1-2. Tongana nyen la tapande ti bazengele Paul apeut ti aidé a-ancien laso?

 BAZENGELE PAUL aye aita ti lo. Lo sara lani kua ngangu ti bâ lege ti ala (Kus. 20:31). Ndani la aita ti lo aye lani lo mingi. Mbeni lâ, a-ancien ti Éphèse “atoto ngangu” ndali ti so ala mä so ala yeke bâ lo encore ape (Kus. 20:37). Legeoko tongana Paul, a-ancien ti e so ayeke sara kua ngangu aye aita ti ala mingi nga ala yeke sara ye kue so ala peut ti sara ti aidé ala (aPhil. 2:16, 17). Ye oko, na ambeni ngoi, a yeke ngangu na a-ancien ti sara ye kue so ala doit ti sara. Nyen la apeut ti aidé ala?

² A-ancien so ayeke sara kua ngangu so apeut ti gbu li na ndö ti tapande ti Paul (1 aCor. 11:1). Lo yeke lani ange ape. Paul ayeke lani zo so ayeke mbilimbili-kue ape, na ambeni ngoi lo tiri ti sara aye so ayeke na lege ni (aRom. 7:18-20). Lo wara lani akpale mingi. Me Paul adécouragé lani ape wala lo perdre ngia ti lo ape. Tongana a-ancien amû tapande ti Paul, ala peut ti ngbâ ti sara na Jéhovah na ngia atâa ala wara akpale. Zia e bâ tongana nyen la ala peut ti sara ni.

3. Nyen la e yeke bâ na yâ ti article so? Mbeni ye nde wa la e yeke bâ?

³ Na yâ ti article so, e yeke bâ akpale osio so a-ancien ayeke wara ka: (1) ti wara ngoi ti fa tënë nga ti sara akua kue so ala doit ti sara, (2) ti wara ngoi ti kpengba aita ti ala, (3) ti tene awokongo ti ala adécouragé ala ape nga (4) ti hon ndö ti awokongo ti aita. E yeke bâ nga ye so amû lani maboko na Paul ti hon ndö ti akpale so kue nga tongana nyen la a-ancien apeut ti mû tapande ti lo.

4. Ngbanga ti nyen la na ambeni ngoi a yeke ngangu na a-ancien ti zia nzoni tapande na yâ ti kua ti fango tënë?

⁴ Ndani so a peut ti duti mbeni kpale. Na ndö ti so a-ancien ayeke mû li ni na kua ti fango tënë, ala yeke na akua mingi. Na tapande, ala mingi ayeke mû li ni na bungbi ti milieu ti yenga nga na Mandango Bible ti congrégation. Peut-être ala yeke mû nga ambeni diskur. Ala yeke sara nga aye mingi ti fa kua na awakua ti mungo maboko nga ala yeke na ngia ti ngbâ ti kpengba aita (1 Pi. 5:2). Ambeni ancien ayeke sara kua ti lekengo aDa ti Royaume nga na ada so ayeke sara kua ti Jéhovah dä nga ala yeke bâ lege ni. Tongana ti aita kue na yâ ti congrégation, kota kua so a-ancien ayeke na ni ti sara ayeke ti fa nzoni tënë.—Mat. 28:19, 20.

5. So Paul ayeke mbeni wafango tënë, tapande wa la lo zia?

⁵ Tapande ti Paul. Na aPhilippien 1:10, Paul afa ye so asara si lo yeke lani mbeni nzoni wafango tënë. Lo tene: “Ala hinga biani aye so ayeke akota ye mingi ahon atanga ni.” Paul asara lani ye alingbi na wango so lo mû. A mû lani na lo kua ti fango tënë na teti angu mingi lo bâ ni tongana kua so ayeke kota mingi. Lo fa tënë lani “na lê ti azo dandara nga da na da.” (Kus. 20:20). Lo yeke fa lani tënë gï na mbeni mbilimbili l’heure ape wala gï na mbeni lango oko na yâ ti yenga ape. Lo yeke fa lani tënë na ndo kue nga na ngoi kue. Na tapande, na ngoi so lo ngbâ lani ti ku amba ti lo na Athènes, lo komanse ti fa nzoni tënë na mbeni groupe ti azo so iri ti ala awu mingi na ambeni amä lo (Kus. 17:16, 17, 34). Même na ngoi so Paul ayeke lani “na yâ ti chaîne,” lo fa tënë na azo so ayeke na terê ti lo.—aPhil. 1:13, 14; Kus. 28:16-24.

6. Nyen la Paul afa na amba ti lo ti sara?

⁶ Paul asara lani kua nzoni mingi na ngoi ti lo. Lo yeke tisa ka amba ti lo ti tene lo na ala afa tënë. Na tapande, na kozo voyage ti lo ti missionnaire lo mû lani Jean Marc na terê ti lo; na use ni, lo mû Timothée (Kus. 12:25; 16:1-4). Kite ayeke dä ape so Paul asara lani aye kue so lo peut ti sara ti fa na akoli so tongana nyen ti leke aye na yâ ti congrégation, tongana nyen ti sara vizite na aita ti kpengba ala nga tongana nyen ti duti anzoni wafango ye.—1 aCor. 4:17.

7. Tongana nyen la a-ancien apeut ti sara ye alingbi na wango ti Paul so ayeke na aÉphésien 6:14, 15?

⁷ Ye ti manda ni. A-ancien apeut ti mû tapande ti Paul tongana ala fa tënë da na da nga ala duti nduru ti fa tënë na ndo kue nga na ngoi kue. (Diko aÉphésien 6:14, 15.) Na tapande, ala peut ti fa tënë tongana ala gue ti vo ye wala na place ti kua ti ala. Wala na ngoi so  ala yeke mû maboko na kua ti lekengo mbeni Da ti Royaume, ala peut ti fa tënë na azo so ayeke nduru na ni nga na azo so ayeke kä ye na ala. Tongana Paul, a-ancien apeut ti mû ngoi so ala yeke fa tënë ti fa ye na azo, na tapande awakua ti mungo maboko.

8. Na ambeni ngoi, nyen la mbeni ancien abezoin ti sara?

⁸ A yeke nzoni akua ti congrégation wala ti circonscription so a-ancien ayeke na ni akanga lege na ala ape ti wara ngoi ti fa tënë. Ti wara ngoi ti sara ye kue so ala doit ti sara, na ambeni ngoi ala bezoin ti ke ambeni kua. Na peko ti so ala gbu li nga ala sambela na ndö ni, ala peut ti bâ so tongana ala yeda ti sara kua ni ala yeke wara lege ape ti bâ lege ti aye so ayeke kota mingi. Ambeni ye so ayeke akota ye mingi ayeke ti voro Nzapa na yâ ti sewa yenga oko oko, ti yapu na kua ti fango tënë wala ti fa na amolenge ti ala ti fa tënë. A yeke ngangu na ambeni ancien ti ke ti sara ambeni kua, me ala peut ti hinga biani so Jéhovah ahinga nzara so ala yeke na ni ti bâ lege ti akua nde nde so ala yeke na ni nzoni.

9. Kpale wa la a-ancien so ayeke na kua mingi ayeke wara?

⁹ Ndani so a peut ti duti mbeni kpale. Awakua ti Jéhovah ayeke na akpale mingi. Na lâ ti nda ni so, e kue e bezoin ti tene a kpengba e, a mû maboko na e nga a dë bê ti e. Na ambeni ngoi, ambeni ita abezoin ti tene a aidé ala si ala sara sioni ye ape (1 aThes. 5:14). Tâ tënë, a-ancien alingbi pëpe ti zi akpale kue so awakua ti Jéhovah ayeke wara. Atâa so kue, Jéhovah aye ti tene a-ancien asara ye so ala peut ti sara ti kpengba ataba ti lo nga ti bata ala. Tongana nyen la a-ancien so ayeke na kua mingi awe apeut ti wara ngoi ti aidé aita so abezoin ti tene a aidé ala?

10. Ti gue oko na 1 aThessalonicien 2:7, Paul abâ lani lege ti awakua ti Jéhovah tongana nyen?

¹⁰ Tapande ti Paul. Paul ayeke lani nduru ti gonda aita ti lo nga ti kpengba ala. A yeke nzoni a-ancien amû tapande ti lo ti sara ye na aita ti ala na ndoye nga na nzoni bê. (Diko 1 aThessalonicien 2:7.) Paul atene na aita ti lo so lo ye ala nga Jéhovah aye ala (2 aCor. 2:4; aÉph. 2:4, 5). Paul asara ye na azo ti congrégation tongana akamarade, lo mû ngoi ndali ti ala. Lo fa so lo sara confiance na ala na lege so lo sara na ala tënë polele na ndö ti aye so asara lo mbeto nga na awokongo ti lo (2 aCor. 7:5; 1 Tim. 1:15). Ye oko, Paul agboto lani lê gï na ndö ti akpale ti lo ape. Me, lo ye ti aidé aita ti lo.

11. Ngbanga ti nyen la Paul ayeke mû lani wango na aita ti lo?

¹¹ Na ambeni ngoi, Paul adoit lani ti mû wango na aita ti lo. Me lo sara ni lâ oko ape ndali ti so bê ti lo ason. Lo mû lani wango na ala ndali ti so lo ye ala nga lo ye ti tene ala wara akpale ape. Lo gi lani ti mû awango  so ayeke ngangu ape ti mä yâ ni nga lo ye ti tene ala yeda na ni. Na tapande, na yâ ti mbeni lettre so Paul atokua na aCorinthien, lo mû na ala mbeni ngangu wango. Na peko ti so lo tokua lettre ni, lo tokua Tite na ala. Lo ye lani ti hinga ala yeke sara ye tongana nyen na peko ti so ala wara lettre ni. Lo yeke lani na ngia mingi so lo mä so ala mä wango ni nga ala sara ye alingbi na ni.—2 aCor. 7:6, 7.

12. Tongana nyen la a-ancien apeut ti kpengba amba ti ala aChrétien?

¹² Ye ti manda ni. A-ancien apeut ti mû tapande ti Paul na lege so ala mû ngoi ti duti na amba ti ala aChrétien. Mbeni lege ti sara ni ayeke ti tene ala si hio na abungbi tongaso si ala sara lisoro na aita ti kpengba ala. Fani mingi, a bezoin ngoi mingi ape ti tënë na mbeni ita mbeni tënë so akpengba lo so lo bezoin ni (aRom. 1:12; aÉph. 5:16). Mbeni ancien so asara ye tongana Paul ayeke sara nga kua na Bible ti kpengba aita ti lo nga ti fa na ala so Nzapa aye ala. Lo yeke sara nga kue ti tene ala hinga so lo ye ala. Lo yeke sara lisoro na ala lakue nga lo yeke gi alege ti gonda ala. Na ngoi so mbeni ancien adoit ti mû wango na mbeni zo, lo doit ti mû wango so alondo na Bible. Lo yeke tene tënë polele me na nzoni bê ndali ti so lo ye si ita ti lo ni asara ye alingbi na wango so lo mû na lo.—aGal. 6:1.

13. Awokongo ti mbeni ancien apeut ti sara nyen na ndö ti lo?

¹³ Ndani so a peut ti duti mbeni kpale. A-ancien ayeke mbilimbili-kue ape. Ala yeke sara afaute tongana tanga ti azo kue (aRom. 3:23). Na ambeni ngoi, a peut ti duti ngangu na ala ti duti na nzoni bango ndo na ndö ti awokongo ti ala. Ambeni apeut ti gi bê ti ala mingi na ndö ti awokongo ti ala asara si ala découragé. Ambeni apeut ti pensé so awokongo ti ala ayeke nga kota ye ape, tongaso ala bezoin ti changé ape.

14. Ti gue oko na aPhilippien 4:13, tongana nyen la sarango terê kete a-aidé Paul ti duti na nzoni bango ndo na ndö ti awokongo ti lo?

¹⁴ Tapande ti Paul. So Paul asara terê ti lo kete, lo hinga so lo peut ti hon ndö ti awokongo ti lo na ngangu ti lo wani ape. Lo bezoin lani ti tene Nzapa amû na lo ngangu. Kozo, Paul ayeke zo so ayapu ti sara aye ti ngangu na aChrétien. Me na pekoni, lo hinga so ye so lo sara ayeke sioni na lo yeda ti changé bango ndo ti lo nga na sarango ye ti lo (1 Tim. 1:12-16). Grâce na mungo maboko ti Jéhovah, Paul aga mbeni ancien so aye azo, so abâ mawa ti zo nga so asara terê ti lo kete. Lo hinga lani so lo yeke na awokongo mingi, me lo zia li ti lo gï na ndö ni ape, lo mä na bê so  Jéhovah ayeke pardonné lo (aRom. 7:21-25). Lo ku lani ti duti mbilimbili-kue ape. Me lo sara ngangu ti maï asarango ye ti aChrétien nga lo sara terê ti lo kete lo zia bê ti lo na Jéhovah ti aidé lo ti sara kua ti lo.—1 aCor. 9:27; diko aPhilippien 4:13.

15. Nzoni bango ndo wa la a yeke nzoni a-ancien aduti na ni na ndö ti awokongo ti ala?

¹⁵ Ye ti manda ni. A soro a-ancien pëpe ndali ti so ala yeke mbilimbili-kue. Me Jéhovah ahunda na ala ti yeda so ala yeke sara afaute nga ti gi ti duti na asarango ye ti aChrétien (aÉph. 4:23, 24). A yeke nzoni mbeni ancien asara kua na Bible ti bâ yâ ti asarango ye ti lo nga ti sara achangement kue so lo bezoin ti sara. Tongaso, Jéhovah ayeke aidé lo ti duti na ngia nga ti sara kua ti lo nzoni.—Jacq. 1:25.

16. Nyen la apeut ti passé tongana mbeni ancien abâ gï awokongo ti aita?

¹⁶ Ndani so a peut ti duti mbeni kpale. Tongana a-ancien amû ngoi mingi ti duti na terê ti aita, a yeke duti ngangu na ala ape ti bâ awokongo ti aita ni. Me, tongana a-ancien asara hange ape, bê ti ala ayeke son, ala yeke sara ye na nzoni bê ape nga ala yeke fâ ngbanga na ndö ti aita ni. Paul atene na aChrétien so Satan aye ti tene ala sara ye tongaso.—2 aCor. 2:10, 11.

17. Paul abâ lani aita ti lo tongana nyen?

¹⁷ Tapande ti Paul. Lo yeke lani na nzoni bango ndo na ndö ti aita ti lo. Lo hinga lani so ala yeke sara afaute ndali ti so na ambeni ngoi ala sara aye so ason bê ti lo. Ye oko, Paul ahinga lani so tongana mbeni zo asara faute aye ti tene ape so lo yeke sioni zo. Lo ye aita ti lo na lo bâ gï anzoni sarango ye ti ala. Tongana aita ti lo ayeke sara ngangu ti sara ye so ayeke na lege ni, lo pensé so nzoni bibe la apusu ala ti sara ni nga ala bezoin ti tene a aidé ala.

18. Nyen la mo manda na lege ti fason so Paul a-aidé Évodie na Syntyche? (aPhilippien 4:1-3).

¹⁸ Na tapande, gbu li na ndö ti fason so Paul a-aidé aita-wali use na congrégation ti Philippes. (Diko aPhilippien 4:1-3.) Na bango ni, Évodie na Syntyche azia si mbeni ye so asara si ala mä terê ape aga na kangbi na popo ti ala. Paul atene lani sioni tënë na ala ape wala lo fâ ngbanga na ndö ti ala ape, me lo bâ gï anzoni sarango ye ti ala. Aita-wali be-ta-zo so asara na Jéhovah teti angu mingi. Paul ahinga lani so Jéhovah aye ala. So Paul ayeke na nzoni bango ndo na ndö ti ala apusu lo ti wa ala ti leke tënë so ayeke na popo ti ala. So Paul abâ gï anzoni sarango ye ti aita ti congrégation, a sara si lo yeke na ngia nga lo ngbâ ti duti na kpengba songo na ala.

19. (a) Tongana nyen la a-ancien apeut ti ngbâ ti duti na nzoni bango ndo na ndö ti amba ti ala aChrétien? (b) Foto ti ancien so angbâ ti nettoyé Da ti Royaume so afa na mo nyen?

¹⁹ Ye ti manda ni. A-ancien, ala gi ti bâ gï anzoni sarango ye ti aita. Ala kue ayeke mbilimbili-kue  ape, me ala kue ayeke na apendere sarango ye so apeut ti nzere na e (aPhil. 2:3). Tâ tënë, ngoi na ngoi a-ancien apeut ti leke bango ndo ti mbeni ita. Me tongana Paul, a yeke nzoni a-ancien asara ngangu ti bâ gï pëpe atënë nga na asarango ye ti zo ni so ayeke na lege ni ape. Me a yeke nzoni ala bâ ndoye so zo ni ayeke na ni ndali ti Jéhovah, gbungo ngangu ti lo na yâ ti kua ti Jéhovah nga anzoni ye so lo peut ti sara. A-ancien so ayeke bâ gï anzoni sarango ye ti aita ayeke aidé ala ti bâ so azo kue na yâ ti congrégation aye ala.

20. Tongana nyen la a-ancien apeut ti ngbâ ti bâ nzoni na lege ti tapande ti Paul?

²⁰ A-ancien, tongana ala ngbâ ti manda ye na ndö ti tapande ti Paul ayeke aidé ala mingi. Na tapande, na yâ ti Index des publications de la Société Watch Tower, gue na li ti tënë “Paul” na pekoni “tapande ndali ti a-ancien.” Na ngoi so mo yeke diko ambeni article so a fa ni, hunda terê ti mo: ‘Tongana nyen la tapande ti Paul apeut ti aidé mbi ti ngbâ ti duti na ngia na ngoi so mbi yeke sara kua ti mbi ti ancien?’

21. Nyen la a-ancien apeut ti duti sûr na ni?

²¹ A-ancien, ala girisa ape so Jéhovah ahunda na ala pëpe ti duti mbilimbili-kue, lo hunda na ala ti duti be-ta-zo (1 aCor. 4:2). Jéhovah ayeke lani na ngia ndali ti so Paul asara kua ngangu nga lo duti be-ta-zo. Ala peut ti duti sûr so Jéhovah abâ nga na nene ni mingi aye so ala yeke sara na yâ ti kua ti lo. Jéhovah ayeke ‘girisa lâ oko pëpe kusala ti ala nga na ndoye so ala fa ndali ti iri ti lo na lege so ala sara kua na azo ti be-vulu na ala ngbâ ti sara kua na ala.’—aHéb. 6:10.