1, 2. ¿Tuku xlakata xliʼakxilhtit Pablo tlan nakamakgtaya lakgkgolotsin?

 APÓSTOL Pablo lu xkapaxki xnatalan, wa xlakata lu xkaliskuja (Hech. 20:31). Chu wa xlakata natalan lu xpaxkikgo. Akgtum kilhtamaku, akxni lakgkgolotsin xalak Éfeso katsikgolh pi nialh amakgtum xʼamaparakgo akxilhkgo «xputumkan lhuwa tasakgolh» (Hech. 20:37). Nachuna, lakgkgolotsin xalak kinkilhtamakujkan lu kapaxkikgo xnatalankan chu lhuwa tuku tlawakgo xlakata nakamakgtayakgo (Filip. 2:16, 17). Pero min kilhtamaku tuwa tuku titaxtukgo. ¿Tuku tlan nakamakgtaya?

² Tlan nawan pi lakgkgolotsin tiku kgalhikgo lhuwa taskujut nastalanikgo xliʼakxilhtit Pablo (1 Cor. 11:1). Xla ni la chatum ángel xwanit; xla chatum lataman tiku na xkgalhi talakgalhin chu xliskuja xlakata natlawa tuku tlan (Rom. 7:18-20). Maski titaxtulh tuku lu tuwa, xla ni taxlajwanilh chu ankgalhin limasiyalh tapaxuwan. Komo lakgkgolotsin nastalanikgo xliʼakxilhtit Pablo, chuntiya xatapaxuwan naskujnanikgo Jehová maski natitaxtukgo tuku tuwa. Kaʼakxilhwi la tlan chuna natlawakgo.

3. ¿Tuku nalichuwinanaw kʼuma artículo, chu tuku nakatsiniyaw?

³ Kʼuma artículo nalichuwinanaw pulaktati tuku max lakgkgolotsin tuwa makgkatsikgo natlawakgo: 1) nakgalhikgo kilhtamaku xlakata nalichuwinankgo Dios chu natlawakgo putum taskujut nema kgalhikgo, 2) nalimaxtukgo kilhtamaku xlakata nakamakgpuwantinikgo natalan, 3) ni nataxlajwanikgo maski tlawakgo tuku nitlan chu 4) akxtum nakataskujkgo tiku na makglakgalhinanin. Nakatsiniyaw tuku makgtayalh Pablo natayani tuku tuwa xtitaxtuma chu la tlan lakgkgolotsin nastalanikgo xliʼakxilhtit.

4. ¿Tuku xlakata max tuwa namakgkatsikgo lakgkgolotsin nawilikgo tlan liʼakxilhtit xlakata nalichuwinankgo Dios?

⁴ Tuku xlakata tuwa. Lakgkgolotsin ni kajwatiya lichuwinankgo Dios, na kgalhikgo amakgapitsi taskujut. Kaʼakxilhwi makgapitsi. Min kilhtamaku pulalinkgo tamakxtumit xaʼitat semana o Takgalhtawakga nema takilhtinit kBiblia kcongregación. Nachuna, xlitlawatkan amakgapitsi taskujut o xlimastatkan akgtum taʼakgchuwin. Na limaxtukgo lhuwa kilhtamaku xlakata nakamasiyanikgo siervos ministeriales la natlawakgo xtaskujutkan chu kamakgpuwantinikgo natalan (1 Ped. 5:2). Makgapitsi lakgkgolotsin makgtayanankgo niku katlawakan chu kakaxtlawakan kimPukgalhtawakgakan chu amakgapitsi chiki nema tamaklakaskin xlakata nakakninanikan Jehová. Pero maski tlawakgo putum uma taskujut, tuku tlakg xlakaskinka xliʼakxilhatkan lakgkgolotsin wa nalichuwinankgo xalaktlan tamakatsinin, chuna la tlawakgo putum natalan (Mat. 28:19, 20).

5. ¿Tuku liʼakxilhtit wililh Pablo chuna la lichuwinalh Dios?

⁵ Xliʼakxilhtit Pablo. Anta kFilipenses 1:10 tekgsaw tuku xlakata Pablo lu tlan xlichuwinan Dios. Anta kinkamaxkiyan uma tastakyaw: «Nakatsiyatit tuku tlakg xlakaskinka». Xla tlawalh tuku wan xtastakyaw. Xla lakgayawaka nalichuwinan Dios chu akglhuwa kata lu xlakaskinka liʼakxilhli uma kxlatamat. Lichuwinalh Dios «kxlakatinkan latamanin chu kʼakgatunu akgatunu chiki» (Hech. 20:20). Ni kajwatiya lichuwinalh Dios makgapitsi horas o kaj makgtum akgatunu semana. Xla kaxanikawa xlichuwinan Dios. Akgtum liʼakxilhtit, akgtum kilhtamaku akxni xkakgalhkgalhima xnatalan anta kʼAtenas, kalitachuwinalh xalaktlan tamakatsinin makgapitsi latamanin tiku lu xlakaskinka xlitaxtukgo, chu uma lu tlan kitaxtunilh (Hech. 17:16, 17, 34). Asta akxni xchiwilikanit kʼakgtum chiki, kalitachuwinalh Dios tiku xlakgminkgo (Hech. 28:16-24; Filip. 1:13, 14).

6. ¿La kamasiyanilh Pablo makgapitsi natalan?

⁶ Pablo liwana xmaklakaskin kilhtamaku chu xlismani akxtum xkatalichuwinan Dios amakgapitsin. Akgtum liʼakxilhtit, akxni xlipulana alh lichuwinantapuli Dios taʼalh Juan Marcos chu akxni xlimakgtiy alh, taʼalh Timoteo (Hech. 12:25; 16:1-4). Lu liskujli xlakata nakamasiyani umakgolh lakchixkuwin la nakakaxwilikgo congregaciones, la napulalinankgo chu tlan makgalhtawakgenanin nalitaxtukgo (1 Cor. 4:17).

7. ¿La tlan nastalanikgo lakgkgolotsin xtastakyaw Pablo nema tatekgsa kʼEfesios 6:14, 15?

⁷ Tuku kinkamasiyaniyan. Lakgkgolotsin ni kajwatiya xlistalanitkan apóstol Pablo akxni lichuwinankgolh Dios kʼakgatunu chiki, na tlan chuna natlawakgo kaxanikawa natatekgskgo  (kalikgalhtawakga Efesios 6:14, 15). Akgtum liʼakxilhtit, tlan chuna natlawakgo akxni ankgo tamawanankgo o anta niku skujkgo. O, komo makgtlawamakgo akgtum Pukgalhtawakga tlan nakalitachuwinankgo xalaktlan tamakatsinin tiku lakatsu wilakgo anta chu tiku makgtamawakgo tuku lichikinamakgo. Chu, chuna la tlawalh Pablo, tlan nalimaklakaskinkgo kilhtamaku nema akxtum katalichuwinankgo Dios amakgapitsin xlakata nakamasiyanikgo, akgtum liʼakxilhtit, siervos ministeriales.

8. Namin kilhtamaku, ¿tuku natalakaskin natlawa chatum kgolotsin?

⁸ Maski lakgkgolotsin kgalhikgo lhuwa taskujut xalak congregación o xalak circuito chuntiya xlimaxtutkan kilhtamaku xlakata nalichuwinankgo Dios. Xlakata nakgalhikgo kilhtamaku namakgantaxtikgo tuku xlitlawatkan, namin kilhtamaku natalakaskin nialh namakglhtinankgo lhuwa taskujut. Max akxni lilakpuwankgonita chu tlawakgonita nawan oración, naʼakxilhkgo pi komo namakglhtinankgo akgtum taskujut nialhla katimakgantaxtikgolh tuku tlakg xlakaskinka, chuna la takaknin nema tlawakgo akgatunu semana, namakgtayanankgo chuna la lichuwinankan Dios o nakamasiyanikgo xkamanankan la nalichuwinankan Dios. Makgapitsi tuwa makgkatsikgo ni namakglhtinankgo akgtum taskujut, pero liwana xlikatsitkan pi Jehová akgatekgsa pi xlakan liwana makgantaxtiputunkgo putum tuku kalakgayawakanit.

9. Xlakata lakgkgolotsin lhuwa taskujut kgalhikgo, ¿tuku max tuwa namakgkatsikgo namakgantaxtikgo?

⁹ Tuku xlakata tuwa. Xlakata lamawa kxaʼawatiya kilhtamaku, xlakskujnin Jehová kgalhiyaw lhuwa taʼakglhuwit. Wa xlakata kimputumkan maklakaskinaw tamakgpuwantin, tamakgtay chu takgoxamixat. Min kilhtamaku, makgapitsi maklakaskinkgo tamakgtay xlakata ni naʼankgo knixatlan tiji (1 Tes. 5:14). Xlikana, lakgkgolotsin nila masputukgo putum taʼakglhuwit nema titaxtuyaw. Pero Jehová lakaskin pi lakgkgolotsin katlawakgolh putum tuku matlanikgo xlakata nakamakgpuwantinikgo chu nakuentajtlawakgo xborregos. Xlakata kgalhikgo lhuwa taskujut, ¿la tlan nalimaxtukgo kilhtamaku xlakata nakamakgtayakgo natalan?

10. Chuna la wan 1 Tesalonicenses 2:7, ¿la kalikatsinilh Pablo natalan?

¹⁰ Xliʼakxilhtit Pablo. Xla ankgalhin xtekgsa la nakawani laktlan tachuwin natalan chu xkamatliwakglha. Lu tlan pi lakgkgolotsin nastalanikgo xliʼakxilhtit Pablo chu nakalimasiyanikgo tapaxkit natalan (kalikgalhtawakga 1 Tesalonicenses 2:7). Pablo kawanilh xnatalan pi xla chu Jehová lu xkapaxkikgo (2 Cor. 2:4; Efes. 2:4, 5). Xkaliʼakxilha chuna la xʼamigos chu xkalimaxtuni kilhtamaku. Xkalimasiyani pi xkalipawan akxni liwana xkalitachuwinan tuku xlilakgaputsa chu xmaxlajwani (2 Cor. 7:5; 1 Tim. 1:15). Maski na tuwa tuku xtitaxtuma, uma ni wa  tuku lu lilakgaputsalh, wata lilakgaputsalh la nakamakgtaya xnatalan.

11. ¿Tuku xlakata Pablo xkastakyawa natalan?

¹¹ Xmin kilhtamaku, Pablo xkastakyawa natalan. Pero nichuna tlawalh kaj xlakata ksitsinit, wata kaj xlakata xkamakgtayaputun xnatalan chu xlakaskin pi ni xkgalhikgolh taʼakglhuwit. Xliskuja xlakata xtastakyaw ni tuwa xtaʼakgatekgsli chu xkatsiputun la xmakgamakglhtinankanit xtastakyaw. Akgtum liʼakxilhtit, akxni katsokgnanilh natalan xalak Corinto, kamaxkilh akgtum palha tastakyaw. Pero alistalh kamalakgachanilh Tito, xlakata xkatsiputun la xmakgamakglhtinankgonit carta nema xkamalakgachaninit. ¡Chu lu makgapaxuwalh akxni katsilh pi makgamakglhtinankgolh tastakyaw nema xkamakamaxkinit! (2 Cor. 7:6, 7).

12. ¿Tuku tlan natlawakgo lakgkgolotsin xlakata nakamatliwakglhkgo xnatalankan?

¹² Tuku kinkamasiyaniyan. Lakgkgolotsin tlan nastalanikgo xliʼakxilhtit Pablo komo nakalimaxtunikgo kilhtamaku xnatalankan. Pulaktum la tlan chuna natlawakgo wa sokg nachankgo ktamakxtumit xlakata nakatachuwinankgo natalan chu nakamakgpuwantinikgo. Makglhuwa ni talakaskin lhuwa kilhtamaku xlakata namakgpuwantinikan chu nalimasiyanikan tapaxkit chatum tala (Rom. 1:12; Efes. 5:16). Lakgkgolotsin tiku stalanikgo xliʼakxilhtit Pablo maklakaskinkgo Biblia xlakata nakamakgpuwantinikgo xnatalankan chu nakawanikgo pi Jehová kapaxki. Nachuna, lakgkgolotsin kalimasiyanikgo tapaxkit natalan akxni ankgalhin katachuwinankgo chu lakputsakgo la tlan nakawanikgo laktlan tachuwin. Komo chatum kgolotsin xlistakyawat chatum tala, xtastakyaw xlikilhtiyat kxTachuwin Dios. Liwana nawani tuku listakyawama chu nalimasiyani talakgalhaman xlakata lakaskin pi tala kamakgantaxtilh tuku listakyawamaka (Gál. 6:1).

13. ¿La max namamakgkatsini chatum kgolotsin tuku nitlan tlawa?

¹³ Tuku xlakata tuwa. Xlakata lakgkgolotsin na makglakgalhinanin, na tlawakgo tuku nitlan (Rom. 3:23). Min kilhtamaku talakaskin lu naliskujkgo xlakata naʼakxilhkgo tuku nitlan tlawakgo chuna la xlilat. Makgapitsi max taxlajwanikgo xlakata kajwatiya lilakpuwankgo tuku nitlan tlawakgo. Amakgapitsin max ni kuenta natlawakgo tuku nitlan tlawakgo chu nalakpuwankgo pi ni talakaskin natlawakgo talakgpalit.

14. Chuna la wan Filipenses 4:13, ¿la makgtayalh Pablo naʼakxilha chuna la xlilat tuku nitlan xtlawanit?

¹⁴ Xliʼakxilhtit Pablo. Xlakata Pablo xtaʼaktuju akgatekgsli pi nila xʼakstu xʼama tayani tuku nitlan xtlawa. Xkatsi pi xmaklakaskin xtamakgtay Dios. Xapulana lu xkaputsastalani kstalaninanin Cristo, pero titaxtulh kilhtamaku  akgatekgsli pi nitlan tuku xtlawanit chu lakkaxwililh nalakgpali xtayat chu chuna la xlikatsi (1 Tim. 1:12-16). Xlakata Jehová makgtayalh, Pablo litaxtulh chatum chixku tiku xlimasiya tataktujut, talakgalhaman chu tapaxkit. Lu nitlan xmamakgkatsini la xlikatsi xapulana, pero lipawa pi Jehová xtapatinit chu uma makgtayalh nialh lu nalilakpuwan tuku nitlan xtlawanit (Rom. 7:21-25). Xkatsi pi makglakgalhina xwanit, wa xlakata liskujli nalakgpali xtayat, tataktujulh chu lipawa pi Jehová xʼama makgtaya xlakata xmakgantaxtilh xtaskujut (1 Cor. 9:27; kalikgalhtawakga Filipenses 4:13).

15. ¿La xliʼakxilhat chatum kgolotsin tuku nitlan tlawa?

¹⁵ Tuku kinkamasiyaniyan. Akxni Jehová wi tiku laksaka kgolotsin nalitaxtu nichuna tlawa xlakata uma tala ni kgalhi talakgalhin, pero Jehová lakaskin pi tiku lakgkgolotsin litaxtukgo kaʼakxilhkgolh tuku nitlan tlawakgo chu kakgalhikgolh laktlan tayat (Efes. 4:23, 24). Wa xlakata xlimaklakaskinatkan xTachuwin Dios xlakata xʼakstukan nakalakputsananikan chu natlawakgo talakgpalit nema talakaskin. Chu Jehová tlan nakamakgtaya xlakata napaxuwakgo chu liwana namakgantaxtikgo xtaskujutkan (Sant. 1:25).

16. ¿Tuku nakitaxtu komo lakgkgolotsin kajwatiya kuenta natlawakgo tuku nitlan tlawakgo natalan?

¹⁶ Tuku xlakata tuwa. Akxni lakgkgolotsin akxtum kataskujkgo amakgapitsi natalan max ni tuwa naʼakxilhkgo pi xlakan na tlawakgo tuku nitlan. Komo ni kuenta natlawakgo, lakgkgolotsin max nakasitsinikgo natalan, nitlan nakalikatsinikgo chu max nitlan nakalichuwinankgo. Pablo kawanilh natalan pi wa uma tuku Satanás lakaskin (2 Cor. 2:10, 11).

17. ¿La xkaʼakxilha Pablo natalan?

¹⁷ Xliʼakxilhtit Pablo. Xla ankgalhin tlan tuku xkalakpuwani natalan. Uma ni wamputun pi ni xʼakxilha tuku nitlan xtlawakgo, xlakata xmin kilhtamaku na xmakgalipuwan tuku xtlawakgo. Pero Pablo xkatsi pi akxni wi tiku tlawa akgtum talakgalhin ni wamputun pi uma lataman nitlan likatsi. Xkapaxki natalan chu wa kuenta xtlawa xalaktlan xtayatkan. Chu komo xʼakxilha pi chatum tuwa xmakgkatsi natlawa tuku tlan, xlakpuwan pi uma lataman xtlawaputun tuku tlan chu kaj tsinu tamakgtay xmaklakaskin.

18. ¿Tuku katsiniyaw xlakata la Pablo kamakgtayalh Evodia chu Síntique? (Filipenses 4:1-3).

¹⁸ Akgtum liʼakxilhtit, kalichuwinaw la Pablo kamakgtayalh chatiy natalan lakpuskatin xalak xcongregación Filipos (kalikgalhtawakga Filipenses 4:1-3). Max Evodia chu Síntique nialh xlaxakgatlikgo xlakata xlamakgasitsikgonit. Pablo tlan kalikatsinilh chu ni wa tuku nitlan xpalakatakan. Wata wa kuenta tlawalh xatlan xtayatkan chu la ni xmakgxtakgkgo Jehová. Xkatsi pi Jehová xkapaxki. Xlakata wa kuenta xtlawa laktlan tayat nema xkgalhikgo kamakgpuwantinilh nalakkaxtlawakgo xtaʼakglhuwitkan. Xlakata Pablo wa kuenta tlawalh xalaktlan xtayatkan amakgapitsin, uma makgtayalh  napaxuwa chu chuntiya tlan nakatalalin natalan xalak uma congregación.

19. 1) ¿Tuku tlan natlawakgo lakgkgolotsin xlakata nakaʼakxilhkgo natalan chuna la xlilat? 2) ¿Tuku katsiniya xlakata dibujo nema masiya pi chatum kgolotsin kaxakama kPukgalhtawakga?

¹⁹ Tuku kinkamasiyaniyan. Lakgkgolotsin, wa kuenta katlawatit xalaktlan xtayatkan natalan. Xlikana pi makglakgalhinanin, pero na kgalhikgo laktlan tayat (Filip. 2:3). Xlikana, max namin kilhtamaku natalakaskin wi tiku nastakyawayatit. Pero chuna la Pablo, kaliskujtit xlakata ni kajwatiya kuenta natlawayatit xtachuwin o xtayat nema max kamakgasitsi amakgapitsin. Wa kalilakpuwanti pi uma tala paxki Jehová, xatapaxuwan skujnanima chu tlan nalakgpali xtayat. Lakgkgolotsin tiku wa kuenta tlawakgo xalaktlan xtayatkan natalan makgtayanankgo xlakata naʼanan tapaxkit kcongregación.

20. ¿Tuku tlan natlawakgo lakgkgolotsin xlakata chuntiya nakatsinikgo xlakata xliʼakxilhtit Pablo?

²⁰ Lakgkgolotsin nakamakgtaya komo chuntiya nalikgalhtawakgakgo xliʼakxilhtit Pablo. Akgtum liʼakxilhtit, kʼÍndice de las publicaciones Watch Tower tlan naputsakgo niku wan «Pablo» chu alistalh niku wan «ejemplo para los ancianos». Akxni nakalikgalhtawakgaya, kalilakpuwanti uma: «¿La kimakgtaya xliʼakxilhtit Pablo chuntiya xatapaxuwan naktlawa kintaskujut chuna la kgolotsin?».

21. ¿Tuku liwana xlikatsitkan lakgkgolotsin?

²¹ Lakgkgolotsin, kalakapastaktit pi Jehová ni kgalhkgalhi pi ni natlawayatit tuku nitlan; tuku kgalhkgalhi wa pi ni namakgxtakgatit (1 Cor. 4:2). Xla xtapalh liʼakxilhli putum tuku Pablo tlawalh chu la ni makgxtakgli. Liwana kakatsitit pi Jehová na xtapalh liʼakxilha mintaskujutkan, xlakata chuna la wan Hebreos 6:10, xla «nikxni katipatsankgalh mintaskujutkan chu tapaxkit nema limasiyanitit xtukuwani; uma chuna limasiyapatit xlakata kamakgtayapatit xasantos natalan asta la uku».