1-2. Ngei muezaniso we muphostori Pauro ungabetsera akuru mazuwa ano?

 MUPHOSTORI Pauro waida maningi hama dzake. Iyena waiseenza maningi kuti adzionerere. (Zvi. 20:31) Ndiyo ndaa hama dze mu ungano dzaida maningi muphostori Pauro. Pa nguwa imweni, akuru e mu ungano yeku Efeso paakaziya kuti anga asikacazomuonizve “akacema maningi.” (Zvi. 20:37) Akuru e mu ungano mazuwa ano, akaitawo hingana muphostori Pauro. Awona anoda hama no hanzvadzi dze mu ungano uye anoseenza no simba kuti adzibetsere. (Afi. 2:16, 17) Asi nguwa dzimweni, akuru anosongana no zvinetso zvakakura. Asi cinyi cingaabetsera?

² Ciro cingaabetsera, ndi kuteedzera muezaniso wa muphostori Pauro. (1Ako. 11:1) Pauro wainga ari munhu usikazi kukwana hingana isusu. Nguwa dzimweni kuita zviro zvakanaka, zvaitomushuphira. (Aro. 7:18-20) Iyena wainga ano zvinetso zvakasiyana-siyana. Kunyazi zvakadaro, Pauro aazi kuruza mupfaro. Kana akuru akateedzera muezaniso wa Pauro, awona acakwanisa kukurira zvinesto zvawo uye acarumbwa eciseenzera Djehovha akapfara. Ngatione kuti angazviita kudini.

3. Ticaonei mu fundo ino?

³ Mu fundo ino, ticaona zvinetso zvirongomuna zvinobatana no akuru: (1) kubuda mu basa rekuparidzira kunyazi ano mabasa akawanda e kuita, (2) kugara aushi ano rudo, (3) kukwanisana nokusama kukwana kawo, uye (4) kukwanisana nokusama kukwana ke amweni. Ticaonawo kuti muphostori Pauro wakakunda kudini zvinetso izvi, uye akuru angateedzera kudini muezaniso wake.

4. Ngei zvecishuphira akuru nguwa dzimweni kuti atungamirire basa rekuparidzira?

⁴ Ngei izvona zvingaashuphira. Akuru anotungamirira basa rekuparidzira, asi awona ano mabasa amweni aanoita mu ungano. Ngo muezaniso, awona anotungamirira misangano ye pakati pe sumana uye anoitisa fundo ye Bhaibheri ye ungano. Awona anoitawo mharidzo ku anhu ese no matii amweni. Akuru anorowedza abati anoseenzera uye anopfara nge kuusha hama no hanzvadzi dze mu ungano. (1 Pe. 5:2) Akuru amweni anoseenza pa basa rekugadzirisa Nyumba dze Umambo no zviwakwa zvimweni zve sangano. Kunyazi zvakadaro, akuru ndiwona ari pamberi pa basa rekuparidzira hingana hama dzimweni dze mu ungano.—Mat. 28:19, 20.

5. Pauro wakapasa muezaniso upi paaiparidzira?

⁵ Muezaniso wa Pauro unotifundisei. Ciro caiita kuti Pauro abudirire pakuparidzira masoko anopfadza, tinocigumira pana Afiripi 1:10, paanotibvunza kuti: “Garai no cokwadi ce zviro zvinokosha.” Uye ndizvona kamare zvaiizwa na Pauro. Pauro wainga wakatambira basa rekuparidzira madzinza amweni, uye ke makore akawanda, izvi zvainga zviri zviro zvaikosha maningi mu upenyu wake. Iyena waiparidzira “kakadzara anhu uye pa nyumba no nyumba.” (Zvi. 20:20) Iyena wainga asikagumiri basi pakuparidza nguwa imwe ye zuwa kana kuti kamwe pa sumana. Pauro waikhorovhera mikana yese yaaiona kuti aparidzire! Ngo muezaniso, paaietsera adoni ake erhwendo ku Atena, iyena wakaparidzira anhu airikira uye wakaona migumisiro yakanaka. (Zvi. 17:16, 17, 34) Pauro wakaparidzira anhu paainga atori “mukaraboso.”—Afi. 1:13, 14; Zvi. 28:16-24.

6. Pauro wakafundisei?

⁶ Pauro waikhorovhera zvakanaka nguwa yake. Ngo Muezaniso, iyena waipika anhu amweni kuti aparidzire ese. Pa rhwendo rake rekutanga re umisionariyo, Pauro wakaenda na Juau Marko, uye pa rhwendo recipiri, wakaenda na Timoti. (Zvi. 12:25; 16:1-4) Zvezvirokwazvo Pauro waipeta masimba kuti arowedze anarume aya. Iyena wakaafundisa kuronga ungano, kuita basa rekuusha uye kugara afundisi akanaka e Soko ra Mwari.—1Ako. 4:17.

7. Akuru angateedzera kudini zvakarekethwa na Pauro zviri pana Aefeso 6:14, 15?

⁷ Zvatinofunda. Akuru anodikana kuteedzera muezaniso wa Pauro haiwa basi ngekuparidzira pa nyumba no nyumba, asi ngekugadzirira kuparidzira panguwa inondomuka mukana. (Erengai Aefeso 6:14, 15.) Ngo muezaniso, awona angaparidzira paanonga ecitenga zviro kana kuti paanonga eciseenza ku basa. Aya anoseenza pa zviwakwa zve sangano, angaparidzira aya anogara dhuze nokaarikuita basero kana kuti angaparidzira aya  anowapa zvaanodikana kuseenzesa pakuwaka. Hinga zvakaizwa na Pauro, akuru angatokhorovhera mukana waanonga eciparidzira kuti arowedze amweni kubatanidzawo abati anoseenzera.

8. Cinyi cinodikana kuizwa nge akuru nguwa dzimweni?

⁸ Akuru aadikani kubatikana maningi no mabasa e mu ungano kana kuti e munharaunda zvekuguma pakukonerhwa nguwa yekubuda mu basa rekuparidzira. Kuti mukuru akwanise kuita zviro zvese zvaanoda, iyena unodikana kuziya kuramba mabasa amweni aanopaswa. Mu masure mekunyasa kurangarira uye mekuita minamato, mukuru ungaguma pakuona kuti aakwanisi kuita zviro zvimweni. Iyena unodikana kurangarira zviro zvinokosha maningi zvakadai hingana kuita kunamata ke mhuri masumana ese, kuita basa rekuparidzira uye kurowedza ana ake kuti akwanise kuparidzira. Akuru amweni angakonerhwa kuramba mabasa amweni aanopaswa mu ungano, asi awona anodikana kugara no zvirokwazvo zvekuti Djehovha anozwisisa cido cawo cekugara no maonero ari pakati no pakati pa mabasa aanopaswa.

9. Akuru akawanda anosongana no zvinetso zvipi?

⁹ Ngei izvona zvingaashuphira. Anhu a Djehovha anosongana no zvinetso zvakawanda. Mu nguwa ino ye mazuwa e kupedzesera, isusu tese tinoda kubambiswa, kutsigirhwa uye kunyaradzwa. Nguwa dzimweni, isusu tinoda kubetserhwa kuti tisaite zviro zvakashata. (1 Ate. 5:14) Zvirokwazvo kuti akuru aangakwanisi kupedza matambudziko ese anobatana no hama no hanzvadzi. Kunyazi zvakadaro, Djehovha anoda kuti awona arumbwe ecidziirira uye ecibambisa mabira ake. No zviro zvese zvaanodikana kuita, akuru angawona kudini nguwa yekubambisa hama no hanzvadzi dzawo?

10. Maererano na 1 Atesaronika 2:7, Pauro wakaitei kuti acengete anhu a Djehovha?

¹⁰ Muezaniso wa Pauro unotifundisei. Pauro waisimba hama dzake nguwa dzese uye waikhorovhera mikana iri yese kuti aabambise. Akuru anoteedzera muezaniso uu we rudo uye anonyasa kubata zvakanaka hama dzawo. (Erengai 1 Atesaronika 2:7.) Pauro waipangidza pamhene kuti iyena waida maningi hama dzake uye kuti Djehovha aida maningi umwe na umwe wawo. (2 Ako. 2:4; Aef. 2:4, 5) Kuna Pauro, hama dze mu ungano dzainga dziri shamwari dzake uye waipedza nguwa yakareba ari pamwepo nawo. Iyena wainyasa kugonda no hama dzake, zvekuti wakaabvunza zviro zvaaithya uye zviro zvaainga asikakwanisi kuita. (2 Ako. 7:5; 1 Tim. 1:15) Pauro wainga asikakandi ndangariro dzake pamatambudziko aaisongana nawo. Pane kudaro, iyena waida kubetsera hama dzake.

11. Ngei Pauro wakapasa mazano hama dzake?

¹¹ Nguwa dzimweni, muphostori Pauro waidikana kupasa mazano hama no hanzvadzi. Asi iyena aipasapi mazano kuti athurudze shungu dzake. Iyena wakapasa mazano ngekuti waiada  uye waida kuadziirira pa ngozi dzakawanda. Iyena waiita zviri zvese kuti mazano ake agare nyore kuzwisisa, uye iyena wainetseka kuti hama dzaizotambira kudini mazano awona. Ngo muezaniso, pa imwe ye tsamba dzaakatarira Akorinti, Pauro wakapasa mazano anosimba. Asi mumasure me izvi, iyena wakatuma Tito kuti aende ku Korinti ngekuti waida kuziya kuti hama dzainga dzakatambira kudini tsamba iyona. Zvezvirokwazvo, iyena wakapfara ngekuziya kuti hama dzainga dzakatambira mazano aakaapasa!—2 Ako. 7:6, 7.

12. Akuru angabambisa kudini hama dze mu ungano?

¹² Zvatinofunda. Akuru angateedzera muezaniso we muphostori Pauro ngekupedza nguwa yakareba pamwepo no hama uye hanzvadzi dze mu ungano. Umwe we mushobo waangazviita, ngewekukasika kuguma ku misangano kuti akwanise kucedza nawo. Kuti mubambise hama no hanzvadzi dzenyu amudikani henyu kutora nguwa yakareba, ngekuti mungazviita kunyazi pazvimiseswa zvinganani. (Aro. 1:12; Aef. 5:16) Akuru angateedzerawo muezaniso wa Pauro ngekuseenzesa Bhaibheri kuti abambise kutenda ke hama no hanzvadzi dze mu ungano, kupangidza kuti Djehovha anoda maningi umwe na umwe we hama idzi. Akuru anocedza no hama nguwa dzese uye anokhorovhera mikana iri yese kuti aasimbe. Pese panodikana kupaswa mazano, akuru anozviita eciseenzesa Bhaibheri. Awona anopasa mazano akananga, asi anozviita nge mushobo wakanaka ngekuti anonetseka kuti hamedzo dzicatambira kudini mazano awona.—Aga. 6:1.

13. Akuru amweni angaona kudini kusama kukwana kawo?

¹³ Ngei izvona zvingaashuphira. Akuru ndi anhu asikazi kukwana. Awona anoshaishawo hingana tese isusu. (Aro. 3:23) Nge ndaa yazvo, amweni awo angakonerhwa kugara no maonero ari pakati no pakati. Ngo muezaniso, amweni awo anorangarira maningi nge zve zvishaishi zvawo zvekutoguma pakuora mwoyo. Amweni anoona hingana kuti zvishashi zvawo azvizi kunyanya kushata uye awona aaiti cinjo.

14. Maererano na Afiripi 4:13, kudzidzosa kakabetsera kudini Pauro kuti akwanisane no kusama kukwana kake?

¹⁴ Muezaniso wa Pauro unotifundisei. Pauro waidzidodosa uye waiziya kuti wainga asikazokwanisi kurhwisana nokusama kukwana kake ega. Iyena waiziya kuti waida kubetserhwa na Mwari. Kareko, Pauro waitambudza Akristu eciyaitira utsinye. Asi iyena wakakwanisa kuona kuti waishaisha uye wakacinyuka ocinja unhu wake. (1 Tim. 1:12-16) No rubetso ra Djehovha, Pauro wakagara muushi unodzidodosa, uno rudo uye uno mwoyo unononoka kutsamwa. Pauro waiziya kuti iyena wainga ari munhu unoshaisha, asi aazi kurumbwa  ecirangarira izvona. Pane kudaro, iyena waigonda kuti Djehovha aizomurekerera. (Aro. 7:21-25) Iyena waiziya kuti wainga asikazokwanisi kugara museenzi wa Djehovha wakakwana. Kunyazi zvakadaro, iyena waiseenza no simba kuti asakurire mawara eciKristu, uye ecidzidodosa, wakagonda no rubetso ra Djehovha kuti aite basa rake.—1Ako. 9:27; erengai Afiripi 4:13.

15. Akuru anodikana kuona kudini zvishaishi zvawo?

¹⁵ Zvatinofunda. Akuru aagadzwi ngekuti ndi anhu akakwana. Asi Djehovha anoda kuti akuru atendere zvishaishi zvawo uye kuti asakurire mawara eciKristu. (Aef. 4:23, 24) Akuru anodikana kufunda Bhaibheri kuti aone kuti ndipapi paanodikana kugadzirisa. Kana akaita kudaro, awona acapfara uye Djehovha acaabetsera kuti agare akuru akanaka.—Tg. 1:25.

16. Cinyi cingaitika kana akuru akakanda ndangariro dzawo pa zvishaishi zve hama no hanzvadzi dzawo?

¹⁶ Ngei izvona zvingaashuphira. Akuru paanopedza nguwa yakareba no hama dze mu ungano, zvinoaitira nyore kuti aone zvishaishi zvawo. Kana akasama kungwarira, izvona zvicaita kuti awona agumbuke, aashore uye aabate zvisikazi kunaka. Hingana zvakarekethwa ndi muphostori Pauro, ndizvona zvinodiwa na Sathani kuti zviitike.—2 Ako. 2:10, 11.

17. Pauro waiona kudini hama no hanzvadzi dzake?

¹⁷ Muezaniso wa Pauro unotifundisei. Iyena waikanda ndangariro dzake pa zviro zvakanaka zvaiizwa no hama no hanzvadzi dzake. Pauro waikwanisa kuona zvishaishi zve hama no hanzvadzi, zvekuti nguwa dzimweni zvishaishi izvona zvaitomubata-batawo. Kunyazi zvakadaro Pauro waiziya kuti, munhu akashaisha, azvirei kuti iyena waamunhu wakashata. Iyena waida hama dzake uye waiona unhu wawo. Hama payaikonerhwa kuita zviro zvakanaka, iyena wainga asikaishori ecirangarira kuti yaita izvona ngekuda. Iyena wairangarira kuti hama dzaida kuita zviro zvakanaka asi dzaida rubetso.

18. Mafundei pamabetsere akaita Pauro Ivhodhia na Sindiki? (Afiripi 4:1-3)

¹⁸ Ngo muezaniso, onai kuti Pauro wakabetsera kudini hanzvadzi mbiri dze ungano ye Firipo. (Erengai Afiripi 4:1-3.) Ivhodhia na Sindiki akareketedzana uye ushamwari wawo wakapera. Pauro aazi kuitira hasha kana kutongesa hanzvadzi idzi. Iyena wakakanda ndangariro dzake pa zviro zvakanaka zvaiita. Hanzvadzi mbiri idzi dzainga dzaano makore akawanda dzeciseenzera Djehovha. Pauro waiziya kuti Djehovha aiyada maningi, uye maonero aya akanaka akaita kuti Pauro akohomedzese hanzvadzi idzi kuti dzigare murunyararo. Kuona zviro zvakanaka zvinoizwa no amweni, kakabetsera Pauro kuti arumbwe ecipfara uye agare no ushamwari wakanaka no hama dze mu ungano.

19. (a) Akuru angateedzera kudini Pauro? (b) Mungafundei kubva pamufanikiso unopangidza mukuru ecicenesa Nyumba ye Umambo?

¹⁹ Zvatinofunda. Akuru, ringisai mawara akanaka  ano hama no hanzvadzi dzenyu. Tese isusu tiri anhu asikazi kukwana. Kunyazi zvakadaro, umwe na umwe we hama dzedu ano unhu watingada kuteedzera. (Afi. 2:3) Zvirokwazvo kuti nguwa dzimweni akuru anodikana kupasa mazano hama dzimweni dze mu ungano. Asi hingana zvakaizwa na Pauro, awona anodikana kuseenza no simba kuti asaringise zvinoizwa nge hama no hanzvadzi zvingaita kuti agumbuke. Pane kudaro, ringisai pakuda kaanoita Djehovha, pakushingirira kaanoita uye pazviro zvaanokwanisa kuita. Akuru paanogara no maonero akanaka, ungano inogara mbuto yakacengeteka inoita kuti munhu wese azwe kuti unodiwa.

20. Akuru angarumbwa kudini ecibetsereka no muezaniso wa Pauro?

²⁰ Akuru angabetsereka maningi kana akarumbwa ecifunda muezaniso wa Pauro. Ngo muezaniso, mu Índice das Publicações da Torre de Vigia, imwimwi mucagumira masoko akawanda nge zva Pauro. Psvakai pakazwi “Paulo” pedzepo endai pakazwi “exemplo para os anciãos.” Mungadzibvunzisa mubvunzo unoteera pamunonga mecifunda nge zva Pauro: ‘Muezaniso wa Pauro ungandibetsera kudini kuti ndirumbwe ndecipfara pa basa rangu hingana mukuru?’

21. Akuru angagara no cokwadi cipi?

²¹ Akuru, edzurirai kuti Djehovha aaripi kumukumbira kuti mugare anhu akakwana, asi anoda kuti imwimwi mugare anhu akagondeka. (1Ako. 4:2) Pauro wakaseenza maningi uye wainga akagondeka, ndiyo ndaa Djehovha aimukoshesa maningi. Imwimwi mungagondawo kuti Djehovha anokoshesa maningi zviro zvamunomuitira. Djehovha aazombokanganwi “mabasa enyu, uye rudo ramakapangidzira zina rake ngekuseenzera acena uye ngekurumbwa meciaseenzera.”—Ahe. 6:10.