1-2. Manino ty modelini-apostoly Paoly ro afaky manampy ty anti-panahy?

 NIASA mafy apostoly Paoly nikarakara ani-mpiara-manompo aminy rey satria tena niteany vatany rozy. (Asa. 20:31) Nahatsapa ani-zay mpiara-manompo aminy reo ka lasa tsy nahafoy ani-Paoly koa. Nisy fotoa aza “nirohaky ty tany” mihintsy ty anti-panahy ta Efesosy tao lafa nahay hoe fa tsy ho hitan-drozy sasy ie. (Asa. 20:37) Manahaky ani-Paoly koa anti-panahintsika reo satria tena tean-drozy tsika mpiara-manompo amin-drozy io, le manao ze fara herin-drozy rozy mba hanampea antsika. (Fil. 2:16, 17) Fe mety ho sarotsy amy anti-panahy reo kindraiky asan-drozy io. Ino ty afaky manampy an-drozy?

² Miasa mafy vatany aloha anti-panahintsika reo. Afaky mandiniky ty raha nataoni-Paoly rozy laha mahatiaro hoe sarotsy asan-drozy io. (1 Kor. 11:1) Tsy anjely Paoly ka hoe hahavita ty raha iaby. Olombelo tsy lavorary ie ka nisarotsy taminy kindraiky ty nanao raha soa. (Rom. 7:18-20) Niatriky raha sarotsy sankarazany mihintsy aza ie. Fe tsy nikivy Paoly ka hoe nijano tsy niasa ho ani-rahalahiny rey sasy. Mbo nifalifaly avao ie. Afaky hanahaky ani-zay avao koa ty anti-panahy laha manahaky ani-Paoly. Ka ndre miatriky raha sarotsy aza rozy, le ho falifaly hanompo ani-Jehovah avao. Ndao hodinihintsika hoe akory ty hahavitan-drozy ani-zay.

3. Ino ty hodinihintsika amy lahatsoratsy toy ato, le ino koa ty raha ho haintsika?

³ Ino ty hodinihintsika amy lahatsoratsy toy ato? Retoa misy raha efatsy mety ho sarotsy amy anti-panahy reo: 1) Mampifandanja ty asa fitoria noho ty asa hafa tokony hataon-drozy, 2) mahita fotoa hampahereza ani-rahalahy noho anabavy reo, 3) tsy kivy ndre manan-kandra, le 4) miaraky miasa amin’olo tsy lavorary. Hohenteansika hoe ino ty nanampy ani-Paoly lafa  nitojiky ani-reo, le akory ty azoni-anti-panahy atao mba hanahafa azy.

4. Manino ro mety ho sarotsy amy anti-panahy kindraiky ty mitariky ty asa fitoria?

⁴ Manino ro mety ho sarotsy raha zay? Satria mitariky ty asa fitoria ty anti-panahy fe mbo mana andraikitsy maro hafa koa. Mitariky fivoria andavanandro noho Fianara Baiboly ataoni-Fiangona, ohatsy, ty ankamaroan-drozy. Mety hanao lahateny hafa koa rozy. Mampiofana ty mpikarakara fiangona rozy sady mampahery ty rahalahy noho anabavy. (1 Pet. 5:2) Ty sisany amy anti-panahy reo koa manamboatsy noho mikarakara ty trano ampiasani-fandamina, manahaky Efitrano Fanjakà rey. Fe ndre eo raha iaby reo, manao manahaky ty olo iaby amy fiangona eo avao ty anti-panahy, zany hoe ty asa fitoria ro tena vatan-draha amin-drozy.​—Mat. 28:19, 20.

5. Ino ty modely nengani-Paoly?

⁵ Ino ty nataoni-Paoly? Ambarany antsika amy Filipianina 1:10 ao hoe ino ty nanampy azy hahita vokatsy amy fitoria. Hoy ty asany: ‘Anovo hay ze vatan-draha marè.’ Tsy nampirisiky avao Paoly fa ndre ie koa nanao ani-raha volaniny io. Nirahy hitory ie, le io ro nataony vatan-draha marè tamy fiainany tanatini-tao maro. Nitory “ankavoria noho santrano” ie. (Asa. 20:20) Tsy nifaritany hoe amy fotoa sisany avao ie vo mitory, na amy andro raiky sankerinandro avao. Tsy zay, fa nihararaotiny iaby ze fahafaha nananany mba hitoria! Lafa ie, ohatsy, nandiny ani-namany rey ta Atena any, le nitory ty vaovao soa tamy mpivavaky tao rey. Nijanjy soa ty sisany tamin’olo rey. (Asa. 17:16, 17, 34) Ndre nigadrà noho “nirohiza seny” aza ie, le mbo nitory tamy ze olo nanodidy azy teo.​—Fil. 1:13, 14; Asa. 28:16-24.

6. Nampiofana ty hafa hanao ino Paoly?

⁶ Nahay nampiasa soa ty fotoany Paoly. Matetiky ie ro nitao olo hafa hiaraky hanompo aminy. Tamy lia misionera voalohany nataony, ohatsy, nandesiny niaraky taminy Jaona Marka, le lafa nandeha fanindroeny ie, nandesiny Timoty. (Asa. 12:25; 16:1-4) Azo antoky fa nanao ze fara heriny Paoly mba hampianara ani-lahilahy reo hoe akory ty fomba fandamina fiangona, manao akory ty fanaova ty asani-mpiarakandro, le akory ty atao laha ta hahay hampianatsy.​—1 Kor. 4:17.

7. Akory ty azoni-anti-panahy anoriha ty raha volanini-Paoly amy Efesianina 6:14, 15 ao?

⁷ Ino ty azoni-anti-panahy ianara? Manahaky ani-Paoly ty anti-panahy laha mitory santrano. Manahaky azy koa rozy laha parè hitory avao ndre aia ndre aia, ndre amy fotoa manao akory. (Vakio Efesianina 6:14, 15.) Azon-drozy atao, ohatsy, ty mitory  lafa am-bazary eny na lafa am-piasà any. Na laha manamboatsy Efitrano Fanjakà rozy, le afaky mitory amy ze olo mipetraky mariniriny mbeny na amy ze olo ivilianan-drozy raha. Manahaky ani-Paoly ty anti-panahy ka afaky mampiofana olo hafa koa lafa amy fanompoa eny. Azon-drozy ampiofany soa mpikarakara fiangona reo.

8. Mila manao ino ty anti-panahy kindraiky?

⁸ Marina fa maro asa ty anti-panahy amy fiangona eo na amy faritsy iandraiketany, fe tsy tokony ho zay ro hanengany ty asa fitoria. Ka ino ty azony atao? Tsy voatery hekeniny iaby ze andraikitsy ampanaovy azy. Soa laha mivavaky noho mandiniky soa tse ie. Mety ho hitany amy zay hoe laha ekeniny raha ampanaovy azy iny, le tsy hahavita ani-ze tena vatan-draha ie. Ino iaby, ohatsy, zay? Mitariky fotoam-pivavahani-fianakavia sankerinandro, mazoto amy asa fitoria, na mampiofana ty anany hitory. Somary sarotsy amin’olo sisany ty mandà lafa ie amea andraikitsy fanampiny. Fe afaky matoky ie hoe haini-Jehovah soa fa maniry handanjalanja amy ty raha ataony ie kanao mandà.

9. Ino ty mety ho sarotsy amy anti-panahy maro asa reo?

⁹ Manino ro mety ho sarotsy raha zay? Maro ty raha manahira ty vahoakini-Jehovah amy andro farany zao. Samby mila fampahereza, fanampea, noho fampionona iaby tsika. Mety hila fanampea, ohatsy, ty olo sisany mba hahavy azy tsy haloto fandaisam-bata. (1 Tes. 5:14) Mazava ho azy fa tsy hahavita hanafaky ani-ze fitsapà iaby mahazo ty vahoakini-Jehovah ty anti-panahy. Fe ndre zay, teani-Jehovah laha manao ze fara heriny ty anti-panahy mba hampahereza noho hiarova ty aondrini-Jehovah. Ka anti-panahy fa maro raha atao retoa lahy, aia ty hahitan-drozy fotoa hanampea ani-rahalahy noho anabavy reo?

10. Laha hentea ty 1 Tesalonianina 2:7, ino ty raha nataoni-Paoly lafa nikarakara ty vahoakini-Jehovah ie?

¹⁰ Ino ty nataoni-Paoly? Niparè hidera noho hampahery ani-rahalahiny reo avao Paoly. Soa koa ty anti-panahy laha be fitiava manahaky azy sady soa fanahy amy rahalahy noho anabavy reo. (Vakio 1 Tesalonianina 2:7.) Nivolanini-Paoly tamy mpiara-manompo reo hoe teany rozy sady teani-Jehovah koa. (2 Kor. 2:4; Efes. 2:4, 5) Niaraky tamin’olo amy fiangona eo reo Paoly satria namany ty fandrambesany an-drozy. Tena natokisany rozy ka niresahiny tamin-drozy ndre ty handrany noho ty raha nampatahotsy azy. (2 Kor. 7:5; 1 Tim. 1:15) Fe tsy raha manahira azy rey ro nifantohany. Hita tamy ty raha nataony hoe tena ta hanampy ani-rahalahiny reo ie.

11. Ino ty antony nahavy ani-Paoly nanoro hevitsy ty rahalahiny noho anabaviny?

¹¹ Nisy fotoa Paoly nila nanoro hevitsy ani-rahalahy  noho anabaviny reo. Fe tsy heloky ro nahavy azy nanao ani-zay. Nanoro hevitsy an-drozy ie satria teany rozy ka ta hiaro an-drozy tsy ho azon-draha ie. Nataony mora azo ty torohevitsy nameany satria teany handramby ani-raha rey rozy. Nanoratsy taratasy ho ani-Korintianina, ohatsy, Paoly le nanome torohevitsy henjakenja an-drozy. Lafa baka nanoratsy ani-taratasy iny ie le naniraky ani-Titosy tamin-drozy any. Fa tsy linini-Paoly ty hahita hoe manao akory ty ho fandrambesan-drozy ani-taratasy iny. Nifalifaly biby ie lafa naharè hoe nirambesin-drozy soa torohevitsiny rey sady norihin-drozy!​—2 Kor. 7:6, 7.

12. Ino ty azoni-anti-panahy atao mba hampahereza ty mpiara-manompo aminy?

¹² Ino ty azoni-anti-panahy ianara? Afaky manahaky ani-Paoly koa ty anti-panahy, zany hoe manoka fotoa hiaraha amy mpiara-manompo reo. Azon-drozy atao, ohatsy, ty avy aloha lafa mivory, amy zay mba afaky mifampiresaky amy mpiara-manompo reo. Tsy voatery ho lava matetiky ty resaky atao amy rahalahy noho anabavy mila fampahereza rey. (Rom. 1:12; Efes. 5:16) Manahaky ani-Paoly koa ty anti-panahy laha mampiasa Baiboly lafa mampahery ty mpiara-manompo noho manome toky an-drozy hoe tena tea an-drozy Ndranahary. Ataony koa ze hahavy ani-mpiara-manompo reo hahatsapa hoe teany vatany rozy. Miresaky amin-drozy matetiky ie sady tsy misalasala midera an-drozy. Lafa hanoro hevitsy ty anti-panahy, le ataony azo antoky hoe mifanaraky soa amy Safà-Ndranahary raha iny. Ataony mivanta torohevitsy iny fe miezaky ho soa fanahy ie satria teany hanaraky ani-raha iny olo iny.​—Gal. 6:1.

13. Mety hanao akory anti-panahy reo lafa mandiniky ty handrany?

¹³ Manino ro mety ho sarotsy raha zay? Tsy lavorary ty anti-panahy. Manahaky ty olo iaby avao rozy ka manao hadisoa avao koa. (Rom. 3:23) Mety ho lositsy marè ty fandinihany ani-handrany rey kindraiky. Ty sisany aza mety ho kivy mihintsy satria mifantoky amy raha iny loatsy. Ty ilany koa mety hieritseritsy hoe tsy de manino raha ataony rey ka tsy voatery miova ie.

14. Laha hentea ty Filipianina 4:13, manino ty fiambanea ro nanampy ani-Paoly lafa nihainy ty handrany?

¹⁴ Ino ty nataoni-Paoly? Niambany Paoly ka nieky ie hoe tsy ho vitany raiky ty hiatriky ani-handrany rey. Nila hery baka amy Ndranahary ie. Taloha tse Paoly, tena nanenjiky ty Kristiana. Fe nihainy tafara atoy hoe tsy mety raha nataony zay ka novàny ty eritseritsiny noho ty raha fataony. (1 Tim. 1:12-16) Nampeani-Jehovah ie ka lasa anti-panahy be fitiava, mahay miferinay olo, sady miambany. Hainy hoe  maro ty handrany, fe tsy hoe nifantoky tamy zay avao ie. Mifanohitsy amy zay aza. Natoky ie hoe hanenga ty hadisoany Jehovah. (Rom. 7:21-25) Tsy nitamà Paoly hoe ho lasa lavorary afarani-zay. Ino ty nataony? Niezaky mafy ie mba hana toetsy kristiana. Niambany koa ie ka naneky hirahini-Jehovah hanao ty asany.​—1 Kor. 9:27; vakio Filipianina 4:13.

15. Ino ty hanampy ty anti-panahy hahay handiniky ty handrany?

¹⁵ Ino ty azoni-anti-panahy ianara? Haini-Jehovah hoe tsy lavorary ty anti-panahy kanefa nitendreny avao. Fe ndre zay, mitamà koa ie hoe hieky ty hadisoan-drozy rozy sady hiezaky hana toetsy kristiana avao. (Efes. 4:23, 24) Tokony hazoto hianatsy Baiboly ty anti-panahy soa ho hitany hoe aia ty tokony hohasoaviny amy ty vatany, bakeo areniny ze tokony hareny. Laha manao ani-zay ie, le hanampy azy Jehovah ka ho falifaly ie sady hahavita soa ty andraikitsiny.​—Jak. 1:25.

16. Ino ty mety hiseho laha mifantoky amy tsy fahalavorarian’olo hafa ty anti-panahy?

¹⁶ Manino ro mety ho sarotsy raha zay? Lafa miaraky matetiky amy rahalahy noho anabavy amy fiangona eo reo ty anti-panahy, le mety ho mora hitan-drozy iaby ze handrani-rahalahy noho anabavin-drozy reo. Laha tsy mitandrina amy zay ty anti-panahy le mety ho kamo ie, tsy ho soa fanahy, na hikinokino an-drozy. Fa nampitandrina Paoly hoe zay mihintsy ty teani-Satana hataoni-Kristiana.​—2 Kor. 2:10, 11.

17. Manao akory ty fahitani-Paoly ani-rahalahy noho anabaviny reo?

¹⁷ Ino ty nataoni-Paoly? Ze raha soa mikasiky ani-rahalahiny noho anabaviny reo avao ro nifantohany. Hainy hoe nanao hadisoa rahalahiny reo, satria kindraiky nisy vokany taminy ty raha nataon-drozy. Fe haini-Paoly hoe laha nanao hadisoa ty olo raiky, le tsy midika zay hoe olo raty ie. Tena teany rahalahiny noho anabaviny reo ka ty toetsy soan-drozy avao ro nifantohany. Laha hitany hoe tsy mahavita manao raha soa rozy, le ataony an’eritseritsy hoe ta hanao raha soa avao rozy reo fe mila fanampea.

18. Ino ty ianaranao mikasiky ty fomba nanampeani-Paoly ani-Eodia noho Syntyke? (Filipianina 4:1-3)

¹⁸ Henteo tse moa ty fomba nanampeani-Paoly ani-ranabavy roe ta Filipy any retoa. (Vakio Filipianina 4:1-3.) Mety tsy nifanaraky vasa Eodia noho Syntyke retoa ka lasa tsy nimpinama sasy. Fe tsy nasiaky na nitsaratsara an-drozy Paoly fa nifantoky tamy ty toetsy soan-drozy. Fa nanompo ani-Jehovah fa ela ranabavy tsy mivaliky retoa. Haini-Paoly fa teani-Jehovah rozy. Raha soa mikasiky ani-anabaviny retoa avao zany ro tan-tsaini-Paoly ao. Ino amy zay ty nataony? Nampirisiky an-drozy hifanaraky soa ndraiky ie. Raha soa avao ro ataoni-Paoly an’eritseritsy lafa manenty  olo ie, ka lasa falifaly avao ie sady tean’olo amy fiangona eo.

19. a) Ino ty hanampy ty anti-panahy hieritseritsy raha soa mikasiky mpiara-manompo reo? b) Ino ty azonao ianara baka amy sarini-anti-panahy manadio Efitrano Fanjakà io?

¹⁹ Ino ty azoni-anti-panahy ianara? Laha anti-panahy iha le ilao hoe ino ty toetsy soa ananani-rahalahy noho anabavinao reo. Marina fa tsy lavorary iaby rozy, fe samby mana toetsy teantsika koa rozy. (Fil. 2:3) Mety hanoro hevitsy ani-rahalahy noho anabavy reo ty anti-panahy kindraiky, le mety hampeloky ty raha volanin’olo iny na ty raha ataony. Fe tokony hiezaky mafy ty anti-panahy mba tsy hifantoky amy raha rey, manahaky nataoni-Paoly iny avao. Soa rozy laha mifantoky amy ty fitiavan’olo iny ani-Jehovah, amy fiaretany tamy fanompoa a Ndranahary, noho amy ty raha soa hafa mety ho vitany. Laha mifantoky amy toetsy soan’olo hafa avao ty anti-panahy, le ho tsapani-rahalahy noho anabavy reo hoe tea an-drozy ty fiangona.

20. Ino ty hanampy ty anti-panahy handramby soa baka amy modelini-Paoly avao?

²⁰ Laha anti-panahy iha le tena hanampy anao ty modelini-Paoly. Tohizo avao ty fianaranao mikasiky azy. Afaky henteanao, ohatsy, ty Fanondroana Bokin’ny Vavolombelon’ny Jehovah amy hoe “Paoly”, le ilao ty lohatenikely hoe “modely ho an’ny anti-panahy.” Lafa mamaky ani-boky noho gazety tononiny eo reo iha, le eritsereto zao: ‘Manino ohatsini-Paoly toy ro manampy ahy ho falifaly avao lafa zaho manao ty asani-anti-panahy?’

21. Ino ty raha atokisani-anti-panahy?

²¹ Ho ani-anti-panahy: Tiarovo fa tsy mitamà anao ho lavorary Jehovah. Fa ino ty takìny aminao? Teany ho azo atokisa iha. (1 Kor. 4:2) Niasa mafy Paoly sady azo atokisa. Nahafalifaly ani-Jehovah raha zay. Afaky matoky koa iha fa tena teani-Jehovah ty asa ataonao ho azy. Tsy ho halinony mihintsy “ze nataonareo, noho ty fitiava nasehonareo ho ahi-ty anarany, tamy nareo nikarakara ty olo masy sady mbo mikarakara an-drozy nareo zisiky henanizao.”​—Heb. 6:10.