1, 2. Павел элчинниң чижээ удуртукчуларга чүзү-биле ажыктыгыл?

 ПАВЕЛ элчин бүзүрээн акы-угбаларынга сеткилиниң ханызындан ынак турган болгаш, олар дээш могаг-шылаг чок ажылдап турган (Аж.-ч. 20:31). Ынчангаш олар база аңаа эрге-чассыг ынак турган. Чижээ, Эфестиң удуртукчуларын сактып кээлиңер. Павелди сөөлгү катап көрүп турарын билип кааш, олар ыглажы берген (Аж.-ч. 20:37). Амгы үеде хуралдың удуртукчулары база кады бүзүрээн ха-дуңмазынга дыка ынак. Ынчангаш олар дээш үезин болгаш күжүн харамнанмайн турар (Флп. 2:16, 17). Ынчалза-даа боттарының хүлээлгелерин күүседири оларга чамдыкта белен эвес. Ынчангаш бо статьяны оларга белеткээн.

² Бистиң бодун хайыралавас удуртукчуларывыс Павелдиң үлегеринден хөй чүүлге өөренип ап болур (1 Кор. 11:1). Павел кандыг-бир күчүтен мөге турган бе? Чок, ол бөдүүн, бачыттыг кижи чораан. Ол, шупту улус ышкаш, частырыгларны кылып турган (Рим. 7:18—20). Ооң чуртталгазы белен эвес турган-даа болза, ол өөрүшкүзүн чидирбейн, дүжүп бербес чораан. Павелдиң чижээ удуртукчуларга бергелерни ажып эртеринге база Иеговага өөрүшкүлүг бараалгаарынга дузалаар. Ам ону тодаргай көрээлиңер.

3. Бо статьядан чүнү билип алыр бис база ол биске чүзү-биле ажыктыг боор?

³ Бо статьяга удуртукчуларга: 1) суртаал ажылын ара кагбайн, боттарының хүлээлгелерин күүседири, 2) сагыш човангыр кадарчылар болуру, 3) боттарының бачыттыг бүдүжүнге шын хамаарылгалыг болуру база 4) өскелерниң четпес талаларынче шын көрүштүг болуру чүге берге бооп турарын көөр бис. Павел база ындыг бергелерге таваржып чораан. Ол оларны канчаар ажып эртип турганын база удуртукчулар оон чүнү өөренип ап болурун ам көрүптээлиңер.

4. Удуртукчуларга суртаал ажылын бирги черге салыры чүге берге бооп болур?

⁴ Ону кылыры чүге берге? Удуртукчуларның ха-дуңмага суртаал ажылынга үлегер көргүзеринден аңгыда, оон-даа өске хүлээлгелери хөй. Чижээ, олар ажыл хүннеринде болур ужуражылганың чарлакчылары бооп, «Чыышка Библияны өөренири» деп пунктуну эрттирип азы программаның өске-даа кезектеринде киржип турар. Оон аңгыда, олар хуралдың дузалакчыларын кызып өөредип, акы-угбаларга кичээнгейни көргүзүп турар (1 Пет. 5:2). Чамдык удуртукчулар тудуг ажылынга азы Хурал залдарын база организациявыстың өске-даа оран-саваларын септээр болгаш хандырар ажылдарынга киржип турар. Ындыг-даа болза, удуртукчулар бис дег бир дугаарында суртаал ажылынга идепкейлиг киржип чоруур (Мф. 28:19, 20).

5. Павел суртаалчы кылдыр кандыг үлегер арттырган?

⁵ Павелдиң үлегери. Чүнүң ачызында Павел чедиишкинниг суртаалчы турган? Ол филипчилерге чагаазынга: «Боттарыңарга эң эки чүүлдү билип ап [чоруңар]» — деп бижээн (Флп. 1:10). Павел ону өскелерге анаа-ла сүмелеп турбаан, а боду аңаа дүүштүр чурттап чораан. Суртаал ажылы аңаа эң-не чугула деп, ол ажыл-херээ-биле көргүзүп турган. Павел он-он чылдар дургузунда «хөй улус мурнунга база бажыңнар кезип», улусту өөредип чораан (Аж.-ч. 20:20). Ол ышкаш Павел элчин хүннүң кайы-бир шагында азы неделяда чаңгыс катап эвес, а арга тыптып кээрге-ле, суртаалдап турган. Чижээ, Павел элчин Афины хоорайга Сила биле Тимофейни манап тургаш, улуг эргелиг улуска өөрүшкүлүг медээни чугаалаан. Безин оларның чамдыызы христианнар апарган (Аж.-ч. 17:16, 17, 34). Ол хоругдалга безин, суртаалдаарын соксатпаан (Аж.-ч. 28:16—24; Флп. 1:13, 14).

6. Павел өскелерни чүү чүвеге өөредип турган?

⁶ Павел үезин шын ажыглап турган. Солун чүүл, ол бирги миссионер аян-чоруунче Маркты, а ийиги аян-чоруунче Тимофейни эдертип алган (Аж.-ч. 12:25; 16:1—4). Чугаажок, Павел олар-биле кады үени халас эрттирбейн, оларга чыыштарны канчаар тургузарын, кадарчы ажылды канчаар кылырын тайылбырлап, башкылаар арга-мергежилин сайзырадырынга дузалаан (1 Кор. 4:17).

7. Эфесчилерге 6:14, 15-те Павелдиң сөстерин удуртукчулар канчаар эдерип болур?

⁷ Кичээл. Павелди удуртукчулар канчаар өттүнүп болур? Олар чүгле бажыңнар кезип эвес, а арга тыптып кээрге-ле, чижээ, садыгга азы ажылдаар черинге суртаалдаарынга белен. (Номчуптуңар: Эфесчилерге 6:14, 15.) Хурал залдарын тударынга киржип тургаш безин, оларның кожаларынга болгаш  хандырыкчыларынга суртаалдаар аргазы бар. Павелди өттүнүп, удуртукчулар хуралдың дузалакчылары болгаш өске-даа улус-биле суртаалдап чорааш, оларны өөредип болур.

8. Удуртукчулар чамдыкта чүнү кылыр апаар?

⁸ Удуртукчуларның чыышка азы кожуунга хөй хүлээлгелери тыптып кээр болза, оларның суртаалдаар үези артпайн баар. Ынчап кээрге, олар чамдык байдалдарда чок деп чугаалап өөренир ужурлуг. Чижээ, бир удуртукчуга немей хүлээлгелерни алырын сүмелеп турар. Ынчалза-даа ол Иеговага мөргүп, эки бодангаш, бир эвес ол аңаа чөпшээрежир болза, оон-даа чугула ажыл-херектерге үези артпайн баар деп түңнелге кээп болур. Чижээ, ол неделя санында өг-бүле мөгейиишкинин эрттирип, суртаалга доктаамал киржип база ажы-төлүн олче ап шыдавас апаар. Эргим акылар, немелде хүлээлгелерден ойталаары силерге белен эвес бооп болур. Ынчалза-даа Иегова силерниң чуртталгаңарга эң чугула чүүлдерни бирги черге салыр дээн күзелиңерни албан йөрээр деп чигзинмеңер.

9. Чайы чок болганындан удуртукчуларга чүнү кылыры берге?

⁹ Ону кылыры чүге берге? Иегованың бараалгакчыларының чуртталгазында эвээш эвес бергелер бар. Бо сөөлгү хүннерде бистиң шуптувуска деткимче, аргалал болгаш чылыг-чымчак, сорук кириишкинниг сөстер херек. А чамдык улусту бачыттан оваарындырар апаар (1 Фес. 5:14). Ийе, удуртукчулар Бурганның чонунуң таваржып турар бергелериниң шуптузун чайладып шыдавас. Ынчалза-даа Иегова олардан Ооң хойларын шыдаар шаа-биле деткип база камгалаарын манап турар. Удуртукчулар чеже-даа чай чок болза, ону кылыр үени кайыын тып ап болур?

10. Павел акы-угбаларның дугайында канчаар сагыш човап чораан? (1 Фессалоникчилерге 2:6—7).

¹⁰ Павелдиң үлегери. Павел акы-угбаларны үргүлчү мактап, хей-аъдын көдүрер сөстерни чугаалап чораан. Удуртукчу акылар база кады бүзүрээн ха-дуңмазынга шак ындыг ынакшылдыг хамаарылгалыг боорун кызып турар. (Номчуптуңар: 1 Фессалоникчилерге 2:6—7.) Павел акы-угбаларны бодунуң ынакшылынга база, эң чугула чүүл, Иегованың ынакшылынга бүзүредип чораан (2 Кор. 2:4; Эф. 2:4, 5). Ол оларның өңнүү бооп, кады үени эрттирип турган. Оон ыңай ол акы-угбаларга бодунуң коргуштарын болгаш четпестерин ажыы-биле чугаалап чораан. Оозун бодаарга, ол оларга бүзүреп турган (2 Кор. 7:5; 1 Тим. 1:15). Ындыг-даа болза, Павел бодунуң бергелерин оларга чүдүрбейн турган. Ол бир дугаарында акы-угбаларга дузалажыксап чораан.

11. Павел чамдыкта акы-угбаларның частырыгларынче чүге айтып турган?

¹¹ Чамдыкта Павел акы-угбаларның частырыгларынче айтып турган. Ынчалза-даа ол  ону хорадап тургаш кылбайн турган. А харын-даа олар дээш сагыш човап, оларны аңгы-аңгы айыылдардан камгалаар дээш кызып турган. Ол сүмелерни хүлээп аары белен база кымның-даа сеткилин хомудатпас кылдыр бээр турган. Чижээ, коринфичилерге чагаазынга Павел акы-угбаларны шыңгыы чемелээн. Олар аңаа кандыг хамаарылгалыг боор ирги дээш, ол сагыш човааш, Коринфиже Титти чорудупкан. Өөрүнчүг чүүл, коринфичилер ооң сүмезин шын хүлээп аарга, Павел дыка амыраан (2 Кор. 7:6, 7).

12. Удуртукчулар акы-угбаларның бүзүрелин канчаар быжыктырып турар?

¹² Кичээл. Хуралдың удуртукчузу акы-угбалар-биле үени эрттирип, чылыг-чымчак хөөрежир болза, ол Павелдиң чижээн өттүнер боор. Ынчангаш ол чыыштарже эртежик кээр болза эки. Кижини деткиир дизе, хөй үе-даа херек чок, каш минут-даа чедер (Рим. 1:12; Эф. 5:16). Павелдиң үлегерин өттүнүксеп чоруур удуртукчу оон ыңай чүнү кылып турар? Ол акы-угбаларның бүзүрелин Библияның дузазы-биле быжыктырып, оларны Бурганның ынакшылынга бүзүредип турар. Оон ыңай ол оларга ынакшылын көргүзүп, оларның-биле үргүлчү аралажып, оларны мактаар аргаларны эрттирбейн чоруур. А бир эвес ол кады бүзүрээн акызын азы угбазын эдип-чазаар апарза, Бурганның Сөзүнге даянып турар. Ол частырыгже дорт айтып турар-даа болза, эптиг-чымчаа-биле чугааланырын кызар. Чүге дээрге ол сөстери-биле кымның-даа сеткилин балыгладыксавайн турар (Гал. 6:1).

13. Чамдык удуртукчулар бачыттыг бүдүжүнге кандыг хамаарылгалыг?

¹³ Ону кылыры чүге берге? Удуртукчулар, бис ышкаш, бачыттыг болгаш, частырыгларны кылып чоруур (Рим. 3:23). Чамдыкта оларга боттарының четпес талаларынга шын көрүштүг боору берге. Чамдык улус бичии-ле частырыг кылыпкаш, боттарын буруудадып, чөгенчиг кылдыр бодаар. А өскелер бодунуң четпес талаларын херекке албайн, эттинеринче далашпас боор.

14. Биче сеткил Павелге бодунуң кошкак талаларынга шын хамаарылгалыг болурунга канчаар дузалаан? (Филипчилерге 4:13).

¹⁴ Павелдиң үлегери. Павел кошкак талалары-биле чааскаан демисежип шыдавазын биче сеткилдии-биле миннип чораан. Аңаа Иегованың дузазы дыка херек деп, ол билип турган. Эрткен үеде Павел христианнарны каржызы-биле истеп сүрүп, аажы-чаңы дедир кижи чораан. Ынчалза-даа соонда ол шын эвес алдынып чораанын билгеш, долузу-биле эттинип алгаш, көңгүс өске кижи апарган (1 Тим. 1:12—16). Иегова аңаа ынакшылдыг, биче сеткилдиг болгаш кээргээчел  удуртукчу апаарынга дузалаан. Павел эрткен үеде кылып чораан частырыгларын сактып келгеш, муңгараанындан ыы-сыызы кээр турган. Ынчалза-даа ол частырыгларын коптарып турбайн, Иегова өршээптер деп сеткилинден бүзүреп турган (Рим. 7:21—25). Павел бодундан тергиин чорукту манавас чораан. Ынчалза-даа ол Иисусту бар шаа-биле өттүнер дээш, эки талаже эттинерин кызып, Иегова аңаа бараалгаарынга дузалаар кылдыр биче сеткилдии-биле дилеп турган (1 Кор. 9:27; номчуптуңар: Филипчилерге 4:13).

15. Удуртукчулар боттарының кошкак талаларынга кандыг хамаарылгалыг боор ужурлуг?

¹⁵ Кичээл. Акывысты удуртукчу кылдыр томуйлап каарга-даа, ол дөмей-ле тергиин апарбас. Ынчангаш ол бодунуң частырыгларын миннип, Иисус Христостуң үлегерин кызып өттүнер кылдыр, Иегова оон манап турар (Эф. 4:23, 24). Удуртукчу Библияны ханы шинчилеп тургаш, бодунуң кошкак талаларын билип алгаш, ону эдер ужурлуг. Ынчан Иегова аңаа аас-кежиктиг болурунга база хүлээлгелерин оон-даа эки кылдыр күүседиринге дузалаар (Иак. 1:25).

16. Бир эвес удуртукчу өске улустуң четпес талаларынче кичээнгей салыр болза, чүү бооп болур?

¹⁶ Ону кылыры чүге берге? Удуртукчулар бүзүрээн ха-дуңмазы-биле хөй аралашкан тудум, оларның четпес талаларын оон-даа эки эскерип эгелээр. Ынчан бодун туттунуп шыдавайн, акы-угбаларга багай чүүлдү чугаалап азы безин оларны шүгүмчүлеп эгелээр айыыл бар. Ынчалза-даа удуртукчулар ынчаар алдынмас ужурлуг. Оларның ындыг болурун херек кырында Эрлик күзеп турар деп, Павел элчин сагындырган (2 Кор. 2:10, 11).

17. Акы-угбаларга Павел кандыг хамаарылгалыг турган?

¹⁷ Павелдиң үлегери. Павел акы-угбаларның эки талаларын эскерерин кызып чораан. Ийе, олар частырыгларны кылыптар турган. Безин оларның частырыглары ооң сеткилин хомудадып турган. Ынчалза-даа Павел бак ажыл-херек биле бак кижи дээрге ийи аңгы чүүл-дүр деп билип турган. Ол акы-угбаларга ынак бооп, оларның эки шынарларын үнелеп чораан. Олар чеже-даа шын эвес кылдыр алдынза, олар ону кара сагыш-биле кылбаан база оларга дуза херек деп, Павел бүзүреп турган.

18. Павелдиң Эводия биле Синтихияга дузалаанындан чүнү өөренип ап болур? (Филипчилерге 4:1—3).

¹⁸ Филиппы хоорайда ийи угбайга Павелдиң канчаар дузалаанын сактып кээлиңер. (Номчуптуңар: Филипчилерге 4:1—3.) Эводия биле Синтихия аразында маргыжып алган. Оларны кончуп, кажан-даа эттинип шыдавас деп бодаарының орнунга, Павел оларның чараш шынарларынче кичээнгей салган. Ол шынчы угбалар Бурганга бараалгалга дыка хөйнү кылып чораан. Иегова оларга дыка ынак деп, Павел билир турган.  Эки хөөн аңаа канчаар дузалаан? Бирээде, Павел Эводия биле Синтихияны эптежип аарынче оттурган. Ийиде, ол өөрүшкүзүн чидирбейн, ол чыыштан акы-угбалар-биле найыралдыг арткан.

19. а) Удуртукчуларга акы-угбаларның чараш шынарларын эскереринге чүү дузалаар? б) Чурукта Хурал залын аштап турар удуртукчунуң чижээнден чүнү өөренип ап тур силер?

¹⁹ Кичээл. Удуртукчулар, акы-угбаларның чараш шынарларын эскериңер. Бис шуптувус тергиин эвес-даа болзувусса, дөмей-ле кижи бүрүзүнде эки шынарлар бар (Флп. 2:3). Ийе, удуртукчулар чамдыкта өскелерни эдип-чазаар апаар. Ынчалза-даа, Павел дег, олар акы-угбаларның доңгун сөстеринче азы частырыгларынче хөй кичээнгей салбайн турар. Чүге дээрге акы-угбаларның Иеговага ынакшылы, Аңаа бердинген бараан болуушкуну болгаш кайы хире эки кижи апарып болуру оон-даа чугула бооп турар. Удуртукчулар акы-угбаларның эки талаларын эскерип турар болза, чыышка, өг-бүледе ышкаш, чылыг-чымчак байдал тергиидээр.

20. Удуртукчулар Павелдиң үлегерин янзы-бүрү талалардан канчаар шинчилеп болур?

²⁰ Удуртукчулар, Павелдиң үлегерин янзы-бүрү талалардан шинчилээрин сүмелеп тур бис. Аңаа силерге «Индекс публикаций Сторожевой башни» (Павел > Пример для старейшин) деп дептер дузалаар. Ону шинчилеп тургаш, бодуңардан: «Павелдиң чижээ меңээ өөрүшкүнү чидирбейн, удуртукчунуң хүлээлгелерин күүседиринге канчаар дузалаар?» деп айтырыңар.

21. Удуртукчулар чүү чүвеге бүзүреп болур?

²¹ Удуртукчулар, Иегова силерден тергиин болурун негевейн турар-даа болза, шынчы болуруңарны манап турар деп утпаңар (1 Кор. 4:2). Бурган Павелдиң кылган ажыл-херээн болгаш шынчы чоруун бедик үнелеп чораан. Иегова силерниң Аңаа кылып чоруур ажыл-херээңерни база үнелеп, ол дээш силерге өөрүп четтирип турар деп чигзинмеңер. Иегова «эрткен болгаш амгы үеде Ооң улузунга бараан бооп тура, кылган ажыл-херээңерни база Аңаа көргүскен ынакшылыңарны» кажан-даа утпас (Евр. 6:10).