1-2. Lamo ndjɔmbɔmba kɛ ɔpɔstɔlɔ Poolo okokawɔ nkotshɛ tokokolo lɔɔko kɛnɛ?

 ƆPƆSTƆLƆ Poolo akɔpaki wananyɔ wande. Nde akambaki olemo efula lá nkambo djɛwɔ. (Ele. 20:31) L’onkoko wɔwɔ, winande andjawodji wokaki Poolo ngandji efula. Lá mbamba kɛmɔtshi, ‘iwɔ walelaka efula,’ winá wɔ tokokolo timá Ɛfɛsɛ iyoke ambɔ wapɔngɔwɛna lonkina. (Ele. 20:37) Edjinge tokokolo tɔso nkɔpaka wananyɔ l’ankaana yɛwɔ efula la nanghaka kenkfumɔ k’okokawɔ nangha djɛ ndaakotshɛ. (Flp. 2:16, 17) Koko lá winá ɛmɔtshi, tokokolo mpomanaka l’ekakasano. Kɛkɔnge kekoka ndaakotshɛ djɛ ndongela ekakasano wɛsɔ?

² Tokokolo tɔso t’entete nkoka nshishima ndjɔmbɔmba kɛ Poolo. (1 Kɔ. 11:1) Nde atayalaki l’akoka w’entengo w’andjelo. Poolo ayalaki onto wɔ ntshamba djɛ djɔ, woyalaki l’okakasano wɔ nangha kɛnɛ kelekɔ wɔlɔ lá winá ɛmɔtshi. (Ɔrɔ. 7:18-20) Lonkina, nde apomanaki l’ekakasano efula wetshikitanyi. Koko Poolo atapekɔ kana ntshutshɛ osasa wɔnde. Má ndjokola Poolo, tokokolo nkoka ndongela ekakasano wepomana lawɔ la nama osasa wɔwɔ winá wokambelawɔ Yehova. Nyontshɔ tokolenda wopo wokokawɔ nangha nkambo djɛsɔ.

3. Kɛkɔnge k’ɔkɔpaso nshishima lá djamba djɛnɛ, ko kɛkɔnge kɛ songoshishima lonkina?

³ Lá djamba djɛnɛ, tongoshishima ekakasano ɛnɛyi weleka mpomana la tokokolo: 1) ndjala la wɛdjimo lantenyɛ olemo w’ipoposanyɛ la edjito wɛwɔ enkina, 2) ndjala enami weyakiyanyɛ lá nkambo dj’ɛnkɔkɔ, 3) ndongela wɛdju wɛwɔ iyɔmɛlɛ la 4) kɛnɛ k’okokawɔ nangha l’evunga w’anto ankina. Tongoshishima lonkina wopo wɔ Poolo ndalongela ekakasano wɛsɔ la wopo wɔ tokokolo okokawɔ ndjokola ndjɔmbɔmba kɛnde.

4. Lamo tokokolo okokawɔ ndjala l’okakasano wɔ mpɛyɛ ndjɔmbɔmba l’olemo w’ipoposanyɛ?

⁴ Lamo nkambo djɛsɔ okokawɔ ndjala okakasano? Tokokolo walekɔ l’edjito efula wɛ nangha má djiko djɛ mpɛyɛ ndjɔmbɔmba l’olemo w’ipoposanyɛ. Ndjɔmbɔmba, efula l’anteyi kɛwɔ ndɔndjɛka losanghanyɛ lel’anteyi kɛ lombengo la ndɔndjɛka Wekelo wɔ Bible wɔ l’otshumano. Lonkina iwɔ mpɛyɛka wamba ankina. Walekɔ lonkina l’odjito wɔ nkfumba enkambi wekotshɛ la wɔ nkembɛ wananyɔ l’ankaana yɛwɔ. (1 Pɛ. 5:2) Tokokolo tɔmɔtshi nkambaka l’olemo w’opikelo la wɔ ndɔngɔsɔla Amvulu y’Onkfumi la amvulu inkina y’olonghanyelo. Koko, etengo ase otshumano ankfumɔ, olemo wɔ ntondo la woleka djonyi wɔ tokokolo oyɛwɔ ladjɛ ndeka ndapɛyɛ nde, mpoposanyɛ losango lɔ wɔlɔ.—Mat. 28:19, 20.

5. Olakanyelo wɔkɔnge Poolo ndatotshikela lá kɛnɛ kelendana l’olemo w’ipoposanyɛ?

⁵ Ndjɔmbɔmba kɛ Poolo. Poolo ntoshimelaka kɛnɛ k’okotshisa djɛ nde ndonga lá Filipɛ 1:10, ante: ‘Nyoshikikɛ akambo waleka djonyi.’ Poolo akambaki la dako dj’indapɛyɛ nyɔmɛlɛ djɛsɔ. Wɔpɛyɛka olemo ɔmɔtshi, edjinge l’ilá k’ɛnɔnyi efula nde ɔsaki olemo wɔsɔ etengo olemo woleka djonyi. Nde apoposanyɛki ‘lá ntshandjawala edjinge lá mvulu la mvulu.’ (Ele. 20:20) Nde atapoposanyɛki ngo l’itenyi imɔtshi yɛ winá kana l’ɛtɔyi kɛmɔtshi kɛ lufu lá lobengo. Nde akambaki la mbamba kenkfumɔ kɛ ndawaka djɛ mpoposanyɛ! Ndjɔmbɔmba, winá wɔ ndakongaka winade amɔtshi l’Atɛnɛ, nde atateyɛka mpoposanyɛ losango lɔ wɔlɔ le eloyi w’anto watshikitanyi, ko awaka eposelo wɛ wɔlɔ. (Ele. 17:16, 17, 34) Kaanga winá wɔ ndayalaka ‘lá lokando,’ Poolo apoposanyɛki le anto wayalaki entshupa lande.—Flp. 1:13, 14; Ele. 28:16-24.

6. Okfumbelo wɔkɔnge wɔpɛyisa Poolo?

⁶ Poolo akambaki la winá wɛnde lá yopo yɛ wɔlɔ. Mbala efula nde aposaki l’anto ankina t’olemo w’ipoposanyɛ. Ndjɔmbɔmba, lá lɔkɛndɔ lɔnde lɔ ntondo etengo misiɔnɛrɛ, nde atshɔka nya Djɔanɛ kanga yetaka lonkina ambɔ Marko, ko lá lɔkɛnde l’ape, nde atshɔka nya Timɔte. (Ele. 12:25; 16:1-4) Ape l’ehamo Poolo ananghaki kenkfumɔ kɛ ndakokaka nangha djɛ ndakanyɛ ampame yɛsɔ wopo wɔ nonghanyɛ otshumano, wopo wɔ nkamba olemo wɔ anami w’ɛnkɔkɔ, la wopo wɔ ndjala wetsha wɛ wɔlɔ.—1 Kɔ. 4:17.

7. Wopo wɔkɔnge tokokolo okokawɔ nkilika dako djɛ Poolo djelekɔ lá Ɛfɛsɛ 6:14, 15?

⁷ Olakanyelo. Tokokolo nkoka ndjokola Poolo apengo má mpoposanyɛ lá mvulu la mvulu toko, koko lonkina má ndjala entshupa djɛ mpoposanyɛ lá mbamba inkfumɔ. (Wala Ɛfɛsɛ 6:14, 15.) Ndjɔmbɔmba, iwɔ nkoka mpoposanyɛ winá wotshɔwɔ ntosomba nkete kana woyɛwɔ l’olemo. Kana winá wonanghawɔ olemo w’opikelo w’amvulu y’Onkfumi, iwɔ nkoka mpoposanyɛ le anto walekɔ entshupa  kana anto wasadjɛ nkete. Ngo ngete Poolo, tokokolo nkoka nkamba la winá woyɛwɔ l’olemo w’ipoposanyɛ djɛ nkfumba anto ankina, ndjila edjinge enkambi wekotshɛ.

8. Lá mbamba imɔtshi, kɛkɔnge kɛ tokokolo oyɛwɔ ladjɛ nangha?

⁸ Tokokolo wapakoke ndapɛyɛka ngo lá edjito wɛwɔ wel’otshumano kana wel’edjingadjinga ko nsamba winá wɔ mpoposanyɛ. Djɛ ndjala la wɛdjimo, lá mbamba imɔtshi iwɔ nkoka ntona edjito emɔtshi. M’ɔkɔngɔ wɔ ntɔnɔla lá lɔlɔmbɔ, tokokolo nkoka nsipisoyɛ ambɔ, ntsha iwɔ ndjawola elemo enkfumɔ wapɛyɛwɔ, iwɔ nkoka ndimɛ yimba l’elemo enkina weleka djonyi. Elemo enkina weleka djonyi wɛsɔ nkoka ndjala, ndɔndjɛ wekelo wɔ nkfumbo mbengo inkfumɔ, mpoposanyɛ l’entete kana nkfumba wana wawɔ djɛ mpoposanyɛ. Amɔtshi ndjalaka l’okakasano wɔ ntona edjito welá nyuma, koko iwɔ nkoka ndashikikɛ ambɔ Yehova nsipisoyɛka mposɛ kelekɔ lawɔ kɛ ndjala la wɛdjimo l’akambo ankfumɔ.

9. Okakasano wɔkɔnge wopomana la tokokolo m’ɔtɛ wɔ akambo efula wokotshɛwɔ?

⁹ Lamo nkambo djɛsɔ okokawɔ ndjala okakasano? Enkambi wɛ Yehova wapomana l’ekakasano efula. L’etsho w’ekomo wɛnɛ, isankfumɔ tolekɔ la djonyi dj’ekeketshelo, dj’osukɔ la dj’okotshɔ. Edjinge lá mbamba imɔtshi, amɔtshi ndjalaka la djonyi dj’okotshɔ djɛ ndongela enanghedji kɛmɔtshi kɛ nyɛtshi. (1 Te. 5:14) Lá nsɔsɔlɔ, tokokolo wapalekɔ l’akoka wa nshiyɛ ekakasano enkfumɔ wepomana l’enkambi wɛ Yehova. Koko kaanga oyɛwɔ nghɔsɔ, Yehova nkɔpaka djɛ tokokolo nangha kenkfumɔ k’okokawɔ nangha djɛ nkembɛ la nama ɛnkɔkɔ wɛnde. Wopo wɔkɔnge tokokolo tomboshiyɛka ntondo ndjala l’akambo wa nangha efula tɔsɔ okokawɔ mba winá wɔ nkotshɛ mposɛ yɛ wanyanghɛmɔkɔ yɛwɔ?

10. Lá nkilika 1 Tesalɔnikɛ 2:7, wopo wɔkɔnge Poolo ndoyakiyanyɛka lá nkambo dj’enkambi wɛ Yehova?

¹⁰ Ndjɔmbɔmba kɛ Poolo. Poolo ahonaki topo tɔ mbandola la tɔ nkembɛ wananyɔ l’akaana yɛnde. Angoyala wɔlɔ tokokolo nkilika ndjɔmbɔmba kɛnde kɛ ngandji kɛsɔ, má nanghelaka enkambi wɛ Yehova akambo la ngandji. (Wala 1 Tesalɔnikɛ 2:7.) Poolo ashikikɛki winande andjawodji ante nde ndaakɔpaka edjinge koko Yehova ndaakɔpaka. (2 Kɔ. 2:4; Ɛfɛ. 2:4, 5) Poolo ɔsaki ase otshumano etengo tolongo la ahetshɛki winá esanga lawɔ. Nde ɛnyɛki ante nde ndawɛkɛka tewɔ má ndaadjipola oloko wɔnde djɛ ndaashimela ekiyano la wɛdju wɛnde. (2 Kɔ. 7:5; 1 Ti. 1:15) Koko, Poolo atilaki yimba ngo l’ekakasano wɛnde nyɔmɛlɛ toko. L’edjena kɛ nangha nghɔsɔ, nde akɔpaki wananyɔ wande.

11. Lamo Poolo ndapɛyɛka wananyɔ l’ankaana yɛnde alako?

¹¹ Lá mbamba imɔtshi, Poolo ayalaki la djonyi djɛ mpɛyɛ wananyɔ l’ankaana yɛnde alako. Koko nde atananghaki nkambo djɛsɔ la nkɛlɛ. Nde apɛyɛki alako ladjikɛnde nde ayakiyanyɛki lá nkambo djɛwɔ la akɔpaki ndaalama  má ambalaka yetshikitanyi. Nde ananghaki la wolo djɛ alako wande ndjala wɔdju djɛ ndjawolama la ilaki yimba lá wopo w’iyakokaka ndaawɔsa. Ndjɔmbɔmba, l’onkanda ɔmɔtshi wɔ ndatomela ase Kɔrɛtɔ, Poolo ápɛyɛka alako wa wolo. M’ɔkɔngɔ wɔnde ndaafunela onkanda wɔsɔ, nde atomaka Tito tewɔ. Poolo ayakiyanyɛki djɛ ndjewa wopo wɔ yongelola l’onkanda wɔsɔ. Ɔsɔngo osasa woyalisa lande winá wɔ ndooke ante iwɔ wawolaka alako wande la wakambaka la wakɔ!—2 Kɔ. 7:6, 7.

12. Wopo wɔkɔnge tokokolo okokawɔ nkembɛ winawɔ andjawodji?

¹² Olakanyelo. Tokokolo nkoka nkilika ndjɔmbɔmba kɛ Poolo má mpetshɛka winá esanga la wananyɔ l’ankaana yɛwɔ. Yopo imɔtshi yokokawɔ nangha nkambo djɛsɔ nde má nkomaka anto wa ntondo lá losanghanyɛ djɛ ntosawola l’anto ankina asawo wa kembɛ. Mbala efula ndɔmbamaka ngo minitɛ imangha toko djɛ mpɛyɛ wɔnanyɔ kana nkaana kɛmɔtshi ekembelo kɛ la ngandji k’oyɛnde la djonyi. (Ɔrɔ. 1:12; Ɛfɛ. 5:16) Ikokolo yekilika ndjɔmbɔmba kɛ Poolo nkambaka lonkina l’Otepela wɔ Ndjambe djɛ nkembɛ djawo djɛ wananyɔ l’ankaana yɛnde kana djɛ ndaashikikɛ ngandji kɛ Ndjambe awokande. Lonkina, nde ndjokaka anto w’ɔlɔndjɛnde ngandji. Nde nsawolaka nyawɔ mbala la mbala la mponaka donga djɛ ndaawandola. Winá wɔ ikokolo ohonande mpɛyɛ dako nde nanghaka la wolo djɛ nkamba l’Otepela wɔ Ndjambe. Nde ntepelaka akambo papopapoo koko la ngandji kenkfumɔ ladjikɛnde nde nkɔpaka djɛ wɔnanyɔ kana nkaana nkamba la dako djɛnde.—Nga. 6:1.

13. Wɛdju w’onto nyɔmɛlɛ nkoka ndjala l’eposelo wɛkɔnge te ikokolo?

¹³ Lamo nkambo djɛsɔ okokawɔ ndjala okakasano? Tokokolo wapalekɔ anto wa djɔ. Ngongete anto ankfumɔ, iwɔ nanghaka evunga. (Ɔrɔ. 3:23) Lá winá ɛmɔtshi iwɔ nkoka ndjala l’okakasano wɔ ndjala l’ikanyi y’ɛdje lá kɛnɛ kelendana la wɛdju wɛwɔ. Amɔtshi nkoka ndakiyanyɛ efula lá nkambo djɛ ntshamba djɛwɔ djɛ djɔ ko ndɔlɛmba. Ankina nkoka ndahonela donga má wɛdju wɛwɔ ko kɛsɔ nkoka ndakomɛ djɛ nyɛna etengo wapalekɔ la djonyi djɛ nangha etshikitano.

14. Lá nkilika Filipɛ 4:13, wopo wɔkɔnge okitshakitshɛ yakotshɛ Poolo djɛ ndongela wɛdju wɛnde?

¹⁴ Ndjɔmbɔmba kɛ Poolo. L’okitshakitshɛ onkfumɔ, Poolo ewaki ante nde apakoke ndongela wɛdju wɛnde ngo nyɔmɛlɛ. Nde ayalaka la djonyi djɛ wolo wɔ Ndjambe ɔpɛyɛkande. Poolo ayalaki ɔtɛ wolo ntepela ente ɛnyɛki Akristo ndjolo efula. Koko l’ɔkɔngɔ, nde ayɛka ndosipisoyɛ djɛ kɛnɛ kɛ ndananghaka kelekɔ owe ko ayalaka entshupa djɛ ntshikitanyɛ lonto lɔnde la eyalelo kɛnde. (1 Ti. 1:12-16) M’okotshɔ wɔ Yehova, Poolo akomaka onami w’ɛnkɔkɔ w’okanaka ngandji, nkɛtshi, la  w’okitshakitshɛ. Nde ayakiyanyɛki efula ngo l’evunga wɛnde, koko l’edjena kɛnde ndjila yimba ngo l’eteyi, nde awolaka ante Yehova angowimeyɛ. (Ɔrɔ. 7:21-25) Nde atahonaki ndjala djɔ. L’edjena kɛ nangha nghɔsɔ nde ananghaka la wolo djɛ mbɔngɛ lonto lɔnde l’Okristo edjinge ayawɛkɛka t’okotshɔ wɔ Yehova djɛ nkotshɛ olemo wɔnde.—1 Kɔ. 9:27; wala Filipɛ 4:13.

15. Ikanyi y’ɛdje yɛkɔnge tokokolo oyɛwɔ ladjɛ ndjala la yɛkɔ lá kɛnɛ kelendana la wɛdju wɛwɔ?

¹⁵ Olakanyelo. Tokokolo wapasɔnama m’ɔtɛ w’oyɛwɔ djɔ. Koko Yehova ndaalɔmbaka dj’iwɔ ndjawola evunga wɛwɔ, edjinge ndjala la lonto l’Okristo. (Ɛfɛ. 4:23, 24) Ikokolo ladjɛ ndjekaka Otepela wɔ Ndjambe djɛ ndashishimaka nyɔmɛlɛ la nanghaka etshikitano enkfumɔ wɛlɔmbama. Másɔ Yehova angookotshɛ djɛ ndjala l’osasa la ndjala ikokolo yɛ wɔlɔ.—Dja. 1:25.

16. Kɛkɔngɔ kekoka mposa ntsha ikokolo mpikaka wiso ngo l’evunga w’anto ankina?

¹⁶ Lamo nkambo djɛsɔ okokawɔ ndjala okakasano? Winá wɔ tokokolo ohetshɛwɔ winá efula esanga la wa nyanghɛmɔko yɛwɔ yel’otshumano, iwɔ nkoka ndjisola evunga wɛwɔ ipa l’okakasano. Ntsha wapawadjisa, tokokolo nkoka nyomala, ndjala akambo wolo, kana nkanelana nyɛtshi. Poolo ewolaka Akristo ante Satana angosasanga ntsha iwɔ ndjala nghɔsɔ.—2 Kɔ. 2:10, 11.

17. Wopo wɔkɔnge Poolo ndɔsaka wananyɔ l’ankaana yɛnde?

¹⁷ Ndjɔmbɔmba kɛ Poolo. Nde alamaka ikanyi yɛ wɔlɔ lá nkambo djɛ wananyɔ l’ankaana yɛnde. Nde ewaki evunga wɛwɔ, ko lá mbamba imɔtshi nanghedji djɛwɔ dj’okiyanyɛki. Koko kaanga iyayalaka nghɔsɔ, Poolo ewaki ante apalekɔ ngo ntsha onto amonangha ovunga mbɔkoko ambokoma onto wɔ nyɛtshi. Nde akɔpaki wanyanghɛmɔko yɛnde la apikaki wiso lá wekeka wawɔ wa wɔlɔ. Ntsha wananyɔ l’ankaana yɛnde wayalaki l’okakasano wɔ nangha kɛnɛ kelekɔ wɔlɔ, nde awolaki ante iwɔ walekɔ l’ekoma wɛ wɔlɔ koko oyɛwɔnde la djonyi dj’okotshɔ.

18. Olakanyelo wɔkɔnge wɔ ngombowa má wopo wɔ Poolo ndananghelá Evodi nya Sutuka akambo? (Filipɛ 4:1-3)

¹⁸ Ndjɔmbɔmba, tokoshishima wopo wɔ Poolo ndananghela ankaana ipe yeyalaki l’otshumano wɔ Filipɛ akambo. (Wala Filipɛ 4:1-3.) Nyɛnamaka ente Evodi nya Sutuka wayalaki l’okakasano ɔmɔtshi ko watokanaki lonkina. Poolo átáyálá akambo wolo tewɔ kana ndawɔnyɔla koko nde ilaki yimba lá wekeka wawɔ wa wɔlɔ. Ankaana yɛso yɛsɔ wayalaki la nkɔmano la wakambelaka Yehova l’ilá k’ɛnɔnyi efula. Poolo ewaki ante Yehova ndaakɔpaka. Wopo wɔ Poolo ndalendaka ankaana yɛsɔ la ntsho djɛ wɔlɔ, otshindaka djɛ ndaakembɛ dj’iwɔ ndjila vu l’anteyi kɛwɔ. Ɛnɛlɔ kɛnde k’akambo kɛsɔ k’okotshɛka djɛnde nama osasa wɔnde la nama djokanelo djɛ wɔlɔ ny’ase otshumano.

19. a) Wopo wɔkɔnge tokokolo okokawɔ nama ikanyi yɛ wɔlɔ lá nkambo djɛ winawɔ Akristo? b) Olakanyelo w’ɔkɔnge w’owɛ má ntshango dj’ikokolo yetasole Mvulu k’Onkfumi?

 ¹⁹ Olakanyelo. Tokokolo, nyopikake wiso lá wekeka wa wɔlɔ walekɔ la wananyɔ l’ankaana yɛnyo. Lako onto wolekɔ djɔ, koko onto onkfumɔ alekɔ la wekeka wakoka ntosasangɛ. (Flp. 2:3) Lá nsɔsɔlɔ, tokokolo nkoka ndjala la djonyi djɛ mpɛyɛ wananyɔ l’ankaana alako winá la winá. Koko etengo Poolo, tokokolo ladjɛ nangha la wolo dj’ipa ndjilaka yimba ngo l’etepela la nanghedji dj’onto wombakiyanyɛ. Koko angoyala djonyi iwɔ mpikaka wiso lá ngandji k’onto te Yehova, entete kɛnde l’olemo wɔ Ndjambe, la welo w’ilande djɛ nangha kɛnɛ kelekɔ wɔlɔ. Tokokolo tiláká wiso lá wekeka wa wɔlɔ w’anto ankina, nkotshɛka wa nyanghɛmɔko yɛwɔ djɛ ndawoka ambɔ iwɔ nkɔpamaka me otshumano w’otondo.

20. Wopo wɔkɔnge tokokolo okokawɔ nkindjɛ mba wapɔ má ndjɔmbɔmba kɛ Poolo?

²⁰ Tokokolo nyongowa wapɔ ntsha nyo nkidjɛ djeka ndjɔmbɔmba kɛ Poolo. Ndjɔmbɔmba, lá Index des Publications des Témoins de Jéhovah, nyokoka mpona l’ɔtɛ wɔ djoyi wotepela ante: ‘Poolo’ ko másɔ lá itɛ yetepela ante: ‘Ndjɔmbɔmba le tokokolo.’ Winá wɔ nyongowalaka akambo amɔtshi walekɔ l’eteyi, nyo nkoka ndawopola ente: ‘Wopo wɔkɔnge ndjɔmbɔmba kɛ Poolo okokawɔ nkotshɛ lemi djɛ nkindjɛ nama osasa wɔmi winá w’okotshɛmi edjito wɛmi w’ikokolo?’

21. Eshikikelo kɛkɔnge tokokolo okokawɔ ndjala la kɛkɔ?

²¹ Tokokolo, nyovungɔ ente Yehova apanyɔlɔmbɛ djɛ nyo ndjala djɔ, koko ɔnyɔlɔmbande nde djɛ nyo ndjala la nkɔmano. (1 Kɔ. 4:2) Yehova asasangaka l’olemo wɔ wolo la wɔ nkɔmano wɔ Poolo ndakambaka. Nyoyashikikɛ ente Ndjambe ndɔsaka edjinge kɛnɛ k’onanghanyo l’olemo wɔnde la ntshina. Yehova apavungɛki lotshinda ‘olemo wɔnyo la ngandji kɛ nyɛnyɛ lá nkambo djɛ djiina djɛnde lá wopo w’okotshɛnyo ankinami la wokindjɛnyo ndaakambela.’—Heb. 6:10.