1, 2. ¿Andisï uaa jarhuataani iásï anapu orhejtsïkutichani apostoli Pablueri ejemplu?

 APOSTOLI Pablu kánikua xénchaasïreendi erachichani jimbosï xáni ánchikuarhiendi imeecha jimbo (Uku. 20:31). Ísï jimboksïsï xáni xéncheendi. Pori ejemplu, ma xanhari engaksï Éfesu anapu orhejtsïkuticha mítepka eskaksï nóteru méni exepiringia, ʻuéki jimboksï uerasptiʼ (Uku. 20:37). Májkueni, iásïjtuksï orhejtsïkuticha xénchaasïndi erachichani ka jánguarhintasïndiksï jarhuataani (Filip. 2:16, 17). Joperuksï ménichani úkua jukanchasïndi máru ambe úni. ¿Ambe uaa jarhuataani?

² Orhejtsïkuticha engaksï kánikua ánchikuarhita jatsika, uaatiksï májkueni úni eska Pablu (1 Kor. 11:1). Pablu no perfektuespti ka ménichani úkua jukanchasïreendi úni imani ambe enga sési jaka (Rom. 7:18-20). Nájkiruka uánikua uandanhiatechani jatsiapka, no méni chkétakuarhispti ka seguirispti tsípikua jingoni marhuani. Engaksï orhejtsïkuticha májkueni úska eska ima, uaatiksï tsípikua jingoni seguirini marhuakuni Tata Diosï Jeobani nájkirukaksï uandanhiatechani jatsiauaka. Ju je exeni nénaksï uaa ísï úni.

3. ¿Ambechi exeni jaua ini jorhenguarhikua jimbo, ka ambechi jorhenguarhia?

³ Ini jorhenguarhikua jimbo, tʼámu ambechi exeni jauaka enga no fásiliika paraksï orhejtsïkuticha úni: 1) tiempu jatsini para aianhpini ka ístu para máteru ambe úni, 2) sési kámpini, 3) orhepani uérakuni imani ambe engaksï no újka sési úni ka 4) tekaakuantani máteruechani engaksï no uaaka sési úni ambe ma. Jorhenguarhini jauakachi na enga apostoli Pablu orhepani uérakuapka ini  ambe ka na engaksï orhejtsïkuticha uaaka májkueni úni.

4. ¿Andiksïsï úpirini úkua jukanchani orhejtsïkuticha ambakiti ejemplu máeni aianhpikuarhu?

⁴ Andisï úkua jukajki. Orhejtsïkutichaksï jatsisïndi para aianhpini ka ístu para máteru ánchikuarhita ambe úni kúnguarhikuarhu. Ju je exeni máru ambe. Ménichanksï jatsisïndi para entre semana anapu tánguarhikuani orhejtsïkuni o Biblieri jorhenguarhikuani nitamatarani kúnguarhikuarhu. Ístuksï jatsisti para máteru ánchikuarhita ambe úni kúnguarhikuarhu o arhijtsïkperatechani nitamataraani. Ístuksï jorhendaasïndi orhejtsïkuticheri jarhuajpirichani ka uinhaperantaasïndiksï erachichani (1 Ped. 5:2). Máru orhejtsïkutichaksï konstruksionirhu ánchikuarhisïndi ka ístuksï jarhuajpesïndi para sési jájkuantani Kʼumanchikua Reinuerichani ka máteru kʼumanchikuechani engaksï úranhajka para kʼéri ambe arhini Tata Diosï Jeobani. Joperu sánderu jukaparhakua ambe, aianhpisïndiksï ambakiti aianhperakuani májkueni eska máteru aianhpiricha (Mat. 28:19, 20).

5. ¿Náki ambakiti ejemplujtsïni íntskuski apostoli Pablu?

⁵ Pablueri ejemplu. Filipusʌ 1:10 uandantasïndi andisï Pablu xáni ambakiti aianhpiri máepi. Ima uandaspti: “Para eskajtsï uaaka erakuni ambe enga sánderu ambakitika [o jukaparhakueni]”. Ka ima ísï úspti eska na uandapka. Pablu arhinhaspti eska aianhpipiringa ka inde ambe sánderu jukaparhakua ambeespti para ima. Jorhentpispti ‘tánguarhikuecharhu ka ístu kʼumanchikuecharhu’ (Uku. 20:20). No solu aianhpispti máru orecha jimbo o ma jurhiatikuajku ma semana jimbo. Sánderu sési, na enga jatini úpiringa. Ma xanhari enga imeeri kompanieruechani eroani japka Atenasi, aianguaspti ambakiti aianhperakueri ambe máru kʼuiripuechani engaksï kʼéri ambeepka ka sési nikuspti (Uku. 17:16, 17, 34). Asta jiáni enga ónhakuarhetini japka kʼumanchikuarhu ma jimbo, uandontskuarhekuaspti imeechani engaksï nireenga exeni (Uku. 28:16-24; Filip. 1:13, 14).

6. ¿Ambe jorhendaaspi Pablu máteru erachichani?

⁶ Pablu mítespti néna sési úrani tiempuni. Pʼindesptia pʼímarhiani máteruechani parakaksï imani jingoni nipiringa aianhpini. Pori ejemplu, enga primeru uelta nípka iauanisï aianhpini, Juanu Markusïni pʼímarhispti ka enga ménderu nípka, Timoteuni pʼímarhispti (Uku. 12:25; 16:1-4). Kánikua jánguarhintaspti para jorhendaani ini achamasïchani néna organisariuani kúnguarhikuechani, ambakiti orhejtsïkuticheni ka paraksï sési jorhentpini (1 Kor. 4:17).

7. ¿Nénaksï uaa orhejtsïkuticha májkueni úni eska Pablu ísï eska na arhijka Efesu 6:14, 15?

⁷ Ambe engachi jorhenguarhijka. Orhejtsïkutichaksï uaati májkueni úni eska Pablu engaksï no solu kʼumanchikuecharhu aianhpiaka, sino nani uéjkisï engaksï jámani jauaka (arhinta je Efesu 6:14, 15). Pori ejemplu, engaksï  niuaka piáni ambe ma o ánchikuarhitarhu. O engaksï jarhuajpeni jauaka organisasioniri konstruksioni ma jimbo, uaatiksï besinuechani uandontskuarhekuani o imeechani engajtsïni atarachintajka konstruksioniri ambe. Ka májkueni eska Pablu, orhejtsïkutichaksï uaati jorhendaani máteruechani engaksï imeecha jingoni aianhpini jámani jauaka, komu orhejtsïkuticheri jarhuajpirichani ka ísïksï sési úrani jauati imeecheri tiempuni.

8. Ménichani, ¿ambe uétarhisïni eska uaaka orhejtsïkuti ma?

⁸ Orhejtsïkutichaksï no méni jatsipirindi para méntku kúnguarhikuarhu anapu ambe úni jarhani o sirkuitueri anapu ambe, jimbokaksï nóteru pakaranchapirindia tiempu para aianhpini. Ménichantsï úpiringa no jiókuarhiani máru ánchikuarhita ambe engajtsï uéjka tiempu jatsini para máteru ambe úni. Jamberi engajtsï na kómarhiakia, úpiringajtsï exeni eska engajtsï jiókuarhiska ánchikuarhita ma, nóterujtsï úpiringia imani ambe enga sánderu jukaparhakueka, komu familieri jorhenguarhikua jatsini mándani semana, uérani aianhpini máteruecha jingoni o jarhuataani chaari uájpeechani sési aianhpini. Para máru, úkua jukasïndi no jiókuarhiani máru ánchikuarhitechani, perujtsï uaaka seguru jarhani eska Tata Diosï kurhangusïnga eskajtsï jimbosï ísï úni jaka jimbokajtsï uékasïnga iámu ambe sési úni.

9. Míteparini eskaksï orhejtsïkuticha uánikua úkua ambe jatsisïnga, ¿náki uandanhiatechaksï jatsiasïni?

⁹ Andisï úkua jukajki. Jimbokachi últimu jurhiatikuechani jimbo irekaxaka, Tata Diosï Jeobaeri marhuarichachi uánikua uandanhiatechani jatsiasïnga. Ísï jimbochisï uétarhinchajka eskajtsïni nema uinhaperantaaka, jarhuataaka ka sési pʼikuastantani. Ménichani, máruksï uétarhinchasïndi jarhuajperata paraksï no imani xanharu jimbo nirani enga no sési jaka (1 Tes. 5:14). Ísïisti, orhejtsïkutichajtsïni no uaati jarhuatani iámindu juchaari uandanhiatechani jingoni. Joperu Tata Diosï Jeoba uékasïndi eskaksï jánguarhintaaka para uinhaperantaani ka kuidariuani imeeri karichichani. Míteparini eskaksï orhejtsïkuticha uánikua úkua ambe jatsiska, ¿nénaksï uaa tiempu jatsini paraksï jarhuataani erachichani?

10. Eska na arhijka 1 Tesalonika 2:7, ¿néna kaaspi Pablu imeeri erachichani?

¹⁰ Pablueri ejemplu. Ima méntkisï exeni jarhasïreendi ambe enga jimbo úpirini sési arhiani erachichani ka uinhaperantaani. Orhejtsïkutichaksï uaati májkueni úni eska Pablu engaksï xénchperakua jingoni kaaska erachichani (arhinta je 1 Tesalonika 2:7). Pablu arhiaspti erachichani eska ima ka Tata Diosï Jeoba kánikua xénchaasïreenga (2 Kor. 2:4; Efes. 2:4, 5). Ísï kaasïreendi eska imeeri amiguechani ka imeecha jingoni jarhasïreendi. Xarhatakuasïreendi eska mintsikaasïreenga jimboka aianguasïreenga ambe enga uandanhiateenga ka ambe enga no ueenga sési úni (2 Kor. 7:5; 1 Tim. 1:15). Joperu ístu, no xáni pendienti pásïreendi imeeri uandanhiatechani jimbo, sánderu sési jarhuatasïreendi erachichani.

11. ¿Andisï Pablu konseju íntsaueni erachichani?

¹¹ Ménichani, Pablu jatsisïreendi para konseju íntsaani erachichani. Joperu no ísï úsïreendi jimboka  ikiani japiringa imeecha jingoni, sino jimboka uandanhiasïreenga imeechani jimbo ka uékasïreendi jarhuataani parakaksï no niárapiringa jatsiani uandanhiatechani. Pablu jánguarhintasïreendi parakaksï imeeri konsejuecha fásili kurhangukuarhipiringa ka parakaksï imeecha enga íntsauenga jiókuarhiapiringa. Pori ejemplu, enga Korintu anapuechani karakuapka, jurhimbitku arhiaspti máru ambe. Joperu tátsekua, Tituni axaspti jimboka uékaxapka míteni sinksï jiókuarhiaspi imani konsejuechani enga íntsaapka. ¡Ka Pablu kánikua tsípispti enga mítepka eskaksï ísï úspka eska na arhiapka! (2 Kor. 7:6, 7).

12. ¿Ambeksï uaa úni orhejtsïkuticha para uinhaperaantani erachichani?

¹² Ambe engachi jorhenguarhijka. Orhejtsïkutichaksï uaati májkueni úni eska Pablu engaksï arhutaska tiempu paraksï erachicha jingoni jarhani. Paraksï ísï úni, jatsistiksï para xarhentku niárani tánguarhikuecharhu paraksï uandontskuarheni erachicha jingoni ka uinhaperantaani. Ka no kánikua tiempu uétarhisïndi paraksï uinhaperantani erachini ma ka xarhatakuni eskaksï xénchasïnga (Rom. 1:12; Efes. 5:16). Orhejtsïkutichaksï májkueni úsïndi eska Pablu engaksï Bibliani úrajka para uinhaperantaani erachichani ka xarhatakuani eska Tata Diosï Jeoba xénchaasïnga. Ístu, orhejtsïkutichaksï xarhatakuasïndi xénchperakua engaksï uandajpaajka ka engaksï felisitariuajka ambe ma jimbo engaksï imeecha újka. Enga orhejtsïkuti ma jatsiaka para nemani konseju ma íntskuni, jatsisti para Tata Diosïri Karakatani úrani. Uétarhisïndi eska jurhimbitku uandontskuarhekuaka peru xénchperakua jingoni paraka erachi uaaka ambe enga ima arhiaka (Gal. 6:1).

13. ¿Néna úpirini pʼikuarherani orhejtsïkuti ma imani ambe jimbo enga no újka sési úni?

¹³ Andisï úkua jukajki. Ísï eska iámindu kʼuiripuecha, orhejtsïkutichajtuksï no perfektuesti jimboksïsï ménisï no sési újti ambe ma (Rom. 3:23). Kánikuaksï jánguarhintasïndi paraksï no sóntku chkétakuarhini imani ambe jimbo engaksï no újka sési úni. Ka jamberiksï máru chkétakuarhijti engaksï imantku ambe exeni jarhajka engaksï no újka úni. Ka máteruechaksï jamberi no no sési exejti na engaksï jásïika ka eratsenksï eskaksï no jatsiska para mójtakurhini.

14. Eska na arhijka 2 Korintu 4:7, ¿néna jarhuataspi kaxumbikua Pabluni para no chkétakuarhini imani ambe jingoni enga no ueenga sési úni?

¹⁴ Pablueri ejemplu. Kaxumbikua jingoni Pablu jiókuarhispti eska no úsïreenga jandiajku sési úni ambe ma. Mítespti eska uétarhinchasïreenga Tata Diosïri uinhapikuani. Ueenani no sési kaasïreendi kristianuechani. Peru niáraspti exeni eska no sési jarhaspka ambe enga úpka ka uékaspti mójtakukuarhini (1 Tim. 1:12-16). Tata Diosï Jeobaeri jarhuajperata jimbo, niáraspti orhejtsïkuti máeni enga sési kámpienga, pʼamojpienga ka kaxumbitini. No sési pʼikuarherasïreendi imani ambe jimbo enga no ueenga sési úni, peru enbesi  de méntku miántani jarhani ambe enga no sési ueenga, mintsikasïreendi eska Tata Diosï Jeoba puákuntapiringa (Rom. 7:21-25). Mítespti eska no perfektuespka. Ísï jimbo, jánguarhintaspti para sánderu ambakiti kʼuiripu máeni ka kaxumbikua jingoni jurajkuspti eska Tata Diosï Jeoba jarhuatapiringa para úni aianhpini (1 Kor. 9:27; arhinta je 2 Korintu 4:7).

15. ¿Ambe jarhuataa orhejtsïkutini ma para no jukari no sési pʼikuarherani imani ambe jimbo enga no újka sési úni?

¹⁵ Ambe engachi jorhenguarhijka. Erachichaksï no niárasïndi orhejtsïkutini jimbokaksï perfektueska, peru Tata Diosï Jeoba uékasïndi eskaksï exeaka ambe engaksï no újka sési úni ka eskaksï jánguarhintaaka ambakiti kristianu máeni (Efes. 4:23, 24). Jatsipirindiksï para Tata Diosïri Karakata jingoni exekuarhini na engaksï jásï kʼuiripu máeka ka mójtakuni ambe enga xáni uétarhiaka. Engaksï ísï uaaka Tata Diosï Jeoba jarhuatauati paraksï sési pʼikuarherani ka ístu parakaksï uaaka úni imeecheri ánchikuarhitani (Sant. 1:25).

16. ¿Ambe úpirini úkuarhini engaksï orhejtsïkuticha imantku ambe exeni japiringa engaksï erachicha no újka sési úni?

¹⁶ Andisï úkua jukajki. Engaksï orhejtsïkuticha erachicha jingoni ánchikuarhini jarhajka, úpirindiksï exeni ambe engaksï imeecha no újka sési úni. Ka engaksï no jingontku jámaska, inde ambe úpirindi no sési pʼikuastaani ka eskaksï uinhamarhikuauaka erachichani o eratsenksï eskaksï no ma ambe úsïnga sési úni. Pablu arhiaspti kristianuechani eska Satanasi meru indeni ambesï uéjka eska úkuarhiaka (2 Kor. 2:10, 11).

17. ¿Néna exeasïreni Pablu erachichani?

¹⁷ Pablueri ejemplu. Ima méntkisï ambakiti ambe eratsesïreendi erachicheri ambe. Mítespti ambe engaksï imeecha no sési ueenga jimboka ménichani ima ambe úsïreendi eska Pabluni no sési pʼikuarherapiringa. Joperu mítespti eska enga nema no sési ueenga ambe ma, no arhikuekasïreenga eska noambakiti kʼuiripu máespka. Xénchaasïreendi erachichani ka jánguarhintasïreendi imani ambe exeni engaksï sési ueenga. Ka enga exenga eska nema úkua jukanchasïreenga sési úni ambe ma joperu eska jánguarhintani jarhasïreenga, eratsesïreendi eska ambakiti kʼuiripu máespka ka eska solu uétarhinchasïreenga eska nema jarhuatapiringa.

18. ¿Ambechi jorhenguarhisïni na enga Pablu jarhuatapka Ebodiani ka Síntikeni? (Filipusʌ 4:1-3).

¹⁸ Ju je exeni na enga Pablu jarhuataapka tsimani pirenchichani engaksï Filipusï anapu kúnguarhikuarhu japka (arhinta je Filipusʌ 4:1-3). Péringa Ebodia ka Síntike nóteruksï sési pájperengia. Peru Pablu no xukaaspti, nijtu no sési eratsepi imeecheri ambe. Sánderu sési, exespti eskaksï ambakiti kualidadichani jatsiaspka ka eskaksï sési marhuakuxapka Tata Diosï Jeobani. Ístu mítespti eska Tata Diosï Jeoba xénchaasïreenga. Pablu ambakiti ambe eratsesïreendi inde pirenchicheri ambe, ísï jimbo arhiaspti eskaksï sési pájperantapiringa. Jimboka Pablu sési exeasïreenga erachichani inde ambe jarhuataspti paraka sési pʼikuarherapiringa ka paraka úpiringa  sési pájperani imani kúnguarhikuarhu anapu erachicha jingoni.

19. a) ¿Ambeksï uaa úni orhejtsïkuticha paraksï ambakiti ambe eratseni erachicheri ambe? b) ¿Ambejtsï jorhenguarhisïni fotueri enga orhejtsïkuti ma limpiarini jaka Kʼumanchikua Reinuerirhu?

¹⁹ Ambe engachi jorhenguarhijka. Orhejtsïkuticha, ambakiti kualidadichani exekua je erachichani. Ísïisti, imeechaksï no perfektueska, joperuksï ambakiti kualidadichani jatsiasti (Filip. 2:3). Ménichantsï jatsiaka para jurhimberantani nemani. Peru ísï eska Pablu, jánguarhinta je no imani ambe exeni enga ima erachi no újka sési úni. Sánderu sési exe je eska xénchasïnga Tata Diosï Jeobani ka eska tekaantskua jingoni marhuakuxaka ka eska uaaka ambakiti kʼuiripu máeni. Ima orhejtsïkuticha engaksï ambakiti ambe eratsejka erachicheri ambe, úsïndiksï eska sési pájperanhaaka ka xénchperanhani kúnguarhikuarhu.

20. ¿Ambeksï uaa úni orhejtsïkuticha paraksï seguirini jorhenguarhini Pablueri ejempluni?

²⁰ Kánikua marhuakuauati orhejtsïkutichani seguirini jorhenguarhini Pablueri ejempluni. Uaatiksï exeni arini informasioni “‘Kuájpikuarhi je chájkumindu, ka ístu Diosïri karichichani’” enga uéraka Programa tánguarhikueri Kristianuecheri Irekua ka Aianhpikua disiembriri de 2018 ka ístu rekuadruni “Bibliaeri ejemplu para erantsintani” enga uéraka Programa tánguarhikueri Kristianuecheri Irekua ka Aianhpikua oktubriri de 2018, pájina 8. Engaksï na jorhenguarhiauakia, uaatiksï kurhamarhikuarhini: “¿Nénarini jarhuataa Pablueri ejemplu parani seguirini tsípikua jingoni marhuani komueska orhejtsïkuti ma?”.

21. ¿Amberiksï uaa seguru jarhani orhejtsïkuticha?

²¹ Orhejtsïkuticha, miá je eska Tata Diosï Jeoba no erokuarhesïnga eskajtsï perfektueuaka, joperu uékasïndi eskajtsï sési marhuakuaka (1 Kor. 4:2). Ima kánikua jukaparharaspti ambe enga Pablu úpka ka na enga xáni sési marhuakupka. Chájtujtsï uaaka seguru jarhani eska Tata Diosï Jeoba jukaparharasïnga chaari ánchikuarhitani, jimboka eska na uandajka Ebreu 6:10, “ima no mirikurhiauati chaari úkuechani ka nijtu indeni ambe engajtsï úni jaka xarhataparini eskajtsï uékasïnga [Tata] Diosïni, jimbokajtsï jarhuataaska imeeri míndakatechani ka útasïjtsï jarhuataaxaka”.