1, 2. Кыӵе пайда вайыны быгатэ апостол Павеллэн примерез тӧроослы?

 АПОСТОЛ Павел вын-агайёсты но сузэр-апайёсты туж яратӥз но соос понна туж трос лэсьтӥз (Ап. уж. 20:31). Соин ик соос но сое яратӥзы. Кылсярысь, куке Ефесысь тӧроос тодӥзы, Павелэз уз адӟе ини шуыса, соос бӧрдыны ик кутскизы (Ап. уж. 20:37). Туннэ но тӧроос вын-агайёсты но сузэр-апайёсты туж ярато, соос понна дырзэс но кужымзэс уг жаляло (Флп. 2:16, 17). Но тӧроос шуг-секытъёсын но пумиськыло. Та статья юрттоз соослы шуг-секытъёссэс вормыны.

² Тӧроос апостол Павеллэсь тросэзлы дышетскыны быгато (1 Кор. 11:1). Павел огшоры, сьӧлыко адями вал, кудӥз янгышъёс лэсьтылӥз (Рим. 7:18—20). Озьы ик со трос шуг-секытъёсын но пумиськылӥз. Озьы ке но Павел киоссэ ӧз лэзьы но шумпотонзэ ӧз ышты. Павеллэсь адӟем карыса, тӧроос быгато шуг-секытъёссэс вормыны но Иеговалы шумпотыса ужаны-тыршыны. Ойдолэ пыр-почгес эскеромы, кыӵе пример возьматӥз апостол Павел.

3. Мае ми тодомы та статьяысь но малы со милемыз дышетыны быгатоз?

³ Та статьяын ми эскеромы ньыль шуг-секытъёсты, кудъёсыныз тӧроос пумиськыло. Кылсярысь, куддыръя соослы секыт тодытон понна, вын-агайёсты но сузэр-апайёсты юнматон понна тырмыт дыр шедьтыны, озьы ик асьсэлэн но мукетъёсызлэн янгышъёссы шоры шонер учкыны. Апостол Павеллэн но таӵе ик шуг-секытъёсыз  вал. Ойдолэ тодомы, мар со кариз, соосын пумиськыкуз, но малы тӧроос солэсь дышетскыны быгато.

4. Малы тӧроослы куддыръя секыт тодытон ужез нырысетӥ интые пуктыны?

⁴ Малы со секыт? Тӧроос кенешлы пример возьматыны кулэ, кызьы тодытон уже пыриськоно. Но соослэн мукет ужъёссы но туж трос. Кылсярысь, тӧроос пумиськонъёсын речьёс верало но мукет пунктъёс ортчыто. Соос кенешлы юрттӥсьёсты дышето но мукет вын-агайёс но сузэр-апайёс сярысь сюлмасько (1 Пётр 5:2). Куд-ог тӧроос Эксэйлык юртъёсты но организацимылэн мукет пуктӥськон но эскерон-тупатъян ужъёсаз пырисько. Озьы ке но тӧроослэн но, мукет христианъёслэн но улоназы нырысетӥ интыын тодытон уж луыны кулэ (Матф. 28:19, 20).

5. Кызьы Павел возьматӥз, тодытон ужез нырысетӥ интые пуктэ шуыса?

⁵ Мар кариз Павел? Мар юрттӥз Павеллы ӟеч иворез вераны? Филиппы карын улӥсьёслы со таӵе визь-кенеш сётӥз: «Ӟечсэ бырйыны быгатӥсесь мед луоды» (Флп. 1:10). Павел ачиз но та кылъёсъя улӥз. Аслаз ужъёсыныз со возьматӥз, «ӟечсэ бырйыны» быгатэ шуыса. Кема аръёс ӵоже со «вань калык азьын, коркась корка ветлыса» тодытӥз (Ап. уж. 20:20). Павел котькуд тупась учыре ӟеч иворез вераны тыршиз. Кылсярысь, Афины карын, Сӥлаез но Тимофеез возьмакуз, Павел нимо-дано адямиослы тодытӥз. Соос пӧлысь куд-огъёсыз христианъёс луизы (Ап. уж. 17:16, 17, 34). Соку но, куке Павел жильыямын вал, со тодытэмысь ӧз дугды (Ап. уж. 28:16—24; Флп. 1:13, 14).

6. Мар кариз Павел, мукетъёсыныз тодытыкуз?

⁶ Павел аслэсьтыз дырзэ юнме ӧз быдты. Нырысетӥзэ пӧртэм шаеръёстӥ тодытыса ветлыкуз, со сьӧраз басьтӥз Маркез, нош кыкетӥяз — Тимофеез (Ап. уж. 12:25; 16:1—4). Соосын ӵош тодытыкуз, Павел валэктылӥз соослы, кызьы кенешъёсты кылдытоно, кызьы вын-агайёсты но сузэр-апайёсты юнматоно но кызьы адямиосты дышетоно (1 Кор. 4:17).

7. Кызьы тӧроос кылзӥсько визь-кенешлэсь, кудӥз гожтэмын Ефесъёслы 6:14, 15?

⁷ Малы со дышетэ? Малы дышетскыны быгато тӧроос Павеллэсь? Тӧроос ӟеч иворез коркась корка ветлыса гинэ уг верало, нош котькуд тупась учыре верало. Кылсярысь, соос магазинын но уж доразы тодыто. (Лыдӟе Ефесъёслы 6:14, 15.) Эксэйлык юртъёсты пуктыку, соос  бускельёссылы Инмар сярысь вераны быгато. Озьы ик, кенешлы юрттӥсьёсын но мукетъёсыныз ӵош тодытыкузы, тӧроос соосты дышето.

8. Котьку-а тӧроос вань сётэм ужъёсты быдэстыны соглаш кариськыны кулэ? Валэктэ.

⁸ Тӧроослэн ужъёссы туж трос бере, куддыръя соослы секыт ӟеч иворез веран понна дыр шедьтыны. Соин ик, тӧроос, куке тӥледлы кыӵе ке уж ӵекто, вӧсяське но малпаське, быгатоды-а тӥ та ужез быдэстыны. Со тӥледлы люкетӥз ке семьяен йыбырттондэс ортчытыны, тодытыны, нылпиостэс дышетыны ӟеч иворез вераны яке мукет кулэ луись ужъёсты лэсьтыны, оло нош, умойгес луоз вераны, та ужез тӥ быдэстыны уд быгатэ шуыса. Озьы вераны секыт ке но, эн вунэтэ: Иегова адӟе, тӥ ӟечсэ бырйыны тыршиськоды шуыса.

9. Кыӵе шуг-секытэн куддыръя тӧроос пумиськыло?

⁹ Малы со секыт? Та берпум нуналъёсы Иеговалэн ужась-тыршисьёсызлэн шуг-секытъёссы трос. Соин ик кулэ кинлы ке юрттыны, кинэ ке юнматыны, кинэ ке янгышлэсь алыны (1 Фес. 5:14). Тӧроос Инмарлэсь калыксэ вань шуг-секытъёслэсь утьыны уг быгато ке но, Иегова возьма, соос лэсьтозы ваньзэ, мае быгато, вын-агайёслы но сузэр-апайёслы юрттон понна. Тӧроослэн ужъёссы туж трос ке но, кызьы соос та понна дыр шедьтыны быгато?

10. Кызьы Павел вын-агайёс но сузэр-апайёс сярысь сюлмаськиз, 1 Фессалоникаослы 2:7 верамъя?

¹⁰ Мар кариз Павел? Павел вын-агайёсты но сузэр-апайёсты котьку ушъя но юнматэ вал. Тӧроос но, Павел сямен, Инмарлэн калыкез сярысь яратыса но лякытэн сюлмасько. (Лыдӟе 1 Фессалоникаослы 2:7.) Павел вын-агайёслы но сузэр-апайёслы вера вал, со но, Иегова но соосты ярато шуыса (2 Кор. 2:4; Еф. 2:4, 5). Павел вын-агайёслы но сузэр-апайёслы умой эш вал но соослы дырзэ висъяз. Со сяна, со соослы оскиз. Озьы вераны луоз, малы ке шуоно Павел соослы сюлмаськонъёсыз но янгышъёсыз сярысь вералляз (2 Кор. 7:5; 1 Тим. 1:15). Озьы ке но со шуг-секытъёсыз сярысь укыр трос вераса ӧз улы. Солэн мукетъёсызлы юрттэмез потэ вал.

11. Малы Павел куддыръя вын-агайёслы но сузэр-апайёслы янгышъёссы сярысь вералляз?

¹¹ Куддыръя Павел вын-агайёслы но сузэр-апайёслы визь-кенешъёс сётъяны кулэ вал. Но со ноку йыркуръяськыса соосты ӧз вералля. Павел вын-агайёс но сузэр-апайёс сярысь сюлмаськиз но соосты янгышъёслэсь утьыны тыршиз. Соин ик со визь-кенешсэ лякыт кылъёсын вералляз,  солэсь кылзӥськыны капчи мед луоз но со вӧсь медаз кары шуыса. Кылсярысь, Павел Коринфысь христианъёслы янгышсы сярысь гожтӥз. Павеллэн тодэмез потэ вал, кызьы соос гожтэтэз шоры учкизы. Соин ик со Коринфе Титэз ыстӥз. Куке Павел тодӥз, соос гожтэтсэ шонер валазы шуыса, со туж шумпотӥз (2 Кор. 7:6, 7).

12. Кызьы тӧроос вын-агайёслэсь но сузэр-апайёслэсь осконзэс юнмато?

¹² Малы со дышетэ? Тӧроос Павеллэсь адӟем каро, вын-агайёслы но сузэр-апайёслы дырзэс висъяса. Со понна соос кенешлэн пумиськоназ вазьгес лыктыны тыршо. Ӵем дыръя кӧня ке минут гинэ но тырме, вын-агаез яке сузэр-апаез юнматон понна (Рим. 1:12; Еф. 5:16). Со сяна, тӧроос Павеллэсь адӟем каро, куке Библиез кутыса, вын-агайёслэсь но сузэр-апайёслэсь осконзэс юнмато. Озьы ик тӧроос соосты оскыто, соос асьсэос но, Иегова но соосты ярато шуыса. Тӧроос вын-агайёсын но сузэр-апайёсын дырзэс ортчытъяло но соосты ушъяло. Куке тӧроос адӟо, кинэ ке тупатоно шуыса, соос Библия вылэ пыкиськыса визь-кенеш сёто. Адямилэн янгышез сярысь соос пырак верало, но со дыре ик лякыт кылъёс быръё, сётэм визь-кенешлэсь кылзӥськыны капчи мед луоз шуыса (Гал. 6:1).

13. Кызьы куд-ог тӧроос янгышъёссы шоры учко?

¹³ Малы со секыт? Тӧроос — сьӧлыко адямиос. Соин ик, мукет адямиос сямен, соос но янгышало (Рим. 3:23). Куддыръя соослы секыт асьсэлэн янгышъёссы шоры шонер учкыны. Куд-огъёсыз, ӧжыт гинэ янгышаса но, асьсэды курадӟыто но номырлы ярасьтэм адямиосын лыдъяны кутско. Нош куд-огъёсыз тырмымтэоссы шоры чиньы пыр учко но тупатскыны уг ик малпало.

14. Кызьы зӥбыт-востэм сям юрттӥз Павеллы янгышъёсыз шоры шонер учкыны, 2 Коринфъёслы 4:7 верамъя?

¹⁴ Мар кариз Павел? Павел зӥбыт-востэм вал. Со валаз, янгышъёссэ аслаз кужыменыз гинэ тупатыны уз быгаты шуыса. Соин ик со Иеговалэсь юрттэт куриз. Азьвыл Павел туж лек вал но христианъёсты уйылыса-улляса улӥз. Но берло со валаз, ассэ шонертэм возиз шуыса, но тупатскыны тыршиз (1 Тим. 1:12—16). Иегова юрттӥз солы яратӥсь, лякыт но зӥбыт-востэм тӧро луыны. Павел янгышъёсыз сэрен куректӥз ке но, соос сярысь укыр трос малпаса ӧз улы. Со оскиз, Иегова сое простить кароз шуыса (Рим. 7:21—25). Павел ӧз малпа, янгышатэк улыны быгатоз шуыса. Но  со дыре ик со тыршиз урод сямъёсыныз нюръяськыны, Иисуслэсь адӟем карыны но Иеговалэсь юрттэтсэ утчаны (1 Кор. 9:27; лыдӟе 2 Коринфъёслы 4:7).

15. Кызьы тӧроослы янгышъёссы шоры учконо?

¹⁵ Малы со дышетэ? Малпано ӧвӧл, тӧроос сьӧлыктэм адямиос шуыса. Соин ик Иегова возьма, соос янгышъёссэс адӟозы но, Иисус Христослэсь адӟем карыса, тупатскыны тыршозы шуыса (Еф. 4:23, 24). Библиез мур эскерыса, тӧроос урод сямъёссэс адӟозы но валалозы, кызьы соосын нюръяськоно. Соку Иегова юрттоз соослы шудо адями но умой тӧро луыны (Иак. 1:25).

16. Мар луоз, тӧро мукетъёсызлэн янгышъёссылы укыр трос саклыксэ висъяз ке?

¹⁶ Малы со секыт? Тӧроос вын-агайёсын но сузэр-апайёсын трос дырзэс ортчыто бере, соос соослэсь янгышъёссэс адӟо. Соин ик, тӧроос ӧз ке чаклаське, мукетъёсызлы вожзэс поттыны, вӧсь карись кылъёс вераны но соосты пыкылыны быгато. Но озьы кароно ӧвӧл. Апостол Павеллэн верамезъя, Шайтанлэн потэ, тӧроос сыӵеесь мед луозы шуыса (2 Кор. 2:10, 11).

17. Кызьы Павел вын-агайёсыз но сузэр-апайёсыз шоры учкиз?

¹⁷ Мар кариз Павел? Павел вын-агайёслэсь но сузэр-апайёслэсь умой палъёссэс адӟыны тыршиз. Куке соос янгышазы, Павеллы соин сэрен вӧсь вал. Озьы ке но Павел ӧз малпа, соос урод адямиос шуыса. Со вын-агайёссэ но сузэр-апайёссэ яратӥз но умой сямъёссэс адӟыны тыршиз. Павел оскиз, соослэн шонерзэ лэсьтэмзы потэ вал шуыса. Со валаз: соослы ӧжыт гинэ юрттыны кулэ.

18. Кызьы Павел Еводиялы но Сӥнтихиялы юрттӥз? Малы со тӥледыз дышетэ? (Филиппыослы 4:1—3).

¹⁸ Тодамы ваёмы, кызьы Павел Филиппы карысь кык сузэръёслы юрттӥз. (Лыдӟе Филиппыослы 4:1—3.) Тупамтэоссы сэрен Еводиялэн но Сӥнтихиялэн кусыпъёссы сӧриськизы. Но Павел соослы вожзэ ӧз потты но ӧз малпа, соос тупатскыны уз быгатэ ини шуыса. Павел умой сямъёссылы саклыксэ висъяз. Та сузэръёс трос аръёс ӵоже Иеговалы ужазы-тыршизы, соин ик Павел тодӥз, Иегова соосты яратэ шуыса. Павел та сузэръёс шоры умоен учкиз бере, со куриз соосты кусыпъёссэс тупатыны. Со сяна, Павел шумпотонзэ ӧз ышты но та кенешысь вын-агайёсын но сузэр-апайёсын эшъяськемысь ӧз дугды.

19. а) Мар юрттоз тӧроослы вын-агайёс но сузэр-апайёс шоры умоен учкыны? б) Малы дышетэ тӥледыз суред, кудаз возьматэмын Эксэйлык юртын утялскись тӧро?

¹⁹ Малы со дышетэ? Тӧроос, вын-агайёслэсь  но сузэр-апайёслэсь умой палъёссэс адӟыны тырше. Ми ваньмы янгышаськомы ке но, котькудмылэн умой сямъёсмы вань (Флп. 2:3). Куддыръя тӧроос мукетъёсызлы визь-кенешъёс сётъяно луо. Озьы ке но, Павел сямен ик, соос вын-агайёслэн но сузэр-апайёслэн янгышъёссылы укыр трос саклыксэс уг висъяло. Соос адӟо, вын-агайёс но сузэр-апайёс Иеговаез туж ярато, солы мылысь-кыдысь ужало-тыршо но умой сямъёссэс будэтыны быгато шуыса. Тӧроос вын-агайёс но сузэр-апайёс шоры умоен учкизы ке, соку кенешын, семьяын кадь ик, шунытэсь кусыпъёс луозы.

20. Мар юрттоз тӧроослы Павел сярысь тросгес тодыны?

²⁰ Тӧроос, куриськомы тӥледыз Павел сярысь тросгес тодыны. Тӥледлы юрттоз «Возьмаськон башнялэн публикациосызлэн индекссы» (Павел > Пример для старейшин). Эскерон ортчытыкуды, малпаське: «Кызьы мон Павеллэсь адӟем карыны быгатӥсько? Кызьы со мыным юрттоз кенешысь ужъёсме шумпотыса быдэсъяны?»

21. Кызьы Иегова тӧроослэн тыршемзы шоры учке?

²¹ Тӧроос, Иегова уг возьма, тӥ янгышатэк улоды шуыса. Со возьма, тӥ солы оскымон луоды шуыса (1 Кор. 4:2). Азьвыл Иегова туж дунъяз Павеллэсь оскымон ужам-тыршемзэ. Туннэ но Иегова адӟе тӥлесьтыд тыршемдэс. Инмар уг вунэты «тӥлесьтыд уждэс, яратондэс, кудзэ тӥ Солэн нимыз понна ужаса-тыршыса возьматӥды, али но вӧсяськись калыклы ӟеч лэсьтыса сое возьматӥськоды» (Евр. 6:10).