1-2. E faapefea ona fesoasoani le faaaʻoaʻoga a Paulo i toeaina i aso nei?

 NA ALOFA Paulo i ona uso. Na galue mamafa o ia mo i latou. (Galu. 20:31) O lea na matuā alolofa ai ona uso iā te ia. I se tasi aso, na “matuā fetagisi” ai toeaina i Efeso ina ua iloa o le a lē toe feiloaʻi ma Paulo. (Galu. 20:37) E tai pei foʻi toeaina galulue mamafa o Paulo. E alolofa tele i uso ma tuafāfine, ma faia mea uma e fesoasoani ai iā i latou. (Fili. 2:16, 17) Ae e iai taimi e feagai ai toeaina ma luʻi. O le ā e fesoasoani iā i latou e foʻia ai na luʻi?

² E mafai ona fesoasoani le faaaʻoaʻoga a Paulo i toeaina galulue mamafa. (1 Kori. 11:1) E lē o Paulo o se agelu. E lē lelei atoatoa o ia ma na iai taimi na matuā faigatā ai ona ia faia le mea saʻo. (Roma 7:18-20) E tele foʻi isi faigatā na ia fesagaʻia. Ae e leʻi faavaivai ai Paulo pe mou ai lona olioli. O le faaaʻoaʻo o toeaina iā Paulo o le a mafai ai ona foʻia luʻi e latou te fesagaʻia, ma maua ai pea le olioli a o auauna iā Ieova.

3. O le ā o le a talanoaina i lenei suʻesuʻega, ma o le ā e tatou te aʻoaʻoina mai ai?

³ O le a talanoaina i lenei suʻesuʻega luʻi e fā e masani ona fesagaʻia e toeaina: (1) o le taumafai e faapaleni la latou galuega talaʻi ma isi tiute tauave, (2) o le avea ma leoleo mamoe manatu mamafa, (3) foʻia o latou lava vaivaiga, ma le (4) o le fesagaʻia o le lē lelei atoatoa o o latou uso ma tuafāfine. O le a talanoaina foʻi auala na foʻia ai e Paulo na luʻi, ma pe faapefea ona faaaʻoaʻo toeaina i lana faaaʻoaʻoga.

4. Aiseā e ono avea ai o se luʻi i toeaina le taʻimua i le galuega talaʻi?

⁴ Le māfuaaga e avea ai o se luʻi. E tele isi tiute tauave a toeaina e ese mai i le taʻimua i le galuega talaʻi. O se faataʻitaʻiga, o le toʻatele o i latou e masani ona taʻitaʻifono i sauniga amata o le vaiaso, ma fai Suʻesuʻega Faale-Tusi Paia a le Faapotopotoga. E latou te faia foʻi lauga lautele ma pisi i le toleniina o auauna o le faiva. E fiafia foʻi e faalaeiau o latou uso ma tuafāfine. (1 Pete. 5:2) E galulue isi toeaina i le fausiaina ma le toe faaleleia o Maota mo Sauniga, ma isi nofoaga e faaaogā mo le tapuaʻiga iā Ieova. Peitaʻi, e pei foʻi toeaina o isi tagata uma o le faapotopotoga, e latou te faamuamua le talaʻia o le tala lelei o le Malo, ona o le mea lenā e sili ona tāua iā i latou.​—Mata. 28:19, 20.

5. O le ā le faaaʻoaʻoga na faataatia e Paulo o se tagata talaʻi?

⁵ Le faaaʻoaʻoga a Paulo. O loo maua i le Filipi 1:10 le auala na taulau manuia ai Paulo. Na ia faapea mai: “Ia outou faamautinoa o mea e sili ona tāua.” Na faatatau e Paulo lana fautuaga. Na tofia o ia i le galuega talaʻi, ma na vaai i le galuega talaʻi o se tasi o mea e sili ona tāua mo le tele o tausaga. Na talaʻi o ia i luma o le “lautele, ma mai i lea fale i lea fale.” (Galu. 20:20) E lē na o le tasi se taimi o le aso pe tasi foʻi se aso o le vaiaso e talaʻi ai Paulo. Na ia faaaogā avanoa uma e talaʻi ai! O se faataʻitaʻiga a o faatalitali Paulo mo ana uō i Atenai, na ia talaʻi atu ai i tagata taualoa ma na maua ai ni iʻuga lelei. (Galu. 17:16, 17, 34) E oo lava foʻi i le taimi na ʻnoanoatia’ ai Paulo i le falepuipui, na talaʻi ai iā i latou na iai i ina.​—Fili. 1:13, 14; Galu. 28:16-24.

6. O ā toleniga na saunia e Paulo?

⁶ Na faaaogā lelei e Paulo lona taimi. E masani ona ia valaaulia isi e latou te ō i le galuega talaʻi. O se faataʻitaʻiga, na valaaulia e Paulo Ioane Mareko i lana malaga faamisionare muamua, ae valaaulia Timoteo i lana malaga faamisionare lona lua. (Galu. 12:25; 16:1-4) E mautinoa na naunau Paulo e aʻoaʻo nei tane i auala e faamaopoopo ai se faapotopotoga, faaauau ai ona faia asiasiga faaleoleo mamoe ma avea ma faiaʻoga lelei.​—1 Kori. 4:17.

7. E faapefea ona mulimuli toeaina i le fautuaga a Paulo o loo i le Efeso 6:14, 15?

⁷ Lesona. E faaaʻoaʻo toeaina e lē gata o le talaʻi mai lea fale i lea fale, ae e latou te nofosauni foʻi ma lotomalilie e molimau atu i so o se avanoa. (Faitau le Efeso 6:14, 15.) O se faataʻitaʻiga, e mafai ona latou molimau atu pe a ō e faatau po o a latou fale faigaluega. Pe a latou galulue i le fausiaina o maota mo  tapuaʻiga, e mafai ona latou faailoa atu le tala lelei i ē nonofo latalata ane ma i latou e faatau atu a latou oloa. E faaaʻoaʻo foʻi toeaina iā Paulo, pe a faaaogā le taimi e auai ai i le galuega talaʻi e toleni ai isi e aofia ai ma auauna o le faiva.

8. O le ā e ono manaʻomia ona faia e se toeaina i nisi taimi?

⁸ E lē tatau ona alu uma le taimi o toeaina i le taulimaina o la latou tiute i le faapotopotoga, po o le matagaluega ma leai ai se taimi e talaʻi ai. Ina ia faaauau pea ona paleni toeaina, atonu e iai taimi e manaʻomia ai ona latou teena nisi tofiga. Pe a uma ona tatalo ma iloilo lelei e le toeaina se tofiga, atonu o le a ia iloa ai e lē mafai ona ia faatinoina lenā tofiga ae faatalalē ai i mea e sili ona tāua. O na mea e aofia ai le faia o le tapuaʻiga a le aiga i vaiaso taʻitasi, faia se sao atoatoa i le galuega talaʻi ma toleni ai le fanau. E faigatā i nisi o toeaina ona teena se tofiga, ae e mafai ona latou mautinoa e malamalama Ieova i o latou faanaunauga ina ia paleni i mea uma.

9. O ā luʻi e fesagaʻia e toeaina?

⁹ Le māfuaaga e avea ai o se luʻi. E tele luʻi e fesagaʻia e tagata o Ieova. I nei aso e gata ai, e tatou te manaʻomia uma ni faalaeiauga, lagolagosua ma faamāfanafanaga. E iai taimi e manaʻomia ai e nisi le fesoasoani ina ia ʻalofia amioga leaga. (1 Tesa. 5:14) E lē mafai e toeaina ona aveesea luʻi uma e fesagaʻia e tagata o Ieova. E ui i lea, e finagalo Ieova ina ia faia e toeaina le mea sili e latou te mafaia, ina ia faalaeiau ma puipuia ai ana mamoe. E faapefea ona maua e toeaina le taimi e fesoasoani ai i mamoe a Ieova?

10. I le 1 Tesalonia 2:7, o le ā le auala na faaalia ai e Paulo lona manatu mamafa i tagata o Ieova?

¹⁰ Le faaaʻoaʻoga a Paulo. Na saʻili e Paulo auala e faamālō ma atiaʻe ai ona uso. E lelei i toeaina le mulimuli i le faaaʻoaʻoga alofa a Paulo, e ala i le feutagaʻi ma tagata o Ieova i se auala alofa faapelepele. (Faitau le 1 Tesalonia 2:7.) Na faamautinoa atu e Paulo i ona uso tapuaʻi lona alofa mo i latou ma e alofa foʻi Ieova iā i latou. (2 Kori. 2:4; Efe. 2:4, 5) Na feutagaʻi Paulo ma i latou i le faapotopotoga o ni uō ma na ia faaaluina foʻi le taimi ma i latou. Na maufaatuatuaina e Paulo ona uso talitonu e ala i le faailoa atu i ai o ona popolega ma ona vaivaiga. (2 Kori. 7:5; 1 Timo. 1:15) Peitaʻi e leʻi taulaʻi atu Paulo i ona faafitauli, ae na taulaʻi atu i auala e fesoasoani ai i ona uso.

11. Aiseā na fautuaina ai e Paulo ona uso ma tuafāfine?

¹¹ E iai taimi na manaʻomia ai e Paulo ona fautua atu i ona uso ma tuafāfine. Ae e na te leʻi faia faapea ona o sona ita. Na avatu e Paulo fautuaga ona o lona manatu mamafa iā i latou, ma na manaʻo e puipuia i latou mai ni lamatiaga. Na taumafai o ia e fautua atu i se auala malamalamagofie, ma na manaʻo foʻi ia  latou talia. O se faataʻitaʻiga, na avatu e Paulo se fautuaga malosi i lana tusi i Korinito. Ina ua uma ona tusia lana tusi na ia auina atu ai loa Tito iā i latou. Na fia iloa e Paulo po o le ā le auala o le a latou tali mai ai i lana tusi. Maʻeu le faafiafiaina o Paulo, ina ua ia iloa na latou faatatauina lana fautuaga!​—2 Kori. 7:6, 7.

12. E faapefea ona faamalosia e toeaina o latou uso talitonu?

¹² Lesona. E mafai ona faaaʻoaʻo toeaina iā Paulo, e ala i le faaalu o le taimi ma o latou uso talitonu. O se tasi o auala e latou te faia ai faapea, o le vave taunuu lea i le sauniga ina ia faaalu se taimi e fai ai ni talanoaga faalaeiau ma isi. E masani lava e na o ni nai minute e faaalu e faalaeiau ai se uso po o se tuafafine o loo manaʻomia le fesoasoani. (Roma 1:12; Efe. 5:16) E faaaʻoaʻo foʻi toeaina iā Paulo pe a latou faamalosia uso talitonu e ala i le faaaogā o le Afioga a le Atua e atiaʻe ai i latou. E faamautinoa atu e toeaina e alofa le Atua i o latou uso ma tuafāfine, ma e latou te alolofa foʻi iā i latou. E fesootaʻi atu pea ma saʻili avanoa e faamālō atu ai. Pe a manaʻomia ona avatu e se toeaina se fautuaga, e faavae mai lenā fautuaga i le Afioga a le Atua. E na te avatu se fautuaga maʻoti ae e agalelei, ona e manaʻo o ia ina ia faatatauina e uso ma tuafāfine lana fautuaga.​—Kala. 6:1.

13. E faapefea ona aafia toeaina i o latou lava vaivaiga?

¹³ Le māfuaaga e avea ai o se luʻi. E lē lelei atoatoa toeaina. E latou te faia foʻi mea sesē e pei o tagata uma. (Roma 3:23) O nisi taimi atonu e latou te tauivi ai ma o latou vaivaiga. O nisi ua taulaʻi naʻuā atu i o latou vaivaiga ma lotovaivai ai. O nisi e ono vave ona latou faia faamolemolega i o latou masei, ma manatu māmā ai i le faia o suiga manaʻomia.

14. I le Filipi 4:13, na faapefea ona fesoasoani le lotomaulalo iā Paulo e fesagaʻia ai ona vaivaiga?

¹⁴ Le faaaʻoaʻoga a Paulo. Na faailoa mai ma le lotomaulalo e Paulo, e lē mafai ona ia fesagaʻia na o ia ona lava vaivaiga. E na te manaʻomia le malosi mai i le Atua. I le taimi muamua na matuā inainā ma maumauaʻi Paulo e sauāina Kerisiano. Mulimuli ane na ia faailoa mai ona sesē ma lotomalie e suia ona uiga ma ana amioga. (1 Timo. 1:12-16) Ae o le fesoasoani a Ieova, na avea ai Paulo ma leoleo mamoe alofa, lotomaulalo ma alofa mutimutivale. Na ia iloa aafiaga leaga o ona vaivaiga, peitaʻi na filifili e maufaatuatuaina le faamagaloga a Ieova nai lo le taulaʻi atu i ona lava vaivaiga. (Roma 7:21-25) E leʻi faatalitalia e Paulo o ia ina ia lelei atoatoa. Ae na galue mamafa e faaleleia ona uiga o se Kerisiano, ma na lotomaulalo o ia e faalagolago i le fesoasoani a Ieova e  faataunuu ai lana faiva.​—1 Kori. 9:27; faitau le Filipi 4:13.

15. O le ā le vaaiga paleni e tatau ona iai i toeaina i o latou vaivaiga?

¹⁵ Lesona. E lē tofia se tasi e avea ma toeaina ona e lelei atoatoa. O lea e faatalitalia e Ieova i latou ina ia taʻutino a latou mea sesē, ma atiaʻe uiga faa-Kerisiano. (Efe. 4:23, 24) E faaaogā e toeaina le Afioga a le Atua e iloilo ai i latou lava, ma fai suiga manaʻomia, ona fesoasoani atu lea o Ieova ia latou maua le fiafia ma taulau manuia ai.​—Iako. 1:25.

16. O le ā e ono tupu pe a taulaʻi se toeaina i vaivaiga o isi?

¹⁶ Le māfuaaga e avea ai o se luʻi. Talu ai ona e galulue faatasi toeaina ma uso ma tuafāfine o le faapotopotoga, atonu la e latou te iloa lelei ai o latou vaivaiga. Peitaʻi pe a lē faaeteete toeaina, e ono feita, inainā ma faamasinosino i o latou uso ma tuafāfine. Peitaʻi na lapataʻia e Paulo Kerisiano, o le mea lenā e manaʻo Satani e latou te faia.​—2 Kori. 2:10, 11.

17. O le ā le vaaiga a Paulo i ona uso ma tuafāfine?

¹⁷ Le faaaʻoaʻoga a Paulo. Na iai pea iā Paulo se vaaiga saʻo i ona uso ma tuafāfine. Na iloa lelei e Paulo a latou mea sesē, ona e iai taimi na aafia ai foʻi o ia. Peitaʻi, na ia iloa le eseesega o le amioga leaga ma le tagata leaga. Na alofa Paulo i ona uso ma na taulaʻi o ia i o latou uiga lelei. Pe a faigatā ona faia e se uso po o se tuafafine le mea saʻo, na manatu Paulo e lelei o latou uunaʻiga ma e latou te manaʻomia se fesoasoani.

18. O le ā e te aʻoaʻoina mai i le auala na taulima ai e Paulo le mea na tupu ia Evotia ma Sunetui? (Filipi 4:1-3)

¹⁸ Seʻi mātau le auala na feutagaʻi ai Paulo ma ni tuafāfine se toʻalua i le faapotopotoga i Filipi. (Faitau le Filipi 4:1-3.) E foliga mai na faataga e Evotia ma Sunetui o laʻua lava faafitauli, e faatupu ai se feeseeseaʻiga i lo la va. E leʻi inainā pe faamasinosino Paulo, ae na ia taulaʻi atu i o la uiga lelei. O i laʻua o ni tuafāfine faamaoni ma na lelei o la talaaga. Na iloa e Paulo e alofa Ieova iā i laʻua. O le iai iā Paulo o se vaaiga saʻo e faatatau i nei tuafāfine, na uunaʻia ai o ia e faalaeiau i laʻua e foʻia lo la feeseeseaʻiga. Na fesoasoani le iai iā Paulo o lenā vaaiga e maua ai pea lona olioli, ma faatumauina ai faauōga māfana ma uso ma tuafāfine i le faapotopotoga.

19. (a) E faapefea ona tausia pea e toeaina le vaaiga saʻo i uso ma tuafāfine? (e) O le ā e te aʻoaʻoina mai i le ata o se toeaina o loo faamamāina le Maota mo Sauniga?

¹⁹ Lesona. E taulaʻi atu toeaina i uiga lelei o o latou uso ma tuafāfine. E tatou te lē lelei atoatoa uma, ae tofu foʻi i tatou ma uiga lelei e fiafia i ai isi. (Fili. 2:3) E moni e iai taimi atonu e manaʻomia ai ona avatu e toeaina se fautuaga i se uso po o se tuafafine. Ae e tatau ona latou faaaʻoaʻo iā Paulo, ina ia taumafai malosi e lē taulaʻi atu i upu ma gaoioiga faatigā  a se uso po o se tuafafine. Ae e lelei ona latou taulaʻi atu i uiga lelei o lenā tagata, lona alofa iā Ieova, ma lona tumau e auauna iā te ia. O toeaina e iai le vaaiga saʻo, e latou te tausia le māfana ma se siʻomaga filemu i le faapotopotoga.

20. E faapefea ona aogā pea le faaaʻoaʻoga a Paulo i toeaina?

²⁰ E mafai ona maua pea e toeaina le fesoasoani, pe a faaauau ona suʻesuʻeina le faaaʻoaʻoga a Paulo. O se faataʻitaʻiga i le Watch Tower Publications Index, e mafai ona e tagaʻi i le ulutala autū “Paul” ona tagaʻi lea i le tamaʻi ulutala “example for elders.” A o e faitauina nisi o mataupu o loo lisi mai ai, ia fesili ifo, ʻE faapefea ona fesoasoani le faaaʻoaʻoga a Paulo iā te aʻu, ina ia faatumauina ai pea loʻu olioli a o faataunuu oʻu tiute o se toeaina?’

21. O le ā e tatau ona mautinoa i ai toeaina?

²¹ Toeaina e, ia manatua e lē o faatalitalia e Ieova outou e lelei atoatoa, ae e na te faatalitalia outou ina ia faamaoni. (1 Kori. 4:2) Na talisapaia e Ieova le faamaoni ma le galue mamafa o Paulo. O lea, ia e mautinoa e tāua foʻi iā Ieova mea o loo e faia e auauna atu ai iā te ia. E na te ʻlē faagalogaloina la outou galuega, ma le alofa ua outou faaali mai i lona suafa, auā ua outou auauna i le ʻaupaia.’​—Epe. 6:10.