1, 2. Sar daștil te ajutil le phuren o exemplo le Pavelosco?

 O APOSTOLO Pavel iubisardea zurales but pesche phralen. Vo cărdea but buchi caște lel sama pe lende. (Fap. 20:31) Anda codoia lesche phrala hai pheia iubisarde-les cadea de but. Iech data, cana le phure anda Efes hachiarde că ci va mai dichena-les niciechdata, „șindea-le o roimos”. (Fap. 20:37) Sa cadea, le phure de aghies iubin zurales but penghe phralen hai pheian hai den sea penghi zor te ajutin-le. (Filip. 2:16, 17) Cu sea cadala, poiechdata andal phure si pharo te cheren sea so camen. So daștil te ajutil-le te nachen părdal le pharimata cai silen?

² O exemplo le Pavelosco daștil te ajutil-le zurales but. (1 Cor. 11:1) Vo sas iech manuș sar amen, iech manuș imperfecto cai poiechdata trebuisardea te del sea peschi zor caște cherel so si mișto. (Rom. 7:18-20) Mai but, leschi viața ci sas ușoro hai sas-les but pharimata. Tha o Pavel ci mechlea-pe hai ci hasardea peschi bucuria. Cana len-pe pala o exemplo le Pavelosco, le phure daștin te nachen părdal le pharimata cai silen hai te slujin mai dur le Iehovasche pherde bucuria.

3. So va dichaia mai dur?

³ Mai dur, va avela te dichas ștar pharimata cai daștin te aven le phuren: 1) te cheren penghe timpo vi anda i predicarea hai vi anda le coaver buchia cai trebun te cheren-le, 2) te aven lașe păstori cai zuriaren le phralen hai pheian, 3) te na aven perade anda lenghe imperfecțiuni hai 4) te nachen părdal averenghe imperfecțiuni. Sa cadea, va avela te dichas so ajutisardea le Pavelos te nachel părdal cadal pharimata hai sar daștin le phure de congregație te len-pe pala lesco exemplo.

4. Sostar daștil te avel phares le phurenghe te aven anglal andi lucrarea de predicare?

⁴ Sostar daștil te avel iech pharimos? Le phure de congregație trebun te aven anglal andi lucrarea de predicare. Tha len silen  vi aver buchia te cheren. Sar exemplo, but anda lende încăren i întrunirea anda o timpo le curchesco hai o studio la Bibliaco andi congregația. Mai but, von trebun te pregătin hai te încăren vi aver teme. Von trebun te sicaven le slujitoren auxiliari hai te zuriaren sea o timpo le phralen hai pheian andai congregația. (1 Pet. 5:2) Chichiva phure cheren buchi ca le proiectea ande save vazden-pe hai lel-pe sama pe le săli le Regatosche, hai vi pe aver clădiri la organizațiache. Tha, cadea sar le coaver phrala andai congregația, iech phuro trebul mai anglal sar aver buchia te predichil i vestea lași. (Mat. 28:19, 20)

5. So exemplo mechlea amenghe o Pavel anda i predicarea?

⁵ O exemplo cai mechlea-les o Pavel. Ando Filipeni 1:10, o Pavel phendea so ajutisardea-les te cherel peschi buchi mișto hai te predichil i vestea lași. Vo zuriarel vi amen cadea: „Len sama le buchiandar mai importanto”. O Pavel chiar cărdea cadaia hai but bărșa vo dichlea pesco servicio sar i mai importanto buchi anda leschi viața. Vo predichisardea „angla sea le manușa hai chăr chărestar”. (Fap. 20:20) Mai but, vo ci predichisardea numai iech data po ghies sau iech-var po curco, tha vo predichisardea ori chichi-var daisardea te cherel cadai buchi. Sar exemplo, cana ajucărelas le phralen andi Atena, vo dea duma chichiva bare manușența anda i vestea lași hai chichiva anda lende sas-le bucurime te așunen so phendea lenghe vo. (Fap. 17:16, 17, 34) Chiar vi cana o Pavel sas-lo „andel lanțuri le phandaimasche”, vo predichisardea codolenghe cai lenas sama pe leste cana sas-lo phandado hai codolenghe cai avenas leste te dichen-les. (Filip. 1:13, 14; Fap. 28:16-24)

6. So sicadea o Pavel averen?

⁶ O Pavel dichlea cuci pesco timpo hai folosisardea-les goghiaia. Butivar achardea vi averen te jian leia andi lucrarea de predicare. Sar exemplo, ande peschi dintuni călătoria sar misionaro, vo lea leia le Ioanos Marcu, hai andi duito le Timoteios. (Fap. 12:25; 16:1-4) Ando timpo chichi sas-lo cadalența o Pavel dea peschi zor te sicavel-le sar te cheren mișto penghi buchi andi congregația, te aven lașe păstori hai te sicaven mișto averen. (1 Cor. 4:17)

7. Sar daștin le phure te len-pe pala so phendea o Pavel ando Efeseni 6:14, 15?

⁷ So daștin te sichion le phure? Le phure len-pe pala o exemplo le Pavelosco cana den duma anda i vestea lași oricana daștin, na numai cana predichin chăr chărestar. (Citisar Efeseni 6:14, 15.) Von daștin te cheren cadaia cana jian te chinen vareso sau ca i buchi. Sau dacă len partea cai iech proiecto cai vazden-pe săli le Regatosche sau aver clădiri, von daștin te den duma anda i vestea lași codolenghe cai beșen pașa codo than sau codolenghe castar chinen buchia anda i construcția. Hai, cadea sar o Pavel, cana jian  andi lucrarea de predicare, le phure daștin te sicaven averen, mașcar save si vi le slujitori auxiliari.

8. So trebun te cheren poiechdata le phure?

⁸ Le phure ci trebun te cheren niciechdata cadichi de but buchia andi congregația sau andi circumscripția, caște arăsăn te na mai avel len timpo anda i lucrarea de predicare. Ca le phuren te avel len timpo anda sea le buchia cai silen te cheren, von trebun te phenen „na” cana si lenghe dine te cheren mai but buchia andi congregația. Pala so gândil-pe hai manghel-pe, iech phuro daștilas te del peschi sama că dacă avileas te acceptil te cherel iech anumime buchi andi congregația, avelas te mechel de iech rig aver buchia mai importanto. Mașcar cadal buchia avelas i închinarea andi familia cai trebul te încărel-la ande fiesavo curco, te jial chichi mai but andi lucrarea de predicare hai te sicavel pesche șiaven te cheren vi von cadai buchi. Daștil-pe că anda chichiva phure si pharo te na acceptin te cheren mai but buchia andi congregația. Tha trebun te pachian că o Iehova hachiarel că von camen te cheren penghe timpo anda sea le buchia cai silen te cheren.

9. So pharimos si le phuren cai silen but buchia te cheren?

⁹ Sostar si iech pharimos? Le slujitori le Iehovasche nachen prin but pharimata ande cadal ghiesa de palal. Anda codoia savore anda amende trebul te avas zuriarde. Sa cadea, poiechdata chichiva phrala cai sile pașă te cheren vareso nasul trebun te aven ajutime. (1 Tes. 5:14) Le phure de congregație ci daștin te duriaren le pharimata cai si lenghe phralen. Tha o Iehova camel ca le phure te cheren sea so daștin caște zuriaren hai te len sama pe lesche bacrea. Sar daștin le phure cai silen but buchia te cheren, te arachen penghe timpo vi te aven pașa penghe phrala cai nachen prin pharimata hai te zuriaren lenghe ile?

10. Cadea sar phenel-pe ando 1 Tesaloniceni 2:7, sar lea sama o Pavel pe le slujitori le Iehovasche?

¹⁰ O exemplo le Pavelosco. O Pavel rodea sea o timpo te așarel le coaveren hai te zuriarel-le. Vo silo iech lașio exemplo andal phure creștini anda codoia că vo phiradea-pe lașimaia hai pherdo iubirea pesche phralența. (Citisar 1 Tesaloniceni 2:7.) O Pavel phendea lenghe butivar că vi vo hai vi o Iehova iubin-le. (2 Cor. 2:4; Ef. 2:4, 5) Vo dichlea le phralen andai congregația sar lesche amala hai beșelas but timpo ande iech than lența. O Pavel sicadea că pachialas-pe ande lende cana pâtărdea pesco ilo caring lende hai dea duma lența anda lesche daraimata hai covlimata. (2 Cor. 7:5; 1 Tim. 1:15) Cu sea cadala, lesche pharimata ci cărde-les te gândil-pe numai peste, tha vo camlea anda sea o ilo te ajutil pesche phralen.

11. Sostar dea sfaturi o Pavel pesche phralenghe?

¹¹ Poiechdata o Pavel trebuisardea te del vi sfaturi pesche phralenghe. Vo ci dea sfaturi anda holi, tha anda codoia că camelas te lel  sama pe lende hai te feril-le catar le but nasulimata. Vo camlea ca lesche sfaturi te aven mișto hachiarde hai te arăsăn ando ilo codolengo cai așunenas-le. Sar exemplo, ande pesco dintuno lil caring le corinteni, o Pavel dea-le sfaturi zurale. Pala so scriisardea o lil, vo bișaldea le Titos ando Corint, anda codoia că camelas anda ilo te jianel so cărde le phrala cana așunde so phendea lenghe vo prin cado lil. So but barilea o ilo le Pavelosco cana așundea că von line-pe pala lesche sfaturi. (2 Cor. 7:6, 7)

12. Sar daștin le phure te zuriaren penghe phralen?

¹² So daștin te sichion le phure? Le phure len-pe pala o exemplo le Pavelosco cana beșen mai but timpo ande iech than penghe phralența. Sar exemplo, von jian mai sigo ca le întruniri caște den duma averența anda buchia cai zuriaren-le. Butivar arăsăn numai chichiva minutea ca le phure te zuriaren o ilo le phralengo. (Rom. 1:12; Ef. 5:16) Sa cadea sar o Pavel, le phure folosin o Cuvânto le Devlesco caște zuriaren o pachiamos penghe phralengo hai phenen lenghe că sile cuci andel iacha le Iehovasche. Sa cadea, von sicaven că sile cuci vi anda lende. Le phure den duma butivar le phralența hai roden sea o timpo te așaren-le anda le lașe buchia cai cheren-le. Cana le phure trebun te den sfaturi, von cheren cadaia anda o Cuvânto le Devlesco hai pala i situația fiesaveschi. Tha, sicaven but lașimos le phralenghe anda codoia că von camen ca le sfaturi te arăsăn ande lengo ilo. (Gal. 6:1)

13. So atitudinea trebul te avel le phuren caring lenghe imperfecțiuni?

¹³ Sostar daștil te avel iech pharimos? Cadea sar savore anda amende, le phure sile imperfecți hai cheren greșeli. (Rom. 3:23) Daștil-pe că, poiechdata, trebun te den sea penghi zor caște avel len iech atitudinea lași caring lenghe covlimata. Chichiva daștinas te aven perade anda codoia că doșaren-pe prea but că ci daștin te cheren sea so camenas. Aver daștinas te pachian că lenghe imperfecțiuni ci sile cadea de nasul hai că ci trebun te cheren paruimata.

14. Cadea sar sicavel-pe ando Filipeni 4:13, sar ajutisardea i umilința le Pavelos te marel-pe contra leschi imperfecțiunea?

¹⁴ O exemplo le Pavelosco. Mai anglal, o Pavel sas iech manuș șăralo hai nasul cai persecutilas zurales but le creștinen. Tha, pala codoia, cana dea peschi sama că ci sas-lo po ciacio drom, vo camlea anda sea o ilo te paruvel pesco phiraimos hai vi peschi personalitatea. Pherdo umilința, o Pavel hachiardea că ci daștilas te cherel le paruimata corcoro hai că trebulas lesche o zuralimos cai numai o Iehova daștil te del-les. (1 Tim. 1:12-16) Prin o ajutorii cai dea-les lesche o Iehova, vo cărdilea iech păstoro iubitorii,  îndurătorii hai umilo. Vo jianelas mișto save sas lesche covlimata, tha ando than te doșarel-pe prea but anda lende, vo alosardea te pachial-pe ando Iehova că vo daștilas te iertil-les. (Rom. 7:21-25) Vo jianelas so but buchia nasul cărdea hai că va mai cherela, tha dea sea peschi zor te avel iech manuș mai lașio. Sa cadea, pherdo umilința mechlea-pe po vast le Iehovasco caște ajutil-les te cherel peschi buchi. (1 Cor. 9:27; citisar Filipeni 4:13.)

15. Sar trebunas te dichen le phure de congregație penghe imperfecțiuni?

¹⁵ So daștin te sichion le phure? Le phure de congregație ci sile numime anda codoia că sile perfecți. Tha o Iehova ajucărel-pe ca von te phenen cana cheren vareso nasul hai te den penghi zor caște avel len iech personalitatea creștino mai șucar. (Ef. 4:23, 24) Cana studiin i Biblia anda pende si importanto ca le phure de congregație te dichen so daștinas te cheren mai mișto hai te cheren le paruimata cai trebun. Cadea, o Iehova va ajutila-le te aven phure lașe hai te cheren penghi buchi pherde bucuria. (Iac. 1:25)

16. So avelas dacă iech phuro rodelas te dichel numai le imperfecțiuni le phralenghe?

¹⁶ Sostar daștil te avel iech pharimos? Le phure daștinas te dichen mai sigo le imperfecțiuni le phralenghe andai congregația, anda codoia că beșen mai but timpo pașa lende hai cheren buchi ande iech than lența. Dacă ci len sama, le phure daștinas te arăsăn te aven holiarde, te na sicaven lașimos hai te arachen doș ande orisavi buchi cai le phrala cheren-la. O Pavel phendea le creștinenghe că o Satan avelas puchiardo barimastar dacă dichelas că le phure avelas te phiraven-pe cadea. (2 Cor. 2:10, 11)

17. Sar dichlea o Pavel le phralen hai le pheian?

¹⁷ O exemplo le Pavelosco. O Pavel rodelas sea o timpo te dichel so sas lașio ca lesche phrala hai pheia. Vo prinjianelas mișto le buchia nasul cai cărde-le anda codoia că chichiva anda lende duchade vi les. Tha o Pavel jianelas că dacă varecon cărdea vareso nasul cadaia ci sicavelas că sas iech manuș nasul. Anda leste le phrala sas-le cuci hai alosardea te dichel le lașe buchia cai cherenas-le. Chiar cana cadalenghe sas pharo poiechdata te cheren so si mișto, vo pachiaia anda sea o ilo că von camenas te cheren cadaia hai că numai trebulas te aven ajutime.

18. So sichioas anda o modo sar o Pavel ajutisardea le pheian Evodia hai Sintiche? (Filipeni 4:1-3)

¹⁸ Te dichas sar ajutisardea o Pavel duie pheian andai congregația anda Filipi. (Citisar Filipeni 4:1-3.) Daștil-pe că i Evodia hai i Sintiche ci mai hachiarde-pe mișto anda codoia că dichenas le buchia diferime. Ando than te avel aspro hai te rodel lenghe iech doș, vo alosardea te dichel le lașe buchia cai cherenas-le cadala pheia. I Evodia hai i Sintiche sas-le prinjiande andi congregația sar pheia loialo cai slujinas de but timpo le Iehovasche. Mai but, o Pavel jianelas că sas-le zurales  cuci andel iacha le Iehovasche. Anda codoia că o Pavel dichelas so sas lașio ande cadala pheia, vo zuriardea-le te roden te cheren pacea mașcar pende. Vo phiradea-pe sa cadea vi le coavere phralența hai cadaia ajutisardea-les te na hasarel peschi bucuria hai te avel lașio amal lența.

19. a) Sar daștin le phure te dichen so si lașio ande lenghe phrala? b) So daisaras te sichioas andai imaginea ande savi iech phuro cherel ujimos cai i sala le Regatoschi?

¹⁹ So daștin te sichion le phure? Phure, roden te dichen so si lașio ande tumare phrala hai pheia. Fiesaves anda lende siles calități, chiar cana sile imperfecți. (Filip. 2:3) Si ciaces, poiechdata le phure trebun te den vi sfaturi le phralenghe hai le pheianghe. Tha, cadea sar o Pavel, le phure trebun te den penghi zor te dichen părdal so phenel sau cherel iech phral. Von dichen i iubirea le phralenghi caring o Iehova, că ci mechen-pe hai slujin mai dur Lesche hai că daștin te arăsăn te cheren le buchia mai mișto. Le phure cai alosaren te dichen le șucar calități cai si le phralen, cheren ca i congregația te avel iech than șucar ande savo le phrala daștin te barion spiritualo hai te simțon-pe iubime.

20. So daștin te cheren le phure caște sichion mai dur anda o exemplo le Pavelosco?

²⁰ Le phure va sichiona but buchia catar o Pavel dacă studiin mai dur lesco exemplo. Ando Indexo le publicațiengo Watch Tower, daștin te roden co subiecto „Pavel”, o subtitlo „exemplo andal phure”. Ando timpo so citin le materialea cai si tumenghe dine, daștin te șion tumenghe o pușimos: „Sar daștil te ajutil-ma o exemplo le Pavelosco te avav bucurime ando timpo so cherav mânri buchi sar phuro de congregație?”.

21. So ci trebun te bâstrăn le phure?

²¹ Cuci phure, na bâstrăn că o Iehova ci ajucărel tumendar te aven perfecto, tha te aven lesche loiali. (1 Cor. 4:2) Anda o Iehova sas zurales cuci i phari buchi cai cărdea-la o Pavel ando miștimos le phralengo hai vi leschi loialitatea. O Iehova ci parudea-pe, anda leste si cuci sea so cheren vi tumen ande lesco servicio. Mai but, vo ci va bâstrăla niciechdata „tumari buchi hai i iubirea cai sicadean-la anda lesco anav cana slujin codolenghe sfinți hai cana slujin mai dur lenghe”. (Evr. 6:10)