STÙDIO 14
I ansiani i ga de seitar a far come el apòstolo Paolo
‘Gavé de far compagno a mi.’ — 1 COR. 11:1.
CÀNTICO 85 Ricevemo a tuti con amor
COSSA CHE NDAREMO IMPARAR? *
1-2. Parché che el esémpio de Paolo el pol giutar i ansiani?
EL APÒSTOLO Paolo el amea tanto i fradei e el fea tante robe par tenderli. (Ati 20:31) Par quela che i fradei dele congregassion i lo amea tanto. Par esémpio, quando i ansiani de Èfeso i ga savesto che no i ndaria pi veder a Paolo, lori i ga piandesto tanto. (Ati 20:37) Nostri cari ansiani i ze come Paolo, parché i ama tanto i fradei e i fà tante robe par tenderli. (Fil. 2:16, 17) Ma lori i infronta arquante dificoltà. Cossa che pol giutarli?
2 Far compagno el esémpio de Paolo pol giutarli tanto. (1 Cor. 11:1) Paolo no l’era perfeto, par quela che dele volte ghe fea fadiga far quel che l’è giusto. (Rom. 7:18-20) Paolo el infrontea arquante dificoltà, anca cossita el seitea contento. Alora, se i ansiani i fà compagno a Paolo i sarà boni de darghene fora cole dificoltà e seitar a servir a Geovà contenti. Ndemo veder come i ansiani i pol far compagno a Paolo.
3. Cossa ndaremo veder in questo stùdio?
3 In questo stùdio, ndaremo imparar sora quatro dificoltà che i ansiani i infronta: (1) gaver el tempo par predicar e par far i so altri laori, (2) tender ben de tuti i fradei, (3) veder i so sbali dela maniera giusta, e (4) veder i sbali dei altri dela maniera giusta. Ndaremo anca veder come che Paolo el ga infrontà queste dificoltà e come i ansiani i pol far compagno a lu.
GAVER TEMPO PAR PREDICAR E PAR FAR TUTI I ALTRI LAORI
4. Parché che pol esser fadiga par i ansiani gaver tempo par la predicassion?
4 Parché che pol esser fadiga farlo? Parché i ansiani i ga tanti laori de far nela congregassion. Par esémpio, tanti i ga de tender dela riunion del meso dela stimana, i ga de far el stùdio bìblico cola congregassion, discorsi e altre parte. Lori i ga anca de incoraiar i fradei e sorele dela congregassion e insegnar i servi ministeriai a far i so laori. (1 Pie. 5:2) Arquanti ansiani anca i giuta a far su e a tender dei Saloni del Regno e altri posti dela organisassion. Anca cossita, el laoro pi importante dei ansiani l’è esser predicadori insieme cola congregassion. — Mat. 28:19, 20.
5. Cossa Paolo el pensea sora el laoro de predicassion?
5 Cossa i ansiani i pol imparar del esémpio de Paolo? In Filipensi 1:10 Paolo el ne dise cossa ghe toca far par esser un bravo predicador dele bone notìssie. Lu el ga dito: “Sìpie sicuri de quale che le ze le robe pi importante.” E Paolo el ga fato pròpio cossita. Lu l’è stà scoliesto par predicar ale persone dele nassion. Questo laoro l’era la roba pi importante par lu. Par quela el predichea par la strada, nel comèrsio e anca de casa in casa. (Ati 20:20) Paolo anca el predichea in difarente ore e in difarenti giorni dela stimana. E lu el se sforsea par predicar a tute le persone che el podea. Par esémpio, quando Paolo l’era drio spetar arquanti fradei in Atena, el ga predicà le bone notìssie a arquante persone importante e lore lo ga scoltà. (Ati 17:16, 17, 34) E Paolo el predichea anca quando l’era in preson. — Fil. 1:13, 14; Ati 28:16-24.
6. Cossa Paolo el ga insegnà a altri fradei?
6 Paolo el doperea dela meio maniera el so tempo. Lu el gavea caro de predicar insieme coi fradei par insegnarghe a esser bravi predicadori. Par esémpio, nel primo viaio che Paolo el ga fato par predicar e visitar le congregassion, el ga portà insieme Marco, e nel secondo el ga portà Timòteo. (Ati 12:25; 16:1-4) Paolo el doperea el tempo che el gavea con questi fradei par giutarli a saver come tender de una congregassion, dei fradei e come esser bravi de insegnar la Parola de Dio. — 1 Cor. 4:17.
Come Paolo, predica a tute le persone che te pol (Vedi el paràgrafo 7.) *
7. Come i ansiani i pol far come dise in Efesi 6:14, 15?
7 Cossa el esémpio de Paolo el insegna? Che i ansiani i ga de predicar de casa in casa e anca i ga de sforsarse de farlo in tuti i altri posti. (Ledi Efesi 6:14, 15. *) Par esémpio, lori i pol predicar quando i ze drio comprar qualcossa o quando i ze nel laoro. E quei che i giuta a far su posti doperadi par la organisassion, i pol predicar a quei che i ze de star darente o anca quei che i va venderghe qualcossa. E i ansiani anca i pol doperar el tempo nela predicassion par insegnar ai servi ministeriai e ai altri fradei.
8. Cossa che i ansiani dele volte i ga de far?
8 I ansiani i sa che far el laoro de predicassion l’è tanto importante. Ma cossa un ansiano el ga de far se qualchedun ghe domanda de far anca nantro laoro nela organisassion? Lu el ga de pensar e pregar tanto a Geovà parché ghe ocore gaver tempo par far anca altre robe tanto importante. Par esémpio, far la adorassion in fameia, predicar e insegnar i fioi a predicar. Alora, se el vede che no’l sarà bon de far tuto quel che el ga de bisogno, el ga de dir che no’l podarà far questo laoro. Pol esser fadiga par i ansiani dir che no i pol far un laoro nela organisassion. Ma lori i pol esser sicuri che Geovà el capisse che i ga belche tanti laori de far.
TENDER BEN DE TUTI I FRADEI
9. Che dificoltà arquanti ansiani i infronta?
9 Parché che pol esser fadiga de farlo? In questi ùltimi giorni i servi de Geovà i infronta arquante dificoltà, par quela che lori i ga bisogno che i ansiani i li incoraie, li giute e ghe dae consolo. O pol esser che lori i ga bisogno che i ansiani li dae consili par no far qualcossa de sbalià. (1 Tes. 5:14) Anca che i ansiani no i ze boni de finir fora coi problemi dei fradei, Geovà el vol che i seite a protegerli e a giutarli. Ma come che lori i pol gaver tempo par giutar tuti questi fradei?
Loda e incoraia i fradei (Vedi i paràgrafi 10 e 12.) *
10. De acordo con 1 Tessalonissensi 2:7, come che Paolo el tendea dei fradei?
10 Cossa i ansiani i pol imparar del esémpio de Paolo? Paolo el lodea tanto i fradei e el se sforsea de sempre incoraiarli. Lu anca el parlea ai fradei che Geovà li amea tanto. (Efe. 2:4, 5) Paolo anca el ghe volea ben ai fradei e ghe piasea de star insieme con lori. (2 Cor. 2:4) Lu el se fidea tanto nei so fradei parché el ghe ga parlà sora quel che el gavea paura e sora i so sbali. (2 Cor. 7:5; 1 Tim. 1:15) Quando Paolo el parlea dei so sbali no l’era mia par farse veder, ma par giutar i fradei. I ansiani i fà compagno a Paolo quando i ghe vol ben ai fradei e li trata con tanto amor. — Ledi 1 Tessalonissensi 2:7. *
11. Parché che Paolo el dea consili ai fradei?
11 Dele volte el apòstolo Paolo el ga bio de dar consili ai so fradei. Ma lu mai lo fea parché l’era disgustà con lori. Invesse, lu el se preocupea tanto coi fradei e el volea protegerli. Paolo sempre el dea consili che fusse fàcile de capir e el se preocupea se i fradei ndaria meterli in pràtica. Par esémpio, lu el ga dato consili ai Corinti sora robe tanto importante che i gavea de cambiar. Dopo, el ga mandà Tito a Corinto parché l’era premoso de saver cossa i fradei i gavea pensà del so consìlio. Lu l’è restà tanto contento quando el ga savesto che lori i era drio meterlo in pràtica! — 2 Cor. 7:6, 7.
12. Come i ansiani i pol incoraiar i fradei?
12 Cossa el esémpio de Paolo el insegna? I ansiani i ga de restar insieme coi fradei dela congregassion. Par esémpio, lori i pol rivar pi bonora ale riunion, cossita i sarà boni de ciacolar coi fradei. Anca che un ansiano el sìpia bon de parlar sol pochi minuti con qualchedun, sicuro che el ndarà giutarlo tanto. (Rom. 1:12; Efe. 5:16) I ansiani anca i pol lodar i fradei, assarli sicuri che Geovà li ama e doperar la Bìblia par incoraiarli. E quando ghe toca dar un consìlio a qualchedun, lori i ga de doperar sempre la Bìblia par farlo. Lori anca i parla pròpio quel che el fradel el ga de cambiar, ma lo fà sempre con bontà parché i vol tanto che el mete in pratica el consìlio. — Gàl. 6:1.
VEDER I SO SBALI DELA MANIERA GIUSTA
13. Cossa che un ansiano el pol pensar sora i so sbali?
13 Parché pol esser fadiga de farlo? Anca i ansiani i sbàlia parché no i ze perfeti. (Rom. 3:23) Par quela che fursi ghe fà fadiga de veder i so sbali dela maniera giusta. Par esémpio, arquanti i se preocupa tanto coi so sbali e i resta desanimadi. Altri no i se preocupa mia coi so sbali e i pensa che no i ghe ocore cambiar.
14. De acordo con Filipensi 4:13, come che la umiltà ga giutà Paolo?
14 Cossa i ansiani i pol imparar del esémpio de Paolo? Vanti de deventar un dissìpolo, Paolo l’era tanto rugno con quei che i ndea drio a Cristo e el volea coparli. Lu el ga visto che quel che el fea l’era sbalià e el ga cambià. (1 Tim. 1:12-16) Geovà lo ga giutà a esser un ansiano che el mostrea tanto amor, passiensa e el gavea tanta umiltà. Paolo el savea che no l’era mia perfeto e che el sbaliea tante volte. Ma no’l seitea a pensar sora questo, invesse el se fidea che Geovà ndaria perdonarlo. (Rom. 7:21-25) Come Paolo l’era ùmile, el savea che el gavea bisogno del aiuto de Geovà par far quel che l’è giusto e par far el laoro che el ghe gavea domandà. Lu anca el seitea a sforsarse par gaver le qualità che ghe piase a Geovà. — 1 Cor. 9:27; Ledi Filipensi 4:13. *
Fà sforso par cambiar quel che te ocore (Vedi i paràgrafi 14 e 15.) *
15. Cossa i ansiani i ga de pensar sora i so sbali?
15 Cossa el esémpio de Paolo el insegna? L’è vera che i ansiani i ndarà sbaliar parché i ze imperfeti. Geovà el vol che i ansiani i se nicorde de quel che i fà de sbalià e i seite a gaver cada volta de pi le bele qualità. (Efe. 4:23, 24) Cossa pol giutar un ansiano a cambiar quel che ghe ocore? Studiar la Bìblia. Cossita, Geovà ndarà giutarlo a esser un bravo ansiano e a restar contento col laoro che el fà nela congregassion. — Tiago 1:25.
VEDER I SBALI DEI ALTRI DELA MANIERA GIUSTA
16. Cossa che pol suceder se i ansiani no i ze boni de veder de maniera giusta i sbali dei fradei?
16 Parché che pol esser fadiga de farlo? Quando i ansiani i cognosse ben i fradei dela congregassion, l’è anca pi fàcile che i vede i so sbali. Alora ghe toca star atenti par no restar inrabiadi, parlar mal o de una maniera bruta con lori. El apòstolo Paolo el ga dito che Sàtana el ghe piaseria tanto se questo sucedesse. — 2 Cor. 2:10, 11.
17. Cossa Paolo el pensea dei so fradei e sorele?
17 Cossa i ansiani i pol imparar del esémpio de Paolo? Paolo el amea tanto i fradei e el proea sempre veder le bele qualità che i gavea. Lu l’era bon de veder i sbali dei altri e dele volte questi sbali lo assea disgustà. Ma lu no’l pensea che la persona che la gavea fato el sbàlio la era rugna e gnanca no la giulghea. Invesse, lu l’era sicuro che i fradei sempre i volea far quel che l’è giusto, ma che i gavea bisogno de aiuto par farlo.
18. Cossa te ghè imparà dela maniera che Paolo el ga tratà Evòdia e Sìntiche? (Filipensi 4:1-3)
18 Varda cossa che Paolo el ga fato quando due sorele le ga bio problemi intrà de lore, nela congregassion de Filipo. (Ledi Filipensi 4:1-3. *) Queste due sorele, Evòdia e Sìntiche no le era pi intese e le ga assà de esser amighe. Paolo no l’è stà mia rugno con lore e anca no le ga giulgà. Invesse lu el ga pensà nele robe bone che le fea. Par esémpio, lore le servia a Geovà fea tanti ani e lu el savea che Geovà le ghe volea tanto ben. Cossita, lu l’è stà bon de incoraiar quele sorele a far la pace intrà de lore. Come Paolo sempre el vedea le robe bone che i altri i fea, lu l’era bon de seitar contento e de gaver boni amighi nela congregassion.
Fà sforso par no parlar mal dei fradei (Vedi el paràgrafo 19.) *
19. (a) Come che i ansiani i pol far compagno a Paolo? (b) Cossa te ghè imparà del ritrato che mostra el ansiano drio netar el Salon del Regno?
19 Cossa el esémpio de Paolo el insegna? I ansiani i ga de sforsarse de veder le qualità dei fradei e sorele. Anca che semo imperfeti, tuti noantri ghemo bele qualità. (Fil. 2:3) L’è vera che i fradei i fà sbali e dele volte i ansiani i ga de darghe consili. Anca cossita i ansiani i ga de sforsarse par veder quel che i fradei i ga de bon. Par esémpio, el amor che lori i ga par Geovà, el so sforso de far quel che l’è giusto e quel che ancora i pol deventar. Cossita tuti i restarà contenti nela congregassion.
SEITÉ A FAR COMPAGNO A PAOLO
20. Come che i ansiani i pol deventar cada volta pi bravi?
20 Come che i ansiani i pol deventar cada volta pi bravi? Lori i pol seitar a studiar sora el esémpio de Paolo. Nel Índice das Publicações da Torre de Vigia, va in “Paulo” e dopo in “exemplo para os anciãos”. Intanto che i ansiani i ze drio studiar sora el esémpio de Paolo, lori i pol domandarse: ‘Come che el so esémpio pol giutarme a seitar contento col me laoro de ansiano?’
21. Cossa che i ansiani i ga sempre de ricordarse?
21 Valtri che sì ansiani gavé de ricordarve che Geovà l’è drio domandarve che sì fedeli e nò perfeti. (1 Cor. 4:2) Geovà el ga dato tanto valor a Paolo parché lu el ga fato un bel laoro e l’è stà fedele. Valtri anca podé esser sicuri che Geovà el dà tanto valor a tuto quel che fé par la congregassion. Ricordeve che lu no’l ndarà mai “desmentegarse del vostro laoro e del amor che gavé dimostrà par el so nome, par servir i santi e par continuar a servirli”. — Ebr. 6:10.
CÀNTICO 109 Mostremo amor un al altro de cuor
^ I ansiani i ama tanto i fradei e i fà tante robe par giutarli. In questo stùdio, ndaremo veder che dificoltà i ansiani i infronta e come el esémpio del apòstolo Paolo el pol giutarli. Questo stùdio anca el sarà tanto bel par tuti noantri parché saremo boni de capir el laoro che i ansiani i fà. Cossita ndaremo darghe ancora pi valor e gavaremo ancora pi voia de giutarli e mostrar che li amemo.
^ (Efesi 6:14, 15) Gavé de star firmi, col vostro sinturon dela verità streto nela sintura, gavé de vestir la corassa dela giustìssia, 15 e gaver nei pié le sandàlie dela disposission par predicar le bone notìssie dela pace.
^ (1 Tessalonissensi 2:7) Al contràrio, noantri ve ghemo tratà con amor e bontà, come una mare che la dà de ciuciar e la tende con amor dei so pròpi fioi.
^ (Filipensi 4:13) Par tute le robe go forsa gràssie a quel che el me dà poder.
^ (Filipensi 4:1-3) Alora me fradei, mi ve amo tanto e go caro de vederve. Valtri me assé contento e sì la me corona. Seité leai come dissìpoli del Signor, me amadi fradei. 2 Suplico a Evòdia e a Sìntiche che le gàpie la medèsima maniera de pensar in union col Signor. 3 E parché te laori ben con mi, te domando che te seiti a giutar queste done che le ga laorà tanto insieme con mi par predicar le bone notìssie, insieme con Clemente e con altri che i ga laorà con mi, che i ga i so nomi scriti nel libro dela vita.
^ RITRATI: Un fradel el predica a un omo quando lori i ze drio ndar via del laoro.
^ RITRATI: Un caro ansiano el discore con un fradel che no’l parla tanto coi altri.
^ RITRATI: Un ansiano l’è drio dar consili a un fradel che l’è disgustà con qualcossa che ga sucedesto.
^ RITRATI: Un ansiano el pensa che l’è meio no dirghe gnente a un fradel che l’è drio vardar le robe nel telèfono invesse de laorar.
