ALATIKE AKO 14
ʼU Tagata ʼAfeā, Kotou Haga Faʼifaʼitakiʼi Ia Te Apositolo Ko Paulo
“Kotou faʼifaʼitakiʼi au.”—1 KO. 11:1.
KATIKO 99 Te ʼu Lauʼi Miliona Tehina
TE ʼU MANATU FAKANOUNOU *
1-2. ʼE lava tokoni feafeaʼi ia te faʼifaʼitaki ʼo te apositolo ko Paulo ki te kau tagata ʼafeā ia ʼaho nei?
NEʼE ʼofa ia te apositolo ko Paulo ʼi ʼona tehina. Neʼe gaue kinakina maʼa natou. (Gaue 20:31) ʼI tana fai te faʼahi ʼaia, neʼe ʼofa mamahi ʼona tehina ia Paulo. ʼI te tahi aluʼaga, ʼi te iloʼi e te kau tagata ʼafeā ʼo Efeso ʼe mole natou toe felaveʼi anai mo Paulo, “neʼe natou faifetagihi fuli.” (Gaue 20:37) ʼE ʼofa mamahi ʼotatou tagata ʼafeā faʼafai ʼi ʼonatou tehina mo tuagaʼane, pea ʼe natou fai ia meʼa fuli moʼo tokoni kia natou. (Flp. 2:16, 17) Koia, ʼi ʼihi temi, ʼe felaveʼi te kau tagata ʼafeā mo te ʼu faigataʼaʼia. Kotea ʼae ʼe feala ke tokoni kia natou ke natou katakiʼi?
2 ʼE feala ki ʼatatou kau tagata ʼafeā ʼae ʼe gaue kinakina ke natou mulimuli ki te faʼifaʼitaki ʼo Paulo. (1 Ko. 11:1) Neʼe ko he tagata pe ohage ko tatou. Ko Paulo, neʼe ko he tagata heʼe haohaoa, pea ʼi ʼihi temi, neʼe fetau ki te fai ʼo te meʼa ʼae ʼe totonu. (Loma 7:18-20) Pea neʼe tau mo te ʼu ʼahiʼahi kehekehe. Kae neʼe mole lotovaivai ia Paulo ʼo puli ai tona fiafia. ʼI tanatou faʼifaʼitakiʼi ia Paulo, ʼe feala ke tauʼi e te kau tagata ʼafeā ʼonatou faigataʼaʼia pea mo taupau tonatou fiafia ʼi tanatou tauhi ʼae kia Sehova. Tou vakaʼi pe ʼe feafeaʼi hanatou fai te faʼahi ʼaia.
3. Kotea ʼae ka tou vakaʼi anai ʼi te alatike ʼaeni?
3 ʼI te alatike ʼaeni, ʼe tou vakaʼi anai ia faigataʼaʼia ʼe fa ʼe hoko tuʼumaʼu ki te kau tagata ʼafeā: (1) ko te vaevae lelei ʼo te temi ki te faifakamafola mo ʼihi atu gaue, (2) ko te liliu ko he tauhi ovi lototokaga, (3) ko te tauʼi ʼo ʼonatou vaivaiʼaga, pea (4) ko te katakiʼi ʼo te ʼu vaivaiʼaga ʼo ʼihi. ʼE tou vakaʼi anai pe neʼe tauʼi feafeaʼi e Paulo ia te ʼu faigataʼaʼia takitahi ʼaia pea ʼe lava mulimuli feafeaʼi te kau tagata ʼafeā ki tana faʼifaʼitaki.
TE VAEVAE LELEI ʼO TE TEMI KI TE FAIFAKAMAFOLA MO ʼIHI ATU GAUE
4. He koʼe ʼe faigataʼa ki te kau tagata ʼafeā tanatou lagolago ki te faifakamafola?
4 ʼE mole faigafua. ʼE lahi te ʼu gaue ʼa te kau tagata ʼafeā, ʼo kau ai mo te takitaki ʼo te faifakamafola. Ohage la, tokolahi ia natou ʼe natou takitaki te fono ʼo te vahaʼa ʼo feia mo te ako Tohi-Tapu ʼo te kokelekasio. ʼE natou fai mo ʼihi atu akonaki. ʼE natou akoako te kau faifekau fakaminisitelio pea ʼe natou fiafia ʼi te foaki tuʼumaʼu ʼo he fakalotomalohi ki te ʼu tehina mo tuagaʼane. (1 Pet. 5:2) ʼE gaue ʼihi kau tagata ʼafeā ʼi te laga fale pea mo fakamaʼa te Fale Fono pea mo ʼihi atu fale ʼo te kautahi. Kae, ohage pe ko te ʼu kokelekasio fuli, ko te gaue tafito ʼa he tagata ʼafeā, ko te fakamafola ʼo te logo lelei.—Mat. 28:19, 20.
5. Kotea te faʼifaʼitaki neʼe tuku mai e Paulo ʼo ʼuhiga mo te faifakamafola?
5 Te faʼifaʼitaki ʼa Paulo. Ko te faʼahi ʼae neʼe tokoni kia Paulo ke ina fakahoko lelei tana minisitelio, ʼe ko te tokoni ʼae neʼe ina foaki ia Filipe 1:10, ʼae neʼe ina ui fenei ai: “Ke kotou iloʼi papau te ʼu meʼa ʼae ʼe maʼuhiga ʼaupito.” Neʼe mulimuli ia Paulo ki te tokoni ʼae neʼe ina foaki e ia totonu. Neʼe foaki age tana gaue, pea lolotoga he ʼu taʼu, neʼe ina fakaʼuhiga ia te gaue ʼaia ko he meʼa ʼe maʼuhiga ʼaupito. Neʼe faifakamafola “ia muʼa ʼo te hahaʼi pea mo te ʼu ʼapi.” (Gaue 20:20) Neʼe mole faifakamafola ʼi he temi pe ʼo te ʼaho, peʼe ʼi he ʼaho pe ʼo te vahaʼa. Neʼe ina toʼo te ʼu faigamalie fuli ke faifakamafola ai. Ohage la, ʼi tana fakaatalitali ki ʼona kaugā gaue ʼi Ateni, neʼe ina fakaha te logo lelei ki te kiʼi kutuga ʼe maʼu tuʼulaga, pea neʼe fua lelei tana gaue ʼaia. (Gaue 17:16, 17, 34) Maʼia mo tana nofo ʼi te “pilisoni,” neʼe faifakamafola ki te kau pilisoni.—Flp. 1:13, 14; Gaue 28:16-24.
6. Kotea te akoako neʼe fai e Paulo ki ʼona tehina?
6 Neʼe fakaʼaogaʼi lelei e Paulo ia tona temi. Neʼe ina fakaafe tuʼumaʼu ʼihi ke natou kaugā gaue mo ia ʼi te minisitelio. Ohage la, ʼi tana ʼuluaki folau fakamisionea, neʼe ina ʼave ia Soane, ʼae neʼe toe higoa mo Maleko. Pea ʼi tana lua folau leva, neʼe ina ʼave ia Timoteo. (Gaue 12:25; 16:1-4) Neʼe akoʼi e Paulo ki te ʼu tagata ʼaia pe ʼe feafeaʼi ia te faʼahiga takitaki ʼo he kokelekasio, mo te faʼahiga fai ʼo te gaue fakatauhi ovi pea mo feafeaʼi hanatou liliu ko he ʼu tagata faiakonaki faiva.—1 Ko. 4:17.
Kotou faʼifaʼitakiʼi ia Paulo ʼo kotou toʼo te faigamalie fuli ke kotou faifakamafola ai (Vakaʼi te palakalafe 7) *
7. ʼE lava mulimuli feafeaʼi te kau tagata ʼafeā ki te tokoni ʼa Paulo ia Efeso 6:14, 15?
7 Te ako. ʼE feala ke faʼifaʼitakiʼi e te kau tagata ʼafeā ia Paulo ʼo natou toʼo te ʼu faigamalie fuli ke natou faifakamafola ai, kae mole gata pe ki te faifakamafola ʼi te ʼu ʼapi. (Lau ia Efeso 6:14, 15.) Ohage la, ʼe feala ke natou faifakamafola moka olo ʼo faifakatau peʼe ʼi tonatou fale gaue. Moka natou kau ki he gaue laga fale, ʼe feala ke natou tala te logo lelei ki te ʼu vahaʼa fale pea mo te kau faikoloa. Ohage ko Paulo, ʼe feala ki te kau tagata ʼafeā ke natou fakaʼaogaʼi te temi ki te faifakamafola ke natou akoako ai ni ʼihi, ʼo kau ai mo te kau faifekau fakaminisitelio.
8. Kotea ʼe ʼaoga ke fai e he tagata ʼafeā ʼi ʼihi temi?
8 ʼE mole tonu ke maʼumaʼua pe te kau tagata ʼafeā ki te ʼu gaue ʼo te kokelekasio peʼe ko te siliko ʼo mole kei maʼu honatou temi ki te faifakamafola. Ke vaevae lelei tonatou temi, ʼi ʼihi temi, ʼe ʼaoga ke natou fakafisi ki ʼihi atu gaue. ʼI te hili ʼo tanatou fakakaukauʼi ʼi te faikole, ʼe lagi natou tokagaʼi ʼe mole feala ke natou fakahoko ia he gaue, he ʼe feala ai ke natou liʼaki ia te ʼu meʼa maʼuhiga tafito. Ohage ko te fai ʼo te ako fakafamili ʼi te vahaʼa fuli peʼe ko te kau ki te faifakamafola peʼe ko te akoako ʼo ʼanatou fanau ki te faifakamafola. ʼE faigataʼa ki ʼihi tanatou fakafisi ki he gaue, kae ʼe feala ke natou tui papau ʼe mahino ia Sehova ki tanatou loto ʼae ke natou fakapotopoto ia meʼa fuli.
KOTOU LILIU KO HE TAGATA TAUHI OVI LOTOTOKAGA
9. Kotea ʼae ʼe faigataʼa ki te kau tagata ʼafeā tanatou fai ʼuhi ko tanatou maʼumaʼua?
9 He koʼe ʼe faigataʼa? ʼE felaveʼi te hahaʼi ʼa te ʼAtua mo te ʼu tuʼuga ʼahiʼahi. ʼI te ʼu ʼaho fakamuli ʼaeni, ʼe ʼaoga mai kia tatou fuli he ʼu fakalotomalohi, he tokoni pea mo he fakalotofimalie. Pea ʼi ʼihi temi, ʼe ʼaoga ki ʼihi ia he tokoni ke ʼaua naʼa natou fai he aga ʼe kovi. (1 Tes. 5:14) ʼE mahino ia, ʼe mole feala ke pulihi e te kau tagata ʼafeā ia te ʼu ʼahiʼahi fuli ʼe tau mo te hahaʼi ʼa Sehova. Kae ʼe loto e Sehova ke fai e te kau tagata ʼafeā ia mea fuli moʼo fakalotomalohiʼi pea mo puipui tana faga ovi. Logo la tonatou maʼumaʼua, ʼe feala koa ke maʼu e te kau tagata ʼafeā he temi ke natou tokoni ai ki ʼonatou tehina mo tuagaʼane?
Kotou fakavikiviki te ʼu tehina mo tuagaʼane pea mo fakalotomalohiʼi natou (Vakaʼi te palakalafe 10, 12) *
10. Ka tou lau ia 1 Tesalonika 2:7, neʼe tokaga feafeaʼi ia Paulo ki te hahaʼi ʼa Sehova?
10 Te faʼifaʼitaki ʼa Paulo. Neʼe fai e Paulo he ʼu fakavikiviki ki ʼona tehina pea mo fakalotomalohiʼi natou. ʼE tonu ke mulimuli te kau tagata ʼafeā ki tana faʼifaʼitaki ʼofa ʼo natou tokakaga fakalelei ki te hahaʼi ʼa Sehova ʼaki he agalelei. Neʼe fakaha e Paulo ki ʼona tehina ʼe ʼofa ia natou pea ʼe toe ʼofa mo Sehova ia natou. (Lau ia 1 Tesalonika 2:7.) Neʼe tokaga kia natou ʼo te kokelekasio ohage ko hona ʼu kaumeʼa, ʼo fakatahi tuʼumaʼu mo natou. (2 Ko. 2:4; Efe. 2:4, 5) Neʼe ina fakaha age ʼe falala kia natou ʼaki tana palalau fakahagatonu kia natou ʼo ʼuhiga mo te ʼu meʼa ʼae neʼe tuʼania ki ai pea mo ʼona vaivaiʼaga. (2 Ko. 7:5; 1 Tim. 1:15) Kae neʼe mole tokaga pe ia Paulo ki ʼona fihifihia. Neʼe fia tokoni tafito ki ʼona tehina.
11. He koʼe neʼe tokoniʼi e Paulo ʼona tehina mo tuagaʼane?
11 ʼI ʼihi temi, neʼe ʼaoga ke tokoniʼi e Paulo ʼona tehina mo tuagaʼane. Kae neʼe mole ina fai te faʼahi ʼaia ʼaki te ita. Neʼe ina tokoniʼi natou koteʼuhi neʼe tuʼania ʼo ʼuhiga mo natou pea neʼe ina fia puipui natou mai te ʼu tuʼutamaki. Neʼe faiga tuʼumaʼu ke mahino ʼana tokoni pea ke mole ina fakalainoaʼi natou. Ohage la, ʼi tana tohi ki te kau Kolonito, neʼe foaki ai e Paulo he ʼu tokoni fakahagatonu. ʼI te hili ʼo tana fai te tohi ʼaia, neʼe ina fekauʼi ia Tito ke alu ki Kolonito. Neʼe fia iloʼi e Paulo pe ʼe natou tali feafeaʼi anai ia tana tohi. Neʼe fiafia ʼaupito ʼi tana iloʼi ʼae neʼe natou tali lelei tana tokoni.—2 Ko. 7:6, 7.
12. ʼE lava fakalotomalohiʼi feafeaʼi e te kau tagata ʼafeā ʼonatou tehina mo tuagaʼane?
12 Te ako. ʼE feala ke mulimuli te kau tagata ʼafeā ki te faʼifaʼitaki ʼa Paulo ʼo natou fakatahi tuʼumaʼu mo ʼonatou tehina mo tuagaʼane. ʼE feala ke natou ʼomai fakatomuʼa ki te ʼu fono ʼo faipalalau mo natou. ʼE feala ke tou fakaʼaogaʼi he ʼu kiʼi minuta moʼo fakalotomalohiʼi he tehina peʼe ko he tuagaʼane ʼe ʼaoga ki ai he tokoni. (Loma 1:12; Efe. 5:16) Ko he tagata ʼafeā ʼe ina faʼifaʼitakiʼi ia Paulo ʼe feala mo ia ke ina fakalotomalohiʼi ʼona tehina mo tuagaʼane ʼaki te Tohi-Tapu pea mo fakaha age ʼe tokaga anai ia te ʼAtua kia natou. Pea ʼe ina fakaha tona ʼofa kia natou ʼae ʼe tokaga ki ai. ʼE felogoi tuʼumaʼu mo natou pea mo ina toʼo te ʼu faigamalie fuli ke ina foaki age kia natou he ʼu fakavikiviki. Koia ka foaki e he tagata ʼafeā ia he tokoni, ʼe tonu ke ina fakatafito ki te Folafola ʼa te ʼAtua. ʼE mahino tana tokoni pea mo ina fai ʼaki he agalelei koteʼuhi ʼe tokaga ki tana faʼahiga foaki he ʼu tokoni.—Kal. 6:1.
TE TAUʼI ʼO ʼOTATOU VAIVAIʼAGA
13. ʼE malave feafeaʼi ki he tagata ʼafeā ʼona vaivaiʼaga?
13 He koʼe ʼe faigataʼa? ʼE mole haohaoa te kau tagata ʼafeā. Ohage ko te tagata fuli, ʼe natou lakahala. (Loma 3:23) ʼI ʼihi temi, ʼe mole natou maʼu te fakasiosio tonu ʼo ʼuhiga mo ʼonatou vaivaiʼaga. Ko ʼihi ʼe natou tokagaʼi pe ʼonatou vaivaiʼaga ʼo natou lotovaivai ai. Pea ko ʼihi ʼe natou manatu ʼe mole kovi ʼonatou vaivaiʼaga pea ʼe mole natou fetogi.
14. Ka tou lau ia Filipe 4:13, neʼe lava tauʼi feafeaʼi e Paulo ʼona vaivaiʼaga?
14 Te faʼifaʼitaki ʼa Paulo. Neʼe tokagaʼi e Paulo ʼaki he agavaivai, ʼe mole feala ke ina tauʼi tokotahi ʼona vaivaiʼaga. Neʼe ʼaoga age te malohi ʼo te ʼAtua. Ki muʼa atu, ko Paulo neʼe ko he tagata logogataʼa mo agafefeka neʼe ina fakatagaʼi te kau Kilisitiano. Kae ki muli age, neʼe ina tokagaʼi ʼona vaivaiʼaga pea neʼe fetogi leva tana aga. (1 Tim. 1:12-16) ʼAki te tokoni ʼa Sehova, neʼe liliu ia Paulo ko he tagata tauhi ovi agalelei, mo lotomahino pea mo agavaivai. Neʼe ina iloʼi ʼona vaivaiʼaga, kae neʼe falala ki te lotofakamolemole ʼa Sehova ʼi hana lotovaivai ʼuhi ko ʼona vaivaiʼaga. (Loma 7:21-25) Neʼe ina iloʼi ʼe mole haohaoa. Kae neʼe gaue kinakina ke lelei age tona ʼuhiga Kilisitiano pea neʼe falala ʼaki he agavaivai ki te tokoni ʼa Sehova ki te fakahoko ʼo tana gaue.—1 Ko. 9:27; lau ia Filipe 4:13.
Kotou tau’i ’okotou vaivai’aga (Vakaʼi te palakalafe 14-15) *
15. ʼE tonu ke fakaʼuhiga feafeaʼi e te kau tagata ʼafeā ʼonatou vaivaiʼaga?
15 Te ako. ʼE mole fakanofo te kau tagata ʼafeā he ʼe natou haohaoa. Kae ʼe loto e Sehova ke natou tokagaʼi ʼonatou vaivaiʼaga pea ke natou fakaha te ʼuhiga Kilisitiano. (Efe. 4:23, 24) ʼE tonu ki he tagata ʼafeā ke ina vakavakaʼi ia ia totonu ʼaki ia te Folafola ʼa te ʼAtua pea mo fetogi. ʼE tokoni anai ia Sehova kia ia ke fiafia pea ke liliu ko he tagata ʼafeā lelei.—Sakp. 1:25.
TE ʼU VAIVAIʼAGA ʼO ʼIHI
16. Kotea ʼae ʼe feala ke hoko mo kapau ʼe tokagaʼi tuʼumaʼu e he tagata ʼafeā te ʼu vaivaiʼaga ʼo ʼona tehina mo tuagaʼane?
16 He koʼe ʼe faigataʼa? ʼE feala ke tokagaʼi e te kau tagata ʼafeā te ʼu vaivaiʼaga ʼo ʼonatou tehina mo tuagaʼane ʼi te kokelekasio koteʼuhi ʼe natou gaue fakatahi mo natou. Kae kapau ʼe mole natou tokakaga, ʼe feala ke lotovaivai te kau tagata ʼafeā, mo natou agafefeka pea mo faifatufatu. Neʼe kua fakatokaga e Paulo ia te kau Kilisitiano, ʼe ko te loto aia ʼo Satana.—2 Ko. 2:10, 11.
17. Kotea te manatu ʼa Paulo ʼo ʼuhiga mo ʼona tehina mo tuagaʼane?
17 Te faʼifaʼitaki ʼa Paulo. Neʼe ina maʼu ia he manatu ʼe lelei ʼo ʼuhiga mo ʼona tehina mo tuagaʼane. Neʼe mahino ki ʼonatou vaivaiʼaga, koteʼuhi ʼi ʼihi temi neʼe malave kovi tanatou aga kia ia totonu. Kae neʼe iloʼi e Paulo, kapau ʼe fai e he tahi ia he meʼa ʼe kovi, ʼe mole fakaʼuhiga leva ʼe ko he tahi agakovi. Neʼe ʼofa ʼi ʼona tehina pea neʼe ina tokagaʼi tafito ʼonatou kalitate. ʼI te temi ʼae neʼe faigataʼa ai ki ʼona tehina mo tuagaʼane tanatou fai te meʼa ʼe totonu, neʼe mole ina ui ʼe natou agakovi kae neʼe ʼaoga he tokoni kia natou.
18. Ka tou lau ia Filipe 4:1-3, neʼe fakatokatoka feafeaʼi e Paulo ia te aluʼaga ʼae neʼe hoko kia Evoti mo Sinitise?
18 Kotou tokagaʼi pe neʼe fakatokatoka feafeaʼi e Paulo ia te aluʼaga neʼe hoko ki te ʼu tuagaʼane ʼe toko lua ʼi te kokelekasio ʼo Filipe. (Lau ia Filipe 4:1-3.) Neʼe hoko he fihifihia ia Evoti mo Sinitise pea neʼe mole kei nā felogoi. Neʼe mole palalau fefeka ia Paulo kia naua pea neʼe mole ina fakamauʼi naua. Neʼe ina tokagaʼi tafito ʼonā kalitate. Neʼe ko he ʼu tuagaʼane agatonu pea neʼe kua fualoa tanā tauhi kia Sehova. Neʼe iloʼi e Paulo, ʼe ʼofa ia Sehova ia naua toko lua. ʼI te maʼu e Paulo he faʼahiga manatu ʼe lelei ʼo ʼuhiga mo naua, neʼe ina fakalotomalohiʼi ai naua ke nā fakatokatoka. ʼAki tanā maʼu te faʼahiga manatu ʼaia, neʼe ina taupau ai tonā fiafia pea mo felogoi lelei ai mo te ʼu tehina mo tuagaʼane ʼo te kokelekasio.
Kotou faiga ke ’aua na’a kotou fakamau’i ’ihi (Vakaʼi te palakalafe 19) *
19. (1) ʼE lava taupau feafeaʼi e te kau tagata ʼafeā he manatu ʼe lelei ʼo ʼuhiga mo ʼonatou tehina mo tuagaʼane? (2) Kotea te ako ʼe kotou taʼofi mai te pāki ʼe ha ai te tagata ʼafeā ʼe ina fakamaʼa te Fale Fono?
19 Te ako. ʼU tagata ʼafeā, kotou kumikumi lelei te ʼu kalitate ʼo ʼokotou tehina mo tuagaʼane. ʼE tou heʼe haohaoa fuli, kae ʼe tou maʼu foki mo ʼotatou kalitate. (Flp. 2:3) ʼE moʼoni, ʼi ʼihi temi, ʼe ʼaoga ke fakatonutonuʼi e te kau tagata ʼafeā ia te faʼahiga manatu ʼo he tehina peʼe ko he tuagaʼane. Kae ohage ko Paulo, ʼe tonu ke mahino te kau tagata ʼafeā pe koʼe ʼe ha te ita ʼo he tahi ʼi ʼana palalau mo ʼana gaue. Koia ʼe tonu anai ke natou tokagaʼi tafito tona ʼofa ʼae kia Sehova, tana faʼa kataki ʼi tana tauhi ki te ʼAtua pea mo te lelei ʼe feala ke ina fai. Ko te ʼu tagata ʼafeā ʼae ʼe natou maʼu he faʼahiga manatu ʼe lelei ʼe feala ke natou tokoni ki ʼonatou tehina mo tuagaʼane ke natou logoʼi ʼe ofainaʼi natou ʼi te kokelekasio.
KOTOU HAGA FAʼIFAʼITAKIʼI IA PAULO
20. ʼE lava haga mulimuli feafeaʼi ia te kau tagata ʼafeā ki te faʼifaʼitaki ʼa Paulo?
20 ʼU tagata ʼafeā, kotou haga akoʼi ia te faʼifaʼitaki ʼa Paulo. Ohage la, te tohi Index des publications des Témoins de Jéhovah, ʼe feala ke kotou sioʼi ʼi te kupu “Paulo,” ʼi te kupu taki “exemple pour les anciens” (faʼifaʼitaki maʼa te kau tagata ʼafeā.) ʼI takotou lau te ʼu alatike ʼaia, kotou fai te fehuʼi ʼaeni: ‘ ʼE au lava mulimuli feafeaʼi ki te faʼifaʼitaki ʼa Paulo pea mo taupau toku fiafia ʼi taku gaue tagata ʼafeā?’
21. Kotea ʼae ʼe tonu ke tui papau ki ai te kau tagata ʼafeā?
21 ʼU tagata ʼafeā, kotou manatuʼi neʼe mole kole atu e Sehova ke kotou liliu ʼo haohaoa, kae ke kotou agatonu. Neʼe leleiʼia e Sehova ia te faʼafai ʼa Paulo pea mo tana agatonu. (1 Ko. 4:2) Kotou tui papau, ʼe toe leleiʼia e te ʼAtua ia te gaue ʼae ʼe kotou fai maʼa ia. Pea ʼe mole galoʼi anai e Sehova ia “takotou gaue mo te ʼofa ʼae neʼe kotou fakaha ki tona huafa ʼi takotou tokoni ki te kau maʼoniʼoni ʼi muʼa atu pea mo takotou haga fai ʼi te temi nei.”—Hep. 6:10.
KATIKO 87 ʼOmai, Ke Kotou Maʼu Ia He Fakafimalie
^ ʼE ko he toe pilivilesio kia tatou ia tatatou maʼu te ʼu fua lelei ʼo te gaue kinakina ʼa te kau tagata ʼafeā ʼofaina mo lototokaga. ʼI te alatike ʼaeni, ʼe tou talanoa anai kia aluʼaga ʼe fa ʼe natou tau mo ia. ʼE tou vakaʼi anai pe ʼe tokoni feafeaʼi ia te faʼifaʼitaki ʼo te apositolo ko Paulo ki te kau tagata ʼafeā ia ʼaho nei ke natou tauʼi te ʼu aluʼaga ʼaia. ʼE toe tokoni mai anai te alatike kia tatou fuli ke tou fakaha te lotomahino ki te kau tagata ʼafeā mo tou fakaha kia natou te ʼofa pea mo tou lagolago kia natou.
^ FAKAMATALA ʼO TE ʼU PĀKI: Ko he tehina ʼe mavae mai tona fale gaue, pea ʼe faifakamafola ki tona kaugā gaue.
^ FAKAMATALA ʼO TE ʼU PĀKI: Ko he tagata ʼafeā ʼe tokoni ʼaki he agalelei ki he tehina ʼe mole fia fakatahi mo ʼihi.
^ FAKAMATALA ʼO TE ʼU PĀKI: Ko he tehina ʼe ina foaki he ʼu tokoni ʼaoga ki he tahi neʼe ita.
^ FAKAMATALA ʼO TE ʼU PĀKI: Ko he tagata ʼafeā ʼe mole ina fakatonutonuʼi he tehina ʼe mole tokaga ki te gaue ʼae neʼe foaki age.