1-2. Oinsá apóstolu Paulo nia ezemplu bele ajuda katuas sira ohin loron?

 APÓSTOLU PAULO hadomi irmaun-irmán sira. Nia serbisu makaʼas atu ajuda sira. (Após 20:31) Tan neʼe, irmaun-irmán sira hadomi tebes Paulo. Loron ida, katuas sira husi Éfeso “tanis makaʼas” bainhira sira hatene katak sira sei la hasoru tan Paulo. (Após 20:37) Ohin loron katuas sira mós hadomi irmaun-irmán sira no uza tempu barak atu ajuda sira. (Flp 2:16, 17) Maibé dala ruma katuas sira hasoru dezafiu oioin. Saida mak bele ajuda katuas sira atu manán dezafiu sira-neʼe?

² Katuas sira bele aprende husi Paulo nia ezemplu. (1 Kor 11:1) Paulo laʼós ema perfeitu. Nia ema sala-naʼin no dala ruma sente susar atu halo buat neʼebé loos. (Rom 7:18-20) Nia luta hasoru problema oioin. Maibé Paulo la rende an ka la lakon ninia ksolok. Hodi banati-tuir apóstolu Paulo, katuas sira bele manán dezafiu oioin no kontinua haksolok atu serbí Jeová. Mai ita haree oinsá.

3. Iha lisaun neʼe, ita sei aprende saida deʼit?

³ Iha lisaun neʼe, ita sei koʼalia kona-ba dezafiu haat neʼebé baibain katuas sira hasoru: (1) halaʼo responsabilidade oioin no mós haklaken ho balansu, (2) sai bibi-atan neʼebé hatudu domin, (3) tahan hasoru fraku oioin, no (4) tahan hasoru ema seluk nia fraku. Ita sei aprende oinsá apóstolu Paulo manán dezafiu sira-neʼe no oinsá katuas sira bele banati-tuir ninia ezemplu.

4. Tanbasá dala ruma susar ba katuas sira atu hola parte beibeik iha serbisu haklaken?

⁴ Tanbasá dala ruma susar. Katuas sira iha responsabilidade oioin no sira mós hola parte iha serbisu haklaken.  Porezemplu, sira troka malu atu dirije reuniaun iha loron baileet no mós dirije Estuda Bíblia iha Kongregasaun. Sira mós dala ruma hatoʼo diskursu. Sira mós treinu atan ba kongregasaun no kontinua anima irmaun-irmán sira. (1 Ped 5:2) Katuas balu hola parte atu harii no mantein Reuniaun-Fatin no mós fatin adorasaun sira seluk. Maibé hanesan irmaun-irmán sira seluk, katuas sira haree serbisu haklaken nuʼudar buat neʼebé importante liu.​—Mt 28:19, 20.

5. Paulo hatudu ezemplu saida kona-ba haklaken?

⁵ Paulo nia ezemplu. Razaun tanbasá Paulo hetan susesu temi iha Filipe 1:10, nia hatete: “Buka-hatene loloos buat sira neʼebé importante liu.” Paulo halo tuir ninia konsellu neʼe. Nia simu knaar atu halaʼo serbisu haklaken no nia sempre haree serbisu neʼe nuʼudar buat neʼebé importante liu. Nia haklaken “iha ema barak nia oin no husi uma ba uma”. (Após 20:20) Nia laʼós deʼit haklaken iha loron espesífiku ruma, maibé nia aproveita oportunidade hotu atu haklaken. Porezemplu, bainhira nia hein ninia belun sira iha sidade Atenas, nia haklaken ba ema-boot sira no sira balu sai fiar-naʼin. (Após 17:16, 17, 34) Bainhira Paulo iha dadur laran, nia haklaken ba ema neʼebé hamutuk ho nia.​—Flp 1:13, 14; Após 28:16-24.

6. Paulo treinu ema seluk atu halo saida?

⁶ Paulo uza didiʼak ninia tempu. Nia konvida beibeik ema seluk atu haklaken hamutuk ho nia. Porezemplu, iha ninia viajen primeiru nuʼudar misionáriu, nia bá hamutuk ho João Marcos, no iha ninia viajen segundu, nia bá hamutuk ho Timóteo. (Após 12:25; 16:1-4) Paulo hanorin mane sira-neʼe oinsá atu organiza kongregasaun, tau matan ba irmaun-irmán sira, no hanorin ho didiʼak.​—1 Kor 4:17.

7. Oinsá katuas sira bele halo tuir Paulo nia konsellu iha Éfeso 6:14, 15?

⁷ Buat neʼebé ita aprende. Katuas sira bele banati-tuir Paulo hodi haklaken husi uma ba uma no mós uza oportunidade seluk atu haklaken. (Lee Éfeso 6:14, 15.) Porezemplu, katuas sira bele haklaken bainhira bá kompras ka haklaken ba kolega serbisu. Ka bainhira sira ajuda projetu konstrusaun, sira bele haklaken ba viziñu sira no negósiu-naʼin sira. Hanesan Paulo, katuas sira bele fó treinu ba ema seluk, inklui atan ba kongregasaun bainhira sira haklaken hamutuk.

8. Dala ruma katuas sira presiza halo saida?

⁸ Katuas sira labele sai okupadu demais ho sira-nia knaar iha kongregasaun  toʼo la iha tempu atu haklaken. Atu bele nafatin balansu, sira presiza hatudu haraik an no simu deʼit knaar tuir sira-nia kbiit. Depois hanoin no halo tiha orasaun kona-ba neʼe, karik sira sei rekoñese katak se sira simu knaar ruma, sira sei la iha tempu atu halo buat neʼebé importante liu. Buat neʼebé importante liu bele inklui halaʼo adorasaun família semana-semana, haklaken ho badinas, ka treinu sira-nia oan atu haklaken. Maski dala ruma susar ba katuas balu atu la simu knaar ruma, maibé sira bele fiar katak Jeová komprende sira-nia hakarak atu kontinua balansu.

9. Katuas sira hasoru dezafiu saida?

⁹ Tanbasá dala ruma susar. Jeová nia povu hasoru problema barak. Durante loron ikus sira-neʼe, ita hotu presiza hetan anima, kmaan no apoia. No dala ruma ita presiza ema seluk nia ajuda atu bele hasees an husi hahalok neʼebé sala. (1 Tes 5:14) Klaru katak katuas sira la iha kbiit atu halakon problema hotu neʼebé Jeová nia povu hasoru. Maski nuneʼe, Jeová hakarak katuas sira atu hakaʼas an anima no proteje Jeová nia bibi sira. Oinsá mak katuas sira neʼebé okupadu bele buka tempu atu ajuda irmaun-irmán sira?

10. Tuir 1 Tesalónika 2:7, oinsá Paulo tau matan ba Jeová nia povu?

¹⁰ Paulo nia ezemplu. Paulo buka dalan atu gaba no hametin irmaun-irmán sira. Katuas sira banati-tuir Paulo nia ezemplu hodi hatudu domin no laran-diʼak ba irmaun-irmán sira. (Lee 1 Tesalónika 2:7.) Paulo fó-hatene irmaun-irmán sira katak nia no mós Jeová hadomi sira. (2 Kor 2:4; Éf 2:4, 5) Paulo haree sira nuʼudar belun no uza tempu hamutuk ho sira. Paulo hatudu katak nia tau fiar ba sira liuhusi koʼalia nakloke kona-ba ninia taʼuk no fraku sira. (2 Kor 7:5; 1 Tim 1:15) Maski nuneʼe, Paulo la tau fokus ba ninia problema rasik. Nia hakarak ajuda irmaun-irmán sira.

11. Tanbasá Paulo fó konsellu ba irmaun-irmán sira?

¹¹ Dala ruma, Paulo presiza fó konsellu ba irmaun-irmán sira. Maibé nia nunka halo ida-neʼe tanba hirus. Nia fó konsellu tanba hadomi sira no hakarak atu proteje sira husi perigu oioin. Nia hakaʼas an atu hatoʼo konsellu iha dalan neʼebé fasil atu komprende no nia hakarak sira atu simu ida-neʼe. Porezemplu, iha Paulo nia karta ida ba ema Kristaun iha Korinto, nia fó konsellu neʼebé makaʼas. Depois hakerek tiha karta neʼe, nia haruka Tito atu vizita sira. Paulo hakarak hatene sira-nia sentimentu kona-ba  ninia karta. Paulo kontente atu hatene katak sira simu no halo tuir ninia konsellu.​—2 Kor 7:6, 7.

12. Oinsá katuas sira bele hametin irmaun-irmán sira?

¹² Buat neʼebé ita aprende. Katuas sira bele banati-tuir Paulo nia ezemplu hodi uza tempu hamutuk ho irmaun-irmán sira. Dalan ida atu halo nuneʼe mak hodi toʼo sedu iha reuniaun atu bele dada lia no anima irmaun-irmán sira. Tuir loloos atu anima irmaun-irmán sira, la presiza tempu barak. (Rom 1:12; Éf 5:16) Katuas neʼebé banati-tuir Paulo nia ezemplu, sei uza Bíblia atu hametin irmaun-irmán sira no ajuda sira fiar katak Jeová hadomi sira. Katuas ida mós presiza fó sai katak nia hadomi sira. Nia koʼalia ho sira beibeik no buka oportunidade atu gaba sira. Bainhira nia presiza fó konsellu, neʼe tenke bazeia ba Bíblia. Nia fó konsellu neʼebé espesífiku, maibé ho laran-diʼak tanba nia hakarak irmaun-irmán sira atu simu no aplika ninia konsellu.​—Gal 6:1.

13. Dala ruma katuas sira sente oinsá kona-ba sira-nia fraku?

¹³ Tanbasá dala ruma susar. Katuas sira la perfeitu. Hanesan ita hotu, sira mós halo sala. (Rom 3:23) Dala ruma sira sente susar atu iha hanoin neʼebé loos kona-ba sira-nia fraku. Katuas balu tau fokus ba sira-nia fraku toʼo sente laran-kraik. Katuas seluk karik la preokupa ho sira-nia fraku, tan neʼe sira hanoin katak sira la presiza halo mudansa ba sira-nia hahalok.

14. Tuir Filipe 4:13, oinsá hahalok haraik an ajuda Paulo atu tahan ninia fraku sira?

¹⁴ Paulo nia ezemplu. Paulo ho haraik an rekoñese katak nia labele tahan ninia fraku sira ho ninia kbiit rasik. Nia presiza kbiit husi Maromak. Uluk Paulo ulun-toos no fó-terus makaʼas ba ema Kristaun. Maibé ikusmai nia rekoñese ninia sala no prontu atu troka ninia hanoin no hahalok. (1 Tim 1:12-16) Ho Jeová nia ajuda, Paulo sai bibi-atan neʼebé hatudu domin, laran-sadiʼa no haraik an. Paulo rekoñese katak nia iha fraku oioin, maibé nia la hanoin beibeik kona-ba neʼe. Nia fiar katak Jeová sei perdua nia. (Rom 7:21-25) Paulo la hanoin katak nia tenke sai perfeitu kedas. Nia hakaʼas an atu haburas hahalok Kristaun no ho haraik an sadere ba Jeová atu bele kumpre ninia serbisu.​—1 Kor 9:27; lee Filipe 4:13.

15. Oinsá katuas sira bele iha hanoin neʼebé loos kona-ba sira-nia fraku?

¹⁵ Buat neʼebé ita aprende. Katuas  sira la perfeitu. Maski nuneʼe, Jeová hakarak sira atu rekoñese sira-nia sala no hakaʼas an atu haburas hahalok Kristaun nian. (Éf 4:23, 24) Katuas ida presiza uza Bíblia atu ajuda nia haree hahalok neʼebé nia presiza hadiʼa no tuirmai halo mudansa. Hodi halo nuneʼe, Jeová sei ajuda nia atu sente kontente no sai katuas kongregasaun neʼebé diʼak.​—Tgo 1:25.

16. Saida mak sei akontese se katuas sira tau fokus ba ema seluk nia fraku?

¹⁶ Tanbasá dala ruma susar. Bainhira katuas sira uza tempu barak hamutuk ho irmaun-irmán sira, karik sira sei nota irmaun-irmán sira-nia fraku. Neʼe bele halo katuas sira sai estrese, hirus ka kritika sira. Paulo fó avizu ba ema Kristaun katak Satanás sei kontente se sira hatudu hahalok hanesan neʼe.​—2 Kor 2:10, 11.

17. Oinsá Paulo nia hanoin kona-ba irmaun-irmán sira?

¹⁷ Paulo nia ezemplu. Paulo kontinua iha hanoin pozitivu kona-ba irmaun-irmán sira. Nia hatene sira-nia sala, tanba dala ruma sira-nia hahalok hakanek ninia laran. Maibé Paulo hatene katak maski ema balu halo sala, neʼe la dehan katak sira mak ema aat. Paulo hadomi irmaun-irmán sira no tau fokus ba sira-nia hahalok diʼak. Bainhira irmaun-irmán sira sente susar atu halo buat neʼebé loos, Paulo la duvida ho sira-nia motivu no nia prontu atu ajuda sira.

18. Saida mak ita aprende husi dalan neʼebé Paulo ajuda Evódia no Síntike? (Filipe 4:1-3)

¹⁸ Hanoin toʼok kona-ba oinsá Paulo ajuda irmán naʼin-rua iha kongregasaun Filipe. (Lee Filipe 4:1-3.) Karik Evódia no Síntike iha hanoin neʼebé la hanesan no sira la sai tan belun. Paulo la siʼak ka kritika sira, maibé nia tau fokus ba sira-nia hahalok diʼak. Irmán naʼin-rua neʼe serbí ona Jeová ho laran-metin durante tempu kleur. Paulo hatene katak Jeová hadomi sira. Tanba Paulo iha hanoin pozitivu kona-ba sira, nia anima sira atu hadame malu. Neʼe mós ajuda nia atu haksolok nafatin no kontinua iha relasaun diʼak ho irmaun-irmán sira iha Filipe.

19. (a) Oinsá katuas sira bele kontinua iha hanoin pozitivu kona-ba irmaun-irmán sira? (b) Ita aprende saida husi dezeñu kona-ba katuas ida neʼebé hamoos Reuniaun-Fatin?

¹⁹ Buat neʼebé ita aprende. Katuas sira presiza tau fokus ba irmaun-irmán sira-nia hahalok diʼak. Irmaun-irmán sira la perfeitu, maibé sira ida-idak iha hahalok neʼebé furak. (Flp 2:3) Dala ruma katuas sira presiza fó konsellu ba irmaun-irmán sira. Hanesan Paulo, katuas sira tenke hakaʼas an atu la tau fokus ba irmaun-irmán sira-nia liafuan no hahalok neʼebé halo sira hirus. Sira presiza tau fokus ba oinsá irmaun-irmán sira  hadomi Jeová, serbí Jeová ho laran-metin no mós iha abilidade atu halo buat diʼak agora ka iha futuru. Katuas sira neʼebé tau fokus ba irmaun-irmán sira-nia hahalok diʼak sei ajuda ema hotu iha kongregasaun atu sente domin.

20. Oinsá katuas sira bele hetan benefísiu husi Paulo nia ezemplu?

²⁰ Katuas sira sei hetan benefísiu hodi kontinua estuda Paulo nia ezemplu. Porezemplu iha Indeks Publikasi Menara Pengawal, buka tópiku “Paulus” no tuirmai haree subtítulu “Teladan bagi Penatua”. Bainhira katuas sira lee informasaun husi lista neʼe, sira bele husu sira-nia an: ‘Oinsá Paulo nia ezemplu bele ajuda haʼu atu kontinua sente haksolok bainhira haʼu halaʼo haʼu-nia knaar nuʼudar katuas?’

21. Katuas sira bele iha konfiansa saida?

²¹ Katuas sira presiza hanoin-hetan katak Jeová la husu sira atu sai perfeitu, maibé nia husu sira atu hatudu laran-metin. (1 Kor 4:2) Jeová hafolin Paulo nia serbisu makaʼas no ninia laran-metin. Fiar bá katak Maromak mós hafolin Ita-nia serbisu ba nia. Jeová sei nunka haluha Ita-nia ‘serbisu no Ita-nia domin neʼebé Ita hatudu ona ba ninia naran, tanba Ita serbí ona no kontinua serbí ema santu sira’.​—Ebr 6:10.