1, 2. ¿Bin-utʼil ya xjuʼ ya xkoltayotik te ancianoetik te ejemplo yuʼun te Pablo?

 TE JPUK-KʼOP Pablo kʼux ta yoʼtan te yermanotak, jaʼ yuʼun maba kejchaj ta yakʼtiklanbeyel koltayel (Hech. 20:31). Jaʼ yuʼun kʼux aʼiybil yuʼun te yermanotak. Ta jun buelta kʼalal te ancianoetik ta Éfeso la snaʼik stojol te maʼyuk bin-ora ya xbajt yilikix, «bayel oqʼuic» yuʼun (Hech. 20:37). Jaʼnix jich ta kʼajkʼal ini te ancianoetik kʼux ta yoʼtanik te yermanotak sok maba ya xkejchajik ta yakʼel koltayel (Filip. 2:16, 17). Pero aynix baeltik te ya sitintayik wokoliletik. ¿Bin ya xjuʼ ya xkoltayotik?

² Te ancianoetik bayal bin ay ta swentaik spasel, lek teme ya snopbeyik te ejemplo yuʼun te Pablo (1 Cor. 11:1). Jaʼnix jich jmulawil winik-euk te aynix la spas tulan yuʼun jaʼ la spas te bin leke (Rom. 7:18-20). Manchukme la sitintay wokoliletik maba chebaj yoʼtan ni jaʼuk la schʼay te stseʼelil yoʼtan. Te ancianoetik teme ya snopbeyik te ejemplo yuʼun, tseʼel yoʼtanik ya x-abatinik ta stojol te Jehová manchukme ya sitintayik wokoliletik. Kiltik te bin-utʼil ya xjuʼ ya spasike.

3. ¿Bin ya kilbeytik skʼoplal ta artículo ini sok bin ya yakʼ jnoptik?

³ Ta artículo ini ya kiltik chanchajp te bin ya sitintayik te ancianoetik. Sbabial, tsajtaybiluk ya yilik te bin ay ta swentaik spasel sok te scholel skʼop Dios. Schebal, ayuk skʼuxul yoʼtanik. Yoxebal, manchuk ya xchebaj yoʼtanik teme ay bin wokol ya yaʼiyik spasel. Schanebal, ma jaʼuk ya xbajt ta yoʼtanik te banti ya xchʼay te yantik. Ya jnoptik bael bin-utʼil la sitintay te jujun wokolil te Pablo sok bin-utʼil te ancianoetik ya stʼunbeyik te ejemplo yuʼune.

4. ¿Bin yuʼun wokol ya yaʼiyik te ancianoetik te jaʼik ejemplo ta scholel skʼop Dios?

⁴ ¿Bin yuʼun te wokole? Te ancianoetik bayal bin ay ta swentaik spasel sok jaʼik ejemplo ta scholel skʼop Dios. Kiltik cheʼoxebuk.  Ay ya spasik presidir ta tsoblej yuʼun olil semana o ya skʼasesik te Snopel skʼop Dios ta congregación. Jaʼnix jich ay ta swentaik yantik asignacionetik o discursoetik sok ya slokʼesik tiempo ta spʼijubtesel te siervo ministerialetik soknix ya yakʼbeyik smukʼul yoʼtan te hermanoetik (1 Ped. 5:2). Ay chaʼoxtul ancianoetik ya xkoltaywanik ta construcción, ta slekubtesel te sNail Tsoblejetik sok yantikxan naetik te ya xtuun swenta ya kichʼtik ta mukʼ te Jehová. Pero te bin mukʼxan skʼoplal ya skʼan ya yilik te ancianoetik jaʼ te scholel skʼop Dios, jich bitʼil ya spasik te yantik publicadoretik (Mat. 28:19, 20).

5. ¿Bin ejemplo la yakʼ jilel te jpuk-kʼop Pablo ta swenta te scholel skʼop Dios?

⁵ Te ejemplo yuʼun te Pablo. Ta Filipenses 1:10 ya jtatik bin yuʼun te Pablo jaʼ bajt ta yoʼtan te scholel skʼop Dios sok jich la yal te mantalil ini: «Scuenta yuʼun hich yac atsahic a te bin lec [o te bintik tulanik skʼoplal, TNM]». La spas ta skuxlejal te mantalil la yale. La yichʼ akʼbeyel te aʼtelil te scholel skʼop Dios sok bayal jaʼbil jich la spas, melel jaʼ mukʼxan skʼoplal ta yoʼtan. La schol skʼop Dios «ta comonsitil soc ta jujun na» (Hech. 20:20). Ma jaʼuknax la yakʼbey yorail te scholel skʼop Dios o jaʼnax jun kʼajkʼal ta jun semana. La sle te bin-utʼil ya schol skʼop Dios. Kʼalal yak ta smaliyel te sjoʼtak ta Atenas, la scholbey te lek yachʼil kʼop te ants winiketik te mukʼ yaʼtelik sok bayal bin lek lokʼ yuʼun-a (Hech. 17:16, 17, 34). Kʼalal ay ta chukel-ae la scholbey skʼop Dios te machʼatik tey ayik-ae (Hech. 28:16-24; Filip. 1:13, 14).

6. ¿Bin-utʼil te Pablo la spʼijubtes te yermanotak?

⁶ Te Pablo la stuuntes ta lek te stiempo. Kʼayem-a te ya yikʼ yantik ta scholel skʼop Dios. Kʼalal ta sbabial buelta bajt ta scholel skʼop Dios, la yikʼ bael te Juan Marcos sok ta schebal buelta, la yikʼ bael te Timoteo (Hech. 12:25; 16:1-4). La spas tulan ta spʼijubtesel te winiketik-abi yuʼun ya yilik te congregacionetik, yuʼun lekil jkanantuminchijetik ya xkʼotik sok te ya snaʼik ta lek pʼijubteswanej (1 Cor. 4:17).

7. ¿Bin-utʼil te ancianoetik ya xjuʼ ya snopbeyik te ejemplo yuʼun te Pablo te ay ta Efesios 6:14, 15?

⁷ Te bin ya yakʼ ta nopel. Te ancianoetik ya xjuʼ ya stʼunbeyik te ejemplo yuʼun te Pablo ma jaʼuknax kʼalal ya scholik skʼop Dios ta nanatik, jaʼnix jich kʼalal ya spasik tulan yuʼun ya sleik te bin-utʼilxan ya scholik skʼop Dios (kʼopona Efesios 6:14, 15). Ya xjuʼ ya spasik kʼalal ya xbajtik ta manbajel sok kʼalal ayik ta yaʼtelike. Jaʼnix jich kʼalal yakik ta aʼtel ta construcción yuʼun te organización yuʼun Jehová, ya xjuʼ ya scholbey skʼop Dios te spatxujkik sok te machʼatik ya xkʼotik ta yijkitayel te aʼtejibaletik. Jich bitʼil la spas  te Pablo ya xjuʼ ya spʼijubtesik te yantik kʼalal yakik ta scholel skʼop Dios, jich bitʼil te siervo ministerialetik.

8. ¿Bin ya skʼan ya spas ta baeltik te ancianoetik?

⁸ Te ancianoetik ma jaʼuk ya skʼan ya xbajt ta yoʼtanik te bin ay ta swentaik ta congregación o ta circuito te maba ya slokʼesikix tiempo yuʼun ya scholik skʼop Dios. Teme ya skʼan ya snaʼik stsajtayele, ayniwan baeltik jaʼ lek ya yalik te ma xjuʼ yuʼunik te bin ya x-akʼbotik spase. Te kʼalal la skʼoponikix-a te Jehová ta swenta te bin ay stojolik spasel yaniwan snaʼik stojol te ay bin mukʼ skʼoplal maba yakik ta spasel, jich bitʼil te yichʼel ta mukʼ Dios ta jujun semana ta familia, te ya xlokʼik ta scholel skʼop Dios o ya spʼijubtesik te yal snichʼnabik ta scholel skʼop Dios. Ayniwan machʼatik wokol ya yaʼiyik yalel te ma xjuʼ yuʼunik te bin ya x-akʼbotik spase, pero ya skʼan ayuk ta yoʼtanik te ya xkʼot ta yoʼtan Jehová te tsajtaybil ya skʼan ya yilik te bintik ya spasike.

9. ¿Bin wokol ya yaʼiyik spasel te ancianoetik te bitʼil bayal bin ay ta swentaik spasel?

⁹ ¿Bin yuʼun te wokole? Te bitʼil ayotikix ta slajibal kʼajkʼal, te j-abatotik yuʼun Jehová ya jsitintaytik wokoliletik. Jaʼ yuʼun jpisiltik ya jkʼantik yip koʼtantik, koltayel sok smukʼul koʼtantik. Ayniwan machʼatik ya skʼanik koltayel yuʼun maba ya spasik te bin ma leke (1 Tes. 5:14). Te ancianoetik ma xjuʼ yuʼunik slajinel te wokoliletik ya jsitintaytik. Pero te Jehová ya skʼan te ya spasik tulan yuʼun ya yakʼbeyik yip yoʼtan sok ya skanantayik te tuminchijetik. Te bitʼil bayal bin ay ta swentaik spasel, ¿bin-utʼil ya slokʼesik tiempo ta skoltayel te hermanoetik?

10. Jich bitʼil ya yal 1 Tesalonicenses 2:7, ¿bin-utʼil la yil te yermanotak te Pablo?

¹⁰ Te ejemplo yuʼun te Pablo. Spisil-ora la sle te bin-utʼil ya yutsilkʼoptay te yermanotak sok te ya yakʼtiklanbey yip yoʼtane. Te ancianoetik lek te ya skʼayinbeyik te ejemplo yuʼun kʼalal ya yakʼik ta ilel te skʼuxul yoʼtanik ta stojol te yermanotakik (kʼopona 1 Tesalonicenses 2:7). Te Pablo jamal la yalbey te yermanotak te kʼux ya yaʼiy ta yoʼtan sok te kʼux aʼiybilik yuʼun te Jehovae (2 Cor. 2:4; Efes. 2:4, 5). Jich la yil bitʼil yamigotak sok spisil-ora la sjokinlan. La yakʼtiklanbey yil te ay smukʼul yoʼtan ta stojolik kʼalal la yaltiklanbey ta jamal te bin ya smel yoʼtan yuʼun sok te bin wokol ya yaʼiy spasele (2 Cor. 7:5; 1 Tim. 1:15). Jaʼ bajt ta yoʼtan skoltayel te yermanotak ma jaʼuk te wokoliletik yak ta kʼaxel ta stojole.

11. ¿Bin yuʼun te Pablo la stojobteslan te yermanotak?

¹¹ Aynix baeltik te Pablo la stojobtes te yermanotak. Pero ma jaʼuk la spas yuʼun ya slokʼes slab yoʼtan ta stojolik, jich la spas ta swenta te ay skʼoplal ta yoʼtan sok ya skʼan te manchuk ya xkʼax swokolike. La spas tulan  yuʼun ya xkʼot ta yoʼtanik te tojobtesel sok ya skʼan ya snaʼ te bin yilel la yilik te yermanotak. Jich bitʼil kʼalal la stikunbey bael carta te corintioetik la yakʼtiklanbey tojobtesel. Ta patil la stikun te Tito yuʼun ya skʼan ya snaʼ stojol te bin yaʼiyel la yaʼiy sbaik yuʼun te cartae. ¡Kʼax tseʼel yoʼtan kʼalal la yaʼiy stojol te la schʼuunik spasel te bin la yale! (2 Cor. 7:6, 7).

12. ¿Bin ya skʼan ya spasik te ancianoetik yuʼun ya yakʼbeyik smukʼul yoʼtan te yermanotak?

¹² Te bin ya yakʼ ta nopel. Te ancianoetik ya stʼunbeyik te ejemplo yuʼun te Pablo kʼalal ya slokʼesik tiempo ta skoltayel te yermanotak. Te bin-utʼil ya xjuʼ ya spasike, jaʼ te kʼalal sab ya xkʼotik ta tsoblej yuʼun ya skʼoponik te hermanoetik. Ma bayaluk tiempo ya yichʼ yuʼun ya yakʼbeyik smukʼul yoʼtan jtul hermano sok te ya yakʼbeyik yil te skʼuxul yoʼtanike (Rom. 1:12; Efes. 5:16). Te ancianoetik ya stʼunbeyik te ejemplo yuʼun te Pablo kʼalal ya stuuntesik te Biblia, kʼalal ya yakʼbeyik smukʼul yoʼtan te yermanotak sok te ya yalbeyik ta jamal te kʼux ya x-aʼiyotik yuʼun te Jehová. Jaʼnix jich ya yakʼik ta ilel skʼuxul yoʼtanik kʼalal spisil-ora ya skʼoponik te yermanotak sok te ya sleik te bin-utʼil ya yutsilkʼoptayik. Teme jtul anciano ay machʼa ya yakʼbey tojobtesel ya skʼan ya stuuntes te Biblia. Jamaluk te bin ya yalbey pero yakuk spas sok yutsil yoʼtan, melel jaʼ mukʼ skʼoplal te ya xkoltayot te bin ya yalbeye (Gál. 6:1).

13. ¿Bin ya xjuʼ ya xkʼot ta stojol te anciano kʼalal ay bin wokol ya yaʼiy spasel?

¹³ ¿Bin yuʼun te wokole? Te ancianoetik jmulawiletik-euk, jaʼ yuʼun ayniwan bin ma stojiluk ya spasik jich bitʼil te yantike (Rom. 3:23). Ay baeltik ya skʼan ya spasik tulan yuʼun tsajtaybiluk ya yilik kʼalal ay bin wokol ya yaʼiyik spasele. Ayniwan machʼatik ya xchebaj yoʼtanik te kʼalal jaʼ ya xbajt ta yoʼtanik yilel te banti ma xjuʼ yuʼunik spasele. Ay yantik maba ya yichʼik ta wenta te banti ya xchʼayik sok ya skuyik te ma puersauk te ya sjeltay te skuxlejalike.

14. Jich bitʼil ya yal Filipenses 4:13, ¿bin-utʼil koltayot te Pablo te spekʼelil yoʼtan yuʼun ma jaʼuk bajt ta yoʼtan te bin wokol la yaʼiy spasel?

¹⁴ Te ejemplo yuʼun te Pablo. La yal sok spekʼelil yoʼtan te ma xjuʼ yuʼun ta stukelnax sitintayel te bin wokol ya yaʼiy spasele. Snaʼoj te ya xtuun yuʼun te koltayel yuʼun te Dios. Ta nail tal la skontrain te jchʼuunjeletik. Pero ta patil la snaʼ stojol te ma lek te bin yak ta spasel sok la sjeltay te stalel sok te bin yilel te skuxlejale (1 Tim. 1:12-16). Ta swenta te koltayel yuʼun te Jehová kʼot ta lekil jkanantuminchij te ay skʼuxul yoʼtan, te ya snaʼbey yoʼbolil sba te yantik sok te ay  spekʼelil yoʼtane. La smel yoʼtan te bitʼil jaʼ jmulawil winik, pero la smukʼulin yoʼtan te ya xpasbot perdón yuʼun te Jehová sok te ma la yakʼix ta yoʼtan te bin ma lek la spase (Rom. 7:21-25). Snaʼoj te ma xjuʼ yuʼun te kʼax toj te bin ya spase, jaʼ yuʼun la spas tulan ta slekubtesel te stalel sok spekʼelil yoʼtan la skʼanbey koltayel te Jehová yuʼun ya sjuʼtes ta pasel te aʼtelil akʼbil ta stojole (1 Cor. 9:27; kʼopona Filipenses 4:13).

15. ¿Bin-utʼil te anciano ma jaʼuk ya xbajt ta yoʼtan ta jkʼaxel te bin wokol ya yaʼiy spasel?

¹⁵ Te bin ya yakʼ ta nopel. Te hermanoetik maba ya yichʼ yaʼtelik ta anciano ta swenta te tojike, pero te Jehová ya skʼan te ayuk ta yoʼtanik te bin ma stojiluk ya spasik sok te yakuk yijkitayik te spokoʼ talelike (Efes. 4:23, 24). Ya skʼan ya yilik te bin yilel te stalelik kʼalal ya skʼoponik te sKʼop Dios sok te ya spasik tulan ta sjeltayel te skuxlejalike. Jichme ya xkoltayotik yuʼun te Jehová swenta ay stseʼelil yoʼtanik sok te ya sjuʼtesik ta pasel te yaʼtelike (Sant. 1:25).

16. ¿Bin ya xkʼot ta pasel teme jaʼ ya xbajt ta yoʼtanik yilel te ancianoetik te bin ma stojiluk ya spasik te yermanotak?

¹⁶ ¿Bin yuʼun te wokole? Kʼalal te ancianoetik ya sjokinik te hermanoetik ayniwan ya staik ta ilel te bin ma stojiluk ya spasike. Teme maba ya stsajtay sbaik yaniwan x-ilinik, maʼyukix yutsil yoʼtanik o ya xjajchik ta labanwanej. Te Pablo la yaltiklanbey te jchʼuunjeletik te jaʼ ya skʼan Satanás te jich ya yichʼ pasele (2 Cor. 2:10, 11).

17. ¿Bin yilel la yil te yermanotak te Pablo?

¹⁷ Te ejemplo yuʼun te Pablo. Spisil-ora lek la yil te yermanotak. La snaʼ stojol te kʼalal ay bin ma stojiluk ya spasik, melel ay baeltik te ma lek ya yaʼiy sba yuʼune. Manchukme jich-abi la snaʼ yilel te bin ma lek ta pasel o te machʼa chopol ants winik. Kʼux ta yoʼtan te yermanotak, jaʼ yuʼun jaʼ la yilbey te lekil taleliletik yuʼunike. Teme ay machʼa ya yil te wokol ya yaʼiyik spasel te bin leke, jaʼ ya snop ta yoʼtan te ya skʼan koltayel ma jaʼuk la snop te sok spasemal yoʼtan la spas te bin ma leke.

18. ¿Bin ya yakʼ jnoptik te bitʼil te Pablo la skoltay te Evodia sok te Síntique? (Filipenses 4:1-3).

¹⁸ Kiltik bin-utʼil la skoltay te Pablo chaʼtul hermanaetik te ayik ta Filipos (kʼopona Filipenses 4:1-3). Jich yilel te Evodia sok te Síntique ma lek ya yil sbaik. Te Pablo maba la yutiklan ni jaʼuk la slabanlan. Te bin la spase, jaʼ la yil te lekil taleliletik yuʼunik sok te jun yoʼtan yakʼoj sbaik ta stojol te Jehová. Snaʼoj te kʼux aʼiybilik yuʼun te Jehová. Te bitʼil jaʼ la yil te bin lek yakik ta spasel, la yaltiklanbey te yakuk schajpanik te kʼop jajchem yuʼunike. Te bin yilel la yil te yermanotake, jaʼ koltayot yuʼun ma chʼay te stseʼelil yoʼtan sok te la yamigoin sba sok te congregación.

19. 1) ¿Bin ya xjuʼ ya spasik te ancianoetik swenta jaʼ ya yilik te bin lek ya spasik te hermanoetik? 2) ¿Bin ya yakʼbat anop te anciano te ya xchiknaj ta foto te yak ta skusel te sNail Tsoblej?

 ¹⁹ Te bin ya yakʼ ta nopel. Ancianoetik, jaʼuk xa awilbeyik te lekil taleliletik yuʼun te hermanoetik. Melel jmulawiletik, pero jaʼnix jich ya yakʼik ta ilel lekil taleliletik (Filip. 2:3). Aynix baeltik ay machʼa ya skʼan tojobtesel. Jich bitʼil la spas te Pablo mame jaʼuknax ya skʼan ya awilik te bin ya yal o ya spas te ya yutsʼinbey yoʼtan te yantik. Jaʼuk ya awilik te kʼux ta yoʼtan te Jehová te hermano-abi, te jun yoʼtan abatinem ta stojol sok te ya xjuʼ ya slekubtes te stalele. Te ancianoetik te jaʼ ya yilbey te bin lek ya spasik te yermanotak ay kʼuxul oʼtanil ta congregación sok leknax ya yaʼiy sbaik te hermanoetik.

20. ¿Bin ya xjuʼ ya spasik te ancianoetik swenta ya snopbeyikxan skʼoplal te ejemplo yuʼun te Pablo?

²⁰ Te ancianoetik bayalme ya xkoltayotik teme ya snopbeyikxan skʼoplal te ejemplo yuʼun te Pablo. Ya xjuʼ ya awilik te Índice de las publicaciones Watch Tower ochan te banti ya yal «Pablo» ta patil «ejemplo para los ancianos». Kʼalal ya awilbey skʼoplal te referenciaetik ya xjuʼ ya ajojkʼoybey aba: «¿Bin-utʼil ya skoltayon te ejemplo yuʼun te Pablo ta spasel sok stseʼelil koʼtan te aʼtelil kichʼoj ta anciano?».

21. ¿Bin ya skʼan ayuk ta yoʼtanik te ancianoetik?

²¹ Ancianoetik, ayuk ta awoʼtanik te maba ya smaliy te Jehová te tojukexe, pero jaʼ ya skʼan te junuk awoʼtanike (1 Cor. 4:2). Bayal skʼoplal kʼot ta yoʼtan te bin la spas te Pablo sok te jun yoʼtan la yakʼ sba ta stojole. Ayuk ta awoʼtanik te mukʼ skʼoplal ta yoʼtan Jehová te bin ya apasik, jich bitʼil ya yal te Hebreos 6:10 te ma «schʼay ta yoʼtan te awaʼtelic soc te scʼuxul awoʼtanic te la awaqʼuic ta ilel ta scuenta sbihil, te bin utʼil la awacʼ abahic ta aʼbatinel ta stojol te machʼatic chʼuhltesbilic».