1-2. Olsem wanem eksampel bilong aposel Pol inap helpim ol elda long nau?

 APOSEL POL i laikim tru ol bratasista bilong em. Em i givim bel tru long mekim ol wok bilong helpim ol. (Apo. 20:31) Dispela i mekim na ol wanbilip bilong Pol i laikim em tru. Wanpela taim “ol i mekim bikpela krai” taim ol elda long Efesus i kisim save olsem ol i no inap lukim Pol gen. (Apo. 20:37) Olsem Pol, ol gutpela elda bilong yumi i laikim tru ol bratasista bilong ol na ol i save mekim olgeta samting ol inap mekim bilong helpim ol. (Fili. 2:16, 17) Tasol sampela taim, ol elda i save bungim ol hatwok. Wanem samting inap helpim ol long daunim ol dispela hatwok?

² Ol gutpela elda bilong yumi i ken bihainim eksampel bilong Pol. (1 Kor. 11:1) Em i no gat wankain strong na save olsem ol ensel. Pol em man i no gutpela olgeta na sampela taim em i hatwok long mekim samting i stret. (Rom 7:18-20) Na tu, em i bin karim sampela hevi. Tasol Pol i no givap o larim dispela i pinisim amamas bilong em. Taim ol elda i bihainim pasin bilong Pol, ol inap daunim ol hatwok bilong ol na holimpas yet amamas bilong ol taim ol i mekim wok bilong Jehova. Yumi ken lukim hau ol i ken mekim olsem.

3. Yumi bai stori long wanem samting long dispela atikol, na yumi bai kisim wanem skul?

³ Long dispela atikol, yumi bai stori long 4-pela hatwok em ol elda i save bungim: (1) balensim gut wok autim tok wantaim ol narapela wok, (2) stap olsem gutpela wasman, (3) karim hevi long ol pasin kranki bilong ol yet, na (4) karim hevi long ol pasin kranki bilong ol narapela. Yumi bai stori long hau Pol i daunim ol dispela hatwok na hau ol elda inap bihainim eksampel bilong em.

4. Bilong wanem ol elda inap pilim hatwok long go pas long wok bilong autim tok?

⁴ Risen na dispela inap givim hatwok long ol. Ol elda i save go pas long wok bilong autim tok na ol i gat ol narapela wok tu. Olsem, planti i save mekim wok olsem siaman long miting namel long wik o lukautim Kongrigesen Baibel Stadi. Na tu, ol inap i gat ol narapela asainmen. Ol i save mekim planti samting long trenim ol kongrigesen sevan, na ol i amamas long wok yet long strongim ol bratasista bilong ol. (1 Pita 5:2) Sampela elda i save insait long wok bilong sanapim na lukautim ol Haus Kingdom na ol narapela haus ol i yusim bilong lotuim Jehova. Maski i olsem, wankain olsem olgeta pablisa insait long kongrigesen, wok bilong autim gutnius i stap olsem nambawan samting long ol.—Mat. 28:19, 20.

5. Olsem wanem Pol i stap gutpela eksampel olsem man bilong autim tok?

⁵ Eksampel bilong Pol. Samting i helpim Pol long mekim gut wok elda em tok i stap long Filipai 1:10, em i tok: “Skelim gut wanem ol samting i bikpela samting moa.” Pol i bihainim dispela tok em yet i mekim. Em i kisim wok olsem man bilong autim tok, na inap planti yia em i tingim wok bilong autim tok olsem nambawan bikpela samting. Em i autim tok long “ol pablik ples na long ol haus.” (Apo. 20:20) Em i no autim tok tasol long wanpela haptaim insait long wanpela de o wanpela de tasol insait long wanpela wik, nogat. Long olgeta taim rot i op, em i autim tok! Olsem, taim em i wetim ol wanwok bilong em long Atens, em i autim gutnius long sampela man i gat namba, na gutpela samting i kamap. (Apo. 17:16, 17, 34) Na tu, maski Pol i stap long “kalabus,” em i autim tok long ol man i stap klostu long em.—Fili. 1:13, 14; Apo. 28:16-24.

6. Pol i givim wanem trening long ol narapela?

⁶ Pol i yusim gut taim bilong em. Planti taim em i save invaitim ol narapela long autim tok wantaim em. Olsem, long namba 1 misineri raun bilong em, em i kisim Jon Mak i go wantaim em, na long namba 2 raun bilong em, em i kisim Timoti i go wantaim em. (Apo. 12:25; 16:1-4) Tru tumas, Pol i givim bes bilong em long skulim ol dispela man long hau long oganaisim gut kongrigesen, inapim gut wok olsem wasman, na long kamap gutpela tisa.—1 Kor. 4:17.

7. Olsem wanem ol elda i ken bihainim tok bilong Pol long Efesus 6:14, 15?

⁷ Skul yumi kisim. Ol elda i ken bihainim eksampel bilong Pol long autim tok long ol haus, na tu, ol i ken redi long autim tok long olgeta taim rot i op. (Ritim Efesus 6:14, 15.) Olsem, ol i ken autim tok taim ol i go long stua o long ples wok bilong ol. Na tu, taim ol i insait long wok bilong sanapim ol Haus Kingdom, ol i ken autim tok long ol man i stap klostu na long ol man i salim ol samting long ol. Olsem Pol, ol  elda i ken yusim haptaim ol i lusim long autim tok long trenim ol narapela, olsem ol kongrigesen sevan.

8. Sampela taim, wanpela elda i ken mekim wanem?

⁸ Ol elda i no ken bisi tumas long ol wok bilong ol insait long kongrigesen o long wok sekit bilong ol na ol i no gat taim long mekim wok autim tok. Bilong balensim gut wok, sampela taim ol i ken tok nogat long sampela asainmen. Bihain long ol i beten na skelim gut ol samting, ol inap luksave olsem sapos ol i kisim dispela asainmen, dispela inap mekim na ol i no gat taim long mekim ol bikpela samting. Olsem, ol bai i no gat taim long go pas long mekim famili lotu long olgeta wik, givim bel tru long wok autim tok, o trenim ol pikinini bilong ol long autim tok. Sampela i pilim hatwok long tok nogat long wanpela asainmen, tasol ol i ken save tru olsem Jehova i kliagut long tingting bilong ol na em i save olsem ol i laik balensim gut olgeta samting.

9. Ol elda i bisi tru i save bungim wanem hatwok?

⁹ Risen na dispela inap givim hatwok long ol. Lain bilong Jehova i save bungim planti hevi. Long dispela taim bilong las de, yumi olgeta i nidim ol tok bilong strongim yumi, helpim yumi, na mekim isi bel bilong yumi. Na sampela taim, ol narapela i nidim helpim long daunim wanpela pasin nogut. (1 Tes. 5:14) Tru tumas, ol elda i no inap rausim olgeta hevi em lain bilong Jehova i karim. Maski i olsem, Jehova i laikim ol elda long mekim samting ol inap mekim bilong strongim na lukautim ol manmeri bilong em. Olsem wanem ol elda em ol i bisi tru inap painim taim bilong helpim ol?

10. Olsem 1 Tesalonaika 2:7 i kamapim, hau Pol i soim olsem em i tingim ol manmeri bilong Jehova?

¹⁰ Eksampel bilong Pol. Oltaim Pol i redi long tok amamas long ol narapela na strongim ol. Ol elda i ken bihainim gutpela eksampel bilong em long laikim na mekim gutpela pasin long ol manmeri bilong Jehova. (Ritim 1 Tesalonaika 2:7.) Pol i tokim ol wanbilip bilong em olsem em i laikim ol na em i tokim ol olsem Jehova i laikim ol. (2 Kor. 2:4; Efe. 2:4, 5) Em i tingim ol narapela insait long kongrigesen olsem ol pren bilong em, olsem na em i lusim haptaim long stap wantaim ol. Em i soim olsem em i trastim ol taim em i tokaut long ol samting em i no gat strong long en na ol pasin kranki bilong em. (2 Kor. 7:5; 1 Tim. 1:15) Maski i olsem, Pol i no putim tingting olgeta long ol hevi bilong em yet, nogat. Em i laik helpim ol bratasista bilong em.

11. Bilong wanem Pol i givim tok kaunsel long ol bratasista bilong em?

¹¹ Sampela taim, Pol i mas givim tok kaunsel long ol bratasista bilong em. Tasol em i no mekim olsem bikos ol i sikirapim bel bilong em, nogat. Em i givim tok kaunsel bikos em i tingim ol na em i laik lukautim ol long ol hevi inap painim ol. Em i mekim tok kaunsel long pasin we i isi long ol i kliagut long en, na em i laik bai ol i bihainim dispela tok kaunsel. Olsem, long pas em i raitim i go long ol bratasista long Korin, em i givim strongpela tok kaunsel long ol. Bihain  long em i raitim dispela pas, em i salim Taitus i go long ol. Pol i laik tru long save olsem ol i bihainim tok bilong em long dispela pas o nogat. Em i amamas tru long save olsem ol i kisim tok kaunsel bilong em na ol i bihainim gut!—2 Kor. 7:6, 7.

12. Olsem wanem ol elda inap strongim ol wanbilip bilong ol?

¹² Skul yumi kisim. Ol elda i ken bihainim eksampel bilong Pol long lusim haptaim long stap wantaim ol wanbilip bilong ol. Wanpela rot ol inap mekim olsem em ol i ken kam paslain long ol miting i kirap na bai ol inap toktok gut wantaim ol bratasista na strongim ol. Sampela taim ol inap lusim sampela minit tasol bilong mekim ol tok bilong strongim wanpela brata o sista, na em ol tok em dispela brata o sista i nidim tru. (Rom 1:12; Efe. 5:16) Na tu, elda husat i bihainim eksampel bilong Pol, em inap strongim ol wanbilip long rot bilong yusim Tok Bilong God long mekim ol tok bilong strongim bilip bilong ol, na helpim ol long bilip olsem God i laikim ol. Na tu, em i mekim ol samting bilong soim ol olsem em i laikim ol. Oltaim em i save toktok wantaim ol na painim rot bilong tok amamas long ol. Taim wanpela elda i mas givim tok kaunsel, em i save yusim Tok Bilong God long mekim olsem. Em i save tokaut stret long samting ol i mas mekim na em i mekim toktok long gutpela pasin bikos em i laik bai ol i bihainim tok kaunsel em i givim.—Gal. 6:1.

13. Ol pasin kranki bilong elda inap mekim wanem long em yet?

¹³ Risen na dispela inap givim hatwok long ol. Ol elda i no gutpela olgeta. Olsem yumi olgeta, ol i save mekim ol popaia. (Rom 3:23) Sampela taim ol inap hatwok long holim stretpela tingting long ol pasin kranki bilong ol yet. Sampela inap wari tumas long ol samting em ol i no inap long mekim na dispela inap mekim ol i bel hevi. Ol narapela inap ting olsem ol popaia bilong ol i no bikpela samting, na dispela inap mekim na ol i no mekim ol senis em ol i mas mekim.

14. Olsem Filipai 4:13 i kamapim, hau pasin daun i helpim Pol long karim hevi long ol pasin kranki bilong em yet?

¹⁴ Eksampel bilong Pol. Long pasin daun Pol i luksave olsem em i no inap daunim ol pasin kranki bilong em long strong bilong em yet, nogat. Em i nidim strong em God tasol i ken givim em. Paslain long em i kamap Kristen, Pol i gat hatpela pasin, na em i save mekim nogut tru long ol Kristen. Tasol bihain, em i luksave long ol popaia bilong em na em i redi long mekim senis long ol pasin na tingting bilong em. (1 Tim. 1:12-16) Jehova i helpim Pol, na em i kamap wanpela elda i gat pasin laikim, pasin sori, na pasin daun. Pol i bel hevi tru bikos em i save olsem em i bin mekim ol bikpela rong. Maski i olsem, em i bilip tru olsem Jehova i fogivim em na em i no tingim tingim ol popaia bilong em. (Rom 7:21-25) Em i  no tingim olsem em i mas kamap gutpela olgeta, nogat. Em i wok strong long kisim ol pasin Kristen, na long pasin daun em i bilip olsem Jehova bai helpim em long inapim wok bilong em.—1 Kor. 9:27; ritim Filipai 4:13.

15. Ol elda i mas holim wanem stretpela tingting long ol pasin kranki bilong ol yet?

¹⁵ Skul yumi kisim. Ol elda i no kisim wok elda bikos ol i gutpela olgeta, nogat. Jehova i laik bai ol i tokaut long ol popaia bilong ol na em i laik bai ol i strongim ol pasin Kristen bilong ol. (Efe. 4:23, 24) Wanpela elda i mas yusim Tok Bilong God long skelim em yet na mekim ol senis em i mas mekim. Taim em i mekim olsem, Jehova bai helpim em long stap amamas na inapim wok bilong em olsem wanpela elda.—Jems 1:25.

16. Wanem samting inap kamap sapos wanpela elda i tingim tumas ol pasin kranki bilong ol narapela?

¹⁶ Risen na dispela inap givim hatwok long ol. Ol elda inap luksave long ol pasin kranki bilong ol narapela insait long kongrigesen bikos planti taim ol i wok wantaim ol. Sapos ol elda i no was gut, ol inap larim pasin kranki bilong ol narapela i sikirapim bel bilong ol, kirapim ol long mekim hatpela pasin, o skelim ol. Pol i givim tok lukaut long ol Kristen olsem em samting Satan i laik ol i mekim.—2 Kor. 2:10, 11.

17. Pol i holim wanem tingting long ol bratasista bilong em?

¹⁷ Eksampel bilong Pol. Em i holim stretpela tingting long ol bratasista bilong em. Em i save long ol popaia bilong ol, long wanem, sampela taim ol pasin bilong ol i bagarapim bel bilong em. Pol i save olsem, maski sapos wanpela i mekim popaia dispela i no makim olsem em i man nogut, nogat. Pol i laikim ol bratasista bilong em na em i tingim ol gutpela pasin bilong ol. Sapos ol i pilim hatwok long mekim pasin i stret, orait Pol i holim tingting olsem long bel ol i laik mekim stretpela pasin, tasol ol i nidim helpim long mekim olsem.

18. Yu kisim wanem skul long samting Pol i mekim long stretim hevi i kamap namel long Yuodia na Sintike? (Filipai 4:1-3)

¹⁸ Skelim samting Pol i mekim bilong stretim hevi i kamap namel long tupela sista long kongrigesen long Filipai. (Ritim Filipai 4:1-3.) Yuodia na Sintike i no wanbel long wanpela samting, olsem na tupela i no moa stap olsem pren. Pol i no mekim hatpela pasin o skelim tupela; em i tingim gutpela pasin bilong ol. Dispela tupela sista i gat strongpela bilip na ol i mekim wok bilong Jehova inap longpela taim. Pol i save olsem Jehova i laikim tupela. Em i holim stretpela tingting long tupela, olsem na em i kirapim tupela long stretim hevi i kamap namel long ol. Pol i tingim gutpela pasin bilong ol narapela, olsem na dispela i helpim em long holimpas amamas bilong em na strongim pasin pren namel long em na ol narapela insait long kongrigesen.

19. (a) Hau ol elda inap holim stretpela tingting long ol wanbilip bilong ol? (b) Yu inap lainim wanem samting long piksa i soim wanpela elda i klinim Haus Kingdom?

¹⁹ Skul yumi kisim. Ol elda, lukim gutpela pasin  bilong ol bratasista bilong yu. Olgeta wan wan bilong ol i no gutpela olgeta. Maski i olsem, ol i gat ol gutpela pasin em yumi inap bihainim. (Fili. 2:3) Tru, sampela taim ol elda i mas stretim tingting bilong wanpela brata o sista. Tasol olsem Pol, ol elda i no ken tingim tumas ol pasin kranki na ol tok kranki bilong dispela brata o sista, nogat. Ol i ken tingim pasin bilong em long laikim Jehova na sanap strong na mekim wok bilong Em, na ol i ken tingim olsem em inap mekim ol gutpela wok. Ol elda em ol i save tingim ol gutpela pasin bilong ol narapela, ol i helpim ol bratasista insait long kongrigesen long pilim olsem ol i dia tumas.

20. Olsem wanem ol elda inap wok yet long kisim helpim long eksampel bilong Pol?

²⁰ Ol elda, yupela bai kisim helpim taim yupela i wok yet long stadi long eksampel bilong Pol. Olsem, yu ken ritim buk “Autim Gut Tru” Tok Bilong Kingdom Bilong God, sapta 12, paragraf 17-20, o Buk Bilong Baibel Namba 47—2 Korin, pes 23, paragraf 19. Taim yu ritim ol tok i stap long ol dispela pablikesen, askim yu yet, ‘Olsem wanem eksampel bilong Pol inap helpim mi long holimpas amamas bilong mi taim mi mekim wok elda?’

21. Ol elda i ken bilip tru long wanem samting?

²¹ Ol elda, tingim olsem Jehova i no askim yupela long kamap gutpela olgeta, nogat, em i askim yupela long mekim gut wok bilong yupela. (1 Kor. 4:2) Jehova i amamas long ol gutpela wok Pol i mekim na pasin bilong em long stap gut long wok bilong em. Yupela i ken bilip tru olsem God i amamas long ol gutpela wok bilong em yupela i mekim. Jehova bai i no inap tru long “lusim tingting long ol wok yupela i bin mekim na pasin bilong yupela long laikim tru nem bilong em. Yupela i bin helpim ol manmeri holi, na yupela i wok yet long mekim olsem.”—Hib. 6:10.