. Kor. 7:5; 1. Tim. 1:15). Ama adalea na manglja te istakninel ple problemija, nego mangela sine te pomožinel e phralenge.

11. Soske o Pavle sovetingja e phralen hem e phenjen?

¹¹ Ponekogaš o Pavle valjani sine te sovetinel e phralen hem e phenjen. Ama ov nikogaš na kergja adava te šaj te ikalel pli holi upri lende. Namesto adava, ov dela len sine sovet adaleske so grižinela pe sine lenge. Hem mangela sine te zaštitinel len taro različna opasnostija. Ov mangela sine leskoro sovet te ovel lokho haljojbaske, hem te prifatinen le. Na primer, ko plo pismo dži  ko Korinkjanja, o Pavle dengja jekh strogo sovet. Otkeda pišingja adava pismo, ov bičhalgja e Tite te džal ki lende. O Pavle edvaj adžikerela sine te doznajnel sar reagiringje o phralja ko leskoro pismo. Hem keda doznajngja kaj prifatingje hem primeningje o sovet, ov sine but bahtalo (2. Kor. 7:6, 7).

12. Sar šaj o starešine te zajakninen e objavitelen?

¹² I pouka. O starešine šaj te džan palo e Pavleskoro primer agjaar so ka nakhaven vreme e objavitelencar. Jekh način sar šaj te keren adava tano agjaar so ka džan porano ko sostanokija te šaj te ovel len ohrabruvačka razgovorija e javerencar. But puti dovolno tane samo nekobor minutija te šaj te ohrabrinel pe nesave phrale ili phenja so nakhela taro pharo periodi (Rim. 1:12; Ef. 5:16). Jekh starešina so džala palo e Pavleskoro primer šaj isto agjaar te ohrabrinel e objavitelen agjaar so ka koristinel e Devleskoro Lafi te šaj te uverinel len kaj o Devel mangela len. Osven adava, ov ka uverinel len kaj mangela len. Ov redovno kerela lencar lafi hem rodela prilike te šaj te pofalinel len. Hem keda mora te del sovet, adava sovet sekogaš temelinela pe ko e Devleskoro Lafi. Ov tano direktno, ama kerela adava ko jekh ljubezno način adaleske so mangela o phral ili i phen te prifatinen adava sovet (Gal. 6:1).

13. Sar šaj te vlijajnen upro starešine lengere slabostija?

¹³ Soske akava šaj te ovel pharo. O starešine nane sovršena. Hem sar sarine ola da grešinena (Rim. 3:23). Ponekogaš šaj te ovel lenge pharo te ovel len ispravno stavi bašo pumare slabostija. Nesave doborom but koncentririnena pe ko ple slabostija so obeshrabrinena pe. A javera doborom sigate opravdinena pumare greške so mislinena kaj na valjani te keren nisave promene.

14. Sprema Filipjanite 4:13, sar i poniznost pomožingja e Pavleske te ikljol ko krajo ple slabostencar?

¹⁴ E Pavleskoro primer. Adaleske so sine ponizno, o Pavle halilo kaj našti korkori te borinel pe protiv ple slabostija. Leske valjani sine i sila koja so avela taro Devel. Angleder, o Pavle sine tvrdoglavo hem but progoninela sine e hristijanen. Ama pokasno, ov halilo ple greške hem sine spremno te meninel plo stavi hem pli ličnost (1. Tim. 1:12-16). Adaleske so o Jehova pomožingja leske, o Pavle ulo jekh ljubezno, sočuvstvitelno hem ponizno pastiri. Ov sine svesno bašo ple slabostija. Sepak, le sine le doverba kaj o Jehova ka prostinel leske hem odlučingja te na  koncentririnel pe ki lende (Rim. 7:21-25). Ov na očekujnela sine te ovel sovršeno. Nego, ov but trudingja pe panda poviše te razvinel i hristijansko ličnost hem ponizno rodingja pomoš taro Jehova te šaj te ispolninel pli zadača. (1. Kor. 9:27; čitin Filipjanite 4:13.)

15. Savo ispravno stavi valjani te ovel e starešinen bašo pumare slabostija?

¹⁵ I pouka. O starešine nane imenujme adaleske soj tane sovršena. Sepak, o Jehova očekujnela lendar te priznajnen pumare greške hem te razvinen i hristijansko ličnost (Ef. 4:23, 24). Džikote proučinela i Biblija o starešina šaj te dikhel kote valjani te podobrinel pe hem te kerel o potrebna promene. Ako kerela adava o Jehova ka pomožinel leske te ovel bahtalo hem te ovel šukar pastiri (Jak. 1:25).

16. So šaj te ovel ako jekh starešina koncentririnela pe ko e javerengere slabostija?

¹⁶ Soske akava šaj te ovel pharo. Keda o starešine nakhavena but vreme e phralencar hem e phenjencar tegani šaj polokhe te dikhen lengere slabostija. Ako na pazinena, o starešine šaj te nervirinen pe, te kritikujnen len hem te na oven lencar ljubezna. O Pavle predupredingja e hristijanen kaj o Satana mangela baš agjaar te postapinen (2. Kor. 2:10, 11).

17. Sar dikhela sine o Pavle ko phralja hem ko phenja?

¹⁷ E Pavleskoro primer. Ov sekogaš dikhela sine šukar ko phralja hem ko phenja. Sine svesno kaj ola grešinena, hem ponekogaš ov lično sine povredimo taro lengere postapke. Ama, o Pavle džanlja kaj ako nekoj grešingja na značinela kaj tano lošno manuš. Ov mangela sine e phralen hem e phenjen hem koncentririnela pe sine ko lengere šukar osobine. Ako e phralenge hem e phenjenge na sine lokho te keren adava soj ispravno, o Pavle birinela sine te mislinel kaj isi len šukar motivija hem kaj samo valjani lenge pomoš.

18. So sikljovaja taro adava sar o Pavle pomožingja e Evodija hem e Sintihija? (Filipjanite 4:1-3).

¹⁸ Te dikha sar o Pavle postapingja duje phenjencar taro sobranie Filipi. (Čitin Filipjanite 4:1-3.) Verojatno i Evodija hem i Sintihija na sine više amalinka adaleske so rasprajngje pe. O Pavle na sine lencar strogo hem na kritikujngja len, namesto adava ov koncentriringja pe ko lengere šukar osobine. Ola sine verna phenja kola so but vreme služinena sine e Jehovaske. O Pavle džanlja kaj o Jehova mangela len. Le sine le pozitivno mislenje bašo akala phenja hem adaleske ohrabringja len te smirinen pe. Adaleske so o Pavle koncentririnela pe sine ko šukar osobine e javerengere, ov šaj sine ponadari da te ovel bahtalo hem te ovel paše amal e phralencar taro sobranie.

19. a) Sar šaj o starešine ponadari da šukar te dikhen ko objavitelija? b) So šaj te sikljove tari slika kote so jekh starešina pomožinela te čistinel pe i dvorana?

 ¹⁹ I pouka. Tumen o starešine, dikhen ko šukar osobine so isi e phralen hem e phenjen. Sekova jekh tano nesovršeno, ama sekole amendar isi le osobine kola so šaj te cenina len (Fil. 2:3). Džangjola pe, o starešine ponekogaš ka valjani te sovetinen jekhe phrale ili phenja. Ama isto sar o Pavle, ola trudinena pe te na koncentririnen pe ko lafija hem ko postapke so šaj te nervirinen len. Namesto adava, o starešine dikhena kaj adava phral mangela e Jehova, kaj istrajnela džikote služinela leske hem kaj mangela te kerel šukaripe. O starešine so dikhena pozitivno ko javera kerena o phralja hem o phenja te osetinen pe mangle ko sobranie.

20. Sar šaj o starešine ponadari da te sikljoven taro e Pavleskoro primer?

²⁰ Tumenge e starešinenge but ka pomožinel ako ponadari da proučinena e Pavleskoro primer. Ko adava šaj te pomožinel tumenge o lil ko Svedoči temelno za Božjeto Carstvo. Džikote čitinea akava lil ili javera statie kote so kerela pe lafi bašo leskoro primer, puč tut: „Sar šaj e Pavleskoro primer te pomožinel mange ponadari da te ovav bahtalo džikote služinava sar starešina?“

21. Ko so šaj o starešine te oven sigurna?

²¹ Tumen o starešine, ma bistren kaj o Jehova na rodela tumendar te oven sovršena, namesto adava ov očekujnela tumendar te oven verna (1. Kor. 4:2). O Jehova but ceningja e Pavleskoro trudo hem leskiri vernost. Hem šaj te oven sigurna kaj o Devel isto agjaar ceninela adava so tumen kerena ki služba baši leste. O Jehova nikogaš nane „te bistrel adava so kergjen hem o mangipe so sikavgjen leskere anaveske, agjaar so služingjen okolenge soj sveta hem ponadari da služinena lenge“ (Evr. 6:10).