1-2. Giyeyedzo gya mupostoli Pawulo gi nga phasa kharini madhota muhuno?

 MUPOSTOLI Pawulo a di gu haladza vandriyaye. Uye a di gu thuma ngudzu gasi gu va sayisa. (Mith. 20:31) Nigu vandriyaye va di gu mu haladza ngudzu. Ga tepo nyo khaguri, tepo madhota ya Efeso ma nga wona gu khayo kha va na nga mu wona gambe, ayo ‘ma di liya.’ (Mith. 20:37) Madhota ma girago thumo nyo garadze khu ndziya yayimweyo ma ngu haladza ngudzu vandriyawe nigu ma ngu gira satshavbo ma si kodzago gasi gu va phasa. (Filp. 2:16, 17) Ambari ulolo, dzimbe dzitepo madhota ma ngu emisana ni sigaradzo. Ginani gi nga va phasago?

² Madhota ma thumago khu gu dzigaradza ma nga pimedzeya giyeyedzo gya Pawulo. (1 Kor. 11:1) Uye a diri mwalo makodzelo ma gu na ni dzingilozi. Pawulo a diri muthu nya mba vbeleya nigu dzimbe dzitepo a di yede gu dzi garadza gasi gu gira silo nya sadi. (Rom. 7:18-20) Nigu uye a diri ni sigaradzo nya singi. Ganiolu, Pawulo kha tsukula ambari gu vbeledwa khu litsako. Tepo madhota ma pimedzeyago giyeyedzo gya Pawulo, ayo ma nga simama gu thumeya Jehovha na ma tsakide ambari na ma gu emisana ni sigaradzo. Olu hi na bhula khedzi madhota ma nga girago khidzo isoso.

3. Ginani hi na bhulago khigyo avba nya ndrima yeyi nigu ginani gambe hi na gi hevbulago?

³ Avba nya ndrima yeyi, hi na hevbula khu 4 silo si nga garadzeyago madhota gu si gira: 1) Gu ninganiseya thumo wawe nyo tshumayele ni yimbe mithumo, 2) gu vbwetedzeya tepo gasi gu tiyisa vandriyawe, 3) gu emisana ni gu mba vbeleya gwawe ni 4) gu emisana ni gu mba vbeleya ga vambe. Hi na bhula khedzi Pawulo a padego khidzo sigaradzo sesi ni edzi madhota ma nga pimedzeyago khidzo giyeyedzo gyaye.

4. Khu ginani dzimbe dzitepo si garadzeyago madhota gu ninga giyeyedzo nya gyadi avbo nya thumo nyo tshumayele?

⁴ Khu ginani isoso si nga garadzago? Madhota ma na ni mithumo nya yingi vbavbandze basi nya gu thangeye thumo nyo tshumayele. Khu giyeyedzo, madhota nya mangi ma ngu thangeya mitshangano ya vbakari nya semana ni gu gimbidzisa gihevbulo nya Bhibhiliya nya libandla. Ayo gambe ma nga ningwa dzimbe dziganelo nigu ma ngu gira nya singi gasi gu trenari vaphasedzeyi nya libandla va bwe va dzi garadzeya gu tiyisa vandriyawe. (1 Ped. 5:2) Mambe madhota ma ngu patega avbo nya gu vbahe ni gu sayisa Dzisalawu nya Mufumo ni dzimbe dzinyumba dzi thumiswago gasi gu khozeya Jehovha. Gu fana ni vatshavbo libandlani, thumo nya lisima owu madhota ma girago, i thumo nyo tshumayele mahungo nya yadi. — Mat. 28:19, 20.

5. Giyeyedzo muni egi Pawulo a vegidego kha nga mutshumayeli?

⁵ Giyeyedzo gya Pawulo. Umo ga Vafilipi 1:10, Pawulo a gu hi embeya gu khuye khu ginani a nga khala mutshumayeli nya wadi. Uye a gu ganeya gu khuye: “Kodza gu hatha esi si gu sadi.” Pawulo thumiside wusingalagadzi waye. Uye a di gu ningidwe thumo nyo tshumayele nigu khu hwane nya myaga nya yingi wonide gu khuye thumo wowu wu diri gilo nya lisima womini gwaye. Uye tshumayede “vathuni ni mudzindrangani.” (Mith. 20:20) Uye kha nga ba a hathide ora nyo khaguri mwendro listhigu limwedo nya semana gasi gu gira thumo nyo tshumayele. Uye a di gu londrola ni levbini lithomo gasi gu tshumayela. Khu giyeyedzo, tepo a nga ba a vireya dzipari dzaye Atena, uye a di tshumayela mahungu nya yadi ga tsawa nyo khaguri nigu vambe va ma hakhide gwadi. (Mith. 17:16, 17, 34) Ambari tepo Pawulo a nga ba a khothedwe ndrangani gwaye uye tshumayede vale va nga ba va mu randrede.— Filp. 1:13, 14; Mith. 28:16-24.

6. Pawulo trenaride vambe gasi gu gira ginani?

⁶ Pawulo thumiside gwadi tepo yaye. Tepo yatshavbo a di gu rana vambe vathu gasi gu patega naye thumoni nyo tshumayele. Khu giyeyedzo, avbo nya liendro laye kha nga misiyonariyu, uye a di dzega Johane a ranwago gu pwani khu Marko; avbo nya liendro laye nya wuvili, a di dzega Thimoti. (Mith. 12:25; 16:1-4) Kha si kanakanisi gu khiso Pawulo a dzi garadzide gasi gu hevbudza vama vava edzi va yedego gu thangeya khidzo libandla, edzi va nga girago khidzo thumo nya wuhavisi ni edzi va nga khalago khidzo vahevbudzi nya vadi. — 1 Kor. 4:17.

7. Madhota ma nga thumisa kharini esi Pawulo a ganedego khiso umo ga Vaefeso 6:14, 15?

⁷ Esi hi si hevbulago. Madhota ma nga pimedzeya Pawulo khu gu ma si tshumayeli basi khu ndranga ni ndranga, ganiolu khu gu ma dzi emiseya gu tshumayela ma gu mana ni levbini lithomo nya gu gire isoso. (Leri Vaefeso 6:14, 15.) Khu giyeyedzo, avo va nga tshumayela tepo  va rengarengago silo mwendro tepo va gu romo thumoni gwawe. Mwendro tepo va phasedzeyago gu vbaha Salawu nya Mufumo, avo va nga tshumayela vathu va vbanyago vbafuvbi mwendro vathu va va rengiseyago silo. Gu fana ni Pawulo, madhota ma nga thumisa tepo ma gomogo thumoni nyo tshumayele gasi gu trenari vambe gupata ni vaphasedzeyi nya libandla.

8. Ginani egi lidhota li yedego gu gira dzimbe dzitepo?

⁸ Madhota kha ma yeli gu pharega ngudzu khu mithumo ma girago libandlani mwendro ga mambe mabandla nyo bwe ma si mani tepo nyo duge thumo nyo tshumayele. Gasi ma si kodza gu mana tepo nyo gire satshavbo si vbwetegago, ayo dzimbe dzitepo ma yede gu bomba ma gu lombwa gu engedzedwa yimbe mithumo. Hwane nya gu pimise ni gu gombeya maningano ni isoso, ayo ma nga tugula gu khayo ma nga dzumeya gu gira thumo nyo khaguri nya mba vega khu phuvbo silo nya lisima ngudzu. Silo soso nya lisima sa gu pata gu gira wukhozeyi nya ndranga dzisemana dzatshavbo, gu patega thumoni nyo tshumayele mwendro gu trenari sanana sawe gasi gu gira thumo wowu. Mambe madhota si ngu ma garadzeya gu bomba thumo nyo khaguri, ganiolu va nga tiyisega gu khavo Jehovha a ngu pwisisa gudogoreya gwawe nya gu ninganiseye silo satshavbo.

9. Ginani adzina gi nga garedzeyago madhota khu kotani nya olu ma gu na ni silo nya singi nyo gire?

⁹ Khu ginani isoso si nga garadzago? Vathu va Jehovha va ngu tshangana ni sigaradzo nya singi. Ndrani nya matshigo yaya nyo hegise, hatshavbo hi ngu vbweta gu tiyiswa, gu phaswa ni gu thaveledwa. Nigu dzimbe dzitepo vambe va na vbweta giphaso gasi gu potsa mavbanyelo nyo vivbe. (1 Tes. 5:14) Khu lisine, madhota kha ma na nga si kodza gu vbedza satshavbo sigaradzo esi vathu va Jehovha va tshanganago naso. Ambari ulolo, Jehovha o vbweta gu khuye madhota ma gira satshavbo ma si kodzago gasi gu tiyisa ni gu vhikeya vathu vaye. Kha nga olu madhota ma gu na ni thumo nya wungi tepo yatshavbo, ma nga yi mana hayi tepo nyo ninge vandriyathu giphaso egi va gi vbwetago?

10. Guya khu 1 Vatesalonika 2:7, ginani egi Pawulo a giridego gasi gu khathaleya vathu va Jehovha?

¹⁰ Giyeyedzo gya Pawulo. Pawulo tepo yatshavbo a di dzi emisede gu zundza ni gu tiyisa vandriyaye. Si na ni lisima gu madhota ma pimedzeya giyeyedzo gyaye khu gu ma haladza ni gu gireya wuwadi vandriyawe. (Leri 1 Vatesalonika 2:7.) Pawulo a embede vandriyaye gu khuye a di gu va haladza ni gu khuye Jehovha nuye a di gu va haladza. (2 Kor. 2:4; Efes. 2:4, 5) Pawulo a di gu phara vathu va libandlani gwaye kha nga dzipari dzaye nigu a di gu vbedza tepo navo. Uye yeyedzide gu khuye a di va tumba khu gu va bhuleya maningano ni esi si nga ba si mu garadza ni gu mba vbeleya gwaye. (2 Kor. 7:5; 1 Thim. 1:15) Ambari ulolo, Pawulo kha vega gupima avba nya sigaradzo saye. Vbavbandze nya isoso, uye a di gu vbweta gu phasa vandriyaye.

11. Khu ginani Pawulo a ningidego wusingalagadzi vandriyaye?

¹¹ Dzimbe dzitepo, Pawulo a di yede gu ninga wusingalagadzi vandriyaye. Ganiolu, uye kha nga  ba a gira isoso khu gu ba a gorogide. Uye a di gu va ninga wusingalagadzi kholu a di gu va haladza nigu a di gu vbweta gu va vhikeya ga dzimango nyo hambanehambane. Uye a di gu zama gu vbevbugisa wusingalagadzi waye gasi va wu pwisisa. Nigu a di gu vbweta gu khuye vandriyaye va dzumeya wusingalagadzi waye. Khu giyeyedzo, avbo nya lidangaliya laye a lovedego Vakorinto, Pawulo va ningide wusingalagadzi nyo tiyise. Hwane nyo ba a lovide lidangaliya lile, uye va rumelede Tito. Pawulo a di gu garadzega khedzi avo va nga hadzi li wona khidzo lidangaliya laye. Uye tsakide ngudzu tepo a ngapwa gu pwani avo va dzumede wusingalagadzi waye nigu va ngu wu thumisa.— 2 Kor. 7:6, 7.

12. Madhota ma nga tiyisa kharini vakhozeyi vakwanu?

¹² Esi hi si hevbulago. Madhota ma nga pimedzeya giyeyedzo gya Pawulo khu gu thumisa tepo nyo khaguri gasi gu bhula ni vakhozeyi vakwanu. Mweyo nya dzindziya nyo gire khidzo isoso khu gu vboha khu tepo mitshanganoni nya libandla gasi gu tiyisa vambe khu mabhulo yawe. Gu tala nya dzitepo gasi gu tiyisa vandriyathu kha si dzegi dzimeneti nya dzingi. (Rom. 1:12; Efes. 5:16) Lidhota li pimedzeyago giyeyedzo gya Pawulo li nga thumisa Bhibhiliya gasi gu tiyisa gukhodwa ga vandriyaye ni gu va tiyisegisa gu khilo Nungungulu a ngu va haladza. Nigu gu vbwetega li yeyedza gu khilo anilo li ngu va haladza vandriyathu. Ilo lo dzi garadzeya gu ganeya navo tepo yatshavbo li bwe li vbwetedzeya mathomo nyo va zundze. Tepo li ningago wusingalagadzi, ilo lo dzi seketeya avba nya lito la Nungungulu, li ganeya khu gu kongoma, ganiolu khu ndziya nya yadi gambe. Kholu ilo la gu vbweta gu khilo vandriyaye va thumisa wusingalagadzi walo. — Gal. 6:1.

13. Madhota ma nga kuhwa kharini khu gu mba vbeleya gwawe?

¹³ Khu ginani isoso si nga garadzago? Madhota kha ma vbeleya. Gu fana ni vathu vatshavbo ayo ma ngu hosisa. (Rom. 3:23) Dzimbe dzitepo dzi nga ma garadzeya gu emisana ni gu mba vbeleya gwawe khu ndziya nya yadi. Mambe ma ngu garadzega ngudzu khu gu mba vbeleya gwawe nyo bwe ma vbeya tshivba. Mambe ma nga pimisa gu khavo sihoso sawe si mwalo ngudzu lisima, khu kharato va mwalo gighelo nyo vbindrugedze.

14. Guya khu Vafilipi 4:13, gudzinogisa gu phaside kharini Pawulo gu emisana ni gu mba vbeleya gwaye?

¹⁴ Giyeyedzo gya Pawulo. Khu kotani nya olu Pawulo a nga ba a dzi nogisa, uye pwisiside gu khuye kha na nga si kodza gu emisana ni gu wegeleya gwaye abune. Uye a di gu vbweta tshivba ya Nungungulu. Gale, Pawulo a di gu tshanisa Makristo, ganiolu uye pwisiside gu khuye esi a nga ba a gira si di gu vivbide nigu a di dzi emisede gu vbindrugedza esi a nga ba a gira ni mavbanyelo yaye. (1 Thim. 1:12-16) Khu gu phaswa khu Jehovha, Pawulo khade lidhota li gu na ni lihaladzo, li pweyago wusiwana ni gu dzi nogisa. Uye a di gu dziti gu khuye a diri ni sihoso nya singi, ganiolu  a di si khaleyi gu pimisa khiso, wulangani nya isoso a di gu tumba gu khuye Jehovha a di hadzi mu divaleya. (Rom. 7:21-25) Uye kha nga ba a vireya gu khuye a khala muthu nyo vbeleye, wulangani nya isoso uye dzi garadzide gasi gu tshukwadzisa mavbanyelo yaye nya Wukristo. Nigu khu gu dzinogisa tumbide giphaso gya Jehovha gasi gu vbedzisa thumo waye. — 1 Kor. 9:27; leri Vafilipi 4:13.

15. Lidhota li nga manega kharini ni mawonelo nya yadi maningano ni gu mba vbeleya gwalo?

¹⁵ Esi hi si hevbulago. Madhota khandri ma di hathwa khu gu ba ayo na ma vbelede. Jehovha o vireya gu khuye ma dzumeya sihoso ma bwe ma tshukwadzisa mavbanyelo yawe nya Wukristo. (Efes. 4:23, 24) Lidhota li yede gu thumisa gihevbulo gyalo nya Bhibhiliya gasi gu wona omu li yedego gu tshukwadzisa ni gu vbindrugedza silo nyo khaguri. Lo gira isoso, Jehovha a na li phasa gu mana gutsaka ni gu khala lidhota nya ladi. — Jak. 1:25.

16. Ginani gi nga giregago la gu tshuka lidhota li vega ngudzu gupima avba nya sihoso sa vambe?

¹⁶ Khu ginani isoso si nga garadzago? Tepo madhota ma vbedzago tepo nya yingi ni vandriyawe libandlani, si ngu ma vbevbugeya gu wona sihoso sawe. Ma gu mba dzi woneya, ayo ma nga goroga ma bwe ma solasola vandriyathu. Pawulo gengedzide Makristo gu khuye Sathane o vbweta gu khuye ayo ma gira kamo isoso. — 2 Kor. 2:10, 11.

17. Pawulo a di gu wona kharini vandriyaye?

¹⁷ Giyeyedzo gya Pawulo. Pawulo tepo yatshavbo a di gu wona vandriyaye khu ndziya nya yadi. Uye a di gu dziti gu khuye avo va ngu hosisa kholu dzimbe dzitepo va di gu gira silo si nga ba si mu khunguvanyisa. Ganiolu, Pawulo a di gu dziti gu khuye muthu a gu hosisa kha si thuli gu khiso muthu yoyo vivbedwe khu monyo. Uye a di gu haladza vandriyaye nigu a di gu vega gupima avba nya makhalelo yawe nya yadi. Ambari tepo vandriyaye si nga ba si va garadzeya gu gira silo nya sadi, uye a di gu pimisa gu khuye khu lisine avo va di gu vbweta gu gira silo nya sadi nigu va di gu vbweta giphaso.

18. Ginani u gi hevbudego maningano ni edzi Pawulo a emisanidego khidzo ni esi si dugeledego ga Evhodhiya ni Sintiki? (Vafilipi 4:1-3)

¹⁸ Khu giyeyedzo, wona edzi Pawulo a phasidego khidzo vandriyathu vavili nya vanyamayi libandlani la Filipi. (Leri Vafilipi 4:1-3.) Evhodhiya ni Sintiki kha va nga ba va pwana nigu va di siri gambe dzipari. Pawulo kha goroga mwendro gu solasola, wulangani nya isoso uye a di vega gipima avba nya makhalelo yawe nya yadi. Vandriyathu vava nya vanyamayi nyo gutumbege va di thumede Jehovha khu tepo nyo laphe, nigu Pawulo a di gu dziti gu khuye Jehovha a di gu va haladza. Khu kotani nya mawonelo nya yadi aya Pawulo a nga ba ari nawo khu vandriyaye, uye va kutside gu lulamisa gigaradzo gyawe. Khu kotani nya olu Pawulo a nga ba a vega gupima avba nya makhalelo ya vambe, uye a di gu si kodza gu simama na tsakide ni gu tiyisa wupari waye ni vambe libandlani.

19. a) Madhota ma nga manega kharini ni mawonelo nya yadi khu vandriyathu? b) Ginani u nga gi hevbulago avba nya fotu yi yeyedzago lidhota na li agisa Salawu nya Mufumo?

 ¹⁹ Esi hi si hevbulago. Madhota vbwetedzeyani makhalelo nya yadi ga vandriyanu. Hatshavbo kha ha vbeleya, ambari ulolo moyo ni moyo wathu na ni makhalelo nyo samadzise ngudzu. (Filp. 2:3) Lisine gu madhota dzimbe dzitepo ma yede gu ninga wusingalagadzi vandriyathu, gu fana ni Pawulo tepo ma girago isoso, ayo ma yede gu dzi garadzeya gu mba vega gupima avba nya silo nya mba sadi esi ndriyathu a nga ganeya ni gu gira. Khu kharato, ayo ma yede gu vega gupima gwawe avba nya lihaladzo laye khu Jehovha, gutimiseya gwaye tepo a thumeyago Nungungulu ni gudzigaradza a gu girago gasi gu gira silo nya sadi. Madhota ma vegago gupima avba nya makhalelo nya yadi ya vambe ma ngu phasa vandriyawe gu dzipwa na va haladzwa khu vatshavbo libandlani.

20. Madhota ma nga simama kharini gu phasega khu giyeyedzo gya Pawulo?

²⁰ Enu madhota mu na wona lisima nya gu simame gu hevbula khu giyeyedzo gya Pawulo. Khu giyeyedzo, beya omu nya Índices das Publicações da Torre de Vigia, avba nya hungo nya mahungu wu gu khuwo “Paulo” u thitha avba nya gihungwana nya mahungu yi gu khigyo “exemplo para os anciãos.” Tepo u lerigo sipandre nyo khaguri si sasamedzidwego avba nya gipandre gegi, dzi wudzise gu khuwe: ‘Giyeyedzo gya Pawulo gi nga nyi phasa kharini gu simama na nyi tsakide tepo nyi girago thumo wangu kha nga lidhota?’

21. Madhota ma nga tiyisega khu ginani?

²¹ Madhota dundrugani gu khenu Jehovha kha vbweti gu khuye mi vbeleya, ganiolu o vbweta gu khuye mu tumbega. (1 Kor. 4:2) Jehovha a di gu tsaka khu thumo wa Pawulo ni gutumbega gwaye. Khu kharato, tiyisegani gu khenu Nungungulu a ngu tsaka khu thumo wanu mu mu gireyago. Jehovha gima kha na nga divala “thumo mu wu giridego enu, ni lihaladzo mu li yeyedzidego, ni giphaso mu giridego ni olu mu nga gu girago ga vandriyanu nya vakristo.” — Hebh. 6:10.