1-2. Yini labadzala belibandla labangayifundza esibonelweni semphostoli Pawula?

 UMPHOSTOLI Pawula bekabatsandza bazalwane nabodzadze. Bekasebenta kamatima kuze abasite. (Imis. 20:31) Nabo bebamtsandza kakhulu. Ngalelinye lilanga, labadzala belibandla base-Efesu “bakhala” nabeva kutsi ngeke basambona. (Imis. 20:37) Ngendlela lefanako, labadzala belibandla babatsandza kakhulu bazalwane nabodzadze futsi benta konkhe labangakwenta kuze babasite. (Fil. 2:16, 17) Kodvwa ngaletinye tikhatsi babhekana netinkinga. Bangatincoba njani?

² Labadzala belibandla bangacabanga ngesibonelo saPawula. (1 Khor. 11:1) Naye bekangumuntfu futsi anesono. Bekuhle kuba matima kutsi ente lokulungile. (Rom. 7:18-20) Bekanetinkinga, kodvwa Pawula akazange aphelelwe ngemandla nobe angasajabuli. Nangabe labadzala belibandla balingisa sibonelo saPawula, bangakhona kubhekana netinkinga tabo futsi bachubeke bakhonta Jehova bajabulile. Asesibone kutsi bangakwenta njani loko.

3. Sitawucoca ngani kulesihloko, futsi yini lenye lesitayifundza?

³ Kulesihloko, sitawucoca ngetinkinga letine labadzala belibandla labavama kubhekana nato: (1) kutfola sikhatsi sekwenta umsebenti wekushumayela naleminye imisebenti, (2) kutfola sikhatsi sekukhutsata bazalwane babo nabodzadze, (3) kubhekana nebutsakatsaka babo, (4) nekubeketelela emaphutsa alabanye. Sitawucoca ngekutsi yini leyasita Pawula wancoba letinkinga nekutsi labadzala belibandla bangasilingisa njani sibonelo sakhe.

4. Yini lengenta kube matima kutsi labadzala belibandla bahole emsebentini wekushumayela?

⁴ Yini leyenta kube matima? Labadzala belibandla kudzingeka bente leminye imisebenti leminyenti ngetulu nje kwekuhola emsebentini wekushumayela. Sibonelo nje, labanyenti babo bavama kuba bosihlalo emihlanganweni yasekhatsi neliviki nobe bachube Sifundvo SeliBhayibheli Selibandla. Ngetulu kwaloko baphindze babeke tinkhulumo. Bacecesha tinceku letisebentako futsi bakhutsata bazalwane babo nabodzadze. (1 Phet. 5:2) Labanye labadzala belibandla basita ekwakheni nasekulungiseni emaHholwa eMbuso naletinye takhiwo tenhlangano. Nobe kunjalo, kufanele bente umsebenti lobaluleke kakhulu wekushumayela, njengabo bonkhe bamemeteli.—Mat. 28:19, 20.

5. Ngusiphi sibonelo Pawula lasibekela sona?

⁵ Sibonelo saPawula. Lokwasita Pawula kutsi aphumelele kutfolakala KubaseFiliphi 1:10, lotsi: ‘Niciniseke ngetintfo letibaluleke kakhulu.’ Pawula wakwenta loko lakusho. Bekaniketwe umsebenti wekushumayela, futsi kwaphela iminyaka leminyenti lomsebenti uyintfo lebaluleke kakhulu ekuphileni kwakhe. Bekashumayela “embikwebantfu nasemtini ngemuti.” (Imis. 20:20) Bekangashumayeli ngesikhatsi lesitsite nobe kanye ngeliviki. Bekawasebentisa onkhe ematfuba lawatfolako kuze ashumayele. Nasi sibonelo, ngesikhatsi amele bangani bakhe e-Athene, washumayela licembu lebantfu labatiwako futsi loko kwaba nemiphumela lemihle. (Imis. 17:16, 17, 34) Ngisho nangesikhatsi Pawula ‘aboshiwe,’ bekashumayela labo bekanabo.—Fil. 1:13, 14; Imis. 28:16-24.

6. Pawula wabacecesha njani labanye?

⁶ Pawula bekasisebentisa kahle sikhatsi sakhe. Bekavame kucela labanye kutsi bashumayele naye. Sibonelo nje, ngesikhatsi acala kuba sitfunywa selivangeli, wahamba naJohane lobekutsiwa nguMakho, futsi eluhambweni lwakhe lwesibili wahamba naThimothi. (Imis. 12:25; 16:1-4) Siyaciniseka kutsi Pawula wenta konkhe lokusemandleni akhe kuze afundzise lamadvodza kutsi lihlelwa njani libandla, kutsi angabakhutsata njani bazalwane bawo nabodzadze, nekutsi angafundzisa njani ngendlela lephumelelako.—1 Khor. 4:17.

7. Labadzala belibandla bangasilalela njani seluleko saPawula lesibhalwe Kubase-Efesu 6:14, 15?

⁷ Lesikufundzako. Labadzala belibandla bangasilingisa sibonelo saPawula ngekutsi bangagcini ngekushumayela emtini ngemuti kodvwa basebentise onkhe ematfuba labawatfolako kuze bashumayele. (Fundza Kubase-Efesu 6:14, 15.) Nasi sibonelo, bangashumayela etitolo nabaye kuyotsenga nobe lapho basebentela khona. Nangabe basita ekwakheni takhiwo  tenhlangano, bangashumayela bomakhelwane nobe bashumayele bantfu labatsengisako. NjengaPawula, labadzala belibandla nabashumayela bangasisebentisa leso sikhatsi kuze baceceshe labanye, lokufaka ekhatsi tinceku letisebentako.

8. Yini lomdzala welibandla lokungahle kudzingeke kutsi ayente?

⁸ Akukafaneli labadzala belibandla babe matasa kakhulu ngemisebenti yelibandla nobe yesigodzi bese bababete sikhatsi sekushumayela. Kuze babe naso sikhatsi sekwenta konkhe lokufanele bakwente, ngalesinye sikhatsi kungahle kudzingeke kutsi bangayemukeli leminye imisebenti. Ngemuva kwekucabanga nekuthantaza ngaloko, bangabese bayabona kutsi nabawemukela lomsebenti batawuba bete sikhatsi sekwenta leminye imisebenti lebalulekile. Leminye yalemisebenti lebalulekile ifaka ekhatsi kuba nekukhonta kwemndeni njalo ngeliviki, kwenta umsebenti wekushumayela nobe kucecesha bantfwana babo kutsi bente lomsebenti. Labanye balabazalwane abakhoni kungawemukeli umsebenti, kodvwa bangaciniseka kutsi Jehova uyati kutsi bafisa kuyenta kahle naleleminye imisebenti labanayo.

9. Njengobe labadzala belibandla bahlala bamatasa, nguyiphi inkinga lababhekana nayo?

⁹ Yini lengenta kube matima? Bantfu baJehova banetinkinga letinyenti. Kulamalanga ekugcina, sonkhe siyakudzinga kukhutsatwa, kusekelwa nekudvudvutwa. Ngetulu kwaloko, labanye badzinga kusitwa kutsi bagweme kutiphatsa lokubi. (1 Thes. 5:14) Kuliciniso kutsi labadzala belibandla angeke bakhone kuticedza tonkhe tinkinga tebantfu baJehova. Nobe kunjalo, Jehova ufuna kutsi labadzala belibandla bente konkhe labangakhona kukwenta kuze bakhutsate bantfu bakhe, baphindze babavikele. Njengobe labadzala bahlala bamatasa, bangasitfola njani sikhatsi sekusita labanye?

10. Ngekusho kwa-1 KubaseThesalonika 2:7, Pawula wabaphatsa njani bantfu baJehova?

¹⁰ Sibonelo saPawula. Pawula bekahlale afuna ematfuba ekuncoma bazalwane bakhe nabodzadze futsi abakhutsate. Labadzala belibandla bangasilingisa sibonelo sakhe ngekutsi babaphatse kahle bantfu baJehova. (Fundza 1 KubaseThesalonika 2:7.) Pawula wacinisekisa bazalwane bakhe nabodzadze kutsi uyabatsandza nekutsi Jehova uyabatsandza. (2 Khor. 2:4; Ef. 2:4, 5) Bekacitsa sikhatsi nabo futsi abatsatsa njengebangani bakhe. Wakhombisa kutsi uyabetsemba ngekutsi abacocele ngetintfo lebetimkhatsata nangebutsakatsaka bakhe. (2 Khor. 7:5; 1 Thim. 1:15) Nobe kunjalo, akazange anake tinkinga takhe kodvwa bekafuna kusita bazalwane bakhe nabodzadze.

11. Yini leyenta Pawula weluleka bazalwane bakhe nabodzadze?

¹¹ Ngaletinye tikhatsi bekudzingeka kutsi Pawula eluleke bazalwane bakhe nabodzadze.  Kodvwa bekangabeluleki atfukutsele. Wabeluleka ngobe abatsandza futsi afuna kubavikela etinkingeni. Beketama kutsi seluleko sakhe kube melula kusiva, futsi bekafuna basemukele. Nasi sibonelo, Pawula wabhalela baseKhorinte incwadzi lebeyineseluleko lesicinile. Ngemuva kwekubhala lencwadzi, watfumela Thithusi kubo. Pawula bekafuna kuva kutsi bayemukele njani lencwadzi. Wajabula nakeva kutsi basemukele kahle seluleko lebesikuyo!—2 Khor. 7:6, 7.

12. Labadzala belibandla bangabakhutsata njani bazalwane babo nabodzadze?

¹² Lesikufundzako. Labadzala belibandla bangasilingisa sibonelo saPawula ngekutsi bacitse sikhatsi nebazalwane babo nabodzadze. Lenye indlela labangakwenta ngayo loko kutsi basheshe befike emihlanganweni yelibandla kuze babe nesikhatsi sekucoca nalabanye futsi babakhutsate. Akutsatsi sikhatsi lesinyenti kukhutsata umzalwane nobe dzadze. (Rom. 1:12; Ef. 5:16) Lomdzala welibandla lolingisa sibonelo saPawula ukhutsata bazalwane bakhe nabodzadze asebentisa liVi laNkulunkulu futsi uyabacinisekisa kutsi Nkulunkulu uyabatsandza. Ngetulu kwaloko, uyaciniseka kutsi bazalwane bakhe nabodzadze bayati kutsi uyabatsandza. Uhlale akhuluma nabo futsi ufuna ematfuba ekubancoma. Nakeluleka lotsite, leseluleko usisekela eVini laNkulunkulu. Leseluleko sakhe asigegi kodvwa usisho ngemusa ngobe ufuna kutsi lolowelulekwako asemukele kahle.—Gal. 6:1.

13. Lomdzala welibandla angativa njani ngemaphutsa lawentako?

¹³ Yini leyenta kube matima? Labadzala belibandla banesono, nabo bayawenta emaphutsa njengabo bonkhe bantfu. (Rom. 3:23) Ngaletinye tikhatsi, bangakutfola kumatima kuba nembono lokahle ngemaphutsa abo. Labanye bangahle bakhatsateke kakhulu ngemaphutsa abo baze badvumateke. Labanye babona ngatsi emaphutsa abo mancane kakhulu ngako abasiboni sidzingo sekushintja.

14. Ngekusho kwembhalo waKubaseFiliphi 4:13, kutfobeka kwamsita njani Pawula kutsi abhekane nebutsakatsaka bakhe?

¹⁴ Sibonelo saPawula. Ngenca yekutsi Pawula bekatfobekile, bekati kutsi udzinga lusito kuze akhone kubhekana nebutsakatsaka bakhe. Bekadzinga kuciniswa nguNkulunkulu. Ngaphambili, Pawula bekawaphatsa kabi kakhulu emaKhristu. Kodvwa ngekuhamba kwesikhatsi wabona kutsi loko bekakwenta bekukabi, futsi watimisela kushintja buntfu bakhe nendlela bekacabanga ngayo. (1 Thim. 1:12-16) Ngekusitwa nguJehova, Pawula waba ngulomdzala welibandla lonelutsandvo, lonesihawu nalotfobekile. Bekati kutsi unemaphutsa lamanyenti; kodvwa akazange achubeke acabanga ngawo, kunaloko beketsemba kutsi  Jehova utamcolela. (Rom. 7:21-25) Bekati kutsi utawenta emaphutsa. Wasebenta kamatima kuze atfutfukise buntfu bakhe bebuKhristu futsi wetsembela kuJehova kutsi amsite kuze akhone kufeza umsebenti wakhe.—1 Khor. 9:27; fundza KubaseFiliphi 4:13.

15. Ngusiphi simo sengcondvo lesikahle labadzala belibandla lokufanele babe naso ngemaphutsa abo?

¹⁵ Lesikufundzako. Labadzala belibandla bayawenta emaphutsa. Kodvwa Jehova ulindzele kutsi bawavume emaphutsa abo futsi batfutfukise buntfu babo bebuKhristu. (Ef. 4:23, 24) Lomdzala welibandla kufanele atihlole asebentisa liVi laNkulunkulu bese wenta lushintjo loludzingekile. Nakenta njalo, Jehova utamsita kutsi ajabule futsi aphumelele.—Jak. 1:25.

16. Yini lengenteka nangabe lomdzala welibandla anaka emaphutsa alabanye?

¹⁶ Yini leyenta kube matima? Njengobe labadzala belibandla bacitsa sikhatsi nebazalwane babo nabodzadze, bangawabona emaphutsa abo. Nobe kunjalo, nabangakanaki, loko kungabakwatisa, kubente babe bete umusa nobe babasole. Pawula wecwayisa emaKhristu kutsi ngiko kanye Sathane lafuna kutsi kwenteke.—2 Khor. 2:10, 11.

17. Pawula bekativa njani ngebazalwane bakhe nabodzadze?

¹⁷ Sibonelo saPawula. Pawula wachubeka anembono lomuhle ngebazalwane bakhe nabodzadze. Bekawati kahle emaphutsa abo ngobe ngaletinye tikhatsi bebahle bamvisa buhlungu. Kepha bekati kutsi nangabe umuntfu ente liphutsa, loko akusho kutsi ungumuntfu lokabi. Bekabatsandza bazalwane bakhe nabodzadze futsi bekanaka buntfu babo lobuhle. Nangabe umzalwane wakhe nobe dzadze akutfola kumatima kwenta lokulungile, bekatitjela kutsi uyafuna kwenta lokulungile nekutsi udzinga nje kusitwa.

18. Yini loyifundzako endleleni Pawula lasita ngayo bo-Evodiya naSintike? (KubaseFiliphi 4:1-3)

¹⁸ Cabanga ngendlela Pawula lasita ngayo bodzadze lababili lebebasebandleni laseFiliphi. (Fundza KubaseFiliphi 4:1-3.) Kungenteka bo-Evodiya naSintike bebangavumelani ngalokutsite futsi bebangasesibo bangani. Nobe kunjalo, Pawula akazange abakhulumise kabi nobe abasole; kunaloko, wanaka buntfu babo lobuhle. Labodzadze labetsembekile bebakhonte Jehova sikhatsi lesidze futsi Pawula bekati kutsi Jehova uyabatsandza. Ngenca yekutsi Pawula bekanake lokuhle kulabodzadze, loko kwamsita wakhona kubakhutsata kutsi balungise kungevani lebekusemkhatsini wabo. Ngetulu kwaloko, loko kwamenta wachubeka ajabulile futsi wahlale anebudlelwane lobuhle nebazalwane bakulelo bandla.

19. (a) Yini labadzala belibandla labangayenta kuze bachubeke banesimo sengcondvo lesihle ngebazalwane babo nabodzadze? (b) Yini longayifundza kulesitfombe salomzalwane longulomdzala welibandla lohlanta liHholwa leMbuso?

¹⁹ Lesikufundzako. Nine labadzala belibandla,  bukani buntfu lobuhle kubazalwane benu nakubodzadze. Bonkhe bayawenta emaphutsa, kodvwa bonkhe banebuntfu lobuhle. (Fil. 2:3) Nobe kunjalo, kuhle kudzingeka kutsi labadzala belibandla beluleke umzalwane nobe dzadze. Kodvwa njengaPawula, labadzala belibandla kufanele banganaki tintfo letishiwo bazalwane babo nabodzadze lokungenteka tibatfukutselise nobe tintfo labatentako lokungenteka tibakwatise. Kunaloko, kufanele banake kutsi umzalwane wabo nobe dzadze uyamtsandza Jehova, uyachubeka amkhonta, nekutsi usengachubeka enta lokuhle. Labadzala belibandla labanaka lokuhle kulabanye benta kutsi bazalwane nabodzadze bative batsandvwa ebandleni.

20. Yini labadzala belibandla labangayenta kuze bachubeke bafundza esibonelweni saPawula?

²⁰ Nine labadzala belibandla, kunganisita kuchubeka nifundza esibonelweni saPawula. Nasi sibonelo, ku-Watch Tower Publications Index, ningabuka sihloko lesitsi “Paul” bese nibuka ngephansi kwesihlokwana lesitsi “example for elders.” Njengobe usafundza lokwatiswa, tibute: ‘Sibonelo saPawula singangisita njani kutsi ngichubeke ngijabulile njengobe ngenta umsebenti wami njengalomdzala welibandla?’

21. Yini labadzala belibandla labangaciniseka ngayo?

²¹ Nine labadzala belibandla, khumbulani kutsi Jehova akaniceli kutsi ningawenti emaphutsa; ucela nje kutsi netsembeke. (1 Khor. 4:2) Jehova bekajabula ngekutsi Pawula bekasebenta kamatima futsi etsembekile. Ningaciniseka kutsi Nkulunkulu uyawujabulela umsebenti lenimentela wona. Jehova “ngeke awukhohlwe umsebenti wenu nelutsandvo lenibe nalo ngelibito lakhe, ngekutsi benibasita labangcwele futsi niyachubeka nibasita.”—Heb. 6:10.