1, 2. ¿Xiñee zanda gacané ejemplu stiʼ Pablo ca ancianu?

 GUNNAXHII apóstol Pablo ca hermanu, ngue runi guizáʼ bíʼnibe dxiiñaʼ para gacanebe laacaʼ (Hech. 20:31). Ne pur ngue guizáʼ gunnaxhiicaʼ laabe. Guzéʼtenu ti ejemplu, dxi gunna ca ancianu de Éfeso maʼ qué zabiguetaʼ gúʼyacaʼ laabe «nabé biinacaʼ» (Hech. 20:37). Tiempu riʼ laaca guizáʼ nadxii ca ancianu ca hermanu sticaʼ nga runi, guizáʼ racanécabe laacaʼ (Filip. 2:16, 17). Peru nuu biaje ridxaagalúcabe caadxi guendanagana. ¿Xi zanda gacané laacabe yaʼ?

² Neca napa ca ancianu ca stale dxiiñaʼ, galán chinándacabe ejemplu stiʼ apóstol Pablo (1 Cor. 11:1). Cadi perfectu guca Pablo, laaca binni ruchee laabe ne guyuu biaje bíʼnibe stipa para gúnibe ni jneza (Rom. 7:18-20). Neca bidxaagalube stale guendanagana, qué nireebe gana ne qué nusaana de ñuube nayecheʼ. Pa chinanda ca ancianu ejemplu stibe la? zúnicaʼ ni ná Jehová né guendanayecheʼ neca guidxaagalucaʼ guendanagana. Guidúʼyanu ximodo zanda gúnicabe ni.

3. ¿Xi zadúʼyanu lu artículo riʼ, ne xi zazíʼdinu?

³ Lu artículo riʼ zadúʼyanu tapa guendanagana ni ridxaagalú ca ancianu. Primé, gácacabe equilibradu né ca dxiiñaʼ ni nápacabe ne guni predicárcabe. Guiropa, gácacabe pastor nachaʼhuiʼ. Guionna, cadi guireecabe gana ora gucheecabe. Ne guidapa, gápacabe paciencia xcaadxi hermanu. Zazíʼdinu ximodo bidxiilú Pablo ca guendanagana riʼ ne ximodo zanda chinanda ca ancianu ejemplu stibe.

4. ¿Xiñee zándaca gaca nagana para ca ancianu guni predicarcaʼ?

⁴ ¿Xiñee nagana ni? Runi predicar ca ancianu ca, peru laaca nápacabe xcaadxi dxiiñaʼ. Guidúʼyanu caadxi de laacani. Nuu biaje runi presidírcabe lu reunión ni raca ndaaniʼ semana o rutiidicabe Reunión ra riuundaʼ Biblia. Laaca rápacabe asignación o discursu. Ne laaca riquiiñecabe stale tiempu para guni capacitárcabe ca siervu ministerial ne cúʼcabe gana ca hermanu (1 Ped. 5:2). Nuu ancianu racané lu construcción ne mantenimientu stiʼ Yoo stiʼ Reinu ne xcaadxi lugar ni riquiiñeʼ para gaca adorar Jehová. Peru ni jma risaca para ca ancianu nga guni predicarcaʼ ca noticia nacubi, cásica runi ca publicador ni (Mat. 28:19, 20).

5. ¿Xi ejemplu galán bisaana Pablo ora biʼniʼ predicar?

⁵ Ejemplu stiʼ Pablo. Lu Filipenses 1:10 riete xiñee guca Pablo ti buen predicador. Ndiʼ nga conseju bidiibe: «Ti ganna chaahuitu xii nga ni jma risaca». Laapebe yenándabe conseju riʼ. Bidii Dios laabe dxiiñaʼ de guni predicarbe ne biiyabe ni casi tobi de ca cosa ni jma risaca lu xquendanabánibe. Biʼniʼ predicarbe nezalú «stale binni ne de yoo pur yoo» (Hech. 20:20). Qué ñuni predicarbe ora gunda si o ti biaje si lu ti semana, sínuque biʼniʼ aprovecharbe guiráʼ hora para guni predicarbe. Guzéʼtenu ti ejemplu, ti biaje laga cabézabe ca compañeru stibe ndaaniʼ guidxi Atenas, biʼniʼ predicarbe ca noticia nacubi ra nuu ti grupu de binni risaca ne guleendube ni galán (Hech. 17:16, 17, 34). Ne dxi deguyoobe ndaaniʼ ti yoo, biʼniʼ predicarbe ca ni cayapa laabe ne ca ni yeganna laabe (Hech. 28:16-24; Filip. 1:13, 14).

6. ¿Ximodo biʼniʼ capacitar Pablo xcaadxi hermanu?

⁶ Biquiiñeʼ Pablo tiempu stiʼ jneza. Gúpabe costumbre guni invitarbe xcaadxi para guni predicarné laabe. Guzéʼtenu ti ejemplu, lu primé viaje misional biʼniʼ Pablo, biʼniʼ invitarbe Juan Marcos ne lu guiropa que la? Timoteo (Hech. 12:25; 16:1-4). Bíʼnibe stipa gusiidibe ca hombre riʼ quixhe chaahuicaʼ dxiiñaʼ raca ndaaniʼ congregación, gácacaʼ pastor nachaʼhuiʼ ne gusiidicaʼ jneza (1 Cor. 4:17).

7. ¿Ximodo zanda chinanda ca ancianu conseju ni bidii Pablo ni zeeda lu Efesios 6:14, 15?

⁷ Ni rizíʼdinu. Rinanda ca ancianu ejemplu stiʼ Pablo ora runi predicarcaʼ de yoo pur yoo ne ora rúnicaʼ ni ra tiica si  (biindaʼ Efesios 6:14, 15). Guzéʼtenu ti ejemplu, zanda gúnicabe ni ora zécabe mandadu o ra dxiiñaʼ. O pa cayacanécabe lu dxiiñaʼ de construcción stiʼ xquidxi Dios, zanda guni predicárcabe ca binni nabeza gaxha ne ca proveedor. Ne cásica biʼniʼ Pablo, ora maʼ ziguni predicárcabe zanda guni capacitárcabe xcaadxi hermanu, casi ca siervu ministerial.

8. Nuu biaje, ¿xi caquiiñeʼ guni ti ancianu?

⁸ Guiráʼ dxiiñaʼ ni napa ca ancianu ndaaniʼ congregación o stiʼ circuito, cadi naquiiñeʼ cueecani tiempu stícabe dede maʼ qué guni predicárcabe. Pa racaláʼdxicabe gácacabe equilibradu, nuu biaje cadi naquiiñeʼ guicaacabe xiixa dxiiñaʼ. Zándaca despué de guni orárcabe, gudiicabe cuenta pa guicaacabe sti dxiiñaʼ, maʼ qué zápacabe tiempu para gúnicabe adoración en familia guiráʼ semana, guni predicárcabe o gusiidicabe ca xiiñicabe guni predicarcaʼ. Nuu tu laa raca nagana para laa gudxii xiixa dxiiñaʼ ni gudiicabe laa, peru zanda ganna dxíchicabe riene Jehová racaláʼdxicabe gácacabe equilibradu.

9. Nánnanu guizáʼ nuu xhiiñaʼ ca ancianu, nga runi, ¿xi guendanagana ridxaagalúcabe?

⁹ ¿Xiñee nagana ni? Cumu nabáninu lu ca últimu dxi la? laanu, ca xpinni Jehová, rápanu stale guendanagana. Nga runi riquiiñenu tu cuʼ gana laanu, tu gacané ne tu quixhedxí ladxidoʼno. Nuu biaje, caquiiñeʼ tuuxa hermanu tu gacané laa para cadi guireechú de lu neza stiʼ Dios (1 Tes. 5:14). Dxandíʼ, qué zanda diʼ cuee ca ancianu guiráʼ guendanagana ni gápanu. Peru racalaʼdxiʼ Jehová gúnicabe stipa pur cúʼcabe gana ne gápacabe ca dendxuhuiiniʼ stiʼ. Yanna, ¿paraa cueecabe tiempu para gacanécabe ca hermanu pa guizáʼ nuu xhiiñacabe yaʼ?

10. Casi ná 1 Tesalonicenses 2:7, ¿ximodo biʼniʼ tratar Pablo ca hermanu stiʼ?

¹⁰ Ejemplu stiʼ Pablo. Nabé biʼniʼ felicitarbe ca hermanu ne guluube gana laacaʼ. Galán guni ca ancianu pa chinándacaʼ ejemplu stibe ra guni tratarcaʼ ca hermanu né guendarannaxhii (biindaʼ 1 Tesalonicenses 2:7). Gudxi Pablo ca hermanu stiʼ nadxiibe laacaʼ ne laaca nadxii Jehová laacaʼ (2 Cor. 2:4; Efes. 2:4, 5). Biiyabe laacaʼ casi xhamígube ne guleebe tiempu para chuʼbe gaxha de laacaʼ. Bisihuinni Pablo napa confianza ca hermanu ora guniʼné laacabe de ca cosa ni ruchibi laa ne ca cosa ni cadi jneza ni biʼniʼ (2 Cor. 7:5; 1 Tim. 1:15). Qué nicá íquebe ca guendanagana ni nápabe, sínuque jma gucuá íquebe gacanebe ca hermanu.

11. ¿Xiñee bidii Pablo conseju ca hermanu?

¹¹ Guyuu biaje, gupa xidé bidii Pablo conseju ca hermanu stiʼ. Peru qué ñúnibe  ni purtiʼ cadxiichinebe laacaʼ, sínuque bíʼnibe ni purtiʼ dxandíʼ rizaaláʼdxibe laacaʼ ne racaláʼdxibe gacanebe laacaʼ ti cadi gacanacaʼ. Bíʼnibe stipa gudiibe conseju ni cadi gaca nagana para ca hermanu que guiénecaʼ ne biiyabe ximodo guicaacaʼ ni. Guzéʼtenu ti ejemplu, dxi bicaabe ra nuu ca hermanu de Corinto, bidiibe conseju nadipaʼ laacaʼ. Peru despué biseendabe Tito ra nuucaʼ, purtiʼ racaláʼdxibe gánnabe ximodo gucuaacaʼ carta stibe. ¡Nánnanu guizáʼ biéchebe ora gúnnabe gucuaacaʼ conseju stibe! (2 Cor. 7:6, 7).

12. ¿Xi zanda guni ca ancianu para cuʼcaʼ gana ca hermanu sticaʼ?

¹² Ni rizíʼdinu. Zanda chinanda ca ancianu ejemplu stiʼ Pablo ra cueecaʼ tiempu para ca hermanu. Ti modo zanda gúnicabe ni nga chindácabe tempranu ra reunión para güinécabe ca hermanu diidxaʼ. Nuu biaje, né chupa chonna si diidxaʼ maʼ guluʼnu gana ti hermanu (Rom. 1:12; Efes. 5:16). Laaca rinanda ca ancianu ejemplu stiʼ Pablo ora riquiiñecaʼ Biblia para cuʼcaʼ gana ca hermanu ne gábicabe laacaʼ nadxii Jehová laacaʼ. Laaca rusihuinni ca ancianu nadxiicaʼ ca hermanu ora guiníʼnecaʼ laacabe ne guni felicitarcaʼ laacabe. Pa caquiiñeʼ gudii ti ancianu conseju tuuxa la? naquiiñeʼ chinándabe ni ná Biblia. Zábibe laa paraa caquiiñeʼ guni mejorar, peru zúnibe ni né diidxaʼ nadóʼ purtiʼ racaláʼdxibe guicaa hermanu riʼ conseju ni cudiibe laa (Gál. 6:1).

13. ¿Xi zazaaca pa guicá ique xhaataʼ ti ancianu ra ruchee?

¹³ ¿Xiñee nagana ni? Cadi perfectu ca ancianu, nga runi riuu ora rucheecaʼ, cásica guiráʼ binni (Rom. 3:23). Ne nuu ancianu runi stipa para cadi guicá ique ra ruchee, purtiʼ zanda cueeni gana laa. Sti cosa ni raca nagana para laacabe nga gudiicabe cuenta paraa rucheecabe. Ne nuu tu laa riníʼ ique cadi naquiiñeʼ guchaa.

14. Casi ná Filipenses 4:13, pur guca Pablo humilde, ¿ximodo gucané ni laa para gudxiilú ca cosa ni cadi jneza ni biʼniʼ?

¹⁴ Ejemplu stiʼ Pablo. Gúcabe humilde ne guniʼbe qué zanda gudxiilube ca cosa ni raca nagana para laabe stúbibe. Gúnnabe caquiiñebe stipa stiʼ Dios. Ante gácabe apóstol, guzanándabe ca xpinni Cristu. Peru gudiʼdiʼ si tiempu bidiibe cuenta cadi jneza ngue ni bíʼnibe ne guyuube dispuestu guchaabe modo laabe ne modo riníʼ íquebe (1 Tim. 1:12-16). Gucané Jehová laabe para gácabe ti pastor nachaʼhuiʼ, humilde ne ni riá binni.  Biuubaʼ ladxidoʼbe pur ca cosa ni cadi jneza ni bíʼnibe, peru gúpabe confianza maʼ biʼniʼ perdonar Jehová laabe ne maʼ qué niníʼ íquerube ca cosa ni bíʼnibe (Rom. 7:21-25). Gúnnabe cadi perfectu laabe, ngue runi bíʼnibe stipa gápabe ca cualidad ni naquiiñeʼ gapa ca xpinni Cristu. Ne cumu gúcabe humilde la? bidiibe lugar gacané Jehová laabe para ganda gúnibe xhiiñaʼ (1 Cor. 9:27; biindaʼ Filipenses 4:13).

15. ¿Xi naquiiñeʼ guni ti ancianu para guʼyaʼ ximodo laa?

¹⁵ Ni rizí’dinu. Cadi pur perfectu ca hermanu riʼ nga raca nombrarcaʼ ancianu, peru ribeza Jehová gudiicabe cuenta paraa rucheecabe ne gúnicabe stipa gusihuínnicabe cualidad stiʼ ca xpinni Cristu (Efes. 4:23, 24). Naquiiñeʼ iquiiñecabe Stiidxaʼ Dios para guiníʼ íquecabe ximodo laacabe ne guchaacabe pa caquiiñeʼ gúnicabe ni. Pa gúnicabe ni, zacané Jehová laacabe gúnicabe xhiiñacabe jneza ne ziuucabe nayecheʼ (Sant. 1:25).

16. ¿Xi zándaca guizaaca pa puru si ra cuchee ca hermanu guʼyaʼ ca ancianu?

¹⁶ ¿Xiñee nagana ni? Zándaca ora guniné ca ancianu ca dxiiñaʼ tuuxa hermanu, gúʼyacaʼ paraa rucheebe. Pa qué gápacabe cuidadu, zándaca guidxiichicabe ne guni criticárcabe hermanu ca. Gudxi Pablo ca xpinni Cristu nga peʼ nga ni racalaʼdxiʼ Binidxabaʼ gúnicabe (2 Cor. 2:10, 11).

17. ¿Ximodo biiyaʼ Pablo ca hermanu?

¹⁷ Ejemplu stiʼ Pablo. Siempre biiyaʼ Pablo ca cualidad galán ni napa ca hermanu. Gúnnabe laaca rucheecaʼ purtiʼ guyuu biaje dede guyuube xizaa pur laani, laaca gúnnabe neca guchee tuuxa, qué riníʼ diʼ ni malu laa. Gunnaxhiibe ca hermanu ne biiyabe ca cualidad galán ni nápacaʼ. Ne ora bíʼyabe tuuxa cayaca nagana para laa guni ni jneza, gucanebe laa purtiʼ guníʼ íquebe racalaʼdxiʼ guni ni jneza.

18. Pur modo gucané Pablo Evodia ne Síntique, ¿xi rusiidiʼ ni laanu? (Filipenses 4:1-3).

¹⁸ Guidúʼyanu ximodo gucané Pablo chupa hermana de congregación de Filipo (biindaʼ Filipenses 4:1-3). Zándaca qué ñaca llevar Evodia ne Síntique purtiʼ gúpacaʼ guendanagana. Qué ñaca Pablo naduxhuʼ né laacabe ne qué ñuni criticar laacabe. Ni bíʼyabe nga ca cualidad stiʼ ca hermana riʼ ne purtiʼ qué huasaanacaʼ Jehová. Gúnnabe nadxii Jehová ca hermana que, cumu biiyabe zanda guchaacaʼ la? guluube gana laacaʼ guni chaahuicaʼ ca guendanagana nápacaʼ. Cumu biiyaʼ Pablo ca cualidad galán napa ca hermanu, gucané ni laa chuʼ nayecheʼ ne gapa xhamigu ndaaniʼ congregación que.

19. a) ¿Xi zanda guni ca ancianu para gúʼyacaʼ ca cualidad galán napa ca hermanu? b) ¿Xi riziidiluʼ de foto ra rihuinni ti ancianu ni cusiá ra Yoo stiʼ Reinu?

 ¹⁹ Ni rizíʼdinu. Ancianu caʼ, laguuyaʼ ca cualidad galán napa ca hermanu. Dxandíʼ nga binni ruchee laacabe, peru laaca rusihuínnicabe cualidad galán (Filip. 2:3). Nuu biaje napa xidé gudiitu conseju tuuxa, peru cásica biʼniʼ Pablo lagapa cuidadu ni guiniʼtu ne ni gúnitu, purtiʼ zándaca guchiichi ni ca hermanu. Laguiníʼ ique nadxii hermanu ca Jehová, cayuni xhiiñabe de guidubi ladxidóʼ ne zanda guchaa. Ora ruuyaʼ ca ancianu ca cualidad galán napa ca hermanu, racanecaʼ para gannaxhiisaa ca hermanu de congregación ne riuucaʼ tobi si.

20. ¿Xi zanda guni ca ancianu para guiziidirucaʼ de ejemplu stiʼ Pablo?

²⁰ Pa guni estudiar ca ancianu ejemplu stiʼ Pablo, guizáʼ zacané ni laacaʼ. Zanda guidxélanu stale información lu ca publicación stinu ni caníʼ de Pablo. Guzéʼtenu ti ejemplu, zanda guidúʼndanu libru Testimonio cabal del Reino de Dios capítulo 12 párrafo 17 hasta 19 ne capítulo 21 párrafo 6, 7, ne ra gúʼndaluʼ ca publicación ni caníʼ de Pablo zanda guiníʼ íqueluʼ: «¿Ximodo zanda gacané ejemplu stiʼ Pablo naa guneʼ dxiiñaʼ de ancianu né guendanayecheʼ?».

21. ¿Xi naquiiñeʼ ganna ca ancianu?

²¹ Ancianu caʼ, qué ribeza diʼ Jehová gácatu perfectu, ni ribézabe nga cadi gusaanatu laabe ne gúnitu xhiiñatu jneza (1 Cor. 4:2). Bisisaca Jehová guiráʼ dxiiñaʼ biʼniʼ Pablo ne pur qué nusaanaʼ laabe. Naquiiñeʼ gánnatu laaca rusisaca Jehová dxiiñaʼ ni rúnitu, purtiʼ sicaríʼ nabe lu Hebreos 6:10: «Qué zusiaandaʼ guiráʼ ni maʼ bíʼnitu pur ca hermanu, ne dede yanna cayúnirutu ni purtiʼ rusihuínnitu nadxiitu nombre stibe».